JKW-KABUM-20-WA-001-085-wylie
sangs rgyas kun gyi ye shes sku/__zhes pa'i dbu can/ na maHshrI gu ra be/_sangs rgyas kun gyi ye shes sku/_/khyab bdag dpal ldan bla ma yis/_/don brgyud dgongs pa'i byin rlabs kyis/_/khyod la rtag tu shis par mdzod/_/dam pas bsngags pa'i dben gnas su/_/rtse gcig sgrub la gzhol ba gang /_/rnam dkar spyod tshul gong 'phel bzhin/_/'tsho khams dge bar bzhugs lags sam/_/'di na mchis pa'i dge sbyong gzugs/_/mchog gsum thugs rje la brten nas/_/nyer 'tshe'i sbyor ba dang bral bzhin/_/dam chos 'chad nyan spel bar mchis/_/slar yang bslab bya'i snying po ni/_/nam 'chi cha med dran pa dang /_/srid las nges par 'byung ba'i blos/_/byang chub sems gnyis rtag tu bsgom/_/khyab bdag rig stong gnyug ma'i gshis/_/brjod bral ngang las ma g.yos bzhin/_/snang grags rtog tshogs lha tshogs dang /_/ye shes chen pos rol par khyer/_/de ltar rtogs na bla ma dang /_/nam yang 'bral bar mi srid do/_/thugs yid gcig tu 'dres pa'i tshe/_/mchog gi dngos grub thob par nges/_/mdor na chos bzhin spyod pa la/_/'gal rkyen nam yang mi 'byung zhing /_/mthun rkyen phun sum tshogs pa yis/_/don gnyis lhun gyis 'grub gyur cig_/sarba dA ka l+yA NaM b+ha ba tu//__//_!_
