JKW-KABUM-10-THA-004-023-wylie
bo dong paN chen lugs kyi dbyangs can ma dkar mo'i bsnyen sgrub las gsum mtsho byung dgyes pa'i lam srol/
@#/_/bo dong paN chen lugs kyi dbyangs can ma dkar mo'i rjes gnang bsnyen sgrub las gsum dang bcas pa'i yi ge mtsho byung dgyes pa'i lam srol zhes bya ba bzhugs so/__/oM swa sti sid+d+haM/__/ye shes bdud rtsis sa gsum gyi/__/gdung sel phan bde'i bcud 'jo ba/__/mtsho byung zla ba skal bzang gi__/yid mkhar rtag tu rol par mdzod/__de la 'phags ma ngag gi dbang phyug mas mngon sum du rjes su bzung zhing /__gsung gi bdud rtsi mtha' yas pa stsal ba'i 'jigs bral gyi slob dpon phyogs thams cad las rnam par rgyal ba dbyangs can dga' ba'i zhal snga nas 'ongs pa'i bcom ldan 'das ma'i gdams skor la/__/snod du bya phyir rjes gnang dang /__/bsnyen pas dngos grub sgrub pa dang /__/rdzas dang las kyi sbyor ba yis/__/grub pa'i dga' ston spel ba'o/__/zhes don rnam pa bzhi'i sgo nas rtogs par bya ba las/__dang po rjes su gnang ba la gsum/__sbyor ba/__dngos gzhi/__rjes so/__/dang po ni/__gnas dben zhing gtsang la yid dang mthun par/__'dzom na tshes grangs yar ngo'i brgyad dang /__gza' skar rgyal phur 'phrad pa sogs grub pa'i sbyor ba khyad par can 'char ba'i dus kyi snga dro'i char khrus dang gtsang sbra la gnas pa/__maN+Dal gyi ngos su ba dmar mo'i mar dang /__sbrang rtsi sbyar bas pad+ma 'dab brgyad lte ba dang bcas pa/__lte bar hrIMH__'dab ma brgyad la mdun nas brtsams te g.yas skor du dbyangs yig gnyis re bri/__de steng 'bras dkar gyi phye ma dar tshags la drangs pa bkram nas ri mo shin tu gsal bar byas pa stegs gtsang ma'i dbus su many+dzi'i khar bzhag__/mdun du ba dkar dmar gang rung gi dkar gsum dang /__sbrang rtsi bcas nas dkar gyi phye dang sbyar la sbrus pa'i gtor ma dkar zlum/__chu gnyis sngon 'gro'i nyer spyod/__maN+Dal gyi pad 'dab so so'i phyi nas bskor ba'am/__nye logs ci bde bar bzhag kyang rung ste/__rgyu gtor ma ltar las bcos pa'i zan gyi ting lo slob ma'i grangs dang mnyam pa sogs 'og tu dgos pa'i yo byad thams cad 'du bya'o//____//
gnyis pa dngos gzhi la/__mchod pa rnams/__oM a mr-i te hU~M phaT kyis bsang /__swa b+hA bas sbyang /__stong pa'i ngang las oM las byung ba'i rin po che las grub pa'i snod yangs shing rgya che ba rnams kyi nang du/__oM 'od du zhu ba las byung ba'i lha rdzas las grub pa'i mchod yon sogs nas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shab+da'i bar sbyar bas byin gyis brlab/__skyabs 'gro sems bskyed nas brtsams te bdag bskyed bzlas pa bcas grub rjes/__mdun gyi maN+Dal bsang sbyang /__stong pa'i ngang las mdun du rin po che'i sa gzhi sogs nas/__zla ba'i dkyil 'khor gyi steng du hrIMHyig dkar po/__mdun bskyed dang rang gi thugs ka'i sa bon las 'od zer 'phros/__lho phyogs rgya mtsho'i 'gram/__dri za'i bu mo'i gnas/__rig 'dzin dga' ba'i tshal sogs nas/__'od dpag med kyi ngo bo pad+ma dkar dmar gyi dbur brgyan par gyur/__zhes pa'i bar/__rang gi sems nyid kyi ngo bo dang /__rang nyid ces pa'i tshig dor/__'di la mngon par dbang bskur ba zhes bsgyur ba tsam ma gtogs bdag bskyed ltar gsal gdab/__de nas mchod pa bsang sbyang byin gyis brlab/__spro na tshigs bcad ji ltar rigs pa'am/__bsdu na/__oM swa ra swa tI sa pa ri wA ra ar+g+haM pra tIts+tsha swA hA nas/__shab+da'i bar sbyar bas mchod/__/mkhyen bzang rab tu rgyas pa'i pad+ma dang /__/thugs rje dri med zla ba'i gdan la 'gying /__/sgra dbyangs rgya mtsho'i pi wang gsung snyan gyis/__/khams gsum dbugs 'byin lha mo khyod la 'dud/__/ces sam/__rgyas par na bstod pa de nyid tshang ma dang /__gzhan yang bstod pa ji ltar rigs pas bstod cing gsol ba gdab/__gtor ma bsang sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M/__gsum gyis brlab/__oM swa ra swa tI sa pa ri wA ra oM a kA ro sogs lan gsum gyis phul/__mchod bstod gong ltar bya/__mdun bskyed kyi lha mo'i sku gsal bar snang ba la yid rtse gcig tu gtad de thugs rgyud bskul ba'i tshul gyis hrIMHdang /__A li ci nus bzlas pa'i mthar thal mo sbyar te/__bcom ldan 'das mas bdag dang rdo rje slob ma rnams kyi rgyud byin gyis brlab tu gsol/__/ma rig pa'i mun pa bsal du gsol/__phyogs thams cad las rnam par rgyal ba'i shes rab khyad par can stsal du gsol/__zhes gsol ba btab pas de de bzhin du bgyi'o zhes zhal gyis bzhes par bsam/__de nas slob ma rnams phyi rol tu dri bzang po'i chus khrus byas/__nang du 'ongs pa na gdan dkar po 'bru dkar gyis pad+ma 'dab brgyad bkod pa'i steng du/__ras dkar po'i stod g.yogs dang smad g.yogs dang la thod bcas kyis mdzes par bklubs nas gral rim bzhin tsog pur 'khod du gzhug la/__slob dpon gyis sems bskyed gsal gdab sogs ji ltar rigs pas mtshams sbyar te/__de la mngon par mtho ba dang /__nges par legs pa'i yon tan mtha' dag gi rtsa ba ni dri ma med pa'i shes rab phun sum tshogs pa la rags las shing /__spyir shes rab kyi ngo bo ni/__brtag bya'i dngos po la rjes su dmigs nas rang dang spyi'i mtshan nyid rab tu rnam par 'byed pa'i sems pa sa bon dang bcas pa'o/__/nges tshig ni/__pradz+nyA zhes pa'i sgra las drangs na/__legs par shes pa ste gang la dmigs pa'i yul gyi mtshan nyid ma nor bar khong du chud pa'o/__/dbye na yul dang yul can gyi sgo nas rnam pa du mar 'gyur ba las/__re zhig phyi thun mong gi rig pa'i gnas gtan la 'bebs pa dang /__nang thun mong ma yin pa sde snod dang rgyud sde'i gnas gtan la 'bebs pa'i shes rab rnam pa gnyis su 'du zhing /__de dag skyed par byed pa'i thabs kyang phyi nang gi rig pa dang gtsug lag gi gnas rgya cher thos pa dang /__tshul bzhin du bsam pa dang /__rtse gcig tu yid la byed pa dang /__thos pa 'dzin pa dang /__gzhan la ston pa dang /__glegs bam dang de la nye bar mkho ba'i yo byad sbyin pa sogs thun mong pa'i thabs rgya cher gsungs pa rnams las mchog tu gyur pa ni/__shes bya thams cad la dbang 'byor par byed pa gzungs kyi sgo bsgrub dgos shing /__/de la'ang shes rab kyi pha rol tu phyin pa las/__a ra pa tsa na la sogs pa bsgoms pas de'i don la bzod pa skye ba ni bzod pa'i gzungs so/__/de la brten nas sangs rgyas dang byang chub sems dpas bstan pa'i chos kyi phung po 'dzin pa'i rgyur 'gyur pa ni chos kyi gzungs so/__/de'i stobs kyis chos thams cad kyi don rtogs pa ni don gyi gzungs so/__/de nas sems can yongs su bsdu ba'i phyir chos thams cad ston pa dang sngags sbyor ba don yod pa la dbang ba ni sngags kyi gzungs so/__/zhes rnam pa bzhir gsungs pa ji bzhin du 'grub pa ni 'phags pa sa chen po la gtogs pa rnams kyi spyod yul yin yang /__de'i nyer len du gyur pa dang /__cha shas ci rigs pa zab mo'i rnal 'byor dang rig sngags kyi mthu la brten nas las dang po las kyang dka' ba med par bde blag tu sgrub nus pa la dgongs nas/__ston pa bla na med pas rdo rje theg pa'i rgyud sde rin po che rnams su shes rab rgyas par byed pa'i lha sngags kyi rim pa ji snyed cig gsungs pa rnams kyi nang nas ches cher bsngags pa rje btsun 'jam pa'i dbyangs dang /___/'phags ma dbyangs can ma gnyis su nges shing /__phyi ma la'ang sgrub thabs dang man ngag gi bka' srol mang du byung ba las da lam 'dir skabs su babs pa ni/__bcom ldan 'das ma nyid kyis dus rtag tu yongs su 'dzin par mdzad nas zab rgyas kyi gdams pa mtha' yas pa dngos su stsal ba'i 'jigs bral gyi slob dpon phyogs thams cad las rnam par rgyal ba'i ma hA paN+Di ta dbyangs can dga' ba'i zhal snga nas 'ongs pa'i nye brgyud thun mong ma yin pa'i rjes su gnang ba bsgrub pa la/__thog mar lo rgyus cung zad cig snyan du gsol na/__rje btsun chen po de nyid sku na phra mo'i dus dpal e chos 'byung ba'i lcags ri mu khyud kyi byang shar gyi lcog gcig tu sku mtshams dam par bcad de/__'phags ma sgra dbyangs lha mo'i rnal 'byor zab mo dang 'brel ba'i ting nge 'dzin gyi sgo du ma la 'jug cing ldang ba'i tshe/__yun mi ring ba zhig gi dus srod kyi thun rdzogs te/__nam gyi gung la sku khams gso ba'i phyir cung zad mnal ba'i tshul bstan pa na mchog gi lha mos byin gyis brlabs shing /__pi wang gi sgra las zab pa dang rgya che ba'i chos kyi rol mo chen pos phyi nang gi gnyid ma lus par sad par mdzad nas zhal mngon sum du gzigs/__dus de nyid nas brtsams te bcom ldan 'das ma nyid kyis yang dang yang du zhal nye bar bstan pa dang /__chos kyi rnam grangs du ma'i lung mtha' dag stsal zhing /__de dag gi dus na rje btsun lha mo la bstod pa'i tshig sbyor yid 'phrog pa du ma mdzad pa dag gi gsham du dbyangs can dga' ba'i paN+Di tas sbyar ba'o zhes 'jigs pa med pa'i seng ge'i sgras zhal gyis 'ches pa ltar 'jig rten na nyi zla ltar yongs su grags shing /__bstod pa de dag kha ton du byed pa tsam la'ang 'phral du shes rab phun sum tshogs pa skyes pa'i gtam rgyud ngo mtshar can 'byung ba dang /__dpal de kho na nyid 'dus pa'i chos kyi rgya mtsho chen po glegs bam gyi phreng ba brgya phrag brgal ba'i legs bshad thogs pa med par rtsom pa'ang 'phags ma 'di nyid kyi byin gyis brlabs pa'i mthu kho na las byung bas na bka' babs kyi khyad par gzhan las rnam par du ma'i sgo nas 'phags shing /__brgyud pa bar ma chad pa las rim par byon pa lags pas dad pa dang nges shes rtse gcig pas drangs te slob dpon sgra dbyangs lha mo dngos su gsal ba la rjes gnang zab mo zhu ba'i yon du dmigs te maN+Dal phul/__gsol ba 'debs pa 'di'i rjes zlos lan gsum mdzod/__/slob dpon bdag la dgongs su gsol/__/sgra dbyangs lha mo dbyangs can ma'i/__/sku dang gsung dang thugs rnams kyi/__/rjes su gnang ba stsal du gsol/__rgyud dag par bya ba'i slad du bla ma dang gnyis su med pa'i 'phags ma sgra dbyangs lha mo la sangs rgyas dang byang chub sems dpa'i tshogs bsam gyis mi khyab pas bskor ba mngon sum lta bur bzhugs pa'i spyan sngar thun mong gi skyabs sems dang rgyun bshags sngon du 'gro bas byang chub mchog tu sems bskyed par bgyi'o snyam pas 'di rnams kyi rjes zlos lan gsum mdzod/__/'gro rnams bsgral 'dod sogs dang /__shes rab snying brtse sogs dang /__dkon mchog gsum la bdag skyabs mchi sogs/__de nas rjes gnang gi dngos gzhi'i slad du thugs gzhan du ma yengs par dmigs pa 'di bzhin du mdzod/__bla ma dang sgra dbyangs lha mo gnyis su med pa'i thugs ka'i hrIMHyig las 'od zer dpag tu med pa 'phros pas khyed rang rnams kyi spyi gtsug nas zhugs/__rkang mthil gyi bar lus kyi nang thams cad khyab/__sdig sgrib nyes ltung dri ma'i tshogs thams cad sbyangs te lus shin tu dag pa'i shel ltar gyur/__de nyid la dmigs te slob dpon gyis oM swA b+hA wa sogs/__zhes brjod pas gnyis snang gis bsdus pa'i chos thams cad stong pa nyid du sbyangs/__stong pa'i ngang las b+h+rU~M las snod kyi 'jig rten rin po che'i sa gzhi sogs nas/__snying gar thugs kyi ngo bo hU~M sngon po zhes pa'i bar mdun bskyed ltar gsal btab/__hU~M gi nA dA'i rtse mor zla ba'i dkyil 'khor gyi steng du hrIMHdkar po/__slar yang slob dpon dang khyed rang rnams kyi thugs ka'i hrIMHlas 'od zer 'phros pas/__lho phyogs rgya mtsho'i 'gram rig pa 'dzin pa dga' ba'i tshal na sgra dbyangs lha mo dbyangs can ma bzhugs pa'i sku lus la phog__/yid 'gugs pa'i lcags kyu'i rnam pas spyan drangs/__ngang pa'i rgyal po nam mkha' la gshegs pa ltar thogs pa med par byon nas khyed rang rnams kyi lus la sib sib thim pas sku'i rjes su gnang ba thob/__/sku'i byin rlabs lus la zhugs pa'i mos pa mdzod ces brda' sbyar nas/__gu gul dkar po sogs dri zhim pa'i spos sbyang bas bdug__/dril bu gsil zhing /__hrIMHA be sha ya aHAH__zhes bzla/__yang slob dpon dang khyed rang rnams dbyangs can mar gsal bzhin pa'i mgrin par pad+ma dkar po 'dab ma brgyad pa'i lte bar hrIMH__'dab ma rnams la dbyangs yig gnyis gnyis mar me ltar 'bar bar gsal gdab nas/__slob dpon la gus 'dud mdzad pas slob dpon gyi mgrin pa'i sngags phreng rang sgra sgrogs pa las 'od zer 'phros/__khyed rang rnams kyi lus kyi nang thams cad gang /__khyad par mgrin pa'i 'khor lo la thim pas gsung gi rjes su gnang ba thob/__gsung gi byin rlabs ngag la zhugs pa'i mos pa mdzod/__spos rol dang sngags bzla/__rjes 'brel du sngags 'di'i rjes zlos lan gsum mdzad pas sgra dbyangs lha mo'i rig pa'i byin rlabs ma lus pa stsal zhing brtan pa'i mos pa mdzod/__hrIMHa A sogs/__slar yang slob dpon gyi thugs ka'i hrIMHyig las 'od zer bsam gyis mi khyab par 'phros/__khyed rang rnams kyi snying ga'i sa bon la thim pas lus kyi nang thams cad gang /__thugs kyi rjes gnang thob/__thugs kyi byin rlabs yid la zhugs pa'i mos pa mdzod/__spos rol dang sngags bzla ba gong ltar bya/__rjes 'brel du mar me 'di nyid sgra dbyangs lha mo'i thugs rnam par mi rtog pa'i ye shes kyi ngo bor bsgoms nas bzhes pas mi shes pa'i mun pa thams cad bsal/__shes rab kyi snang ba khyad par can rgyud la skyes pa'i mos pa mdzod ces brda' sbyar la ting lo sbar ba mid du gzhug__/mdun gyi maN+Dal blangs la/__sbrang rtsi dang ba dmar mo'i dkar gsum cung zad sbyar ba'i dri bzang po'i chus yig 'bru rnams ma zum par hrIMHdang dbyangs yig bzla bzhin du khrus bgyis pa'i khu ba rin po che'i snod du blugs/__maN+Dal sngar bzhin du bkod/__/slob ma la 'di skad ces brda' sbyar te/__de nas mthar mdun bskyed kyi sgra dbyangs lha mo'i byin rlabs thams cad ye shes kyi bdud rtsi'i rnam par byung /__khyed rang rnams la thim pas sku gsung thugs yon tan phrin las dang bcas pa'i rjes su gnang ba thob/__lus ngag yid gsum gyi dri ma dag__/shes bya thams cad la chags thogs dang bral ba'i gzungs kyi sgo dang blo gros kyi snang ba dpag tu med pa skyes pa'i mos pa mdzod ces brjod la khrus chu slob ma rnams la sbyin/__mjug gi chos dam tshig khas blang pa sogs spyi ltar byas la slob ma rnams rang gnas su btang ngo /__/gsum pa rjes ni/__mchod pa kha gsos bsang sbyang byin rlabs mchod bstod gsol gdab gong ltar bu/__yi ge brgya pa lan gsum dang /__oM badz+ra sa twa hU~M zhes mang du brjod la/__ma 'byor pa dang sogs kyis nongs pa bzod par gsol/__badz+ra muHmdun bskyed kyi ye shes pa gshegs/__dam tshig pa rang la bstim/__gnas gsum bsrung /__bsngo smon shis brjod rgyas par spel la las kyi rjes mi mngon par bya'o//__//
gnyis pa dngos grub sgrub pa'i thabs bsnyen pa ji ltar bya ba'i tshul la gsum/__dang po sbyor ba ni/__ji skad bshad pa'i rjes gnang thob cing dam tshig dang sdom pa la gnas pas/__ra ba bzhi'i yar ngo'i tshes brgyad sogs tshes grangs gza' skar sbyor byed de yan lag lnga'i 'bras bu mchog tu dge ba'i snga dro'i char gnas khang gtsang zhing dben par phyag dar legs par byas/__/'phags ma'i bris sku yod na dgram/__gtor ma dkar zlum gnyis dang mchod pa/__nye logs ci bde bar changs bu'i gtor ma dang /__cha gsum bcas bsham/__khrus dang gtsang sbra la gnas pas cha gsum btang la mtshams bcad/__gnyis pa dngos gzhi sgrub pa'i thabs ni/__mdun gyi nam mkhar skyabs yul rnams gsal bar dmigs te/__/'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/zhes mang du brjod la skyabs su 'gro/__/shes rab snying brtse dang bcas pas/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/_/zhes lan gsum gyis sems bskyed/__rang skad cig gis sgra dbyangs lha mo dbyangs can mar gsal ba'i thugs ka'i hrIMHlas 'od zer zla ba shar ba lta bu 'phros pas/__rang bzhin gyi gnas nas sangs rgyas dang byang chub sems dpa' thams cad lha mo dbyangs can ma 'khor dang bcas pa'i rnam par mdun gyi nam mkhar oM badz+ra sa mA dzaHsa tshogs zhing spyan drang /__swa ra swa tI sa pa ri wA ra na mA me zhes pas phyag bya/__oM swa ra swa ti sa pa ri wA ra ar+g+haM nas/__shab+da pra tI ts+tsha swA hA'i bar gyis mchod/__dkon mchog gsum la bdag skyabs mchi sogs lan gsum gyis sdom pa bzung ba rnams kyis bsod nams kyi tshogs bsags la tshogs zhing rang la bstim/__ye shes kyi tshogs bsags pa'i slad du/__oM swa b+hA ba shud+d+haHsarba d+harmAHswa b+hA ba shud+d+ho\u0f85haM/__zhes brjod pas 'khor 'das kyi chos thams cad 'od gsal stong nyid nam mkha'i dbyings lta bur gyur par bsams la cung zad mnyam par bzhag__/de nas tshogs gnyis kyi rang 'bras sgyu ma lta bu'i lha'i 'khor lo bsgom pa ni/__stong pa'i ngang las b+h+rU~M las rin po che'i sa gzhi rin po che sna tshogs kyi shing ljon pas mdzes pa/__gser dang dngul la sogs pa'i me tog du ma 'bar ba/__bya sna tshogs skad snyan par sgrog pa/__ri dwags sna tshogs rgyug cing 'phyo ba/__drang srong du ma bsam gtan mdzad pa/__lha phrug sna tshogs rtse zhing 'phyo ba'i gnas/__rin po che'i ne'u gseng na zla ba nor bu'i rdo leb phyogs bcur bkram pa/__nor bu'i rgya mtsho dri ma med pa'i 'jug ngogs su pa~M las pad+ma 'dab ma du mas rgyas pa'i lte bar a las zla ba nya gang ba'i dkyil 'khor dri ma med pa/__de'i steng du rang gi sems nyid kyi ngo bo hrIMHdkar po rtag tu 'char ba'i rang bzhin can/__de las 'od zer 'phros/__sems can thams cad kyi mi shes pa'i mun pa bsal/__tshur 'dus yongs su gyur pa las rang nyid lha mo dbyangs can ma sku mdog dkar mo/__zhal gcig phyag gnyis ma chags pa'i 'dug stangs can/__zhal ras zla ba shar ba 'dra ba smin 'khyug ri mo bris pa 'dra ba/__spyan gnyis ut+pal ltar bkra ba/__zur mig gi skar mda' g.yo ba/__mkhur tshos dkar dmar mdangs gsal zhing snying du sdug pa/__mgrin pa sgeg chags shing dal gyis 'dud pa/__nu ma dkar zlum mkhrang zhing mtho la rgyas pa/__phyag g.yon dri za'i pi wang rin po ches spras pa 'dzin pa/__g.yas sor gdub kyi sgra dang ldan pa'i sor mo'i cha shas kyis pi wang rdung ba la brtson pa/__rab tu phra zhing sta zur ldem pa'i sked skabs can/__sku lus rim par 'tsham zhing dkar 'jam gzhon sha byas la 'khril bag chags pa/__dkar 'jam bde ba'i 'du byed chags pa'i zhabs gnyis cung zad tsog pu'i tshul gyis bzhugs pa/__yid 'phrog pa'i lhas ma ring zhing rgyas pa phyed grol ba'i zar bus sku stod khebs shing /__phyed gyen du bcings pa'i thor cog la yid bzhin gyi nor bu 'bar ba/__gser gyi nyag thag la mngon par brgyus pa'i me tog sngo dmar sogs kyis skra mtshams mdzes par spras pa/__snyan gong la gser gyi me tog dang /__ut+pa las spras shing /__snyan ltag tu dar gyi cod pan g.yo ba/__gzhan yang rin po che'i rna rgyan/__mgul rgyan/__phyag gdub/__zhabs gdub/__ska rags/__do shal la sogs pa'i rgyan du mas brgyan pa/__ras dkar po yid 'phrog pa'i stod g.yogs dang /__dbang po'i gzhu lta bu'i smad g.yogs kyis spras pa/__mtshar sdug 'od chags pa bcu drug lon pa'i lang tsho can du gyur pa'i dpral bar dus gsum sangs rgyas thams cad kyi sku'i ngo bor gyur pa'i oM dkar po/__mgrin par gsung gi ngo bo AHdmar po/__snying gar thugs kyi ngo bo hU~M sngon po/__hU~M gi nA da'i rtser zla ba'i dkyil 'khor gyi steng du hrIMHyig dkar po 'dir yig cha phyi mar snying gar dbyangs can gyi 'khor lo gsal gdab par gsungs kyang /__rtsa ba'i yi ge'i dgongs pa ni 'di kho na'o/__/las 'od zer dkar po sna bug nas thon te skar mda' 'phangs pa bzhin song nas/__lho phyogs rgya mtsho'i 'gram/__dri za'i bu mo'i gnas/__rig 'dzin dga' ba'i tshal na lha mo dbyangs can ma rtse 'phyo la yengs pa'i sku la phog pas/__yid 'gugs shing lcags kyus drangs pa ltar lha mo 'khor bcas gnas de nas 'phur te/__dges pa dang bcas pas rang gi steng gi bar snang la bzhugs par gyur/__sngar ltar phyag 'tshal zhing mchod nas/__dzaHhU~M ba~M hoH__zhes pas gnyis su med par gyur/__de bzhin gshegs pa thams cad kyis bdag la mngon par dbang bskur du gsol/__zhes gsol ba btab pas/__steng gi bar snang nas me tog gi char 'bebs/__rol mo'i sgra sgrog__/ye shes kyi bdud rtsis sku khrus gsol/__sku gang /__dri ma dag__/chu lhag ma yar lud pa spyi bor 'khyil pa las 'od zer gyi cha las grub pa'i 'od dpag med kyi ngo bo pad+ma dkar dmar gyis dbur brgyan par gyur/__ces yan lag bzhi rdzogs kyi tshul du gsal btab la lha'i gsal snang la yun ring du mnyam par bzhag__/des skyo bar gyur na bzlas pa bya ba ni/__rang gi snying gar zla ba'i dkyil 'khor gyi steng du gnas pa'i hrIMHyig dkar po las 'od zer dkar po mtha' yas pa zhal nas 'phros te/__phyogs bcu thams cad du song nas/__sangs rgyas byang chub sems dpa' thams cad dang /__nyan thos rang rgyal/__mkhas pa/__grub thob/__lha dang /__mi sogs mdor na 'jig rten dang 'jig rten las 'das pa'i mkhyen brtse nus mthu la sogs dngos grub thams cad dang /__khyad par du shes rab dang ye shes kyi tshogs thams cad 'dus nas rang gi lte bar thim pa'i 'od zer gyis lus kyi nang thams cad gang /__ma rig pa'i mun pa thams cad bsal/__shes bya thams cad la chags thogs dang bral ba'i blo gros kyi snang ba mchog tu rgyas par bsams la/__hrIMHyig gi phreng ba lte ba nas snying ga'i bar du g.yon skor gyis rang sgra dang bcas 'gal me 'khor ba'i rnam pa lta bu la yid gtad nas/__hrIMHzhes pa'i rig pa 'bru gcig pa nyid bzlas pa'i skyon rnams spangs la rtse gcig tu bzla/__thun 'jog khar gtor ma 'bul ba ni/__gtor ma la chab gtsang mas bran te/__oM a mr-i te hU~M phaT kyis bsang /__swa b+hA bas sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M gsum gyis byin brlab/__rang gi snying ga nas 'od zer 'phros pas sgra dbyangs lha mo dbyangs can ma la sangs rgyas dang byang chub sems dpa'i tshogs kyis bskor ba oM badz+ra sa mA dzaHsa spyan drang /__oM swa ra swa tI sa pa ri wA ra a kA ro sogs lan gsum gyis phul/__tshogs zhing gi skabs ltar mchod/__bstod pa rgyas bsdus gang shes kyis bstod/__sgra dbyangs lha mo 'khor bcas rnams/__/mchod sbyin gtor ma 'di bzhes la sogs dang /__bcom ldan 'das mas bdag dang sems can thams cad kyi ma rig pa'i mun pa bsal nas/__phyogs thams cad las rnam par rgyal ba'i shes rab khyad par can stsal du gsol/__zhes sogs ji ltar rigs pas 'dod pa'i don la gsol ba gdab/__gtor ma gnyis pa bsang sbyang byin rlabs gong bzhin bya/__/rang gi snying ga nas 'od zer 'phros pas 'phags ma nor rgyun ma 'khor dang bcas pa oM badz+ra sa mA dzaH__oM bA su d+hA ri hU~M dzaH__oM pra ka ra dza me swA hA/__zhes lan bdun nam nyi shu rtsa gcig gis 'bul/__bdag ming 'di zhes bgyi ba dpal lha mo dbyangs can ma sgrub pa la phrag dog ma mdzad par nor 'phel bar mdzad du gsol zhes 'dod don gsol/__changs bu'i gtor ma bsang sbyang byin gyis brlab/__srid pa gsum gyi 'byung po thams cad mdun du 'khod par bsams la/__na ma s+sarba ta thA ga ta sogs lan bdun gyis bsngo/__de bzhin gshegs pa bzhi'i mtshan brjod/__srid pa gsum gyi 'byung po'i tshogs rnams mchod sbyin gyi gtor ma rgya chen po 'di bzhes la/__sgrub pa la bar du gcod pa ma mdzad cig__/dkar phyogs skyong ba mthu dang ldan pa rnams kyis bar chad srung zhing /__dngos grub stsol ba'i mthun rkyen mdzod cig__/ces phrin las gsol/__yi ge brgya pa dang /__oM badz+ra sa twa hU~M zhes mang du bzla/__ma 'byor pa dang nyams pa dang sogs kyis nongs pa bzod par gsol/__gtor mgron rten yod pa rnams la brtan zhugs dang /__med pa rnams badz+ra muHsa gshegs su gsol/__sarba b+hU ta gats+tshas 'jig rten pa rnams rang gi gnas su btang /__rang gi dpral bar oM/__mgrin par AH__thugs kar hU~M gis mtshan par mos la/__/dge ba 'di yis myur du bdag__/sgra dbyangs lha mo 'grub gyur nas sogs kyis bsngo smon dang /__shis pa brjod/__thun mtshams thams cad du lha'i nga rgyal dang ma bral bas spyod lam dge ba'i phyogs la brtson pas sgo gsum don yod par bya/__khyad par 'phags ma'i bris sku'i mdun du yan lag bdun pa dang /__maN+Dal dang /__bstod pa byin rlabs can rnams kyis bstod cing gsol ba gdab/__bza' btung la longs spyod pa'i tshe snying ga'i hrIMHlas 'od zer 'phros/__brtan g.yo srid zhi'i dwangs bcud thams cad bsdus te thim pas dngos grub mtha' dag stsol ba'i rdzas su bsams la rol/__nyal ba'i tshe snying ga'i hrIMHlas byung ba'i 'od kyis lus kyi nang thams cad gang /__gti mug gi mun pa bsal bar bsams la snang ba'i 'du shes kyis gnyid log__/ldang ba na 'khor gyi lha dang /__drang srong dang /__dri za'i bu mo'i tshogs kyi pi wang gi sgra dang bstod pa'i glus bskul nas sad par bsams la khrus byas te rnal 'byor la 'jug__/de lta bu'i rnal 'byor thun bzhi'i rim pas sngags yi ge gcig pa nyid 'bum phrag lnga kha skong dang bcas pa bzla ba ni grangs bsnyen las rung tsam yin la/__nges par mtshan ma mthong ba don du gnyer na 'bum phrag bco lnga bzlas pas/__dngos su lce bde blo gsal thos pa 'dzin pa dang /__rmi lam du bu mo gtsang ma gos dkar can gyis shel dang thod le kor gyi phreng ba gtod pa/__dkar gsum ster ba/__me tog dkar po'i tshal du rtse ba/__chu gtsang gi rgyun las 'thung ba sogs dge ba'i rtags ci rigs pa 'byung zhing /__rim gyis smra ba'i dbang phyug chen po'i gnas thob par 'gyur ro/__/de dag gi skabs su me 'bar ba'i sngon du du ba 'byung ba ltar/__yon tan skye ba'i snga ltas su bying rgod dang chags pa la sogs pa'i gegs kyi rim pa'ang ci rigs pa 'byung srid pas gegs sel gyi gdams pa dang /__yon tan skyes pa 'phel zhing brtan pa dang /__ma grub pa grub par bya ba'i slad du bogs 'don spogs chog gi rim pa ni rtsa ba'i yi ge las shes par byas la nyams su blang ngo /__/gsum pa rjes ni/__rtags mthong ba'am grangs rdzogs pa na 'og nas 'byung ba ltar sbyin sreg bsnyen sgrub thabs 'di la rtsa ba'i yi ge lan tshan gnyis snang ba'i snga ma ni ring brgyud thun mong pa dang /__phyi ma 'dir bshad pa nyid paN chen rang gi bzhed pa thun mong ma yin par snang la/__spyir gnyis ka gang nyams su blang na'ang rung ba nyid do/__/pa'i bcu cha sogs ci nus 'bul/__grub na rjes gnang gi skabs ltar mdun bskyed kyi maN+Dal bshams la sgrub mchod bzlas pa dang bcas pa ci 'grub byas la/__mthar 'khor lo sbrang rtsi dang ba dmar mo'i dkar gsum sbyar ba'i dri bzang gi chus khrus bgyis pa dngos grub kyi tshul du longs spyad/__gang ltar yang gza' skar sbyor byed shis pa'i nyi shar la mtshams grol nas/__rgyun du'ang lha mo'i dam tshig la gnas pas rnal 'byor la brtson par bya/__de la rgyun khyer gyi bdag bskyed ni skyabs 'gro nas bzlas pa'i bar gong ltar dang /__bzlas pa'i mjug tu mchod bstod 'dod don gsol/__yi ge brgya pa dang badz+ra sa twa'i sngags kyis lhag chad kha bskang /__bzod gsol/__gnas gsum srung ba bsngo smon shis brjod bcas bya'o//__//
gsum pa grub pa'i dga' ston spel ba'i slad du rdzas kyi sbyor ba sgrub pa'i tshul la gsum las/__dang po sbyor ba ni/__spyir 'di la rgya gzhung dang man ngag gi yi ge gzhan las sman mang nyung ci rigs 'byung na'ang 'dir bshad pa ni/__rab rgyal phur 'dzom pa'am/__de min res gza' phur bu dar ba'i nyin a ru ra gser mdog1/__ba ru 2ra/__skyu ru 3ra/__sgron shing 4/__go snyod kyi 'bras bu5/__dug mo nyung gi 'bras 6bu/__lug ru dkar 7dmar 8ser 9gsum/__spang rgyan dkar 10po rnams 'di'i steng du pi pi ling dang /__shing mngar gnyis bsnan na rgya gzhung las gsungs pa'i sman rnams kyang tshang ba yin no/__/cha mnyam par byas la/__zhib tu btags nas dar tshags la drangs pa tshil gyis bzhus pa ma yin pa'i ka ra dang /__/sbrang rtsi gtsang ma/__ba dmar mo'i 'o ma bcas sbyar la gong du bshad pa ltar dngos grub blang ba'i 'khor lo'i bdud rtsi dang sbyar na'ang shin tu legs par sems ril bu sran sbos tsam du dril nas grib skam bya/__/gnyis pa dngos gzhi ni/__sman sbyor rkyang pa bsten pas kyang phan yon ci rigs pa 'byung mod/__lha sngags kyi mthus byin gyis brlabs na rno la ngar gyis gdags pa ltar nus pa mchog dang ldan pa'i phyir sgrub pa'i sbyor ba brtsam par bya ste/__ril bu rnams rin po che'i snod du blugs la stegs bu'i dbus su bkod/__mchod gtor bsham/__mchod pa byin brlab bdag bskyed bzlas pa dang bcas pa bya/__de nas mdun rten a mr-i tas bsang /__swa b+hA bas sbyang /__stong pa'i ngang las b+h+rU~M las rin po che'i sa gzhi sogs nas/__dri ma med pa/__de'i steng du ril bu rnams hrIMHdkar po 'od zer 'bar ba dang bcas pa gyur/__de las 'od zer 'phros sogs nas/__pad+ma dkar dmar gyis dbur brgyan par gyur/__ces pa'i bar gyis yan lag bzhi rdzogs su bskyed/__mchod pa bsang sbyang byin brlab/__thal mo sbyar te/__'jig rten khams ni dpag med na/__/mchod yon ji snyed yod pa rnams/__/'phags ma 'khor dang bcas la 'bul/__/blo dang mchog gi dngos grub stsol/__/oM swa ra swa tI sa pa ri wa ra ar+g+haM pra tI ts+tsha swA hA/__de bzhin du sbyar bas rol mo'i bar du dbul/__bstod pa ci rigs pas bstod/__mdun bskyed kyi thugs ka'i sa bon las 'od zer phyogs bcur 'phros/__'phags pa mchod/__sems can thams cad kyi ma rig pa'i mun pa bsal/__shes rab kyi snang ba la bkod/__'jig rten dang 'jig rten las 'das pa'i dngos grub/__mkhyen brtse nus pa'i ye shes/__brtan g.yo'i dwangs bcud thams cad bsdus nas thugs ka'i sa bon la thim par bsams la hrIMHzhes ci nus dang /__thun mthar dbyangs gsal dang /__oM hrIMHma hA mA yang+ge ma hA swa ra swa t+yai na ma/__zhes dang /__oM bAg+dzA di ni bA tsarma ni yats+tsha swa ra swa tI ma hA shwe te swa hA/__zhes dang /__oM tsan+d+ra go mi sal sal phye phye hU~M hU~M swA hA/__zhes pa rnams kyang bzla/__sgrub thabs ltar gtor ma gsum phul/__lhag chad kha bskang /__bzod gsol/__gnas gsum srung ba bsngo smon shis brjod bcas bya/__thun phyi ma rnams la mdun bskyed sngar yod gsal gdab kyi tshul du bskyed la ji skad bshad pa bzhin nyams su blangs te/__de ltar rmi lam sogs rtags mtshan dge ba mthong ba'i bar du bsgrub/__thun tha mar gtor ma phul ba'i rjes su/__dbyangs can ma 'od du zhu ba yongs su gyur pa las sman gyi ril bu blo gros kyi mthu thogs pa med pa ster ba'i nus byin dang ldan par bsams la/__rten 'brel snying po mang du bzlas pa'i me tog gi char dbab la shis pa brjod/__gtor mgron rten med pa gshegs su gsol ba sogs skabs dang sbyar/__gnas gsum bsrung /__bsngo smon shis brjod bya'o//__//
gsum pa rjes ni/__de ltar bsgrubs pa'i ril bu nyid rin po che sogs snod gtsang mar rlung mi 'chor bar byas la bcang /__zla ba gang yang rung ba'i yar ngo'i tshes gcig gi tho rangs nas brtsams te lto stong gi dus su khrus byas la/__ril bu lag mthil du bzhag__/stong pa'i ngang las rang nyid ni/__/sgra dbyangs lha mo sku mdog dkar/___/zhal gcig phyag gnyis skyil krung can/__phyag g.yas mchog sbyin g.yon pa ni/__/bdud rtsis gang ba'i bum pa 'dzin/__/lha rdzas dar gyi na bza' dang /__/rin chen rgyan gyis rnam par brgyan/__/pad+ma zla ba'i gdan la bzhugs/__/ril bu srid dang zhi ba yi/__/dwangs bcud 'dus pa'i ngo bo nyid/__/zos pas rmongs pa'i mun pa bsal/__/ye shes snang ba rgyas par gyur/__ces brjod cing bsams la/__oM tsan+d+ra go mi sal sal phye phye hU~M hU~M swA hA/__zhes lan bdun bzlas la mid/__de ltar tshul bzhin du bsten pa'i phan yon ni/__/zhag bdun zos pas dig pa dang /__/lkugs pa glen pa dag kyang 'tsho/__/bcu gcig skad bzang mgrin pa bde/__/nyi shus mi brjed gzungs thob 'gyur/__/zla ba gcig tu zos gyur na/__/blo ni me dang 'dra bar 'gyur/__/rab tu bsten na tshe ring zhing /__/rgas pa'i skyon gyis gos pa med/__/ces so/__/gzhan yang 'jam dpal dpa' bo gcig grub las gsungs pa'i dbyangs can gyi sman mar tshul bzhin sbyar ba'ang rig pa 'di nyid kyi sgo nas sgrub na shin tu legs par 'gyur ro//__//
bzhi pa rang gzhan la phan pa sgrub pa'i las sna tshogs pa'i rim pa ni/__ring brgyud bram ze phur bu'i man ngag dang thun mong du gyur pa'i dug gzhil ba dang /__byis pa'i blo gros rgyas par spel ba dang /__dbang du bya ba dang /__rgol ba ngan pa tshar bcad pa ste las bzhi dang rjes su 'brel ba'i man ngag dang /__sbyin sreg gi cho ga rnams las/__snga ma rnams ni yig rnying gsal byed dang bcas pa las rtogs par bya zhing /__'dir bsnyen sgrub las sbyor mtha' dag la nye bar mkho ba'i sbyin sreg gi cho ga la gsum/__sbyor ba dang /__dngos gzhi dang /__rjes so/__/dang po ni/__dus bzang po la gang du bya ba'i sar/__gzhi bgegs la gtor ma btang /__thab kyi gzhir stegs bu khru do gru bzhir brtsigs pa'am/__de dang rgya mnyam pa'i gzhi la ba byung dang dri bzang gis byugs/__der tshangs zur gyi thig btab pa'i dbus nas mtho gang zlum por bskor ba'i phyir sor bzhi pa nyis rim du bskor ba ni thab dang kha khyer mu ran no/__/dbus su dbyangs can gyi 'khor lo 'og tu 'chad par 'gyur ba ltar dang /__kha khyer la pad 'dab bcu drug__/mu ran la rdo rje'i phreng ba byas pa'i phyi'i grwa bzhir zla phyed rdo rje dang bcas pa rdul tshon dkar pos dgang zhing /__dmar po'i bcad kyis phye/__thab kyi khar srog chags med pa'i lci bas zlum por brtsigs pa'i nang dri zhim po'i shing gru bzhi bsnol mas bkang ba'i dbus su/__me tshang ting lo dang bcas pa bya/__rang gi g.yas su ba byung gi maN+Dal gyi steng du/__bsreg rdzas tsan+dan dkar dmar sogs spos sna tshogs dang /__me tog dkar ser/__ting lo grangs ldan/__tsan+dan dkar po/__gla rtsi/__gur gum/__gi wang bzhi cha mnyam du sbyar ba'i bzhi mnyam gyi lde gu/__mngar gsum mar dang sbyar ba'i zas mchog gi ril bu grangs ldan/__bzhi mnyam dang mngar gsum gyis sbags pa'i ku sha__/nas gro 'bras sran ma til dkar nag sogs 'bru sna tshogs bsres pa dang /__ba dmar ser gyi mar khu dang /__shing thog sna tshogs rnams bzhag__/rang gi g.yon du sgrub thabs ltar gtor ma gsum/__me tog la sogs pa'i mchod pa/__nye logs ci bde bar changs bu'i gtor ma/__gzhan yang bsang chu dang me lha'i bsreg rdzas rnams kyang tshogs par bya'o/__/gnyis pa ni/__skyabs 'gro nas brtsams te/__bdag bskyed bzlas pa'i mthar thug pa sngon du 'gro bas/__bsang chu a mr-i ta brgya'am nyer gcig gis bsngags/__rdzas rnams la gtor te bsang sbyang /__stong pa'i ngang las rin po che las grub pa'i snod yangs shing rgya che ba rnams kyi nang du/__mchod rdzas dang bsreg rdzas lha mnyes pa dang so so'i las sgrub pa'i nus pa dang ldan par bsams la/__ar+g+haM nas shab+da'i bar dang /__oM AHhU~M gi byin gyis brlab/__de nas thab bsang sbyangs la/__/stong pa'i ngang las b+h+rU~M las byung ba'i thab khung gser btso ma ltar 'bar pa/__kha khyer mu ran dang bcas pa dwangs gsal thogs pa med pa'i nang lha rdzas kyi bud shing gis gang bar bsams nas/__dge 'dun gyi tshang mang ngam rgyal po'i pho brang gi mes/__oM ag+ni dz+wa la ra~M/__zhes brjod cing sbar/__der ra~M las drang srong me lha'i ngo bo me 'bar ba'i rnam pa can du gyur/__rang gi snying ga nas 'od zer 'phros pas me lha 'khor bcas oM badz+ra sa mA dzaHsa spyan drangs/__dbyu gu rtse gsum pa'i phyag rgya rna ba'i drung du g.yob cing /__dzaHhU~M ba~M hoH'bar ba'i rnam pa dang gnyis su med par gyur/__oM ag+na ye A dI bya A dI bya A bi sha A bi sha ha bya ka bya bah+nA ya swA hA/__zhes dang /__oM ag+na ye swA hA/__lan bdun gyis mar blugs/__gzar bdun gyis dgang gzar bkang la phul/__slar yang bsreg rdzas thams cad gcig tu bsres la/__oM ag+na ye swA hA/__zhes lan nyer gcig tsam phul/__de nas me bsang sbyang /__stong pa'i ngang las me 'bar ba'i dbus su/__bris pa'i 'khor lo nyid dbyangs can gyi 'khor lo pad+ma dkar po 'dab ma brgyad pa shin tu rgyas shing 'dab ma 'jam pa lte ba ljang ser ze'u 'bru dmar ser gyis yongs su bskor ba/__lte ba'i steng na zla ba nya gang ba dri ma med pa'i dbus su hriMHdkar po mgo gyen du bstan pa nA da dang bcas pa/__/pad 'dab rnams la mdun nas brtsams te g.yas skor du a A nas/__aM aHzhes pa'i dbyangs yig bcu drug mchog tu dkar ba rin po che'i sgron me ltar 'od gsal ba/__pad 'dab re la gnyis gnyis gnas pa ste/__pad+ma dang zla ba yig 'bru rnams kyi 'od zer dkar pos sa gsum gyi mun pa ma lus pa sel bar gyur/__rang gi snying ga'i sa bon las 'od zer dkar po zla ba shar ba lta bu sna bug g.yas nas phyir 'phros/__lho phyogs rgya mtsho'i 'gram rig pa 'dzin pa dga' ba'i tshal na lha mo dbyangs can ma bzhugs pa'i shangs bug g.yon nas zhugs/__thugs ka nas ngo bo ye shes sems dpa' la/__rnam pa dbyangs can gyi 'khor lo 'od zer 'bar ba dang bcas pa spyan drangs te skad cig gis mdun gyi nam mkhar byon par bsams la/__oM pr-i tI de bI dI bya puSh+pe hU~M/__de bzhin du sbyar te/__d+hU pe/__gan+d+he/__A lo ke/__bi le ba ni/__zhes pas mchod/__oM pr-i tI de bI me hrIMHSh+t-i tiSh+Tha hrIMH__mdun gyi 'khor lo dam tshig pa la gnyis su med par thim pas 'khor lo'i 'od las lha mo'i skur gyur pa ni/__sku mdog dkar mo sogs nas/__lang tsho can du gyur par sgrub thabs ltar brjod la gsal btab/__oM pr-i tI de bI hrIMHa A nas/__aM aHlan bdun brjod pas brtan par bya/__de nas bsreg rdzas 'bul ba ni/__oM pr-i tI de wI hrIMHdI bya d+hU pe hU~M me pradz+nyA war+d+ha mA nA ya oM/__zhes pas bdug spos dang /__oM pr-i tI de bI hrIMHdI bya puSh+pe hU~M me pradz+nyA war+d+ha mA nA ya oM/__zhes pas me tog dang /__de bzhin du sngags thog mtha' 'dra ba las/__dI pe/__zhes pas ting lo dang /__bi le pa ni/__zhes pas lde gu dang /__nai bi d+yes zas mchog dang /__ag+na yes mar khu dang /__a pra ti ha tas ku sha dang /__bI dzA yas 'bru sna tshogs/__shrI pha lA yas shing thog sna tshogs rnams 'bul/__grangs zas mchog la 'dzin cing thun re la stong rtsa sogs 'bul lo/__/mjug tu sgrub thabs ltar gtor ma gsum phul nas/__gshegs gsol gyi bar byas la/__oM pr-i tI di wI me hrIMHSh+t-i tiSh+Tha hrIMH__zhes bzlas pas dam tshig pa'i 'khor lo rang gi snying gar thim par bsam/__gsum pa ni/__slar yang me lha la mar khu dang bsreg rdzas lhag ma rnams ag+na'i sngags kyis phul/__ag+na ye gats+tsha/__zhes dbyu gu'i phyag rgya phyir bstan nas gshegs su gsol/__gnas gsum bsrung /__bsngo smon dang bkra shis bya'o/__/de ni rgyas pa'i tshul lo/__/de las mchod pa'i skabs rnams bor bas 'bring po'o/__/kha khyer mu ran stegs bu rnams mi 'bri ba dang /__bsreg rdzas rnams/__hrIMHme pradz+nyA war+d+ha mA nA ya oM/__zhes pa kho nas 'bul ba ni bsdus pa dang /__shin tu bsdus pa ni/__hrIMH__zhes pa kho nas bsreg rdzas rnams 'bul/__gzhan sngar ltar ro/__/tshul 'di ni bsnyen sgrub las sbyor mtha' dag la mkho che zhing /__sdig sgrib zhi ba dang /__sgrub pa'i bogs dngos su 'byin cing /__bar chad thams cad zhi ba dang /__tshogs rdzogs pa sogs lha dgyes pa'i thabs bla na med pa yin te/__sgrub skor tshigs bcad ma las/__/rang dang gzhan gyi don gyi phyir/__/sbyin sreg byas na lkugs pa yang /__/snyan dngags mkhan du 'gyur bar gsungs/__/zhes pa ltar ro//__//
'di'i bsnyen sgrub sogs kyi tshe dam tshig ni/__spyir rang gis ji tsam khas blangs pa'i dam tshig dang sdom pa dag par bya ba gzhir bzhag nas/__bye brag tu sdig pa spang /__tshangs par spyod/__rdzun mi smra/__sha chang sgog btsong sogs mi gtsang ba'i zas dang /__gdan dang sga sngas su 'jug pa/__l+h+wam dang gos rnying skrad rnying gi 'og tu nyal ba sogs mi gtsang ba'i spyod lam spang /__gos gtsang ma gyon zhing khrus dang gtsang sbra sogs la 'bad par bya'o/__/de ltar ji skad bshad pa'i bsnyen sgrub las kyi sbyor ba dang bcas pa la rtse gcig tu 'bad pas thos pa 'dzin pa dang /__'chad rtsod rtsom gsum gyi gnas la blo gros kyi mthu thogs pa med pa'i smra ba'i dbang phyug chen po'i gnas thob par 'gyur zhing /__mthar thug chos dang /__don dang /__nges tshig dang /__spobs pa so so yang dag pa'i rig pa bzhi la dbang 'byor ba thams cad mkhyen pa'i ye shes mngon du 'gyur ba nyid do/__/'jigs bral phyogs las rnam rgyal ba/__/mtsho byung dgyes pa'i lam gyi srol/__/shin tu gsal bar phye ba'i dges/__/'gro rnams kun mkhyen nyid gyur cig__/ces pa'ang rtsa ba'i gzhung gsal byed dang bcas pa'i dgongs don dang 'brel bar/__rang gzhan rnams 'jug pa bde ba'i slad 'phags ma 'di nyid kyi chos skor mang du thos shing mthong ba'i bya bral ba 'jam dbyangs mkhyen brtse'i dbang pos sbyar ba sarba dA shre yo b+ha ba tu//____//__!_
