JKW-KABUM-17-TSA-002-016-wylie

gso dpyad yan lag bzhi pa las btus pa'i rtsa gnad kyi gdams pa/ gso dpyad yan lag bzhi pa las btus pa'i rtsa gnad kyi gdams pa las/__don snod gang gi rtsa gang na gnas bstan pa ni/__mdun gyi skra mtshams nas gyen du sor bzhi bcal ba nas 'tshogs ma'i gsang zhes bya ste bad mkhris 'doms pa'i rtsa yin/__ltag zur g.yas g.yon gnyis nas mar la 'phar rtsa zung ni ltag rtsa nag po zhes bya ste mkhal ma'i rtsa yin/__za 'gram g.yas g.yon gnyis na 'phred kyi 'khyug rtsa 'phar ba gnyis bad kan gyi rtsa ring zhes bya ste bad mkhris 'doms pa'i rtsa yin/__mig zur g.yas g.yon gnyis nas gyen du rgyu ba'i rtsa ni mig rtsa 'greng bu zhes bya ste mchin pa'i rtsa yin/__dpral ba'i dkyil drang por gyen du rgyu ba'i rtsa ni dung rtsa zhes bya ste glo rtsa yin/__mig gi nang zur khug gnyis na mig gi rtse'u chung gnyis gnas te mchin pa'i rtsa'o/__/de khug par song ba'i sna rtse'ang mchin rtsa'o/__/sna bug gnyis kyi phugs su rngul rtsa nag po zhes bya ste don snod thams cad 'dus pa'i rtsa'o/__/lce yi 'og na gnas pa'i rtsa ni ra ma lug ces bya ste mchin pa'i rtsa'o/__/ma mchu la gnas pa'i 'phar rtsa ni mtsher pa'i rtsa'o/__/'gram pa'i zur na 'phar ba'i rtsa ni snying rtsa'o/__/ske'i rtsa rtse'u chung ni glo ba'i rtsa'o/__/de las gyes pa'i rtsa ni rtse nag ces bya ste glo bu'i rtsa yin/__rtse'u chung gi mdun ngos nas mar la rgyu ba'i rtsa ni rtse 'dra zhes bya ste snying gi rtsa yin/__ol gong gi steng nas mar rgyu ba ni snying rtsa me ru zhes bya ste snying rtsa'o/__/de nas lag pa'i rtsa la dpung pa'i snying steng nas mar la rgyu ba ni dpung rtsa zhes bya ste rtse zhabs kyang zer glo ma'i rtsa yin/__gru mo'i nang zur nas sor bzhi yar bcal ba na gru mgo mchin pa'i rtsa yin/__lag pa'i khug zur na snod ka zhes kyang bya/__pho ba'i a so li ka zhes kyang bya ste pho ba'i rtsa yin/__khug drang po na snying gi a so li ka zhes bya ste/__kha cig glo snying 'dams rtsa'ang zer/__snying gi rtsa yin/__khug gi mar zur na glo ba'i a so li ka zhes glo ma'i rtsa yin/__snod ka zhabs kyi 'dams rtsa kha sbrag tu gnas te bad mkhris kyi 'dom rtsa'o/__/mchin rtsa las nang du gnas pa ni mkhris pa'i gser mdung ces bya ste mkhris pa'i rtsa yin/__mchin rtsa las gru mgo'i gyen sor bzhir gzhal mtshams mchin pa'i ru thung zhes bya ste mchin spang chen mo'i rtsa yin/__de nas yar sor bzhi bcal ba na gsha' ring zhes bya ste mchin pa spang chung gi rtsa yin/__de nas yar sor bzhi bcal ba na sha ru mon ru zhes bya ste spang chung dang dgra lce 'doms pa'i rtsa yin/__de nas sor bzhi bcal ba na phran bu zhes bya ste dgra lce'i rtsa yin/__mkhrig ma'i rgyab tshig thog la nye ba ni rgyab rtsa drug 'dus zhes bya ste don snod/__mtheb chen zhabs nas 'phar rtsa sor bzhi bcal ba na skyor gang zhes bya ste glo bu'i rtsa yin/__de nas sor bzhi bcal ba ni gong rtsa zhes bya ste glo stod bu la nye ba'i rtsa yin/__de nas sor bzhi bcal ba na sgang rtsa zhes bya ste rgyab phyogs glo mar nye ba'i rtsa yin/__de nas lag pa'i rgyab las mar gyes pa'i rtsa ni/__skyor gong yin nam ma dpe la mi 'dug mchan/__zhes bya ste glo ma'i rtsa yin no/__/lag pa'i thal gong gung mo'i steng nas pho gdung zhes mchin pa pho gdung gi rtsa'o/__/mtheb chen gyi steng na yar song ba mtheb skyor zhes bya ste glo bu'i rtsa yin/__skad 'gags sel/__'dzub mo'i steng nas zur la song ba 'dzub skyor zhes glo bu'i rtsa yin/__skad la phan/__gung mo'i steng nas zur la song ba ni gung skyor zhes bya ste mchin pa dang pho ba bsdongs pa'i rtsa yin/__srin lag gi steng nas zur la song ba ni srin skyor mchu la phan zhes bya ste pho ba dang mtsher pa'i rtsa yin/__mthe'u chung steng nas zur la song ba ni mthe'u chung skyor te mkhal rang la phan ma'i rtsa yin/__de nas rkang pa'i gdab rtsa bstan pa ni/__dpung tshig nang zur mtho gang gyen la bcal ba'i nang man chod/__chag gang gyen la bcal ba yan chod kyi bar gyi rtsa bo che'i gdab sa snod kun gyi rtsa'o/__/l+h+wam sgrogs 'ching ba'i rtsa'ang snod kun gyi rtsa'o/__/de las gyes nas ngar gdong nag po zhes bya ste mkhal ma'i gzhi che ba'i rtsa'o/__/long bu'i nang log gi rtsa ni long bu dpyangs zhes bya ste long gi rtsa yin/__sgab khung byin pa'i steng nas mar rtsa gsum yod pa'i sa ni sgab rtsa nag po smad gsum zhes bya ste/__de'i dbus ma'i l+h+wam sgrogs 'ching sa'i 'og byin snying gi gong du mchin pa'i rtsa yin/__rting pa'i dregs mtshams nas gyen la 'dzub gang bcal ba na gnas pa ni byin 'jug ces bya ste mkhal ma'i rtsa yin/__long bu'i phyi log nas tshur la 'khyud pa ni long bu'i phyi gra yin te mkhal ma'i rtsa yin/__bol gyi yob gang na mar rgyug pa ni yob gong zhes bya ste mkhal ma'i rtsa yin/__bol gong nas 'phred la rgyug pa ni/__bol gyi rtsa 'phred thag pa 'dra/__zhes pa ste de'ang mkhal ma'i rtsa'o/__/rkang pa'i rgyu ma'i nang du bkug na rgyu ma gong du gnyer ma gsum 'byung ste/__de'i gnyer ma dbus ma'i 'og tu rgyu ma khung gi rtsa nag ces bya ste/__de ni mchin pa'i rtsa yin/__gdab thabs gnyis len ni thog mar pags pa dang rtsa dpral/__de nas rtsar gdab pa'o/__/mdzo sna ni lag pas rtsa bgag ste 'phred du thal mar phug nas rma kha nas khrag dbyung ngo /__/mdung thabs ni g.yon gyis rtsa bgag la g.yas kyis mdung thabs su brgyab ste rtsa gshag pa'o/__/dol chod ni tsag bu bsnyal te mdzo sna bzhin tal gyis btang la so gyen la bsten te bcad pa'am rtsa phran lta bu 'drud nas bcad pa'o/__/glo phug ni glo g.yas g.yon phug pa'o/__/pho ba'i gong a so li la 'phar rtsa yod pas ma bsnyal gong du thad la gdabs/__gru mgo la'ang snying rtsa la gzab/__glo ba'i skyor gong la gshong gshong por blta rtsa lod pas gzab/__pho gdung la gung srin bar na smin bu'i gnad la gzab/__yob gang la snying rtsa yod pas gzab/__sgab rtsa'i skabs byin snying la gzab/__mig rtsa 'greng bu ni skra mtshams su stod la gdab/__de dmas na mig ca re long du 'gro bas gzab/__snying rtsa me rul gnyis len byas te pags pa dral/__rtsa mngon pa dang rgya khab bkug pas rtsa yar bslangs la mdung thabs kyis bkal la gdab bo/__/rgyu ma khug gi rtsa nag la btsag bu sor gcig gting du brgyab la khrag nag po bton la me btsa' bsreg go/__//__!