JKW-KABUM-05-CA-002-005

From Khyentse Lineage - A Tsadra Foundation Project

རྣམ་འགྲེལ་བཅུ་གཅིག་གི་ངོས་འཛིན།
Wylie title rnam 'grel bcu gcig gi ngos 'dzin JKW-KABUM-05-CA-002.pdf
Location mkhyen brtse'i bka' 'bum
Volume 5, sde tshan 2, Text 5, Pages 282-287 (Folios 107b5 to 110a6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s) (Sa chen kun dga' snying po)
Citation 'jam dbyangs mkhyen brtse'i dbang po. rnam 'grel bcu gcig gi ngos 'dzin. In 'jam dbyangs mkhyen brtse'i dbang po'i bka' 'bum, Vol. 5: 282-287. Khams sde dge rdzong sar dgon: Rdzong sar blo gros phun tshogs, 2020.
Genre Commentaries - 'grel pa

":Property:textsubnumber|textsubnumber" can not be assigned to a declared number type with value 1.

[edit]
རྣམ་འགྲེལ་བཅུ་གཅིག་གི་ངོས་འཛིན་ནོར་བུའི་གཎྜི་ཞེས་བྱ་བ་བཞུགས་སོ། །ཨོཾ་སྭ་སྟི། ལམ་འབྲས་བུ་དང་བཅས་པའི་རྩ་བ་རྡོ་རྗེའི་ཚིག་རྐང་གི་རྣམ་འགྲེལ་བཅུ་གཅིག་ཅེས་པ་ནི། རྗེ་བཙུན་གྱི་དཀར་ཆག་ལས། དེ་ལ་རྡོ་རྗེའི་ཚིག་རྐང་ལ་རྣམ་འགྲེལ་རྗེ་བླ་མས་མཛད་པ་བཅུ་གཅིག་ཙམ་སྣང་བ་ལས། ཞེས་གསུངས་པ་ཉིད་གྲངས་འདྲེན་ཚུལ་མི་འདྲ་བ་མང་ཡང་། འདིར་འཁྲུལ་མེད་ཀྱི་ངོས་འཛིན་ནི། ༡ཨ་སེང་ཟླ་རྒྱལ་༢ལྡན་བུ་༣དང་། །ཡུམ་༤དོན་ཀློག་༥སྐྱ་སྒ་༦ཐེང་ཞུ༧། །སྲས་༨དོན་ཇོ་མོ་༩ཟངས་༡༠རི་ཕུག །གཉགས་༡༡ མ་དང་ནི་བཅུ་གཅིག་གོ །ཞེས་པ་ལྟར་ཏེ། དེ་ལ་དང་པོ་ནི། ཁམས་པ་བྱང་ཆུབ་སེམས་དཔའ་སྐྱུ་རུ་ཨ་སྐྱབས་ཀྱི་སྲས་སྐྱུ་ར་ཨ་སེང་གི་ངོར་མཛད་པ་སྟེ། གཞུང་ཚད་རྐང་པར་བཅད་པའི་ཤློ་ཀ་ཉི་ཤུ་ཡོད། ། ༈ གཉིས་པ་ནི། མངའ་རིས་པ་བྱང་སེམས་ཟླ་བ་རྒྱལ་མཚན་གྱི་ངོར་མཛད་པ་སྟེ། འདིའི་ནང་དུ་དབང་གསུམ་པ་དང་བཞི་པའི་འདའ་ཁ་མ་གཉིས་ཀྱི་ཁྱད་པར་འཆི་ཁར་ཁམས་ལྟེ་བར་འདུས་པ་དང་། གསང་གནས་སུ་འདུས་པ་ལ་བཤད། ལམ་དུས་ཀྱི་དབང་གི་ཐད་དུ་ཆོས་དབྱིངས་ཡེ་ཤེས་མི་བསྐྱོད་པ་ལ་སྦྱར་བ་སོགས་ཡོད། གཞུང་ཚད་ཕྲེང་བདུན་རེར་བྱས་པའི་ཤོག་བུ་༢༠ཙམ་མོ། ། ༈ གསུམ་པ་ནི། ཇོ་གདན་ལྡན་བུའི་ངོར་མཛད་པ་སྟེ། འདི་རྒྱ་གར་སིནྡྷུའི་ཡུལ་གྱི་དགེ་སློང་པཎྜིཏ་ལ་ན་ལ་རྩེར་གདམས་ངག་གནང་བའི་ཚེ་ཇོ་གདན་ལྡན་བུས་ཀྱང་ཉན་པས། དེའི་ཚེ་ལེགས་སྦྱར་གྱི་སྐད་དུ་གསུངས་པ། སླར་བོད་སྐད་དུ་བསྒྱུར་བ་ཡིན་པས་མགོ་བོར་སྐད་གཉིས་ཤན་སྦྱར་ནས་ཡོད། གདན་སོགས་ཀྱི་ཐད་དུ། གསང་བ་ཤེས་རབ་ཡེ་ཤེས་ཀྱི་དབང་ལ། ཕྱག་རྒྱའི་ཆོས་འབྱུང་དུ། ལྷ་དགུ་གཞལ་ཡས་ཁང་དང་བཅས་པ་བསྐྱེད། མཆོད། དེ་ལ་སློབ་མས་མེ་ཏོག་དོར། གར་ཕོག་གི་མིང་བཏགས། ཡེ་ཤེས་དབབ། དེ་ནས་སྙོམས་འཇུག་བྱས་ཏེ་དབང་བསྐུར་བར་བཤད་པ་སོགས་སྣང་། འདི་ལ་ཆེ་ཆུང་གཉིས་ཡོད་པའི་ཆུང་བ་ལ་གཞུང་གི་ཚད་བརྒྱ་ཉི་ཤུ་ཙམ་མོ། ། ༈ བཞི་པ་ནི། ས་ཆེན་རང་གི་ཡུམ་གྱི་དོན་དུ་མཛད་པ་སྟེ། འདིར་སྣང་བ་བསྒྱུར་བའི་འདའ་ཁ་མ་ནི། སྤྱོད་ལམ་ཐམས་ཅད་དུ་ཡི་དམ་གྱི་ལྷ་ཡིན་དུ་བསམས་ཏེ། ཞལ་ཕྱག་ལ་སོགས་པ་དྲན་མི་དགོས་སོ་གསུངས། གཞུང་ཚད་ནི་བརྒྱ་ཕྲག་ཙམ་མོ། ། ༈ ལྔ་པ་ནི། གཙང་པ་ཀློག་སྐྱའི་ངོར་མཛད་པ་སྟེ། ཡུམ་དོན་མ་དང་ཞུ་དག་ཕེར་བ་ཙམ་ཡོད་ཀྱང་མཆན་བུ་འགའ་ཞིག་བསྣན་པས་ཁྱད་པར་དུ་བྱས་པ་སྟེ། གཞུང་ཚད་ཀྱང་སྔ་མ་ལས་༡༢༠མང་ངོ་། ། ༈ འདིའི་མཆན་དུ་ལུས་དཀྱིལ་གྱི་གཙོ་བོ་རྣམས་བཞུགས། འཁོར་རྣམས་བཞེངས་ལ་གཙོ་བོ་རྣམས་བཞེངས་ཀྱང་བཏུབ་གསུངས། འདི་དང་སྔ་མ་གཉིས་ཀར་ལྷ་ཐམས་ཅད་ལ་རིན་ཆེན་དང་རུས་པའི་རྒྱན་བཤད། ། ༈ དྲུག་པ་ནི། ཁམས་པ་སྒ་ཐེང་གི་ངོར་མཛད་པ་སྟེ། འདིའི་དམ་ཚིག་གི་སྐབས་སུ་བདུད་རྩི་རིལ་བུའི་སྒྲུབ་ཐབས་བསྟན། ལམ་དབང་གི་གསུང་སྒྲོས་རྒྱས། གཞུང་བརྒྱ་ལྷག་ཙམ་མོ། ། ༈ བདུན་པ་ནི། ཞུ་བྱས་དངོས་གྲུབ་ཅེས་འགྲོ་མགོན་ཞང་རིན་པོ་ཆེའི་བླ་མ་དེའི་ངོར་མཛད་པ་སྟེ། འདིའི་མཇུག་ཏུ། འདི་བྲིས་དགེ་བས་སེམས་ཅན་ཀུན། །བསོད་ནམས་ཡེ་ཤེས་ཚོགས་རྫོགས་ཏེ། །དཔལ་ལྡན་ས་བཅུའི་རྩེ་མོ་ནི། །རྡོ་རྗེ་འཆང་དབང་འགྲུབ་པར་ཤོག །ཅེས་སློབ་དཔོན་རིན་པོ་ཆེའི་སྦྱར་བྱང་འབྱུང་བ་ནི། རྗེ་བཙུན་སྐུ་མཆེད་ཀྱིས་ནང་མཆོད་ཅིག་མཛད་པའི་ཚེ། ཞུ་བྱས་རྡོ་རྗེ་གདན་ནས་ཉི་མ་ཟེར་ཙམ་ལ་རྫུ་འཕྲུལ་གྱིས་ཕེབས་པའི་ཚེ། སྐུ་མཆེད་གཉིས་ཀྱིས་ངག་ནས་བླངས་ཏེ་བྲིས་པས་འབྲི་བ་པོའི་མཚན་བཏགས་པའོ། །གཞུང་ཚང་ཉུང་། ། ༈ བརྒྱད་པ་ནི། རང་གི་སྲས་ཀྱི་དོན་དུ་ཡི་གེ་དུམ་བུ་དུམ་བུར་མཛད་པ་ཉིད། གཉན་ཕུལ་བྱུང་བ་གཙུག་ཏོར་རྒྱལ་པོས་ཕྱོགས་གཅིག་ཏུ་བསྒྲིགས་པ་སྟེ། འདིར་རྩ་བ་མཐར་ཆགས་སུ་བསྟན་ན་ཆོས་བཅོ་བརྒྱད། དེ་ལས་དབྱེ་ན་འཁོར་འདས་ཐུན་མོང་བ་ལ་ལྔ་བཅུ་རྩ་ལྔ། འཁོར་ལོ་འཆམ་པ་ལ་བཅུ་གཉིས། བསྐོར་བ་ལ་ཉི་ཤུ་རྩ་ལྔ་སྟེ་བསྡོམས་པས་བརྒྱ་དང་བཅུ་རུ་བསྡུས། ཉམས་སུ་བླང་བའི་མཐའ་ནི་སྦྱང་བ་དུས་ཀྱི་གནས་ལུགས་ཉི་ཤུ་ལ་སོགས་པ་དང་། །ཞེས་ལུས་སྦྱོང་རྒྱས་པ་ལུས་སྦྱོང་ཉི་ཤུ་པ་ལ་གསུངས་པ་སོགས་སྣང་། ། ༈ དགུ་པ་ནི། གཡའ་ལུང་ཇོ་མོ་ཞིག་གིས་ལམ་འབྲས་བསྒོམ་པས་ཁྱིའི་ཉམས་བྱུང་ནས་འའུ་འའུ་ཟེར་བས་དེ་སྐད་དུ་གྲགས་པ་དེའི་ངོར་མཛད་པས་འའུ་མར་གྲགས་པ་སྟེ། མ་ཆུང་མ་དང་གཅིག་པར་ཡང་བཞེད། འདིའི་ཉམས་ཀྱི་སྣང་བའི་ཐད་དུ་ཉམས་དགུར་བསྟན། གསང་དབང་གི་སྔོན་འགྲོ་སྦྱོང་བ་གསུམ་གྱི་ཐད་དུ། དང་པོ་ལག་པ་བཀྲུ་སྟེ་ཞེས་སོགས་ལུས་སྦྱོང་ཉི་ཤུ་ཚང་བར་བསྟན་པ་སོགས་ཡོད། གཞུང་ཚད་བདུན་ཅུ་ཙམ་མོ། ། ༈ བཅུ་པ་ནི། ངམ་ཤོད་ཀྱི་སྔགས་པ་བནྡེ་གཤིན་རྗེ་གྲགས་ཏེ་འགའ་ཞིག་གིས་འདའ་འཕྱར་ཡིན་པར་བཤད་པ་དེའི་ངོར་མཛད་པ་སྟེ། ཀུན་གཞི་རྒྱུ་རྒྱུད་དུ་རྩ་ཡིག་རགས་པ་རྡོ་རྗེ་དང་པདྨར་བཤད། བར་དོར་འོད་སྔོན་པོ་ལ་སེམས་ཟིན་ན་དམྱལ་བ། དཀར་པོ་ལ་ཟིན་ན་བྱོལ་སོང་ཞེས་བཤད། གྲིབ་མ་ཁྲུས་ཀྱིས་སེལ་བར། བྱང་ཆུབ་དང་ལམ་ལས་རྡོ་རྗེ་གྲི་གུག་དང་འདི་ལ་དགོངས་ནས་འབྱུང་བཞིའི་རླུང་ཉིས་བརྒྱ་ཉེར་ལྔ་པ་རེ་ལ་ལྷ་མོའི་མིང་གིས་བཏགས་པ། ཞེས་བཤད། ཧ་རིམ་ལ་སོགས་པར་ཞེས་པ་ཐུན་མོང་མ་ཡིན་པའི་གསང་བ་ལས། ཕྲ་ཞིང་ཡང་ལ་ཞེས་སོགས་དྲངས། འདིར་གཞན་ཡང་ཐུན་མོང་མིན་པའི་ལུང་འདྲེན་འགའ་རེ་འབྱུང་། གཞུང་ཚད་ནི་གོ་ལྔ་ཙམ་མོ། ། ༈ བཅུ་གཅིག་པ་ནི། དགེ་བཤེས་གཉན་གཉགས་དབང་རྒྱལ་གྱི་ངོར་མཛད་པ་སྟེ། འདི་ལ། ལམ་སོགས་ཉི་ཤུའི་བུམ་པའི་དབང་གི་ལམ་དུ། ལམ་དབྱིབས་༡དང་། བུམ་དབང་གི་འཕོ་བ་༢དང་། གསང་དབང་གི་ལམ་དུ་ཐིག་ལེའི་རྣལ་འབྱོར་༣དང་། ཤེས་རབ་ཡེ་ཤེས་ཀྱི་ལམ་དུ་ཕྱག་རྒྱའི་མཚན་ཉིད་༤དང་། དབང་བཞི་པའི་འཕོ་བ་༥དང་། ལམ་གྱི་དབང་བཞི་རྒྱས་བསྡུས་བླང་བ་༦དང་། གདམས་ངག་དྲུག་གི་སྐྱོན་མེད་གསུམ་ལ་མ་སྐྱེས་པ་བསྐྱེད་པའི་ཐབས་༧དང་། ཐུན་མོང་གི་སྲུང་བ་བཅུ་བཞིའི་འཛག་སྲུང་༨དང་། སྒྲིབ་པ་སྲུང་བའི་སྐབས་ཀྱི་སྐྱོན་མེད་མ་སྐྱེས་པ་བསྐྱེད་པའི་༩ཐབས་དང་། རླུང་རང་གནས་སུ་ཟིན་པའི་ཐད་ཀྱི་གཞུང་ཇི་ལྟར་འགྲོ་བ་སྟེ་ཞལ་ཤེས་བཅུ་དང་ལྡན་ཅིང་རྣམ་འགྲེལ་ཐམས་ཅད་ལས་ཁྱད་པར་འཕགས་སོ། ༼ཀ༽ །ཀློག་སྐྱ་མར། ཀུན་གཞི་རྒྱུ་རྒྱུད་རྟེན་དང་བརྟེན་ཚུལ་དུ། ཏིལ་དང་། ཏིལ་མར་རམ། འོ་མ་དང་མར་རམ། ཆུ་དང་འཁྱག་པའམ། མེ་ཏོག་དང་དྲིའི་ཚུལ་ཞེས་བཤད། བུམ་དབང་གི་འདའ་ཀ་མའི་མཚམས་སྦྱོར་དུ་གྲུབ་མཐའ་སྙོགས་ན་ཚེ་བསྐལ་པའི་བར་དུ་ཐུབ་པས་འདའ་ཁ་མི་དགོས་ཞེས་བཤད། མཇུག་ཏུ། བླ་མ་དམ་པའི་གསུང་ངག་བདུད་རྩིའི་བཅུད། །འཐུང་ན་སྲིད་པའི་སྡུག་བསྔལ་འཁྱག་ཞི་བྱེད་པའི། །དཔེ་མཁྱུད་སྤངས་པར་དྷརྨ་ཀཱིརྟི་ཡིས། །ལར་བཟང་པོའི་མཐའ་ཅན་དང་། ལ་ལར་གྲགས་པ་བཟང་པོ་ཞེས་འབྱུང་ཡང་དོན་དུ་ཞུས་ཚུལ་ལས་སྦྱར་བྱང་མ་ཡིན་ཅིང་གློག་སྐྱ་བའི་མཚན་ཡིན་ནམ་སྙམ་ལགས། །ཐོབ་དང་བྲིས་པ་གུས་པར་སྤྱི་བོས་བླངས། །ཞེས་འབྱུང་།། །། ༈
[edit]

rnam 'grel bcu gcig gi ngos 'dzin/ rnam 'grel bcu gcig gi ngos 'dzin nor bu'i gaN+Di zhes bya ba bzhugs so/__/oM swa sti/__lam 'bras bu dang bcas pa'i rtsa ba rdo rje'i tshig rkang gi rnam 'grel bcu gcig ces pa ni/__rje btsun gyi dkar chag las/__de la rdo rje'i tshig rkang la rnam 'grel rje bla mas mdzad pa bcu gcig tsam snang ba las/__zhes gsungs pa nyid grangs 'dren tshul mi 'dra ba mang yang /__'dir 'khrul med kyi ngos 'dzin ni/__1a seng zla rgyal 2ldan bu 3dang /__/yum 4don klog 5skya sga 6theng zhu7/__/sras 8don jo mo 9zangs 10ri phug__/gnyags 11_ma dang ni bcu gcig go__/zhes pa ltar te/__de la dang po ni/__khams pa byang chub sems dpa' skyu ru a skyabs kyi sras skyu ra a seng gi ngor mdzad pa ste/__gzhung tshad rkang par bcad pa'i sh+lo ka nyi shu yod/____/_!_gnyis pa ni/__mnga' ris pa byang sems zla ba rgyal mtshan gyi ngor mdzad pa ste/__'di'i nang du dbang gsum pa dang bzhi pa'i 'da' kha ma gnyis kyi khyad par 'chi khar khams lte bar 'dus pa dang /__gsang gnas su 'dus pa la bshad/__lam dus kyi dbang gi thad du chos dbyings ye shes mi bskyod pa la sbyar ba sogs yod/__gzhung tshad phreng bdun rer byas pa'i shog bu 20tsam mo/____/_!_gsum pa ni/__jo gdan ldan bu'i ngor mdzad pa ste/__'di rgya gar sin+d+hu'i yul gyi dge slong paN+Dita la na la rtser gdams ngag gnang ba'i tshe jo gdan ldan bus kyang nyan pas/__de'i tshe legs sbyar gyi skad du gsungs pa/__slar bod skad du bsgyur ba yin pas mgo bor skad gnyis shan sbyar nas yod/__gdan sogs kyi thad du/__gsang ba shes rab ye shes kyi dbang la/__phyag rgya'i chos 'byung du/__lha dgu gzhal yas khang dang bcas pa bskyed/__mchod/__de la slob mas me tog dor/__gar phog gi ming btags/__ye shes dbab/__de nas snyoms 'jug byas te dbang bskur bar bshad pa sogs snang /__'di la che chung gnyis yod pa'i chung ba la gzhung gi tshad brgya nyi shu tsam mo/____/_!_bzhi pa ni/__sa chen rang gi yum gyi don du mdzad pa ste/__'dir snang ba bsgyur ba'i 'da' kha ma ni/__spyod lam thams cad du yi dam gyi lha yin du bsams te/__zhal phyag la sogs pa dran mi dgos so gsungs/__gzhung tshad ni brgya phrag tsam mo/____/_!_lnga pa ni/__gtsang pa klog skya'i ngor mdzad pa ste/__yum don ma dang zhu dag pher ba tsam yod kyang mchan bu 'ga' zhig bsnan pas khyad par du byas pa ste/__gzhung tshad kyang snga ma las 120mang ngo /____/_!_'di'i mchan du lus dkyil gyi gtso bo rnams bzhugs/__'khor rnams bzhengs la gtso bo rnams bzhengs kyang btub gsungs/__'di dang snga ma gnyis kar lha thams cad la rin chen dang rus pa'i rgyan bshad/____/_!_drug pa ni/__khams pa sga theng gi ngor mdzad pa ste/__'di'i dam tshig gi skabs su bdud rtsi ril bu'i sgrub thabs bstan/__lam dbang gi gsung sgros rgyas/__gzhung brgya lhag tsam mo/____/_!_bdun pa ni/__zhu byas dngos grub ces 'gro mgon zhang rin po che'i bla ma de'i ngor mdzad pa ste/__'di'i mjug tu/__'di bris dge bas sems can kun/__/bsod nams ye shes tshogs rdzogs te/__/dpal ldan sa bcu'i rtse mo ni/__/rdo rje 'chang dbang 'grub par shog__/ces slob dpon rin po che'i sbyar byang 'byung ba ni/__rje btsun sku mched kyis nang mchod cig mdzad pa'i tshe/__zhu byas rdo rje gdan nas nyi ma zer tsam la rdzu 'phrul gyis phebs pa'i tshe/__sku mched gnyis kyis ngag nas blangs te bris pas 'bri ba po'i mtshan btags pa'o/__/gzhung tshang nyung /___/_!_brgyad pa ni/__rang gi sras kyi don du yi ge dum bu dum bur mdzad pa nyid/__gnyan phul byung ba gtsug tor rgyal pos phyogs gcig tu bsgrigs pa ste/__'dir rtsa ba mthar chags su bstan na chos bco brgyad/__de las dbye na 'khor 'das thun mong ba la lnga bcu rtsa lnga/__'khor lo 'cham pa la bcu gnyis/__bskor ba la nyi shu rtsa lnga ste bsdoms pas brgya dang bcu ru bsdus/__nyams su blang ba'i mtha' ni sbyang ba dus kyi gnas lugs nyi shu la sogs pa dang /__/zhes lus sbyong rgyas pa lus sbyong nyi shu pa la gsungs pa sogs snang /____/_!_dgu pa ni/__g.ya' lung jo mo zhig gis lam 'bras bsgom pas khyi'i nyams byung nas 'a'u 'a'u zer bas de skad du grags pa de'i ngor mdzad pas 'a'u mar grags pa ste/__ma chung ma dang gcig par yang bzhed/__'di'i nyams kyi snang ba'i thad du nyams dgur bstan/__gsang dbang gi sngon 'gro sbyong ba gsum gyi thad du/__dang po lag pa bkru ste zhes sogs lus sbyong nyi shu tshang bar bstan pa sogs yod/__gzhung tshad bdun cu tsam mo/____/_!_bcu pa ni/__ngam shod kyi sngags pa ban+de gshin rje grags te 'ga' zhig gis 'da' 'phyar yin par bshad pa de'i ngor mdzad pa ste/__kun gzhi rgyu rgyud du rtsa yig rags pa rdo rje dang pad+mar bshad/__bar dor 'od sngon po la sems zin na dmyal ba/__dkar po la zin na byol song zhes bshad/__grib ma khrus kyis sel bar/__byang chub dang lam las rdo rje gri gug dang 'di la dgongs nas 'byung bzhi'i rlung nyis brgya nyer lnga pa re la lha mo'i ming gis btags pa/__zhes bshad/__ha rim la sogs par zhes pa thun mong ma yin pa'i gsang ba las/__phra zhing yang la zhes sogs drangs/__'dir gzhan yang thun mong min pa'i lung 'dren 'ga' re 'byung /__gzhung tshad ni go lnga tsam mo/____/_!_bcu gcig pa ni/__dge bshes gnyan gnyags dbang rgyal gyi ngor mdzad pa ste/__'di la/__lam sogs nyi shu'i bum pa'i dbang gi lam du/__lam dbyibs 1dang /__bum dbang gi 'pho ba 2dang /__gsang dbang gi lam du thig le'i rnal 'byor 3dang /__shes rab ye shes kyi lam du phyag rgya'i mtshan nyid 4dang /__dbang bzhi pa'i 'pho ba 5dang /__lam gyi dbang bzhi rgyas bsdus blang ba 6dang /__gdams ngag drug gi skyon med gsum la ma skyes pa bskyed pa'i thabs 7dang /__thun mong gi srung ba bcu bzhi'i 'dzag srung 8dang /__sgrib pa srung ba'i skabs kyi skyon med ma skyes pa bskyed pa'i 9thabs dang /__rlung rang gnas su zin pa'i thad kyi gzhung ji ltar 'gro ba ste zhal shes bcu dang ldan cing rnam 'grel thams cad las khyad par 'phags so/__(ka)_/klog skya mar/__kun gzhi rgyu rgyud rten dang brten tshul du/__til dang /__til mar ram/__'o ma dang mar ram/__chu dang 'khyag pa'am/__me tog dang dri'i tshul zhes bshad/__bum dbang gi 'da' ka ma'i mtshams sbyor du grub mtha' snyogs na tshe bskal pa'i bar du thub pas 'da' kha mi dgos zhes bshad/__mjug tu/__bla ma dam pa'i gsung ngag bdud rtsi'i bcud/__/'thung na srid pa'i sdug bsngal 'khyag zhi byed pa'i/__/dpe mkhyud spangs par d+harma kIrti yis/__/lar bzang po'i mtha' can dang /__la lar grags pa bzang po zhes 'byung yang don du zhus tshul las sbyar byang ma yin cing glog skya ba'i mtshan yin nam snyam lags/__/thob dang bris pa gus par spyi bos blangs/__/zhes 'byung //___//__!_

Footnotes

Other Information