JKW-KABUM-23-'A-001-068

Previous Text Back to Volume PageNext Text

དཔལ་ལྡན་བླ་མར་གསོལ་འདེབས་ཀྱི་གླུ་དད་པའི་ཕོ་ཉ།

Wylie title	dpal ldan bla mar gsol 'debs kyi glu dad pa'i pho nya
Location	mkhyen brtse'i bka' 'bum Volume 23, sde tshan 1, Text 68, Pages 131-133 (Folios 66a4 to 67a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal ldan bla mar gsol 'debs kyi glu dad pa'i pho nya. In 'jam dbyangs mkhyen brtse'i dbang po'i bka' 'bum, Vol. 23: 131-133. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཅེས་པ་འདིའང་གཞོན་ནུ་འཇིགས་པ་མེད་པའི་བློ་གྲོས་ཀྱི་ཆུ་གཏེར་ལས་གང་ཤར་གྱི་རྟོག་པ་གླུར་བླངས་པའི་འཆར་གཞིའོ།
	ces pa 'di'ang gzhon nu 'jigs pa med pa'i blo gros kyi chu gter las gang shar gyi rtog pa glur blangs pa'i 'char gzhi'o

Tibetan Text

Wylie

[edit]

དཔལ་ལྡན་བླ་མ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་དད་པའི་ཕོ་ཉ་ཞེས་བྱ་བ། ན་མོ་གུ་རུ་བྷྱཿ རྡོ་རྗེ་ལུས་གྱི་རྩ་ཁམས་ཇི་སྙེད་ཀྱི་རྒྱུ་བ། །འོད་གསལ་ཨ་བ་དྷཱུ་ཏིའི་འཁྲི་ཤིང་ལ་རེག་པས། །གདན་གསུམ་སྒྱུ་འཕྲུལ་དྲྭ་བའི་རྣམ་རོལ་ཏུ་ཤར་བའི། །དཔལ་ལྡན་བླ་མ་སྐུ་ཡི་རྡོ་རྗེ་ལ་འདུད་དོ། །ཕུང་ཁམས་ལྷ་སྐུར་དག་པར་བྱིན་གྱིས་རང་རློབས་ཤིག །མགྲིན་པ་ལོངས་སྤྱོད་འཁོར་ལོའི་དྲི་བཞོན་གྱི་རྒྱུ་བ། །ཐབས་ཤེས་ཨཱ་ལི་ཀཱ་ལིའི་རོལ་མོ་རུ་ཤར་བས། །ལུང་རྟོགས་ཆོས་ཕུང་རྒྱ་མཚོའི་འབྱུང་གནས་སུ་གྱུར་བའི། །དཔལ་ལྡན་བླ་མ་གསུང་གི་རྡོ་རྗེ་ལ་འདུད་དོ། །སྲོག་རྩོལ་དབུ་མར་ཐིམ་པར་བྱིན་གྱིས་རང་རློབས་ཤིག །དཀར་དམར་ཨ་ཧཾ་ལས་བྱུང་ཐིག་ལེ་ཡི་རྒྱུ་བ། །གཙུག་ཏོར་ནོར་བུའི་གདེངས་ཀར་འཕོ་མེད་དུ་བཅིངས་པས། །བདེ་སྟོང་ཟུང་དུ་འཇུག་པའི་དགའ་སྟོན་ལ་རོལ་པ། །དཔལ་ལྡན་བླ་མ་ཐུགས་ཀྱི་རྡོ་རྗེ་ལ་འདུད་དོ། །འགྱུར་བཅས་ཆོས་ཀུན་ཟད་པར་བྱིན་གྱིས་རང་རློབས་ཤིག །ཐ་མལ་གཟུང་དང་འཛིན་པའི་རྣམ་རྟོག་གི་རྒྱུ་བ། །འོད་གསལ་ལྷན་ཅིག་སྐྱེས་པའི་ཡེ་ཤེས་སུ་ཐིམ་པས། །རྣམ་ཀུན་མཆོག་ལྡན་གནས་ལུགས་མངོན་སུམ་དུ་གཟིགས་པའི། །དཔལ་ལྡན་བླ་མ་ཡེ་ཤེས་རྡོ་རྗེ་ལ་འདུད་དོ། །བརྗོད་བྲལ་ཆོས་སྐུ་རྟོགས་པར་བྱིན་གྱིས་རང་རློབས་ཤིག །སྲིད་ལས་ངེས་པར་འབྱུང་བའི་བདུད་རྩི་ཡི་རེག་པས། །ཐར་པའི་ཕྱོགས་སུ་གྲོལ་བའི་བློ་གྲོས་ཀྱི་པདྨོས། །མཚན་ལྡན་བླ་མའི་ཞབས་པད་དུས་ཀུན་ཏུ་བསྙེན་པར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཚུལ་གནས་མང་དུ་ཐོས་པའི་ནགས་ཚལ་གྱི་དབུས་ན། །བསམ་བྱུང་རིག་པའི་གྲིབ་བསིལ་ཕྱོགས་བརྒྱ་རུ་གཡོ་བས། །རང་གཞན་རྨོངས་པའི་གདུང་བ་ཕྲ་མོ་རུ་བགྱིད་པར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །རང་བྱུང་རྡོ་རྗེའི་བྲག་སྐྱིབས་ཉམས་དགའ་ཡི་དབུས་ན། །རིམ་གཉིས་རྣལ་འབྱོར་ཟབ་མོའི་སྐྱོ་གྲོགས་དང་འགྲོགས་ཏེ། །ཚེ་གཅིག་ཟུང་འཇུག་རྡོ་རྗེའི་གོ་འཕང་ལ་རོལ་པར། །ཁྱབ་བདག་དཔལ་ལྡན་བླ་མས་བྱིན་གྱིས་རང་རློབས་ཤིག །ཅེས་པ་འདིའང་གཞོན་ནུ་འཇིགས་པ་མེད་པའི་བློ་གྲོས་ཀྱི་ཆུ་གཏེར་ལས་གང་ཤར་གྱི་རྟོག་པ་གླུར་བླངས་པའི་འཆར་གཞིའོ། ། ༈

[edit]

dpal ldan bla mar gsol 'debs kyi glu dad pa'i pho nya/__ dpal ldan bla ma la gsol ba 'debs pa'i rdo rje'i thol glu dad pa'i pho nya zhes bya ba/__na mo gu ru b+h+yaH__rdo rje lus gyi rtsa khams ji snyed kyi rgyu ba/__/'od gsal a ba d+hU ti'i 'khri shing la reg pas/__/gdan gsum sgyu 'phrul drwa ba'i rnam rol tu shar ba'i/__/dpal ldan bla ma sku yi rdo rje la 'dud do/__/phung khams lha skur dag par byin gyis rang rlobs shig__/mgrin pa longs spyod 'khor lo'i dri bzhon gyi rgyu ba/__/thabs shes A li kA li'i rol mo ru shar bas/__/lung rtogs chos phung rgya mtsho'i 'byung gnas su gyur ba'i/__/dpal ldan bla ma gsung gi rdo rje la 'dud do/__/srog rtsol dbu mar thim par byin gyis rang rlobs shig__/dkar dmar a haM las byung thig le yi rgyu ba/__/gtsug tor nor bu'i gdengs kar 'pho med du bcings pas/__/bde stong zung du 'jug pa'i dga' ston la rol pa/__/dpal ldan bla ma thugs kyi rdo rje la 'dud do/__/'gyur bcas chos kun zad par byin gyis rang rlobs shig__/tha mal gzung dang 'dzin pa'i rnam rtog gi rgyu ba/__/'od gsal lhan cig skyes pa'i ye shes su thim pas/__/rnam kun mchog ldan gnas lugs mngon sum du gzigs pa'i/__/dpal ldan bla ma ye shes rdo rje la 'dud do/__/brjod bral chos sku rtogs par byin gyis rang rlobs shig__/srid las nges par 'byung ba'i bdud rtsi yi reg pas/__/thar pa'i phyogs su grol ba'i blo gros kyi pad+mos/__/mtshan ldan bla ma'i zhabs pad dus kun tu bsnyen par/__/khyab bdag dpal ldan bla mas byin gyis rang rlobs shig__/tshul gnas mang du thos pa'i nags tshal gyi dbus na/__/bsam byung rig pa'i grib bsil phyogs brgya ru g.yo bas/__/rang gzhan rmongs pa'i gdung ba phra mo ru bgyid par/__/khyab bdag dpal ldan bla mas byin gyis rang rlobs shig__/rang byung rdo rje'i brag skyibs nyams dga' yi dbus na/__/rim gnyis rnal 'byor zab mo'i skyo grogs dang 'grogs te/__/tshe gcig zung 'jug rdo rje'i go 'phang la rol par/__/khyab bdag dpal ldan bla mas byin gyis rang rlobs shig__/ces pa 'di'ang gzhon nu 'jigs pa med pa'i blo gros kyi chu gter las gang shar gyi rtog pa glur blangs pa'i 'char gzhi'o/___/__!