ཤེར་ཕྱིན་སྐབས་དགེ་འདུན་ཉི་ཤུའི་ཟུར་བཀོལ།

Previous Text Back to Volume Page Next Text

Wylie title	sher phyin skabs dge 'dun nyi shu'i zur bkol
Location	dpal sprul bka' 'bum Volume 3, Text 3, Pages 741-745 (Folios 1a1 to 3a2)
Author	དཔལ་སྤྲུལ་རིན་པོ་ཆེ་
Less details More details
Citation	Dpal sprul rin po che. Sher phyin skabs dge 'dun nyi shu'i zur bkol. In Dpal sprul 'jigs med chos kyi dbang po'i gsung 'bum, Vol. 3: 741-745. Kathmandu: Tsadra Foundation and Shechen Publications, 2026.
Genre	Detailed Classification - rnam bzhag

[edit]

༄༅། །ཤེར་ཕྱིན་སྐབས་དགེ་འདུན་ཉི་ཤུའི་ཟུར་བཀོལ་བཞུགས་སོ། །

༄༅། །མཚོན་བྱ་དོན་གྱི་དགེ་འདུན་ཐེག་པ་ཆེན་པོའི་དགེ་འདུན་ཉི་ཤུ་ནི། དང་པོ་རྒྱུན་ཞུགས་ཞུགས་པ་ལ་དབང་རྟུལ་དད་པའི་རྗེས་འབྲང་དང་དབང་རྣོན་ཆོས་ཀྱི་རྗེས་འབྲང་གཉིས་རྒྱུན་ཞུགས་འབྲས་གནས་ལ་ཙམ་པོ་པ་དང་ཁྱད་པར་བ་གཉིས་ལས་ཕྱི་མ་ལ་ལྷའི་རིགས་ནས་རིགས་སྐྱེ་དང་། མིའི་རིགས་ནས་རིགས་སྐྱེ་གཉིས་ཏེ། རྒྱུན་ཞུགས་ལྔ། ཕྱིར་འོང་ཞུགས་པ་ལ་དད་པས་མོས་པ་དང་། མཐོང་བས་ཐོབ་པ་གཉིས། དང་པོ་འདི་གཉིས་གཅིག་ཏུ་བརྩིས་པའི་གཅིག་འབྲས་གནས་ལ་ཙམ་ཁྱད་གཉིས་དང་ཕྱིར་འོང་གསུམ། ཕྱིར་མི་འོང་ཞུགས་པ་ལ་གཅིག །གནས་པ་ལ། བར་མ་དོར་འདའ་བ། སྐྱེས་འདའ་བ། མངོན་པར་འདུ་བྱེད་བཅས། བྱེད་མེད་བཞི། གོང་འཕོ་ལ་གཉིས་ལས། འོག་མིན་མཐར་ཐུག་འགྲོ་བ་ལ་འཕར་བ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་དང་གསུམ། སྲིད་རྩེ་མཐར་ཐུག་འགྲོ་བ་ནི། མཐོང་ཆོས་ལ་ཞི་བ་དང་། ཏིང་ངེ་འཛིན་ལུས་ཀྱི་མངོན་དུ་བྱེད་པ་གཉིས་ཏེ་ཁྱོན་དགུ། དགྲ་བཅོམ་ཞུགས་པ། བསེ་རུ་ལྟ་བུ་དང་ཉི་ཤུའོ། །༢དགེ་འདུན་ཉི་ཤུ་ལ་སྤྱིར་བཞེད་པ་མང་ཡང་། སློབ་དཔོན་ཤཱནྟཱི་བ་དང་། བུདྡྷ་ཤྲཱི་ནི་དངོས་བསྟན་ཉི་ཤུ་པོ་བཞེད་དེ། དབང་པོ་རྟུལ་དང་རྣོན་པོ་དང་མཐོང་ཐོབ་བཞི། རིགས་སྐྱེ་གཉིས་དང་དྲུག །བར་ཆད་གཅིག་པ་དང་བདུན། བར་དོར་འདའ་དང་བརྒྱད། སྐྱེས་འདའ་དང་དགུ། བྱེད།༡༠ བྱེད་མིན།༡༡ འོག་མིན་འགྲོ།༡༢ འཕར་གསུམ་དང་བཅོ་ལྔ། སྲིད་རྩེར་འགྲོ།༡༦ གཟུགས་ཀྱི་ཆགས་བཅོམ།༡༧ མཐོང་ཆོས་ལ་ཞི།༡༨ ལུས་མངོན་བྱེད།༡༩ བསེ་རུ་དང་ཉི་ཤུའོ། །འཕགས་པའི་བཞེད་པ་ལ་སྔ་རབ་པ་དག་དངོས་བསྟན་བཅུ་དྲུག་དང་། བཞི་སྣོན་པར་བཞེད་དེ་འོག་མིན་འགྲོ། འཕར་གསུམ་སྲིད་རྩེར་འགྲོ་ལྔ་གོང་འཕོ་ཞེས་གཅིག་ཏུ་བརྩིས་ནས། བརྒྱད་པ་འབྲས་གནས་བར་པ་གཉིས་དགྲ་བཅོམ་ཞུགས་པ་བསྣན་ནས་ཉི་ཤུའོ། །རྗེའི་བཞེད་པ་ལ། དབང་པོ་རྟུལ་དང་རྣོན་པོ་ཞེས་པས་བརྒྱད་པ་དང་ཆགས་བྲལ་སྔོན་སོང་གི་ཞུགས་པ་གཉིས་ཏེ་གསུམ་བསྟན་དད་མོས་མཐོང་ཐོབ་ཞེས་པས་ཆགས་བྲལ་སྔོན་སོང་གི་འབྲས་གནས་གཉིས་བསྟན་ཏེ་དེ་ལྟར་ལྔ། རིགས་ནས་རིགས་སྐྱེ་གཉིས་དང་།༧ བར་ཆད་གཅིག་པ་དང་།༨ བར་དོར་སྐྱེས་ནས་བྱེད་བྱེད་མིན། འོག་མིན་འགྲོ་གསུམ་སྲིད་རྩེར་འགྲོ། གཟུགས་ཀྱི་ཆགས་བཅོམ། མཐོང་ཆོས་ལ་ཞི་ལུས་མངོན་བྱེད་དེ་ཕྱིར་མི་འོང་།༡༡ བསེ་རུ་དང་ཉི་ཤུ་འཕགས་པའི་དགོངས་པར་བཞེད། སློབ་དཔོན་སེང་གེ་བཟང་པོས་དངོས་བསྟན་བཅུ་བདུན་དང་གསུམ་སྣོན་པར་བཞེད་དེ། བརྒྱད་པ་ལ་དབང་པོ་རྣོ་བརྟུལ་གཉིས། དད་དང་མཐོང་ཐོབ་ཅེས་པའི་ཕྱིར་འོང་མི་འོང་ཞུགས་པ་གཉིས་རིགས་སྐྱེ་གཉིས། བར་ཆད་གཅིག་པ། སྐྱེས་ནས། བྱེད། བྱེད་མིན། འོག་མིན། འོག་མིན་འགྲོ་གསུམ། གཟུགས་ཀྱི་ཆགས་པ་བཅོམ་ནས་སྲིད་རྩེར་འགྲོ་བ་ལ་མཐོང་ཆོས་ལ་ཞི་ལུས་མངོན་བྱེད་གཉིས་ཏེ་དངོས་བསྟན་བཅུ་བདུན། རྒྱུན་ཞུགས་དང་ཕྱིར་འོང་འབྲས་གནས་ཙམ་པོ་པ་གཉིས། དགྲ་བཅོམ་ཞུགས་པ་བསྣན་ནས་ཉི་ཤུར་བཞེད་དེ་དེ་ཡང་། རྒྱུན་ཞུགས་ལྔ། ཕྱིར་འོང་གསུམ། མི་འོང་བཅུ། དགྲ་བཅོམ་ཞུགས་པ། བསེ་རུ་དང་ཉི་ཤུའོ།། །།