JKW-KABUM-20-WA-001-033-wylie
lha 'brang bla ma rin 'dzin dpal ldan chos rgyal gyi sprul sku rin po cher khri ston phul ba'i yi ge/ lha 'brang bla ma rin 'dzin dpal ldan chos rgyal gyi sprul sku rin po cher khri ston phul ba'i yi ge legs byas dpyid kyi snye ma'o/___/__#/___/_ts+tshan+dobAk+t+raMnAsas+yaprastAro/_/_sras bcas rgyal ba kun gyi ye shes ni/___/zung 'jug 'chi med grub pa'i skur bzhengs pa/___/tshe dpag med mgon thugs rje'i snang ba yis/___/khyed la rtag tu shis pa sbyin gyur cig__/ces dge legs su bya ba'i tshig sbyor gyi me tog sngon du gtor nas/___deng gi char yang /___mkhas grub rgya mtsho'i cod pan rig 'dzin dpal ldan chos rgyal gyi ye shes sgyu 'phrul drwa ba'i rol gar rnam 'dren mchog sprul rin po che gang nyid/___rje btsun bla ma rim par byon pa rnams kyi chos kyi 'khor los bsgyur ba'i khri 'phang mthon por zhabs pad bkod de/___bstan pa'i sbyin bdag chen pos thog drangs/___mchog dman bar ma'i dad spro'i yid can mtha' klas pas spyi dgos bstan 'gro'i dpal mgon dam par mnga' gsol ba'i tshe na/___kho bo cag brang ti mkhas pa'i rigs skyes e wa~M thar rtse pa'ang /___bla ma gong ma de nyid kyi dus nas mchod yon chos dam gyi 'brel zab thun min du gyur pa la brten/___lhag pa'i bsam pa zla ba tshes pa lta bus kun nas bslang ste/___rgyal ba'i sras kyi myu gu gsar pa gang nyid bskal pa rgya mtshor 'tsho zhing gzhes la chos kyang ston pas rnam mang bstan 'gro'i sman yon chen por 'gyur ba'i mnga' gsol gzengs bstod kyi shis pa brjod pa'i me tog man+dA ra'i phang phung char du bsnyil ba'i rten 'byung mtshon byed sa bcad stong min tsam du/___bkra shis pa'i lha gos rab dkar sogs/___bcas 'bul lam zhus yod pas dgyes pa'i spyan ras kyis btsa' ba dang /___slad ma'i char yang /___gang la brten nas nam yang mi bslu ba'i/___/dkon mchog gsum zhes grags pa'i zla shel gyis/___/dge mtshan bdud rtsi'i 'od rlabs spro ba yis/___/bkra shis snang ba rtag tu rgyas gyur cig__/sarba shre yo b+ha ba tu//___//_!
