JKW-KABUM-20-WA-001-086

Previous Text Back to Volume PageNext Text

ལྷར་བཅས་བསྟན་འགྲོ་ཡོངས་ཀྱི་གཙུག་རྒྱན་འཇམ་མགོན་བླ་མ་རིན་པོ་ཆེར་ཕུལ་བ།

Wylie title	lhar bcas bstan 'gro yongs kyi gtsug rgyan 'jam mgon bla ma rin po cher phul ba
Location	mkhyen brtse'i bka' 'bum Volume 20, sde tshan 1, Text 86, Pages 154-156 (Folios 77b2 to 78b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. lhar bcas bstan 'gro yongs kyi gtsug rgyan 'jam mgon bla ma rin po cher phul ba. In 'jam dbyangs mkhyen brtse'i dbang po'i bka' 'bum, Vol. 20: 154-156. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog
Colophon	ཅེས་ཞུ་གསོལ་འདེབས་མཚོན་རྣམ་པར་དཀར་བའི་ལྷ་རེག །རིན་ཆེན་དང་པོ་སྲང་འཁོར་ལྔ་བཅས་ཟླ་༣ཚེས་༢༥དགེ་བར་བྱ་བྲལ་བ་འཇམ་དབྱངས་མཁྱེན་བརྩེས་དངོས་པོ་ཀུན་གྱིས་བཏུད་དེ་ཞུ་ཆུང་དགེ།
	ces zhu gsol 'debs mtshon rnam par dkar ba'i lha reg_/rin chen dang po srang 'khor lnga bcas zla 3 tshes 25 dge bar bya bral ba 'jam dbyangs mkhyen brtses dngos po kun gyis btud de zhu chung dge/

Tibetan Text

Wylie

[edit]

ལྷར་བཅས་བསྟན་འགྲོ་ཡོངས་ཀྱི་གཙུག་རྒྱན་འཇམ་མགོན་བླ་མ་རིན་པོ་ཆེའི་ཞབས་པད་དུ། གུས་གསོལ། སྐུ་བསོད་ནམས་ཆེན་པོའི་གཟི་བྱིན་ལྷམ་མེར་གསལ། །གསུང་ཆོས་སྒོ་མཐའ་ཡས་པ་ལྷང་ངེར་སྤྲོ། ཐུགས་ཤེས་དང་ཤེས་བྱ་མི་ཕྱེད་པའི་ཡོན་ཏན་དང་ཕྲིན་ལས་གཞལ་དུ་མེད་པ་ནས་བཀའ་གླེགས་ཞིབ་མོ་ནོར་བུའི་མུ་ཀུ་ཊ་སྐྱེས་བཟང་པོའི་འཕྱངས་འཕྲུལ་ཅན་སྤྱི་བོར་སོན་པས་གུས་སྤྲོ་ཕན་ཚུན་འགྲན་བཞིན་འཕེལ་བ་ནི་ཟླ་བའི་ཆ་ཤས་གངས་ལ་འཛེགས་པ་ཇི་ལྟ་བའོ། །འདི་ན་མགོན་པོ་གང་གི་ཐུགས་རྗེའི་སྐྱབས་སྦྱིན་གྱི་འོག་ཏུ་ངལ་འཚོ་བའི་དགེ་སྦྱོང་རྒན་པོའང་། འདུ་ཁམས་ཤིན་ཏུ་མི་བདེ་བ་རྒྱུན་ཆགས་པ་ལས་བདག་གིར་བགྱི་བའི་ཚུལ་དུ་ཁུར་བཟོད་པར་བྱས་ཏེ་བསམ་གཏན་གྱི་ཁང་བུར་ཉམ་ཆུང་སེམས་ཆུང་འཁོས་ཆུང་དུ་འཁུམས་པར་མཚམས་རྒྱའི་མིང་གིས་སྒྲོ་བཏགས་ཏེ་མཆིས། མཚམས་ཞུས། ཇི་ཕེབས་ཤར་ཕྱོགས་ཏི་ཕུ་ཚུན་ཞབས་སེན་བཀྲ་ཤིས་ཀྱི་རེ་ཁཱ་བཀོད་དེ། འབྲེལ་ཚད་དོན་ལྡན་གྱི་མཛད་པ་མཁའ་ཁྱབ་ཏུ་སྣང་བ་ནས་དེང་འཆི་མེད་གྲུབ་པས་བྱིན་གྱིས་བརླབས་པའི་ཆོས་གྲྭར་ས་སྤྱོད་དམ་པའི་ཐུགས་ཀྱི་བཞེད་སྐོང་ཡེ་ཤེས་མགོན་པོ་རྣམ་པར་རོལ་པའི་ཞིང་ཁམས་འདུ་མཛད་པའི་ཆོ་འཕྲུལ་ལ་ཞུགས་པ་སོགས་བཀའ་དྲིན་བསམ་ལས་འདས། ན་ནིང་བདེ་གཟིར་སྐབས་སེམས་ཅན་སྤྱིའི་ལས་ཤུགས་བཟློག་དཀའ་ཞིང་། ལྷག་པར་སྙིགས་མའི་དུས་ཀྱི་སྐྱེ་བོའི་བསམ་སྤྱོད་སྨྱོན་པའི་ཟློས་གར་ལ་མཛད་ཐབས་བྲལ་བ་གཞིར་བཅས། ཟཱ་ལ་སོགས་དུས་འགྱུར་མི་བཟད་པ་དེ་བཞིན་ཀླ་ཀློའི་འཇུག་པས་བསྟན་པའི་ལྷག་ཞབས་སྡུད་པ་ལ་ཡིད་སྐྱོའང་བྱ་ཐབས་བྲལ། ཕན་མཛད་རེ་རེ་ཙམ་ཡོད་དུ་ཟིན་ཀྱང་ཡིད་སྲུབས་ཀྱི་ཕྲིན་ལས་པ་རྣམས་ཀྱི་གཞན་དབང་གིས་དུག་སྦྲུལ་གདུག་པ་ཅན་གླལ་པའི་ཉེ་ལོགས་ཀྱི་མར་མེ་བཞིན་དུ་གྱུར། དེ་ལྟ་མོད་ཀྱི་སྐྱེས་བུ་དམ་པའི་ཐུགས་བསྐྱེད་ནི་ཚད་མེད་པས་ཇོ་ཤཱཀ་རིན་པོ་ཆེ་རྣམ་གཉིས་སོགས་ཀྱི་སྤྱན་སྔར་རྒྱལ་བསྟན་ལྔ་ཕྲག་ཐ་མ་ཕྱིར་བསྲེང་བའི་སྨོན་གསོལ་གྱི་བཀའ་དྲིན་ཀྱང་ཅི་གནང་ཞེས་གསོལ་བ་འདེབས་པ་ལགས། །སླད་མའི་ཆར་ཡང་། ཉི་མ་བཞིན་དུ་མཚན་དཔེའི་གཟི་བརྗིད་བསྐལ་བརྒྱར་གསལ། །ཟླ་སྟེར་བདུད་རྩིའི་སྙེམས་པ་འཕྲོག་པའི་ཆོས་ཆར་འབེབས། །རྫོགས་ལྡན་སྤྲིན་ལྟར་ཕན་བདེའི་ཕྲིན་ལས་ཀུན་ཏུ་ཁྱབ། །དམན་པ་བདག་ཀྱང་བྱང་ཆུབ་བར་དུ་དབུགས་འབྱིན་མཛོད། །ཅེས་ཞུ་གསོལ་འདེབས་མཚོན་རྣམ་པར་དཀར་བའི་ལྷ་རེག །རིན་ཆེན་དང་པོ་སྲང་འཁོར་ལྔ་བཅས་ཟླ་༣ཚེས་༢༥དགེ་བར་བྱ་བྲལ་བ་འཇམ་དབྱངས་མཁྱེན་བརྩེས་དངོས་པོ་ཀུན་གྱིས་བཏུད་དེ་ཞུ་ཆུང་དགེ།། །། ༈

[edit]

lhar bcas bstan 'gro yongs kyi gtsug rgyan 'jam mgon bla ma rin po cher phul ba/ lhar bcas bstan 'gro yongs kyi gtsug rgyan 'jam mgon bla ma rin po che'i zhabs pad du/_gus gsol/_sku bsod nams chen po'i gzi byin lham mer gsal/_/gsung chos sgo mtha' yas pa lhang nger spro/_thugs shes dang shes bya mi phyed pa'i yon tan dang phrin las gzhal du med pa nas bka' glegs zhib mo nor bu'i mu ku Ta skyes bzang po'i 'phyangs 'phrul can spyi bor son pas gus spro phan tshun 'gran bzhin 'phel ba ni zla ba'i cha shas gangs la 'dzegs pa ji lta ba'o/_/'di na mgon po gang gi thugs rje'i skyabs sbyin gyi 'og tu ngal 'tsho ba'i dge sbyong rgan po'ang /_'du khams shin tu mi bde ba rgyun chags pa las bdag gir bgyi ba'i tshul du khur bzod par byas te bsam gtan gyi khang bur nyam chung sems chung 'khos chung du 'khums par mtshams rgya'i ming gis sgro btags te mchis/_mtshams zhus/_ji phebs shar phyogs ti phu tshun zhabs sen bkra shis kyi re khA bkod de/_'brel tshad don ldan gyi mdzad pa mkha' khyab tu snang ba nas deng 'chi med grub pas byin gyis brlabs pa'i chos grwar sa spyod dam pa'i thugs kyi bzhed skong ye shes mgon po rnam par rol pa'i zhing khams 'du mdzad pa'i cho 'phrul la zhugs pa sogs bka' drin bsam las 'das/_na ning bde gzir skabs sems can spyi'i las shugs bzlog dka' zhing /_lhag par snyigs ma'i dus kyi skye bo'i bsam spyod smyon pa'i zlos gar la mdzad thabs bral ba gzhir bcas/_zA la sogs dus 'gyur mi bzad pa de bzhin kla klo'i 'jug pas bstan pa'i lhag zhabs sdud pa la yid skyo'ang bya thabs bral/_phan mdzad re re tsam yod du zin kyang yid srubs kyi phrin las pa rnams kyi gzhan dbang gis dug sbrul gdug pa can glal pa'i nye logs kyi mar me bzhin du gyur/_de lta mod kyi skyes bu dam pa'i thugs bskyed ni tshad med pas jo shAka rin po che rnam gnyis sogs kyi spyan sngar rgyal bstan lnga phrag tha ma phyir bsreng ba'i smon gsol gyi bka' drin kyang ci gnang zhes gsol ba 'debs pa lags/_/slad ma'i char yang /_nyi ma bzhin du mtshan dpe'i gzi brjid bskal brgyar gsal/_/zla ster bdud rtsi'i snyems pa 'phrog pa'i chos char 'bebs/_/rdzogs ldan sprin ltar phan bde'i phrin las kun tu khyab/_/dman pa bdag kyang byang chub bar du dbugs 'byin mdzod/_/ces zhu gsol 'debs mtshon rnam par dkar ba'i lha reg_/rin chen dang po srang 'khor lnga bcas zla 3tshes 25dge bar bya bral ba 'jam dbyangs mkhyen brtses dngos po kun gyis btud de zhu chung dge//__//_!