JKW-KABUM-05-CA-002-011-wylie
shrI gu h+yas mA dza'i de nyid nyer bsdus las rdo rje'i tshig gi dum bu 'ga' zhig phyung ba/
dI paM kA ras mdzad pa'i shrI guh+ya sa mA dza maN+Dal bid+ha las/__nyes byas dus gsum byas pa rnams/__/rang gi log rtog tsam las byung /__/rmi lam rmi lam sogs bzhin du/__/lan gsum du ni 'chags par bgyid/__/ces dang /__ming gi yi ge dang bo ni/__/klad kor bcas par sngags rnams btu/__/zhes dang /__mgrin pa gos mchog gis dkris la/__/a mra sogs 'dab kyis kha dgab/__/dkyil 'khor ba yi bum pa ni/__/de yi sngags kyis lhag gnas bya/__/'bru sman rin chen lnga rnams dang /__/dri bzang chu dang 'khor lo'i tshogs/__/me tog phreng btags rdo rje ni/__/steng bzhag 'khor lo gtso rgyal la/__/mchod yon phul te yang dag mchod/__/me tog dkar po gzhug par bya/__/zhes dang /__de steng dgang gzar rgyar sor bzhi/__/zabs su sor gnyis nang rdo rje/__/sor bzhi'i mthar ni rdo rje ste/__/bar du pad+ma'i 'dab ma'i dbyibs/__/blugs gzar pad+ma'i dbyibs sor gnyis/__/zabs su sor gnyis nang rdo rje/__/zhes dang /__rtag tu bla ma la yang dbul/__/'di ni sangs rgyas kun dang mnyam/__/de byin sangs rgyas thams cad la/__/rtag tu byin pa nyid du 'gyur/__/zhes dang /__bla ma dam pa'i gzhung bzung ba/__/dad pa yis ni gsal bar byas/__/dad sogs nor ni bsten bya yin/__/bsten 'os skal ldan smad bya min/__/bdag las dman pa'am mtshungs don yod/__/sems can dam pas legs bshad ni/__/byis pa las kyang blang bya yin/__/zhes gsungs so/__/'di mar me mdzad bzang pos mdzad cing rin bzang gis 'gyur ba'o/____/_!_mdzes pa'i me tog ces bya ba rim pa 87gnyis nas/__pa'i de kho na nyid sgom pa zhal gyi lung gi 'grel 134bar/__pa bud+d+ha dz+nyA na nyid kyi dngos slob ma hA A tsaR+Ya bi ta pA das 'di ka ma la guh+ya dang lha dz+nyA na d+h+wa dza'i 'gyur/__mdzad par/__'jam dbyangs zhes pa ni 'jaXm zhing mnyen pa'i dbyaXngs kyis 'gro ba rnams tshim par byed pa ste/__sangs rgyas thams cad kyi shes rab chen po rnam par dag pa'i phyir ro/__/zhes dang /__de la a zhes pa ni dngos po thams cad kyi rang bzhin te/__ma skyes pa'i phyir chos thams cad kyi sgo'o/__/zhes gsungs pa la dpyad na/__thams cad 'byung ba'i sgo ste/__de yang zab gsal gnyis su med pa'i rang bzhin nam mkha'i dkyil 'khor lta bu brtags pa thams cad kyis ma skyes pa dang po nas lhun gyis grub pa nyid du shes par bya'o/__/zhes dang /__a la la ho/__de la a zhes pa ni ma skyes pa'i phyag rgya ste bdag dang gzhan dbugs 'byin par byed pa'o/__/zhes dang /__de yang dus dang po rkyen khyad par can las skyes pa'i mdog gis brgyan cing /__khyad par gyi gnyis su med pa 'byung ba de mi bslu zhing /__mtshan dang dpe byad du ldan par rang 'od kyi rig mas 'khyud pa yongs su dag pa la snang ba ni la dang po'o/__/gcig pa dang du ma'i rang bzhin dang bral ba thabs kyi cha'i bum pa na gnas pa'i bde ba chen po mi bslu ba ste nam mkha'i dkyil ltar rnam par dag pa gnyis su med pa'i gzugs thog ma nas zhi bar ldan pa ni la gnyis pa'o/__/de'ang thig le 'gags pa'i ngo bo gzhan yid dga' bar byed pa'i mtshan nyid kyis mi bslu ba rigs gcig la sogs pas gdul bya'i rgyud la snang bar 'gyur bas de'i rgyud yongs su dag par byed cing /__spyi dang so so'i las kyi mtha' med pa'i bar du gnas pa ni la gsum pa'o/__/de'ang rgyun mi chad cing mi 'gog par srid pa ji srid yod pa de srid bar du ro myang ba'i mtshan nyid brgyad dang ldan par bzhugs pa ni 'jig rten dang 'jig rten las 'das pa'i dgyes pa thams cad kyi phul du byung bas ho zhes bya'o/__/zhes dang /__mtshan nyid 'dzin pa'i phyir na chos te/__gzugs nas rnam pa thams cad mkhyen pa'i bar rnams so/__/zhes dang /__rang bzhin ni sems kyi rang bzhin te/__'od gsal ba ni de'i rang bzhin ma skyes pas snang bar byed pa'i phyir ro/__/ma skyes pa'i rang bzhin la rdzas su rtog pa ni 'gal ba'i phyir ro/__/gdod ma nas dag pa zhes pa ni/__de nyid gdod ma nas dag pa ste/__ye shes sgyu ma kho na ste/__de lta bu ni byed pa ma yin pas na de skad ces dper na nam mkha' bzhin no/__/zhes dang /__rdo rje 'chang zhes pa ni dang po'i mgon po ste mi shigs pa'i don dang ldan pa'i phyir ro/__/zhes dang /__zhal phyag la sogs pa dang ldan pa ni phyag rgya chen po'o/__/zhes dang /__stong pa nyid de'i ngo bo bstan pa/__/'od gsal ba zhes te dri ma dang rnam par bral bas 'jig rten gyi khams thams cad kyang de'i rang bzhin du gsal ba'i phyir ro/__/dri ma dang ji ltar bral zhe na/__gzod nas rnam par dag ces te/__bcos ma ma yin pas ni dang po nas te/__byed pas ni ma yin no/__/zhes dang /__bskyed pa'i rim pa ni snod bcud rags par 'khrul pa bzlog pa'i phyir ro/__/blos rnam par bzhag pa'i rnal 'byor pa ste dang po'o/__/de yang 'khor ba'i sa la sogs pa dang nam mkha' dang rtswa dang shing gel pa lha'i khang pa la sogs pa rten gyi dkyil 'khor gyis sbyong bar byed cing /__de na gnas pa'i sems can skye gnas bzhis bsdus pa thams cad rten rkyen gyi 'khor los sbyong bar byed do/__/gnyis pa rdzogs rim ni don la mi bslu ba'i de kho na nyid dang mi gnyis par bsgoms pas mal las ldog cing brtan pa rnyed do/__/sogs dang /__da ni gnyis su med pa'i ye shes las 'khor ba ji ltar 'byung ba bstan pa de 'dra'i zhes pa la sogs pa'o/__/de yang gnyis su med pa de lta bus dngos po kun la rnam par khyab ste gnas kyang de mi gsal ba'i rgyu ni/__thog med dus nas/__zhes te/__srid pa gang la dang po med pa de ni thog ma med pa'o/__/de'i dus na nam mkha' las sprin 'byung ba bzhin du rnam rtog chen po zhes te/__sems tsam rtogs pa dang 'brel pa lta bu'i tshul du byung ste/__zhes so/__/de yang chos thams cad sgyu ma dang /__smig rgyu dang /__brag ca dang /__mgal me'i 'khor lo dang /__'khrul pa dang /__rmi lam dang /__dri za'i grong khyer dang /__chu'i chu bur dang /__glog gi rnam pa dang /__sprul pa dang /__brgya byin gyi gzhu dang /__sprin gyi rnam pa ste/__dpe bcu gnyis kyis don du rtogs par 'gyur ro/__/zhes dang /__da ni de lta bu'i don la grub pa'i mtha' 'dzin pa'i 'phags pa dang 'phags pa ma yin pa rnams kyis 'khrul par bstan pa ste/__de 'dra'i zhes pa la sogs pa'o/__/de 'dra'i dngos po thams cad kyi mtha'i de bzhin nyid zab mo dang /__yang dag par bsal ba gnyis su med pa las thog ma dang tha ma med pa'i dus na so so skye bo'i grub pa'i mtha' 'dzin pa rnams kyis nga dang nga yir 'dzin pas yang dag pa'i tshad mas ma brtags par ni bdag tu bzung zhes te/__yid mi ches pa'i lung 1dang /__rjes su dpag par 2snang ba dang /__log par 3'dzin pa'i ting nge 'dzin gyis so/__/de yang dus las byung bya ba la sogs pa bzhi ni grangs can pas brtags pa'o/__/'dzin pa pos sprul pa la sogs pa brgyad ni bye brag pas brtags=__rnal 'byor la sogs pa bzhi ni ser skya pas brtags=__nang gnas la sogs pa lnga ni nam mkha'i gos can pas=__rnam shes la sogs pa gsum ni rig byed kyi mtha' gsang bar smra bas=__mthong ba la sogs pa lnga ni tsa raka pas=__shed las skyes pa dang shed bu ni rgyal po la sogs pas brtags pa'o/__/srog dang gsob la sogs pa ni gos dmar bas brtags pa ste/__mu stegs kyi lta ba pa rnams kyi gtso bo rnams kyis de ltar rnam pa gsum gyis rnam par rtog ces pa'o/__/rang gi sde pa las kyang nam mkha' ni thog par byed pa'i reg bya med pa'i snang ba'o/__/'gog pa gnyis ni so sor brtags pa'i skye ba 'gog par byed pa dang /__so sor brtags pa ma yin pa'i 'gog pa las med pas mi skye ba ste/__de gsum ni rgyu rkyen gyis shin tu 'dus ma byas pa ste/__de ni shin tu brtan byas zhes te gzhan gyis bskyod du med pa'i phyir ro/__/'dus byas kun zhes pa ni/__lhag mas bsdus pa'i phung po lnga ste/__de yang skad cig ma yin zhing gong gi bdag po thams cad med cing gzugs la sogs pa phra rab cha shas dang bral bar snang ba dang mun pa'i go skabs mi 'byed cing rdzas kyi skabs 'byed pa 'du zhing skye 'gag byed pa shes pa re re la dmigs pa las grub pa de yang blo'i rnam pa las logs shig grub pa yin par kha che bye brag tu smra bas rtog ces te/__yul kha che mu stegs bye brag pa ltar smra ba ste dge 'dun bzang po la sogs pas so/__/rang gi rig pa skyed byed pa/__/zhes pa ni mig la sogs pa'i rnam par shes pa skyed par byed pa/__/zhes so/__/de yang gang zhe na/__blta bya spyod yul rnam pa bzhi/__/zhes te/__gzugs la sogs pa ni rnam pa ste/__/de yang rdul phra rab gcig nas gcig tu 'byur ba la sogs pa snang bar rtog go/__/de dag las kyang 'dus ma byas gsum ni rtag pa tsam ste/__don gzhan du 'gyur ba med pas na/__mo gsham bu bzhin med pa dang /__/zhes te ming tsam can zhes pa'i tha tshig go/__/'du byed thams cad ni bem po dang mi rtag pa'i ngo bo'i brtags pa ma yin pas na dus gsum du rgyu ba ma yin pa dang /__dman min rdul phra rab ste grub pa'i gzhi yin pa'i phyir ro/__/de nyid thogs pa dang bral yang sems can gyi las kyis 'dus pa'i gzugs yin par nyan thos mdo sde pas rtog go/__/yang dag can yang don dam min/__/zhes pa ni mu stegs kyis brtags pa rnams so/__/rdul phran dag kyang de bzhin no/__/zhes pa ni nyan thos bye brag tu smra bas brtags pa'o/__/so sor snang ba'i gzugs phra rab so sor snang ba mi dmigs pa dang 'dus pa mi dmigs pa ste/__nyan thos mdo sde pas brtags pa'o/__/de thams cad rmi lam lta bur mi snang ba ste/__'o na gang snang zhe na/__gzung 'dzin spangs pa'i rnam shes che/__/zhes so/__/ji ltar snang zhe na/__don dam shel ltar dag pa ru/__/zhes te/__gnyis pos stong pa'i rnam par shes pa shel ltar dag pa lta bu don dam par rdzas nyid du sems pa nyid rnal 'byor spyod pas rab tu rtog go/__/zhes so/__/so sor snang ba'i gzhung thams cad/__/ces pa ni brda dang gzung 'dzin dang dngos po'i kun tu brtags pa'o/__/de dag kyang don dam pa min te/__ci'i phyir zhe na/__gcig dang du ma'i rang bzhin dang bral ba'i phyir dper na nam mkha'i chu skyes bzhin du gzhung de thams cad spangs pa ste/__gnyis med don dam pa'i bden pa'o/__/gnyis su med min zhes te kun rdzob kyi bden pa'o/__/de nyid spros pa med pas na zhi ba'o/__/de'ang mtha' gsum gyis ma rig pa'i rnam par shes pa kun rdzob sgyu ma lta bu'i mtshan nyid tsam du dag pa dang /__ma dag par snang ba don dam par na shin tu dri med nam mkha' ltar snang ba blo gros dang ldan pa dbu ma pas rtogs so/__/de dag gi rtog pa dang bcas pa'i gtso bo ste/__de dag la sogs pa mtha' yas pa zhes pas ni lta ba lnga brgya bdun cu pa rnams bsdu bar bya'o/__/de kun kyang gnyis su med pa'i don de kho na la gnas nas blo tha dad par so sor brtag pa'o/_/de ltar brtags kyang de thams cad yang dag par brtags pa min par bla na med pa'i sangs rgyas ma thob pas bla dang bcas/__zhes so/__/ci'i phyir zhe na/__'og ma 'og ma'i rnal 'byor blo las gong ma gong mas khyad par du 'phags so/__/de mu stegs pa las bye brag tu smra bas te mi rtag pa'o/__/de las mdo sde pa ste rtag pa'o/__/de las rnal 'byor spyod pa ste sems tsam gyis so/__/de las rnal 'byor spyod pa'i dbu ma pa ste kun rdzob tsam nyid kyis so/__/de las bla na med pa'i gzhung pa ste ye shes kho nas so/__/de bas na/__'og ma'i blo ni gong ma yi/__/shes rab kyis ni sun 'byin no/__/zhes pa yang de kho nas bsal lo/__/zhes dang /__'di yi don shes pa ni ma 'ongs pa'i dus na rdo rje 'dzin pa ni bla ma ste rdo rje 'dzin pa de'i lus la gnas pa'i phyir ro/__/de rjes su mthun pa'i yon gyis mnyes par byas te shes par bya'o/__/zhes so/__/de'i yang sngon du song ba'i rgyu ni rang gi tshe rabs sngon du bsod nams chen po bsags pa'i stobs kyis phyi rol gyi yi ge la sogs pa la brten pa med par slob ma'i rgyud du rnam par 'pho'o/__/zhes so/__/gnyis su med pa'i rnam pa la dang po'i las la sogs pa'i mtha' gnyis dgag par gsungs pa/__de la zhes pa la sogs pa'o/__/dkyil 'khor ni ri mo'i dkyil 'khor ro/__/sbyin sreg ni thab la sogs pa dang ldan pa'o/__/gtor ma ni 'byung po la sogs pa'i'o/__/bzlas pa ni phreng ba'i sngags la sogs pa bzlas pa'o/__/bgrang phreng ni las kyi bye brag gi grangs dang kha dog la sogs pa'o/__/skyil mo krung ni rdo rje'i skyil mo krung la sogs pa'o/__/stangs stabs ni g.yas brkyang pa la sogs pa so so'i tshul spyod pa'i khyad par ro/__/sogs kyis bsdus pa tshogs kyi 'khor lo dang /__phyi'i mchod pa la sogs pa'o/__/de rnams la zhes pa ni spros bral rnam par bslu ba ste spros par snang ba'i phyir ro/__/de'i bya ba ma yin zhes te gcig tu spyod pa'i tshul gyis so/__/dgag pa ma yin zhes te/__de la gnas pa bsod nams kyi tshogs rdzogs par bya ba'i phyir mi dgag ste/__lhag pa'i lha ni mtshan ma med pa'i lha ste/__de las thams cad 'byung ba'i phyir na sprul phyir ro/__/zhes so/__/yang rtsa bar/__da ni gnyis med ye shes nyid/__/kun rdzob gzugs la brten nas kyang /__/mi g.yo la sogs g.yo dang bcas/__/tshangs sogs lha dang lha min sogs/__/thams cad rab tu mi snang yang /__/thig le 'gog par mi 'gyur te/__/rgyu dang mi rgyur bcas pa kun/__/slar yang de las 'byung bar byed/__/de las skye bo rnams kyis ni/__/yang dag ma rtogs pa yi phyir/__/tshangs pa'i sgo nga las skyes par/__/'khrul bas chos rnams kyis mi bsgul/__/gang gis kyang ni mi shigs pa/__/ji srid 'di ni lus gnas pas/__/las dang las ni rab byed pa/__/brtan po 'jig pa rab spangs pa'i/__/mi shigs thig le bsgom par bshad/__/ces pa'i 'grel par/__gnyis med ye shes zhes pa ni/__zab mo dang gsal ba gnyis su med pa'i ye shes nam mkha' ltar dag pa gang yin pa'o/__/de kun rdzob kyi gzugs su ji ltar gnas she na/__thig le kha dog lnga pa tsa na ka'i 'bru tsam du rnam par gnas te/__de la brten nas zhes pa ni de la rlung la sogs pa'i dkyil 'khor byung nas mi g.yo ba la sogs pa zhes pa ni snod kyi 'jig rten lcags ri dang /__lha'i khang pa la sogs ba yang /__de las 'byung bar byed ces par sbyar ro/__/de bzhin du g.yo ba dang bcas zhes te/__bcud kyi sems can tshangs pa la sogs pa'i lha dang lha min dang sogs kyi sgras bsdus pa mi dang byol song dang yi dwags dang dmyal ba la sogs pa'i yang de las 'byung bar byed ces sbyar ro/__/gang gi dus su 'byung bar byed ce na/__thams cad rab tu mi snang yang /__/zhes te/__las su smra ba'i gzhung gis gnas pa'i bskal pa zad nas me la sogs pa nyi shu'i bar du rnam par gzhig ste stong par 'gyur ba'i dus su yang /__/thig le 'gog par mi 'gyur te/__/zhes pa ni ye shes rdo rje'i rang bzhin yin pas na me la sogs pa gang gis kyang gzhig tu med pa'i phyir de kho nar snang ba'o/__/de nas chags par 'gyur ba'i dus su gong ma ltar/__rgyu dang mi rgyur bcas pa kun/__/slar yang de las 'byung bar byed/__/ces pa'o/__/de la phyi rol pa rnams kyis 'khrul par gsungs pa/__de las zhes pa la sogs pa'o/__/skye bo rnams zhes pa ni kha na ma tho ba las ring du song ba'i chos ma thob pa grub pa'i mtha' 'dzin pa'o/__/des yang dag pa'i don ma rtogs pa'i phyir mi shigs pa'i thig ler ma shes te tshangs pa'i sgo nga zhes 'khrul te/__sems can gyi las kyis tshangs pa mi snang yang de'i sgo nga lus pas de las thams cad skyes pa'o zhes 'dogs shing tshangs pa la mes po zhes smra ste/__rang gis kyang de bzhin du 'khrul te de kho na yin no snyam du rloms so/__/de bas na de las stong pa nyid du khas blangs pa'i skye bo rnams kyis dus las byung ba sogs la sgro 'dogs shing de'i lam la 'jug par byed do/__de ltar na yang de'i rang bzhin ni chos kun gyis mi bskul te/__me la sogs pa'i 'byung ba gang gis kyang mi shigs pa ste/__mi shigs pa'i thig le ste/__ji srid 'di ni lus gnas pas/__/zhes pas ni bcud kyi sems can rnams kyi snying gi pad+ma kha sbyar gyi dbus na thig le'i rnam par gnas pa'o/__/ji srid rang bzhin dag pa'i man ngag thob nas de'i don la mi 'dzin pa de srid du/__las dang las min rab byed pas/__/zhes te/__srog gcod pa spangs ba la sogs pa'i las dang /__srog gcod pa la sogs pa ma yin pa'i las rab tu byed de/__ci'i phyir zhe na/__de'i rang bzhin ma shes pas las su smra ba ste/__des mtho ris dang dmyal ba la sogs par 'gro bar 'gyur ro/__/de'i rang bzhin yongs su shes pa'i las kyis 'khor bar 'khor ba mi nus te/__las de nyid der thim pa'i phyir ro/__/de bas na brtan po zhes te/__ci'i phyir zhe na/__'jig pa rnams spangs pa/__zhes pa ni/__mi rtag pa la sogs pa'i bskal pa rnam par spangs pa'o/__/de'i phyir de lta bu'i mi shigs pa'i thig le bsgom par bshad pa khas 'ches so/__/zhes dang /__dbugs kyi rta zhon kun rtog rnams/__/zhes te rlung dang lhan cig tu byung ba'i kun tu rtog pa glo bur ba ni gzung ba dang 'dzin pa'i rtog pa ste/__de las byung ba dang bcas pa'o/__/zhes dang /__rtsa bar/__'di ni yang dag goms byas pas/__/mi gnas mya ngan 'das pa che/__/thabs kun gyis ni bsgrub bya mchog__/rdo rje 'chang ba chen po thob/__/'di ni lhan cig skyes pa yi/__/ye shes 'ba' zhig dbang byas nas/__/rim pa gnyis pa sgom pa'i thabs/__/mi shigs thig le bsgom pa'o/__/zhes gsungs so/__/yang /__de bzhin nyid dang yang dag mtha'/__/byang chub sems zhal lung las/__gzugs bcu drug go/__/mthe bo'i rtsa bar yi ge a/__/rje ngar la ni yi ge de bzhin A/__/brla gnyis la ni i yi gzugs/__/gsang ba la ni I yi gzugs/__/lte ba'i rtsa ru u gzugs nas/__/de bzhin gsus par U yi gzugs/__/nu ma gnyis su r-i gzugs nas/__de bzhin lag par r-I gzugs nas/__/mgrin pa la ni l-i yi gzugs/__/de bzhin ma mchur l-I yi gzugs/__/'gram pa gnyis su e gzugs so/__/de gnyis mig gnyis yang ni ai/__/rna ba'i rtsa bar o yi gzugs/__/spyi bor oM gzugs yang dag gnas/__/aM aH'i gzugs su tshigs kun la/__/bcu drug dus su rdzogs par 'gyur/__/zhes dang /__dpal 43he ru ka'i sgrub thabs kyi 'grel par/__he ru ka la yang nges tshig gi tshul gyis ni he zhes bya ba'i tshul gyis na rgyu yin la/__de dang bral ba rnam par thar pa mtshan ma med pa'i sgo'o/__/ru ni ru ti ra ste smon pa med pa'o/__/ka ni ka ra ste byed pa dang bral bas stong pa nyid do/__/de ltar rnam par thar pa'i sgo gsum gang la yod pa de la de skad ces bya ste/__rdo rje khro bo chen po zhes bya ba'i don to/__/zhes gsungs/__yang /__gnas dgu ni/__zhi gnas dur khrod shing gcig dang /__/lam mdo brag phug chu 'gram dang /__/ri rtse khang stong ma mo'i gnas/__/'di ni dur khrod gnas dgu yin/__/zhes spyod pa byed pa'i gnas su gsungs so/__/grol thig las/__'byung ba hU~M gi ngo bo yis/__/sangs rgyas la sogs spro bar byed/__/de yi dus su gnas pa yi/__/chos kun 'grub par byed pa'o/__/'jug pa oM gyi ngo bo yis/__/sangs rgyas la sogs sdud par byed/__/de yi dus su g.yo ba yi/__/chos kun 'grub par byed pa'o/__/gnas pa AHyi ngo bo yis/__/sangs rgyas la sogs bzung ba yis/__/de bzhin g.yo gnas chos rnams kun/__/gnyis med ye shes 'jug pa'o/__/zhes snang /__yang /__phyag rgya bzhi 'brel re re nas/__/nyis brgya nyi shu rtsa lnga ste/__/de bzhis bsgres pas dgu brgya'o/__/de ni 'pho ba nyi shu bzhis/__/brtsis pas khri phrag gnyis dang ni/__/chig stong dang ni drug brgya'o/__/zhes so/__/bdag sgrub pa la 'jug par/__'gro ba gang zhig rmongs pa'i rgyu yis gnas ma yin la skrag 'gyur ba/__/yun ring dus su bsod nams phung po chen po min pa 'byung 'gyur rgyus/__/rigs med bshes med blo ma sbyangs shing snga mar dge ba ma bskyed pas/__/chos 'di dag la skrag par 'gyur ba don chen 'di las nyams par 'gyur/__/zhes bshad/__de yang 'jam dpal zhal lung ni/__thog mar bud+d+ha dz+nyA na rang gis gdams pa btsal nas mthar 'jam dpal dbyangs mjal ba'i bar dang /__de la gsol ba btab tshul bcas kyi skabs dbye nas/__dngos gzhi la/__nyan par gdams nas thog mar gnyis su med pa'i ye shes bstan pa ni/__chos rnams sogs so/__/gnyis su med pa'i ye shes las 'khor ba ji ltar 'byung ba'i tshul bstan pa ni/__de 'dra'i don des dngos po kun/__/sogs nas/__de yi ngo bo rtogs par bya/__/bar ro/__/de rtogs par byed pa'i lam la 'jug pa'i skyes bu gsungs pa/__gang zhig de rtogs rab 'dun pa/__/sogs so/__/rjes mthun gtong phod des shes 'gyur/__/zhes so/__/des mnyes par bya ba'i bla ma ji lta bu yin zhe na/__de yis rje btsun yang dag pa/__/sogs nas/__de 'dra'i bla ma mnyes par bya/__/bar ro/__/ji ltar mnyes par byed tshul ni/__yul dang mkhar dang khyim dang rta/__/sogs nas/__de 'dra'i rje btsun dbang po mchod/__/ces pa'i bar ro/__/khyad par mnyes par byed pa bla ma gnyis kyi mtshan nyid gsungs pa/__gsal zhing rab dag sogs dang /__lhag par phyag rgya'i mtshan nyid bstan pa dngos ni/__sgyu ma de yang 'jig rten 'dir/__/sogs nas/__lhag pa'i lha zhes bya ba bsgrub/__/ces pa'i bar ro/__/de dang ldan pa la gsang dbang bskur tshul bstan pa ni/__de yang thun mong dang bcas pa/__/sogs nas/__bcu gnyis don du rtogs par 'gyur/__/bar ro/__/de nas zhing dag par byas pa'i slob ma la chos sku rtogs par bya ba'i phyir sher dbang bskur bar gsungs pa/__de las de la rang byung gi__/sogs nas/__lha mo de la 'khyud par bya/__/bar ro/__/de nas bla mas de la de kho na nyid bzhi pa bstan pa ni/__rdo rje pad+mar reg pa ni/__/sogs nas/__sgrub pa chen po de nyid do/__/zhes so/__/de nas bla ma de'i ngo bo bshad pas sbyin par gsungs pa/__nam mkha'i khams dang rdo rje sbyor/__/sogs nas/__blangs nas btung bya'o/__/bar ro/__/da ni de lta bu'i don la grub pa'i mtha' 'dzin pa'i 'phags pa dang 'phags pa ma yin pa rnams kyis 'khrul par bstan pa ni/__de 'dra'i dngos po thams cad kyis/__/sogs nas/__gso byed skyes bu dam pa'o/__/zhes pa'i bar/__da ni bdag nyid chen po rnams kyis de rig par byas nas goms par bya ba gsungs pa/__de bas lus ngag yid gsum gyi/__/sogs nas/__phyi rol lus ni sdom byed do/__/zhes pas bskyed pa'i rim pas gzhi rnam par bkod nas/__rdzogs pa'i rim pa de sbyong ba'i thabs gsungs pa/__sangs rgyas rnams kyi spyod yul mchog__/ces sogs nas/__cho ga 'di ni dang por bshad/__/ces pa'i bar gyis dga' ba'i ye shes kyi rang bzhin mi shigs pa'i thig le bsgom pa dang /__dga' ba bar ma'i ye shes kyi rang bzhin gsang ba'i thig le bsgom pa'i cho ga gsungs pa/__de la bsgrubs pas byin brlabs pas/__/sogs nas/__rjes su dran pa'i yan lag go__/zhes pa'i bar du dbugs dgag pa/__gtong ba/__gzung ba/__rjes dran gyi yan lag gsum pa bstan/__de nas dga' bral gyi ye shes kyi rang bzhin dbang gi mthar thugs rje rgyas pa'i yan lag tu gnas pas sprul pa'i thig le bsgom par gsungs pa/__de ltar yan lag gsum gyis ni/__/zhes sogs nas/__cho ga 'di la rab tu 'bad/__/bar ro/__/de dag gi don bsdu ba/__de ltar dga' gsum bye brag gis/__/sogs nas/__cho ga yan lag bstan pa'o/__/zhes so/__/de ni lhan cig skyes pa'i dga' ba'i rang bzhin mi shigs pa'i thig le de kho na nyid bsgom pa'i chos gsungs pa/__da ni gnyis med ye shes nyid/__/sogs nas/__sgrub pa'i bdag nyid can du 'gyur/__/bar ro/__/da ni gnyis med kyi ye shes de ltar goms par byas pa de mngon du bya ba'i thabs gsungs pa/__bdag nyid can des sgrub pa'i mchog__/sogs nas/__zla drug sogs par rab tu 'bad/__/bar ro/__/des mngon du byas pa'i 'bras bu'i mtshan nyid ni/__de yis rje btsun yid med pa/__/sogs nas/__blo ldan rnams kyis rtogs par bya/__/zhes pa'i bar gyis ngo bo mtshan nyid dang bcas pa rgya cher bstan to/__/de'i nye bar len pa'i rgyu sa bcu dang ldan pa lha mos gsungs pa'i tshul/__sa bcu dang ni rab ldan pa'i/__/sogs nas/__gang du gsungs pa rab thos te/__/bar ro/__/da ni de la 'jug par mi nus pa rnams la gzhan du bstan par gsungs pa/__de bas de 'dra'i don chen la/__/sogs nas/__bcu gsum sa zhes bya bar bshad/__/bar ro/__/da ni rim pa gnyis pa'i de kho na la gnas pa la bsngags pa gsungs pa/__de ltar rim pa gnyis pa yis/__/sogs nas/__'pho bar the tshom mi bya'o/__/zhes pa'i bar ro/__/de ltar phyogs chos la mya ngan las 'das pa'i rim pa bstan nas/__da ni bar ma dor mya ngan las 'da' ba'i rim pa gsungs pa/__da ni rang nyid byin rlabs sogs nas/__dngos grub de ni bsgom par bshad/__/ces pa'i bar gyis 'chi bar skye gnas gsum gyis sku gsum 'grub pa'i lam 'khor bcas bstan nas/__da ni don gyi mjug bsdu ba'i phyir/__gang zhig 'di ni ma rtogs par/__/sogs nas/__a la la ho/__zhes pa'i bar gyis gsang bar gdams pa sogs bstan/__de nas blos sprul pa'i dkyil 'khor bsdu ba gsungs pa/__de ltar rol pa'i sogs nas/__mi snang gyur/__/bar/__de ltar rang gis shes nas skal ldan gyi don ji ltar byas pa'i lo rgyus gsungs pa/__rdo rje gdan gyi rgyab nas sogs nas/__skal ldan 'gas don byas/__/bar ro/__/da ni de lta bus dad par byas te/__gnyis su med pa'i ye shes bsgom pa 'bras bu dang bcas pa gsungs pa/__de bas de ltar sogs nas/__'dod pas yang dag longs/__/bar ro/__/snod du rung ba'i sems can mang ba ma yin pa la gsang ba bla ma'i zhal nas rnyed par bya ba gsungs pa/__'di ni rnal 'byor spyod pas sogs nas/__yang dag zhal rnyed byas/__/bar ro/__/de las gzhan gyi som nyi bzlog pa'i phyir/__de bas rnal 'byor sogs nas/__the tshom ma byed cig__/bar ro/__/rgyu gnyis dang mi ldan pa rnams don khyad par can dang bral bar gsungs pa/__'di ni rang bzhin grub pa'i sogs nas/__zhes bya de la bya'o/__/bar/__da ni de kho na la blo brtan por bya bar gsungs pa/__de ltar rab tu shes par byas nas su/__/sogs nas/__ci phyir de mi sgom/__/zhes pa'i bar ro/__/da ni lam de nyid zhi lhag zung 'brel gyi rnal 'byor gyis bsgom par gsungs pa/__dad dang brtson 'grus sogs nas/__bya ba kho na'o/__/bar/__da ni 'di byas pa las byung ba'i dge rtsa bsngo ba gsungs pa/__de ltar zhal gyi lung bsdus pa las/__sogs nas/__srid las sgrol bar shog__/ces pa'i bar ro/__/de yang thog mar mchod par brjod pa ni/__dpal ldan bde rdzogs zab gsal gnyis med 'od zer ldan/__/sogs nas/__de la bya byed gsum mnyam pa yis rtag tu 'dud/__/ces pa'i bar gyis/__de nas brjod 'brel dgos pa nying dgos kyis brtsam par dam bca' ba ni/__chos rnams kun gyi snying po dngos po'i de bzhin nyid/__/sogs nas/__'jam dbyangs bla ma'i lung gis rtogs phyir bshad par bya/__/bar ro/__/da ni 'gro ba rnams dad par bya ba'i phyir rje btsun nyid kyis mnyes pa'i lo rgyus gsungs pa/__dbus kyi yul chen kha bir grong khyer rdo 'jog tu/__/sogs nas/__sngar ltar ro/__/yul dbus nA len+d+ra/__de las yul phran kha bir gyi bye brag grong khyer rdo 'jog tu/____/_!_dngos por 'dzin pa bzlog pa'i rnal 'byor pas srung ba'i 'khor lo la sogs pas phyi rol gyi yul sbyangs te/__de la gnas pa'i sems can ni skye gnas bzhis bsdus pa ste/__ting nge 'dzin lhag mas go rim bzhin du drod gsher las skyes pa dang /__brdzus te skyes pa dang /__mngal nas skyes pa dang /__sgo nga las skyes pa sbyong ba ste/__'di ni 'og nas 'chad do/__/gsham du/__blugs dang gtor dang dag pa byas pas slob dpon cher 'gyur te/__/thams cad kun gyi rjes 'dzin gzhan rnams rgyud kun la sbyor ba'i/__/dang po'i rim pa rab rtogs dri ma rnams ni dag byas te/__/ye shes sgyu ma'i snod du rung bar rnal 'byor de 'gyur shog__1_/snying rje ldan pa'i bla ma'i zhabs la gus pa rab ldan pas/__/ri bong 'dzin pa'i gzugs kyis rang rgyud rab tu smin byas te/__/zhing dag byas pas chos kun sgyu sogs don du rab rtogs nas/__/byams pa la sogs bzhin du sems can kun gyis 'gro bar shog__2_/lhan cig byed pas byin rlabs rje btsun thugs rje chen po yis/__/dga' ba rnyed pas chos kun dag pa'i ngo bo chen po mchog__/ji bzhin gnas pa'i don la mi bslu bcu drug thig le'i cha/__/ngal gso las thob man ngag chen po rab tu rnyed par shog__3__/de rnyed de la sems ni yang dag rab tu mgu gyur nas/__/mgrin pa dma' bas brtags nas rang rig chos kyi sku ni yang dag thob/__/sku dang gsung dang thugs dang dpag med sprul pa'i gzugs kyis ni/__/khams gsum bkang nas sems can thams cad srid las grol bar shog__/ces dbang bzhi'i lam dang sbyar te TI kar yang gsal bar bshad do/____/_!_mi 'phrog pa'i mkhyen rab dang thugs rje ldan pa dpal mgon nA gA rdzu na'i zhabs sen gyi pad+mo spyi bo'i nor bus reg pa'i bsti stangs kyis phyag 'tshal zhing skyabs su mchi'o/__/rgyud byin gyis brlab tu gsol/__/bla na med pa'i rgyud thams cad kyi snying por gyur pa shrI gu h+ya sa mA dza'i sbas don gyi bdud rtsi'i chu gter so sor rtog pa'i ye shes kyi man+dA ras bsrubs pa las skyes pa'i nang gi de kho na nyid nye bar bsdus pa zla shel gsar pa'i dogs pa lta bu zhig shar bar gyur te smos ma thag pa'i mthu las so/__/de'i phyir na shin tu dman pa'i sar gnas pa'i blo gros kyi ku mu dA yang gus pa dang bcas pas cung zad cig dgod pa'i tshe na rdo rje'i tshig gi dum bu 'ga' zhig bsdus te bung ba gzhon nu'i mgrin pa'i rgyud mang bzhin len par bya'o zhes dam bcas pa ste skal ba bzang por 'dod pa rnams kyis rna ba lhogs shig__/ces gdams so/__/de yang sgrub pa'i thabs mdor byas pa las/__/rnam rtog bag chags nyes pa yis/__/'gro ba gsum po rnam rmongs la/__/blo dang ldan pas legs bltas te/__/rnal 'byor rgyud kyis sbyang bar bya/____/_!_zhes dang /__dgon pa chen po'i sa phyogs ni/__/me tog 'bras bu sogs kyis brgyan/__/ri bo dben pa dag tu ni/__/dngos grub thams cad bsdus pa bsgrub/__/'jam pa'i stan la 'dug nas ni/__/sems dpa'i skyil krung legs gnas nas/__/zhe sdang rdo rje'i ting 'dzin gnas/__/gnas srung ba ni bsam par bya/__/zhes dang /__rnam par snang mdzad ngo bo ni/__/kha dog dkar po yi ge oM/__/gzugs phung ngo bo nyid kyis ni/__/sngags shes pas ni spyi bor dgod/__/AHni mgon po 'od dpag med/__/'du shes phung po'i ngo bo nyid/__/mdog dmar kha la bsams nas ni/__/ngag gi dbang phyug nyid 'thob 'gyur/__/mi bskyod pa yi yi ge hU~M/__/rab tu bzang po mthis shun mdog__/rnam shes phung po'i ngo bo nyid/__/sngags pas snying gar rnam par dgod/__/rin chen mgon po'i yi ge swA/__/tshor ba'i phung po'i ngo bo nyid/__/tshor ba dag gi rgyu rkyen ni/__/kha dog ser po lte bar dgod/__/rkang pa gnyis la yi ge hA/__/'du byed phung po'i ngo bo nyid/__/las kyi mgon po de nyid ni/__/sngags pas kha dog ljang gur dgod/__/ces dang /__de ltar bdag nyid byin gyis brlab/__/zla ba'i dkyil 'khor dbus gnas pa'i/__/mtshan ma drug dang yang dag ldan/__/dam tshig sems dpa' bsgom par bya/__/snying ga'i dbus su phra mo yi/__/ye shes sems dpa' rnam par bsgom/__/ting 'dzin sems dpa' zhes bya ba'i/__/yi ge hU~M ni de ru dgod/__/ces dang /__hU~M gis legs par sbyangs byas la/__/yi ge AHyis rtogs byas te/__/oM gyis mnan nas sbar bar bya/__/'di ni kha zas sbyang bya ba'o/__/zhes so/____/_!_yang des mdzad pa'i bskyed rim mdo bsrer/_/shin tu stong pa zab cing phra bas na/__/rtog ge'i yul min 'khrul pas shes mi nus/_/zhes so/___/_!_dbang bzhi'i rab tu byed par/__dngos kun rnam dag 'od gsal rang bzhin bde ba chen po'i sku/__/'gro ba 'di kun thugs rjes khyab mdzad cir yang snang ba'i sku/__/ma lus yul du gyur pa khams gsum ro mnyam gnyis su med/__/zung 'jug gzod nas dbyer med rdo rje 'chang ba de la 'dud/__/ces dang /__gzugs brnyan lus dang byang chub sems/__/mtshan ma dbyibs dang sbas pa yum/__/zhal gyi bum pas dbang bskur te/__/phyi yi bzhi pa grangs kyi gzhi/__/sbas pa'i bzhi pa dag 'phral gzhi/__/bde chen bzhi pa 'bras bu'i gzhi/__/zhes dang /__nga ni ye nas rdo rje 'chang /__/gnas skabs glo bur gyis bsgribs shing /__/rang gi mtshan nyid ngo ma shes/__/dam pa'i drin gyis de mthong nas/__/rang gi lus la de nyid gnas/__/chu khams gser dang nam mkha' 'dra/__/de ltar mos ldan blo bzang la/__/spro ba bskyed pa bum pa'i zhal/__/dang po lus 'di grub pa ni/__/cho ga gsum dang byang chub lnga'o/__/pha ma'i sa bon bar do'i sems/__/las kyi rlung la zhon nas ni/__/ma rig pa yis len par byed/__/chags dang phrag dog dbang gis zhugs/__/mer mer ltar ltar yi ge lnga/__/gor gor mkhrang gyur mtshan ma lnga/__/yan lag rdzogs pa rigs lnga'i sku/__/sngon du shi ba chos sku ste/__/bar do longs spyod rdzogs pa'o/__/sa bon gsum 'dres zla ba yin/__/gnas skabs gnyis ni yi ge ste/__/gnas skabs gnyis ni mtshan ma yin/__/gcig ni sprul pa'i sku rdzogs pa'o/__/zhes sogs rgyas par gsungs/__/rang sems gdod nas ma skyes pa/__/stong pa nyid kyi rang bzhin no/__/dbugs gtong rdubs pa ma yin te/__/spyan phye btsums pa ma yin no/__/dgye ba ma yin sgu ba min/__/gsung ba ma yin mi gsung min/__/phyir ni lus la mi spyod cing /__/nang du sems la mi rtog go__/sems gang gis ni byis pa rnams/__/'khor ba'i 'ching bas bcing bar 'gyur/__/sems gang gis ni rnal 'byor pa/__/bde gshegs gnas su skye bar 'gyur/__/bya ba thams cad blos btang la/__/gang ltar gnas pa'i don la bzhag__/ma bcos pa nyid ma nor ba/__/bde ba chen po rang so nyid/__/don du snang ba rang bzhin med/__/dngos por gsal ba rtog pa med/__/chu dang rnyog ma de bzhin no/__/byings shing lci ba gzengs bstod cing /__/'thor zhing 'phyar ba rang sor bzhag__/cung zad cung zad goms byas pas/__/gong nas gong du khyad par 'gro/__/mthar ni mi rtog ting 'dzin dag__/lhun gyis grub pa 'thob par 'gyur/__/bla ma nyid kyang mnyam bzhag la/__/slob ma byin gyis brlab par bya/__/thun gyi nges pa yod min te/__/ji tsam gnas kyi bar du bzhag__/'dod pa'i longs spyod kun bsten cing /__/lus kyi 'byung ba ro yang mnyam/__/bzhi pa'i dbang bskur cho ga'o/__/e wa~M mA yA'i yi ge bzhis/__/don bzhi dang ni sbyar bar bya/__/rgyud rnams kun gyi don bsdus pa'o/__/e ni 'jug pa wa~M ni gnas/__/mA ni srung ba yA ni grogs/__/e ni las dang wa~M ni chos/__/mA ni mu dra yA dam tshig__/e ni snang ba stong pa ste/__/wa~M ni mched pa shin tu stong /__/ma ni nyer thob chen po stong /__/yA ni ro mnyam thams cad stong /__/e ni ma thob thob bar byed/__/wa~M ni thob pa brtan par byed/__/mA ni gong nas gong du 'gro/__/yA ni tshe 'dir rdzogs sangs rgyas/__/zhes sogs mang po dang /__/rten can las la brten pa ste/__/las ni lus ngag yid kyi las/__/de la rgyas 'debs phyag rgya yin/__/dga' bral la ni bzhi par brjod/__/sems la dmigs pa ji bzhin du/__/sgom pa sems la dmigs pa ste/__/rten can zhes ni brjod pa yin/__/rten med rang lus thabs ldan nam/__/'khor lo bzhi dang 'khor lo gnyis/__/rdo rje sems dpa'i dbab thabs sam/__/rnam par shes pa thod sbyor ram/__/yi ge hU~M gi dbab thabs sam/__/gtum po'am mkha' 'gro'i byin rlabs sam/__/bla ma dus thabs bsten pas so/__/nyams su myong ba bzhi pa ste/__/rnam shes rlung dang ro gcig pa'o/__/ngo bo nyid ni rdo rje 'chang /__/yan lag bdun dang ldan pa ste/__/zhes sogs dang /__/chu nang gi ni zla ba'i gzugs/__/bden pa ma yin brdzun pa min/__/de bzhin dkyil 'khor 'khor lo yang /__/rang bzhin med lugs de ltar snang /__/zhes dang /__dngos don rang gi mtshan nyid las/__/gud na yod pa ma yin te/__/lha sogs ye shes snang ba las/__/gzhan du dmigs pa smos ci dgos/__/zhes dang /__bde chen bde ba chen po'i sku/__/rang snang rig mas nyer brgyan pa/__/'og min gnas su dus rtag tu/__/mtshan dang dpe byad 'bar bar bzhugs/__/gang dang gang gis 'dul phyur pa/__/de de bzhin du so sor snang /__/mos ba'i dbang gis tha dad pa/__/sems can rnams ni 'dul bar mdzad/__/rgyud gzhan dag las bshad pa ni/__/spang bya gsum dang ma rig pa/__/sbyong byed smin byed dbang bzhi'o/__/grol byed rgyud dang sngags dang chos/__/gsang ba'i rim pas bzhi par 'dod/__/'di nyid yi ge spyi sbas dang /__/mthar thug yin pas bzhi par 'dod/__/mkha' 'dra chos sku stong pa las/__/rtog med ye shes 'ja' 'dra ba/__/rlung dang ye shes ting 'dzin gyis/__/'bad pa bral bar lhun gyis grub/__/ces so/__/'di zhi ba'i snying po dang 'gos lhas btsas kyis bsgyur bar bshad snang mod/__cung zad dpyad byar sems so/____/_!_des mdzad pa'i rdzogs rim rim pa lnga'i ngag dben dang po rdo rje'i bzlas pa'i rim par/__bskyed pa'i rim par legs gnas shing /__/rdzogs pa'i rim pa 'dod rnams la/__/thabs 'di rdzogs pa'i sangs rgyas kyis/__/skas kyi rim pa lta bur gsungs/__/sems can rnams kyi srog gyur pa/__/rlung zhes bya ba las kun byed/__/'di ni rnam shes bzhon pa ste/__/lnga yi bdag nyid bcu ming can/__/rlung gi de nyid rim gyis ni/__/sngags kyi de nyid yang dag 'jug__/sngags kyi dmigs pa rtogs nas ni/__/rdo rje'i bzlas pa rnams la slob/__/rdo rje bzlas nas rnal 'byor pa/__/sems la dmigs pa 'thob par 'gyur/__/sgyu ma lta bu'i ting 'dzin gnas/__/yang dag mthas ni rnam par sbyang /__/yang dag mtha' las langs nas ni/__/gnyis med ye shes thob par 'gyur/__/zung 'jug ting 'dzin la gnas nas/__/phyir zhing gang yang mi slob bo/__/'di ni rdzogs pa'i rnal 'byor pa/__/rdo rje 'dzin pa chen po'ang de/__/rnam pa kun gyi mchog ldan pa'i/__/thams cad mkhyen par de nas 'gyur/__/'das pa dang ni ma 'ongs pa/__/da ltar byung ba'i srid gsum ni/__/'od gsal bas ni rnam dag pas/__/skad cig de la ma lus mthong /__/dpal ldan 'dus pa'i rgyud du ni/__/de nyid de dag rgyas btab pas/__/bshad pa'i rgyud kyi rjes 'brangs nas/__/bla ma'i kha las rtogs par bya/__/zhes dang /__rtsa ba'i rgyud las lung drangs pa/__sna yi rtse mor yungs kar bsams/__/'gro dang mi 'gro yungs kar la/__/gsang ba'i sngags kyis brtag pa yi/__/ye shes mchog gi gnas bsgom mo/__/rin chen kha dog sna lnga pa/__/yungs kar gyi ni 'bru tshad tsam/__/sna yi rtse mor nan tan du/__/rnal 'byor rig pas rtag tu bsgom/__/sogs rlung bcu'i de kho na nyid rgyas par bstan mthar sngags kyi de kho na nyid bstan par/__oM AHhU~M/__don rtogs pa yi bzlas pa ni/__/ngo bo nyid med bzang po las/__/dus gsum sangs rgyas kyis brtags pa/__/rdo rje'i bzlas par de bshad do/__/slong mo za zhing mi bzla ste/__/ma slong pa la'ang chags mi bya/__/'dod pa kun la longs spyod cing /__/sngags kyi yan lag ma nyams bzlas/__/zhes sogs dang /__dgongs pa lung bstan pa'i rgyud las drangs pa/__mi rtog don gyi de nyid ni/__/rab tu phye nas bshad par bya/__/brjod pa dmigs par bcas pa dang /__/brdar gyur pa dang don dam mo/__/tshig gi brjod pa thun mong ste/__/dmigs par bcas pa sangs rgyas nyid/__/sngags kyi de nyid brda ru bshad/__/don dam de bzhin nyid yin no/__/dang po gcig ni dgu dbus na/__/sogs kyis sngags su bstan/__'og dang steng du bcas pa ni/__/shes nas blo yis nges par sbyar/__/brjod pa yi ni sngags 'di dag__/dngos med ngo bo las byung ba'o/__/de ni yongs su gyur pa'i gzugs/__/lha ru nye bar mtshon pa gang /__/de ni nye bar dmigs pa'o/__/brda ni de nyid gsum gnas pa/__/rang bzhin bzlas pa'i mtshan nyid do/__/e yig bshad pa'i ye shes ni/__/sangs rgyas kun gyi snying por gyur/__/oM gyis sems can yang dag sdud/__/sangs rgyas sku ni rab tu brtag__/hU~M gis sems can yang dag spros/__/sangs rgyas thugs su rab tu brtag__/AHyis gnas par gyur pa'o/__/sangs rgyas gsung du rab tu brtag__/'jug pa nyid dang gnas pa dang /__/ldang ba yi ni rim pas kyang /__/shes rab thabs kyi gzhir gnas te/__/sngags kyi yan lag ma nyams bzlas/__/gos dkar la sogs bzlas bshad pa/__/brgya phrag gnyis dang nyi shu lnga/__/bzhi po legs par bsdus pa ni/__/sbyor bzhi bsdus pa brgya phrag dgu/__/dgu brgya dag tu gang bstan pa/__/nyi shu rtsa dbyu gu/__bzhi'i rim gyis ni/__/de ni so sor 'byung ba las/__/nyi khri chig stong drug brgya'o/__/zhes dang /__'dus rgyud phyi na 'brangs pa dag__/rig pa'i cho ga 'di yis ni/__/thun mtshams bzhi ni rab sbyor bas/__/grangs 'bum gyi ni mtshan nyid can/__/sngags kyi yan lag ma nyams bzlas/__/zhes dang /__bsgom pa yi ni bar chad can/__/rnal 'byor phyi rol bzlas pa spangs/__/sngags don bcom ldan rdo rje can/__/rdo rje bdag nyid ji ltar bzla/__/zhes dang /__gsung gi rdo rje sgrub pa ste/__/'dis ni sngags kyi de nyid gsal/__/ye shes gsum gyi dbye ba yis/__/'jug gnas ldang gsum/__sems tsam la ni nges par sbyar/__/zhes dang /__ri dbang rtse nas 'ga' zhig ltung gyur na/__/ltung bar mi 'gyur bsams kyang ltung bar 'gyur/__/bla ma'i drin gyis phan pa'i lung thob na/__/grol bar mi 'gyur snyam yang grol bar 'gyur/__/zhes dang /__khri phrag gnyis dang chig stong dang /__/de bzhin du ni brgya phrag drug__/rnal 'byor dbang po nyin mtshan gyis/__/bzlas brjod kyi ni grangs byed do/__/zhes so/__/_!rim pa gnyis pa'i dgongs pa bla med kyi rim par/__phyag 'tshal 'dud cing phyag 'tshal 'dud/__/phyag 'tshal phyag 'tshal phyag 'tshal 'dud/__/ji ltar bstod cing phyag 'tshal ba/__/gang la bstod cing gang gis bstod/__/ji ltar chu la chu bzhag dang /__/ji ltar mar la mar bzhin du/__/rang gis rang rig ye shes ni/__/legs mthong gang yin 'di phyag yin/__/'on kyang kun mkhyen ma thob bar/__/de ni nye bar dmigs mi 'gyur/__/mun nag rab rib kyis khebs pa/__/drin gyis snang ba 'thob par 'gyur/__/stong nyid shin tu stong pa dang /__/gsum pa chen po stong pa dang /__/bzhi pa thams cad stong pa ni/__/rgyu dang 'bras bu'i bye brag go/__/shes rab thabs su sbyor ba las/__/rdzogs pa nye bar 'thob par 'gyur/__/thams cad stong pa 'od gsal ba/__/rgyu yi rim pa rnam dag pa/__/rnam shes gsum po sbyor ba dang /__/stong pa gsum ni mnyam sbyor bas/__/bla med go 'phang 'thob par 'gyur/__/zhes sogs kyis snang mched thob pa'i ye shes kyi mtshan nyid gsal bar bstan nas/__snang dang snang ba mched pa dang /__/de bzhin snang ba nyer thob pa'i/__/sems ni rnam pa gsum bshad nas/__/de yi sgrub pa brjod par bya/__/rlung rnams phra ba'i gzugs kyis ni/__/shes dang yang dag 'dres gyur nas/__/dbang po'i lam nas byung nas ni/__/yul rnams la ni dmigs par byed/__/gang tshe snang ba ldan gyur cing /__/rlung gi bzhon pa nyid gyur pa/__/de tshe rang bzhin de dag kun/__/ma lus lus pa med par 'byung /__/rlung ni gang dang gang gnas pa/__/rang bzhin de dang de 'byung 'gyur/__/ji srid rlung ni mi rgyu dang /__/snang ba mi g.yo bar gyur pa/__/snang ba gnyis kyi rgyur gyur pa/__/bdag gi dngos po rnam par brtag__/ji ltar snang ba thob pa ltar/__/gnyis ka'i yan lag nyid du 'gyur/__/sgyu ma dag ni thams cad las/__/bud med sgyu ma khyad par 'phags/__/ye shes gsum gyi dbye ba ni/__/gsal bar 'di las mtshon par 'gyur/__/'dod chags nyid dang chags bral dag__/de yi bar te gsum po ni/__/dbang po gnyis ni mnyam sbyor ba'i/__/rdo rje pad+ma 'dus las so/__/zhes sogs dang /__gang zhig chu skyes rdo rje sbyor/__/kun rdzob tu yang med gyur na/__/lan gcig tsam zhig myang nas kyang /__/rnal 'byor stobs kyis 'grub par 'gyur/__/ye shes 'jug pa'i ngo bo yi/__/dbye ba ji bzhin shes bya la/__/rang gi de nyid slar yang ni/__/rtag tu rnal 'byor pas mtshon bya/__/ji ltar sprin ni sna tshogs shing /__/mdog dang dbyibs ni tha dad pa/__/nam mkha'i dbyings su byung nas ni/__/de nyid du ni thim par 'gyur/__/de bzhin rang bzhin thams cad ni/__/snang ba gsum gyi rgyu can te/__/ma lus yul la zhugs nas ni/__/'od gsal bar ni zhugs par 'gyur/__/de 'dra'i rang bzhin ma shes pas/__/mi shes mun pas khebs pa ni/__/dge dang mi dge'i las byas nas/__/'gro ba lngar ni 'khor bar 'gyur/__/zhes sogs dang /__da ni yongs rdzogs rnal 'byor gyi/__/gsal ba ru ni bshad bya ste/__/stong pa gsum gyi rnam dag gang /__/'od gsal bar ni 'dir bshad do/__/thams cad stong par de brjod do/__/ye shes gsum ni rnam dag pa/__/ye shes dag nas de nyid rtogs/__/thams cad mkhyen pa bla na med/__/'gyur ba med cing snang ba med/__/gnyis med mchog tu zhi ba ni/__/yod dang de bzhin med pa dang /__/de ni tshig gi spyod yul min/__/de nas 'od gsal dag pa la/__/ye shes gsum ni 'byung 'gyur te/__/sum cu rtsa gnyis mtshan 'bar zhing /__/dpe byad bzang po brgyad cur gyur/__/rnam pa kun tu mchog ldan pa'i/__/thams cad mkhyen pa de nas 'gyur/__/zhes sogs lung dang bcas te rgya cher gsungs mthar/__gzod nas dag pa'i rang bzhin can/__/ngo bo nyid kyis de grub na/__/bslab pa'i sbyor bas ci zhig bya/__/rtog las de bzhin nyid mi skye/__/gang zhig de ltar 'dir rtogs na/__/ye shes rim pa spangs pa nyid/__/de yi dbye ba mi shes pas/__/slar yang slob par 'gyur ba yin/__/zhes sogs kyis rang bzhin brgyad cu 'gags pa'i snang gsum gyi ye shes sngon du 'gro bas mthar gyis thams cad stong ba don gyi 'od gsal grub cing /__de yang phyag rgya las drangs pa nyid lan gcig nyams su myong nas phyis rang gis bsten goms bya bar bshad do/__/gsum pa kun rdzob sgyu ma bdag byin brlabs pa'i rim pa las bdag byin brlabs pa'i rim pa zhes/__/kun rdzob bden pa bsten pa ste/__/de ni bla ma'i drin dag gis/__/'thob par 'gyur gyi gzhan du min/__/bdag la byin gyis brlabs pa'i rim/__/gang gis rnyed par ma gyur pas/__mdo sde rgyud dang rtog pa la/__de yi ngal ba don med 'gyur/__/bdag la byin rlabs rim thob pa'i/__/gtso bo sangs rgyas kun bdag nyid/__/tshe 'di nyid du sangs rgyas ni/__/the tshom med par 'thob par 'gyur/__/bdag byin brlabs pa'i ting 'dzin dang /__/de bzhin 'od gsal ba yi gnas/__/rgyu dang 'bras bu'i khyad par gyis/__/bden pa gnyis su bstan pa yin/__/bdag byin brlabs pa'i rim gyis ni/__/'od gsal ba ni 'thob par 'gyur/__/de bas rdo rje slob dpon gyis/__/dang por bdag byin brlabs pa bstan/__/'gro kun rang dbang med pa de/__/rang dbang du ni 'byung ma yin/__/de yi rgyu ni 'od gsal ba/__/'od gsal thams cad stong pa'o/__/sems gang gis ni byis pa rnams/__/'khor bar 'ching bas bcing bar 'gyur/__/sems de nyid kyis rnal 'byor pa/__/bde gshegs gnas su 'gro bar 'gyur/__/sogs nas/__de nyid rlung dang yang 'od gsal dag ldan/__/rnam shes gsum po slar yang ni/__/rnal 'byor pa yi lus su 'byung /__/sgyu ma'i lus zhes de la bshad/__/de bas 'di ltar 'gro ba kun/__/sgyu ma lta bur 'dir bshad de/__/sgyu ma lta bu'i ting 'dzin gnas/__/thams cad de dang 'dra bar mthong /__/sogs nas/__me long nang gi gzugs brnyan gyis/__/sgyu ma'i lus ni shes par bya/__/kha dog rnams ni 'ja' lta bu/__/khyab pa chu yi zla ba'o/__/dngos dang dngos min las grol ba/__/rdo rje sems dpa' logs bris la/__/me long dri ma med pa la/__/gzugs brnyan gsal bar snang dang mtshungs/__/rnam pa kun gyi mchog ldan pa'i/__/sku ni blta bas mi ngom pa/__/slob ma bzang po de la bstan/__/bdag byin brlabs zhes de bshad do/__/sgyu mar bstan pa'i mtshan nyid kyis/__/de nyid nye bar mtshon pa ste/__/kun rdzob bden pa sgyu ma nyid/__/longs spyod rdzogs pa'i sku yang de/__/de nyid dri za'i sems can gyur/__/rdo rje'i sku yang de nyid yin/__/sogs dang /__rdo rje theg pa de nyid du/__/'dir ni mang du bshad ci dgos/__/rnal 'byor pa yis gang gang dmigs/__/de de sgyu ma lta bur brtag__/me long nang gi gzugs brnyan dang /__/rmi lam sgyu ma chu bur dang /__/mig 'phrul mtshungs pa gang gis mthong /__/'di ni gtso bo yin par bshad/__/ces sogs dang /__/las dang nyon mongs las can lus/__/byed pa po dang 'bras bu nyid/__/smig rgyu rmi lam lta bu dang /__/dri za'i grong khyer dag dang mtshungs/__/'di 'dra'i ting 'dzin mi shes pas/__/dngos po la ni nyer dmigs te/__/'dod chags sna tshogs skyes pa rnams/__/de dag sgyu ma'i sman gyis gso/__/zhes dang /__mchod pa thams cad yongs spangs te/__/bla ma=_de=__ye shes mchog ni 'thob par 'gyur/__/bla med byed pa slob dpon gyi/__/rdo rje sems dpa' mchod byas na/__/de yis bsod nams ma byas ci/__/dka' thub ma bsten gang zhig yod/__/de nyid mi zad 'dod pa yis/__/shin tu khyad par can nyid de/__/de dang de ni bla mar sbyin/__/slob dpon gyis ni sdig pa 'phrog__/slob dpon gyis ni 'jigs pa sel/__/slob dpon gyis ni sdug bsngal gyi/__/rgya mtsho'i 'jigs las pha rol bsgral/__/ces so/_/_!_bzhi pa don dam 'od gsal mngon par byang chub pa'i rim par/__'di ni rang byung bcom ldan 'das/__/gcig pu bdag nyid che ba'i lha/__/man ngag rnams ni rab ster bas/__/rdo rje slob dpon de bas lhag__/ces dang /__/thog mar byung dang tha mar 'byung pa'am/__/dbus min 'byung ba'am dbus su 'byung ba'am/__/mtha' min 'byung ba'am mthar ni 'byung ba rnams/__/de dag thams cad stong par dam pas gsungs/__/gang du 'gro ba dang ni 'ong med cing /__/zad dang 'phel med dngos dang dngos med min/__/ngo mtshar gzugs can yin zhing ngo mtshar min/__/gnas par 'gyur min myur du 'gro ba min/__/gang zhig yod dang med pa'i tha snyad rnams dang bral/__/bsod nams gzugs su ma yin sdig pa'i gzugs ma yin/__/bsod nams dang ni sdig gi bdag min mchog gyur pa/__/de dag thams cad stong par sangs rgyas rnams kyis gsungs/__/sogs dang /__man ngag thob pa'i slob ma yis/__/de nas rnal 'byor rnam gnyis bslab/__/ril por 'dzin pa'i rim pa dang /__/de bzhin rjes su gzhig pa'o/__/mgo bo nas ni rkang pa'i bar/__/ji srid snying gar phyin pa'i bar/__/rnal 'byor yang dag mtha' la 'jug__/ril por 'dzin pa zhes bshad do/__/rgyu dang mi rgyu'i dngos po kun/__/dang po 'od gsal bya ba ste/__/phyi nas de bzhin bdag nyid byed/__/rjes su bzhag pa'i rim pa yin/__/dbugs kyi rlung ni me long la/__/ji ltar kun tu thim gyur pa/__/de bzhin rnal 'byor yang dag mthar/__/yang dang yang du 'jug par byed/__/'gro dang 'dug dang nyal dang za/__/mig btsum 'byed dang rgod pa na/__/bsam gtan sbyor ba 'di yis ni/__/de nyid rig pa rtag tu gnas/__/gzugs bcas 'od zer de dang de/__/rnam shes rlung dang ldan pa yi/__/bdag byin brlabs pa'i rim gyis kyang /__/sems can don du lan 'ga' 'byung /__/ji ltar dwangs pa'i chu klung las/__/nya dag myur du ldang ba ltar/__/de bzhin thams cad stong pa las/__/sgyu 'phrul drwa ba 'byung bar 'gyur/__/rigs lnga'i sangs rgyas la ltos pa'i/__/phyag rgya chen por brtag pa ni/__/'od zer lnga yi 'byung ba dag__/nam mkha'i 'ja' tshon dag dang mtshungs/____/_!_lnga pa bden gnyis dbyer med zung du 'jug pa'i rim par/__/'khor ba sgyu ma/__dang ni mya ngan 'od gsal 'das/__/rtog pa gnyis po spangs pas na/__/gang du dngos po gcig gyur pa/__/zung du 'jug ces de la bshad/__/kun nas nyon mongs rnam par byang /__/don dam nyid du shes nas ni/__/gang gis gcig tu shes gyur pa/__/de yis zung du 'jug pa shes/__/sogs nas/__/ril por 'dzin dang rjes gzhig dang /__/'jug dang de bzhin gnas pa dang /__/de nas gang du ldang gyur pa/__/mnyam gyur zung du 'jug pa'o/__/kun rdzob dang ni don dam dag__/so so'i char ni shes gyur pa/__/gang du yang dag 'dres gyur pa/__/zung du 'jug par de bshad do/__/zhes sogs dang /__/dran dang mi dran las grol zhing /__/rtag tu 'byung ba'i mtshan nyid can/__/rnal 'byor pa ni 'dod bzhin spyod/__/zung 'jug rim pa la gnas pa'o/__/zhes dang /__bskyed pa'i rim pa 'di gcig yin/__/gzhan yang rdzogs pa'i rim pa dag__/gnyis po gang du gcig gyur pa/__/de ni zung du 'jug par bshad/__/sogs kyi mthar/__de ltar gang gnas rnal 'byor pa/__/zung 'jug rim pa gnas pa ste/__/de ni kun mkhyen de nyid mthong /__/sna tshogs 'dzin ces brjod pa yin/__/sgyu 'phrul drwa ba mngon sangs rgyas/__/'khor ba'i rgya mtsho'i pha rol son/__/bya ba byas pa'i rnal 'byor che/__/bden pa gnyis kyi tshul la gnas/__/de nyid gnyis med ye shes te/__/mi gnas mya ngan 'das pa yin/__/sangs rgyas rdo rje sems dpa' nyid/__/de bzhin kun gyi dbang phyug yin/__/rdo rje lta ba'i ting 'dzin yang /__/rdzogs pa'i rim gnas de nyid de/__/sgyu ma lta bu'i ting 'dzin dang /__/gnyis su med par de bshad do/__/sogs rgyas par bstan to/__/shin tu sbas pa'i bdud rtsi ni/__/rim pa lnga pa'i thigs pa zhig__/btung las bsod nams gang thob des/__/bla med grub pa'i srog 'dzin shog__/sarba ga ti saM ya thA war+d+han+tu//__//__!
