JKW-KABUM-22-ZA-007-023-wylie
lam zab phyi ma'i nyams len byin rlabs mchog stsol/__ @#/_/lam zab phyi ma'i nyams len snying por dril ba byin rlabs mchog stsol zhes bya ba/__na mo gu ra we/__gsung ngag rin po che'i lam zab phyi ma'i bla ma'i rnal 'byor shin tu bsdus pa'i tshul gyis nyams su blang bar 'dod na/__sbyor ba skyabs sems ni/__bdag sogs 'gro kun deng nas byang chub bar/__/bla ma dkon mchog gsum la skyabs su mchi/_/gzhan don rdzogs pa'i sangs rgyas thob bya'i phyir/__/zab mo'i rnal 'byor nyams su blang bar bgyi/__/lan gsum/__dngos gzhir tshogs zhing gsal gdab pa ni/__rang mdun nam mkhar yid 'phrog mchod sprin dbus/__/seng khri pad nyi bdud bzhi'i gdan gyi steng /__/rtsa ba'i bla ma dges pa rdo rje'i sku/__/zhal brgyad bcu drug phyag can zhabs bzhi pa/__/bdag med yum 'khyud gar dgu'i nyams kyis rol/__/gnas gsum rdo rje'i yi ge 'bru gsum mtshan/__/phung po rigs lnga 'byung ba yum mchog lnga/__/dbang po tshigs mtshams rtsa rgyus sems dpa' brgyad/__/sku yi gnas bcu khro bo'i dbang po bcu/__/zag med yul rnams rdo rje'i lha mo'i dngos/__/mtha' skor skyabs yul rgya mtsho'i tshogs dang bcas/__/snang stong zung 'jug dges bzhin bzhugs par gyur/__/gsol ba 'debs pa ni/__skyabs gnas kun 'dus bla ma rin po che/__/drin can chos kyi rje la gsol ba 'debs/__/mnyam med bka' drin can gyi thugs rjes gzigs/__/'di phyi bar do kun tu byin gyis rlobs/__/ci nus su brjod/__zhen pa spang ba ni/__bdag gi nyon mongs rang gzugs lus longs spyod/__/dgra gnyen bar ma'i snang ba ji snyed kun/__/rje btsun bla ma mchog la dbul bar bgyi/__/gzung 'dzin rnam rtog zhi bar byin gyis rlobs/__/mchod pa 'bul ba ni/__lag g.yas ral gris phung po tshogs su sbar/__/oM AHhU~M hoHsa zag med bdud rtsir bsgyur/__/rang sems lhar gsal mchod pa'i lha mo spros/__/bla ma skyabs gnas rgya mtsho'i tshogs rnams mchod/__/mchog dang thun mong dngos grub stsal du gsol/__mchod pa'i lha rnams rtsa ba'i bla mar thim/__/zag med bde chen dges pa'i gzi byin 'bar/__/lhag mas rigs drug mgron kun tshim par gyur/__/rjes dbang dang dngos grub blang zhing de kho na nyid la blo bzhag pa ni/__mtha' skor skyabs yul rtsa ba'i bla mar 'dus/__/bla ma'i gnas gsum 'bru gsum 'od zer bcas/__/rim dang cig car byung nas rang la thim/__/dbang thob sgrib dag byin rlabs dngos grub thob/__/bla ma mchog dang rang sems dbyer med pa'i/__/gshis lugs brjod med gsal gdangs ma 'gags pa/__/mos gus lam khyer phyag rgya chen po'i ngang /__/bsgom bya sgom byed bral ba'i dbyings su bzhag__/ces brjod cing bsams la mnyam par gzhag__/thun de las ldang ba na/__skye ba kun tu yang dag bla ma dang /__/zhes sogs bsngo smon ji ltar rig pas mtshams sbyar te spyod lam la 'jug go__/zhes pa'ang rje btsun bla ma'i bka' drin gyis bskyangs ba 'jam dbyangs mkhyen brtse'i dbang pos thams cad mkhyen pa dkon mchog lhun grub kyi gsung rab ji lta bar shin tu bsdus pa'i tshul gyis sbyar ba'i dge bas 'gro kun bla ma rdo rje 'chang chen po'i go 'phang myur du thob pa'i rgyur gyur cig__!__/
