JKW-KABUM-22-ZA-012-008-wylie
'phags yul rig 'dzin rnam dgu la gsol 'debs rdo rje'i thol glu bde stong DA ki'i glu gar/__ 'phaT yul rig 'dzin rnam dgu la gsol ba 'debs pa'i rdo rje'i thol glu bde stong DA ki'i glu gar zhes bya ba/__e ma ho/__/phyi nang rtsa yi 'pho chags tha mal gyi rgyu ba/__/snang stong 'jam dpal sku yi dkyil 'khor du bsdams pas/__/rdul bral me long lta bu'i ye shes su shar ba'i/__/rig 'dzin many+dzu mi tra snying dbus nas dran byung /__/phung khams sprul skur dag par byin gyis rang rlobs shig__/'gro 'ong srog dang rtsol ba'i dri bzhon gyi rgyu ba/__/chaT bral pad+ma gsung gi drwa ba ru bsdams pas/__/bde chen so sor rtog pa'i ye shes su shar ba'i/__/rig 'dzin nA ga rdzu na snying dbus nas dran byung /__/lha sngags longs skur rdzoT par byin gyis rang rlobs shig__/kun rdzob gzung 'dzin 'khrul pa'i gnyis snang gi rgyu ba/__/don dam yang dag thugs kyi thig le ru bsdams pas/__/zung 'jug lhan skyes chos dbyings ye shes su shar ba'i/__/rig 'dzin hU~M chen kA ra snying dbus nas dran byung /__/rtog tshogs chos skur smin par byin gyis rang rlobs shig__/sna tshogs skye shi'i 'khrul 'khor 'pho 'gyur gyi rgyu ba/__/'chi med yon tan bdud rtsi'i dkyil 'khor du bsdoms pas/__/'da' dka' 'pho ba chen po'i ye shes su shar ba/__/rig 'dzin bi ma mi tra snying dbus nas dran byung /__/zag bcas 'od skur 'grub par byin gyis rang rlobs shig__/rdul mun snying stobs rang gzugs khams gsum gyi rgyu ba/__/dbyings dang rig pa dbyer med phur bu ru bsdams pas/__/cir snang bya ba grub pa'i ye shes su shar ba'i/__/rig 'dzin pra b+ha hasti snying dbus nas dran byung /__/dbang yul lha skur dag par byin gyis rang rlobs shig__/byang chub sems kyi chu rgyun gnas bzhi ru rgyu ba/__/snang srid ma mo'i dkyil 'khor dbu ma ru bsdams pas/__/srid zhi klong du gyur pa'i ye shes su shar ba'i/__/rig 'dzin d+ha na saM skr-i snying dbus nas dran byung /__/char yang dga' bzhir rdzogs par byin gyis rang rlobs shig__/sems dang sems byung 'tshol ba'i nyon mongs kyi rgyu ba/__/zung 'jug 'jig rten mchod bstod phyag rgya ru bsdams pas/__/'khor 'das gzhi dbyings grol ba'i ye shes su shar ba'i/__/rig 'dzin raM bu gu h+ya snying dbus nas dran byung /__/sgrib gsum ka nas dag par byin gyis rang rlobs shig__/kun brtags dngos por zhen pa'i gzhan dbang gi rgyu ba/__/yongs grub drag sngags dmod pa'i drwa ba ru bsdams pas/__/mtha' brgyad rang sar grol ba'i ye shes su shar ba'i/__/rig 'dzin shIn+taM gar+b+ha snying dbus na dran byung /__/'od gsal dbu mar smin par byin gyis rang rlobs shig__/tshogs brgyad glo bur 'khrul ba'i 'jug ldang gi rgyu ba/__/dpal chen sgrub sde brgyad kyi dkyil 'khor du bsdoms pas/_/ye shes glong dgu'i rang gzugs mtshan dpe ru shar ba'i/__/rig 'dzin pad+ma saM b+hA snying dbus nas dran byung /__/dbyer med sku bzhir smin par byin gyis rang rlobs shig__/de skad gsol ba 'debs pa'i rdo rje yi thol glu/__/bde stong DA ki 'du ba'i dkar phyogs kyi tshes la/__/'og min grub pa mchog gi bsti gnas su blangs pas/__/don gnyis lhun gyis grub pa'i dngos grub zhig zhu'o/__/zhes pa'ang dpal gyi bsam yas mchims phu'i brag dmar rdo rje'i ke'u tshang du sgrub sde chen po brgyad kyi dkyil 'khor zhal phye zhing /__tshogs kyi 'khor lo stong phrag thal bas dgyes pa bskyed pa'i tshe gang shar gyi rtogs pa glur len pa po ni rnal 'byor pa pad+ma dgyes pa'i sde'o//___//__!_
