JKW-KABUM-22-ZA-012-047-wylie
dpal ldan bla ma la gsol 'debs rdo rje'i thol glu yo ga gsum gyi sgra dbyangs/__ dpal ldan bla ma la gsol ba 'debs pa'i rdo rje'i thol glu yo ga gsum gyi sgra dbyangs zhes bya ba/__a ho/__'jigs med rgyal ba kun gyi spyi myes su gyur kyang /__/srid 'dir mi yi myu gu dam pa ru bzung nas/__/skal bzang 'gro kun thar pa'i lam mchog la sbyor ba'i/__/khyab bdag 'khor lo'i mgon po snying dbus nas dran byung /__/blo sna chos la 'gyur bar byin gyis rang rlobs shig__/rnyed dka'i dal 'byor mi lus rin chen de thob kyang /__/'chi bdag gshin rje'i pho nya nam 'ong ni mi 'dug__/de tshe dkar nag las 'bras 'phen pa yi rjes 'gro/__/sdug bsngal 'khor ba'i rgya mtsho zad med du 'khyams tshe/__/nges 'byung gting nas skye bar byin gyis rang rlobs shig_/mtshan ldan bla ma dge ba'i bshes gnyen dang mjal te/__/gsang chen rdo rje theg pa'i lam mchog la zhugs shing /_/smin grol bdud rtsi'i dga' ston zad med du rol pas/__/bskyed rdzogs zung 'jug nye lam snod mchog tu gyur nas/__/dam tshig nyams med srung bar byin gyis rang rlobs shig__/gdan gsum dbyer med sgyu 'phrul drwa ba yi klong nas/__/snang stong zung 'jug phyag rgya rnam bzhi ru rol pas/__/bkod pa lus kyi dkyil 'khor lha sku ru rdzogs pa'i/__/nyams len mtha' ru phyin par byin gyis rang rlobs shig__/'khor lo rnam lnga'i zhing du rig 'dzin dang DA ki/__/yas babs mas brtan dga' bzhi'i bdud rtsi yis tshim pas/__/zhu bde mi rtog bde stong drwa ba yi 'khor lo/__/rlung sems dbu mar thim par byin gyis rang rlobs shig__/spros pa'i mtha' brgyad kun bral lta ba yi yang rtse/__/skye 'gag rang sar grol ba'i ngang bzhag gi sgom pa/__/dmigs gtad ched 'dzin spangs pa'i yang dag gi spyod lam/__/'bras bu rang ngor rdzogs par byin gyis rang rlobs shig__/sgron ma rnam bzhir bzhad pa'i nyams len gyi klong du/__/snang bzhi'i rtogs pa gong 'phel chos zad du bskyal bas/__/nang gsal khyad chos drug ldan ngo bo ru rol pa'i/__/zag bcas 'od skur thim par byin gyis rang rlobs shig__/de skad dus kun skyo shas nges 'byung gi ngang nas/__/dpal ldan bla mar dad pa'i rang bzhin las skyes pa'i/__/'gag med rdo rje'i thol glu bsgyur ba yi dge bas/__/'gro rnams gang dang dbyer med 'grub pa ru shog cig__/dpal ldan bla ma la gsol ba 'debs pa rdo rje'i thol glu yo ga gsum gyi sgra tshig ces bya ba 'di yang nges 'byung gi blo can a b+hA ya'i ming gis rang lo bcu drug par brjod med kyi ngang nas gsol ba btab pa'o//__//___!_
