ཡོན་ཏན་མཛོད་ཀྱི་འཆད་ཐབས་ཡིད་ཀྱི་མེ་ལོང་།

Previous Text Back to Volume Page Next Text

Wylie title	yon tan mdzod kyi 'chad thabs yid kyi me long
Location	dpal sprul bka' 'bum Volume 2, Text 10, Pages 273-277 (Folios 1a1 to 3a5)
Author	དཔལ་སྤྲུལ་རིན་པོ་ཆེ་
Less details More details
Source Author(s)	འཇིགས་མེད་གླིང་པ་ ('jigs med gling pa)
Citation	Dpal sprul rin po che. Yon tan mdzod kyi 'chad thabs yid kyi me long. In Dpal sprul 'jigs med chos kyi dbang po'i gsung 'bum, Vol. 2: 273-277. Kathmandu: Tsadra Foundation and Shechen Publications, 2026.
Genre	Teaching Methods - 'chad thabs
Colophon	དཔལ་སྤྲུལ་གྱིས་གསུངས་སོ། །
Colophon	dpal sprul gyis gsungs so/

[edit]

༄༅། །ཡོན་ཏན་མཛོད་ཀྱི་འཆད་ཐབས་ཡིད་ཀྱི་མེ་ལོང་བཞུགས། །

༄༅། །ཉན་པོ་སྣོད་དུ་རུང་བའི་ཆོས་ལ། མཛད་པ་པོ་སློབ་དཔོན་གྱི་ཆེ་བ། དེའི་མཛད་པའི་ཆོས་ཀྱི་ཆེ་བ། ཆེ་བ་དེ་ལྟ་བུ་དང་ལྡན་པའི་ཆོས་བཤད་ཅིང་ཉན་པའི་ཚུལ་དང་གསུམ་ལས། དང་པོ་ནི། བདེ་བར་གཤེགས་པའི་བསྟན་པ་ལ་གུས་པས་ལེགས་པར་འཛིན་པ། ཐོས་བསམ་རྟོག་གེའི་ཤེས་རབ་ཀྱིས་སྦྱང་བརྩོན་མ་མཛད་ཀྱང་ཆོས་ཉིད་ཇི་ལྟ་བའི་ཡེ་ཤེས་དོན་དམ་པའི་གནས་ལུགས་རྫོགས་པ་ཆེན་པོ་ཆོས་ཉིད་མངོན་སུམ་དུ་གཟིགས་པའི་རྩལ་ལས་ཆོས་ཅན་ཤེས་བྱའི་གནས་ཚུལ་ཇི་སྙེད་མཁྱེན་པའི་ཡེ་ཤེས་བསྒོམ་བྱུང་གི་ཤེས་རབ་ཀློང་རྡོལ་ཏེ་ཆོས་རབ་ཏུ་རྣམ་པར་འབྱེད་པའི་ཤེས་རབ་ལ་མངའ་དབང་འབྱོར་ཞིང་། རྗེས་ཐོབ་སྙིང་རྗེ་ཆེན་པོས་རང་གཞན་གྱི་དོན་ལ་བརྩོན་པའི་གོ་ཆ་བགོས་པ་རྫོགས་པ་ཆེན་པོ་རང་བྱུང་རྡོ་རྗེའམ་རིག་འཛིན་འཇིགས་མེད་གླིང་པ་ཞེས་བྱའོ། །ཆོས་ནི་ཐེག་པ་མཐའ་དག་གི་སོགས་ཐེག་པ་ཆེན་པོའི་མན་ངག་གི་བསྟན་བཅོས་ཡོན་ཏན་རིན་པོ་ཆེའི་མཛོད་ཅེས་བྱ་བ་ཡིན་ནོ། །ཆིངས་ཆེན་པོ་ལྔ་ལས། དང་པོ་དགོས་པ་ནི། ཡོན་ཏན་རིན་པོ་ཆེའི་མཛོད་ལེའུ་བཅུ་གསུམ་གྱི་བདག་ཉིད་ཉེ་བར་བཀོད་པ་ལས། སྐལ་པ་དང་ལྡན་པའི་གང་ཟག་གིས་ཐོས་པ་དང་བསམ་པ་དང་བསྒོམ་པས་བདེ་བླག་ཏུ་རྟོགས་ཏེ་ཞུགས་པས། གནས་སྐབས་དང་མཐར་ཐུག་གི་དོན་གཉིས་འགྲུབ་པའི་ཐབས་དམ་པར་གྱུར་པ་ནི་འདིའི་དགོས་པའོ། །བསྡུས་པའི་དོན་ནི། ལམ་ལ་འཇུག་པའི་རྒྱུ་དང་། ལམ་དངོས་དང་། མཐར་ཐུག་གི་འབྲས་བུ་གསུམ་དུ་འདུ་ཞིང་། ཚིག་གི་དོན་ནི། གཞུང་རྒྱ་ཆེར་བཤད་པའི་སྐབས་བཞིན་ལ། སྔ་ཕྱི་འབྲེལ་བའི་མཚམས་སྦྱོར་ནི། ལེའུ་དང་པོས་དལ་འབྱོར་གྱི་རང་བཞིན་རྙེད་པར་དཀའ་བའི་རྒྱུ་མཚན་བཤད་དེ་ཆོས་ལ་འཇུག་པའི་རྒྱུ་བྱེད་ཅིང་། ལེའུ་གཉིས་པས་དེ་ལྟ་བུའི་དལ་འབྱོར་དེ་ཡང་མི་རྟག་པའི་རང་བཞིན་དུ་བསྟན་པས་ཆོས་ལ་མྱུར་དུ་འཇུག་ཅིང་བརྩོན་འགྲུས་ཀྱི་ཕྱི་བཤོལ་དུ་མི་ལུས། ལེའུ་གསུམ་པས་དེ་ལྟར་མི་རྟག་པར་གྱུར་ནས་ཀྱང་སྲིད་པ་ཕྱི་མར་དཀར་ནག་གི་ལས་འབའ་ཞིག་གི་རྗེས་སུ་འབྲང་དགོས་པའི་ལས་འབྲས་ཀྱི་འདོར་ལེན་བཤད། དེ་ལྟར་དགེ་སྡིག་གི་འབྲས་བུ་རིགས་དྲུག་གི་གནས་ཡིན་པས་ལེའུ་བཞི་པས་འཁོར་བའི་སྡུག་བསྔལ་བསྟན། དེ་ལྟར་འཁོར་བ་སྡུག་བསྔལ་དུ་ཤེས་ནས་དེ་སྤོངས་པའི་ཐབས་དམ་པའི་ཆོས་ལ་འཇུག་པའི་སྒོ་འཁོར་ལོ་ཆེན་པོ་བཞིའི་ཚོམ་ལེའུ་ལྔ་པས་བཤད། དེ་ལྟར་འཁོར་ལོ་ཆེན་པོ་བཞིའི་རང་བཞིན་ངེས་པར་ཚང་བའི་སྐྱེས་བུ་དེ་བསྟན་པ་ལ་འཇུག་པའི་གཞི་རྟེན་སྐྱབས་འགྲོ་ཡིན་པས་ལེའུ་དྲུག་པས་སྟོན། སྐྱབས་སུ་སོང་ནས་ཐེག་པ་ཆེན་པོའི་ལམ་ལ་འཇུག་པའི་ཐོག་མར་ཚད་མེད་བཞིའི་རང་བཞིན་ལེའུ་བདུན་པས་སྟོན། དེ་ལྟར་ཚད་མེད་བཞིས་བློ་སྦྱངས་པས་བྱང་ཆུབ་ཀྱི་སེམས་རང་ཤུགས་ཀྱིས་སྐྱེ་ཞིང་རྒྱུད་ལས་སུ་རུང་བར་བྱས་ནས་སེམས་བསྐྱེད་པ་དངོས་ལེའུ་བརྒྱད་པས་སྟོན། དེ་ལྟར་སེམས་བསྐྱེད་ནས་དེའང་བསླབ་བྱ་ལེགས་པར་བསླབ་པ་ལ་བརྟེན་ནས་མི་ཉམས་པར་བཟུང་དགོས་པས་ལེའུ་དགུ་པ་སྨོན་འཇུག་གི་བསླབ་བྱ་སྟོན། དེ་ལྟར་སེམས་བསྐྱེད་པའི་གང་ཟག་དེ་ངང་གིས་བློ་ཆེན་པོར་གྱུར་པས་ཆོས་ཟབ་མོའི་སྣོད་རུང་དུ་བྱས་ནས་ལམ་བདེ་མྱུར་དང་ལྡན་པས་གསང་སྔགས་རྡོ་རྗེ་ཐེག་པའི་ལམ་དུ་འཇུག་རུང་བ་ཡིན་པས་དེ་སྟོན་ཕྱིར་ལེའུ་བཅུ་པས་གསང་སྔགས་སྤྱིའི་རང་བཞིན་དང་། བཅུ་གཅིག་པ་དང་བཅུ་གཉིས་པས་རྫོགས་པ་ཆེན་པོའི་གཞི་ལམ་གྱི་རྣམ་བཞག་ལེགས་པར་གཏན་ལ་ཕབས་ཏེ་དབང་རྣོན་ཚེ་གཅིག་གིས་གྲོལ་བའི་ལམ་བཟང་རྫོགས་པར་བསྟན་ནས་ལེའུ་བཅུ་གསུམ་པས་དེ་ལྟར་ལམ་མཐར་ཕྱིན་པའི་འབྲས་བུ་མཐར་ཐུག་པ་ལེགས་པར་བསྟན་པ་ཡིན་ནོ། །བརྒལ་ལན་གྱི་སྒོ་ནས་བཤད་པ་ནི་གཞུང་རྒྱ་ཆེར་བཀྲོལ་སྐབས་ཉིད་དུ་ཕྱོགས་སྔ་མའི་རྩོད་པའི་རིགས་སུ་གཏོགས་པ་རྣམས་ལུང་རིག་གཏན་ཚིགས་ཀྱི་སྒོ་ནས་ལེགས་པར་སྤངས་ཏེ་འཆད་པར་འགྱུར་བ་ལས་ཤེས་པར་འགྱུར་རོ། །དཔལ་སྤྲུལ་གྱིས་གསུངས་སོ། །