JKW-KABUM-22-ZA-012-041-wylie
bla ma sku lnga la gsol 'debs rdo rje'i thol glu byin rlabs sprin dkar gzhon nu'i rol mo/__ bla ma sku lnga la gsol ba 'debs pa'i rdo rje'i thol glu byin rlabs sprin dkar gzhon nu'i rol mo zhes bya ba bzhugs/__na mo gu ru b+h+yaH__ye grol gdod nas rnam dag ka dag gi gzhi dbyings/__/bskyar grol rang shes rang grol lhun grub kyi ngo bo/__/mtha' grol gzhon nu bum sku'i bla ma de mkhyen no/__/dag pa gnyis ldan chos sku'i dngos grub de stsol shog__/bde stong gnyis su med pa'i ye shes kyi sgyu 'phrul/__/stong dang snying rje zung 'jug phyir gsal gyi rang gdangs/__/gang 'dul longs spyod rdzogs sku'i bla ma de mkhyen no/__/kha sbyor yan lag bdun ldan dngos grub de stsol shog__/chos nyid ji bzhin nyid dbyings rnam dag gi klong nas/__/chos can 'gro rnams bde chen ye shes su sgrol phyir/__/sna tshogs ma nges sprul pa'i bla ma de mkhyen no/__/'gro 'dul mkhyen dang brtse ba'i dngos grub de stsol shog__/sku gsum rnam par dbye ba'i ngo bo dang rang bzhin/__/thugs rje'i bye brag so sor 'byed pa yi chos rnams/__/ro gcig blo 'das dbyer med bla ma de dran byung /__/ngo bo nyid sku'i ye shes chen po de stsol shog__/byang chub phyogs chos sum cu la sogs kyi yon tan/__/rang rig bde gshegs snying po nyag gcig la rdzogs pas/__/mngon par byang chub dpal ldan bla ma de dran byung /__/sa lam yon tan rdzogs par byin gyis rang rlobs shig__/gang ltar snang yang snang srid 'khor 'das de ma grub/__/ji ltar g.yos kyang rang byung thugs rje yi ye shes/__/mi 'gyur rdo rje'i ngo bo bla ma de dran byung /__/blo bral 'gyur med rtogs par byin gyis rang rlobs shig__/a ho/__ma skyes gdod nas dag pa ka dag gi ngang nas/_/'gag med rdo rje'i thol glu'i skyes bzang de blangs pas/__/dpa' bo mkha' 'gro dgyes pa'i 'dzun zhal rang ston nas/_/lhan skyes sku bzhi thob par byin gyis rang rlobs shig_/_!_
