JKW-KABUM-23- A-003-006-wylie
bdag med rnam gnyis las brtsams pa'i gdams pa bdud rtsi'i zegs ma/__ bdag med rnam gnyis las brtsams pa'i gdams pa mdor bsdus bdud rtsi'i zeg ma zhes bya ba/__shes dang shes bya ro gcig par/__/thugs su chud pa'i rgyal ba'i sras/__/gzhan phan pha mtha' yas pa yis/__/khyed la shis pa sbyin gyur cig__/byang chub mchog la rab dmigs nas/__/srid las ji ltar thar 'gyur zhes/__/nges 'byung blo 'di thog ma nas/__/'bad pas bskyed par bya ba nyid/__/de tshe srid pa'i rtsa ba ni/__/gang yin legs par nges byas te/__/de nyid gcod pa'i rig pa las/__/bsten goms bya zhes mkhas rnams gsungs/__/'di ni gcig tu 'thad pa ste/__/ji ltar srog 'phrog dug sogs kyi/__/rtsa ba drungs nas ma phyung na/__/myu gu bcad kyang slar la skye/__/de bas khams gsum yid can kun/__/'jigs tshogs lta dang mtshungs ldan pa'i/__/bdag tu 'dzin pa la brten nas/__/pha mtha' mi mngon 'khor bar 'khyams/__/de la thabs kyi phyogs gzhan gyis/__/dngos su gnod pa nus min te/__/gang dang 'dzin stangs 'gal ba yi/__/bdag med rtogs pa'i shes rab brten/__/'di ltar phung po tshogs tsam la/__/bsten pa'i ngar 'dzin lhan skyes dang /__/gzhan sdes gsar du btags pa yi/__/bdag de rig pas rnam dpyad na/__/bem shes ldan min 'du byed de/__/rnam pa gsum las 'da' ba med/__/de dag kyang ni rdul phran dang /__/skad cig bar du bsil byas nas/__/phyogs dang dus kyi cha shas kyi/__/nges pas legs par brtags pa na/__/gdags gzhi nyid kyang ma grub phyir/__/gdags pa ji ltar 'grub par 'gyur/__/'o na mngon sum snang ba 'di/__/ji ltar zhe na thog med nas/__/'khrul pa'i gnyid kyis bslad pa yi/__/rdzun pa'i ri mo tsam du nges/__/gal te yul nyid bden min yang /__/de 'dzin shes pa bden ce na/__/rmi lam snang dang shes pa bzhin/__/gang bden gang ni 'khrul par 'gyur/__/mdor na snang tsam mi 'gog kyang /__/bden zhen blo ni dgag bya nyid/__/mthar thug gnyis ka ma dmigs phyir/__/blo yi yul las shin tu grol/__/e ma rten cing 'brel 'byung gi__/rkyen las skyes phyir de ma skyes/__/'on tang 'gags pa'ang ma mchis pa'i/__/zung 'jug tshul 'di rtogs par mdzod/__/de ltar gnas dang snang tshul gyi/__/nges pas mtha' gnyis mun bsal te/__/bsod nams ye shes tshogs zung gis/__/glo bur dri ma bsal la brtson/__/blo gros mchog tu gyur pa na/__/da gzod dpyad pas mi mtshon pa'i/__/lhan cig skyes pa'i phyag rgya che/__/rdo rje sngags kyi mthu yis bskyed/__/gang gi shes rab zab mo dang /__/thabs kyi khyad par mi phyed pas/__/tshe gcig kho nas zung 'jug gi__/go 'phang mngon du brnyes gyur cig__/ces pa'ang thub bstan rdo rje brag gi chos mdzad sa man+tas ched du bskul ba bzhin rnal 'byor 'jigs pa med pa'i sdes o rgyan smin grol gling gi chos grwar gdams pa dge legs su gyur cig__/sarba dA ka l+yA NaM b+ha ba tu//___//___!_
