ཕྱོགས་དུས་རྒྱལ་བ་སོགས་ཀྱི་དབུ་ཅན།

🚧 This website is under continued development. We appreciate your patience!

Previous Text Back to Volume PageNext Text

Wylie title	phyogs dus rgyal ba sogs kyi dbu can
Location	mkhyen brtse'i bka' 'bum Volume 23, sde tshan 3, Text 14, Pages 219-221 (Folios 14b6 to 15a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phyogs dus rgyal ba sogs kyi dbu can. In 'jam dbyangs mkhyen brtse'i dbang po'i bka' 'bum, Vol. 23: 219-221. Khams sde dge rdzong sar dgon: Rdzong sar blo gros phun tshogs, 2020.
Genre	Advice - zhal gdams
Colophon	།ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་གདམས་སྨོན་ལམ་གྱི་ཚུལ་དུ་བྲིས་པ་དོན་དང་ལྡན་པར་གྱུར་ཅིག །མངྒ་ལཾ།
	ces pa'ang 'jam dbyangs bla ma dgyes pa'i 'bangs mkhyen brtse'i dbang pos zhal gdams smon lam gyi tshul du bris pa don dang ldan par gyur cig__/mang+ga laM/

Tibetan Text

Wylie

[edit]

ཕྱོགས་དུས་རྒྱལ་བ་སྲས་བཅས་སྐུ་གསུང་ཐུགས། །ཡོན་ཏན་ཕྲིན་ལས་མ་ལུས་འདུས་པའི་དངོས། །དྲན་པས་གདུང་སེལ་དཔལ་ལྡན་བླ་མ་ལ། །མི་ཕྱེད་སྒོ་གསུམ་གུས་པས་ཕྱག་འཚལ་ལོ། །གསོལ་བ་འདེབས་སོ་དྲིན་ཅན་ཆོས་ཀྱི་རྗེ། །བྱིན་གྱིས་རློབས་ཤིག་རྩ་བརྒྱུད་བླ་མའི་ཚོགས། །དངོས་གྲུབ་སྩོལ་ཅིག་དམ་ཅན་རྒྱ་མཚོའི་ཚོགས། །སྙིང་ནས་དྲན་ནོ་ཐུགས་རྗེའི་སྤྱན་གྱིས་གཟིགས། །དལ་འབྱོར་རྙེད་དཀའ་ནམ་འཆི་ངེས་མེད་དང་། །འཁོར་བའི་སྡུག་བསྔལ་དྲན་པའི་ངེས་འབྱུང་གིས། །ལས་འབྲས་བླང་དོར་ཚུལ་བཞིན་བརྩོན་པ་དང་། །བྱང་ཆུབ་སེམས་གཉིས་འབྱོང་བར་བྱིན་གྱིས་རློབས། །དབང་གིས་རྒྱུད་སྨིན་དམ་ཚིག་རྣམ་པར་དག །བསྐྱེད་པའི་རིམ་པས་ཅིར་སྣང་ལྷ་སྐུར་ཤར། །རྫོགས་རིམ་ཟབ་མོས་རླུང་སེམས་དབུ་མར་ཐིམ། །བདེ་ཆེན་ཡེ་ཤེས་འགྲུབ་པར་བྱིན་གྱིས་རློབས། །ཀ༷་ད༷ག་ཁྲེགས་ཆོད་གནས་ལུགས་མངོན་དུ་གྱུར། །ལྷུན་གྲུབ་ཐོད་རྒལ་རིག་པ་ཚད་ལ་ཕེབས། །ཟུང་འཇུག་ཁྱད་ཆོས་དྲུག་ལྡན་གཉུག་མའི་ཀློང་། །གདོད་མའི་གཏན་སྲིད་ཟིན་པར༴ གཟུང་འཛིན་སྤྲོས་བྲལ་དབུ་མ་ཆེན་པོའི་གཞི༷། །རང་བྱུང་རིག་པ་ཕྱག་རྒྱ་ཆེན་པོའི་ལ༷མ། །དབྱིངས་རིག་དབྱེར་མེད་འོད་གསལ་རྫོགས་པ་ཆེའི། །འབྲ༷ས་བུ༷་མངོན་དུ་འགྱུར་བར༴ བསམ་གྱིས་མི་ཁྱབ་ལྟ༷་བ༷འི་གནས་ལུགས་མཐོང་། །དེ་ཉིད་ངང་གཞག་སྒོམ་པའི་རྩལ་ཆེན་རྫོགས། །ཤར་གྲོལ་དུས་མཉམ་སྤྱོད༷་པ༷་མཐར་ཕྱིན་ནས། །འཁོར་འདས་སྤང་བླང་བྲལ་བར༴ ངོ༷་བོ༷་ཆོ༷ས་སྐུའི་དབྱིངས་ལས་མ་གཡོས་བཞིན། །ར༷ང་བཞི༷ན་ལོངས་སྤྱོད་རྫོགས་སྐུའི་ཡེ་ཤེས་དང་། །ཐུ༷གས་རྗེ༷་སྤྲུལ་པའི་རྣམ་འཕྲུལ་བསམ་ཡས་ཀྱིས། །རང་གཞན་དོན་གཉིས་འགྲུབ་པར་བྱིན༴ གཞན་ཡང་གནས་སྐབས་ཆོས་བཞིན་སྤྱོད་པ་ལ། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །མཐུན་རྐྱེན་མ་ལུས་ཕུན་སུམ་ཚོགས་པ་ཡིས། །དགེ་མཚན་སྣང་བ་རྒྱས་པའི་བཀྲ་ཤིས་ཤོག །ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་གདམས་སྨོན་ལམ་གྱི་ཚུལ་དུ་བྲིས་པ་དོན་དང་ལྡན་པར་གྱུར་ཅིག །མངྒ་ལཾ། ། ༈

[edit]

phyogs dus rgyal ba sogs kyi dbu can/__ phyogs dus rgyal ba sras bcas sku gsung thugs/__/yon tan phrin las ma lus 'dus pa'i dngos/__/dran pas gdung sel dpal ldan bla ma la/__/mi phyed sgo gsum gus pas phyag 'tshal lo/__/gsol ba 'debs so drin can chos kyi rje/__/byin gyis rlobs shig rtsa brgyud bla ma'i tshogs/__/dngos grub stsol cig dam can rgya mtsho'i tshogs/__/snying nas dran no thugs rje'i spyan gyis gzigs/__/dal 'byor rnyed dka' nam 'chi nges med dang /__/'khor ba'i sdug bsngal dran pa'i nges 'byung gis/__/las 'bras blang dor tshul bzhin brtson pa dang /__/byang chub sems gnyis 'byong bar byin gyis rlobs/__/dbang gis rgyud smin dam tshig rnam par dag__/bskyed pa'i rim pas cir snang lha skur shar/__/rdzogs rim zab mos rlung sems dbu mar thim/__/bde chen ye shes 'grub par byin gyis rlobs/__/kaX daXg khregs chod gnas lugs mngon du gyur/__/lhun grub thod rgal rig pa tshad la phebs/__/zung 'jug khyad chos drug ldan gnyug ma'i klong /__/gdod ma'i gtan srid zin par=__gzung 'dzin spros bral dbu ma chen po'i gzhiX/__/rang byung rig pa phyag rgya chen po'i laXm/__/dbyings rig dbyer med 'od gsal rdzogs pa che'i/__/'braXs buX mngon du 'gyur bar=__bsam gyis mi khyab ltaX baX'i gnas lugs mthong /__/de nyid ngang gzhag sgom pa'i rtsal chen rdzogs/_/shar grol dus mnyam spyodaX paX mthar phyin nas/__/'khor 'das spang blang bral bar=__ngoX boX choXs sku'i dbyings las ma g.yos bzhin/__/raXng bzhiXn longs spyod rdzogs sku'i ye shes dang /__/thuXgs rjeX sprul pa'i rnam 'phrul bsam yas kyis/__/rang gzhan don gnyis 'grub par byin=__gzhan yang gnas skabs chos bzhin spyod pa la/__/phyi nang gsang ba'i 'gal rkyen kun zhi zhing /__/mthun rkyen ma lus phun sum tshogs pa yis/__/dge mtshan snang ba rgyas pa'i bkra shis shog__/ces pa'ang 'jam dbyangs bla ma dgyes pa'i 'bangs mkhyen brtse'i dbang pos zhal gdams smon lam gyi tshul du bris pa don dang ldan par gyur cig__/mang+ga laM/___/__!_