རྡོ་རྗེ་མི་འཁྲུགས་པའི་ཆོ་ག་གཞན་ཕན་ཟླ་བ་ལས་འཕྲོས་པའི་སློབ་མ་དབང་བསྐུར་བའི་ཚུལ།

🚧 This website is under continued development. We appreciate your patience!

First text in section. Back to Volume PageNext Text

Wylie title	rdo rje mi 'khrugs pa'i cho ga gzhan phan zla ba las 'phros pa'i slob ma dbang bskur ba'i tshul
Location	mkhyen brtse'i bka' 'bum Volume 11, sde tshan 7, Text 1, Pages 245-262 (Folios 1a to 9b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje mi 'khrugs pa'i cho ga gzhan phan zla ba las 'phros pa'i slob ma dbang bskur ba'i tshul. In 'jam dbyangs mkhyen brtse'i dbang po'i bka' 'bum, Vol. 11: 245-262. Khams sde dge rdzong sar dgon: Rdzong sar blo gros phun tshogs, 2020.
Genre	Ritual and Liturgical Texts - cho ga phyag len  ·  Empowerment Ritual - dbang chog - dbang skur
Deity	rdo rje mi 'khrugs pa
Colophon	།ཞེས་པའང་རྡོ་རྗེ་མི་འཁྲུགས་པའི་ཆོ་ག་གཞན་ཕན་ཟླ་བ་གཞིར་བཞག་ནས་སློབ་མ་ལ་དབང་བསྐུར་བའི་ཚུལ་ལྷན་ཐབས་ཀྱི་ཚུལ་དུ་མཉྫུ་གྷོ་ཥས་བྲིས་པ་མངྒ་ལཾ།།
	zhes pa'ang rdo rje mi 'khrugs pa'i cho ga gzhan phan zla ba gzhir bzhag nas slob ma la dbang bskur ba'i tshul lhan thabs kyi tshul du many+dzu g+ho Shas bris pa mang+ga laM

1 Texts in this Section (sde tshan or chos tshan)

1 245-262	རྡོ་རྗེ་མི་འཁྲུགས་པའི་ཆོ་ག་གཞན་ཕན་ཟླ་བ་ལས་འཕྲོས་པའི་སློབ་མ་དབང་བསྐུར་བའི་ཚུལ། rdo rje mi 'khrugs pa'i cho ga gzhan phan zla ba las 'phros pa'i slob ma dbang bskur ba'i tshul Ritual and Liturgical Texts - cho ga phyag len   ·   Empowerment Ritual - dbang chog - dbang skur	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྡོ་རྗེ་མི་འཁྲུགས་པའི་ཆོ་ག་གཞན་ཕན་ཟླ་བ་ལས་འཕྲོས་པའི་སློབ་མ་དབང་བསྐུར་བའི་ཚུལ་བཞུགས་སོ།། །། ཨོཾ་སྭ་སྟི། མི་འཁྲུགས་པ་ལྷ་དགུའི་དཀྱིལ་འཁོར་དུ་སློབ་མ་ལ་དབང་བསྐུར་བའི་སྐབས། སྦྱོར་བ་ཡོ་བྱད་ཀྱི་བཤམ་ནི་སྣོད་དང་ལྡན་པའི་སློབ་མ་ལ། མི་འཁྲུགས་མགོན་པོའི་དཀྱིལ་འཁོར་དུ། །མངོན་པར་དབང་བསྐུར་བསྒྲུབ་འདོད་པས། །གཙང་ཞིང་དབེན་པའི་ས་ཕྱོགས་སུ། །སྟེགས་བུ་རས་བཟང་གིས་བཀབ་པའི། །སྟེང་དུ་མཎྜལ་གཙང་མའི་དབུས། །དྲི་ཡི་ཐིག་ལེ་གྲུ་བཞི་དང་། །ཕྱོགས་མཚམས་རྣམས་སུ་ཟླུམ་པོའི་སྟེང་། །མེ་ཏོག་ཚོམ་བུ་རེ་བཀོད་དེ། །མཉྫི་ལ་སོགས་སྟེང་དུ་བཞག །དེ་ཡི་འོག་གམ་མདུན་གྱི་ཆར། །ས་ལྷའི་མཎྜལ་ཚོམ་བུའང་དགོད། །དེ་ཡི་ཕྱིར་རོལ་བྱང་ཤར་གྱི། །མཚམས་སུ་མཚམས་འཛིན་མེ་ཏོག་དང་། །ཆུ་གཉིས་སྔོན་འགྲོའི་ཉེར་སྤྱོད་རྣམས། ཤར་ནས་བརྩམས་ཏེ་གྲུ་བཞིར་བཤམ། །ཤར་གྱི་ཕྱོགས་སུ་ལྷ་གཅིག་དང་། །བཅས་པའི་ཕྱོགས་བཞི་མཚམས་བཞི་རུ། །བདུག་སྤོས་མར་མེ་ཞལ་ཟས་རེ། །གཡས་སྐོར་དག་ཏུ་གྲུ་བཞིར་བཤམ། །ས་ལྷའི་མཎྜལ་ཉེ་ལོགས་སུ། །གཏོར་མ་གཅིག་བཤམ་འབྱོར་གྱུར་ན། །སྒོས་མཆོད་ཀྱང་བཤམས་དཀྱིལ་འཁོར་གྱི། །ལྷོ་ནུབ་ནས་བརྩམས་ཤར་ལྷོའི་བར། །ཆ་གསུམ་གཏོར་མའང་ལེགས་པར་བཤམ། །སློབ་དཔོན་མདུན་དུ་རྡོར་དྲིལ་དང་། །མཚན་ཉིད་ལྡན་པའི་བུམ་པ་གཅིག །ལེགས་བཀྲུས་ཁ་ཚར་མ་ཉམས་པའི། །རས་བཟང་མགུལ་ཆིངས་སྲོག་ལྔ་པའམ། །བདུན་པ་ལེགས་བཅིངས་མཚན་མ་གདགས། །དྲག་སྔགས་བཟླ་ཞིང་གུ་གུལ་གྱིས། །ལེགས་བདུག་ཡུངས་དཀར་དག་གིས་བྲབ། །གཙང་མའི་ཆུ་ཡིས་སུམ་གཉིས་དགང་། །འབྲུ་ལྔ་སྨན་ལྔ་རིན་ཆེན་ལྔ། །སྙིང་པོ་ལྔ་དང་དྲི་ལྔ་གཞུག །ཀུ་ཤས་ཁ་བརྒྱན་དེ་སྟེང་དུ། །དུང་ཆོས་དྲི་བཟང་ཆུར་བཅས་དང་། །རྡོ་རྗེ་གཟུངས་ཐག་ཀྱང་བཤམ་ཞིང་། །ལོགས་སུ་སློབ་མ་སྟ་གོན་ཆས། །ཉེར་སྤྱོད་སོ་ཤིང་ཁྱོར་ཆུ་དང་། །དཔུང་སྐུད་ཀུ་ཤ་སོགས་བཤམ་མོ། །ཞེས་སོ། །ཆོ་ག་དངོས་ལ། སྟ་གོན་དང་། དངོས་གཞི་གཉིས་ཀྱི་དང་པོ་ལ། བདག་བསྐྱེད་བསྒོམ་པ། དཀྱིལ་འཁོར་གྱི་བྱ་བ། རྗེས་ཀྱི་ཆོ་གའོ། །དང་པོ་ནི། མཆོད་པ་བྱིན་རླབས་ནས། རང་དམ་ཚིག་པའི་ང་རྒྱལ་གྱིས་འཁོད་པར་གྱུར་ཞེས་པའི་བར་གཞན་ཕན་ཟླ་བ་ལྟར་རོ། །གཉིས་པ་ལ་བཞི་ལས། སའི་ལྷ་མོའི་སྟ་གོན་ནི། ཚོམ་བུ་ཨ་མྲྀ་ཏས་བསང་། ཤཱུ་ནྱ་ཏཱས་སྦྱངས་ལ། རང་གི་ལག་པ་གཡས་པ་ས་ལ་རེག་པའི་རྐྱེན་གྱིས་ཚོམ་བུའི་སྟེང་དུ་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་སའི་ལྷ་མོ་སྐུ་མདོག་སེར་མོ་ཞི་བའི་ཉམས་ཅན་ཕྱག་གཉིས་ཀྱིས་རིན་པོ་ཆེའི་བུམ་པ་འཛིན་པ། རིན་པོ་ཆེའི་རྒྱན་དང་དར་གྱི་ན་བཟའ་ཅན། བདག་ལ་ཞལ་ཕྱོགས་ཏེ་བཞུགས་པར་གྱུར། དེ་ལ་ཨོཾ་པྲི་ཐི་དེ་ཝཱི་ཞེས་པ་རེ་རེའི་མགོར་སྦྱར་བའི། ཨརྒྷཾ་པྲ་ཏཱི་ཙྪ་སྭཱ་ཧཱ་ཞེས་སོགས་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། གཏོར་མ་ཆུ་གཙང་གིས་བྲན་ལ་ཨོཾ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབས་ལ། ཨོཾ་པྲི་ཐི་ཝི་དེ་ཝཱི་སྔོན་དུ་འགྲོ་བའི། ཨ་ཀཱ་རོའི་སྔགས་ལན་གསུམ་དང་མཆོག་སྦྱིན་གྱི་ཕྱག་རྒྱས་ཕུལ་ལ་སྤོས་དང་བཅས་པའི་རྡོ་རྗེ་དྲིལ་བུ་འཛིན་པས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་འབྲི། །ཞེས་ལན་གསུམ་གྱིས་མཁྱེན་པར་གསོལ་བས། རིག་པ་འཛིན་པ་ཁྱོད་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །ཅེས་གནང་བ་བྱིན་པར་བསམས་ལ། ལག་པ་གཡས་པ་ས་ལ་རེག་སྟེ། ཨོཾ་བཛྲ་མུཿ སའི་ལྷ་མོ་ས་དེ་ཉིད་ལ་ཐིམ་པར་བསམ། གཉིས་པ་ལྷ་སྟ་གོན་ནི། ཚོམ་བུ་གོང་ལྟར་བསང་སྦྱངས། སྟོང་པའི་ངང་ལས་ཧཱུྃ་ཡིག་ལས་སོགས་ནས། ཛཿཧཱུྃ་བྃ་ཧོཿཞེས་པའི་བར་མདུན་བསྐྱེད་ལྟར། མཆོད་པ་བསང་སྦྱང་བརླབ། འཇིག་རྟེན་ཁམས་འདི་སོགས་ནས། འདོད་ཡོན་ལྔ་འབུལ་བའི་བར་མདུན་བསྐྱེད་ལྟར། མཉམ་ཉིད་མི་གཡོ་སོགས་དང་། ཆོས་དབྱིངས་མཉམ་པ་ཉིད་སོགས་དང་། ཡོན་ཏན་མཆོག་སྟེར་སོགས་ཀྱིས་བསྟོད། སྤོས་དང་བཅས་པའི་རྡོ་རྗེ་དྲིལ་བུ་འཛིན་པས། མི་འཁྲུགས་རྒྱལ་པོ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་བསྟོད། བདག་ནི་སྙིང་བརྩེར་གྱུར་ནས་སུ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་འབྲི་བར་འཚལ། །བཅོམ་ལྡན་བདག་ནི་གུས་པ་ལགས། །དེ་བས་གནང་བར་མཛད་པའི་རིགས། །སངས་རྒྱས་འཇིག་རྟེན་མགོན་བརྩེ་དང་། །བྱང་ཆུབ་སེམས་དཔའ་དགྲ་བཅོམ་དང་། །གསང་སྔགས་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་སུ་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །རིག་པ་འཛིན་པ་བདག་གིས་ནི། །སང་ནི་དཀྱིལ་འཁོར་བཟང་པོའི་མིང་། །མི་འཁྲུགས་དཀྱིལ་འཁོར་ཅི་ནུས་ཀྱི། །ཆོ་ག་བཞིན་དུ་འབྲི་ལགས་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་སྙན་གསན་ལན་གསུམ་ཕབ་པས། རིག་པ་འཛིན་པ་ཁྱོད་གཞན་དོན་རྒྱ་ཆེ་བར་གྱིས་ཤིག་ཅེས་གནང་བ་བྱིན་པར་བསམ་མོ། །གསུམ་པ་བུམ་པ་སྟ་གོན་ནི། བསང་སྦྱངས་ནས། ནུས་པ་དང་ལྡན་པར་གྱུར་ཅེས་པའི་བར་དཀྱུས་ལྟར། སྐབས་འདིར་གཏོར་མ་ཆ་གསུམ་བཏང་ལ་ཉེ་རེག་བྱ། །བཞི་པ་སློབ་མ་སྟ་གོན་ནི། དཀྱིལ་འཁོར་ཡོལ་བས་བཅད་ནས་སློབ་མ་རྣམས་བོས་ཏེ་འཁོད་པ་ལ་སེམས་བསྐྱེད་གསལ་གདབ། དེ་ལ་འདིར་རང་རེ་རྣམས་ཀྱི་སྟོན་པ་ཚད་མེད་པའི་ཐུགས་རྗེ་ཆེན་པོ་དང་ལྡན་པ་ཐུབ་པའི་དབང་པོ་དེ་ཉིད་ཀྱིས་གདུལ་བྱ་རྣམས་ཀྱི་བསམ་པ་དང་མཐུན་པར་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས་པ་རྣམས་ཕྱོགས་རིས་སུ་བསྡུ་ན་ཐེག་པ་ཆུང་ངུ་དང་ཆེན་པོ་གཉིས་སུ་འདུ། ཐེག་པ་ཆེན་པོ་ལ་ཡང་། ཕ་རོལ་ཏུ་ཕྱིན་པའི་སྡེ་སྣོད་དང་། རིག་པ་འཛིན་པ་སྔགས་ཀྱི་སྡེ་སྣོད་གཉིས་ལས། འདིར་རིག་སྔགས་འཆང་གི་སྡེ་སྣོད་ཐམས་ཅད་ཀྱི་རྩ་བར་གྱུར་པ་བྱ་བའི་རྒྱུད་ཡིན། དེ་ལ་བྱ་བ་སྤྱིའི་རྒྱུད་དང་། སོ་སོའི་རྒྱུད་གཉིས་ལས་སོ་སོའི་རྒྱུད་ཡིན། སོ་སོའི་རྒྱུད་ལ་དེ་བཞིན་གཤེགས་པའི་རིགས། པདྨའི་རིགས། རྡོ་རྗེའི་རིགས། ལྔས་རྩེན་གྱི་རིགས། ནོར་བུའི་རིགས། འཇིག་རྟེན་རིགས་ཏེ་དྲུག་ཏུ་ཡོད་པ་ལས། རྡོ་རྗེའི་རིགས་ཡིན། དེ་ལ་རིགས་ཀྱི་བདག་པོ། རིགས་ཀྱི་ཡུམ། རིགས་ཀྱི་ཁྲོ་བོ་ཁྲོ་མོ། །རིགས་ཀྱི་ཕོ་ཉའམ་ཕྱག་བརྙན་ཕོ་མོའི་རྒྱུད་སྡེ་ལྔ་ཡོད་པའི་དང་པོ། །རིགས་ཀྱི་གཙོ་བོའི་རྒྱུད་འཕགས་པ་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བའི་གཟུངས་ཀྱི་རྗེས་སུ་འབྲངས་ནས་གྲུབ་པའི་དབང་ཕྱུག་ཆེན་པོ་ཛེ་ཏཱ་རིས་ཆོ་གའི་ཡན་ལག་འགའ་ཞིག་སྤྱོད་རྒྱུད་དང་མཐུན་པར་བཀྲལ་བའི་བཅོམ༷་ལྡན་འདས་མི་འཁྲུགས་པ་ལྷ་དགུའི་དཀྱིལ་འཁོར་དུ་མངོན་པར་དབང་བསྐུར་བ་བསྒྲུབ་པ་ལ་སྟ་གོན་དུ་གནས་པ་དང་། དངོས་གཞི་དབང་བསྐུར་བ་གཉིས་ཀྱི་དང་པོ་ལ་བཞི་ཡོད་པ་ལས། དང་པོ་གསུམ་པོ་སྔོན་དུ་སློབ་དཔོན་གྱིས་གྲུབ་པར་བྱས་ཟིན་ནས། ད་ཁྱེད་རང་གི་ངོ་སྐལ་དུ་གྱུར་པ་སློབ་མ་སྟ་གོན་གྱི་སྐབས་སུ་བབ་པ་ཡིན། དེ་ལ་ཆོས་བཅུ་བཞི་ཡོད་པ་ལས། དང་པོ་ལུས་ཀྱི་བྱ་བ་ཁྲུས་བྱ། ཕྱག་དང་འཇུག་པའི་ཡོན་ཕུལ་ནས་རང་གི་གྲལ་ལ་སྙིམ་པ་མེ་ཏོག་དང་བཅས་པས་འཁོད་དེ། སློབ་དཔོན་ལ་རྡོ་རྗེ་མི་འཁྲུགས་པ་དངོས་ཡིན་སྙམ་པའི་མོས་གུས་དང་ལྡན་པས་སྟ་གོན་གྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། མྱ་ངན་ལས་འདས་པའི་བསམ་པ་བརྟན་པོ་བསྐྱེད་དུ་གཞུག་པ་ནི། གསང་བ་སྤྱི་རྒྱུད་ལས། ཁ་ཅིག་གསང་སྔགས་བསྒྲུབ་དོན་གཉེར། །དཀྱིལ་འཁོར་དུ་ནི་འཇུག་པར་འགྱུར། །དེ་བཞིན་གཞན་གྱི་བསོད་ནམས་འདོད། །གཞན་དག་འཇིག་རྟེན་ཕ་རོལ་གཞོལ། །བློ་བཟང་ཕལ་ཆེར་དད་བྱས་ནས། །འཇིག་རྟེན་ཕ་རོལ་དོན་གཉེར་འཇུག །འཇིག་རྟེན་འདི་འབྲས་དོར་ནས་ནི། འཇིག་རྟེན་ཕ་རོལ་འབྲས་གཉེར་ན། །གང་ཕྱིར་ཚེ་འདིར་བདེ་བླག་འགྲུབ། །འདི་ཡིན་འཇིག་རྟེན་ཕ་རོལ་མིན། །དེ་ཕྱིར་འཇིག་རྟེན་ཕ་རོལ་གྱི། །དོན་དུ་ཡིད་ནི་བརྟན་པར་གྱིས། །ཞེས་གསུངས་ཏེ་དེའི་དོན་ནི་དཀྱིལ་འཁོར་དུ་ཞུགས་པའི་སྐབས་ཀྱི་དོན། ཚེ་འདིར་ཚེ་རིང་བ་དང་། །ཕྱི་མར་ལྷ་མིའི་གོ་འཕང་ཙམ་དང་། འཁོར་བ་སྤངས་པའི་ཉན་རང་ཙམ་དོན་དུ་གཉེར་བའི་སྒོ་ནས་མ་ཡིན་པར་གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བའི་སླད་དཀྱིལ་འཁོར་འདིར་ཞུགས་ལ་དབང་བླངས་ཏེ་དམ་ཚིག་ལ་བསྲུང་སྡོམ་བགྱི་སྙམ་པ་མཛོད། བསམ་པ་དེ་ལྟ་བུ་ཞིག་སྐྱེས་ན་ཚེ་འདིའི་ནད་གདོན་ཞི་བ་དང་། ཕྱི་མར་ལྷ་མིའི་གོ་འཕང་ཡང་ཞར་བྱུང་དུ་འབྱུང་བ་ཡིན། རྣ་བ་གཏད་པར་བསྐུལ་བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་ཀྱི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་གསུངས་ཏེ། དེ་ཡང་ཆོས་ཀྱི་ཚིག་དོན་ལ་ཡིད་མི་གཏོད་པ་སྣོད་ཁ་སྦུབ་ལྟ་བུའི་སྐྱོན་དང་། ཡིད་གཏད་ཀྱང་དྲན་ཤེས་བཞིན་གྱིས་མི་འཛིན་པ་སྣོད་ཞབས་རྡོལ་ལྟ་བུའི་སྐྱོན་དྲན་ཤེས་ཀྱིས་བཟུང་ཡང་། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ཡིད་བསྡུས་དང་། །སྐྱོ་བ་ཉན་པའི་དྲི་མ་ཡིན། །ཞེས་པ་ལྟར་གྱི་དྲི་མ་དྲུག་པོ་གང་རུང་དང་ལྡན་པ། སྣོད་དྲི་མ་ཅན་ལྟ་བུའི་སྐྱོན་ཏེ་སྣོད་ཀྱི་སྐྱོན་གསུམ་སྤངས་ནས། གཞན་ཕན་བྱང་ཆུབ་ཀྱི་སེམས་དང་ལྡན་པའི་སྒོ་ནས་མ་ཡེངས་པར་ཉོན་ཅིག་ཅེས་བསྒོས་ནས། ཁྱད་པར་ཅན་གྱི་དོན་དུ་ཞུ་བའི་སླད་དུ་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་འདིའི་རྗེས་ཟློས་ལན་གསུམ་མཛོད། དགའ་ཆེན་ཁྱོད་བདག་སྟོན་པ་སྟེ། །ཞེས་སོགས་ཀྱིས་གསོལ་བ་བཏབ་ནས། རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པའི་སླད་དུ་དམིགས་པ་འདི་བཞིན་མཛོད། མདུན་གྱི་ནམ་མཁར་བླ་མ་དང་གཉིས་སུ་མེད་པའི་བཅོམ་ལྡན་འདས་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བ་མངོན་སུམ་བཞིན་དུ་བཞུགས་པར་མོས་པ་བྱས། དེ་དག་གི་སྤྱན་སྔར་བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་ཚེ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། དཀོན་མཆོག་གསུམ་ལ་བདག་སྐྱབས་མཆི། ཞེས་སོགས་ཀྱིས་རྒྱུད་དག་པར་བྱས་ནས། སླར་ཡང་སྐྱབས་འགྲོ་སེམས་བསྐྱེད་ཁྱད་པར་ཅན་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པས་སེམས་བསྐྱེད་པའི་སློབ་མ་ལ་བར་ཆད་བསྲུང་བའི་སླད་དུ་བུམ་པའི་ཆུ་གཏོར་ཏེ་ཨོཾ་ཨ་མྲྀ་ཏེ་ཧཱུྃ་ཕཊ། ཅེས་བརྗོད་པས་བར་དུ་གཅོད་པ་ཐམས་ཅད་བསྲུངས་ནས། བྱིན་གྱིས་བརླབས་པའི་སླད་དུ་ཁྱེད་རང་སྐད་ཅིག་གིས་རྡོ་རྗེ་མི་འཁྲུགས་པའི་ང་རྒྱལ་གྱིས་གནས་པ་ལ་སློབ་དཔོན་གྱིས་དྲིའི་ཆུ་རྡོ་རྗེ་དང་བཅས་གནས་གསུམ་དུ་རེག་སྟེ། །ཨོཾ་ཨཱཿཧཱུྃ་ཞེས་བརྗོད་པས་ཁྱེད་རྣམས་ཀྱི་དཔྲལ་བར་ཨོཾ་ལས་འཁོར་ལོར་ཨོཾ་གྱིས་མཚན་པ། མགྲིན་པར་ཨཱཿལས་པདྨ་ཨཱཿས་མཚན་པ། སྙིང་གར་ཧཱུྃ་ལས་རྡོ་རྗེ་ཧཱུྃ་གིས་མཚན་པ་རྣམས་ལམ་གྱིས་བྱུང་བར་མོས་པ་མཛོད། དེ་ལྟར་ལུས་ངག་ཡིད་གསུམ་ལྷའི་སྐུ་གསུང་ཐུགས་ཀྱི་ངོ་བོར་བྱིན་གྱིས་བརླབས་པ་དེ་མཆོད་ཡུལ་དུ་བཟུང་བ་ཡིན་པས། སློབ་དཔོན་གྱིས་མེ་ཏོག་དབུ་ལ་ཕུལ་ནས་མཆོད་པར་མོས་པ་མཛོད། ཨོཾ་བཛྲ་པུཥྤེ་ཨཱཿཧཱུྃ། བདུག་སྤོས་ཤངས་ལ༴ དྷཱུ་པེ༴ མར་མེ་སྤྱན་ལམ་དུ༴ ཨཱ་ལོ་ཀེ༴ ཐུགས་ཀར་དྲིའི་བྱུག་པ༴ གནྡྷེ༴ ཞེས་པས་མཆོད་ནས། དངོས་གྲུབ་ཀྱི་མཚན་ལྟས་བརྟག་པའི་སླད་དུ་སོ་ཤིང་སྦྱིན་པ་ནི། བུམ་ཆུ་གཏོར་ཞིང་། ཨ་མྲྀ་ཏས་བྱིན་གྱིས་བརླབས་པའི་སོ་ཤིང་ཐལ་མོ་སྦྱར་བའི་བར་དུ་སྔགས་དེ་ཉིད་ཀྱིས་སྦྱིན་ཏེ། སོ་བྲུད་པ་བཞིན་བྱས་པས་སྡིག་སྒྲིབ་ཐམས་ཅད་སྐྱུགས་པར་བསམས་ལ། སོ་ཤིང་གི་ར་བ་ཚོམ་བུ་དགུ་བཀོད་པའི་དབུས་སུ་ཅང་མི་སྨྲ་བར་དོར་ཅིག །དེ་ཡང་རྩེ་མོ་རང་ངམ་སྟེང་དུ་ཕྱོགས་ན་མཆོག་གི་དངོས་གྲུབ། ཤར་དུ་ཕྱོགས་ན་འབྲིང་གི་དངོས་གྲུབ་ཕྱོགས་མཚམས་གཞན་རྣམས་སུ་ཕྱོགས་ན་འཇིག་རྟེན་པའི་དངོས་གྲུབ། འོག་ཏུ་ཕྱོགས་ནས་འོག་གི་དངོས་གྲུབ་འགྲུབ་པར་འགྱུར་རོ། །སྒོ་གསུམ་གྱི་དྲི་མ་སྦྱང་བའི་སླད་དུ་ཁྱོར་ཆུ་བླུད་པ་ནི། ཨ་མྲྀ་ཏེ་བཟླས་པའི་ཆུ། ཨོཾ་ཧྲཱིཿབི་ཤུདྡྷཿསརྦ་དྷརྨཱཿསརྦ་པཱ་པཾ་ནི་ཙཪྻ་སཾ་ཤོདྷ་ཡ་སརྦ་བི་ཀལྤ་ཨ་པ་ན་ཡ་ཧཱུྃ་ཞེས་པའི་སྔགས་ཀྱིས་ལན་བདུན་སྦྱིན་ནོ། །བར་ཆད་བསྲུང་བའི་སླད་དུ་སྲུང་སྐུད་སྦྱིན་པ་ནི། ཨ་མྲྀ་ཏས་བྱིན་གྱིས་བརླབས་པའི་སྲུང་སྐུད་དམར་པོ་རྡོ་རྗེ་སློབ་མ་རྣམས་ཀྱི་ལུས་ཚད་དང་མཉམ་པ་རྡོ་རྗེའི་མདུད་པ་གསུམ་བཏབ་པ། སློབ་མ་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་པར་གཙོ་བོའི་སྔགས་བཟླ་ཞིང་བཅིང་། བུམ་ཆུ་གཏོར། ཡིག་བརྒྱས་བརྟན་པར་བྱའོ། །རྩྭ་ཀུ་ཤའི་སྔས་སྟན་སྦྱིན་པ་ནི། ཨ་མྲྀ་ཏེ་བཟླས་པའི་ཀུ་ཤ་ཆུང་བ་གཡས་སུ་དྷཱིཿདང་། ཆེ་བ་གཡོན་དུ་ཧཿཞེས་པས་སྦྱིན། ཆོས་ཟབ་མོ་བཤད་པའི་སྒོ་ནས་སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུཪྺཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་ཆད་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། གང་གིས་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །དེའི་དོན་ནི། འཇིག་རྟེན་ན་ཨུ་དུཪྺཱ་རའི་མེ་ཏོག་དཀོན་པ་ལྟར། སངས་རྒྱས་བྱོན་པ། བྱོན་ནས་ཆོས་གསུངས་པ། གསུངས་པའི་བསྟན་པ་གནས་པ། བསྟན་པའི་རྗེས་སུ་བདག་གཞན་འཇུག་པ་ཡོད་པ་རྣམས་དཀོན། དེའི་ནང་ནས་ཀྱང་གསང་སྔགས་ཀྱི་ཐེག་པ་དང་མཇལ་བ་ཤིན་ཏུ་དཀོན་ཞིང་། དཀོན་པ་དེ་ཡང་ཕན་ཡོན་ཆེན་པོ་དང་ལྡན་པ་ཡིན་ཏེ། དཀྱིལ་འཁོར་དུ་ཞུགས་ཏེ་དབང་བླངས་ནས་དམ་ཚིག་ལ་བསྲུང་སྡོམ་དང་ལམ་ལ་འབད་པ་བྱས་ན་བརྩོན་འགྲུས་དང་བསྟུན་པའི་བྱེ་བྲག་གི་ཚེ་འདིའམ་བར་དོའམ་སྐྱེ་བ་བདུན་ནམ་བཅུ་དྲུག་ཚུན་ཆད་ན་འབྲས་བུ་འགྲུབ་པར་གསུངས་པས། མཐར་ཐུག་གི་འབྲས་བུ་ལ་ཉེ་ཞིང་གནས་སྐབས་ཀྱི་འབྲས་བུ་ཚེ་འདིར་ཚེ་རིང་བ་དང་ནད་དང་སྡུག་བསྔལ་ཞི་བ་ལ་སོགས་པའང་རྩོལ་སྒྲུབ་ལོགས་ནས་མི་དགོས་པར་ཞར་ལས་འབྱུང་བའི་ཚུལ་གྱིས་འགྲུབ་པ་ཡིན་པས་རྙེད་དཀའ་བ་ཕན་ཡོན་ཆེ་བའི་གསང་སྔགས་ཀྱི་ཐེག་པ་དང་མཇལ་བ་འདི་སྐལ་པ་བཟང་བ་ཡིན་སྙམ་དུ་ཤེས་པའི་སྒོ་ནས་ལམ་ལ་འབད་པ་དང་། དམ་ཚིག་ལ་སྲུང་སྡོམ་ཚུལ་བཞིན་དུ་བགྱི་སྙམ་པ་གྱིས། རྨི་ལམ་བརྟག་ཅིང་ངན་ན་བསྲུང་བ་ནི། དོ་ནུབ་ཉལ་བའི་ཚེ་སྔར་གྱི་ཀུ་ཤ་ཆུང་བ་སྔས་དང་ཆེ་བ་སྟན་དུ་གྱིས་ལ་ལྷ་དང་བླ་མ་ཡིད་ལ་དྲན་པའི་སྒོ་ནས་མགོ་ཤར་རམ་བྱང་དུ་སྟོན་ལ་ཉོལ་ཞིག །ལུང་སྟོན་པའི་རྨི་ལམ་འབྱུང་བར་འགྱུར་རོ། །དེ་ཡང་རྨི་ལམ་བཟང་བའི་ལྟས་ནི། དེ་བཞིན་གཤེགས་པའི་སྐུ་གཟུགས་དང་མཆོད་རྟེན་མཐོང་བ། དམ་པའི་ཆོས་ཀྱི་གླེགས་བམ་ལག་ཏུ་ཐོགས་པ། འཕགས་པའི་དགེ་འདུན་གྱི་སྡེའི་དབུས་སུ་བཞུགས་པ། རང་གི་བླ་མ་དང་མཇལ་བ། ཆོས་མཉན་པ། ཉི་ཟླ་ཤར་བ། རྒྱལ་པོར་དབང་བསྐུར་བ། རྟ་དང་གླང་པོ་ཆེ་ཞོན་པ་ལ་སོགས་འབྱུང་ན་བཟང་བ་ཡིན་པས་ཞེན་པ་མེད་པའི་དགའ་བ་བསྒོམ་ཞིང་དགའ་སྟོན་བྱ། གལ་ཏེ་ངན་པ་ཡང་འབྱུང་སྲིད་དོ། །དེའི་ལྟས་ནི། རྒྱ་སྐྱེགས་ཀྱི་རི་ལ་འཛེགས་པ། །རཝཱི་རའི་མེ་ཏོག་འཐུ་བ། མཆོད་སྡོང་དང་བྱེ་མ་དང་ཐལ་ཕུང་ལར་ཛེགས་པ། སྤྲེའུ་དང་བོང་བུ་ལ་ཞོན་ནས་ཁ་ཕྱིར་ཕྱོགས་ཏེ་འགྲོ་བ། ཆུས་ཁྱེར་བ། སྐྲ་བྲེགས་པ། ལུས་ཏིལ་མར་གྱིས་བྱུགས་པ་ལ་སོགས་པ་བྱུང་ན་ཅུང་ཟད་ངན་པ་ཡིན་པས་གཉིད་སད་མ་ཐག་ཏུ་ཆོས་ཐམས་ཅད་རྨི་ལམ་གྱི་སྣང་བ་དང་ཁྱད་པར་མེད་དེ། དོན་ལ་གྲུབ་པ་ཅི་ཡང་མེད་ཅེས་བདེན་མེད་ཀྱི་སྣང་བས་རྒྱས་འདེབས་པ། ཞི་བའི་སྦྱིན་སྲེག་བླུགས་པ་ལ་སོགས་པའི་སྒོ་ནས་རྨི་ལམ་ངན་པ་བཟློག་པའི་ཐབས་ལ་འབད་པར་བྱ་དགོས་པ་ཡིན་ནོ། །དེ་རྣམས་ཀྱིས་སློབ་མ་སྟ་གོན་གྱི་ཆོས་རྣམས་སོང་ནས། འདིའི་དངོས་གཞི་སང་ཉིན་འབྱུང་བ་ཡིན་ནོ། །ཞེས་བརྗོད་ལ་སློབ་མ་རང་གནས་སུ་གཏོང་ངོ་། །གསུམ་པ་རྗེས་ནི། མཆོད་པ་རྣམས་ཁ་གསོས་ལ་བྱིན་གྱིས་བརླབ། བུམ་བསྐྱེད་ཀྱི་སྐབས་ལྟར་མཆོད་བསྟོད་འདོད་དོན་ཞུས་ལ། ལྷག་ཆད་ཁ་བསྐང་། ནོངས་པ་བཟོད་པར་གསོལ། ཨོཾ། ཁྱེད་ཀྱིས་སེམས་ཅན་དོན་ཀུན་མཛོད། །ཅེས་སོགས་ཀྱི་མཐར་མཐེབ་སྲིན་གྱིས་སེ་གོལ་དང་། ཨོཾ་བཛྲ་མུཿ སྟ་གོན་གྱི་ལྷ་རྣམས་སང་ནང་པར་འབྱོན་པར་བཞེད་བཞིན་པས། རང་བཞིན་གྱི་གནས་སུ་གཤེགས་ཞེས་བརྗོད་ཅིང་བསམས་ལ་སྟ་གོན་གྱི་ཡོ་བྱད་རྣམས་བསྡུས་ཏེ། དེའི་ནུབ་མོ་དགེ་བའི་གཉིད་ཀྱིས་ལོག་གོ །གཉིས་པ། དངོས་གཞི་ལ། སྦྱོར་དངོས་རྗེས་གསུམ་གྱི་དང་པོ་ནི། འདིའི་བྲིས་སྐུ་རབ་གནས་ཅན་ཞལ་ཤར་དུ་ཕྱོགས་པར་དགྲམ། ཕྱི་མཆོད། སྒོས་མཆོད། ཆ་གསུམ་རྣམས་སྔར་བཞིན་དུ་བཤམ། སྲོག་ཆགས་དང་མ་འདྲེས་པའི་བདུག་སྤོས་རྒྱུན་མི་འཆད་པར་བཏུལ། འབྱོར་ན་ཕྱོགས་མཚམས་རྣམས་སུ་མདའ་བརྒྱད། ཚོན་སྐུད་ཀྱི་དྲྭ་བ། མེ་ལོང་། རལ་གྲི། ཕུར་བུ་རྣམས་ལས་སྔགས་བརྗོད་ཅིང་ཕྱག་ལེན་བཞིན་དགྲམ། རྡོ་རྗེ་དྲིལ་བུ་དང་བུམ་པ་ལ་སོགས་པ་སྔར་བཞིན་བཤམ། མིག་རས། མེ་ཏོག །གུ་གུལ། ཉེར་སྤྱོད་ལྔ། རྨ་བྱའི་མདོངས། བཀྲ་ཤིས་རྫས་བརྒྱད་ལ་སོགས་པ་འོག་ཏུ་དགོས་པའི་ཡོ་བྱད་རྣམས་སྟ་གོན་བྱ། གྲུབ་ན་སྤྱི་རྒྱུད་ལས་འབྱུང་བ་ལྟར་དཀྱིལ་འཁོར་གྱི་ཤར་ངོས་སུ་དབང་སྟེགས་ཀྱི་དཀྱིལ་འཁོར་ཡང་བྲིའོ། །གཉིས་པ་ནི། བདག་བསྐྱེད། །མདུན་བསྐྱེད། ཆོ་ག་གཞན་མང་པོ་སྦྲེལ་ན་དངོས་གཞི་གཉིས་པ་མན་ལ་བུམ་པ་བསྒྲུབ་པ། ཆ་གསུམ། བདག་འཇུག །སློབ་མ་ལ་དབང་བསྐུར་བ་རྣམས་གཞན་ཕན་ཟླ་བའི་དཀྱུས་བཞིན་ལ། ཡེ་ཤེས་པ་སྤྱན་འདྲེན་གྱི་ཚེ། དངོས་གཞི་ཉིན་སྦྲེལ་ཡིན་ན་ཉི་མ་དང་པོའི་ཚེ། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས་སྟ་གོན་གྱི་ལྷ་རྡོ་རྗེ་མི་འཁྲུགས་པ་ལྷ་དགུའི་དཀྱིལ་འཁོར་གྱི་ལྷ་ཚོགས་ཀྱི་རྣམ་པར་ཨོཾ་བཛྲ་ས་མཱ་ཛཿཞེས་བརྗོད་པ་ཙམ་ཁྱད་པར་དང་། སློབ་མ་ལ་དབང་བསྐུར་བའི་མཚམས་སྦྱོར་གྱི་ཚིག །མངོན་པར་དབང་བསྐུར་བ་བསྒྲུབ་པ་ལ། ཞེས་པའི་མཚམས། སྟ་གོན་དང་དངོས་གཞི་གཉིས་ཀྱི་དང་པོ་གྲུབ་ཟིན་ནས། ཕྱི་མ་ལ་སྔོན་འགྲོ་སློབ་དཔོན་གྱིས་ཞེས་སྦྲེལ་བ་ཙམ་ཁྱད་པར་རོ། །གསུམ་པ་རྗེས་ཆོག་ནི་དཀྱུས་ལྟར་རོ། །ཞེས་པའང་རྡོ་རྗེ་མི་འཁྲུགས་པའི་ཆོ་ག་གཞན་ཕན་ཟླ་བ་གཞིར་བཞག་ནས་སློབ་མ་ལ་དབང་བསྐུར་བའི་ཚུལ་ལྷན་ཐབས་ཀྱི་ཚུལ་དུ་མཉྫུ་གྷོ་ཥས་བྲིས་པ་མངྒ་ལཾ།། །། ༈

[edit]

rdo rje mi 'khrugs pa'i cho ga gzhan phan zla ba las 'phros pa'i slob ma dbang bskur ba'i tshul/ @#/_/rdo rje mi 'khrugs pa'i cho ga gzhan phan zla ba las 'phros pa'i slob ma dbang bskur ba'i tshul bzhugs so//__// oM swa sti/__mi 'khrugs pa lha dgu'i dkyil 'khor du slob ma la dbang bskur ba'i skabs/__sbyor ba yo byad kyi bsham ni snod dang ldan pa'i slob ma la/__mi 'khrugs mgon po'i dkyil 'khor du/__/mngon par dbang bskur bsgrub 'dod pas/__/gtsang zhing dben pa'i sa phyogs su/__/stegs bu ras bzang gis bkab pa'i/__/steng du maN+Dal gtsang ma'i dbus/__/dri yi thig le gru bzhi dang /__/phyogs mtshams rnams su zlum po'i steng /__/me tog tshom bu re bkod de/__/many+dzi la sogs steng du bzhag__/de yi 'og gam mdun gyi char/__/sa lha'i maN+Dal tshom bu'ang dgod/__/de yi phyir rol byang shar gyi/__/mtshams su mtshams 'dzin me tog dang /__/chu gnyis sngon 'gro'i nyer spyod rnams/__shar nas brtsams te gru bzhir bsham/__/shar gyi phyogs su lha gcig dang /__/bcas pa'i phyogs bzhi mtshams bzhi ru/__/bdug spos mar me zhal zas re/__/g.yas skor dag tu gru bzhir bsham/__/sa lha'i maN+Dal nye logs su/__/gtor ma gcig bsham 'byor gyur na/__/sgos mchod kyang bshams dkyil 'khor gyi/__/lho nub nas brtsams shar lho'i bar/__/cha gsum gtor ma'ang legs par bsham/__/slob dpon mdun du rdor dril dang /__/mtshan nyid ldan pa'i bum pa gcig__/legs bkrus kha tshar ma nyams pa'i/__/ras bzang mgul chings srog lnga pa'am/__/bdun pa legs bcings mtshan ma gdags/__/drag sngags bzla zhing gu gul gyis/__/legs bdug yungs dkar dag gis brab/__/gtsang ma'i chu yis sum gnyis dgang /__/'bru lnga sman lnga rin chen lnga/__/snying po lnga dang dri lnga gzhug__/ku shas kha brgyan de steng du/__/dung chos dri bzang chur bcas dang /__/rdo rje gzungs thag kyang bsham zhing /__/logs su slob ma sta gon chas/__/nyer spyod so shing khyor chu dang /__/dpung skud ku sha sogs bsham mo/__/zhes so/__/cho ga dngos la/__sta gon dang /__dngos gzhi gnyis kyi dang po la/__bdag bskyed bsgom pa/__dkyil 'khor gyi bya ba/__rjes kyi cho ga'o/__/dang po ni/__mchod pa byin rlabs nas/__rang dam tshig pa'i nga rgyal gyis 'khod par gyur zhes pa'i bar gzhan phan zla ba ltar ro/__/gnyis pa la bzhi las/__sa'i lha mo'i sta gon ni/__tshom bu a mr-i tas bsang /__shU n+ya tAs sbyangs la/__rang gi lag pa g.yas pa sa la reg pa'i rkyen gyis tshom bu'i steng du pad+ma dang zla ba'i dkyil 'khor gyi steng du sa'i lha mo sku mdog ser mo zhi ba'i nyams can phyag gnyis kyis rin po che'i bum pa 'dzin pa/__rin po che'i rgyan dang dar gyi na bza' can/__bdag la zhal phyogs te bzhugs par gyur/__de la oM pri thi de wI zhes pa re re'i mgor sbyar ba'i/__ar+g+haM pra tI ts+tsha swA hA zhes sogs chu gnyis nyer spyod rol mo dang bcas pas mchod/__gtor ma chu gtsang gis bran la oM AHhU~M lan gsum gyis byin gyis brlabs la/__oM pri thi wi de wI sngon du 'gro ba'i/__a kA ro'i sngags lan gsum dang mchog sbyin gyi phyag rgyas phul la spos dang bcas pa'i rdo rje dril bu 'dzin pas/__skyob pa sangs rgyas thams cad kyi/__/spyod pa'i tshul dang khyad par dang /__/sa dang pha rol phyin pa la/__/lha mo khyod ni dpang du gyur/__/shAkya seng ge skyob pa yis/__/ji ltar bdud kyi sde bcom pa/__/de bzhin bdag gis bdud sde las/__/rgyal bar byas te dkyil 'khor 'bri/__/zhes lan gsum gyis mkhyen par gsol bas/__rig pa 'dzin pa khyod dkyil 'khor gyi las ci bde bar gyis shig__/ces gnang ba byin par bsams la/__lag pa g.yas pa sa la reg ste/__oM badz+ra muH__sa'i lha mo sa de nyid la thim par bsam/__gnyis pa lha sta gon ni/__tshom bu gong ltar bsang sbyangs/__stong pa'i ngang las hU~M yig las sogs nas/__dzaHhU~M ba~M hoHzhes pa'i bar mdun bskyed ltar/__mchod pa bsang sbyang brlab/__'jig rten khams 'di sogs nas/_'dod yon lnga 'bul ba'i bar mdun bskyed ltar/__mnyam nyid mi g.yo sogs dang /__chos dbyings mnyam pa nyid sogs dang /__yon tan mchog ster sogs kyis bstod/__spos dang bcas pa'i rdo rje dril bu 'dzin pas/__mi 'khrugs rgyal po bcom ldan 'das/__/rig sngags rgyal la phyag 'tshal bstod/__bdag ni snying brtser gyur nas su/__/slob ma rnams la brtse ba dang /__/khyed rnams la yang mchod pa'i phyir/__/sang ni dkyil 'khor 'bri bar 'tshal/__/bcom ldan bdag ni gus pa lags/__/de bas gnang bar mdzad pa'i rigs/__/sangs rgyas 'jig rten mgon brtse dang /__/byang chub sems dpa' dgra bcom dang /__/gsang sngags lha gzhan gang lags dang /__/'jig rten skyong ba'i lha rnams dang /__/gang yang 'byung po mthu chen dang /__/gang su lha yi spyan mnga' ba'i/__/sems can bstan la dga' ba rnams/__/bdag la dgongs par mdzad du gsol/__/rig pa 'dzin pa bdag gis ni/__/sang ni dkyil 'khor bzang po'i ming /__/mi 'khrugs dkyil 'khor ci nus kyi/__/cho ga bzhin du 'bri lags na/__/bdag dang slob mar bcas pa la/__/thugs ni brtse bar dgongs nas su/__/tshogs pa thams cad dkyil 'khor du/__/byin gyis brlab par mdzad du gsol/__/zhes snyan gsan lan gsum phab pas/__rig pa 'dzin pa khyod gzhan don rgya che bar gyis shig ces gnang ba byin par bsam mo/__/gsum pa bum pa sta gon ni/__bsang sbyangs nas/__nus pa dang ldan par gyur ces pa'i bar dkyus ltar/__skabs 'dir gtor ma cha gsum btang la nye reg bya/_/bzhi pa slob ma sta gon ni/__dkyil 'khor yol bas bcad nas slob ma rnams bos te 'khod pa la sems bskyed gsal gdab/__de la 'dir rang re rnams kyi ston pa tshad med pa'i thugs rje chen po dang ldan pa thub pa'i dbang po de nyid kyis gdul bya rnams kyi bsam pa dang mthun par chos kyi rnam grangs bsam gyis mi khyab pa zhig gsungs pa rnams phyogs ris su bsdu na theg pa chung ngu dang chen po gnyis su 'du/__theg pa chen po la yang /__pha rol tu phyin pa'i sde snod dang /__rig pa 'dzin pa sngags kyi sde snod gnyis las/__'dir rig sngags 'chang gi sde snod thams cad kyi rtsa bar gyur pa bya ba'i rgyud yin/__de la bya ba spyi'i rgyud dang /__so so'i rgyud gnyis las so so'i rgyud yin/__so so'i rgyud la de bzhin gshegs pa'i rigs/__pad+ma'i rigs/__rdo rje'i rigs/__lngas rtsen gyi rigs/__nor bu'i rigs/__'jig rten rigs te drug tu yod pa las/__rdo rje'i rigs yin/__de la rigs kyi bdag po/__rigs kyi yum/__rigs kyi khro bo khro mo/__/rigs kyi pho nya'am phyag brnyan pho mo'i rgyud sde lnga yod pa'i dang po/__/rigs kyi gtso bo'i rgyud 'phags pa las kyi sgrib pa thams cad rnam par sbyong ba'i gzungs kyi rjes su 'brangs nas grub pa'i dbang phyug chen po dze tA ris cho ga'i yan lag 'ga' zhig spyod rgyud dang mthun par bkral ba'i bcomaX ldan 'das mi 'khrugs pa lha dgu'i dkyil 'khor du mngon par dbang bskur ba bsgrub pa la sta gon du gnas pa dang /__dngos gzhi dbang bskur ba gnyis kyi dang po la bzhi yod pa las/__dang po gsum po sngon du slob dpon gyis grub par byas zin nas/__da khyed rang gi ngo skal du gyur pa slob ma sta gon gyi skabs su bab pa yin/__de la chos bcu bzhi yod pa las/__dang po lus kyi bya ba khrus bya/__phyag dang 'jug pa'i yon phul nas rang gi gral la snyim pa me tog dang bcas pas 'khod de/__slob dpon la rdo rje mi 'khrugs pa dngos yin snyam pa'i mos gus dang ldan pas sta gon gyi chos rnams zhu ba'i yon du maN+Dal phul mdzod/__mya ngan las 'das pa'i bsam pa brtan po bskyed du gzhug pa ni/__gsang ba spyi rgyud las/__kha cig gsang sngags bsgrub don gnyer/__/dkyil 'khor du ni 'jug par 'gyur/__/de bzhin gzhan gyi bsod nams 'dod/__/gzhan dag 'jig rten pha rol gzhol/__/blo bzang phal cher dad byas nas/__/'jig rten pha rol don gnyer 'jug__/'jig rten 'di 'bras dor nas ni/__'jig rten pha rol 'bras gnyer na/__/gang phyir tshe 'dir bde blag 'grub/__/'di yin 'jig rten pha rol min/__/de phyir 'jig rten pha rol gyi/__/don du yid ni brtan par gyis/__/zhes gsungs te de'i don ni dkyil 'khor du zhugs pa'i skabs kyi don/__tshe 'dir tshe ring ba dang /__/phyi mar lha mi'i go 'phang tsam dang /__'khor ba spangs pa'i nyan rang tsam don du gnyer ba'i sgo nas ma yin par gzhan don du rdzogs pa'i sangs rgyas kyi go 'phang thob par bya ba'i slad dkyil 'khor 'dir zhugs la dbang blangs te dam tshig la bsrung sdom bgyi snyam pa mdzod/__bsam pa de lta bu zhig skyes na tshe 'di'i nad gdon zhi ba dang /__phyi mar lha mi'i go 'phang yang zhar byung du 'byung ba yin/__rna ba gtad par bskul ba ni/__rtog pa thams cad legs par bsdus nas ni/__/shin tu bsam pa bzang dang ldan pas nyon/__/brjed ngas blo la rdo rje sems sogs kyi/__/bde bar gshegs pa rnams kyis byin mi rlob/__/ces gsungs te/__de yang chos kyi tshig don la yid mi gtod pa snod kha sbub lta bu'i skyon dang /__yid gtad kyang dran shes bzhin gyis mi 'dzin pa snod zhabs rdol lta bu'i skyon dran shes kyis bzung yang /__nga rgyal dang ni ma dad dang /__/don du gnyer ba med nyid dang /__/phyi rol rnam g.yeng yid bsdus dang /__/skyo ba nyan pa'i dri ma yin/__/zhes pa ltar gyi dri ma drug po gang rung dang ldan pa/__snod dri ma can lta bu'i skyon te snod kyi skyon gsum spangs nas/__gzhan phan byang chub kyi sems dang ldan pa'i sgo nas ma yengs par nyon cig ces bsgos nas/__khyad par can gyi don du zhu ba'i slad du snyim pa me tog dang bcas pas thal mo sbyar te 'di'i rjes zlos lan gsum mdzod/__dga' chen khyod bdag ston pa ste/__/zhes sogs kyis gsol ba btab nas/__rgyun bshags sngon du 'gro ba'i sems bskyed pa'i slad du dmigs pa 'di bzhin mdzod/__mdun gyi nam mkhar bla ma dang gnyis su med pa'i bcom ldan 'das rdo rje mi 'khrugs pa lha dgu'i dkyil 'khor la sangs rgyas dang byang chub sems dpa' thams cad kyis bskor ba mngon sum bzhin du bzhugs par mos pa byas/__de dag gi spyan sngar bdag dang mtha' yas pa'i sems can thams cad kyi tshe thog ma med pa nas bsags pa'i sdig pa bshags pa la sogs pa'i yan lag bdun pa bgyi snyam pas 'di'i rjes zlos lan gsum mdzod/__dkon mchog gsum la bdag skyabs mchi/__zhes sogs kyis rgyud dag par byas nas/__slar yang skyabs 'gro sems bskyed khyad par can bgyi snyam pas 'di'i rjes zlos lan gsum mdzod/__byang chub snying por mchis kyi bar/__/sangs rgyas rnams la skyabs su mchi/__/chos dang byang chub sems dpa' yi/__/tshogs la'ang de bzhin skyabs su mchi/__/ji ltar sngon gyi bde gshegs kyis/__/byang chub thugs ni bskyed pa dang /__/byang chub sems dpa'i bslab pa la/__/de dag rim bzhin gnas pa ltar/__/de bzhin 'gro la phan don du/__/byang chub sems ni bskyed bgyi zhing /__/de bzhin du ni bslab pa la/__/rim pa bzhin du bslab par bgyi/__/zhes pas sems bskyed pa'i slob ma la bar chad bsrung ba'i slad du bum pa'i chu gtor te oM a mr-i te hU~M phaT/__ces brjod pas bar du gcod pa thams cad bsrungs nas/__byin gyis brlabs pa'i slad du khyed rang skad cig gis rdo rje mi 'khrugs pa'i nga rgyal gyis gnas pa la slob dpon gyis dri'i chu rdo rje dang bcas gnas gsum du reg ste/__/oM AHhU~M zhes brjod pas khyed rnams kyi dpral bar oM las 'khor lor oM gyis mtshan pa/__mgrin par AHlas pad+ma AHsa mtshan pa/__snying gar hU~M las rdo rje hU~M gis mtshan pa rnams lam gyis byung bar mos pa mdzod/__de ltar lus ngag yid gsum lha'i sku gsung thugs kyi ngo bor byin gyis brlabs pa de mchod yul du bzung ba yin pas/__slob dpon gyis me tog dbu la phul nas mchod par mos pa mdzod/__oM badz+ra puSh+pe AHhU~M/__bdug spos shangs la=__d+hU pe=__mar me spyan lam du=__A lo ke=__thugs kar dri'i byug pa=__gan+d+he=__zhes pas mchod nas/__dngos grub kyi mtshan ltas brtag pa'i slad du so shing sbyin pa ni/__bum chu gtor zhing /__a mr-i tas byin gyis brlabs pa'i so shing thal mo sbyar ba'i bar du sngags de nyid kyis sbyin te/__so brud pa bzhin byas pas sdig sgrib thams cad skyugs par bsams la/__so shing gi ra ba tshom bu dgu bkod pa'i dbus su cang mi smra bar dor cig__/de yang rtse mo rang ngam steng du phyogs na mchog gi dngos grub/__shar du phyogs na 'bring gi dngos grub phyogs mtshams gzhan rnams su phyogs na 'jig rten pa'i dngos grub/__'og tu phyogs nas 'og gi dngos grub 'grub par 'gyur ro/__/sgo gsum gyi dri ma sbyang ba'i slad du khyor chu blud pa ni/__a mr-i te bzlas pa'i chu/__oM hrIHbi shud+d+haHsarba d+harmAHsarba pA paM ni tsaR+Ya saM shod+ha ya sarba bi kalpa a pa na ya hU~M zhes pa'i sngags kyis lan bdun sbyin no/__/bar chad bsrung ba'i slad du srung skud sbyin pa ni/__a mr-i tas byin gyis brlabs pa'i srung skud dmar po rdo rje slob ma rnams kyi lus tshad dang mnyam pa rdo rje'i mdud pa gsum btab pa/__slob ma skyes pa'i dpung pa g.yon dang bud med kyi g.yas par gtso bo'i sngags bzla zhing bcing /__bum chu gtor/__yig brgyas brtan par bya'o/__/rtswa ku sha'i sngas stan sbyin pa ni/__a mr-i te bzlas pa'i ku sha chung ba g.yas su d+hIHdang /__che ba g.yon du haHzhes pas sbyin/__chos zab mo bshad pa'i sgo nas spro ba bskyed pa ni/__'jig rten du ni kun mkhyen dag__/u duR+WA ra'i me tog bzhin/__/brgya lam na ni res 'ga' zhig__/'byung 'gyur yang ni mi 'byung ngo /__/gsang sngags spyod pa'i tshul 'byung ba/__/de bas kyang ni dkon pa ste/__/gang gis sems can mnyam med don/__/bla med byed par nus pa yin/__/bskal pa bye ba du ma ru/__/sngon chad sdig pa byas pa gang /__/dkyil 'khor 'di 'dra mthong ma thag__/de dag zad par 'gyur yin na/__/grags pa mtha' yas sngags spyod pa'i/__/tshul la gnas na smos ci dgos/__/skyob pa'i gsang sngags bzlas na ni/__/go 'phang bla na med par 'gyur/__gang gis spyod pa mchog 'di la/__/blo gros shin tu mi g.yo na/__/sdug bsngal thams cad 'byung ba yi/__/ngan 'gro de yis gcod par 'gyur/__/bdag nyid chen po khyed rnams kyis/__/rnyed pa mnyam med de ring rnyed/__/gang phyir rgyal ba sras bcas pa/__/bdag nyid chen po kun gyis ni/__/bstan pa 'di la khyed rnams kun/__/yongs su bzung ste skye bzhin pa/__/de phyir khyed rnams theg chen du/__/sang ni rab tu skye bar 'gyur/__/theg pa chen po cher 'byung ba'i/__/lam mchog 'di ni dpal dang ldan/__/khyed rnams der ni dong bas na/__/rang byung skal pa chen po pa/__/'jig rten thams cad mkhyen pa yi/__/de bzhin gshegs pa nyid du 'gyur/__/de'i don ni/__'jig rten na u duR+WA ra'i me tog dkon pa ltar/__sangs rgyas byon pa/__byon nas chos gsungs pa/__gsungs pa'i bstan pa gnas pa/__bstan pa'i rjes su bdag gzhan 'jug pa yod pa rnams dkon/__de'i nang nas kyang gsang sngags kyi theg pa dang mjal ba shin tu dkon zhing /__dkon pa de yang phan yon chen po dang ldan pa yin te/__dkyil 'khor du zhugs te dbang blangs nas dam tshig la bsrung sdom dang lam la 'bad pa byas na brtson 'grus dang bstun pa'i bye brag gi tshe 'di'am bar do'am skye ba bdun nam bcu drug tshun chad na 'bras bu 'grub par gsungs pas/__mthar thug gi 'bras bu la nye zhing gnas skabs kyi 'bras bu tshe 'dir tshe ring ba dang nad dang sdug bsngal zhi ba la sogs pa'ang rtsol sgrub logs nas mi dgos par zhar las 'byung ba'i tshul gyis 'grub pa yin pas rnyed dka' ba phan yon che ba'i gsang sngags kyi theg pa dang mjal ba 'di skal pa bzang ba yin snyam du shes pa'i sgo nas lam la 'bad pa dang /__dam tshig la srung sdom tshul bzhin du bgyi snyam pa gyis/__rmi lam brtag cing ngan na bsrung ba ni/__do nub nyal ba'i tshe sngar gyi ku sha chung ba sngas dang che ba stan du gyis la lha dang bla ma yid la dran pa'i sgo nas mgo shar ram byang du ston la nyol zhig__/lung ston pa'i rmi lam 'byung bar 'gyur ro/__/de yang rmi lam bzang ba'i ltas ni/__de bzhin gshegs pa'i sku gzugs dang mchod rten mthong ba/__dam pa'i chos kyi glegs bam lag tu thogs pa/__'phags pa'i dge 'dun gyi sde'i dbus su bzhugs pa/__rang gi bla ma dang mjal ba/__chos mnyan pa/__nyi zla shar ba/__rgyal por dbang bskur ba/__rta dang glang po che zhon pa la sogs 'byung na bzang ba yin pas zhen pa med pa'i dga' ba bsgom zhing dga' ston bya/__gal te ngan pa yang 'byung srid do/__/de'i ltas ni/__rgya skyegs kyi ri la 'dzegs pa/__/rawI ra'i me tog 'thu ba/__mchod sdong dang bye ma dang thal phung lar dzegs pa/__spre'u dang bong bu la zhon nas kha phyir phyogs te 'gro ba/__chus khyer ba/__skra bregs pa/__lus til mar gyis byugs pa la sogs pa byung na cung zad ngan pa yin pas gnyid sad ma thag tu chos thams cad rmi lam gyi snang ba dang khyad par med de/__don la grub pa ci yang med ces bden med kyi snang bas rgyas 'debs pa/__zhi ba'i sbyin sreg blugs pa la sogs pa'i sgo nas rmi lam ngan pa bzlog pa'i thabs la 'bad par bya dgos pa yin no/__/de rnams kyis slob ma sta gon gyi chos rnams song nas/__'di'i dngos gzhi sang nyin 'byung ba yin no/__/zhes brjod la slob ma rang gnas su gtong ngo /__/gsum pa rjes ni/__mchod pa rnams kha gsos la byin gyis brlab/__bum bskyed kyi skabs ltar mchod bstod 'dod don zhus la/__lhag chad kha bskang /__nongs pa bzod par gsol/__oM/__khyed kyis sems can don kun mdzod/__/ces sogs kyi mthar mtheb srin gyis se gol dang /__oM badz+ra muH__sta gon gyi lha rnams sang nang par 'byon par bzhed bzhin pas/__rang bzhin gyi gnas su gshegs zhes brjod cing bsams la sta gon gyi yo byad rnams bsdus te/__de'i nub mo dge ba'i gnyid kyis log go__/gnyis pa/__dngos gzhi la/__sbyor dngos rjes gsum gyi dang po ni/__'di'i bris sku rab gnas can zhal shar du phyogs par dgram/__phyi mchod/__sgos mchod/__cha gsum rnams sngar bzhin du bsham/__srog chags dang ma 'dres pa'i bdug spos rgyun mi 'chad par btul/__'byor na phyogs mtshams rnams su mda' brgyad/__tshon skud kyi drwa ba/__me long /__ral gri/__phur bu rnams las sngags brjod cing phyag len bzhin dgram/__rdo rje dril bu dang bum pa la sogs pa sngar bzhin bsham/__mig ras/__me tog__/gu gul/__nyer spyod lnga/__rma bya'i mdongs/__bkra shis rdzas brgyad la sogs pa 'og tu dgos pa'i yo byad rnams sta gon bya/__grub na spyi rgyud las 'byung ba ltar dkyil 'khor gyi shar ngos su dbang stegs kyi dkyil 'khor yang bri'o/__/gnyis pa ni/__bdag bskyed/__/mdun bskyed/__cho ga gzhan mang po sbrel na dngos gzhi gnyis pa man la bum pa bsgrub pa/__cha gsum/__bdag 'jug__/slob ma la dbang bskur ba rnams gzhan phan zla ba'i dkyus bzhin la/__ye shes pa spyan 'dren gyi tshe/__dngos gzhi nyin sbrel yin na nyi ma dang po'i tshe/__rang gi snying ga'i hU~M las 'od zer 'phros pas sta gon gyi lha rdo rje mi 'khrugs pa lha dgu'i dkyil 'khor gyi lha tshogs kyi rnam par oM badz+ra sa mA dzaHzhes brjod pa tsam khyad par dang /__slob ma la dbang bskur ba'i mtshams sbyor gyi tshig__/mngon par dbang bskur ba bsgrub pa la/__zhes pa'i mtshams/__sta gon dang dngos gzhi gnyis kyi dang po grub zin nas/__phyi ma la sngon 'gro slob dpon gyis zhes sbrel ba tsam khyad par ro/__/gsum pa rjes chog ni dkyus ltar ro/__/zhes pa'ang rdo rje mi 'khrugs pa'i cho ga gzhan phan zla ba gzhir bzhag nas slob ma la dbang bskur ba'i tshul lhan thabs kyi tshul du many+dzu g+ho Shas bris pa mang+ga laM//____//__!_