JKW-KABUM-16-MA-024-003-wylie
sgrol dkar yid bzhin 'khor lo'i sgrub thabs kyi yan lag_/ sgrol dkar yid bzhin 'khor lo'i sgrub thabs kyi yan lag bzhugs so/__/bla ma dang rje btsun sgrol ma la phyag 'tshal lo/__/rje btsun sgrol ma dkar mo'i sgrub thabs kyi sgo nas rang gzhan gyi don bya ba'i cho ga'i yan lag nyer mkho mdor bsdus pa la gsum las/__dang po tshogs kyi mchod pa'i cho ga ni/__dkar gsum mngar gsum shing tog khur ba sogs gtsang zhing gya nom pa'i bza' btung bsham/__bdag bskyed bzlas pa dang bcas pa dang /__spro na mdun bskyed kyang bya/__tshogs rdzas chab kyis bran/__a mr-i tas bsangs/__swa b+hA was sbyangs/__stong pa'i ngang las lha rdzas dang ting nge 'dzin las grub pa'i tshogs rdzas ye shes kyi bdud rtsi 'dod yon rgya mtsho'i sprin phung 'phro bar gyur/__oM AHhU~M dang nam mkha' mdzod kyi sngags rgyas brlab/__tshogs zhing spyan 'dren pa ni/__oM/__po ta la yi gnas mchog nas/__/rje btsun yid bzhin 'khor lo la/__/sangs rgyas byang sems DA kis bskor/__/tshogs kyi mchod pa bzhes phyir gshegs/__/badz+ra sa mA dzaH__tshogs phud 'bul/__oM AHhU~M/__ting 'dzin sngags rgyas byin brlabs pas/__/tshogs mchod ye shes bdud rtsi'i bcud/__/'dod yon rgya mtsho'i dam tshig gis/__/'phags ma 'khor bcas mnyes gyur cig__/oM Ar+yA tA re sa pa ri wA ra ga na pU dza hoH__skong bshags ni/__slar yang tshogs phud bran la nam mkha' mdzod kyi sngags rgyas brlab/__oM/__chos kun 'od gsal stong pa nyid kyi ngang /__/ting nge 'dzin gyi rol mo las byung ba'i/__/snod bcud rnam dag bde chen bkod pa'i zhing /__/gling bzhi ri rab bye ba phrag brgya'i dbus/__/mchod yon zhabs bsil me tog bdug spos dang /__/mar me dri chab zhal zas rol mo'i sgra/__/bkra shis rdzas rtags rgyal srid rin chen bdun/__/gzugs sgra dri ro reg bya'i 'dod yon mchog__/rin chen ri bo dpag bsam ljon pa'i shing /__/'dod 'jo'i ba dang ma rmos lo tog tshal/__/gter chen bum bzang 'chi med bdud rtsi'i mtsho/__/nyi zla'i snang ba nor bu'i brag skyibs sogs/__/lha dang mi las khyad par 'phags pa yi/__/byang chub sems dpa'i smon lam las grub pa/__/dngos bshams yid sprul mchod sprin rgya mtsho dang /__/tshogs dang gtor ma'i longs spyod rmad byung bas/__/'phags ma yid bzhin 'khor lo'i thugs dam bskang /__/rigs bdag 'od snang mtha' yas thugs dam=__dus gsum rgyal ba sras bcas=__yi dam dkyil 'khor yongs rdzogs=__gnas gsum dpa' bo mkha' 'gro'i=__chos srung nor lha rgya mtsho'i=__rang bzhin bcas pa'i sdig sgrib nyes ltung kun/__/gnong 'gyod drag pos mthol bshags bzod par bzhes/__/gnas skabs mthar thug 'gal rkyen zhi ba dang /__/tshe bsod dpal 'byor nyams rtogs ye shes spor/__/khams gsum snod bcud snang sems dbang du bsdus/__/gnyis 'dzin dgra bgegs chos nyid klong du sgrol/__/mdor na yid la smon pa'i dge mtshan kun/__/thogs med myur du 'grub pa'i phrin las mdzod/__/ces dang yi ge brgya pa brjod/__tshogs kyi zhal zas dngos grub kyi bdud rtsi'i tshul du rol/__lhag ma/__oM AHhU~M gis brlab/__rje btsun sgrol ma'i bka' 'khor na/__/gnas pa'i mkha' 'gro shugs 'gro'i tshogs/__/longs spyod bdud rtsi'i lhag ma bzhes/__/'khor srungs rkyen zlog phrin las spel/__/sarba DA ki nI uts+tshiSh+ta ba ling+ta b+heg+Sha si swA hA/__zhes dbul/__'chi med 'phags ma'i lha tshogs la/__/tshogs kyi mchod pa phul ba yis/__/bsod nams ye shes tshogs rdzogs nas/__/dam pa sku gnyis thob par shog___/ces smon lam gdab/__rjes cho ga mchod bstod sngon du 'gro bas/__oM/__'chi med 'phags ma'i lha tshogs thugs rje'i gter/__/bdag gis rtse gcig bsnyen cing mchod pa'i mthus/__/phrin las bzhi dang dbang bcu'i yon tan dang /__/sku gsung thugs kyi dngos grub stsal du gsol/__/rtsa sngags mthar/__sarba sid+d+hi m+me pra yats+tshan+tu/__zhes dngos grub gsol/__nongs par bshags/__mdun bskyed rten yod na brtan bzhugs dang /__med na badz+ra muHsa ye shes pa gshegs/__dam tshig pa rang la thim par bsam/__rang dang snang ba thams cad 'od gsal ngang /__/slar yang yid bzhin 'khor lo'i skur gyur pa'i/__/gnas gsum oM dkar AHdmar hU~M mthing mtshan/__/sgo gsum rdo rje gsum gyi ngo bor gyur/__/ces gsal btab la/__dge ba 'di yis bdag dang 'gro ba kun/___/'chi bdag la sogs bdud bzhi rnam bcom ste/__/skye rga na 'chi'i mtsho chen las brgal ba/__/mgon po tshe mtha' yas pa thob par shog__/ces sogs bsngo smon dang bkra shis rgyas par bya'o/__/__!_gnyis pa me mchod kyi cho ga ni/__las bzhi so so'am yongs su rdzogs pa'i thab lha mtshan dang bcas par bud shing brtsegs/__mchod bsregs kyi rdzas sogs phyag len ltar 'du bya/__bsang chu/__oM badz+ra a mr-i ta kuN+Da li ha na ha na hU~M phaT/__ces pas byin gyis brlabs pa gtor bas bsang sbyang /__stong pa'i ngang las lha rdzas dang ting nge 'dzin las grub pa'i mchod rdzas dang bsreg rdzas rnams ye shes kyi bdud rtsi'i rang bzhin so so'i las sgrub pa'i nus pa phun sum tshogs par gyur/__oM AHhU~M gis brlab/__sngags mthar/__oM badz+ra dz+wa la ra~M zhes pas me sbar/__bsang sbyang /__stong pa'i ngang las b+h+rU~M yig yongs gyur pa'i/__/mtshan nyid yongs rdzogs las kyi thab khung dbus/__/ye shes me phung rab tu 'bar ba'i klong /__/pad zla'i gdan la tA~M yig yongs gyur las/__/zhes sogs bstod pa'i bar gzhung ltar gtong /__'phags ma'i ljags steng hU~M yig las/__/byung ba'i 'od kyis sbu gu yis/__/sreg rdzas bdud rtsi'i rgyun drangs pas/__/zag med bde bas rab tu dgyes/__/thugs nas las mthun 'od zer 'phros/__/'dod rgu'i phrin las 'grub par gyur/__/ces dmigs la/__rtsa sngags la/__oM ag+na ye swA hA/__zhes dang /__skabs su 'og nas 'byung ba'i las sngags btags pas mar khu/__rtsa sngags la/__oM bo d+hi br-ik+Sha ya swA hA dang /__las sngags btags pas yam shing bcas ci nus su 'bul/__khyad par gyi rdzas zhi ba la til dang /__rtsa sngags mthar spel tshig__/bdag cag dpon slob yon mchod 'khor dang bcas pa'i nad gdon sdig sgrib thams cad shAn+tiM ku ru oM/__zhes sbyar/__rgyas pa la dUrba dang rin chen 'bru sman zas mchog sogs dang /__rtsa sngags mthar spel tshig__/bdag cag dpon slob yon mchod 'khor dang bcas pa'i tshe bsod dpal 'byor ye shes yon tan thams cad puSh+tiM ku ru oM/__dbang la chang gis sbags pa'i me tog dmar po dang /__rtsa sngags mthar/__bdag cag dpon slob yon mchod 'khor dang bcas pa'i khams gsum snod bcud thams cad wA shaM ku ru ho/__drag po la yungs dkar dang lan tshwa bsres pa dang /__rtsa sngags mthar/__bdag cag dpon slob yon mchod 'khor dang bcas pa la gnod cing 'tshe ba'i dgra bgegs 'byung po thams cad mA ra ya phaT/__ces sbyar ba gtso bor 'bul/__rdzas rdzogs pa na mchod bstod dngos grub blangs/__nongs pa bshags/__badz+ra muHsa thab kyi ye shes pa gshegs/__dam tshig pa rang la thim par bsam/__nyer bsdu nas bkra shis par gong ltar bya'o//___//_!_gsum pa gzhan rjes su 'dzin pa'i cho ga ni/__stegs bu khebs ldan gyi dbus su maN+Dal pad+ma 'dab brgyad kyi lte bar sku'am me tog gi tshom bu dgod/__de'i mdun du rnam bum bcud ldan/__g.yas su 'o ma dang mngar gsum sbyar ba'i bdud rtsi/__g.yon du dkar mngar dang tshe rdzas sbyar ba'i ril bu/__de'i mdun du mchod gtor sogs 'du bya/__bdag bskyed bzlas pa dang bcas pa'i rjes/__mdun rten bsangs sbyang /__mdun rten stong nyid skye ba med pa'i ngang /__/skye ba'i cho 'phrul sgyu ma'i rnam rol ni/__/g.yu lo bkod pa'i zhing khams nyams dga' ba/__/zhes sogs nas bstod pa'i bar bya/__gtor ma phul/__mdun bskyed kyi thugs rgyud bskul bar mos la bzlas pa ci rigs pa dang /__thugs ka'i 'od kyis tshe bcud bsdus nas tshe rdzas la thim par dmigs/__bum pa bsang sbyang /__stong pa'i ngang las pad zla'i gdan gyi steng /__/b+h+rU~M las rin chen bum pa mtshan nyid rdzogs/__/bdud rtsi'i bcud kyis yongs su gang ba'i dbus/__/pad dkar zla steng tA~M yig yongs gyur las/__/zhes sogs nas bstod pa'i bar bya/__gzungs thag blangs la/__rang gi thugs ka nas sngags kyi phreng ba byung /__/gzungs thag la 'khril bum lha'i thugs rgyud bskul/__/sku las 'chi med ye shes bdud rtsi'i rgyun/__/babs pas bum pa yongs su gang bar gyur/__/ces dmigs la bzlas pa ci nus mthar mchod cing bstod/__yi ge brgya pa brjod/__oM AHhU~M gis dung zhal gyi chu mchod yon du drangs pas bum pa'i lha 'od du zhu ba'i chu bdud rtsi'i rang bzhin du gyur par bsam/__de nas slob ma khrus byas/__sngon gtor gtong /__chos bshad ci rigs pa las mtshams sbyor gyi khyad par/__de la 'chi med tshe dang ye shes kyi dngos grub ster ba'i lhag pa'i lha khyad par can rje btsun sgrol ma dkar mo yid bzhin 'khor lo'i bskor la bka' gter dag snang gi babs so mang du bzhugs pa las/__'dir ring brgyud bka' ma jo bo rje dpal ldan a ti sha'i gdams pa las byung ba gzhir bzung ste/__nye brgyud gter ma rtsod bral dus babs kyi gter chen o rgyan rog rje gling pas 'phying dbang bang so dmar po nas spyan drangs pa'i 'phags ma'i gdams bskor gyi byin rlabs kyi brgyud pa'ang don gyis bzhugs shing /__/shin tu nye brgyud kun mkhyen bla ma nyid la 'phags ma yid bzhin 'khor los mngon sum du byin gyis brlabs pas khyad par du byas pa 'di nyid kyi sgo nas slob ma rjes su bzung ba la thog mar maN+Dal phul mdzod/__gsol ba 'debs pa 'di'i rjes zlos mdzod/__rdo rje 'dzin pa dgongs su gsol/__/bdag ni 'gro la phan don du/__/gtso chen khyod la gsol 'debs kyis/__/ma lus rjes gnang stsal du gsol/__/lan gsum/__slob dpon mdun bskyed dang bcas pa'i spyan sngar rgyun bshags sngon du 'gro bas sdom pa bzung ba 'di'i rjes zlos mdzod/__dkon mchog gsum la bdag sogs lan gsum/__dngos gzhir sku'i rjes gnang gi slad du/__khyed rang rnams stong pa'i ngang las pad zla'i gdan la tA~M dkar po las rje btsun sgrol ma sku mdog dkar mo zhal gcig phyag gnyis spyan bdun dang ldan pa/__g.yas mchog sbyin dang /__g.yon dkon mchog gsum mtshon skyabs sbyin gyi phyag rgyas me tog ut+pal la dkar po bsnams pa/__dar dang rin po che'i rgyan gyis brgyan cing zhabs rdo rje'i skyil mo krung gis bzhugs pa'i gnas gsum du oM AHhU~M gis mtshan pa las 'od zer 'phros/__bsgom pa dang 'dra ba'i ye shes sems ma'i tshogs bsam gyis mi khyab pa spyan drangs/__khyed rang rnams la gnyis su med par thim pa'i mos pa mdzod/__rtsa sngags mthar/__A be sha ya btags pa dang /__spos rol dang bcas byin dbab/__de brtan par bya ba'i slad du bum pa'i bdud rtsis spyi bo nas dbang bskur ba'i mos pa mdzod/__oM/__rje btsun 'phags ma sgrol ma yi/__/sku yi rang bzhin bum pa'i dbang /__/skal ldan khyod la bskur ba yis/__/rdo rje'i sku ru 'grub par shog__/rtsa sngags mthar/__kA ya ab+hi Shiny+tsa oM/__des sku'i rjes su gnang ba thob pa yin no/__/gsung gi rjes su gnang ba la bzlas lung gi slad du/__khyed rang rnams kyi snying gar 'khor lo dkar po rtsibs brgyad pa'i lte bar tA~M/__de'i mdun du oM/__rgyab tu hA/__rtsibs brgyad la yi ge 'bru brgyad gsal btab nas slob dpon la mos gus byas pas thugs ka'i 'khor lo las sngags phreng byung /__zhal nas thon/__khyed rang rnams kyi zhal du zhugs/__snying ga'i sngags phreng la thim pa'i mos pa 'di'i rjes zlos mdzod/__rtsa sngags lan gsum/__dam bca' ba'i slad du/__'di nas byang chub snying po'i bar du rje btsun sgrol ma dkar mo yi dam du 'dzin snyam pas 'di'i rjes zlos mdzod/__phyogs bcu na bzhugs pa'i sangs rgyas dang byang chub sems dpa' thams cad dang /__slob dpon bdag la dgongs su gsol/__bdag ming 'di zhes bgyi bas/__dus 'di nas bzung ste/__ji srid byang chub snying po la mchis kyi bar du/__sgrol dkar yid bzhin 'khor lo yi dam gyi lhar bzung zhing /__bzlas brjod la brtson par dam 'cha' lags so/__/lan gsum/__byin gyis brlab pa'i slad du/__slob dpon la me tog 'thor bzhin du 'di'i rjes zlos mdzod/__bcom ldan bdag la stsal lags kyi/__/bdag la 'go bar mdzad du gsol/__/lan gsum/__slob dpon gyi de ltar phul ba'i me tog sngags phreng du bsgyur nas khyed rang rnams kyi spyi bor gtor bas snying gar thim pa'i mos pa mdzod/__bcom ldan 'di la stsal lags kyi/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__/lan gsum/__de brtan par bya ba'i slad du 'chi med tshe'i bdud rtsi byin pa'i mos pa mdzod/__AH__rje btsun 'phags ma sgrol ma yi/__/gsung gi rang bzhin bdud rtsi'i rgyun/__/skal ldan khyod la sbyin pa yis/__/rdo rje'i gsung du 'grub par shog__/rtsa sngags dang /__wA ka a b+hi Shiny+tsa AH__des gsung gi rjes su gnang ba thob pa yin no/__/thugs kyi rjes gnang gi slad du/__slob dpon gyi thugs ka'i 'od kyis mdun bskyed kyi thugs rgyud bskul/__de'i thugs ka nas 'od zer 'phros/__phyogs bcu'i sangs rgyas thams cad kyi thugs gnyis su med pa'i ye shes kyi ngo bo phyag mtshan ut+pa la'i rnam par spyan drangs/__mdun bskyed kyi thugs kar thim/__de'i thugs ka nas ye shes kyi sku gnyis pa byung /__khyed rang rnams kyi spyi bo nas zhugs/__snying gar thim pa'i mos pa dang bcas spros bral rnam par mi rtog pa'i ngang du mnyam par 'jog mdzod/__de brtan par bya ba'i slad du tshe'i ril bu byin pa'i mos pa mdzod/__hU~M/__rje btsun 'phags ma sgrol ma yi/__/thugs kyi rang bzhin tshe'i ril bu/__/skal ldan khyod la sbyin pa yis/__/rdo rje'i thugs su 'grub par shog__/rtsa sngags dang /__tsit+ta a b+hi Shiny+tsa hU~M/__des thugs kyi rjes su gnang ba thob pa yin no/__/rjes su bkra shis brjod/__dam tshig khas blangs sogs spyi ltar dang /__rjes chog mchod bstod dngos grub blangs ba sogs tshogs mchod kyi skabs ltar bya'o/__/zhes pa'ang zhabs drung rin po che bstan 'dzin lags kyi gsung gis bskul ba dang /__rje btsun rin po che dz+nyA na'i mtshan can gyi zhal snga nas kyang legs so dbugs dbyung bas 'dri ba'i spobs pa skyes te/__sngags btsun shA sa na d+ha ra badz+ra gyis lha dang mkha' 'gro 'du ba'i dben ri'i ngogs bsam gtan bsgom pa'i khang bur thun mtshams 'ga' zhig tu bris pa'i dge ba'i bstan 'dzin gyi skyes bu rnams zhabs pad brtan cing /__sems can thams cad tshe mthar phyin pa'i rgyur gyur cig__/'di'i brgyud pa ni/__kun mkhyen rin po che nas/__rje btsun ye shes chos sgron/__ngag dbang bstan 'dzin rdo rje/__dge slong blo bzang bstan 'phel/__bstan 'dzin rin po che mkhyen rab mthu stobs/__des bdag la'o/___/__!__ tshe dbang grangs gsog na/__rgyas pa tshar gcig bkra shis yan grub pa'i mthar/__slar yang bla ma dang bdun bskyed rje btsun sgrol ma dkar mo tha mi dad pas sku gsung thugs rdo rje'i 'chi med tshe'i dbang dang dngos grub ma lus pa stsal ba'i mos pa mdzod/__bum pa spyi bor bzhag cing bum chu byin la/__oM/__rje btsun 'phags ma sgrol ma yis/__/sku yi rang bzhin bum pa'i dbang /__/skal ldan khyod la bskur ba yis/__/rdo rje'i sku ru 'grub par shog__/rtsa sngags dang /__kA ya a b+hi Shiny+tsa oM/__bdud rtsi sbyin la/__AH__rje btsun 'phags ma sgrol ma yis/__/gsung gi rang bzhin bdud rtsi'i rgyun/__/skal ldan khyod la sbyin pa yis/__/rdo rje'i gsung du 'grub par shog__/rtsa sngags dang /__wA ka a b+hi Shiny+tsa AH__ril bu sbyin la/__hU~M/__rje btsun 'phags ma sgrol ma yi/__/thugs kyi rang bzhin tshe'i ril bu/__/skal ldan khyod la sbyin pa yis/__/rdo rje'i thugs su 'grub par shog__/rtsa sngags dang /__tsit+ta a b+hi Shiny+tsa hU~M/__shis brjod sh+lo ka gang rung re bya/__grangs rdzogs nas dam tshig khas blang man dkyus ltar ro/___/__!
