JKW-KABUM-22-ZA-012-022-wylie
skyabs kun 'dus zhal 'chi med pad+ma thod phreng la gsol 'debs thugs dam skul byed rdo rje'i thol glu pad+ma drwa ba'i lam bzang / skyabs kun 'dus zhal 'chi med pad+ma thod phreng la gsol 'debs thugs dam skul byed rdo rje'i thol glu pad+ma drwa ba'i lam bzang zhes bya ba/__a ho/__spyir dus gsum rgyal ba'i phrin las pa/__/sgos bod khams bstan 'gro yongs kyi mgon/__/rje pad+ma 'byung gnas bka' drin can/__/bdag gsol 'debs bu la thugs rjes gzigs/__/gnas 'di nas lho nub mtshams shed na/__/sa spyod kyi bsti gnas pad+ma 'od/__/nyams dga' ba 'ja' zer 'khrigs pa'i klong /__/'khor dpa' bo mkha' 'gro'i tshogs dbus na/__/'chi med kyi rig 'dzin mtsho skyes rje/__/sku'i cha lugs rnam 'gyur ma nges pa/__/sna tshogs su snang ba'i rol mo yis/__/chos brda thabs kyi phrin las cir yang ston/__/tshul de 'dra snying la dran drags pas/__/bcos min gyis gsol ba 'debs lags na/__/mgon sku yi rdo rje'i ngo bo yis/__/phyi snang stong bum pa'i dbang bskur nas/__/phung khams dang skye mched rags pa'i chos/__/gdan gsum gyi lha skur dag byin rlobs/__/mgon gsung gi rdo rje'i ngo bo yis/__/nang gsal stong gsang ba'i dbang bskur nas/__/phung khams dang skye mched rags pa'i chos/__/mi shig pa'i nA dar rdzogs byin rlobs/__/mgon thugs kyi rdo rje'i ngo bo yis/__/mchog bde stong phyag rgya'i dbang bskur nas/__yid thig le sred zhen rgyur bcas pa/__/bde chen gyi drwa bar smin byin rlobs/__/mgon ye shes rdo rje'i ngo bo yis/__/don rig stong bzhi pa'i dbang bskur bas/__/kun gzhi dang shes bya'i sgrib pa'i tshogs/__/blo 'das kyi dbyings su grol byin rlobs/__/de lta bu'i grub mtha' ma rnyogs na/__/nam tshe 'di'i snang ba nub pa'i tshe/__/rlung sems kyi gzhan dbang gyur pa'i yid/__/gnas zangs mdog dpal rir drong du gsol/__/phyi tshad bzung bral ba'i chu gter dbus/__/sa 'dzin gyi dbang po tsit+ta'i dbyibs/__/tshe nam mkha'i khams su snyegs pa lta'i/__/gnas zangs mdog dpal rir drong du gsol/__/de steng du 'ja' zer thig le yi/__/tshom bu dang 'dra bar 'brel pa'i sbubs/__/rin chen las grub pa'i gzhal med khang /__/gnas zangs mdog dpal rir drong du gsol/__/phyogs kun na pad+ma'i 'khri shing dang /__/bdud rtsi yi rdzing bu g.yo ba'i khrod/__/dpal rig 'dzin DA ki'i glu gar rtsen/__/gnas zangs mdog dpal rir drong du gsol/__/dbus thar pa chen po'i grong khyer du/__/'od gsal ba 'pho chen dwangs ma'i zhal/__/skyabs kun 'dus mgon khyod dgyes par bzhugs/__/gnas zangs mdog dpal rir drong du gsol/__/'khor dus gsum rtsa brgyud bla ma dang /__/yi dam dang mkha' 'gro chos skyong tshogs/__/dpe til gong kha phye lta bur bzhugs/__/gnas zangs mdog dpal rir drong du gsol/__/bar khang du 'phags mchog snying rje'i bdag__/mgon phyag na pad+mas mdzes pa'i lhar/__/rigs tshom bu'i dkyil 'khor rgya mtshos bskor/__/gnas zangs mdog dpal rir drong du gsol/__/de'i steng khang phyogs bcu'i zhing khams su/__/dpal 'od mtshan stong du 'bar ba'i skur/__/'khor rig pa rang snang sems dpas mdzes/__/gnas zangs mdog dpal rir drong du gsol/__/rnam thar gyi sgo bzhi'i srung ma ru/__/rigs bzhi yi dpa' bo DA k+ki'i bskor/__/dga' ba bzhi'i zlos gar cir yang ston/__/gnas zangs mdog dpal rir drong du gsol/__/phyi ltar na sprul pa'i 'og min che/__/sa spyod kyi bsti gnas nyams re dga'/__/rnga yab kyi gling gi ze'u 'brur mdzes/__/gnas zangs mdog dpal rir drong du gsol/__/nang ltar na rdo rje'i lus kyi grong /__/snying dbus kyi mi shigs thig le cher/__/lhan skyes kyi zhing mchog pad+ma 'od/__/gnas zangs mdog dpal rir drong du gsol/__/gzhan du na bskyed rdzogs thabs mkhas kyis/__/tshogs brgyad kyi 'khrul pa bsdams pa las/__/zhing pad+ma dra bar rang snang ba'i/__/gnas zangs mdog dpal rir drong du gsol/__/de ltar na rnal 'byor zab mo la/__/smin grol gyi cho gas dge byas pas/__/lam rig 'dzin rnam bzhi'i bgrod pa yis/__/sku gsum gyi go 'phang myur thob shog__/tshul de las tshad med snying rje'i mthus/__/sna tshogs kyi phrin las zab mo yis/__/khams gsum gyi 'gro ba yongs sgrol bar/__/rje khyed dang mnyam par byin gyis rlobs/__/tshig de skad gsol 'debs smon pa'i glu/__/dpal gzhong pa lha chu'i 'gram ngogs su/__/sprang gtad med pad+ma dgyes pa'i sdes/__/yid bzod med dad pa'i ngang nas bris/__/zhes rgyal kun 'dus zhal 'chi med pad+ma thod phreng gis sgyu 'phrul rdo rje'i bkod pa la brten nas snang sems ro gcig tu 'dres pa'i brdar gram pa las bdud rtsi'i rgyun bzang chal chil g.yo bar mdzad pa'i stod lung gzhong pa lha chur rigs 'dus gu ru'i dkyil 'khor du tshogs kyi mchod pa brgya phrag thal ba bgyis pa'i rjes _thog skad cig la gsol ba btab pa sarbA sid+d+hi m+me pra yats+tshan+tu//__//___!
