མེ་རྟ་ལོར་སེ་ནཱ་ཤུ་བྷའི་གཉེན་སྟོན་སྐབས་མཁན་ཆེན་རྡོ་རྗེ་འཆང་ནས་ལེགས་འབུལ་གནང་བའི་ཡི་གེ།

🚧 This website is under continued development. We appreciate your patience!

Previous Text Back to Volume PageNext Text

Wylie title	me rta lor se nA shu b+ha'i gnyen ston skabs mkhan chen rdo rje 'chang nas legs 'bul gnang ba'i yi ge
Location	mkhyen brtse'i bka' 'bum Volume 20, sde tshan 1, Text 34, Pages 64-66 (Folios 32b2 to 33b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. me rta lor se nA shu b+ha'i gnyen ston skabs mkhan chen rdo rje 'chang nas legs 'bul gnang ba'i yi ge. In 'jam dbyangs mkhyen brtse'i dbang po'i bka' 'bum, Vol. 20: 64-66. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

34 64-66	མེ་རྟ་ལོར་སེ་ནཱ་ཤུ་བྷའི་གཉེན་སྟོན་སྐབས་མཁན་ཆེན་རྡོ་རྗེ་འཆང་ནས་ལེགས་འབུལ་གནང་བའི་ཡི་གེ། me rta lor se nA shu b+ha'i gnyen ston skabs mkhan chen rdo rje 'chang nas legs 'bul gnang ba'i yi ge Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

མེ་རྟ་ལོར་སེ་ནཱ་ཤུ་བྷའི་གཉེན་སྟོན་སྐབས་མཁན་ཆེན་རྡོ་རྗེ་འཆང་ནས་ལེགས་འབུལ་གནང་བའི་ཡི་གེ་དཔྱིད་ཀྱི་སྣང་བའོ། ། ལཀྵྨཱིཤཱནྟབྷབཱབདཱཔཊུཾ། ཤུདྡྷསྱདཱིཔྟནཱམཔྲསྟཱརེ། ཏྲཻརཏྣཾརུཙིཀཱིནྟིནཱམཔ བྱཱམངྒལྱསུཔུཥྤབཱཪྵདཱ། གང་མཚན་ཐོས་པའི་ལེགས་བྱས་རྨད་བྱུང་གིས། །སྲིད་ཞིའི་ཕུན་ཚོགས་མཐའ་དག་སྦྱིན་མཁས་པ། །རིན་ཆེན་གསུམ་ཞེས་གྲགས་པའི་སྣང་བ་ཡིས། །རྣམ་ཀུན་ཤིས་པའི་མེ་ཏོག་ཆར་དུ་བསྙིལ། ༡ །འཆི་མེད་གྲུབ་པའི་དཔྱིད་ཀྱིས་འཇིག་རྟེན་ན། །ངལ་འཚོའི་སྤྲིང་ཡིག་གསར་པས་མཛེས་གྱུར་པ། །ཚེ་དཔག་མེད་མགོན་ཐུགས་རྗེའི་ཟླ་རིས་ཀྱིས། །མི་བདག་འཁོར་བཅས་འཚོ་གཞེས་བསྐལ་བརྒྱར་བསྲིངས། ༢ །རབ་དམར་དབང་གི་མཆིལ་པ་རྣོན་པོ་དང་། །འགྲོགས་པའི་ཡེ་ཤེས་སྣང་བ་སྤྲོས་ཙམ་གྱིས། །ཁམས་གསུམ་སྡུད་མཛད་རིག་བྱེད་དགའ་བ་ཡིས། །བརྟན་གཡོའི་ཕུན་ཚོགས་ཇི་སྙེད་བདག་གིར་མཛོད། ༣ ། གང་འདུལ་སྒྱུ་འཕྲུལ་དྲྭ་བའི་རྣམ་རོལ་གར། །རྡོ་རྗེའི་ཆོས་སྲུང་རྒྱ་མཚོའི་ཕྲིན་ལས་ཀྱིས། །ཉེ་བར་འཚེ་བའི་ཚོགས་རྣམས་མཐར་བྱས་ནས། །བཞེད་དགུའི་དོན་ཀུན་འབད་པ་མེད་པར་སྒྲུབས། ༤ །བསོད་ནམས་སྤྲིན་གྱི་འཛུམ་དཀར་གཡོ་བ་ལས། །དགོས་འདོད་ནོར་བུའི་གྲུ་ཆར་འབེབས་མཁས་པ། །གནོད་གནས་དབང་པོའི་འབྱོར་པའི་དཔག་བསམ་གྱིས། །རྫོགས་ལྡན་དང་པོའི་དགའ་སྟོན་གསར་དུ་དཀྲིགས། ༥ །ཞེས་ཤིས་པར་བྱ་བའི་ཚིག་གི་མེ་ཏོག་ཅུང་ཟད་སྔོན་དུ་གཏོར་ནས། དེང་གི་ཆར་ཡང་དུས་ཕུན་སུམ་ཚོགས་པའི་སྐབས་འདིར། ཡོངས་རྫོགས་བསྟན་པ་རྒྱ་མཚོའི་སྦྱིན་བདག །རིས་བྲལ་འགྲོ་བ་ཀུན་གྱི་གཉེན་གཅིག །བསོད་ནམས་སྟོབས་ཀྱི་འཁོར་ལོས་བསྒྱུར་བ་མི་བདག་སའི་ཚངས་པ་ཆེན་པོ་གང་གི་ཞལ་སྔ་ནས། འགྲོ་བའི་བདེ་སྐྱིད་ནི་སངས་རྒྱས་ཀྱི་བསྟན་པ་རིན་པོ་ཆེར་རགས་ལས་ཤིང་། དེ་ཡང་ཆོས་ལྡན་གྱི་རྒྱལ་པོའི་བདག་རྐྱེན་ལ་བལྟོས་པས་ན། དེ་ཉིད་མི་ཉམས་ཤིང་ཡུན་དུ་བརྟན་པ་ནི་སྤྲུལ་པའི་གདུང་རབས་ཟམ་མ་ཆད་བར་ཕེབས་པ་ཁོ་ན་ལས་གཞན་དུ་མ་དམིགས་པའི་ཕྱིར། ལྷག་པའི་ཐུགས་བསྐྱེད་རྣམ་པར་དག་པས་མདུན་བདར་ཏེ། རྒྱལ་སྲིད་དཔག་བསམ་གྱི་ལྗོན་པའི་རྩ་བ་གཡོ་མེད་དུ་བརླིང་པའི་སླད་རིགས་གཟུགས་འབྱོར་པའི་ཡོན་ཏན་འབུམ་གྱིས་མངོན་པར་མཐོ་བའི་བཙུན་མོ་རིན་པོ་ཆེ་གང་ཉིད། སྡེ་བཞི་དང་རྒྱལ་ཐབས་ཀྱི་ཡན་ལག་བདུན་གྱིས་སྒེག་པའི་དཔལ་གྱི་འབྱོར་པ་ཆེས་རྨད་དུ་བྱུང་བའི་སྒོ་ནས་ཁབ་ཏུ་བཞེས་པར། ཁོ་བོ་ཅག་བྲང་ཏིའི་རིགས་སྐྱེས་ཨེ་ཝྃ་ཐར་རྩེ་མཁན་མིང་པའང་གནའ་ནས་ད་བར་མཆོད་ཡོན་ཆོས་དམ་གྱི་འབྲེལ་ཟབ་ཐུན་མིན་དུ་གྱུར་པས་དགའ་བ་དང་སྤྲོ་བ་ཕན་ཚུན་འགྲན་བཞིན་དུ་འཕེལ་བ་དང་ཆབ་གཅིག །རྣམ་པ་ཀུན་ཏུ་དགེ་ལེགས་ཤིས་པའི་རྟེན་འབྱུང་གི་སྒོ་འཕར་བརྒྱ་ཕྲག་ཏུ་དབྱེ་བའི་ལེགས་གསོལ་དངོས་འབུལ་གྱི་བདོག་འབྱོར་ཟེག་མ་ཙམ་བསྟར་བར། ཐོག་མར་བཀྲ་ཤིས་པའི་ལྷ་གོས་རབ་དཀར་གངས་རིའི་མདོག་ཅན་སྲིད་དུ་རིང་བ་སོགས། མཐའ་རྟེན་རས་དཀར་ཡུག་བཅས་རྣམ་གྲངས་བཅུ་ཕྲག་གསུམ་ལ་ཉག་མ་བདུན་གྱིས་ལྷག་པ་འབུལ་ལམ་ཞུ་ན་དགྱེས་པའི་སྤྱན་རས་ཀྱིས་ཡུད་ཙམ་རོལ་པ་དང་། འབྱུང་འགྱུར་གྱི་ཆར་ཡང་། སྡེ་བཞི་དགེ་བཅུའི་རྒྱལ་ཐབས་རྨད་བྱུང་གི། །ཆོས་སྲིད་རིགས་བརྒྱུད་འབྱོར་པའི་རྫོགས་ལྡན་སྤྲིན། །ལྷག་པར་འཕེལ་བའི་དགེ་མཚན་གཏམ་གྱི་རྔ། །སྲིད་པ་གསུམ་ན་ཀུན་ཏུ་སྙན་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། ། ༈ ། །

[edit]

me rta lor se nA shu b+ha'i gnyen ston skabs mkhan chen rdo rje 'chang nas legs 'bul gnang ba'i yi ge/ me rta lor se nA shu b+ha'i gnyen ston skabs mkhan chen rdo rje 'chang nas legs 'bul gnang ba'i yi ge dpyid kyi snang ba'o/___/_lak+Sh+mIshAn+tab+habAbadApaTuM/___shud+d+has+yadIp+tanAmaprastAre/___trairat+naMrutsikIn+tinAmapa__byAmang+gal+yasupuSh+pabAR+ShadA/___gang mtshan thos pa'i legs byas rmad byung gis/___/srid zhi'i phun tshogs mtha' dag sbyin mkhas pa/___/rin chen gsum zhes grags pa'i snang ba yis/___/rnam kun shis pa'i me tog char du bsnyil/___1__/'chi med grub pa'i dpyid kyis 'jig rten na/___/ngal 'tsho'i spring yig gsar pas mdzes gyur pa/___/tshe dpag med mgon thugs rje'i zla ris kyis/___/mi bdag 'khor bcas 'tsho gzhes bskal brgyar bsrings/___2__/rab dmar dbang gi mchil pa rnon po dang /___/'grogs pa'i ye shes snang ba spros tsam gyis/___/khams gsum sdud mdzad rig byed dga' ba yis/___/brtan g.yo'i phun tshogs ji snyed bdag gir mdzod/___3_/_gang 'dul sgyu 'phrul drwa ba'i rnam rol gar/___/rdo rje'i chos srung rgya mtsho'i phrin las kyis/___/nye bar 'tshe ba'i tshogs rnams mthar byas nas/___/bzhed dgu'i don kun 'bad pa med par sgrubs/___4__/bsod nams sprin gyi 'dzum dkar g.yo ba las/___/dgos 'dod nor bu'i gru char 'bebs mkhas pa/___/gnod gnas dbang po'i 'byor pa'i dpag bsam gyis/___/rdzogs ldan dang po'i dga' ston gsar du dkrigs/___5__/zhes shis par bya ba'i tshig gi me tog cung zad sngon du gtor nas/___deng gi char yang dus phun sum tshogs pa'i skabs 'dir/___yongs rdzogs bstan pa rgya mtsho'i sbyin bdag__/ris bral 'gro ba kun gyi gnyen gcig__/bsod nams stobs kyi 'khor los bsgyur ba mi bdag sa'i tshangs pa chen po gang gi zhal snga nas/___'gro ba'i bde skyid ni sangs rgyas kyi bstan pa rin po cher rags las shing /___de yang chos ldan gyi rgyal po'i bdag rkyen la bltos pas na/___de nyid mi nyams shing yun du brtan pa ni sprul pa'i gdung rabs zam ma chad bar phebs pa kho na las gzhan du ma dmigs pa'i phyir/___lhag pa'i thugs bskyed rnam par dag pas mdun bdar te/___rgyal srid dpag bsam gyi ljon pa'i rtsa ba g.yo med du brling pa'i slad rigs gzugs 'byor pa'i yon tan 'bum gyis mngon par mtho ba'i btsun mo rin po che gang nyid/___sde bzhi dang rgyal thabs kyi yan lag bdun gyis sgeg pa'i dpal gyi 'byor pa ches rmad du byung ba'i sgo nas khab tu bzhes par/___kho bo cag brang ti'i rigs skyes e wa~M thar rtse mkhan ming pa'ang gna' nas da bar mchod yon chos dam gyi 'brel zab thun min du gyur pas dga' ba dang spro ba phan tshun 'gran bzhin du 'phel ba dang chab gcig__/rnam pa kun tu dge legs shis pa'i rten 'byung gi sgo 'phar brgya phrag tu dbye ba'i legs gsol dngos 'bul gyi bdog 'byor zeg ma tsam bstar bar/___thog mar bkra shis pa'i lha gos rab dkar gangs ri'i mdog can srid du ring ba sogs/___mtha' rten ras dkar yug bcas rnam grangs bcu phrag gsum la nyag ma bdun gyis lhag pa 'bul lam zhu na dgyes pa'i spyan ras kyis yud tsam rol pa dang /___'byung 'gyur gyi char yang /___sde bzhi dge bcu'i rgyal thabs rmad byung gi/___/chos srid rigs brgyud 'byor pa'i rdzogs ldan sprin/___/lhag par 'phel ba'i dge mtshan gtam gyi rnga/___/srid pa gsum na kun tu snyan gyur cig__/sarba dA ka l+yA NaM b+ha ba tu/_/__!__/_/