JKW-KABUM-13-PA-023-015-wylie
byang gter khyung nag byin rlabs/_ @#/_/lha brag gter byon las kyi bya khyung nag po'i byin rlabs kyi cho ga bar chad kun sel zhes bya ba bzhugs so/__/oM swa sti sid+d+haM/__rig 'dzin chen po dngos grub rgyal mtshan gyi gter byon las kyi bya khyung nag po'i sgo nas slob ma la byin rlabs bya bar 'dod na/__stegs kyi khar many+dzi'i steng du gtor ma dpal gtor brjid ldan 'khor rang 'dra brgyad kyis bskor ba la rtsi dmar byugs sku tsaka yod na 'dzugs/__mthar mchod gtor dang /__nye logs ci rigs par las bum sogs dgos pa'i yo byad rnams 'du bya/__bdag mdun dbyer med kyi bskyed bzlas sngon du 'gro bas/__slob ma rnams khrus bya/__/bgegs bskrad/__srung 'khor bsgom/__sems bskyed gsal gdab nas/__de la 'dir klu dang sa bdag gi gnyen po rdo rje khyung gi skor la gsar rnying bka' gter gyi lugs srol mi 'dra ba du ma zhig mchis pa las/__da lam sprul pa'i gter ston chen po rig 'dzin rgod kyi ldem 'bru can gyis zangs zangs lha brag nas spyan drangs pa'i bka' brgyad drag po rang byung rang shar gyi cha lag rgyal sras khyung chen yongs rdzogs dang /__gsang mtshan thugs kyi sgrub pa'i las tshogs las kyi bya khyung nag po gnyis kyi phyi ma 'di'i sgo nas byin rlabs gtor dbang gi rim pa zab mo bsgrub pa la/__slob dpon gyi bya ba rnams grub nas/__slob ma la bya ba'i rim pa sbyor dngos rjes gsum las/__sbyor ba'i rim pa la/__thog mar byin rlabs dbang bskur zab mo zhu ba'i yon du maN+Dal zhig phul mdzod/__gsol ba 'debs pa 'di'i rjes zlos mdzod/__/dus gsum sangs rgyas thams cad kyi/__/thugs las sprul pa'i pho nya ni/__/las kyi bya khyung 'jigs pa yi/__/sku gsung thugs kyi byin rlabs stsol/__/rgyud dag par bya ba'i slad du/__mdun gyi nam mkhar bla ma dang gnyis su med pa'i rtsa gsum chos srung rgya mtsho'i tshogs dang bcas pa mngon sum lta bur bzhugs pa'i spyan sngar skyabs su 'gro ba dang /__sems bskyed pa 'di'i rjes zlos mdzod/__brgyud pa'i rtsa ba bla ma rje:__dngos grub stsol ba'i yi dam lha:__legs par byin rlob mkha' 'gro ma:__rtsa ba gsum la skyabs su mchi:__sems bskyed 'gro ba kun don du:__sprul pa'i khyung chen bsgrubs nas ni:__gang la gang 'dul phrin las kyis:__'gro don byed par sems bskyed do:__dngos gzhi la sku gsung thugs kyi byin rlabs dang /__gtor ma'i dbang bskur ba rnams su yod pa las/__dang po sku'i byin rlabs kyi slad du dmigs pa 'di bzhin mdzod/__las sngags kyis bsang /__swa b+hA was sbyang /__slob ma rnams kyi phung khams skye mched kyis mtshon pa'i ma dag pa'i snang ba thams cad mi dmigs te stong pa nyid du gyur/__stong pa'i ngang las/__khyed rang rnams kyi sems nyid khroM mthing nag gcig tu gsal ba de yongs su gyur pa las/__khyed rang rnams las kyi bya khyung nag po mgo bo dgu pa/__phyag gnyis pa/__klu rgyal mang po gdan du bting ba/__klu phran mang po zas su za ba/__sku lus las gnam lcags kyi me 'bar ba/__ye shes 'bar ba'i gshog pa can/__nyi zla/__'bar ba'i spyan mig can/__lcags kyu 'bar ba'i mchu sder can du gsal ba'i spyi bor oM dkar po/__mgrin par AHdmar po/__thugs kar hU~M sngon pos mtshan pa/__de ltar du gsal ba'i thugs ka'i sa bon las 'od zer 'phros pas phyogs bcu'i sangs rgyas dang byang chub sems dpa' thams cad kyi sku'i byin rlabs ma lus pa sprul pa'i khyung nag chen po'i sku'i rnam pa bsam gyis mi khyab pa/__steng nas kha char babs pa lta bu/_'og nas sa rlangs thon pa lta bu/__bar nas bu yug 'tshubs pa lta bu/__nam mkha' sa gzhi bar snang thams cad yom yom shig shig byon nas/__khyed rang rnams kyi gzhi lus lhar gsal ba la dbyer med du thim pas lus kyi nad gdon sdig sgrib thams cad dag cing rdo rje khyung gi sku'i byin rlabs ma lus pa rgyud la zhugs pa'i mos pa mdzod/__oM drung drung /__ngur ngur/__chem chem/__khaM khaM/__sod sod/__rbad rbad/__dpe phal cher la med swA hA/__kA ya a b+hi Shiny+tsa oM/__spos rol bya/__gsung gi byin rlabs kyi slad du/__khyed rang rnams las kyi bya khyung nag por gsal bzhin pa'i gnas gsum yig 'bru gsum gyis mtshan pa las 'od zer 'phros pas phyogs bcu'i sangs rgyas dang byang chub sems dpa' thams cad kyi gsung gi byin rlabs ma lus pa sprul pa'i khyung nag chen po'i gzungs sngags kyi rnam pa bsam gyis mi khyab par spyan drangs nas ngag sngags su gsal ba la thim pas ngag gi nad gdon sdig sgrib thams cad dag__/rdo rje khyung gi gsung gi byin rlabs ma lus pa rgyud la zhugs pa'i mos pa mdzod/__sngags mthar/__wA ka a b+hi Shiny+tsa AHdang spos rol bya/__slar yang thugs kyi byin rlabs kyi slad du/__khyed rang rnams las kyi bya khyung nag por gsal bzhin pa'i gnas gsum yig 'bru gsum gyis mtshan pa las 'od zer 'phros pas phyogs bcu'i sangs rgyas dang byang chub sems dpa' thams cad kyi thugs kyi byin rlabs ma lus pa sprul pa'i khyung nag chen po'i thugs sa bon gyi rnam pa bsam gyis mi khyab par spyan drangs nas yid ye shes su gsal ba la dbyer med du thim pas yid kyi nad gdon sdig sgrib thams cad dag__/rdo rje khyung gi thugs kyi byin rlabs ma lus pa rgyud la zhugs pa'i mos pa mdzod/__sngags mthar/__tsit+ta a b+hi Shiny+tsa hU~M/__dang spos rol bya/__mtha' rten gtor ma la brten nas dbang bskur ba ni/__gtor ma 'di nyid sprul pa'i bya khyung chen por gsal btab nas ye shes pa bstims/__mchod bstod bzlas pas mnyes par byas pa yin pas/__rdo rje khyung gi ye shes sku dngos yin snyam pa'i mos gus drag po dung pa zhig mdzad pa la brten nas/__rang rang so so'i spyi bor byon nas khyung nag gi sku tshon gang ba dpag tu med pa mar me gcig la gnyis mched gyi tshul du byung /__khyed rang rnams lhar gsal ba'i tshangs bug nas zhugs/__lus kyi nang thams cad bong ba 'brus khengs pa ltar sprul pa'i khyung nag gi sku mer gyis khengs pas nad gdon sdig sgrib gnod byed kyi tshogs thams cad gzhob thul gyis lhag med du song /__lus sems la bde stong gi ye shes bsam gyis mi khyab pa skyes te sprul pa'i bya khyung chen po'i sku gsung thugs yon tan phrin las dang dbyer med du byin gyis brlabs pa yin snyam du thugs mos mdzod/__spro na brgyud pa'i bshar 'debs dang /__bsdu na/__rtsa ba dang brgyud par bcas pa'i dpal ldan bla ma dam pa rnams dang /__yi dam dkyil 'khor gyi lha tshogs/__gnas gsum gyi dpa' bo mkha' 'gro chos skyong srung ma'i tshogs rnams dang /__khyad par ye shes sprul pa'i khyung chen nag po'i lha tshogs 'khor dang bcas pa thams cad kyis rdo rje'i slob ma 'di rnams kyi lus ngag yid gsum la sku gsung thugs kyis dbang bskur zhing byin gyis rlabs par mdzad du gsol/__de ltar byin gyis brlabs pa la brten nas steng gdon gza' dang rgyu skar/__'og gdon klu dang sa bdag__/bar gdon 'byung po rgyal btsan la sogs pa 'gal rkyen nad gdon bar chad thams cad zhi ba dang /__mthun rkyen tshe dang bsod nams/__dpal dang 'byor pa/__mthu dang nus pa/__nyams dang rtogs pa'i yon tan thams cad gong nas gong du 'phel zhing rgyas par byin gyi brlab tu gsol/__sngags mthar/__ba ling+ta a b+hi Shiny+tsa oM AHhU~M/__mthar gtor ma'i lha 'od du mer gyis zhu nas khyed rang la thim pas byang chub bar du 'bral ba med par byin gyis brlabs pa'i mos pa mdzod/__ces dang sngags kyi mthar/__dzaHhU~M ba~M hoH__zhes brjod/__rjes dam tshig khas blang ba sogs spyi ltar byas la slob ma rnams rang gnas su btang /__slob dpon gyis bdag bskyed la mchod bstod bzod gsol nyer bsdu bsngo smon shis brjod sogs spyi ltar bya'o/__/zhes pa'ang yig rnying mdzad byang mi gsal ba zhig la mtshams sbyor sogs kyi gsal byed bla ma'i phyag bzhes ltar sbyar te/__mkhas shing dngos grub brnyes pa'i sgrol ston 'jam pa'i dbyangs chos kyi rgyal mtshan las tshul 'di'i bka' drin nos pa'i mkhyen brtse'i dbang pos zin bris su btab pa dge legs su gyur cig__/'di'i byin rlabs tshar grangs byed na/__thog mar gtor dbang _gi bar rgyas par byed/__de nas slar yang khyed rang rnams las kyi bya khyung nag por gsal bzhin pa'i gnas gsum yig 'bru gsum gyis mtshan pa las 'od zer 'phros pas phyogs bcu'i sangs rgyas dang byang chub sems dpa' thams cad kyi sku gsung thugs kyi byin rlabs ma lus pa sprul pa'i khyung nag chen po'i sku phyag rgya/__gsung sngags phreng /__thugs sa bon gyi rnam pa bsam gyis mi khyab par spyan drangs nas sgo gsum rdo rje gsum du gsal ba la thim pas lus ngag yid gsum gyi nad gdon sdig sgrib thams cad dag__/rdo rje khyung gi sku gsung thugs kyi byin rlabs ma lus rgyud la zhugs pa'i mos pa mdzod/__sngags mthar kA ya wA katsit+ta a b+hi Shiny+tsa oM AHhU~M/__zhes brjod cing spos rol bya/__de brtan par bya ba'i slad du/__gtor ma lhar gsal ba rang rang gi spyi bor byon pa las rdo rje khyung gi sku dpag tu med pa 'phros/__lus kyi nang thams cad gang /__nad gdon sdig sgrib thams cad lhag med du bsregs shing sbyangs/__sku gsung thugs yon tan phrin las dang bcas pas rgyud byin gyis brlabs pa'i mos pa mdzod/__spro na gsol 'debs dang /__bsdu na sngags mthar ba liM ta sogs btags pas dbang bskur/__shis brjod gang rung shwa lo ka re bya/__grangs rdzogs pa'i tshe/__mthar gtor ma'i lha 'od du mer gyis zhu sogs dkyus ltar ro//___//_!
