ཡང་དག་གྲུབ་པའི་གླུ།

🚧 This website is under continued development. We appreciate your patience!

Previous Text Back to Volume PageNext Text

Wylie title	yang dag grub pa'i glu
Location	mkhyen brtse'i bka' 'bum Volume 23, sde tshan 1, Text 37, Pages 78-79 (Folios 39b3 to 40a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang dag grub pa'i glu. In 'jam dbyangs mkhyen brtse'i dbang po'i bka' 'bum, Vol. 23: 78-79. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu
Colophon	།ཞེས་དཔལ་ཡང་དག་ལ་ཀུན་ཏུ་དགའ་བའི་ཚ་བ་ཤོད་ཀྱི་འབྲོག་ལྗོངས་སུ་སྐྱེ་བའི་མྱུ་གུ་བཟུང་བ། ལོ་ཙཱ་བ་རཏྣ་བི་ཛ་ཡས་ཡི་གེར་བྲིས་ཏེ་བྱ་བ་གཉིས་ཀས་སྟོང་པ་ཆེན་པོ་སྒོ་མེད་འབྲིང་པོར་མེ་ཉག་བླ་མ་ཆེན་པོས་དབུགས་དབྱུང་བའི་འཇའ་ས་ཐོབ་པ། ཡན་པ་བློ་བདེས་འོད་གསལ་ཤེལ་ཕུག་གི་ཉེ་འདབས་སུ་སྨྲས་པའོ།
	zhes dpal yang dag la kun tu dga' ba'i tsha ba shod kyi 'brog ljongs su skye ba'i myu gu bzung ba/__lo tsA ba rat+na bi dza yas yi ger bris te bya ba gnyis kas stong pa chen po sgo med 'bring por me nyag bla ma chen pos dbugs dbyung ba'i 'ja' sa thob pa/__yan pa blo bdes 'od gsal shel phug gi nye 'dabs su smras pa'o

Tibetan Text

Wylie

[edit]

ཨེ་མ་ཧོ། ཙིཏྟ་རང་བྱུང་གསང་བའི་སྦུབས། །གཞོམ་དུ་མེད་པའི་ཡེ་ཤེས་ཀྱི། །ཐིག་ལེ་ཟག་པ་མེད་པའི་བདེ། །མངོན་སུམ་མཐོང་བས་ཕྱག་བགྱིའོ། །ཐོག་མ་ཐ་མ་མེད་པ་ཡི། །རང་བྱུང་འོད་གསལ་སེམས་ཀྱི་གཤིས། །འཁོར་བའི་དུས་སུ་མ་བཅིངས་ཤིང་། །མྱ་ངན་འདས་ཀྱང་གྲོལ་བ་མེད། །དེ་ནི་དཔལ་ཆེན་ཡང་དག་གོ །ཨོཾ་ཡིག་གཞོམ་དུ་མེད་པ་ཡི། །བདེ་ཆེན་ཡེ་ཤེས་གཅིག་ཉིད་ལས། །སྲིད་དང་ཞི་བའི་རྣམ་འགྱུར་ནི། །གར་མཁན་ལག་པ་བཞིན་ཏུ་སྣང་། །རུ་ལུ་གནས་ལུགས་མ་བཅོས་པ། །གདོད་མའི་ཀ་དག་ཆེན་པོའི་བབས། །རུ་ལུ་སྣང་ལུགས་ལྷུན་གྲུབ་ཀྱི། །སྒོ་བརྒྱད་མ་འགགས་འཆར་གཞིར་གནས། །ཀ་དག་ལྷུན་གྲུབ་ཟུང་འཇུག་པ། །དབྱིངས་དང་རིག་པ་དབྱེར་མེད་ཧཱུྃ། །མ་བཅོས་མ་བསླད་དེ་བཞིན་གཤེགས། །བློ་འདས་ངང་དུ་མཉམ་བཞག་པས། །སྒྲིབ་གཉིས་མ་སྤངས་ཐིག་ལེ་ཚེ། །མཁའ་ཀློང་དབྱིངས་སུ་རོ་གཅིག་བྷྱོ། །གཏིང་ཟབ་ཀུན་ཏུ་བཟང་མོའི་དབྱིངས། །རང་བཞིན་ལྷུན་གྲུབ་འདུས་མ་བྱས། །བྷ་ག་གསང་བ་ཆེན་མོའི་སྦུབས། །སྐུ་གསུམ་འདུ་འབྲལ་མེད་པར་རྫོགས། །དེ་ནི་ལྷ་སྔགས་ཡེ་ཤེས་ཀུན། །དབྱེར་མེད་ཐིག་ལེ་ཆེན་པོ་ཧཱུྃ། །ཆོས་རྣམས་ཟད་པ་དེ་ཡིན་ཏེ། །དཔལ་ཆེན་དགོངས་པའི་མཐར་ཐུག་གོ །དེ་ཡང་སྙིང་པོ་གཅིག་དྲིལ་ནས། །རང་སེམས་གསལ་སྟོང་ཟུང་འཇུག་ཉིད། །དོན་གྱི་ཡང་དག་དེ་ཡིན་ཞེས། །ཨོ་རྒྱན་མཁན་པོས་དེ་སྐད་གསུངས། །དེ་ཕྱིར་རང་སེམས་མ་བཅོས་པ། །རྣལ་མར་འཇོག་པ་ཁོ་ན་ལས། །ཡང་དག་གཞན་དུ་མེད་པར་ཁུམས། །རྡོ་རྗེ་གཟི་བརྗིད་དེ་སྐད་ལོ། །ཞེས་དཔལ་ཡང་དག་ལ་ཀུན་ཏུ་དགའ་བའི་ཚ་བ་ཤོད་ཀྱི་འབྲོག་ལྗོངས་སུ་སྐྱེ་བའི་མྱུ་གུ་བཟུང་བ། ལོ་ཙཱ་བ་རཏྣ་བི་ཛ་ཡས་ཡི་གེར་བྲིས་ཏེ་བྱ་བ་གཉིས་ཀས་སྟོང་པ་ཆེན་པོ་སྒོ་མེད་འབྲིང་པོར་མེ་ཉག་བླ་མ་ཆེན་པོས་དབུགས་དབྱུང་བའི་འཇའ་ས་ཐོབ་པ། ཡན་པ་བློ་བདེས་འོད་གསལ་ཤེལ་ཕུག་གི་ཉེ་འདབས་སུ་སྨྲས་པའོ། ། ༈

[edit]

yang dag grub pa'i glu/__ e ma ho/__tsit+ta rang byung gsang ba'i sbubs/__/gzhom du med pa'i ye shes kyi/__/thig le zag pa med pa'i bde/__/mngon sum mthong bas phyag bgyi'o/__/thog ma tha ma med pa yi/__/rang byung 'od gsal sems kyi gshis/__/'khor ba'i dus su ma bcings shing /__/mya ngan 'das kyang grol ba med/__/de ni dpal chen yang dag go__/oM yig gzhom du med pa yi/__/bde chen ye shes gcig nyid las/__/srid dang zhi ba'i rnam 'gyur ni/__/gar mkhan lag pa bzhin tu snang /__/ru lu gnas lugs ma bcos pa/__/gdod ma'i ka dag chen po'i babs/__/ru lu snang lugs lhun grub kyi/__/sgo brgyad ma 'gags 'char gzhir gnas/__/ka dag lhun grub zung 'jug pa/__/dbyings dang rig pa dbyer med hU~M/__/ma bcos ma bslad de bzhin gshegs/__/blo 'das ngang du mnyam bzhag pas/__/sgrib gnyis ma spangs thig le tshe/__/mkha' klong dbyings su ro gcig b+h+yo/__/gting zab kun tu bzang mo'i dbyings/__/rang bzhin lhun grub 'dus ma byas/__/b+ha ga gsang ba chen mo'i sbubs/__/sku gsum 'du 'bral med par rdzogs/__/de ni lha sngags ye shes kun/__/dbyer med thig le chen po hU~M/__/chos rnams zad pa de yin te/__/dpal chen dgongs pa'i mthar thug go__/de yang snying po gcig dril nas/__/rang sems gsal stong zung 'jug nyid/__/don gyi yang dag de yin zhes/__/o rgyan mkhan pos de skad gsungs/__/de phyir rang sems ma bcos pa/__/rnal mar 'jog pa kho na las/__/yang dag gzhan du med par khums/__/rdo rje gzi brjid de skad lo/__/zhes dpal yang dag la kun tu dga' ba'i tsha ba shod kyi 'brog ljongs su skye ba'i myu gu bzung ba/__lo tsA ba rat+na bi dza yas yi ger bris te bya ba gnyis kas stong pa chen po sgo med 'bring por me nyag bla ma chen pos dbugs dbyung ba'i 'ja' sa thob pa/__yan pa blo bdes 'od gsal shel phug gi nye 'dabs su smras pa'o/___/__!_