པཎྜི་ཏ་པཎྜི་ཏ་བི་ཏ་པཱ་དས་མཛད་པའི་དེ་ཉིད་བསྒོམ་པའི་ཞལ་ལུང་གི་འགྲེལ་པ་ལས་ཟབ་གནད་ཁོལ་ཕྱུང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	paN+Di ta bi ta pA das mdzad pa'i de nyid bsgom pa'i zhal lung gi 'grel pa las zab gnad khol phyung
Location	mkhyen brtse'i bka' 'bum Volume 5, sde tshan 2, Text 10, Pages 376-383 (Folios 154b3 to 158a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. paN+Di ta bi ta pA das mdzad pa'i de nyid bsgom pa'i zhal lung gi 'grel pa las zab gnad khol phyung. In 'jam dbyangs mkhyen brtse'i dbang po'i bka' 'bum, Vol. 5: 376-383. Khams sde dge rdzong sar dgon: Rdzong sar blo gros phun tshogs, 2020.
Genre	Commentaries - 'grel pa
Notes	This text entry contains explanations of several different commentaries related to Buddhajñānapāda's Samantabhadra-nāma-sādhana, including Thagana's Dpal kun tu bzang po'i sgrub pa'i thabs kyi 'grel pa and Vitapāda's Yan lag bzhi pa'i sgrub thabs kun tu bzang mo zhes bya ba'i rnam par bshad pa.

1 Texts in this Section (sde tshan or chos tshan)

10 376-383	པཎྜི་ཏ་པཎྜི་ཏ་བི་ཏ་པཱ་དས་མཛད་པའི་དེ་ཉིད་བསྒོམ་པའི་ཞལ་ལུང་གི་འགྲེལ་པ་ལས་ཟབ་གནད་ཁོལ་ཕྱུང་། paN+Di ta bi ta pA das mdzad pa'i de nyid bsgom pa'i zhal lung gi 'grel pa las zab gnad khol phyung Commentaries - 'grel pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཡང་སྒྲུབ་ཐབས་དེ་ཉིད་ཀྱི་འགྲེལ་པ་སློབ་དཔོན་མཁས་པ་ཆེན་པོ་ཐ་ག་ནས་མཛད་པ་པཎྜི་ཏ་ཤྲརྔྷཱ་༡༨༧ཀ་ར་ཝརྨ་དང་། ནས། ལོ་ཙཱ་བ་རཏྣ་༢༡བྷ་དྲས་བསྒྱུར་བ་ལས། དེའི་དགོས་པ་ཡང་འདི་ཡིན་ཏེ། བསོད་ནམས་མངོན་པར་འཕེལ་བ་དང་། བགེགས་ཀྱི་བར་ཆད་ཞི་བ་དང་། འཆད་པ་པོ་དང་། ཉན་པ་པོ་དག་གིས་བཤད་པ་དང་། ཐོས་པ་ཕུན་སུམ་ཚོགས་པར་འགྱུར་བའོ། །ཕྱག་འཚལ་བ་དེ་ཡང་ཡོན་ཏན་དམ་པ་གསལ་བར་བརྗོད་པའི་སྒོ་ནས་ལུས་དང་ངག་དང་ཡིད་ཀྱི་ཕྱག་བྱ་བའི་ཚུལ་ཡིན་པར་བལྟའོ། །ཞེས་དང་། ཐ་མལ་གྱི་རྣམ་པར་རྟོག་པ་ནི་བདག་དང་བདག་གིར་རྣམ་པར་རྟོག་པའོ། །དེའི་རྒྱུན་ནི་རྒྱུན་གྱིས་འབྱུང་བའོ། །དེ་ལས་གཞན་པའི་སྲིད་པའི་སྡུག་བསྔལ་ཅི་ཡང་ཡོད་པ་མ་ཡིན་གྱི། དེ་ཉིད་སྲིད་པའི་སྡུག་བསྔལ་ཡིན་ནོ། །ཞེས་བྱ་བའི་དོན་ཏོ། །དེ་དང་ཞེས་བྱ་བ་སྲིད་པའི་སྡུག་བསྔལ་དེ་དང་རྣམ་པར་འགལ་བར་འགྱུར་བ་སྟེ། གཉེན་པོར་གྱུར་པ་ནི་དཀྱིལ་འཁོར་གྱི་འཁོར་ལོའི་རྣམ་པའི་སེམས་དེ་ལ་མངོན་སུམ་གྱིས་གསལ་བར་རྟོགས་པ་རྣལ་འབྱོར་པར་འགྱུར་རོ། །དེ་ཇི་ལྟར་གསལ་བར་རྟོགས་པར་འགྱུར་ཞེ་ན། ཟབ་ཅིང་རྒྱ་ཆེ་བའི་ཞེས་པ་ལ་སོགས་པ་སྨོས་ཏེ། ཟབ་ཅིང་རྒྱ་ཆེ་བའི་བདག་ཉིད་ཅན་ན་ཤེས་རབ་དང་ཐབས་ཀྱི་རང་བཞིན་ཅན་ཏེ་དཀྱིལ་འཁོར་གྱི་འཁོར་ལོ་ལྟ་བུའི་སེམས་གང་ཡིན་པ་དེར་ནི་སྲིད་པའི་སྡུག་བསྔལ་གྱི་རང་བཞིན་ཀུན་ཏུ་རྟོག་པ་རྣམས་སྣང་བར་མི་འགྱུར་ཞིང་སོ་སོར་སྣང་བར་མི་འགྱུར་ལ། དེ་བས་ན་སྲིད་པའི་སྡུག་བསྔལ་གྱི་བདག་ཉིད་མ་ལུས་པའི་མི་མཐུན་པའི་ཕྱོགས་ནི་དཀྱིལ་འཁོར་གྱི་འཁོར་ལོའི་རྣམ་པ་ཅན་སེམས་དེ་ཡིན་པར་གསལ་བར་རྟོགས་པར་འགྱུར་བས་སྡུག་བསྔལ་དེ་ཡང་ཕྱི་རོལ་དུ་སྣང་བ་ཙམ་འབའ་ཞིག་མ་ཡིན་ནོ། །དེ་ཅིས་ན། ཡོད་པ་མེད་པ་སྔར་ནི་བསྒྲུབས་པ་ཡིན། །ཞེས་བྱ་བ་སྨོས་ཏེ། སེམས་ཙམ་ལས་ཐ་དད་པའི་ཕྱི་རོལ་གཞན་འགའ་ཡང་ཡོད་པ་མ་ཡིན་ཏེ། གཟུགས་ལ་སོགས་པའི་རྣམ་པ་དང་བྲལ་བས། །ཞེས་བྱ་བ་ལ་སོགས་པ་སྔར་བསྟན་པ་ཉིད་ཡིན་པའི་ཕྱིར་རོ། །ཞེས་དང་། དཔལ་ཡང་ཡིན་ལ་ཀུན་ཏུ་བཟང་པོ་ཡང་ཡིན་པས་དཔལ་ཀུན་ཏུ་བཟང་པོ་སྟེ་གཉིས་སུ་མེད་པའི་ཡེ་ཤེས་ཀྱི་རང་བཞིན་བཅོམ་ལྡན་འདས་དཔལ་རྡོ་རྗེ་སེམས་དཔའོ། །དེ་ཡང་རང་གི་ངོ་བོ་ཉིད་དེ་བཅོམ་ལྡན་འདས་ནི་ཆོས་མ་ལུས་པའི་དེ་ཁོ་ན་ཉིད་ཀྱི་རང་བཞིན་ཡིན་པས་ཆོས་ཐམས་ཅད་རང་གི་ངོ་བོ་ཉིད་ཡིན་ནོ། །ཞེས་སོ། །སློབ་དཔོན་འཕགས་པས། ཡོད་མིན་མེད་མིན་ཡོད་མེད་མིན། །གཉིས་ཀྱི་བདག་ཉིད་ཀྱང་མིན་པ། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་སོ། །སྟོང་ངོ་ཞེས་སུ་མི་བརྗོད་ལ། །མི་སྟོང་ཞེས་ཀྱང་མི་བྱ་ཞིང་། །གཉིས་དང་གཉིས་མིན་མི་བྱ་སྟེ། །ཞེས་སོ། ། ༈ དེས་མཛད་པའི་ཡན་ལག་བཞིའི་སྒྲུབ་༩༦ཐབས་ནས་ཀུན་ཏུ་བཟང་༤༠བར་པོ་ལས། སྟོང་པར་རང་བཞིན་མེད་ཕྱིར་རྒྱུ་འབྲས་ཕྱིར་ནི་རང་བཞིན་མཚན་མ་མེད། །རྗེས་སུ་དཔག་པ་བསལ་བས་མ་ལུས་གཞི་ཡི་སྨོན་པ་མེད་པའོ། །ཞེས་དང་། བདག་གིར་འཛིན་པའི་རྟོག་པའི་རྒྱུན་གྱི་ངོ་བོས་འཁོར་བ་འདི་དག་སྟེ། །དག་པ་ཡང་ནི་དེ་ལས་ལྡོག་པའི་ངོ་བོ་ཙམ་ལ་རྣམ་པར་ཤེས་པར་བྱ། །ཆོས་ཉིད་ཀྱིས་ནི་སྲིད་དང་ཞི་བའི་ངོ་བོ་འདིར་ནི་དབྱེ་བ་འགའ་ཡང་མེད། །ཅིའི་ཕྱིར་འཛིན་པ་ལ་སོགས་རྣམ་པར་བྲལ་བ་རྟག་ཏུ་ཀུན་ལ་བསྒྲུབ་པའི་ཕྱིར། །ཐམས་ཅད་འགའ་ཡང་མེད་དེ་སོ་སོར་སྣང་བའི་རང་བཞིན་རྟོགས་པ་ལས། །སེམས་ལས་གཞན་དུ་གྱུར་པའི་ང་ཞེས་འགའ་ཡང་མེད་དེ་དེ་ཕྱིར་བདག་ཀྱང་དེ། །གང་གི་ངོ་བོ་གང་ཡིན་དེ་ཡིས་དེ་ཉིད་རྟོགས་པའི་གཞི་སྟེ་ཅི་ཕྱིར་དངོས། །དེ་བས་ཐམས་ཅད་དབྱེར་མེད་ཤེས་ཏེ་དངོས་པོ་ཐམས་ཅད་དབྱེར་མེད་པ་ཉིད་ཡིན། །ཞེས་དང་། བཟའ་བའི་དུས་ན་སྙིང་ཁ་རུ་ནི་གཞི་ཡི་ས་བོན་རྣམས་ནི་དམིགས་ནས་སུ། །བྱང་ཆུབ་སེམས་དང་ལྡན་པའི་རང་བཞིན་ཀུན་ཏུ་འོད་ཟེར་འབར་བར་བསམ་པར་བྱ། །ཐམས་ཅད་མཉམ་ཉིད་དག་པའི་བཟའ་བ་དེ་ཉིད་གསུམ་གྱི་སྔགས་ནི་བཏབ་བྱས་ཏེ། །དེས་ནི་སྐུ་ཡི་རྡོ་རྗེ་ལ་སོགས་ལྷ་རྣམས་རབ་ཏུ་ཚིམ་པར་བྱ། །ཞེས་དང་། ཐོ་རངས་ལངས་པའི་དུས་ན་ལྷ་མོ་རྣམས་ཀྱི་དབྱངས་ཀྱིས་བསྐུལ་ནས་དཔལ་ལྡན་པར། །བྱས་ནས་ལངས་ཏེ་ཐུབ་པའི་བཟླས་པ་ལ་སོགས་གོང་མའི་ཆོ་ག་ཉིད་ཀྱིས་བྱ། །ཞེས་དང་། སྒྱུ་མ་རྣམ་པར་རྟོག་པར་གྱུར་ལས་གཞན་འགའ་བའང་སྲིད་པའི་སྡུག་བསྔལ་ཡོད་པ་མེད། །དེ་དང་མི་མཐུན་པ་ནི་དེ་དག་སེམས་དཔའ་མངོན་སུམ་དུ་ནི་བྱང་ཆུབ་ཤེས་པར་བྱ། །ཞེས་དང་། དེ་ལྟར་ཤེས་ནས་སྙིང་རྗེར་ལྡན་པས་རྫོགས་ཆེན་ཡེ་ཤེས་རབ་ཏུ་འགྲུབ་པའི་སེམས། །དཔལ་ལྡན་ཀུན་ཏུ་བཟང་པོ་གཞི་ཡི་དངོས་པོ་གང་གིས་བསྒོམ་པར་མི་བྱའོ། །ཞེས་སོ། ། ༈ སྒྲུབ་ཐབས་ཀུན་བཟང་ལས། ངོ་བོ་ཉིད་དང་བྲལ་ཕྱིར་སྟོང་པ་སྟེ། །རང་བཞིན་རྒྱུ་དང་བྲལ་བས་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་མཚན་མ་ལས་ནི་ངེས་པར་གྲོལ། །ཞེས་དང་། ཐ་མལ་རྣམ་རྟོག་རྒྱུན་ལས་ཞེན་པ་ཡི། །སྲིད་པའི་སྡུག་བསྔལ་གཞན་ཅིའང་ཡོད་མ་ཡིན། །དེ་དང་རྣམ་པར་འགལ་བར་གྱུར་པའི་སེམས། །འདི་ནི་མངོན་སུམ་དུ་ནི་རྟོགས་པར་འགྱུར། །ཟབ་ཅིང་རྒྱ་ཆེ་བ་ཡི་བདག་ཉིད་ཅན། །གང་ཡིན་དེར་ནི་ཀུན་རྟོག་སྣང་མི་འགྱུར། །རིག་པ་ལས་ནི་གཞན་དུ་གྱུར་པ་དག །ཡོད་པ་མིན་པར་སྔར་ནི་བསྒྲུབས་པས་ན། །གང་ཞིག་གང་དང་མི་མཐུན་པ་དག་ཏུ། །ལན་གཅིག་གྱུར་པའང་དེ་བགྲོད་རྒྱས་གྱུར་པ། མཐོང་བའི་བསླབ་པ་རྣམ་པར་གཡེལ་བ་ཡིས། །རང་གི་མི་མཐུན་ཤིན་ཏུ་འགགས་པར་བྱེད། །སྦྱིན་པ་ལ་སོགས་བདག་མེད་ལྡན་པས་ཀྱང་། །ཐ་མལ་པ་ཡི་རང་གི་ངོ་བོ་ལས། །རྣམ་པར་རྟོག་པར་མི་འགྱུར་གང་ཕྱིར་འདིར། །ཡོད་ཀྱང་དེ་ནི་མི་མཐུན་འགྱུར་མ་ཡིན། །དེ་ལྟར་རྟོགས་ནས་སྙིང་རྗེར་ལྡན་པ་དང་། །ཡེ་ཤེས་བསམ་ཡས་སྐད་ཅིག་གིས་བསྒྲུབ་པ། །དཔལ་ལྡན་ཀུན་ཏུ་བཟང་པོ་རང་གི་ནི། །ངོ་བོ་སུ་ཞིག་ངེས་པར་སྒོམ་མི་བྱེད། །ཅེས་སོ། ། ༈ ཡང་དེས་མཛད་པའི་བདག་སྒྲུབ་པ་ལ་འཇུག་པར། རྣམ་པར་རྟོག་པ་ཙམ་དང་སོ་སོར་འབྲེལ་བ་དེའི་རང་བཞིན་མ་ལུས་པ་འདི་ནི་གཅིག་ཏུ་སྡུག་བསྔལ་དཔག་ཏུ་མེད་པའི་མཚན་ཉིད་ཡིན་ལ། སྐད་ཅིག་མ་གཅིག་ནས་གཅིག་ཏུ་བརྒྱུད་པའི་བདག་ཉིད་ཅན་གྱི་སྲིད་པ་ཉམས་སུ་མྱོང་བ་དེ་རྣམ་པར་ལྡོག་པ་ཙམ་ནི་མྱ་ངན་ལས་འདས་པ་ཡིན་པས་དེ་བསྒྲུབ་པའི་ཕྱིར་རབ་ཏུ་འབད་པར་བྱ་སྟེ། རྣམ་རྟོག་ལས་གཞན་འཁོར་བ་ཞེས། །བྱ་བ་འགའ་ཡང་ཡོད་མིན་ཏེ། །དེ་ཕྱིར་རྣམ་རྟོག་བྲལ་གྱུར་པས། །རྟག་ཏུ་ཁྱོད་ནི་མྱ་ངན་འདས། །ཞེས་གང་གསུངས་པ་བཞིན་ནོ། །ཞེས་དང་། གང་གི་ཕྱིར་སེམས་ཀྱི་རང་བཞིན་གང་ཡིན་པ་དེ་ཉིད་འཛིན་པ་ལ་སོགས་པའི་རྣམ་པ་དང་བྲལ་བའི་ཕྱིར་ཆོས་ཀྱི་དབྱིངས་ཀྱི་རང་བཞིན་ཡིན་ལ། དེ་ཉིད་གློ་བུར་གྱི་དྲི་མ་དང་བྲལ་བས་འོད་གསལ་བ་ཉིད་ཡིན་པའི་ཕྱིར་དང་། ཡེ་ཤེས་གཞན་བསྐྱེད་པའི་རྒྱུ་མཚན་ཡིན་པའི་ཕྱིར་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཡིན་ནོ། །མི་དམིགས་པའི་སྙིང་རྗེ་ལ་སོགས་པའི་བདག་ཉིད་ཀྱིས་རྒྱུད་གཞན་ཐ་དད་པ་འཛིན་པ་མེད་པའི་ཕྱིར་མཉམ་པ་ཉིད་ཀྱི་ཡེ་ཤེས་སོ། །ཤེས་བྱ་ཐམས་ཅད་ལ་ཕྱིན་ཅི་མ་ལོག་པའི་ཕྱིར་སོ་སོར་རྟོག་པའི་ཡེ་ཤེས་སོ། །འགྲོ་བ་མ་ལུས་པ་ལ་ཕན་པའི་རྒྱུ་ཡིན་པ་ཉིད་ཀྱིས་བྱ་བ་ནན་ཏན་གྱི་ཡེ་ཤེས་ཀྱི་བདག་ཉིད་ཡིན་ནོ། །ཞེས་དང་། རྒྱ་ཆེ་བ་ལ་དམིགས་པ་ཉིད་ཀྱི་ཕྱིར་རང་གི་བདག་ཉིད་ཀྱི་གཟུགས་ལ་སོགས་པ་ཡང་ཐ་མལ་པའི་གཟུགས་ལ་ཞེན་པའི་གཉེན་པོ་ཉིད་ཡིན་པས་བརྒྱུད་ནས་རྫོགས་པའི་སངས་རྒྱས་ཀྱི་གོ་འཕང་འཇོག་པའི་རྒྱུ་ཡིན་ཏེ། རྫོགས་པའི་སངས་རྒྱས་ཀྱི་ངོ་བོའི་ང་རྒྱལ་གྱི་རྗེས་སུ་མཐུན་པའི་གཟུགས་ལ་སོགས་པ་ལོངས་སྤྱོད་པའི་ཕྱིར་རོ། །ཞེས་སོ། ། ༈ དེས་མཛད་པའི་སྟངས་སྟབས་ཀྱི་བཀོད་པ་ལས། གཡས་པའི་བྱིན་པ་དང་ནི་བརླ་དབུས་སུ། །རྐང་པ་གཡོན་པ་རྣམ་པར་བཞག་ནས་ཀྱང་། །དེ་ཡི་སྟེང་དུ་གཡོན་པ་བཞག་པ་ནི། །རྡོ་རྗེའི་སྐྱིལ་མོ་ཀྲུང་ཞེས་བྱ་བར་བཤད། །གཡས་པའི་བྱིན་པས་བྱིན་པ་གཡོན་མནན་ལ། །པུས་མོ་གཉིས་ཀ་ཕབ་པར་བྱས་ནས་ནི། །ལུས་ནི་རབ་ཏུ་ཞི་བའི་ཚུལ་དང་ལྡན། །པདྨའི་འདུག་སྟངས་ཡིན་པར་མཁས་བས་བཤད། །རྐང་པ་གཡོན་པའི་བརླ་ཡི་སྟེང་དུ་ནི། །རྐང་པ་གཡས་པ་ཅུང་ཟད་ཙམ་སྦྱར་ལ། །གཡོན་པ་དེ་ཡི་འོག་ཏུ་བཞག་པ་ནི། །སེམས་མའི་སྐྱིལ་མོ་ཀྲུང་ཞེས་རྣམ་པར་གྲགས། །རྐང་པ་གཡོན་པ་ཡིས་ནི་སྐྱིལ་མོ་ཀྲུང་། །ཕྱེད་དུ་བཅས་ལ་དེ་དང་ཉེ་བར་ཡང་། །རྐང་པ་གཡས་པ་དྲང་པོར་བཞག་པ་ནི། །དེ་ནི་དཔའ་བོའི་འདུག་སྟངས་ཡིན་པར་འདོད། །རྐང་པ་གཉིས་ཀ་སྟན་གྱི་སྟེང་དུ་ནི། །དྲང་པོ་ཉིད་དུ་ཐུར་དུ་བརྐྱངས་བྱས་ལ། །དེ་ཉིད་བརྟན་པོར་རབ་ཏུ་འཇོག་པ་ནི། །བཟང་པོའི་འདུག་སྟངས་ཡིན་པར་རབ་ཏུ་གྲགས། །རྐང་པ་གཉིས་ཀ་མཐོ་གང་ཙམ་གྱིས་ནི། །བར་དུ་ཆོད་པར་སྟན་ལ་བཞག་ནས་ཀྱང་། །ཙོག་ཙོག་པོར་ནི་འདུག་པ་གང་ཡིན་པ། །དེ་ཉིད་ཙོག་པུའི་འདུག་སྟངས་ཉིད་དུ་བཤད། །རྐང་པ་གཡས་པ་ཉིད་ནི་སེམས་དཔའ་ཡི། །སྐྱིལ་ཀྲུང་ཕྱེད་པ་བརྟན་པར་རབ་བྱས་ལ། །གཡོན་པ་སྒེག་དང་བཅས་པས་བརྐྱངས་པ་ནི། །རོལ་པའི་འདུག་སྟངས་ཞེས་སུ་གྲགས་པ་ཡིན། །ཞེས་སོ། ། ༈

[edit]

paN+Di ta bu ta bA das mdzad pa'i de nyid bsgom pa'i zhal lung gi 'grel pa las zab gnad khol phyung / yang sgrub thabs de nyid kyi 'grel pa slob dpon mkhas pa chen po tha ga nas mdzad pa paN+Di ta shrar+ng+hA 187ka ra warma dang /__nas/__lo tsA ba rat+na 21b+ha dras bsgyur ba las/__de'i dgos pa yang 'di yin te/__bsod nams mngon par 'phel ba dang /__bgegs kyi bar chad zhi ba dang /__'chad pa po dang /__nyan pa po dag gis bshad pa dang /__thos pa phun sum tshogs par 'gyur ba'o/__/phyag 'tshal ba de yang yon tan dam pa gsal bar brjod pa'i sgo nas lus dang ngag dang yid kyi phyag bya ba'i tshul yin par blta'o/__/zhes dang /__tha mal gyi rnam par rtog pa ni bdag dang bdag gir rnam par rtog pa'o/__/de'i rgyun ni rgyun gyis 'byung ba'o/__/de las gzhan pa'i srid pa'i sdug bsngal ci yang yod pa ma yin gyi/__de nyid srid pa'i sdug bsngal yin no/__/zhes bya ba'i don to/__/de dang zhes bya ba srid pa'i sdug bsngal de dang rnam par 'gal bar 'gyur ba ste/__gnyen por gyur pa ni dkyil 'khor gyi 'khor lo'i rnam pa'i sems de la mngon sum gyis gsal bar rtogs pa rnal 'byor par 'gyur ro/__/de ji ltar gsal bar rtogs par 'gyur zhe na/__zab cing rgya che ba'i zhes pa la sogs pa smos te/__zab cing rgya che ba'i bdag nyid can na shes rab dang thabs kyi rang bzhin can te dkyil 'khor gyi 'khor lo lta bu'i sems gang yin pa der ni srid pa'i sdug bsngal gyi rang bzhin kun tu rtog pa rnams snang bar mi 'gyur zhing so sor snang bar mi 'gyur la/__de bas na srid pa'i sdug bsngal gyi bdag nyid ma lus pa'i mi mthun pa'i phyogs ni dkyil 'khor gyi 'khor lo'i rnam pa can sems de yin par gsal bar rtogs par 'gyur bas sdug bsngal de yang phyi rol du snang ba tsam 'ba' zhig ma yin no/__/de cis na/__yod pa med pa sngar ni bsgrubs pa yin/__/zhes bya ba smos te/__sems tsam las tha dad pa'i phyi rol gzhan 'ga' yang yod pa ma yin te/__gzugs la sogs pa'i rnam pa dang bral bas/__/zhes bya ba la sogs pa sngar bstan pa nyid yin pa'i phyir ro/__/zhes dang /__dpal yang yin la kun tu bzang po yang yin pas dpal kun tu bzang po ste gnyis su med pa'i ye shes kyi rang bzhin bcom ldan 'das dpal rdo rje sems dpa'o/__/de yang rang gi ngo bo nyid de bcom ldan 'das ni chos ma lus pa'i de kho na nyid kyi rang bzhin yin pas chos thams cad rang gi ngo bo nyid yin no/__/zhes so/__/slob dpon 'phags pas/__yod min med min yod med min/__/gnyis kyi bdag nyid kyang min pa/__/mtha' bzhi las grol dbu ma pa/__/mkhas pa rnams kyi de kho na/__/zhes so/__/stong ngo zhes su mi brjod la/__/mi stong zhes kyang mi bya zhing /__/gnyis dang gnyis min mi bya ste/__/zhes so/____/_!_des mdzad pa'i yan lag bzhi'i sgrub 96thabs nas kun tu bzang 40bar po las/__stong par rang bzhin med phyir rgyu 'bras phyir ni rang bzhin mtshan ma med/__/rjes su dpag pa bsal bas ma lus gzhi yi smon pa med pa'o/__/zhes dang /__bdag gir 'dzin pa'i rtog pa'i rgyun gyi ngo bos 'khor ba 'di dag ste/__/dag pa yang ni de las ldog pa'i ngo bo tsam la rnam par shes par bya/__/chos nyid kyis ni srid dang zhi ba'i ngo bo 'dir ni dbye ba 'ga' yang med/__/ci'i phyir 'dzin pa la sogs rnam par bral ba rtag tu kun la bsgrub pa'i phyir/__/thams cad 'ga' yang med de so sor snang ba'i rang bzhin rtogs pa las/__/sems las gzhan du gyur pa'i nga zhes 'ga' yang med de de phyir bdag kyang de/__/gang gi ngo bo gang yin de yis de nyid rtogs pa'i gzhi ste ci phyir dngos/__/de bas thams cad dbyer med shes te dngos po thams cad dbyer med pa nyid yin/__/zhes dang /__bza' ba'i dus na snying kha ru ni gzhi yi sa bon rnams ni dmigs nas su/__/byang chub sems dang ldan pa'i rang bzhin kun tu 'od zer 'bar bar bsam par bya/__/thams cad mnyam nyid dag pa'i bza' ba de nyid gsum gyi sngags ni btab byas te/__/des ni sku yi rdo rje la sogs lha rnams rab tu tshim par bya/__/zhes dang /__tho rangs langs pa'i dus na lha mo rnams kyi dbyangs kyis bskul nas dpal ldan par/__/byas nas langs te thub pa'i bzlas pa la sogs gong ma'i cho ga nyid kyis bya/__/zhes dang /__sgyu ma rnam par rtog par gyur las gzhan 'ga' ba'ang srid pa'i sdug bsngal yod pa med/__/de dang mi mthun pa ni de dag sems dpa' mngon sum du ni byang chub shes par bya/__/zhes dang /__de ltar shes nas snying rjer ldan pas rdzogs chen ye shes rab tu 'grub pa'i sems/__/dpal ldan kun tu bzang po gzhi yi dngos po gang gis bsgom par mi bya'o/__/zhes so/____/_!_sgrub thabs kun bzang las/__ngo bo nyid dang bral phyir stong pa ste/__/rang bzhin rgyu dang bral bas mtshan ma med/__/rtog pa rnams dang bral phyir dngos po ni/__/ma lus mtshan ma las ni nges par grol/__/zhes dang /__tha mal rnam rtog rgyun las zhen pa yi/__/srid pa'i sdug bsngal gzhan ci'ang yod ma yin/__/de dang rnam par 'gal bar gyur pa'i sems/__/'di ni mngon sum du ni rtogs par 'gyur/__/zab cing rgya che ba yi bdag nyid can/__/gang yin der ni kun rtog snang mi 'gyur/__/rig pa las ni gzhan du gyur pa dag__/yod pa min par sngar ni bsgrubs pas na/__/gang zhig gang dang mi mthun pa dag tu/__/lan gcig gyur pa'ang de bgrod rgyas gyur pa/__mthong ba'i bslab pa rnam par g.yel ba yis/__/rang gi mi mthun shin tu 'gags par byed/__/sbyin pa la sogs bdag med ldan pas kyang /__/tha mal pa yi rang gi ngo bo las/__/rnam par rtog par mi 'gyur gang phyir 'dir/__/yod kyang de ni mi mthun 'gyur ma yin/__/de ltar rtogs nas snying rjer ldan pa dang /__/ye shes bsam yas skad cig gis bsgrub pa/__/dpal ldan kun tu bzang po rang gi ni/__/ngo bo su zhig nges par sgom mi byed/__/ces so/____/_!_yang des mdzad pa'i bdag sgrub pa la 'jug par/__rnam par rtog pa tsam dang so sor 'brel ba de'i rang bzhin ma lus pa 'di ni gcig tu sdug bsngal dpag tu med pa'i mtshan nyid yin la/__skad cig ma gcig nas gcig tu brgyud pa'i bdag nyid can gyi srid pa nyams su myong ba de rnam par ldog pa tsam ni mya ngan las 'das pa yin pas de bsgrub pa'i phyir rab tu 'bad par bya ste/__rnam rtog las gzhan 'khor ba zhes/__/bya ba 'ga' yang yod min te/__/de phyir rnam rtog bral gyur pas/__/rtag tu khyod ni mya ngan 'das/__/zhes gang gsungs pa bzhin no/__/zhes dang /__gang gi phyir sems kyi rang bzhin gang yin pa de nyid 'dzin pa la sogs pa'i rnam pa dang bral ba'i phyir chos kyi dbyings kyi rang bzhin yin la/__de nyid glo bur gyi dri ma dang bral bas 'od gsal ba nyid yin pa'i phyir dang /__ye shes gzhan bskyed pa'i rgyu mtshan yin pa'i phyir me long lta bu'i ye shes kyi bdag nyid yin no/__/mi dmigs pa'i snying rje la sogs pa'i bdag nyid kyis rgyud gzhan tha dad pa 'dzin pa med pa'i phyir mnyam pa nyid kyi ye shes so/__/shes bya thams cad la phyin ci ma log pa'i phyir so sor rtog pa'i ye shes so/__/'gro ba ma lus pa la phan pa'i rgyu yin pa nyid kyis bya ba nan tan gyi ye shes kyi bdag nyid yin no/__/zhes dang /__rgya che ba la dmigs pa nyid kyi phyir rang gi bdag nyid kyi gzugs la sogs pa yang tha mal pa'i gzugs la zhen pa'i gnyen po nyid yin pas brgyud nas rdzogs pa'i sangs rgyas kyi go 'phang 'jog pa'i rgyu yin te/__rdzogs pa'i sangs rgyas kyi ngo bo'i nga rgyal gyi rjes su mthun pa'i gzugs la sogs pa longs spyod pa'i phyir ro/__/zhes so/____/_!_des mdzad pa'i stangs stabs kyi bkod pa las/__g.yas pa'i byin pa dang ni brla dbus su/__/rkang pa g.yon pa rnam par bzhag nas kyang /__/de yi steng du g.yon pa bzhag pa ni/__/rdo rje'i skyil mo krung zhes bya bar bshad/__/g.yas pa'i byin pas byin pa g.yon mnan la/__/pus mo gnyis ka phab par byas nas ni/__/lus ni rab tu zhi ba'i tshul dang ldan/__/pad+ma'i 'dug stangs yin par mkhas bas bshad/__/rkang pa g.yon pa'i brla yi steng du ni/__/rkang pa g.yas pa cung zad tsam sbyar la/__/g.yon pa de yi 'og tu bzhag pa ni/__/sems ma'i skyil mo krung zhes rnam par grags/__/rkang pa g.yon pa yis ni skyil mo krung /__/phyed du bcas la de dang nye bar yang /__/rkang pa g.yas pa drang por bzhag pa ni/__/de ni dpa' bo'i 'dug stangs yin par 'dod/__/rkang pa gnyis ka stan gyi steng du ni/__/drang po nyid du thur du brkyangs byas la/__/de nyid brtan por rab tu 'jog pa ni/__/bzang po'i 'dug stangs yin par rab tu grags/__/rkang pa gnyis ka mtho gang tsam gyis ni/__/bar du chod par stan la bzhag nas kyang /__/tsog tsog por ni 'dug pa gang yin pa/__/de nyid tsog pu'i 'dug stangs nyid du bshad/__/rkang pa g.yas pa nyid ni sems dpa' yi/__/skyil krung phyed pa brtan par rab byas la/__/g.yon pa sgeg dang bcas pas brkyangs pa ni/__/rol pa'i 'dug stangs zhes su grags pa yin/__/zhes so/____/_!_