རང་གྲོལ་སྐོར་ལྔའི་གེགས་སེལ་རིན་པོ་ཆེའི་དྲྭ་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	rang grol skor lnga'i gegs sel rin po che'i drwa ba
Location	mkhyen brtse'i bka' 'bum Volume 23, sde tshan 1, Text 61, Pages 118-120 (Folios 59b4 to 60b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rang grol skor lnga'i gegs sel rin po che'i drwa ba. In 'jam dbyangs mkhyen brtse'i dbang po'i bka' 'bum, Vol. 23: 118-120. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

རྫོགས་པ་ཆེན་པོ་རང་གྲོལ་སྐོར་ལྔ་ལས། གེགས་སེལ་རིན་པོ་ཆེའི་དྲྭ་བ་ཞེས་བྱ་བ། ན་མོ་གུ་ར་ཝེ། གདོད་ནས་རང་སར་གྲོལ་བའི་ཆོས་ཉིད་ལ། །གེགས་དང་གོལ་ཤོར་ནོར་བའི་ཐ་སྙད་ལས། །རྣམ་པར་འདས་ཕྱིར་གཏད་མེད་དབུ་མའི་སྦུབས། །དུས་གསུམ་དུས་མེད་ཆེན་པོར་རྒྱལ་གྱུར་ཅིག །ཟབ་མོའི་དོན་ལ་མོས་པ་བརྟན་ན་ཡང་། །བསོད་ནམས་དམན་པས་མཚན་ལྡན་བླ་མ་དང་། །མ་མཇལ་ཡིད་དཔྱོད་ཙམ་ལ་གདིངས་བཅས་པའི། །སྐལ་བཟང་རྣམས་ལ་ཕྲིན་འདི་གདམས་པར་བྱ། །ཀྱེ་ཧོ་གཞི་གྲོལ་རིག་པ་ཟང་ཀ་མར། །ཡོད་མེད་ཡིན་མིན་དམིགས་གཏད་མཚན་མ་ནུབ། །རང་གསལ་རྗེན་པ་འདི་ཀ་ལྟ་བ་ཡིན། །དེ་ལ་ཆེད་འཛིན་ཞུགས་ན་གེགས་སུ་ཆེ། །མ་ཡེངས་ངང་གདངས་བསྐྱང་བ་ཙམ་ཉིད་ལས། །སླད་ནས་བསལ་བཞག་འཇུར་བུས་མ་བཅིངས་པའི། །ཁོར་ཡུག་ཆད་མེད་འདི་ཀ་སྒོམ་པ་ཡིན། །དེ་ལ་གཉེན་པོས་བཟུང་ན་གེགས་སུ་ཆེ། །ཚོགས་དྲུག་ཡུལ་དུ་ཤར་བའི་ཉམས་མྱོང་ཀུན། །ཤར་གྲོལ་རིས་མེད་ཆུ་དང་ཆུ་རླབས་བཞིན། །རོ་གཅིག་འདྲེས་པ་འདི་ཀ་སྤྱོད་པ་ཡིན། །བདེ་སྡུག་སྤང་བླང་ལངས་ན་གེགས་སུ་ཆེ། །གཞི་གནས་གདོད་ནས་དག་པའི་ཆོས་ཉིད་ལ། །གློ་བུར་དྲི་མ་བསལ་ནས་དག་པའི་ཚེ། །བློ་འདས་རྗེན་པར་མཐོང་བ་འབྲས་བུ་ཡིན། །དེ་ལས་གུད་དུ་བཙལ་ན་གེགས་སུ་ཆེ། །དེ་ཕྱིར་ད་ལྟའི་ཤེས་པ་སོ་མ་ལ། །བཅས་བཅོས་བསྒྱུར་བཀོད་མ་མང་གང་དགར་ཞོག །བྱིང་ན་རླུང་རོ་དགུ་ཕྲུགས་བུས་པའི་རྗེས། ཁ་སྦྱོར་རླུང་བསྡམས་སྟོང་པའི་ཡེ་ཤེས་འཆར། །རྒོད་ན་སྙིང་གི་ཐིག་ལེར་སེམས་བཟུང་ཞིང་། །བདེན་མེད་བཞག་པས་གསལ་བའི་ཡེ་ཤེས་མཐོང་། །དུས་ཀུན་ཙིཏྟ་པདྨ་འདབ་བརྒྱད་དབུས། །ཁྱབ་བདག་བླ་མའི་གསང་གསུམ་གསལ་བཏབ་སྟེ། །གེགས་དང་བར་ཆད་རྣམ་པ་ཅི་བྱུང་ཡང་། །ཁྱེད་ཤེས་དད་པས་སྙིང་ནས་གསོལ་བ་འདེབས། །མཐར་ནི་ཀུན་བརྟགས་ལྷ་སྐུའི་སྣང་ཆ་ཡང་། །རིག་སྟོང་གཉུག་མའི་ངང་དུ་འཇའ་ལྟར་ཡལ། །དོན་དམ་འགོག་བདེན་བླ་མའི་ཞལ་མཇལ་བས། །ལམ་བདེན་གེགས་དང་བར་ཆད་དབྱིངས་སུ་དེངས། །དེ་ལྟར་ཤིན་ཏུ་གཅེས་པའི་གདམས་པ་འདི། །ཐེག་མཆོག་སྙིང་པོའི་ལམ་ལ་མོས་པའི་དོན། །ཆགས་བྲལ་པདྨ་དགྱེས་པས་གླུར་བླངས་པའི། །དགེ་བས་གེགས་དང་གོལ་ས་རང་གྲོལ་ཤོག །གུ་ཧྱ། ། ༈

[edit]

rang grol skor lnga'i gegs sel rin po che'i drwa ba/__ rdzogs pa chen po rang grol skor lnga las/__gegs sel rin po che'i drwa ba zhes bya ba/__na mo gu ra we/__gdod nas rang sar grol ba'i chos nyid la/__/gegs dang gol shor nor ba'i tha snyad las/__/rnam par 'das phyir gtad med dbu ma'i sbubs/__/dus gsum dus med chen por rgyal gyur cig__/zab mo'i don la mos pa brtan na yang /__/bsod nams dman pas mtshan ldan bla ma dang /__/ma mjal yid dpyod tsam la gdings bcas pa'i/__/skal bzang rnams la phrin 'di gdams par bya/__/kye ho gzhi grol rig pa zang ka mar/__/yod med yin min dmigs gtad mtshan ma nub/__/rang gsal rjen pa 'di ka lta ba yin/__/de la ched 'dzin zhugs na gegs su che/__/ma yengs ngang gdangs bskyang ba tsam nyid las/__/slad nas bsal bzhag 'jur bus ma bcings pa'i/__/khor yug chad med 'di ka sgom pa yin/__/de la gnyen pos bzung na gegs su che/__/tshogs drug yul du shar ba'i nyams myong kun/__/shar grol ris med chu dang chu rlabs bzhin/__/ro gcig 'dres pa 'di ka spyod pa yin/__/bde sdug spang blang langs na gegs su che/__/gzhi gnas gdod nas dag pa'i chos nyid la/__/glo bur dri ma bsal nas dag pa'i tshe/__/blo 'das rjen par mthong ba 'bras bu yin/__/de las gud du btsal na gegs su che/__/de phyir da lta'i shes pa so ma la/__/bcas bcos bsgyur bkod ma mang gang dgar zhog__/bying na rlung ro dgu phrugs bus pa'i rjes/__kha sbyor rlung bsdams stong pa'i ye shes 'char/__/rgod na snying gi thig ler sems bzung zhing /__/bden med bzhag pas gsal ba'i ye shes mthong /__/dus kun tsit+ta pad+ma 'dab brgyad dbus/__/khyab bdag bla ma'i gsang gsum gsal btab ste/__/gegs dang bar chad rnam pa ci byung yang /__/khyed shes dad pas snying nas gsol ba 'debs/__/mthar ni kun brtags lha sku'i snang cha yang /__/rig stong gnyug ma'i ngang du 'ja' ltar yal/__/don dam 'gog bden bla ma'i zhal mjal bas/__/lam bden gegs dang bar chad dbyings su dengs/__/de ltar shin tu gces pa'i gdams pa 'di/__/theg mchog snying po'i lam la mos pa'i don/__/chags bral pad+ma dgyes pas glur blangs pa'i/__/dge bas gegs dang gol sa rang grol shog__/gu h+ya/___/__!__