JKW-KABUM-03-GA-001-026-wylie
ye shes bzhi ni sogs tshig don/
ye shes bzhi ni/_chos dbyings ye shes kun gyi khyab byed du gyur pas logs su ma bgrangs pa'i lhag ma bzhi'o//___//_!
'chad thabs kyi skyon spong ba'i skabs/__rdo rje theg pa na babs kyi skyon ni/__theg pa gong ma 'og mar babs pa'i skyon no/__/yo ga 'brog 'chol ba ni go rim 'chol ba/__rin po che rtsar 'chol ba'i skyon ni/__rin po che rtsar la brgyud pa'i dus su legs par bsdeb ma shes na/__gnas skabs su blta ba la yang mi mdzes shing /__rgyal khrims chen po yod pa'i sar chad pa 'byung ba bzhin no/__/zhes lam rim gyi TI ka las so/___/__!_
bshad thabs 'dren pa'i tshig bcu'i skabs/__ldems dgongs gsang ba brgyad kyis sbyar/__/ces pa ni/__gzhug pa/__mtshan nyid/__gnyen po/__bsgyur ba ldems dgongs te bzhi po re re la'ang /__tshig ldems po dang /__don dgongs pa gnyis re phye bas brgyad du 'gyur te/__de la dang po ni/__dper na gang zag kha cig sems zhums nas gsang sngags kyi sgor zhugs mi nus pa rnams la/__gsang sngags kyi don rtogs par sla ba'i tshul gyis tshig ldems por brjod pa ni don gnas lugs rang la rang chas lhun grub tu bzhugs pa la dgongs pa ste/__drang gi tshig thams cad la ngos bzung ngo /__/gnyis pa ni/__dbu mas dbyings spros bral du 'dod pa dang mthun par gsang sngags kyang spros bral du 'dod pas lta ba la khyad par med ces tshig ldems por brjod pa ni/__don mtha' bral lhun grub kyi lta ba la dgongs pa ste/__sgra mthun don dpag gi gtan tshigs thams cad la ngos bzung ngo /__/gsum pa ni/__gsang sngags sla chos su mthong zhing don du mi gnyer ba rnams la tshig gis bsgribs nas dka' ba ltar byed cing thabs kyis 'dzud dgos pa'i phyir/__'di skad du/__pha dang ma ni gsad bya zhing /__/rgyal po yul 'khor bcas bcom na/__/mi de thar pa thob par 'gyur/__/zhes pa la sogs pa'i tshig ldems por brjod pa ni/__don gzung 'dzin dang rnam shes tshogs brgyad 'khor dang bcas pa gnas su dag nas thar pa thob pa la dgongs pa ste/__ma spangs shing mi ldan pa'i gtan tshigs thams cad la ngos bzung ngo /__/bzhi pa ni/__theg pa 'og ma'i sgor zhugs pa'i gang zag phal cher rang gi yon tan gyis sems khengs nas/__gsang sngags la brnyas pa byed cing don du mi gnyer ba rnams la/__de dang de'i lam gyis 'bras bu mi thob pas yon tan dman pa'i tshul gyis tshig ldems por brjod pa ni/__don gsang sngags la ma brten par mthar thug gi 'bras bu mi thob pa la dgongs pa ste/__gsang sngags kyi che yon thams cad la ngos bzung ngo /___/__!_
khre'ur zhes pa ni mang po las logs su btus pa'i don/___/__!_
mi gnyis pa ni gnyis su med pa/___/__!_
sems lnga po de thun mong gi theg pa la sbyar ba'i tshe thun mong dang /__sngags la sbyar ba'i tshe mchog gi sems lnga'am/__yang lam spyir brtsi ba thun mong dang /__thabs lam gyi skabs khams kyi 'gros la brtsi bar mchog gi sems su bzhed do/___/__!_
lta ba'i skabs nyams su len byed lam gyi rim pa'i lha grangs dang /__blang bya rgyud don gyi lha grangs gnyis kyi/__dang po ni/__khyab byed lam kun khyab bya lta bas khyab pa'i phyir lam gyi lha grangs dgu ste/__lam rim las/__mnyam nyid ngang gis mi skrag pa/__/mngon byang nges pa'i shes rab 1dang /__/rnam pa kun ldan stong chen 2mthong /__/rang rig ye shes snying rjes 3gzigs/__/phyag rgya gcig sku 4'bras bur lta/__/thams cad gsal ba'i lta 5ba dang /__/bar chad med pa'i tshogs chen 6mthong /__/dbang 7bsgyur mnyam nyid mi 8g.yo ba/__/ye shes kun mkhyen lta ba 9dgu/__/zhes gsungs te/__de'i don ni/__chos nyid bden pa dbyer med pa mnyam pa nyid kyi ngang las mi skrag pa'i bzod pa thob pas/__rang rig pa'i mngon sum sgro 'dogs dang bral bar gnas pa la yid ches pa'i nges pa gting tshugs par rnyed pa ni nges pa'i shes rab kyi lta 1ba/__rnam kun mchog ldan gyi stong pa chen po mthong ba'i ngang la gnas pa de bzhin nyid kyi lta 2ba/__yul yul can gnyis su med pa'i rang rig pa'i snying rje chen po'i ting 'dzin gyis ye shes sgyu mar gzigs pa kun snang snying rje chen po'i lta 3ba/__'bras bu dbyer med yi dam lha yi sku gcig snang stong zung 'jug tu gsal bar lta ba phyag 4rgya gcig pa'i lta ba/__rtog tshogs thams cad lha'i dkyil 'khor chen por gnyis med du gsal bar rtogs pa phyag rgya spros bcas kyi lta 5ba/__sbyor lam bar chad med pa'i lam du yo byad thams cad snang la rang bzhin med par spyod pas tshogs gnyis rdzogs par mthong ba sbyor lam tshom bu tshogs 6sgrub kyi lta ba/__rig pa la rang dbang bsgyur zhing zag med mngon du mthong ba mthong lam/__rnam smin tshe dbang gi lta ba 7/__chos nyid mnyam pa nyid kyi don las blo mi g.yo ba sgom lam phyag 8chen gyi lta ba/__mnyam gzhag gi ngang la thams cad mkhyen pa'i ye shes kun yul med du mkhyen cing mnga' ba thar lam lhun grub rig 'dzin gyi lta ba dang dgu'o/__/gnyis pa ni/__rgyud kyi dngos po thams cad la'ang khyab byed lta bas khyab pa'i phyir/__rgyud don gyi lha grangs dgu ste/__snga mar/__rgyud don gzungs kyis zin pa ni/__dam tshig dam tshig ces bya ba/__/rang gi lta ba dam tshig yin/__/zhes sogs mi 'da' ba dam tshig__/blang dor med pa spyod pa'i/__bkod pa dkyil 'khor gyi rol ba phrin las kyi/__gnas su stobs pa mchod pa'i/_rim pa dbang gi__don du gnyer ba sgrub pa'i/__nyams su len pa ting 'dzin gyi/__'ching grol med pa sngags dang phyag rgya'i lta ba rnams te/__de dag thams cad lta ba bden gnyis dbyer med kyi rgyas btab nas bsgom pa'i phyir ro/___/__!_
gong 'og 'gar/__ru zhes snang ba ni/__gu ru'i sgra bsdus pas bla ma la 'jug ste/__snga 'gyur gyi skabs 'dir bla ma la dbang phyug dang ru sogs kyi sgras smos pa mang ngo /___/__!_
brgyad dang bzhi la nges par ni/__stang dpyal gnyis kyi dkyil 'khor te/__phyag rgya dgu yi mtshan mas gdab/__/ces pa'i phyag rgya dgu ni/__sku gsung thugs kyi lha gsum/__ye shes sems dpa'/__dbu rgyan rigs lnga bcas so/___/__!_
go ma ye ni ba byung lnga dang /__sum cu ni bla med kyi bum rdzas sum cu'o/___/__!_
rgyu'i yi ge la yi ge bzhi bcu rtsa gnyis zhes pa'i/__rgyu'i yi ge a dang /__bzhi bcu rtsa gnyis ni ka nas k+ShaHyi bar gsal byed 34dang /__i I nas/__o au/__bar dbyangs brgyad de zhe gnyis so/___/__!_
las tshogs ni rgyud don gzhan rnams sgrub pa'i cha rkyen du 'gyur te/__gang 'dod pa'i spyod yul thams cad lhun gyis grub cing 'gal rkyen gyis mi 'phrog pas lta ba rtogs pa'am/__spyod pa spyad pa sogs la thogs pa med pa'i phyir ro/___/__!_
sbyin sreg skabs/__dug dang tsha ba sa gsum dang /__/zhes pa'i sa gsum ni yi ge nyams pa las/__don tu tshwa gsum zhes rgya tshwa/__rgyam tshwa/__kha ru tshwa gsum yin nam snyam/___/__!_
mut+ka'i chan ni sran ma'i chan/__dan ti li zhes pa dan+da rog po ste/__bal yul sogs su snum nag gi rgyu'o/___/__!_
stangs kyi sems zhes las bzhi gang yin gyi dmigs pa'i 'dzin stangs bar ma chad pa/___/_!
sngags spu gri dang bcas pa zhes so/__/las bzhi so so'i sngags sham/__mnyam skyi_la ni bde lugs kyi skyil krung /__pad skyil long bu bsnol ba/__rus sbal gyi 'dug stangs ni stegs la hor 'dug byed pa/___/__!_
tshogs kyi 'khor lo'i yo byad kyi khyad par/__he ru ka galpo las/__rdo rje tshe dang gal phyis dang /__/tshe khrid dza gad dzag+ti dang /__/bran mo sham mo kun tu rgyug__/na ling ge rgyas la sogs bsham/__/zhes pa'i ngos 'dzin so so'i mchan gyis gsal ba bzhin no/___/__!_
thugs thig gi lung /__yi ge 'dus pa grub pa bzhi/__/mthu can red pa gang yin pa/__/bzhi rdzogs nyid las mi 'da' ba/__/gang la snang ba de ngo bo/__/zhes pa'i don/__sngags kyi ngo bo ni/__lus dang yan lag gi yi ge 'dus nas yi dam gyi lha gang yin pa bskyed pa na grub pa bzhi rang bzhin gyis ldan pa yin te/__chos nyid gnyug ma'i ye shes gzhom du med ba'i sngags kyi de kho na nyid rang la gdod nas rang chas su gnas pa ni chos nyid rang bzhin gyis grub pa/__rtsa rlung thig le rtog tshogs kyi rnam pa thams cad yi ge dang /__sngags dang /__phyag rgya'i dkyil 'khor chen por rang chas su shang ba ni chos can rang gi ngo bos grub pa/__de nyid skye 'gags med pa'i ye shes su rang snang bas sgrub pa po'i rgyud byin gyis brlabs pa byin rlabs kyis grub pa/__sngags kyi de kho na nyid rtogs shing goms pa'i sbyor bas mchog gi dngos grub sku lnga lhun gyis grub pa dang /__thun mong gi dngos grub la dbang 'byor ba mthus grub pa ste/__de lta bu'i sngags kyi nus pas dngos grub rnam gnyis la sbyor pa'i phyir nus mthu khyad par can du 'gyur ba ni sngags kyi ngo bo'o/__/phyag rgya'i ngo bo ni/__sku phyag chen/__gsung chos rgya/__thugs dam rgya/__'phro 'du phrin las bzhir rdzogs pa nyid las mi 'da' bas phyag rgya ste/__de lta bus rnal 'byor pa gang gi sgo gsum spyod yul dang bcas pa la rgyas btab par snang ba'o/___/__!_
tshe dbang rig 'dzin gyi skabs su/__ngo bo thabs dang sman rig 'dzin/__/rnal 'byor sgrol ma'i rig 'dzin dang /__/lam mchog rdzogs pa'i rig 'dzin bzhi/__/zhes pa'i don/__'di ltar tshe la dbang ba'i rig 'dzin ni sgras brjod rigs kyi phye pa'i dbang du byas na rgyu bzhi las byung ba ste/__rdo rje'i tshe sgrub pa'i thabs dang /__nye shing /__ra mo shag dang /__bdud rtsi lnga dang /__gzhan yang bcud len gyi sman sbyor ji snyed pa la brten nas tshe ring bar gyur pa dang /__dngos yid kyi phyag rgya la brten nas thabs lam steng sgo dang 'og sgo'i rnal 'byor gyis thig le dbab bzung bzlog dgram gyi sbyor bas dngul chu'i sbyor pas lcags rnams gser du bsgyur ba ltar snyigs ma dwangs ma'i lus su gyur nas tshe ring bar gyur pa dang /__sgrol ma'i rnal 'byor ni/__steng 'og gi 'khor lo dang /__steng 'og gi rlung rdo rje d+hU ti'i dbyings su kha sbyor gyi cho gas bcings pa las 'gog pa'i snyoms 'jug ltar tshe bskal par gnas pa dang /__lam mchog yongs su rdzogs pa ni/__de kho na nyid kyi don la phyin ci ma log pa'i goms pa brtas pas mthong lam zag pa med pa'i ye shes mngon sum du gyur pa'o/___/__!_
phyag chen gyi rig 'dzin la/__kr-i yas rigs gsum dbye ba ni/__spyir bya ba'i rgyud kyi bsgrub bya'i lha thams cad rigs drug tu 'du zhing /__de'ang bsdu na de bzhin gshegs pa dang /__pad+ma dang /__rdo rje'i rigs gsum du 'du pa las/__lam dus su sgrub pa pos gang la bsnyen pa'i lha de dang de yi rnam char shar ba'o/__/u b+ha yas rigs bzhir snang ba ni/__mi bskyod pa ma gtogs pa'i rigs lhag ma bzhi dang /__rnal 'byor gyi rgyud du rigs lngar snang ba ni spyi ltar ro/__/sarba mang+ga laM//___//_!
gter chen rin po che'i bka' 'bum dris lan skor las/__yan lag brgyad pa ni/__sangs rgyas gsang ba'i lam rim du/__/yan lag brgyad kyi tshul bzung la/__/zhes pa'i don sgeg pa'i rdo rjes rgyun bshags rtsa bar/__rgyal ba 'khor bcas spyan drangs te/__/bla ma snying por bzhugs pa la/__/phyag skyabs mchod dang bshags pa dang /__/yi rangs sems bskyed lus dbul dang /__/byang chub chen por yongs su bsngo/__/zhes dang /__de'i las byang du/__rdo rje slob dpon sangs rgyas dpal/__/zhes sogs 'byung ba ste/__'di la mya ngan las mi 'da' ba dang /__chos 'khor bskul ba gnyis mi 'byung ba sngags kyi smon pa nges pa lnga ldan gyi dbang du byas pa'o/__/yan lag bcu pa ni/__bka' brgyud yongs rdzogs hU~M sgrub las/__bla ma yi dam mkha' 'gro gshegs:__zhes sogs gsungs pa ltar/__spyan 'dren bzhugs gsol sngon du 'gro ba'i yan lag bdun spyi ltar la/__smon lam khyad par ba zur du phye bas so/__/'brug pa thams cad mkhyen pa'i bka' lan du/__bka' brgyud rang bzhed gnas lugs phyag chen dbang la ma ltos pa dang /__bde stong phyag chen ltos par bzhed pa la/__sa paN gyis mthing slad mdzad pa'i skyon spong khyad par can gyi sgrub byed 'gos lo yab sras rtsal bshad mdzad pa'i rjes su/__bka' brgyud kyi mkhas pa phal cher 'brang na'ang /__chos grags rgya mtsho dang /__mi bskyod rdo rje/__phyis kyi rje btsun tA ra nA tha sogs kyis/__des kyang bka' brgyud gong ma'i dgongs pa'i gnad ma lon pas 'phral gyi skyon sel nyi tshe ba tsam las min tshul gsungs pa sogs dgongs pa mi mthun pa mang bas skyong dka' ba lta bur 'dug kyang /__rang re bka' brgyud gong ma'i bzhed pa de don la gnas sam snyam pa'i mos blo lam byed las so skye'i blo la nges pa mchis pa sogs/__'di skor rje pad dkar dang /__rje sangs rdor ba/__bya gshong klu sgrub pa/__thub bstan chos rnam pa sogs kyi brgal lan rgya cher 'dug__/dkar brgyud ces bri ba dang sgra bshad mdzad pa ni ma dag par bzhed snang /___/__!_
gtsug lag ni rgyal ba'i gsung rabs dang /__de gtso bor gyur pa'i rten gsum gyi bzhugs gnas la gtsug lag khang ngo /___/__!_
sku yi bkod pa snga ma bsdus nas phyi ma bzung bar skye ba dang /__sprul gzhi ma bsdus par sprul pa gzhan dag ston pa sprul pa zhes bzhed/___/__!_
chos kyi rgyal po'i mdo las/__lha dang bcas pa'i 'jig rten na/__/dkon mchog gsum po ma gtogs pa/__/yon gyi gnas 'ga' yod min pas/__/dngos po kun gyis de la mchod/__/ces so/__/__!
zhabs brtan sogs kyi tshe/__sku rten du tshe dpag med dang thub dbang /__gsung rten du chos kyi dung dang gaN+Di ste/__chos kyi dung ni sgra chen ldan/__/chos kyi gaN+Di sgra bo che/__/zhes so/__/gzhan yang rdo rje dril bu/__glegs bam/__thugs rnam par grol ba'i ye shes lnga mtshon byed rigs lnga'i phyag rgya sogs yon tan gyi rten du sku yi nyer spyad/__phrin las kyi rten du phyag rtags tham zhu sogs/__rjes 'brel rgyal srid bdun dang /__bkra shis rdzas brgyad sogs 'bul na legs/___/__!_
gsar ma'i bla ma la las/__rgyal blon snga dar gyi dus su 'gyur ba'i sngags rnying ma yin kyang /__mdo de ltar ma yin pa'i dbang che'i stang gcod byas pa 'ga' re gser mdog paN chen sogs kyis yi ger bkod 'dug kyang /__rgya gar la don gyis gsar rnying gi khyad par yod kyang /__tha snyad la med pa dang /__bod du 'gyur snga phyi'i bye brag las de skad du tha snyad btags pas snga 'gyur gyi mdo sngags thams cad la rnying ma zhes bzhed pa rang 'thad/__/__!
bsdus pa zhes pa'i sgra don/__ji skad du/__rgyal ba'i bka' dang de 'grel bstan bcos kyi/__/dgongs don ma lus legs par bsdus pas na/__/bsdus pa zhes su mkhas pas mtshan du btags/__/zhes ba ltar dang /__grwa ni de nyid slab pa'i sde tshan gyi grwa ste/__dper na/__bshad grwa/__sgrub grwa zer ba lta bu'o/_/slob dpon phya bas dbu ma/__phar phyin sogs la'ang bsdus pa re re mdzad cing /__khyad par tshad ma bsdus pa yid kyi mun sel rtsa 'grel mdzad pa nas shin tu dar ro/___/__!_
byin 'bebs kyi rdzas bla med spyir 'jug pa/__skyes bu gtsang ma'i byang sems dkar po/__bud med rigs bzang gi zla mtshan/__sngags pa nus ldan nam/__dge slong khrims ldan nam/__skyes pa gzhon nu'i dri che chung /__mi rims ngan pas shi ba ma yin pa'i klad pa sha chen gyi dwangs ma ste bdud rtsi lnga ni rtsa ba'i rdzas dang /__byi la nag po'i brun/__ra yi rkang lag gi nywa bzhi'i sha__/sgrub pa po'i skra sen phran bu/__gu gul dang bcas pa rnams las/__phyag len du/__rdzas gong ma rnams sne 'dzom tsam la/__dri shugs bskyed phyir ga bur/__dzA ti/__gur gum rnams cha phran re/__tsan+dan dkar dmar/__a ga ru/__khyad par stod kyi ar nag dang /__nA gi rnams gang mang /__de thams cad las 'phar ba'i gu gul nag po bungs bskyed pa rnams phye ril gang byed kyang byin gyis brlabs pa'i nang mchod kyis kha phru cung zad btab/__byin 'bebs kyi sngags kyis yun bsrings te bsgrub pa'am/__tha na'ang brgya rtsa tsam bzlas nas/__byin 'bebs kyi skabs yi dwags kyi me zhes ro sol gyi me rnyed na dang /__de min sol me gang rung la bsreg go___/__!
bdag mdun tha dad pa ni/__thog mar bdag bskyed rdzogs par bsgoms nas 'khor rnams rang nyid gtso bo yab yum la bsdus te dkyil 'khor gyi dbus su phyin par mos la slar mdun bskyed bsgrub pa dang /__bdag gi rnal 'byor nyer bsdu'i bar du byas nas/__de'i 'od gsal dang de nyid mtshams sbyar nas mdun bskyed bsgom pa dong sprugs pad+ma brgya ldan du bshad pa ltar dang /__yang gyer tshig gcig gis bdag mdun bum gsum rnam pa ma 'dres pa me long dang gzugs brnyan gyi dpe ltar bsgom pa sogs kyang /__snga 'gyur gyi skabs su bye brag gi dmigs bsal med na/__rngams glog las/__de nas sngags pas mnyam gzhag ste/_/ting 'dzin dkyil 'khor gsal bar bsgom/__/gsal ba gnyis min dkyil 'khor du/__/rang bzhin kun rdzob spyan drangs te/__/dbab dang gzhug dang brtan pa'o/__/zhes bdag mdun dbyer med du gsungs pa nyid gtso bor bya ste/__de yang sgrub gzhi bdag dang bris pa'i dkyil 'khor gnyis/__sgrub chos ting 'dzin gsum nas brtsams dam tshig gi 'khor lo gcig gis bsdus par bsgom pa'o/___/__!_
rdzogs pa chen po zhes pa'i sgra don/__san+d+hi zhes pa'i sgra las thams cad der 'dus shing chub pa'i don dang /__ma hA'i sgra las thun mong gi tshul las 'phags shing /__de las gong du bogs dbyung du med pas na chen po'o/__/slob dpon chen pos/__bsod nams dang ye shes kyi tshogs rdzogs shing 'bras bu'i don lhun gyis grub pa'i don to/__/zhes gsungs pa bzhin spyir mos gus dang gdams ngag gi don la blo rtse gcig tu dril bas rtogs par bya ba yin la/__bye brag rang byung gi ye shes de lam du byed pa la rdzogs chen sems sde dang phyag chen sogs mtshan ma bshig pa'am la bzla ba'am thag gcod pa ste spang bya rnam shes kyi phyogs nas bslab pa dang /__man ngag sde ba'i phyogs kyis bzang ngan gyi rtog pa ris mi 'byed par rtsol ba bshig pas la bzla ba ste gnyen po ye shes kyi phyogs nas bslab pa'o/___/__!_
rje rin po cher rnying ma'i lung bstan 'ga' zhig tu klan kar mdzad pa ni rjes sor bcos bsgyur dang cal sgrogs tsam las/__don du gter ston grub pa'i dbang po nyi zla sangs rgyas kyis o rgyan la lung bstan dogs sel zhus par tshad mar bsgrubs pas som nyi bral lo/___/__!_
dngos grub kyi rdzas/__zla rgyal zho dang khur ba/__zla khrom thud dang phrum/__dzak+ti sha__/kun tu rgyu tshwa/__spang na skyes shwa mang sna tshogs dang rtsi thog mar la bshad cing /__zla khrom sogs bzo rgyun ni khungs ldan gyi man ngag ltar ro/___/__!_
'phags pa thabs kyi zhags pa pad+mo'i phreng ba'i don bsdus pa/__tshe 'dir 'grub pas/__yun ring gis 'grub pa'i theg chen spyi las 'phags pas 'phags pa/__thabs ni snying rje chen pos mtshams med lnga la spyod pa dang /__phyin ci log la zhen ba'i sems can thams cad sgrol bas na de skad do/__/zhags pa ni mi gtong ba ste 'khor ba nyid nas mnyam pa'i chos su mkhyen pas/__'khor ba la mi gtong bar sbyor ba'o/__/'di ni sbyor ba gnyis sam/__che mchog rnam gnyis zhes kyang bya/__pad+ma ni shes rab kyis chos thams cad la dpyod kyang de la ma chags pa'o/__/phreng ba ni sprul pa'i phreng ba rgyud mi 'chad de thabs so/__/don bsdus pa ni gsung rabs yan lag bcu gnyis dang /__tan+t+ra bco brgyad la sogs pa'i don bsdus pa'o/__/mdor na thabs dang shes rab gnyis su med pa ni brjod bya ste bskyed rdzogs thams cad la'ang de kho nas khyab pa'o//____//__!
rdo rje bkod pa kun 'dus rig pa'i mdo las/__bdag med gnyis bral bde chen klong /__/sangs rgyas kun gyi bde ba che/__/ye nas lhun grub 'dus ma byas/__/thig le chos dbyings ye 'byams pa/__/kun khyab gdal ba'i snying por 'dus/__/zhes dang /__snang ba med pa'i rang bzhin ni/__/nam mkha' lta bur de nyid 'gyur/__/chos dbyings nam mkha' lta bu ste/__/nam mkha' la yang mtshan nyid med/__/ces dang /__lta dang dam tshig bsgrub pa yi/__/dam pa'i mdzod gsum smra shes kyang /__/zhes dang /__sa rab mchog tu bgrod pa la/__/thabs mchog lnga yis bgrod bya ste/__/rdo rje tshogs dang bsnyen pa dang /__/nye ba dang ni sgrub pa dang /__/sgrub pa chen po spyad par bya/__/zhes dang /__kun rdzob tshogs kyi rgyu des ni/__/yang dag tshogs chen ci 'dra ba/__/mchog gi bde ba dam pa dang /__/de nyid chen por de nyid 'gyur/__/zhes dang /__lha rnams mnyes par bya ba dang /__/bgegs rnams zhi bar bya ba dang /__/don grub shi ba gso ba'i phyir/__/las 'dir spyod pa shin tu gces/__/zhes dang /__'khor ba chos kyi dbyings nyid las/__/sems can sangs rgyas snying por shar/__/sgra skad bsam gyis mi khyab pa/__/thams cad bzlas brjod sngags kyi tshig__/ces dang /__'khor ba shes rab yum nyid la/__/snying rje thabs kyi rgyal po yis/__/'du 'bral med par sbyor bas ni/__/thams cad rgyal ba'i sras su bskyed/__/ces dang /__'khor ba bsgral ba'i zhing 'di dag__/ye shes 'bar ba'i mtshon rnon gyis/__/rang bzhin med par bsgral nas ni/__/mnyam nyid chos sku chen por bton/__/ces dang /__'dus pa chen po'i rnal 'byor pa/__/srid pa gsum gyis phyag byas pas/__/bla ma'i sa la gnas pa ni/__/dbang mchog sum cu rtsa drug yin/__/phyi yi dbang dang nang gi dbang /__/sgrub pa'i dbang dang gsang ba'i dbang /__/bcu dang bcu gcig bcu gsum dang /__/rnam pa gnyis kyis rdzogs par 'gyur/__/zhes so/__/rmad byung sgrub pa'i dkyil 'khor du/__/'jug dang dngos grub gsol ba dang /__/dbang bskur ba yi las rnams bya/__/zhes so/__/byang chub sems kun byed rgyal po las/__sangs rgyas sku dang ye shes yon tan dang /__/sems can lus dang bag chags la sogs pa/__/snang srid snod bcud bsdus pa thams cad kun/__/byang chub sems kyi ngo bo ye nas yin/__/zhes dang /__nga yi rang bzhin ma bsgribs kun khyab pas/__/gsal ba'i nam mkha' ye shes gzhal yas khang /__/rang byung ye shes nyid las gzhan mi bzhugs/__/zhes so/__/sems ni ji bzhin sa yi ngo bo ste/__/gnyis med ye shes bde ba chen po la/__/rnam pa kun ldan rnam pa yongs kyis med/__/spros bral nam mkha' bzhin du ye gnas la/__/dmigs pa'i yul 'das gcig ces bgrang du med/__/ces so/__/don gyi snying po rnal ma byar med la/__/shin tu rnal 'byor rdzogs chen lta mthong ba/__/byang chub sems ni kun gyi snying por mthong /__/de nyid ma bcos don gyi rnal mar mthong /__/zhes dang /__chos kun ma lus pa yi snying po ni/__/ma skyes rnam par dag pas sgrib pa med/__/bgrod pa'i lam dang bral bas gol sa med/__/ye nas lhun gyis grub pas btsal du med/__/chos kun snying po byang chub sems su gcig__/ces so/__/sgom dang mi sgom rkyen la rag ma las/__/bsgom bya ji ltar snang ba'i chos rnams kun/__/gang du ji ltar bzhag pa'i tshul med par/__/ma btsal rang sar bzhag pa sgom pa yin/__/zhes dang /__de ltar sgom du med pa'i snying po la/__/ma yengs dran pas bzung ba man ngag yin/__/zhes dang /__kun mkhyen rgyal po'i spyod pa bstan pa ni/__/gang ltar spyod pa de ltar mi 'gal te/__/byas dang ma byas gnyis ka skye med par/__/shes pas gang ltar spyad kyang skye med don/__/zhes dang /__ji ltar snang ba de bzhin nyid du gcig__/'di la sus kyang 'chos par ma byed cig__/ma bcos mnyam pa'i rgyal po de la ni/__/mi rtog chos sku'i dgongs pa de la gnas/__/zhes so/__/spros pa med cing sgrub pa med/__/skye ba med cing 'gag pa med/__/'gog pa med par de bzhin gnas/__/rnam par mi rtog snying po 'di/___/nam mkha' bzhin du ye gnas pas/__/rtog pa'i smra bsam yul las 'das/__/zhes dang /__nga ni ye nas rang byung ye shes te/__/nga ni ye nas chos kun snying po yin/__/nga ni kun byed rgyal po byang chub sems/__/nga yi mtshan 'di sems dpa' rtogs par gyis/__/zhes dang /__rang byung zhes ni bya ba ni/__/rgyu rkyen med pa'i snying por bas/__/rtsol sgrub kun las 'das pa yin/__/ye shes zhes ni bya ba ni/__/'gags pa med cing ma bsgribs pas/__/chos kun ma lus ston par byed/__/ces dang /__chos rnams thams cad nga yin pas/__/nga yi rang bzhin 'di rig na/__/chos rnams thams cad rig 'gyur pas/__/bya byed rtsol sgrub kun las 'das/__/mi rtsol lhun gyis grub _par 'gyur/__/zhes dang /__nam mkha' lta bu sems gyi chos nyid la/__/lta ba sgom med dam tshig bsrung du med/__/phrin las btsal med ye shes sgrib pa med/__/sa la sbyong med bgrod pa'i lam yang med/__/ces so/__/nga ni mi rtog mnyam par gnas pa'i phyir/__/rtog med mnyam nyid chos skur ye sangs rgyas/__/nga yi ngo bo kun tu longs spyod phyir/__/nga nyid longs spyod rdzogs skur ye sangs rgyas/__/nga nyid rang byung ye shes snang ba'i phyir/__/nga nyid thugs rje sprul skur mngon sangs rgyas/__/des na sangs rgyas kun gyi snying por bshad/__/ces so/__/dran bsam yid la rgyu ba ma lus kun/__/skye ba med pa'i ngang la ma yengs pa/__/gang ltar bsam yang sgom pa yin shes na/__/ma bsgom gang ltar bzhag kyang yengs pa med/__/ces dang /__kun byed nga ni ye nas de bzhin nyid/__/de bzhin nyid la gzung 'dzin med pa'i phyir/__/chos rnams de ltar gang gis rtogs pa la/__/srung dang mi srung 'du shes 'jug pa med/__/ces dang /__sems ni ji bzhin pa yi ngo bo ste/__/ji bzhin pa la 'chos par byed ma myong /__/rang byung nga la rgyu rkyen kun dang bral/__/sgo gsum btsal med lhug pa nyid du zhog__/sems dpa' rdo rje ji bzhin nyid sgoms shig__/rang lus mi bcos dbang po mi brtul te/__/ngag kyang mi bsdoms bya rtsol byar yang med/__/sems kyang gar gtad mi g.yo'i ngang la bzhag__/byas pa med par don kun rdzogs par 'gyur/__/zhes dang /____/__!_
mdo dgongs 'dus las/__las ngan myur du rgyun bcad na/__/gnas ngan dag las myur du sgrol/__/ces dang /__'khor bar 'khrul pa'i sgyu ma ngang /__/rnam dag rnam byang sgyu ma gnyis/__/sems can sangs rgyas tha dad kyang /__/de bzhin nyid la yong ye med/__/ces dang /__'khor ba'i sdug bsngal rmi 'dra bas/__/dbugs chen phyin nas rmi sangs ltar/__/thams cad bde chen byang chub sems/__/mkha' ltar khyab bdal nyid du snang /__/zhes so/__/bsam du med pa'i chos nyid ni/__/rmi lam de bzhin nyid du bzhag__/ces dang /__'di ltar snang ba'i chos thams cad/__/ye'am ngang gis sangs rgyas la/__/min las yin par 'gyur ma yin/__/ngo bo nyid kyis de nyid la/__/yin dang min zhes ci byar yod/__/ces dang /__chu'am sa dang nam mkha' 'am/__/me'am de bzhin rlung rnams la/__/sku gdung spel mchod ring bsrel rnams/__/brtsams pa'i las chen 'khor lo bya/__/zhes dang /__rngams glog las/__e ma'o dngos po thams cad dang bral ba/__/phung po khams dang skye mched dang /__/gzung dang 'dzin pa rnam par spangs/__/chos bdag med pa mnyam nyid la/__/rang sems gdod nas ma skyes pa/__/stong pa nyid kyi rang bzhin no/__/zhes dang /__/rin chen lnga dang sman lnga dang /__/spos lnga 'bru lnga snying po lnga/__/gwa'u'i nang du blugs nas kyang /__/sa gzhi gter dang ldan par bya/__/zhes dang /__srid gsum sems can thams cad la/__/log rtog 'khrul pa bsam mi khyab/__/de nyid gzhil ba'i 'dul thabs su/__/phyi nang sdom pa ji snyed pa/__/rtog 'dul dam tshig de snyed gsungs/__/zhes dang /__thog mar bsnyen pa yin par bshad/__/gnyis pa dge ni nye bsnyen pa/__/gsum pa sgrub pa zhes su brjod/__/tha ma sgrub chen po zhes bya/__/zhes so sor bye brag bcas dang /__yum la sbyar ba'i tshul sogs gsungs/__gsang ba'i tshig la gsal 'dris shing /__/don la gzhol zhing yid ches kyang /__/dbang bskur bka' rtags ma phyin par/__/sa rnams thob par mi 'gyur ro/__/zhes so/__/yang dgongs 'dus las/_e ma'o ngo mtshar=__rdzogs=__stong pa ma yin mi stong min/__/dbu ma'ang dmigs su yod ma yin/__/zhes so/__/kun byed las/__rtog med mnyam nyid chos kyi sku/__/bzung bas mi zin chu zla 'dra/__/kun tu bzang po'i rol pa yis/__/A li kA li rab tu bstan/__/ces so/__/kun 'dus rig pa'i mdo las/__'gro drug rgyal ba'i sras po 'di/__/ma rtogs log par 'khyams pa rnams/__/rgyal ba'i sras su bskyed nas ni/__/'khor ba'i rgyun lam bcad par bya/__/nyi zla'i nang du bzhag nas ni/__/bcu drug sa la rdzogs par 'gyur/__/de nas rig ma mtshan ldan la/__/don dang ldan pa'i mkhas pa yis/__/sbyor ba'i yan lag kun rdzogs nas/_/yum gyi mkha' dbyings zla gam la/__/grub pa'i gzhal yas khang du bskyed/__/rtsibs brgyad zla gam dgur gsal la/__/byang chub sems dpa'i phyag rgya'i tshogs/__/lha dgur gsal ba'i ye shes bskyed/__/des ni thams cad rdzogs par 'gyur/__/zhes dang /__de nas sems dpa'i rdo rje snying po de mi 'gyur ba gtan 'pho ba med pa zhes bya ba'i ting nge 'dzin la snyoms par zhugs nas 'di skad ces gsungs so/__/rnal 'byor rig 'dzin gang zhig rnams/__/mi 'pho bar ni gnas 'dod pas/__/lo gcig gam ni zla gcig gam/__/de bzhin zhag gi rnam grangs kyang /__/bco lnga'am yang na bdun bar du/__/tho rang thun tha'i dang po'i tshe/__/rig 'dzin rnal 'byor sgrub pa po/__/shar gyi phyogs su kha bltas te/__/shar phyogs nam mkha' bsdus pa yi/__/lha klu gnod sbyin 'jig rten bcas/__/thams cad khongs su bsdus nas kyang /__/dbugs de slar yang mi dbyung bar/__/rang gi khong du bstim par bya/__/tha mar sna yi nang du bsre/__/de ltar mang por bsgrubs pa dang /__/dpal che gzi brjid thams cad thob/__/ces gsungs so/__/zhes pa 'di le'u bcu gcig pa las rdo rje tshe sgrub pa las/__gsungs pa ste nam mkha' zas su za ba'i tshe sgrub khyad par can gyi man ngag go/__/a+thi+-i/__/rdo rje tshe sgrub pa 'di lung lugs kyi tshe sgrub dang /__'di 'og bdud rtsi sman gyi sgrub pa yang bstan to//___//__!
de la spyir lung a nu yo ga'i lugs kyis/__rtogs bya gzhi dang rtogs byed kyi lam gnyis rnal 'byor gsum du bsdus nas bshad de/__ji skad du/__spyi mdo las/__grogs po dag__/de bas na bsam gyis mi khyab pa'i rnam pa gang zhe na/__'di ltar bsam gyis mi khyab pa'i chos thams cad kyi rnam pa ni/__rnal 'byor rnam pa gsum gyis yongs su 'brel ba ste/__gsum gang zhe na/__bya ba'i rnal 'byor dang /__bya ba byed pa'i rnal 'byor dang /__bya ba med pa'i rnal 'byor ro/__/zhes dang /__rtsa rgyud kun 'dus las/__chos thams cad ni rnal 'byor rnam pa gsum du 'dus par shes par bya'o/__/gsum gang zhe na/__rgyu'i rnal 'byor dang /__rkyen gyi rnal 'byor dang /__'bras bu'i rnal 'byor ro/__/zhes gsungs shing /__rtsa bshad kyi rgyud de gnyis kyi lung don dgongs pa gcig tu bsgril nas tha snyad btags pa ni/__mdo 'grel lung bstan ma las/__ji snyed chos rnams 'dir 'dus la/__/'di nyid rnal 'byor gsum du gnas/__/rgyu dang rkyen dang 'bras bu rnams/_/bya dang byed dang byar med do/__/ji snyed chos rnams thams cad kun/__/nang dang phyi dang phyi nang chos/__/sangs rgyas sems can dbyer med pas/__/dang po'i rnal 'byor du bshad do/__/zhes dang /__don bsdus las kyang /__kun bzang thugs rjes 'gro don du/__/theg pa gsum snang 'dul mdzad pa'i/__/don dam nges pa'i theg pa las/__/gsang sgo mtshon pa'i mdo rgyud don/__/rnam pa gsum du shes bya ste/__/bya ba rgyu dang byed pa rkyen/__/bya bral 'bras bu'i rnal 'byor dag__/ji snyed chos kyi rtsa bar bshad/__/ces pas bya ba rgyu'i rnal 'byor/__byed pa rkyen gyi rnal 'byor/__bya bral 'bras bu'i rnal 'byor dang gsum/__dang po ni/__chos thams cad kyi gshis lugs dkyil 'khor rnam gsum ma 'dres yongs rdzogs su gnas pa nyid yin te/__de las/__phyi nang bye brag ji snyed pa'i/__/chos rnams thams cad byang chub sems/__/ji bzhin dang du ye gnas pa/__/shes par bya ba'i rgyud don yin/__/zhes so/__/gnyis pa ni/__lam gyi rtsol ba dang bcas pa'i byed pas 'khor ba las 'dren cing rang rang gi 'dod pa'i 'bras bur 'jug par byed pa nyan rang byang sems kyi theg pa gsum ste/__de las/__gzhan du 'bras bu re rtsol med/__/bsgrub bya nyid la lam gnas pas/__/thabs chen theg 'di bya bral ba'o/__/zhes so/__/de la rkyen 'bras kyi rnal 'byor gnyis po de la thun mong spyi'i lam zhes bya zhing /__de'i nang nas kyang mdo khyad par can gyi lam la dbye na/__de las/__ngo bo thabs dang shes rab ste/__/zhes pas/__thabs kyi nges pa'i lam dang /__shes rab rnam par grol ba'i lam gnyis su grangs nges pa las/__dang po ni/__zhu bde 'gyur med kyi bde chen lhan cig skyes pa'i ye shes sgrub pa'i thabs gang zhig__/'khor lo bzhi'i sgom thabs la brten nas lhan skyes kyi ye shes rim gyis 'dren pa'i thabs steng sgo'i man ngag dang /__mkha' gsang gnyis kyi snyoms 'jug la brten nas lhan skyes kyi ye shes gcig car du 'dren pa'i thabs 'og sgo'i man ngag gnyis te/__de las/__rol pa'i kar la sogs pa/__/man ngag thabs kyis der 'jug dang /__/zhes gsungs/__gnyis pa ni/__de'i 'phros las/__thos bsam sgom pa'i tshul 'gro ba'o/__/der ni 'jug pa rnam gsum ste/__/rtog dpyod don dang yi ge yi/__/rjes 'jug ces pas/__rtog dpyod kyi rjes su 'jug pa lta ba gtan la dbab pa ni lam sgom pa'i sngon du 'gro dgos te/__de yang chos can shes bya'i don la/__shes byed rigs pa'i gtan tshigs rnams kyis so sor brtags pas chos thams cad gnas lugs chos nyid ji bzhin pa dkyil 'khor rnam gsum dbyer med bsam brjod dang bral bar gtan la phebs pa ni grub mtha'o/__/don gyi rjes su 'jug pa ni/__rnam par mi rtog pa'i ting nge 'dzin bsgom pa'i rim pa yin te/__bsgom bya'i don chos nyid snying po ji bzhin pa'i ngang la/__sgom byed kyi blo de bzhin par bzhag nas bsgom pa'i phyir/__de ltar yang spyi mdo las/__ji bzhin pa yi chos nyid la/__/de bzhin ba yi blo bzhag nas/__/brjod pa med pa'i ngang nyid las/__/ma yengs rgyun du dran pa'o/__/zhes so/__/yi ge'i rjes su 'jug pa ni/__mtshan bcas lha'i ting nge 'dzin sgom pa'i rim pa ste/__bskyed sngags brjod pa tsam gyis chu las nya ldang ba ltar snod bcud lha'i dkyil 'khor du gsal la ma 'dres par bsgom pa gtso bor byed pa'i nyams len no/__/de ltar yang bang mdzod 'phrul lde las/__a nu yo ga'i theg par ni/__/snying po tsam zhig brjod byas pas/__/ma bskyed rdzogs pa'i lha ru bsgom/__/zhes so/__/de yang blo che ba gcig car pas ni/__chig chod du rtogs goms mthar phyin par byed pas sa lam rim par bgrod pa'i rtsol ba dang bral ba yin la/__blo chung 'bring gnyis ni/__sa bcus bsdus pa'i slob lam bzhi rim gyis sam/__thod rgal gang rung gis bgrod nas/__mi slob pa'i lam mthar thug gi 'bras bu la sbyor bar byed pa ste/__de la sa bcu gang zhe na/__dang po 'gyur ba ma nges pa'i sa/__gnyis pa brten pa gzhi'i sa/__gsum pa gal chen sbyong ba'i sa/__bzhi pa bslab pa rgyun gyi sa/__lnga pa bsod nams rten gyi sa/__drug pa brten pas khyad par du 'gro ba'i sa/__bdun pa dmigs pas 'bras bu skye ba'i sa/__brgyad pa gnas mi 'gyur pa'i sa/__dgu pa brdal ba chos nyid kyi sa/__bcu pa rdzogs pa spyi chibs kyi sa rnams so/__/de dag kyang 'dun pa skye ba'i skabs sogs sa bcu po re re dang sbyar ba'i gnas skabs bcur/__chos nyid snying po ji bzhin pa'i rjes su 'jug pa'i rang sa'i lam na 'phar pa'i rim pa ltar bsgoms pas/__sa bcu rang rang gi spyad bya/__rkyen 'gyur las kyi bag chags rags phra gnyis dang /__mngon du rgyu'i bag chags rags 'bring phra gsum dang /__kun 'gro dang /__lhan cig gnas pa dang /__bag la nyal rags 'bring phra gsum gyi sgrib pa rnams rim par dag nas/__sa gong ma gong ma la sbyor ba'i g.yo ba byang chub kyi sems la sogs te sems bcu po dpe skar ma phra mo lta bu la sogs sa bcu dang sbyar nas bgrod par rtsa rgyud kun 'dus kyi le'u gnyis pa sogs mdo'i rtsa bshad kyi rgyud dang man ngag rnams las rgya cher gsungs so/_/de rnams slob pa'i lam bzhis ji ltar bsdus tshul ni/__sa dang po dang gnyis pa gnyis tshogs lam 'dun pa sems pa'i rnal 'byor gyis bsdus te/__de thob pas spyan dang mngon shes dang rdzu 'phrul phra mos sprul sgyur nus pa sogs thun mong gi dngos grub rnams rim gyis grub cing sangs rgyas sprul pa'i sku'i zhal mthong ba sogs tshogs lam gyi yon tan rnams 'char ro/__/de nas sa gsum pa bzhi pa lnga pa gsum ni sbyor lam rigs chen 'byed pa'i rnal 'byor gyis bsdus te/__de rlung sems tsam gyi lha sku grub cing /__nyin snang mtshan snang gi bar mtshams med bar thams cad sgyu ma lta bur rtogs pa sogs sbyor lam gyi yon tan rnams 'char ro/__/de nyid du tshogs kyi spyod pa'i nye rgyu spyad pas/__khu rdul rlung yid kyi 'gyur pa rags pa bcom ste/__'jigs pa lnga dang bral zhing zag pa zad nas/__drug pa brten pas khyad par du 'gro ba'i sa mthong lam dbugs chen phyin pa'i rnal 'byor gyis bsdus pa/__chos nyid rang mtshan mngon sum du mthong ba'i stobs kyis bde stong ye shes 'od gsal gyi lha sku grub cing /__yon tan brgya phrag bcu gnyis la dbang thob/__longs sku rigs lnga'i zhing bgrod nas chos nyan pa sogs mthong lam gyi yon tan thams cad 'char ro/__/de nas mthong lam 'od gsal las langs pa'i rjes la mngon rtogs/__bdun pa dmigs pas 'bras bu skye ba'i sa sgom lam lung chen thob pa'i rnal 'byor gyis bsdus pa thob pas chos nyid rtogs pa'i ye shes dang dag pa lha sku'i snang ba rgyun mi 'chad pa zung 'jug gi sku 'grub cing /__de nas sa brgyad pa dgu pa/__bcu pa gsum ni mthar lam rtsal chen rdzogs pa'i rnal 'byor gyis bsdus pa yin la/__de ltar bsgom mthar gyi lam gyi sa bzhi po de thun mong ba ltar na/__sgom lam rgyun mtha' dang bcas pa'i sa dgus bsdus pas na/__de rnams su sngar mthong lam gyi yon tan brgya phrag bcu gnyis po de stong du 'gyur nas/__zhing khams brjod du med pa bye ba khrag khrig brgya stong phrag bcu'i rdul shin tu phra ba snyed dang mnyam pa'i bar du rim bar 'phel zhing /__cho 'phrul bzhi dang /__dbang bcu la sogs pa'i yon tan rnams 'char ba yin no/__/de ltar slob pa'i lam bzhir zung 'jug gi lam nyams su blangs pas mthar phyin pa'i 'bras bu mi slob pa'i lam brnyes te/__mdo sde rgyan las/__sgom pa tha ma rdzogs nas ni/__/'od zer chen pos dbang bskur ba/__/zhes 'byung ba ltar sngags kyi theg par/__slob lam gyi rtse mo sa bcu rgyun gyi tha mar 'dod chags chen po'i lam gyi 'bras bu'i dbang bskur bas dga' bzhi lugs 'byung ldog gi mthar khu rdul phra mo steng 'og tu 'gag cing /__de'i skad cig gnyis par rlung phra mo 'gags pas/__'gyur ba de myong ba'i shes rig phra mo'ang rgyun chad pa na/__spyi mdo las/__gzhan nas ma byung rang byung ba/__/zhes dang /__lung bstan pa las/__tha ma yid bzhin nor bu ltar/__/ma bsags zad 'phel med pa'i sku/__/gdul bya'i don snang dngos gzhi med/__/lhun grub yon tan rang snang ba'o/__/zhes gsungs pa ltar gzhi la yon tan lhun grub tu bzhugs pa nyid mngon du gyur pa tsam las/__don dam par dri ma sngar yod bsal rgyu dang yon tan sngar med sgrub tu med kyang /__snang lugs la glo bur gyi dri ma mtha' dag bral stobs kyis spangs rtogs yon tan gsar du thob pa ltar snang ste/__mi slob pa'i zung 'jug 'bras bu'i chos lnga'am nyi shu rtsa lnga dbyer med lhun grub kyi ngo bo sku bzhi ye shes lnga'i bdag nyid dpal kun tu bzang po'i go 'phang la dbang 'byor bas/__rtag khyab lhun gyis grub pa'i phrin las kyi don mdzad do/__/de ltar yang don bsdus las/__'bras bu nyid ni rdzogs sangs rgyas/__/sku gsung thugs dang yon tan las/__/nyi shu rtsa lnga bsdus mtha' yas/__/lhun rdzogs rnam kun mkhyen pa'o/__/zhes gsungs so/___/__!_
saM gra ha sU tra'i dbang gi spyi don rgyud lung man ngag gi gnad gsal byed sgron me las/__de yang phyogs bcu dus gsum gyi de bzhin gshegs pa thams cad kyi dgongs pa zung 'jug ro gcig tu bzhugs pa'i bdag nyid/_'phags mchog rnams kyi thugs su legs par chud cing /_thar 'dod kyi skyes bu rnams kyis rtogs par bya ba'i yul ni/__dbyings dang ye shes zung du 'jug pa'i mtshan nyid can/__dkyil 'khor rnam gsum dbyer med sras rtsa ba byang chub sems kyi dkyil 'khor du chos thams cad ye nas sangs rgyas pa nyid de/__spyi mdo dgongs pa 'dus pa las/__thams cad bdag nyid der gcig pas/__/ye nas sangs rgyas bde chen nyid/__/skye 'gags med pa'i snying po yin/__/bya byed med pa'i dkyil 'khor gsum/__/ye nas grub zin lhun gyis grub/__/ces gsungs/__/de yang dkyil 'khor rnam gsum gang zhe na/__snang srid 'khor 'das kyis bsdus pa'i chos thams cad sems kyi rang rtsal du 'du zhing /__sems nyid skye med spros pa dang bral ba ni yum kun tu bzang mo'i mkha' klong rnam par dag pa ye ji bzhin pa'i dkyil 'khor te/__de las/__thams cad kyi rang bzhin gang lags pa de ma bcos ma bslad ma byung ma skyes ji bzhin pa'i de kho na nyid ye ji bzhin pa'i dkyil 'khor du mthong lags so/__/zhes so/__/de nyid thams cad du ma 'gags par rang snang ris med kun khyab tu shar ba ni/__kun tu bzang po rang byung gi ye shes rang bzhin lhun grub kyi dkyil 'khor te/__thams cad kyis de nyid du sangs rgyas te kun la khyab pa'i slad du rang bzhin lhun gyis grub pa'i dkyil 'khor du mthong lags so/__/zhes so/__/de gnyis kyang ngo bo tha mi dad par zung 'jug tu gnas pa ni/__dbyings dang ye shes gnyis su med pa'i sras bde ba chen po rtsa ba byang chub sems kyi dkyil 'khor te/__thams cad rtsa ba byang chub sems kyi dkyil 'khor du mthong lags so/__/zhes gsungs pa'i phyir/__/zhes so/___/__!_
