JKW-KABUM-21-ZHA-003-003-wylie
thugs chen sgom bzlas bde chen zhing du bgrod pa'i lam bzang /__ 'phags pa thugs rje chen po'i bsgom bzlas bde chen zhing du bgrod pa'i lam bzang zhes bya ba bzhugs so/__/bla ma dkon mchog gsum la skyabs su mchi/__/gzhan don byang chub bsgrub par sems bskyed do/__/'gro kun bde ldan sdug bsngal kun dang bral/__/bde las nyams med btang snyoms la gnas shog__/AH__chos kun gdod nas 'od gsal stong nyid ngang /__/rten cing 'brel 'byung sgyu ma'i rnam rol las/__/phyi snod thams cad po tA la yi zhing /__/bkod pa rab rdzogs gzhal med khang chen dbus/__/pad zla'i steng du hrIHyig dkar gsal las/__/bdag nyid thugs rje chen po spyan ras gzigs/__/ston zla'i mdog can zhal gcig phyag bzhi pa/__/zhi zhing 'dzum la mtshan dpe'i nyams 'gyur rdzogs/__/rtsa ba'i phyag gnyis thugs kar thal mo sbyar/__/g.yas g.yon 'og ma shel phreng pad dkar bsnams/__/dar dang rin chen sna tshogs rgyan gyis spras/__/kr-iSh+Na sa ra'i pags pas nu g.yon bkab/__/snang stong zung 'jug 'od kyi dkyil 'khor dbus/__/zhabs zung rdo rje'i skyil krung drang por bzhugs/__/rtsa gsum rab 'byams 'dus pa'i ngo bor rdzogs/__/spyi gtsug chu skyes zla ba'i gdan gyi steng /__/rigs bdag bla ma mgon po 'od dpag med/__/dmar gsal mnyam bzhag bdud rtsi'i lhung bzed bsnams/__/chos gos gsum gsol mtshan dpe'i dpal du 'bar/__/dam tshig ye shes dbyer med chen por gyur/__/bdag dang mtha' yas sems can ma lus kun/__/bla ma 'od dpag med la gsol ba 'debs/__/'gal rkyen kun zhi tshe bsod dpal 'byor 'phel/__/bde ba can du skye bar byin gyis rlobs/__/oM a mA ra Ni dzI ban+ti ye swA hA/__zhes ci rigs bzla/__rang gi thugs kar zla steng hrIHyig mthar/__/yi ge drug pa'i sngags kyi 'od zer gyis/__/'phags mchod 'gro kun sgrib sbyangs bdag byin brlab/__/snang grags lha sngags ye shes 'khor lor gyur/__/oM ma Ni pad+me hU~M hrIH__zhes ci nus bzlas mthar/__dge ba 'di yis mtha' yas sems can kun/__/tshe ring nad med bsam don chos bzhin 'grub/__/phyi ma bde ba can gyi zhing skyes nas/__/myur du byang chub go 'phang thob par shog__/ces dang /__spro zhing nus na bzang po spyod pa la sogs pa'i smon lam rgya cher gdab par bya'o/__/zhes pa'ang chen po'i rigs las son pa'i dad pa dang ldan pas gsol ba btab pa'i ngor 'jam dbyangs mkhyen brtse'i dbang pos bris pa 'brel tshad bde ba can du skye ba'i rgyur gyur cig/_!__/
