JKW-KABUM-16-MA-019-wylie
sman btsun tshogs mchod phan bde'i rna cha/ @#/__/bka' srung sman btsun mched lnga'i phrin las dpag bsam yongs 'du dang 'brel ba'i tshogs mchod phan bde'i rna cha zhes bya ba bzhugs so//__// ye shes kyi DA ki bde chen rgyal mo la phyag 'tshal lo/__/gzod nas chos sku'i dbyings las ma g.yos kyang /__/'gag med sgyu 'phrul drwa ba'i rol mo ni/__/gnas yul dur khrod kun tu sgyur mdzad ma/__/sman btsun mched lnga'i dgyes skong deng 'dir spel/__/'di la gsum/__sbyor ba ni/__gnas gtsang mar bris sku dang /__sku gtor sogs gzhung nas ji ltar 'byung ba ltar 'du byas pa'i mthar sman rag gtor ma dang /__tshogs kyi yo byad ma tshang ba med par bsag__/yi dam gang rigs kyi las gzhung bsrang ba sngon du 'gro bas sman btsun mched lnga'i phrin las nas bzlas pa yan grub pa'i rjes/__dngos gzhi la/__brjod med kyi bshags pas rgyud sbyangs te/__dang po byin gyis brlab pa ni/__ra~M ya~M kha~M/__chos dbyings mtha' bral bde skyong snod mchog tu/__/zag med dga' bzhi dbu mar sbyar ba'i rtsal/__/bsam gyis mi khyab mchod pa'i sprin gyi gter/__/mi zad nam mkha' mdzod kyi 'khor lor gyur/__/oM hU~M trA~M hrIHAH__gnyis pa tshogs zhing spyan 'dren ni/__hU~M/__ka dag 'gyur med ye shes DA ki'i zhal/__/lhun grub rang rtsal thig le chen po'i gzugs/__/sna tshogs sprul pa'i sgyu 'phrul drwa ba can/__/sman btsun mched lnga 'khor dang bcas pa kun/__/'dod yon tshogs la spyan 'dren gshegs su gsol/__/thabs shes dbyer med sprul pa'i dkyil 'khor 'dir/__/yul dang dbang por rol pa'i mchod sprin ni/__/bde stong zung 'jug phyag rgya la sbyar bas/__/thugs dam dgyes par bskang phyir da tshur byon/__/badz+ra sa ma ya dzaH__gsum pa tshogs phud 'bul ba ni/__/hU~M/__lugs 'byung d+hU tir g.yo pa'i gar mkhan ma/__/lugs ldog 'od gsal thig ler bsdams pa las/__/tshogs drug rang grol bla med dam tshig rdzas/__/sman btsun mched lnga 'khor dang bcas la 'bul/__/badz+ra pany+tsa dz+nyA na DA ki nI ga Na tsakra pU dza khA hi/__/bzhi pa bshags pa ni/__hU~M/__yongs grub blo bral shes rab pha rol phyin/__/kun brtags glo bur 'khrul pas bcings pa'i mthus/__/gzhan dbang sna tshogs rtog pa'i rang rtsal gyis/__/thugs dang 'gal ba'i tshogs kun bshags par bgyi/__/yi ge brgya pa brjod/__lnga pa bsgral zhing bstab pa ni/__hU~M/__gzung ba'i yul la brten gyur 'dzin pa'i sems/__/dbyings rig mnyam sbyor mtshon gyis bsgral nas kyang /__/sha khrag bde stong zag med bdud rtsi yis/__/sman btsun DA ki'i tshogs rnams mnyes gyur cig__/pany+tsa dz+nyA na DA ki nI mAM sa rak+ta tsit+ta go ro tsa na ba su ta kiM ni ri ti ba liM ta khA hi/__drug pa thugs dam bskang ba ni/__AH__phyi nang gzhan gsum dbu mar ro gcig pas/___/srid dang zhi ba'i khams kun yongs khyab pa'i/__/bzhed rgu'i rol mor 'char ba'i 'dod yon gter/__/thugs dam dgyes par skong ba'i rdzas su shar/__/nam mkha' mdzod kyi sngags rgyas brlab/__hU~M/__bde chen chos sku'i klong yangs sogs nas/__mthu rtsal can la bdag bstod do:__bar las gzhung bzhin/__bdun pa tshogs la rol zhing smon lam gdab pa ni gzhan nas 'byung ba ltar bya/__brgyad pa lhag ma bsngo ba ni/__a kA ros brlab/__phaiM phaiM/__blo bral thig le chen po'i ye shes ni/__/sna tshogs rtog pa'i rjes mthun rol pa can/__/ma mo DA ki zhing skyong khyo shug kun/__/lhag gtor 'di bzhes don gnyis phrin las sgrubs/__/uts+tshiSh+Ta ba liM ta khA hi/__bar 'dir spro na mnga' gsol gyi rjes/__dgu pa thugs dam bskul ba ni/__hU~M/__zung 'jug gnyug ma'i pho brang nas/__/bde stong dbyer med DA ki nI/__/gnas yul mkha' 'gro'i tshogs kyi rje/__/tshe ring mched lnga 'khor bcas kyis/__/mchod gtor rgyan ldan 'di bzhes la/__/rgyal dbang pad+ma thod phreng dang /__/rig 'dzin brgyud pa'i spyan snga ru/__/sogs dang spro na/__de mthar/__kye/__thub pa'i bstan pa rin chen 'bar ba'i snod/__/ces sogs kyis phrin las gzhol/__/bcu pa chad tho bya ba ni/__hU~M/__bde chen thabs mchog dpa' bo rA hu la/__/rdul bral stong pa'i rang gzugs e ka dza/__/zung 'jug sgyu mar shar ba'i rdo rje legs/__/sna tshogs rig rtsal dregs pa'i tshogs rnams kun/__/gdod nas yongs grol don gyi dpal chen pos/__/dbang bskur dam bzhag bran du khas blangs bzhin/__/mchod gtor bzhes la phrin las 'grub par mdzod/__/bcu gcig brtan ma bskyang ba ni/__hU~M/__'pho med 'od gsal dbu ma'i dkyil 'khor du/__/dus sbyor bcu gnyis gnas su dag pa'i gzugs/__/bod skyong brtan ma'i tshogs rnams gtor ma bzhes/__/gangs can bstan dang 'gro la phan bde spel/__/ma ma hrIM hrIM ba liM ta khA hi/__bcu gnyis mnan pa bya ba ni/__hU~M/__byang chub sgrub la 'tshe ba'i dgra bgegs kun/__/rnam thar gsum ldan dbyings su rgyas btab cing /__/dbang dang drag shul rol pa'i bro brdungs pas/__/byang chub bar du ldang bar ma gyur cig__/s+t+waM b+ha ya nan/__rjes kyi rim pa la/__dang po dngos grub blang ba ni/__hU~M/__dngos su 'byor pa'i mchod pa sna tshogs dang /__/yid sprul zag med kun tu bzang po'i sprin/__/bde stong zung 'jug chen por mnyam sbyar bas/__/sman btsun DA ki'i tshogs rnams mnyes gyur cig__/badz+ra pany+tsa dz+nyA na DA ki nI sa pa ri wA ra rU pa sogs kyis mchod/__hU~M/__/rjes chags dga' bzhi'i lang tshor 'bar ba'i sku/__/grags stong rdo rje nA da'i rang bzhin gsung /__/'gyur med rnam pa kun gyi mchog ldan thugs/__/mkha' 'gro'i tshogs rje 'khor dang bcas la bstod/__/ces pas bstod/__hU~M/__ye shes grub kyang las kyi phyag rgya can/__/sman btsun DA ki 'khor bcas deng 'dir dgongs/__/'chi med tshe dang 'dzad med nor la sogs/__/mchog dang thun mong dngos grub ma lus stsol/__/pany+tsa dz+nyA na DA ki nI sa pa ri wA ra sarba sid+d+hi pha la hoH__gnyis pa nongs pa bshags pa ni/__hU~M/__rtag tu gzung 'dzin spros pa las 'das phyir/__/rang bzhin dbyings la nyes pa'i skyon bral yang /__/glo bur 'khrul pa'i mtshan mas bcings pa'i mthus/__/nongs pa gang mchis snying nas bzod par gsol/__/yi ge brgya pa brjod/__/gsum pa gshegs su gsol ba ni/__hU~M/__bskyed cing spyan drangs ye shes mkha' 'gro'i tshogs/__/gnas yul lhan skyes grub pa'i grong du gshegs/__/snang char shar ba'i lha sku'i rol pa kun/__/skye med brjod bral gnyug ma'i dbyings su yal/__/bzhi pa bsngo smon bya ba ni/__hU~M/__dge ba'i rtsa ba 'dis mtshon legs byas kun/__/rnam grol chos kyi dbyings su bsngos pa'i mthus/__/bdag gzhan 'gro kun tshogs gnyis myur rdzogs nas/__/mchog thun phrin las lhun gyis grub par shog__/lnga pa shis pa brjod pa ni/__hU~M/__kun khyab 'gyur med don dam bde ba che/__/mtha' klas sgyu 'phrul drwa ba'i rol mo las/__/don gnyis 'dod rgu yid bzhin stsol mdzad pa/__/rtsa gsum dam can rgya mtsho'i bkra shis shog__/gzhan yang bkra shis ci rigs pas mtha' brgyan par bya'o/__/nges don shes rab pha rol phyin ma'i dbyings/__/drang don 'jig rten skyong ba'i rol pa can/__/grub gnyis lag rtser sbyin pa'i bdag nyid che'i/__/dgyes skong mchod sprin gsar pa ci yang spros/__/'di na rab mdzes zhi ba'i nags klung du/__/khu byug lang tshos rgyags pa'i mgrin glu yis/__/mtshon med phaXn bdeX'i lam bzang ster byed gang /__/don gnyer dpyod ldan tshogs kyi rnaX charaX 'os/__/de las byung ba'i dge bas bdag gzhan 'gro/__/gnas skabs rnam bzhi'i phrin las lhun grub cing /__/mthar thug kha sbyor yan lag bdun gyi grong /__/rnam kun mchog ldan rtse dgas rol par shog__/ces 'od gsal rdzogs pa chen po klong chen snying gi thig le'i bka' srung sman btsun mched lnga'i dgyes skong tshogs kyi mchod pa phan bde'i rna cha zhes pa 'di'ang don gnyer dag gis nye bar bskul pa dang /__rang nyid kyang tshul 'dir mi phyed pa'i 'dun pa thob pas rkyen byas te/__/kun mkhyen yab sras kyi gzhung lugs la rgyu mtshan shes nas dad pa brtan pa gzhon nu 'jigs med mkhyen brtse'i zlos gar gyis rang lo bcu bdun par gang shar myur du sbyar ba'o//__//sarba shu b+ha sba d+hur+b+du ye ta//
