JKW-KABUM-18-TSHA-003-007-wylie
grub mtha' gzhan pa/ gzhan yang de dag tu ma 'dus pa'i/__grub mtha' zur pa/__jo zhal/__po shangs/__zhi gcod sogs mang du mchis pa las/_ _jo nang rgyal ba'i ri khrod ni/__kun mkhyen chos sku 'od zer gyi slob ma kun spangs thugs rje brtson 'grus zhes grub pa'i khyu mchog chen po des btab/__de rjes kun mkhyen dol bu pa shes rab rgyal mtshan ni/__spyi ston grags pa rgyal mtshan sogs bla ma sum cu lhag pa las mdo sngags kyi chos tshul rgya mtsho lta bu gsan/__dbus gtsang du grwa skor mdzad pas thams cad mkhyen pa'i grags pas khyab/__so gcig par dze nang du phebs nas mkhas btsun yon tan rgya mtsho las rdo rje'i rnal 'byor zab mo gsan zhing srog rtsol mthar phyin/__de nas gdan sar bzhugs te sku 'bum chen mo bzhengs/__dbu ma gzhan stong pa'i lta ba la thugs nges 'drangs te/__de rtsal du bton pa'i yig cha nges don rgya mtsho dang /__bka' bsdu bzhi pa sogs mang du brtsams/__de'i rgyun jo nang phyogs las rnam rgyal dang /__nya dbon kun dga' dpal sogs kyis bskyangs/__phyis 'jam dbyangs kun dga' grol mchog kyang phebs/__de'i rnam 'phrul rje btsun tA ra nA thas 'phags bod kyi mkhas grub du ma bsten nas mdo sngags rgya mtsho lta bur gsan bsam sgom gsum mdzad pas mkhas shing nyams myong dang ldan par gyur/__gsang sngags gtso bor gyur pa'i bstan bcos kyang pod bco brgyad tham pa mdzad/__rtag brtan phun tshogs gling btab cing dar rgyas che bar byung na'ang /__bar skabs su dus 'gyur gyi dbang gis/__deng sang jo nang du rten gsum sogs ma nyams tsam las brgyud 'dzin cher med la/__phun tshogs gling ni lnga pa rin po ches dge lugs par bsgyur nas dga' ldan phun tshogs gling zhes grags/__chos brgyud 'ga' zhig sngar smos pa ltar bka' 'brug dang /__jo nang kun mkhyen gyi yang slob drung ka bzhi pa rin chen dpal gyis btab pa'i khams dzi thang 'dir sbyor drug gi nyams len gyi rgyun sogs ma nyams par yod/__dgon sogs su yod do//____//__!_ dpal zhwa lu gser khang khra mo ni/__chos rgyal khri srong gi dus lo tsA ba chen po lce khyi 'brug sogs mang du byon pa'i gdung brgyud rnam par dag pa las/__bstan pa phyi dar gyi thog mar dbus gtsang gi mi bcur grags pa'i nang tshan gtsang pa lo ston rdo rje dbang phyug gi slob ma/__lce btsun shes rab 'byung gnas kyis btab ste/__de yang rang gi bla ma lo ston la dgon gnas gar 'debs kyi lung bstan zhus pas/__bla mas phyag mda'i ltongs kha gser gyis bkang ba zhig gnang bas/__da lta'i chos sde chags sa 'dir mdil rtse zhwa lu gsar pa zhig la khel 'dug pas der dgon gnas btab pas 'brel pa rgyu mtshan du byas nas zhwa lu gser skong dang /__phyis tshon rtsi khra bo gsol bas zhwa lu gser khang khra mo zhes grags/__lce btsun nyid rgya gar du byon nas a b+hA ya las sdom rgyun gsar du zhus te spel/__lnga brgya pa rnams kyi gtsug gi nor bu dpal ldan a ti shas rab tu gnas pa'i me tog 'thong zhing /__ri sbugs su gzims skyil phubs te phyag tsha btab pa'i sa 'bum da lta yang bzhugs/__de rjes mgo ye shes g.yung drung gis 'dul ba dang /__paN+Di ta 'bum phrag gsum pa dang /__rngog lo chen pos phar phyin gyi bshad grwa btsugs/__kun mkhyen bu ston rin po che yan chad mkhan thog bcu gcig tsam gyis 'dul ba a b+hA ya'i sdom rgyun dang /__phar phyin rngog lugs gtso bor bton/__phyis su rgyal po chen po rnam thos sras kyi sprul pa sku zhang grags pa rgyal mtshan gyis lcags sprel lo rtsod pa'i dus kyi thams cad mkhyen pa khro phu bu ston rin po che gdan sar spyan drangs/__de nas bzung /__sdom rgyun kha che paN chen lugs dang /__mdo sngags gnyis ka'i sgo nas grub mtha' bu lugs zhes gangs can mkhas pa rnams kyi rna ba'i rgyan du gyur/__de yang ma byon pa'i sangs rgyas rab gsal gyi rnam 'phrul kun mkhyen 'di nyid ni/__'jam dpal rtsa rgyud las/__yi ge ra ra lung /__dang pa bu ston/__dang por/__blo ldan gang zhig rab 'byung gsungs/__/ston pa'i bstan pa gsal byed pa/__/'byung bar 'gyur pa the tshom med/__/ces rten brten par bcas pa lung gis gsal bar bstan pa bzhin/__gtsang shab smad sgom gnas zhes bya bar brag ston rgyal mtshan dpal bzang gi sras su lcags pho rta yi lor 'khrungs/__chung ngu nas 'jam dpal dpa' bos rjes su bzung /__khro phu sems dpa' chen po/__rang gi mes po tshul khrims bzang po/__mkhan chen bzang po dpal grags pa gzhon nu/__thar lo nyi ma rgyal mtshan/__bla ma dpal ldan seng+ge/__bla ma rdo rje rgyal mtshan/__'phags 'od yon tan rgya mtsho sogs las/__bzo gso sgra tshad/__nang rigs pa sde snod rgyud sde dang bcas pa/__zhar byung rig gnas chung ba lnga ste/__mdor na gangs can gyi ljongs su rgyun bzhugs so cog gi gtsug lag rab 'byams la mang du thos pa'i mthar son pas slob dpon dbyig gnyen gyi spun zlar 'dzegs/__de dag gi don la bsam byung gis dpyad pa yongs su rdzogs pas rig par smra ba rnams kyi khengs pa'i ru tshon brtul nas phyogs glang dang chos kyi grags pa'i brtul zhugs bzung /__khyad par pha rol tu phyin pa'i sde snod rgya mtsho lta bu 'chad cing rtsom pa la shing rta chen po klu thogs dang /_'phags pa lha sogs kyi rjes su son/__rgyud sde bzhi'i nges gsang 'grol ba'i tshe rdo rje 'dzin pa ngur sgrig gi gar gyis rol par nges pa rnyed/__dpal gsang ba 'dus pa dang /__dus kyi 'khor lo sogs la brten nas mchog gi dngos grub mngon du gyur/__sku gsung thugs kyi rten bsam gyi mi khyad pa bzhengs/__bka' bstan bzhengs pa'i tshe ma tshang ba bcug__/lhag pa bton pa sogs dag ther 'gran zla dang bral bar mdzad las bde bar gshegs bsras dang slob mar bcas pa'i phrin las dus gcig tu bsgrubs/__dpal ldan sa skya pa bla ma dam pa sogs kyis yongs 'dzin du bkur/__snyan grags kyis sa steng thams cad khyab pas rgya nag rgyal po tho gon the mur khA dang /__rgya nag chos kyi rgyal po puN+ya mA la sogs pas kyang bsngags pa'i springs yig gis mchod/__zhwa lu mthil du/__dge 'dun sum stong brgyad brgya dang /__ri sbugs su sde snod 'dzin pa 'dag sbyar chu bug sgo la bzhugs pa'i bshes gnyen lnga brgya tsam re 'dus/__rgyud sde bzhi dang 'brel ba'i dbang lung man ngag bsam gyis mi khyab pa 'chad spel mdzad/__phyis re lnga par gdan sa dngos thugs sras lo tsA ba rin chen rnam rgyal la gtad nas/__rje nyid ri sbug tu kun spangs mdzad de thugs dam zab mo la rtse gcig tu gzhol/__mdor na 'khor lo gsum gyi phyag rjes re re nas bsams kyang 'di kho na sku tshe hril por mdzad dam snyam pa yod/__dam pa'i chos ma bsgyur ba rnams bsgyur/__bsgyur ba rnams zhu chen byas/__hor kong bsabs/__'grel bshad kyis bkral/__thun mong dang thun mong ma yin pa'i chos thams cad phas bu gcig la ster ba lta bur mdzad pas bka' drin bsam gyis mi khyab/_legs bshad gsung rtsom yang sngags phyogs la pod chen dang 18/__mdo phyogs rig gnas dang bcas pa la pod bzhugs/__mthar don lnga par dga' ldan chos kyi 'dun sar gshegs/__de nas gdan sar lo tsA ba rin chen rnam rgyal bzhugs/__phrin las kyi rgyun ni gdan sa rang du rdo rje 'chang mkhyen rab chos rje/__lo chen chos skyong bzang po mtshungs med tshar pa chos rje yab sras sogs mkhas grub bsam gyis khyab pa zhig byon pa dang /__rje nyid kyi dngos slob mkhas grub khyung po lhas pa dang /__gong gsum pa las rgyal ba tsong kha pa chen pos gsan pa dang /__thugs sras rin po che'i slob ma bkra shis rin chen las ngor chen rdo rje 'chang gis gsan pa sogs/__sa dge kar 'brug gi grub mtha' thams cad la rje 'di las brgyud pa'i dbang dang rgyud bshad man ngag gis khyab pas bsam dpyod kyi yul las 'das shing /__deng sang yang rgyud sde bzhi'i smin grol dang sgrub mchod kyi srol ma nub par bzhugs pa'i tshul mdo tsam brjod na/__thog mar rnal 'byor chen po bla med pa'i rgyud la/__thabs dang /_shes rab/__gnyis su med pa'i rgyud gsum las/__dang po gnyis su med pa'i rgyud la/__dpal dus kyi 'khor lo sku gsung thugs yongs rdzogs kyi dkyil 'khor lha634/__thugs gtso bor ston pa'i dkyil 'khor/__dus 'khor sdom chen lha72/__gnyis pa shes rab gtso bor ston pa'i rgyud la/__rigs drug cha mnyam du ston pa he ru ka'i rigs/__rnam snang gi rigs/__rdo rje nyi ma'i rigs/__pad+ma ka ra dbang gi rigs/__rta mchog gi rigs/__rdo rje 'chang gi rigs dang drug las/__dang po ni/__dpal sangs rgyas thams cad mnyam par sbyor ba rigs drug bsdus pa'i dkyil 'khor lha51/__gnyis pa ni/__grub chen lU hi pa'i lugs kyi bde mchog 'khor lo lha62/__grub chen nag po pa'i lugs kyi bde mchog lha62/__grub chen rdo rje dril bu pa'i lugs kyi bde mchog phyi dkyil la lha lnga/__lus dkyil dang bcas pa/__slob dpon l+wa ba pa'i lugs kyi bde mchog sbyangs pa'i yon tan bcu gnyis kyi dkyil 'khor lha13/__slob dpon pad+ma badz+ra gyi lugs kyi 'khor lo bde mchog spyan ras gzigs pad+ma drwa ba lha20/__'khor lo bde mchog 'dus pa 'phags lugs dang mthun par bshad pa sdom pa 'byung ba lha12/__13grub chen 'di brgyud pad+ma'i rigs bde chen ral gcig ma'i dbang ka chad pas de'i tshab tu gsar btsugs/__nA ro pa'i lugs kyi mkha' spyod rdo rje rnal 'byor ma ste bde mchog gi skor dang /__dpal bir wa pa'i lugs kyi kye rdor man ngag lugs9/__grub chen ku ku ri pas legs par bkral ba'i rngog dkyil bdun gyi ya gyal ma hA ma ya lha lnga rnams so/__/gnyis pa ni/__grub chen 'phags pa lha'i lugs kyi dpal rdo rje gdan bzhi lha mang /__lnga pa ni/__slob dpon nyi ma sbas pa'i lugs kyi sgrol ma lha bcu bdun ma phyi dkyil dang /__lus dkyil gnyis so/__/gsum pa thabs gtso bor ston pa'i rgyud la/__mi bskyod pa/__rnam snang /__rin 'byung /__'od dpag med/__don grub/__rdo rje 'chang gi rigs dang drug tu gsungs pa'i dang po ni/__'phags pa klu sgrub kyi gsang 'dus mi bskyod pa lha32/__slob dpon sangs rgyas ye shes zhabs kyi lugs srol gsang 'dus 'jam dpal rdo rje lha19/__jo bo a ti sha'i lugs kyi gsang 'dus spyan ras gzigs lha19/__mi bskyod pa'i rigs kyi khro bo grub chen pa ba ri ba'i lugs kyi phyag na rdo rje 'khor chen lha 18rnams so/__/gnyis pa ni/__grub chen bir wa pa'i lugs kyi gshed dmar lha lnga/__grub chen dpal 'dzin gyi lugs kyi gshed dmar lha12/__rwa lugs kyi gshin rje gshed dgra nag lha13/__rwa lugs rdo rje 'jigs byed dpa' bo gcig pa phyag mtshan so gnyis kyis bskor ba'i dkyil 'khor/__rwa lugs thun mong ma yin pa 'jigs byed lha13/__rwa lugs gshin rje gshed gdong drug lha 21rnams so/__/gnyis pa rnal 'byor gyi rgyud la/__thabs gtso bor ston pa dang /__shes rab gtso bor ston pa'i rgyud gnyis kyi/__dang po la'ang /__rtsa brgyud/__bshad rgyud/__'phros rgyud/__cha mthun gyi rgyud/__yan lag gi rgyud dang lngar gsungs pa'i/__dang po ni/__de bzhin gshegs pa thams cad kyi de kho na nyid bsdus pa'i rgyud chen po ste/__de la nang gses su dum bu bzhi las/__dum bu dang po 'dod chags can gyi 'dod chags 'dul ba'i phyir bstan pa de bzhin gshegs pa'i rigs rdo rje dbyings kyi dkyil 'khor la/__rdor dbyings rtsa lugs kyi dkyil 'khor lha30/__'grel chen de nyid snang ba'i lugs kyi dkyil 'khor lha1037/__dum bu gnyis pa khro bas khro ba spangs pa'i phyir bstan pa rdo rje'i rigs khams gsum rnam rgyal gyi dkyil 'khor lha1037/__gnyis pa ni/__bshad rgyud rdo rje rtse mo nas gsungs pa'i gsang ba mchod chen rigs thams cad bsdus pa'i dkyil 'khor bcu la lha grangs1271/__gsum pa ni/__rtsa rgyud dum bu gsum pa'i ngan 'gro dgug cing sdig pa bral ba las 'phros pa'i kun rig rnam par snang mdzad kyi dkyil 'khor rtsa ba'i lha37/__ngan song thams cad yongs su sbyong ba gzi brjid kyi rgyal po'i brtag pa phyogs gcig pa las gsungs pa'i/__shAkya seng ge gtsug tor dgu pa'i dkyil 'khor lha37/__dpal phyag na rdo rje 'chi bdag 'joms pa'i dkyil 'khor lha13/__ngan 'gro thams cad yongs su sbyong ba bcom ldan 'das rdo rje mi 'khrugs pa lha 13gyi dkyil 'khor rnams so/__/bzhi pa ni/__shes rab gtso bor ston pa'i rgyud dam/__cha mthun gyi rgyud dpal mchog dang po las gsungs pa'i rigs thams cad bsdus pa'i dkyil 'khor bcu bzhi lha dang 339/__rigs rkyang pa rdo rje sems dpa'i dkyil 'khor gnyis so/__/lnga pa ni/__'jam dpal sgyu 'phrul drwa ba mtshan yang dag par brjod pa rnal 'byor gyi rgyud du bkral ba'i skor te/__de yang che ba slob dpon 'jam dpal grags pas bkral ba chos dbyings gsung nam mkha' 'dri med che ba/__gi dbang phyug lha229/__'bring po slob dpon sgeg pa'i rdo rjes bkral ba'i 'jam dpal gsang ldan nam 'jam dpal yon tan kun 'byung gi dkyil 'khor lha15/__chung ba slob dpon 'jam dpal bshes gnyen gyis bkral ba'i 'jam dpal nam mkha' dri med chung ba'ang zer/__rigs bsdus rnams 'di yi 'jam dpal gong 'og gnyis kyi dbang rgyun med/__so/__/de dag las rdo rje rtse mo ni/__zangs dkar lugs dang /__kun rig gtsug dgu gnyis stod lugs sam jo bo lugs dang /__smad lugs sam lo chen lugs gnyis ka yod cing /__mi 'khrugs pa dang phyag rdor 'chi 'joms gnyis jo lugs dang 'jam dpal nam mkha' dri med chung ba dkon dbang phyug blo gros nas brgyud/__'jam dpal gsang ldan smri ti nas rngog gi phyogs su bka' babs pa yin la/__gzhan rnams lo chen rin bzang las brgyud pa kho na'o/__/gsum pa spyod pa'i rgyud la de bzhin gshegs pa dang /__pad+ma dang /__rdo rje'i rigs gsum las/__dang po ni/__rdo rje gdan pa nas ba ri lo tsA ba la brgyud pa'i rnam par snang mdzad mngon par byang chub pa'i rgyud las gsungs pa'i dkyil 'khor lha119/__gnyis pa ni/__skabs 'dir mi 'byung la/__gsum pa ni/__phyag rdor 'gro bzang lugs dang /__rnam 'joms dkar po sogs sbyong rgyud du bzhed pa ltar na 'dir drang bar bya'o/__/bzhi pa bya ba'i rgyud la/__de bzhin gshegs pa dang /__pad+ma dang /__rdo rje dang /__nor can dang /__lnga rtsen dang /__'jig rten pa'i rigs te sgo drug las/__dang po la'ang rigs kyi gtso bo sogs brgyad kyi/__dang po/__rigs kyi gtso bo thub pa gnas brtan bcu drug gis bskor ba'i dkyil 'khor/__mkhan po bo d+hi sa twas mdzad pa'i sman bla bde gshegs brgyad la mchod cing gsol ba gdab pa'i tshom bu'i dkyil 'khor/__'phags pa 'od zer dri med las gsungs pa'i thub dbang lha bdun gyi dkyil 'khor/__gnyis pa rigs kyi yum ni/__rdo rje gdan pa nas ba ri lo tsA ba la brgyud pa'i srung ba lha lnga lha51/__gsum pa rigs kyi gtsug tor la/__rdo rje gdan pa nas ba ri lo tsA ba brgyud pa'i gtsug tor gdugs dkar gyi dkyil 'khor lha/__'phags pa gtsug tor dri med kyi dkyil 'khor lha mang /__rnam rgyal lha mang /__gnyis pa pad+ma'i rigs la rigs kyi gtso bo sogs lnga las/__rigs kyi gtso bo rdo rje gdan pa nas ba ri lo tsA ba la brgyud pa'i tshe dpag med 'chi med rnga sgra lha9/__rigs kyi bdag po 'phags pa spyan ras gzigs don yod zhags pa lha25/__gsum pa rdo rje'i rigs la/__rigs kyi gtso bo sogs lnga las rigs kyi gtso bo slob dpon 'bro bzang snying po'i lugs kyi dpal phyag na rdo rje lha21/__grub chen pa ba ri ba'i lugs kyi rnam 'joms dkar po lha bco lnga la/__sgo ba bzhi bsnan pa'i lha bcu dgu pa'i dkyil 'khor/__nor bu'i rigs la/__chos skyong chen po rnam thos sras kyi gtor sgrub bcas so/__/de ltar yang bla med kyi rgyud la dkyil 'khor nyer brgyad/__rnal 'byor gyi rgyud la bcu gsum/__spyod rgyud la gcig__/bya rgyud la bcu gnyis te dkyil 'khor lnga bcu rtsa gsum ste/__de rnams kyi dbang rjes gnang lung man ngag dang bcas pa dang /__sgrub mchod kyi rgyun rnams su bzhugs shing /__bu lugs kyi khrid chen rim lnga/_spros med/__ngal bso/__sbyor drug bzhi/___bzhi zhes grags pa las/__gsang 'dus rim lnga dang /__gshed dmar spros med kyi khrid/__khrid chung bzhi las/__snying po don gsum dang tshem bu dmar khrid/__gzhan yang ra khrid mkha' 'gro'i snyan brgyud sogs khrid bka' dang /__bu ston rin po che'i bka' 'bum sngags phyogs skor pod18/__thugs sras lo tsA ba'i bka' 'bum pod 2bcas kyi lung /__chos skyong skor la rgyal po rnam thos sras bka' bco lnga/__glegs bam gnyis kyi lung /__mgon po bing dmar gyi rjes gnang /__lha mo rdo rje rab brtan ma'i rjes gnang thun mong dang /__thun mong ma yin pa dang /__sgrub skor gyi lung sogs bzhugs so/__/dpal zhwa lu pa'i gdan rabs sogs rgyas par rtogs par 'dod na/__kun mkhyen bu ston rin po che'i rnam thar le tshan dang /__mchog sprul rin po che blo gsal bstan skyong gis mdzad pa'i gdan rabs glegs bam sogs las shes par bya zhing /__rgyud sde'i byung tshul sogs kyang /__kun mkhyen bu ston rin po che'i rgyud sde spyi'i rnam bzhag che 'bring chung gsum dang /__bde gsang dus gsum yo ga dang bcas pa'i chos 'byung rnams las shes par bya'o/____/_!_ bo dong e ni/__thog mar bka' gdams pa'i dge bshes mu tra chen pos sa glang lor btab/__phyis dpang lo blo gros brtan pa/__de'i dbon lo chen byang chub rtse mo/__de'i dbon lo chen grags pa sogs mkhas grub chen po mang du byon/__khyad par grags pa'i dbon po bo dong phyogs las rnam rgyal lam/__'jigs bral chos kyi rgyal mtshan ni sgra dbyangs lha mos rjes su bzung bas rig pa'i gnas mtha' dag thogs pa med par smra pa'i ma hA paN+Di tar gyur/__gangs ljongs mkhas pa phal cher rtsod pas pham par byas/__rdo rje sems dpa' dang /__rdo rje phag mo sogs dkyil 'khor gyi gtso bo rnams kyis gsang ba'i mdzod chen po byin pas de nyid 'dus pa chen po sogs bstan bcos pod brgya phrag thal pa mdzad cing gsung las skyes pa'i slob ma yang /__bzo rig pa nas bstan pa yongs rdzogs kyi bar bka' babs nyi shu rtsa gsum/__'khon gyi gdung brgyud gsum/__sngags 'chang chen po gcig__mkhas grub gnyis/__lo chen gsum sogs nas/__bka' bcu smra ba stong phrag gcig__/bka' bzhi smra ba stong phrag zung /__phar tshad shes pa'i slob ma khri phrag brgal ba sogs byon par grags shing /__phyis dpal mo chos sdings su phrin las skyong /__grub mtha'i khas len cung mi 'dra ba mang du mdzad pas bo dong pa'i lugs zhes grags/__deng song gdan sa dngos su chos rgyun sogs cher mi bzhugs kyang /__lo ror rje nyid kyi rnam 'phrul sbyor ra thams cad mkhyen pa rim byon dang /__yar 'brog bsam sdings su rdo rje phag mo rim byon sogs kyis bzung ste chos rgyun 'ga' zhig yod do//____//__!_ shangs zhang zhang rdo rje gdan ni/__sku gsang ba 'dus pa/__gsung ma hA mA ya/__thugs dgyes pa rdo rje/__yon tan 'khor lo sdom pa/__phrin las rdo rje 'jigs mdzad de rgyud sde lnga yi ngo bor bzhugs pa mkhas grub khyung po rnal 'byor brtson 'grus mgon zhes grags pa de nyid dang por bon gyi sgor zhugs/__bar du rim par rdzogs chen dang phyag chen sbyangs/__mthar des kyang thugs ma tshim par 'phags pa'i yul du byon nas/__ye shes kyi mkha' 'gro ni gu ma/__su kha si d+d+hi/__me tri pa/__rdo rje gdan pa sogs paN grub brgya dang lnga bcu'i thugs kyi dgongs pa blangs nas gangs can du phebs te glang thang pa rdo rje seng ge las rab tu byung /__sku tshe'i smad la lo gcig gi nang dgon gnas brgya rtsa gcig btab pa'i ya gyal te/__shangs pa bka' brgyud kyi 'byung gnas lta bu yin yang /__deng sang ni sku 'dra rin po che byin can tsam las brgyud 'dzin sogs mi snang /__chos brgyud ni/__rdo rje 'chang 1/__ni gu ma2/__khyung po3/__de yi slob ma khri brgyad du longs par byung bar grags pa'i gtso bo grub thob rmog lcog pa rin chen brtson 'grus/__de nas/__dbon ston skyer sgang pa chos kyi seng ge5/__sangs rgyas gnyan ston sbas pa'i rnal 'byor chos kyi shes rab6/__'gro mgon sangs rgyas ston pa brtson 'grus seng+ge 7rnams la dpal shangs pa bka' brgyud pa'i brgyud pa rin po che sna bdun du grags shing /__gdams pa phal cher yang chig brgyud du bzhugs/__sangs rgyas gnyan ston pas khyab bdal du spel bas shangs 'jag pa tshul khrims mgon dang /__nyang bsam sdings pa gzhon nu grub sogs mkhas shing dngos grub brnyes pa/__sgyu lus dang rmi lam la rang dbang thob pa mang du byon/__grub mtha' thams cad la rgyud 'dres par gyur/__de las byung ba'i chos bka' la/__ni gu'i chos skor/__su kha'i chos skor/__rdo rje gdan pa'i chos skor/__mai tri pa'i chos skor/__rA hu la'i chos skor te lnga dang /__der ma 'thus pa'i man ngag thor bu dang bcas bsam gyis mi khyab pa zhig mchis na'ang /__deng sang chos rje mus pa dang /__bka' brgyud sogs su ni gu'i skor gtso bor gyur pa la/__rtsa ba ni ni gu chos drug__/sdong po phyag rgya chen po ga'u ma/__yal ga lam khyer rnam gsum/__me tog mkha' spyod dkar dmar/__'bras bu lus sems 'chi med/__bka' srung ye shes mgon po'i skor rnams kyi smin grol rgyab brten dang bcas pa las/__dang po la/__chos drug gi smin byed khog phub gsum/__sgos bka' drug__/phyag chen bka' lnga/__mkha' spyod bka' gsum/__gsang sgrub bka' lnga/__mgon po bka' gnyis las/__dang po ni/__chos 'jug spyi yi khog phub rgyud sde lnga gtso bor gyur pa'i 'jug sgo sgyu lus dbang mo che1/__bde mchog dbang bzhi lus bsgrigs/__lha bzhi dril sgrub bcas/__gnyis pa ni/__gtum mo sogs chos drug so so'i dbang /__gsum pa ni/__phyag chen ga'u ma1/__bla ma2/__yi dam3/__sgyu lus 4lam khyer/__lus sems 5'chi med kyi dbang /__bzhi pa ni/__mkha' spyod dkar mo1/__dmar mo2/__sum phrugs 3kyi dbang /__lnga pa ni/__bde mchog1__/spyan ras gzigs2/__phyag rdor3/__rta mgrin4/__drug pa ni/__phyag drug 1pa dang /__mgon dkar2/__zhar byung su kha sid+d+hi'i byin rlabs bcas so//__//gnyis pa grol byed khrid la/__thang rgyal mus pa sogs/__dang /__jo nang bka' brgyud sogs/__tA ra nA tha sogs kyi yig cha'i steng nas chos drug__/phyag chen/__lam khyer rnam gsum/__mkha' spyod dkar dmar gyi 'pho ba/__lus sems 'chi med/__bla mgon dbyer med rnams kyi nyams khrid/__gsum pa lung la/__rtsa ba rdo rje'i tshig rkang sogs glegs bam gcig lhag rnams bzhugs shing /__gzhan yang sngar smos pa ltar dge lugs pa'i phyogs la'ang chos drug gi khrid rgyun tsam dang /__khyad par mgon po phyag drug pa'i rjes gnang /__khrid lung bcas rgya cher dar ro//____//__!_ la stod ding ri glang 'khor ni/__'gro mgon dam pa sangs rgyas dang /__de'i thugs sras byang chub sems dpa' kun dga' sogs kyis byin gyis brlabs pa'i gnas khyad par can te/_de la grub chen 'di nyid ni/__'phags yul bai tA yul gyi tsa ra sid+har 'khrungs/__grub thob pho mo lnga bcu rtsa drug las gdams ngag gi sgro 'dogs bcad/__thugs dam bde gshegs bcu gnyis dang /__ngo mtshar mkha' spyod kyi bla ma sum cu rtsa drug gi ye shes kyi skus rjes su bzung /__thun mong gi dngos grub chen po brgyad dang /__mchog gi dngos grub mthong lam chen po mngon du gyur/__bod du lan lnga byon pa'i dus/__gsum pa la kha che dz+nyA na gu h+ya la zhi byed sgron ma'i skor gsum sogs gsungs/__de dang dam pa gnyis kas rje btsun long po lo tsA dang /__kha che pu hrang lo chung la gsungs pa sogs brgyud pa snga ma dang /__bzhi par/__rma chos kyi shes rab la phyag chen/__so chung dge 'dun 'bar la rigs pa gcer mthong /__kam tshul khrims rgyal mtshan la rtogs pa lam khyer gyi gdams ngag gnang bas mtshon rma so kam gsum grangs dang /_lce dang /__ljags lugs gsum/___phran dang bcas pa la brgyud par bar ma/__lnga par dam pa phyar chen/__phyar chung badz+ra kro d+hA/__kun dga' bzhi la gdams pa so sor gnang /__gzhan yang ma jo nyi shu rtsa bzhi sogs grub pa'i skyes bu nam mkha'i skar tshogs tsam byon pa brgyud pa phyi ma ste/__de las kyang skye ba lngar dam pas rjes su bzung zhing /__nga dang dgongs pa mnyam pa kun dga' yin/__/zhes bsngags pa chig brgyud sbas pa'i gter mdzod dam pa kun dga' nas rim par pa tshab sgom pa rgyal ba te ne/__rog shes rab seng ge sku mched sogs brgyud shin tu dar ba byung yang /__deng sang ni brgyud la phyi ma'i skor las/__tshogs lam blo sbyang sbyor lam dka' thub/__mthong lam blo bral/__sgom lam ro snyoms/__mthar lam bdag bstod dang bcas pa'i lam lnga'i dbang rgyas pa/__'bring po lam gsum gzhung ma/__bsdus pa dbang rnon ku sA la'i rnal 'byor gyi dbang /__rten 'brel sngon du bdag po bstod pa zhes bya ba dam pa phyi nang gsang gsum gyi bla sgrub byin rlabs/__thugs dam bde gshegs bcu gnyis kyi dbang /__bde mchog bcu gsum ma/__phag mo phyi sgrub lha dgu/__nang sgrub zhal gnyis ma/__gsang sgrub khros nag__/bdud rtsi bum pa rnams kyi dbang /__chos skyong ye shes kyi mgon po a g+ho ra skrag med/__gsang sgrub dmar nag gi dbang bka' rgya ma/__phyi sgrub thun mong ba/__zhing skyong kun tu ri ka dang /__a pa ra tsit+ta sogs kyi rjes gnang dang /__mkhyud dpyad dkar nag khra gsum gyi lung sogs thor bu tsam las/__grub mtha'i rkang 'dzin pa dang chos brgyud sogs rgya cher mi snang ngo //____//__!_ ngom shod zangs ri mkhar dmar gyi phug par/__ma gcig lab kyi sgron mas sku tshe'i smad du yun ring bzhugs shing /__gdul bya dpag tu med pa'i don mdzad pa dang sras snying po grub pas g.ye chung glang lung dgon pa bzung ba sogs phyogs der gcod yul gyi bstan pa dar ba byung mod/__deng sang ni gdan sa dngos su chos brgyud 'dzin pa dmigs bsal med kyang /__gdams ngag gi rgyun ni grub mtha' thams cad la khyab par gyur te/__spyir dam pas yar lung sma ra ser po dang /__skyo ston bsod nams bla ma la bshad par pho gcod dang /__ma gcig gis dam pa dang skyo ston gnyis ka las gsan nas brgyud pa la mo gcod ces grags pa las/__yum chen mo shes rab kyi pha rol tu phyin ma dang dbyer med pa'i ye shes DA ki 'di nyid ni yul g.yel ba/__grong 'dab grong ma tshe mor mor rus khe'u gad kyi rigs su 'khrungs/__grwa pa mngon shes dbang phyug 'bar las rab tu byung /__sher phyin klog pas stong nyid kyi lta ba gsha' mar skyes/__cer grong thod pa 'bab re bya ba dang 'dus pas sras lcam sring lnga 'khrungs/__slar yang rab tu byung nas dgu bcu rtsa lnga'i bar du gdul bya bsam gyis mi khyab pa'i don mdzad cing /__sher phyin gyi gdams ngag zab mo gcod yul gyi grub mtha' gangs can thams cad la khyab par mdzad/__tshogs slob kyang sras rgyal ba don grub nas brgyud pa la sras brgyud dang /__khu sgom chos seng nas slob brgyud rnams byung /__phyis kun mkhyen rang byung rdo rje dang /__rgod phrug ras pa rgyal thang pa sogs lam 'di'i bka' babs mang du byung ste/__deng sang yang bka' brgyud gtso bor gyur pa'i sa rnying dge lugs sogs kyi grub mtha' thams cad la khros nag lha lnga'i dbang /__nam mkha' sgo 'byed kyi byin rlabs/__zhag bdun ma dang stan thog gcig ma sogs kyi nyams khrid phyag bzhes dang bcas pa/__ma gcig gi bka' chem sogs rtsa ba'i gzhung dang /__grub mtha' so so'i gcod gzhung glegs bam mang po'i lung sogs ci rigs par mchis so/__/de la sdug bsngal zhi byed ces pa'i don ni/__bod du byon pa'i gdams pa phal mo che slob ma mi dge ba las zlog tu bcug nas gzod de'i sems rgyud kyi nyon mongs par sbyangs bar byed pa gtso che la/__'dis ni tshe rabs snga ma'i las kyi dbang gis lus dman pa dang /__nad gdon gyis gtses pa sogs sdug bsngal rnams lam du bslangs pas 'phral du zhi bar byas nas rnal 'byor la sbyor bzod pa'i phyir de skad ces bya ste/__sher snying las/__sdug bsngal thams cad rab tu zhi bar byed pa'i sngags/__ces pa la brten nas btags par bzhed de/__gcod yul zhes pa ni/__gcod bya ni/__thogs bcas/__thogs med/__dga' brod/__snyems byed de bdud bzhi'i rgyu 'bras su gyur pa'i nyon mongs thams cad spang gnyen res 'jog ma yin par yul de nyid kyi rang thog tu gcod par byed pas de skad ces bya zhing /__ngo bo pha rol tu phyin pa la sngags dang rjes su mthun pa'i spyod pas khyad par du byas pa'o/____/_!_ yang dam pa'i chos 'dul ba'i thog mar bstan pa la snga 'gyur smad 'dul gyi brgyud ni/__lha btsan po khri srong dus/__byang chub sems dpa' chen po zhi ba 'tshos/__sba rat+na ye shes dbang po srung ba sogs sad mi mi bdun rab tu byung bas mtshon bstan pa'i sgron me dang por sbar/__dar mas bstan pa bsnubs pa'i skabs/__sba rat+na'i mkhan bu 'dul ba 'dzin pa dmar g.yo gtsang gsum khams su byon/__de rnams kyi spyan sngar bla chen dgongs pa rab gsal gyis rab tu byung zhing 'dul ba'i sde snod la sbyangs/__de las klu mes sogs dbus gtsang gi mi bcus bka' drin zhus te so sos gnas gzhi yang brtsigs te chos grwa shin tu mang ba byung /__bka' gdams pa'i dge ba'i bshes gnyen chen po rnams kyang snga 'gyur gyi sdom rgyun las bsnyan par rdzogs/__bar du lha bla ma ye shes 'od kyis rgya gar shar phyogs kyi paN+Di ta d+harma pA la spyan drangs te/__mkhan bu pA la rnam gsum bsnyen par rdzogs te stod mnga' ris phyogs su dar bstod 'dul zhes grags pa byung /__gzhan yang lce btsun gyis zhwa lur a b+ha ya'i sdom rgyun spel na'ang /__snga 'gyur gyi bshad rgyun ni kha che lugs kyi brgyud pa dang 'dres shing sdom rgyun kyang deng sang gi bar du gnas la/__rnying ma dang dge lugs phyogs las zhig__phyi ma gnyis kyi srol ni yun ma byung ngo /__/phyis ma byon pa'i sangs rgyas gsum pa kha che'i paN+Di ti shAkya shrI bod du phebs nas 'dul ba'i sdom rgyun gsar du btsugs pa las/__tshogs sde grangs med pa zhig 'phel ba'i rtsa ba lta bu ni/__dge 'dun sgang pa/__chos lang pa/__tshal mig pa/__bye rdzing pa sde tshogs sde bzhir grags pa 'di yin la/__'di rnams su sngar 'dul ba'i bshad pa lag len gnyis ka khyad par can byung na'ang /__deng sang ni spyi 'gre tsam las dmigs bsal gyi khyad thon yod par ma mngon mod/__'on kyang dge 'dun sgang pa las kar lugs/__chos lung pa las 'brug lugs/_tshal mig pa las ngor lugs dang /__sa lugs snga ma rnams kyis mtshon sdom rgyun mang du 'phel bas phyogs thams cad du 'dul ba'i bstan pa shin tu dar zhing rgyas par gyur to/__/de ltar na gangs kyi ri bo'i sul na ston pa bde bar gshegs pa'i bstan pa 'ba' zhig gi dbang du byas te/__'gro ba rnams kyi phan bde'i gzhir gyur pa'i dge 'dun 'dus pa'i sde dang /__gdan rabs kyi skor ji ltar byon pa'i tshul sogs yongs su grags pa 'ga' zhig gi mtshan tsam brjod zin te/__spyir yang ji skad du/__shes rab mchog yin de'i gzhi ni/__/thos pa yin phyir thos pa gces/__/zhes gsungs pa ltar rang dang gzhan gyi grub pa'i mtha' yi gang zag dang chos kyi tshul mang du thos par bya ba ni shin tu gal che ste/__gzhan du rang rang gi lugs srol tsam khong du chud par rlom pa kha cig kyang /__rang gi bla ma brgyud pa dang /__chos lugs tsam ma gtogs gzhan mkhas pa dang grub pa dang lung rigs kyis dben no snyam du sems shing gzhan la'ang gdams pas chos spong ba'i las mi bzod pa gsog pa dag snang ba'i phyir ro/__/de bas na bdag legs su 'dod pa rnams kyis ston pa thugs rje can gyi rnam thar mdo sde rin po che rnams dang /__de dag gi don bsdus pa brgya nyer lnga byams pa chos rjes bskal bzang rgya mtsho/__pa dang /__skyes rabs so bzhi pa kha skong rang byung zhabs sogs/__'grel chen ye shes rgyal mtshan sogs/__dang bcas pa dang /__rtogs brjod dpag bsam gyi 'khri shing mchan spang los ston sogs/__dang don bsdu ba'i rigs dang /__'phags pa'i gnas brtan ye shes rgyal mtshan sogs/__bcu drug dang /__grub chen brgyad cu'i rtogs pa brjod pa sogs legs par blta zhing dad pa bskyed/__grub mtha' spyi'i chos 'byung skor la/__thams cad mkhyen pa tA ra nA thas mdzad pa'i rgya gar chos 'byung dang bka' babs bdun gyi gtam sogs rgya gar ba'i gtam tshad ma mang po dang /__gung mgon po skyabs kyis byas pa'i rgya nag gi chos 'byung /__bu ston rin po che'i chos 'byung /__tshal pa'i deb dmar/__'gos lo'i deb sngon/__dpa' bo gtsug lag phreng ba'i chos 'byung mkhas pa'i dga' ston/__pad dkar gyi bstan pa'i pad+mo rgyas pa'i nyin byed/__thu'u bkwan pa'i grub mtha' shel gyi me long /__rgyal rabs gsal ba'i me long dang /__rdzogs ldan gzhon nu'i dga' ston sogs/__bye brag sngar smos pa'i so so'i rnam thar dang lo rgyus rnams la blo gros kyi mig bsgrubs te rang gi lugs srol ma nyams par bzung ba'i steng /__grub mtha' gzhan la'ang sdang zhen gyis smod pa sogs spangs te/__dad pa'i pad+mo mchog tu rgyas par bya'o/__/thos pas yid kyi gdung sel zhing /__/phan bde'i chu gter 'phel byed pa/__/dam pa'i rnam thar zla shel gyis/__/'jig rten gsum po snang gyur cig__/gangs can gyi ljongs su byon pa'i gdan rabs sogs cung zad bshad pa'i brjed byang gi le'u tshan no//__//shub+ham stu sarba dzA ga tAM//__//
