JKW-KABUM-21-ZHA-016-002-wylie
dgongs 'dus srung 'bum gyi tsakra rab gnas/ @#/_/bla ma dgongs pa 'dus pa'i srung 'bum rdo rje'i phreng ba'i tsakra rab gnas bya tshul nyung gsal bzhugs so/__/ na mo gu ru de wa DA ki nI b+h+yaH__'dir bod yul sa 'og kun gyi gter gcig bla ma dgongs pa 'dus pa'i gser chos las byung ba'i las tshogs srung 'bum rdo rje'i phreng ba nas ji skad gsungs pa'i tsakra rnams rab tu gnas par bya ba'i tshul ni/__srung 'khor bri ba dang /__rdzas byugs pa sogs legs par grub nas stegs bu gtsang ma'i steng 'bru dkar bkram pa'i khar dgram/__'byor na mdun du sman rag gtor ma nyer spyod dang bcas pa bshams/__tshogs zhing gsal btab/__kye kye/__phyogs bcu'i skyabs gnas dkon mchog bdag la dgongs:__'gro rnams skyob pa'i mgon dang dpung mdzod cig:__dus 'di nas bzung rdzogs sangs ma rgyas bar:__mgon po mchog gyur rnams la phyag 'tshal lo:__bdag gzhan lus dang longs spyod mchod par 'bul/__/nyams chags nyes ltung bsags rnams mthol zhing bshags:__dus gsum dge bar gyur la rjes yi rangs:__bla med theg chen chos 'khor bskor du gsol:__rgyal ba mya ngan mi 'da' bzhugs par gsol:__bdag gzhan dge tshogs byang chub chen por bsngo:__skyabs gnas dkon mchog rnams la skyabs su mchi:__sngon chad rgyal ba'i mdzad pa rmad byung ltar:__de bzhin bdag gis dus 'di nas brtsam bya:__'gro ba yongs kyi bla mar bdag gyur cig:__ces pas rgyud sbyangs te tshogs zhing rnams rang la bstim/__dngos su bshams pa'i mchod pa yod na bsang sbyangs/__oM snang srid 'dod yon longs spyod mchod pa'i rdzas:__AHrnam dag lha tshogs dgyes pa skong bar byed:__hU~M gzugs sgra dri ro reg bya nus bcud ldan:__hoHphyi nang gsang ba'i mchod pa bla na med:__oM AHhU~M hoH__zhes byin brlab/__bdag bskyed ni/__hU~M hrIH__stong pa nyid dang snying rje che rang bzhin:__zung 'jug hrIHlas rgyu yi he ru ka:__ma 'gags rang byung lhun grub gzhal yas khang :__dwang gsal 'od dpung 'khrigs pa'i klong yongs su:__rig 'dzin pad+ma badz+ra dmar gsal mdangs:__dmar mthing dkar ba'i zhal gsum phyag drug gis:__rdor dril ral gri b+hany+dza bum pa dang /__/kha T+wAM ga 'dzin lha lcam gsang ba'i yum:__dmar po DA ru dung dmar 'dzin dang sbyor/__/gar dgu'i nyams ldan 'bar ba'i chas kyis brjid:__bud+d+ha thod phreng mi bskyod rdo rje rtsal/__pad+ma dbang chen rig 'dzin thod pa rtsal:__mdog dmar me phreng sangs rgyas dpa' bo dang :__rta mgrin phyag na rdo rje la sogs pa:__rang rang yum 'khor bka' nyan sprul par bcas:__rnam rol ma 'gags sgyu 'phrul rdo rje'i sprin:__gang 'dul mos pa'i dpal du lham mer gsal:__hU~M hrIH__rang byung thugs rjes ma 'gags rol pa'i sku:__spyan 'dren bzhugs su gsol bar mi dmigs kyang :__thugs rje'i ngang nyid chos skur dag pa las:__rtsal snang dbyings nas rol cing gshegs su gsol:__oM AHhU~M badz+ra gu ru d+he wa d+hA ki nI hrI ma ha ri ni sa ra tsa hrIHya e a ral+li hring hring :__pheM pheM/__dzaHhU~M ba~M hoH__tsit+ta badz+ra dz+nyA na pad+ma ka ma la ya s+t+waM/__oM AHhU~M hrIHswA hAH__a b+hi ShIny+tsa tu mAM/__a ti pU hoH__pra tI ts+tsha hoH__hU~M hrIH__dngos su 'byor dang yid kyis rnam sprul pa'i:__me tog bdug spos mar me zhal zas dri:__sgra dbyangs ar+g+haM la sogs mchod pa'i sprin:__phyi nang gsang ba bla med dgyes mchod 'bul:__oM AHhU~M badz+ra gu ru d+he wa d+ha ki ni ar+g+haM pu Sh+pe d+hu pe A lo ke g+han+d+he nai wid+yA shab+da pU dza hoH__rU pa shab+da g+han+d+he rA sa s+phaR+she pU dza hoH__ma hA maM sa rak+ta keM ni ri ti b+ha su ta tsit+ta pU dza hoH__bo d+hi tsit+ta ma hA su kha dza hoH__sarba pany+tsa a mr-i ta rak+ta b+ha liM ta kha kha khA hi khA hi:__hU~M hrIH__phyi nang gzhan gsum lha dang lha mo'i tshogs:__byed pa kun ston rnam 'phrul yongs kyi mdzod:__'khor 'das rang grol bde chen g.yung drung sku:__dkyil 'khor rdzogs pa'i dpal la phyag 'tshal bstod:__bzlas dmigs ni/__lha tshogs thugs kar pad zla nyi steng hrIH__sngags phreng bskor ba'i 'od kyis don gnyis byas/__/snod bcud rtsa gsum rgyal ba'i zhing du gyur/__/tshur 'dus mchog dang thun mong dngos grub thob/__oM AHhU~M hrIHbadz+ra gu ru d+he wa d+ha ki ni sarba sid+d+hi pha la hU~M AH__zhes rtsa gsum dril sgrub kyi snying po ci nus bzlas/__bar 'dir rgyas par spro na rgyab chos su lha bsangs dang gser skyems lta bu gang yang rung bas rnam bzhi'i mgron la mchod cing phrin las bcol/__/de nas 'khor lo la dmigs te bgegs sbyong ba dang /__khrus gsol rgyas par bya ba'am/__ma grub na/__rang gi thugs ka nas las kyi khro bo'i tshogs dpag tu med pa 'phros te bgegs rnams rgyangs ring du bskrad par bsams la/__sum+b+ha bzla/__gu gul gyis bdug__/yungs kar gyis brab/__a mr-i tas bsang /__swa b+hA was sbyangs/__stong pa'i ngang las skad cig dran rdzogs su/__/tsakra b+h+rU~M las mu khyud gzhal yas khang /__/rab 'byams rtsa gsum rgyal ba'i pho brang che/__/dwang gsal 'od phung 'khrigs pa'i klong yangs su/__/rang byung sngags kyi yi ge'i phreng ba rnams/__/yongs gyur pad+ma badz+ra dmar gsal mdangs/__sogs nas/__dkyil 'khor rdzogs pa'i dpal la phyag 'tshal bstod/__/ces pa'i bar bdag bskyed ltar bya/__bsgrub bya'i ming yig dmigs bsal bris yod na de dang /__gzhan du 'chang ba po zhes pa'i yi ge nyid bsgrub bya dngos su gsal ba dkyil 'khor gyi khyams la gus pa'i tshul gyis 'khod par sde brgyad spyi srung la/__bla ma rtsa ba gsum gyi lha tshogs 'khor dang bcas pa rnams kyis bsgrub bya 'di la lha srin sde brgyad kyi gnod pa thams cad zhi zhing srung ba dang /__mchog dang thun mong gi dngos grub ma lus pa stsal du gsol/__zhes pa lta bus mtshon te so so'i spel tshig ltar 'dod pa'i don la gsol ba gdab/__thugs rgyud bskul bar dmigs te/__oM AHhU~M hrIHbadz+ra gu ru d+he ba d+hA ki nI sarba sid+d+hi pha la hU~M AH__stong phrag sogs ci nus dang /__srung 'khor la bkod pa'i sngags gzhan rnams kyang brgya rtsa nas bdun yan chad ci rigs pa bzla/__skabs su/__bdag mdun gyi thugs ka nas sngags kyi 'od zer 'phros pas bsrung bya la gnod pa'i gdon bgegs thams cad rang dbang med par bkug__/bka' bsgo ba'i tshul gyis sngags bzlas pas bdag gi dbang du 'dus te gang bcol ba'i las thams cad sgrub par bsams la bzlas pa'ang bya/__mthar mchod cing bstod la/__bla ma rtsa ba gsum gyi lha tshogs 'khor dang bcas pa rnams bskyed gzhi'i rten 'di la ji srid 'byung ba bzhi'i gnod pas ma zhig gi bar du brtan pa bzhugs su gsol/__brtan par bzhugs nas kyang 'di 'chang ba po la lha srin sde brgyad kyi gnod pa thams cad zhi zhing srung ba dang /__mchog dang thun mong gi dngos grub ma lus pa stsal du gsol/__zhes gsol ba btab pas/__lha tshogs rnams kyis kyang de de bzhin du bgyi'o/__/zhes dgyes pa chen pos zhal gyis bzhes te rten dang brten par bcas pa thams cad bde stong gi ngo bor 'od du zhu ba yongs su gyur pa las bris pa'i 'khor lo'i rnam pa ji lta ba 'dod don thams cad thogs pa med par bsgrub pa'i nus byin mchog tu 'bar ba dang /__bsgrub bya yang ming yig so so'i rnam par gyur bar bsam/__slar yang 'khor lo'i sngags dang dbyangs gsal rten snying spel nas bzlas pa'i nus pa me tog la bstims te/__'dir ni rten dang lhan cig tu/__/sogs kyi mthar/__rten 'brel snying po dang /__su pra tiSh+Tha mang du brjod cing me tog 'thor/__bkra shis rgyas par brjod/__bdag nyid rten dang brten par bcas pa 'od gsal gyi dbyings su thim/__slar yang snang stong zung 'jug lha yi skur gyur par bsams la bsngo smon shis brjod bya'o/__/gal te bdag bskyed gzhan dang sbyar na/__rta mgrin phyag rdor phur pa sogs rang gi rgyun gyi yi dam gang yang rung ba'i skyabs sems nas bzlas pa'i bar sngon du 'gro bas/__'khor lo'i bgegs bsal ba nas/__rang byung sngags kyi yi ge'i phreng ba rnams/__zhes pa'i bar gong ltar la/__lhag pa'i lha mchog gtso bor gyur pa yi/__/bla ma yi dam mkha' 'gro'i sprin phung 'khrigs/__/rnam rol ma 'gags sgyu 'phrul rdo rje'i sprin/__/gang 'dul mos pa'i dpal du lham mer gsal/__/ces sbyar/__spyan 'dren nas bzung gong du bshad pa ltar byas pas kyang rung ngo /__/gong ltar yang rab gnas kyi bya ba tshar ma thag tsakra sgrub pa po rang nyid kyis blangs la srog yig ma nyams pa gru bzhir ltebs bsgrub bya'i srog khams dang mthun pa'i srad bus 'byung ba mthun bsdebs kyi mdangs dang mthun par lag len ltar dkris/__dmigs bsal bsgrim tshas bshad pa yod na des dril/_phyi nas kyang khams mthun gyi dar ras sogs kyis g.yog__/gza' skar 'phrod sbyor bzang po'i nyin/__grub na bsgrub bya mdun du 'khod pa la/__sbyong ba gsum dang /__bkru byabs sngon du 'gro bas tsakra'i yi ge rnams ngo bo lha la rnam pa yi ge'i gzugs su shar ba/__byed las 'chang ba tsam gyis don thams cad thogs pa med par bsgrub nus pa'i byin rlabs dang dngos grub kyi gter chen por mos su bcug la gnas gsum du bzhag ste/__rtsa gsum gyi snying po bzla zhing /__lha nyid sngags kyi gzugs 'chang ba/__/rtsa ba gsum gyi byin rlabs kyis/__/bsgrub bya'i sgo gsum srung ba dang /__/mchog thun dngos grub stsal du gsol/__/oM AHhU~M hrIHbadz+ra gu ru d+he ba d+hA ki nI kA ya wA ka tsit+ta a d+hiSh+Tha na a b+hi Shiny+tsA mi/__zhes byin brlabs la mgul du drod dang ma bral bar gdags so/__/'dogs lugs srung ba la srog yig zhal rang dang /__zlog pa la phyir bstan par gsungs/__mchan/__slar yang bsrung ba bya zhing srung 'khor bsgom/__bden tshig dang /__shis brjod rgyas par bya/__ma grub kyang tsakra mi gzhan gyi lag mi dmigs gsal ma gtogs/__brgyud par bsgrub bya rang nyid kyis gdags so/__/de lta bu'i rim pa rnams yi dam lha yi bsnyen pa las su rung zhing /__gzhan phan byang chub kyi sems dang ldan pa'i rnal 'byor pas tshul bzhin du bsgrubs na gzhung nas bshad pa'i phan yon rnams 'byung ba ni nges pa'o/__/zhes pa'ang gter gzhung rtsa ba'i dgongs pa dang /__rig 'dzin gter bdag gling pas mdzad pa'i rgyun khyer dang /__'khor lo'i rab gnas bya tshul sogs sbyar te shin tu gsal bar mtsho skyes bla ma dgyes pa'i 'bangs mkhyen brtse'i dbang pos bris pa'i dge bas mkha' khyab kyi 'gro kun bsam pa'i don thams cad chos dang mthun par yid bzhin du 'grub pa'i rgyur gyur cig/__/sarba dA mang+ga laM b+ha ba tu//__//
