JKW-KABUM-16-MA-029-014-wylie
nA ro mkha' spyod kyi bla brgyud gsol 'debs/ @#/_/rje btsun rdo rje rnal 'byor ma nA ro mkha' spyod kyi brgyud pa'i bla ma la phyag 'tshal zhing gsol ba 'debs pa'i tshigs su bcad pa bzhugs so/__/gang gi drin gyis bde chen nyid/__/skad cig nyid la 'char ba gang /__/bla ma rin chen lta bu'i sku/__/rdo rje can zhabs pad la 'dud/__/gang gis skye dang 'jigs pa dag__/ring du yongs su spongs gyur pa/__/sems can kun la thams cad du/__/phan dgongs khyod la phyag 'tshal lo/__/rgyud rnams kun gyi don 'dzin cing /__/sems can kun la phan brtson pa'i/__/kun mchog rdo rje 'chang dbang la/__/rtag tu phyag 'tshal gsol ba 'debs/__/rdzogs sangs rgyas las mngon sum du/__/khyod kyis chos rnams thugs chud cing /__/mda' 'dzin spyod pa mdzad pa la/__/rtag tu=__thub pas thub par lung bstan cing /__/chos rnams don ston klu sgrub mchog__/bde ba can du gshegs pa la/__/rtag tu=__nyid kyi de nyid mchog brnyes nas/__/dman mos sems can don gyi phyir/__/rngon pa'i cha lugs 'dzin pa la/__/rtag tu=__yi ge'i sbyor ba spangs nas su/__/brtson pas nya rgyu gsol mdzad de/__/brtse bas gzhan don mdzad pa la/__/rtag tu=__rgyal po'i bya ba rab spangs nas/__/sprul 'tshong rjes su bsgrub mdzad de/__/gany+tsa'i grong du grub pa la/__/rtag tu=__ye shes mkha' 'gros rjes gnang zhing /__/gzhan don spyod pa mngon sum mdzad/__/rdo rje dril bu 'dzin pa la/__/rtag tu=__dam pa'i de nyid don rtogs te/__/brtse bas ru sbal zhabs ldan pa/_/sems can smin par mdzad pa la/__/rtag tu=__khyod ni brtse bas grub brnyes te/__/'bar bas 'bar ba'i spyod pa 'dzin/__/kun la phan par mdzad pa la/__/rtag tu=__nus pa la ni mnga' brnyes shing /__/spyod pa kun gyi rmad byung bas/__/'jig rten 'dren pa mdzad pa la/__/rtag tu=__rnal 'byor dbang phyug gu h+ya pa/__/brtse bas log 'dren rnal 'byor ma/__/btul nas 'gro ba skyong ba la/__/rtag tu=__mi mthun phyogs rnams rab spangs te/__/dkar po rnam par 'phel mdzad pa/__/rnam par rgyal ba'i zhabs pad la/__/rtag tu=__grub nas grub pa'i lam ston cing /__/grol nas rnam par phan mdzad pa/__/bar ma'i slob dpon dam pa la/__/rtag tu=__til brdungs pas ni rab grub pa/__/skal ldan gzhan la brtse ba can/__/mu stegs rnam par sun 'byin la/__/rtag tu=__bram ze las ni rab byung zhing /__/gnas lnga la ni rab sbyangs pas/__/dka' bas dam pa bsten pa la/__/rtag tu=__shes bya la ni rab sbyangs shing /__/nus pa kun la thogs med ldan/__/pha na phing gur grags pa la/__/rtag tu=__skad gnyis smra ba'i mchog gyur cing /__/shes rab ldan pas phan mdzad pa/__/brtsegs pa'i mtha' dang ldan pa la/__/rtag tu=__brtson pas dka' ba cher mdzad de/__/rgyud kun 'dzin mdzad skad gnyis smra/__/rje btsun blo gros grags pa la/__/rtag tu=__'jam pa'i dbyangs kyis mngon sum du/__/khyod la byin gyis brlabs pa yis/__/shes bya kun la thogs med ldan/__/rgyud rnams kun gyi bdag por gyur/__/kun dga' snying por grags pa yi/__/dpal ldan sa skyar bzhugs gyur cing /__/bde ba can du gshegs pa la/__/rtag tu=__gang gi sras kyi thu bo pa/__/'jam pa'i dbyangs kyis byin brlabs pas/__/gnas lnga la ni rab mkhas shing /__/bsod nams ye shes rtser gyur pa/__/nyid kyis gzhan don rdzogs mdzad nas/__/'jig rten rnams ni gzhug pa'i phyir/_/bde ba can du mngon sum gshegs/__/rtag tu=__khyod kyi thugs ni 'jam dbyangs ltar/__/shes bya kun la ma rmongs shing /__/'jig rten kun la rtsa lag ltar/__/dgongs pa khyod kyis grags pa yi/__/rgyal mtshan dri ma med pa thob/__/ngo mtshar du ma'i spyod pa 'dzin/__/kun nas yon tan ldan khyod la/__/rtag tu=__brtse bas sems can thams cad la/__/dpal 'byor chen po'i 'od zer gyis/__/rtag tu skyong bar mdzad khyod la/__/rtag tu=__'jam pa'i dbyangs nyid ngur smrig gi__/chos gos 'dzin par legs sprul pa'i/__/sa skya paN chen zhabs pad la/__/rtag tu=__'khor los sgyur ba'i dpal 'byor dang /__/mkhas shing grub pa'i blo gros can/__/chos kyi rgyal po 'phags pa la/_/rtag tu=__sbyangs pa'i yon tan lhur mdzad pas/__/rim pa gnyis la thugs brtan pa/__/zhang ston dkon mchog dpal ba la/__/rtag tu=__bla ma'i zhabs tog dka' ba spyad/__/rtse gcig sgrub pa'i rgyal mtshan 'dzin/__/grub chen bsod nams dpal ba la/__/rtag tu=__'jam pa'i dbyangs kyis rjes bzung ste/__/'chad rtsod rtsom pa'i khrir 'khod pa'i/__/'gro mgon bsod nams rgyal mtshan la/__/rtag tu=__snyan brgyud gdams pa'i dpal ldan zhing /__/rnam dag tshul khrims gos bzang can/__/rgyal sras rdo rje 'dzin pa la/__/rtag tu=__gnyis med ye shes legs gzigs shing /__/gzhan phan lhag bsam cher bskyed pa'i/__/chos rje ye shes rgyal mtshan la/__/rtag tu=__e waM rdo rje'i gnas mchog tu/__/zung 'jug chos kyi sku brnyes pa/__/kun bzang rdo rje 'chang chen la/__/rtag tu=__gcig tu sgrub la brtson mdzad cing /__/rdo rje'i rnal 'byor mthar phyin pa'i/__/mus chen 'khor lo sdom pa la/__/rtag tu=__bsod nams gangs ri'i spor gnas shing /__/lung dang rig pa'i mche sder can/__/kun mkhyen smra ba'i seng ge la/__/rtag tu=__rig pa'i gnas kun rab sbyangs te/__/grub pa'i sa brnyes chos kyi rje/__/grags pa'i rgyal mtshan 'dzin pa la/__/rtag tu=__dkon mchog gsum dang dbyer med cing /__/lhag pa'i lha yi ngo bo nyid/__/nges don gdams pa 'phel mdzad la/__/rtag tu=__mkhyen pas shes bya'i de nyid gzigs/__/brtse bas nus pa rmad byung ba/__/rje btsun legs pa'i 'byung gnas la/__/rtag tu=__sangs rgyas kun gyi ngo bo nyid/__/dam chos rin chen kun gyi gter/__/dge 'dun 'dus pa'i gtsug rgyan la/__/rtag tu=__rig pa'i gnas lnga la sbyangs shing /__/grub pa'i byin brlabs bka' bab pa/__/'jam dbyangs kun dga' bsod nams la/__/rtag tu phyag=__shes bya thams cad mngon sum du/__/gzigs nas gzhan la 'doms mkhas pa/__/rje btsun dkon mgon lhun grub la/__/rtag tu=__phyi nang rig gzhung rgya mtsho gzigs/__/grub pa'i go 'phang mchog brnyes pa/__/paN chen nam mkha' dpal bzang la/__/rtag tu=__'jam dpal gzhon nur gyur pa nyid/__/ngur smrig 'dzin pa'i rnam rol can/__/kun dga' bsod nams lhun grub la/__/rtag tu=__gsan bsam bsgom pa'i mthar son nas/__/'chad rtsod rtsom pas gzhan don mdzad/__/mkhas grub dpal mchog rgyal mtshan la/__/rtag tu=__bla ma rnams dang lhag pa'i lhas/__/rjes bzung phrin las mtha' yas pa/__/'jam mgon sangs rgyas phun tshogs la/__/rtag tu=__rim gnyis zab mo'i rnal 'byor gyis/__/grub pa gnyis kyi mthar phyin pa/__/mtshungs med bsod nams dpal ldan la/__/rtag tu=__rmad byung dam pa'i rigs 'khrungs shing /__/mkhyen brtse nus pa'i mdzod du gyur/__/'dren mchog nam mkha' bsam grub la/__/rtag tu=__sras bcas rgyas pa'i ye shes sku/___/snyigs dus bstan pa'i nyi ma mchog__/sa chen kun dga' blo gros la/__/rtag tu=__mkhas shing grub pa'i gtsug rgyan che/__/yongs rdzogs bstan pa rgya mtsho'i bdag__/rje btsun nam mkha' 'chi med la/__/rtag tu=__rnal 'byor dbang phyug brtse ba che'i/__/zab gsang snyan brgyud rgya mtsho'i bdag__/mkhan chen 'jam dpal bzang po la/__/rtag tu=__rigs dang dkyil 'khor rgya mtsho'i dngos/__/dran pas srid zhi'i gdung sel ba/__/dpal ldan rtsa ba'i bla ma la/__/rtag tu phyag 'tshal gsol ba 'debs/__/dngos kun khyab bdag bde ba'i mchog__/gsang gsum 'khor lo'i he ru ka__/shes rab sgyu ma'i btsun mo dang /__/rol mdzad bde ba chen por 'dud/__/zung 'jug de nyid ma thob bar/__/rje btsun bla mas rjes bzung ste/__/mngal sgong rdzus skyes dkyil 'khor du/__/smin bya dbang bzhis smin par shog__/zab mo'i lam gyi rtsa ba mchog__/thun mong thun mong ma yin pa'i/__/'khor lo sdom pa'i dam tshig rnams/__/ma nyams tshul bzhin srung par shog__/ma dag skye gnas bzhi sbyangs pa'i/__/gsal dag bskyed rim legs bsgoms te/__/snang ba lha ru 'char ba dang /__/zhi sogs phrin las dbang sgyur shog__/brgyud rim gnas lugs shes byas nas/____/sngags rim gtum mo'i rnal 'byor gyis/__/ye shes dga' bzhi'i rim pa bskyed/__/gsang ba'i rim pa 'grub par shog__/de ltar rim gnyis la brtson pas/__/drod thob spyod pas mtshams sbyar te/__/rab dga' la sogs sa bgrod nas/__/rtse gcig phyag chen 'grub par shog__/khyad par skye ba 'di nyid la/__/mtshan 'dzin kun rtog rab spangs nas/__/DeM gi d+ha ri ka pa bzhin/__/gsang chen spyod pa mthar phyin shog__/'khor lo sdom pa'i rnal 'byor dang /__/nam yang mi 'bral gnas gsum gyi/__/mkha' 'gro'i tshogs dang lhan cig gnas/__/rig 'dzin dbang po nyid gyur cig__/bla ma rnams kyi byin rlabs dang /__/yi dam mkha' 'gro'i nus mthu yis/__/bdag dang mkha' mnyam sems can kun/__/zung 'jug rdo rje'i sa thob shog__/ces pa'ang rje btsun sa skya paN+Di tas mdzad pa'i 'khor lo bde mchog gi bla brgyud gsol 'debs kyi brgyud pa phyi ma rnams rim par bsnan pa 'jam mgon kun dga' bsod nams kyis mdzad pa'i nA ro mkha' spyod kyi dkyil chog las byung ba ltar/__dkon mchog lhun grub man chad kyi kha skong rnams ngor e waM pa chen po nas brgyud pa'i rnal 'byor ma'i byin rlabs kyi brgyud rim dang mthun par 'jam dbyangs mkhyen brtse'i dbang pos bris pa'o/__/sarba mang+ga laM b+ha ba tu/___/__!_
