JKW-KABUM-15-BA-011-wylie
rje rang nyid kyi zab gter skor la/_snga 'gyur rdo rje theg pa'i brgyud pa gsum gyi bla ma la gsol ba 'debs pa byin rlabs char 'bebs/_ @#/__/snga 'gyur rdo rje theg pa'i brgyud pa gsum gyi bla ma la gsol ba 'debs pa byin rlabs char 'bebs zhes bya ba bzhugs so/__/ na mo gu ru be/__kun bzang rdor sems dga' rab shrI seng /__/rigs can drwa ma lnga dang rig 'dzin brgyad/__/rje 'bangs nyer lnga so zur gnubs nyang sogs/__/snga 'gyur bka' brgyud bla mar gsol ba 'debs/__/drug ldan brgyud pa'i zhal lung rmad byung bas/__/gangs can phan bde'i snang ba rgyas mdzad pa/__/gter chen brgya dang gter phran stong rtsa sogs/__/zab gter brgyud pa rnams la gsol ba 'debs/__/ye shes nor bu'i me long dwangs pa'i ngogs/__/rab 'byams rtsa gsum rgya mtsho'i snang brnyan gyis/__/dbang bskur byin gyis brlabs pa'i dge mtshan can/__/dag snang brgyud pa rnams la gsol ba 'debs/__/khyad par skyabs gnas kun 'dus thod phreng rtsal/__/dbyer med chos kyi rgyal po klong chen pa/__/snyigs dus bstan pa'i nyi ma gter bdag gling /__/yab sras brgyud par bcas la gsol ba 'debs/__/de ltar gsol ba btab pa'i byin rlabs kyis/__/deng nas byang chub snying por mchis kyi bar/__/dal 'byor mchog thob zab gsang bstan la zhugs/__/mtshan ldan bla mas rtag tu rjes 'dzin shog__/tshul gnas thos dang bsam pa'i pha mthar son/__/nges 'byung byang chub sems gnyis snying la shar/__/dben zhing nyams dga' zhi ba'i sman ljongs su/__/rnal 'byor gsum gyi lam bzang sgom par shog__/de tshe snod bcud lha sngags chos skur dag__/rtsa rlung thig le bde stong dbu mar smin/__/ka dag lhun grub snang ba mthar phyin nas/__/'ja' lus rdo rje'i go 'phang mngon gyur shog/__//ces pa'ang grub pa'i dpyid mtsho skyes bla ma dgyes pa'i 'bangs kyi mos gus kyi chu gter las byung ba'o//__//sarba dA mang+ga laM//__//
