རྡོ་རྗེའི་གནས་ཡུལ་རྣམས་ཀྱི་བཤད་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje'i gnas yul rnams kyi bshad pa
Location	mkhyen brtse'i bka' 'bum Volume 3, sde tshan 1, Text 5, Pages 119-139 (Folios 60a1 to 70a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdo rje'i gnas yul rnams kyi bshad pa. In 'jam dbyangs mkhyen brtse'i dbang po'i bka' 'bum, Vol. 3: 119-139. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Vows - sdom pa

1 Texts in this Section (sde tshan or chos tshan)

5 119-139	རྡོ་རྗེའི་གནས་ཡུལ་རྣམས་ཀྱི་བཤད་པ། rdo rje'i gnas yul rnams kyi bshad pa Notes - zin bris   ·   Vows - sdom pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྡོམ་གསུམ་ལས་བཤད་པའི་རི་བོ་གངས་ཅན་དང་མ་དྲོས་པ། རྒྱུད་སྡེ་ནས་གསུངས་པའི་ཕྱིའི་ཡུལ་ཆེན། རྡོ་རྗེ་གདན་ཏེ་གནས་གསུམ་གྱི་རྣམ་གཞག་མ་ཎི་ཛ་ལ་ཀཱནྟ་ལས། དང་པོ་ནི། ཕྱི་རོལ་པའི་ལུགས་ལྟར་ན། གངས་ཅན་གྱིས་ཤར་ནུབ་རྒྱ་མཚོའི་བར་ཐམས་ཅད་ཁྱབ་པར་བཤད་ཅིང་། མ་དྲོས་པའི་ཐ་སྙད་དངོས་སུ་མ་གྲགས་ཀྱང་། དེའི་དོད་གངྒཱ་ལ་འདོད་པར་གསལ་ལ། དེ་ན་རྒྱལ་པོ་བྷ་གི་ར་ཐས་ཕབ་པའི་གངྒཱ་ཉིད་གངས་ཅན་གྱི་སྟེང་དུ་རྒྱ་མཚོར་འཁྱིལ་པ་ལས་གངྒཱ་སོགས་བདུན་དུ་གྱེས་པར་བཤད། གངྒཱ་དེ་སྡིག་པ་སྦྱོང་བའི་ཆ་ནས་མཱ་པཾ་སྟེ་སྡིག་བྲལ་ཅེས་བྱ། དེ་རི་བོ་གངས་ཅན་གྱི་རྩེ་རྒྱ་མཚོར་ཡོད་ལ། ད་ལྟ་མཱ་པཾ་འདི་ཏི་སེའི་དྲུང་ན་ཡོད། ཏི་སེ་ནི་ཧ་ནུ་མནྠས་འཕངས་པའི་གངས་རི་དུམ་བུ་ཞིག་ཡིན་པར་དྲང་སྲོང་གྲོགས་མཁར་སྨྲ་བས་བཤད། དེས་ན་གངས་ཅན་དངོས་གཞི་མ་ཡིན། དེ་མ་ཡིན་པར་གྲུབ་པས་མཱ་པཾ་ཡང་མ་དྲོས་པར་མི་འཐད། གངས་རིའི་ཡུལ་ནས་འབབ་པར་བཤད་པས་ཀྱང་གནོད་དོ། །འོ་ན་ཏི་སེ་ཡིན་ནམ་ཞེ་ན། དེ་ཡང་མ་ཡིན་ཏེ། ཏི་སེ་ལ། ཀཻ་ལ་ཤ་ཞེས་གྲགས་ལ། གངས་འདིའི་མིང་ལ་ཀ་བི་ལ་ཞེས་རྒྱ་གར་ཤར་ནུབ་ཏུ་གྲགས་པའི་ཕྱིར་དང་། གངས་ཅན་ལ་ཧི་མ་ལ་ཞེས་བཤད་པས་ཐམས་ཅད་ཐ་དད་དོ། །མངོན་པའི་ལུགས་ལྟར་ན། མཛོད་ལས་བཤད་ཚུལ་གཞུང་དུ་བྲིས་པ་དང་། ས་སྡེ་ལས་ཀྱང་རི་ནག་པོ་དགུ་ཞེས་པའི་གསལ་ཁ་མ་བཤད་པ་མ་གཏོགས་སྔ་མ་དང་ཕལ་ཆེར་མཚུངས་ལ། ཕལ་ཆེན་ལས་ཀྱང་དེ་དང་འདྲ་བ་ལས། མཚོ་མ་དྲོས་པ་དང་། ཆུ་བོ་མ་དྲོས་པ་གཉིས་སུ་ཕྱེ་ནས་ཆུ་བོ་བཞི་ཀ་ཡང་མ་དྲོས་པར་བཤད་དོ། །དེ་ལ་རིག་རལ་གྱིས་སྡོམ་གསུམ་རྒྱན་གྱི་མེ་ཏོག་ལས། ད་ལྟའི་ཏི་སེ་དང་མཉན་ཡོད་ཐད་མཉམ་ཡོད་ལ། དེ་དང་གནས་ཀྱི་བར་དུ་རི་ནག་པོ་དགུ་ཡོད་པར་མངོན་སུམ་གྱིས་མཐོང་བའི་ཕྱིར་དང་། ཕལ་པོ་ཆེ་སོགས་ནས་བཤད་པ་ནི་དུས་དབང་གིས་འགྱུར་པ་ཡིན་ལ། བྱ་རྒོད་ཕུང་པོ་ལ་རབ་བརྟགས་དང་། གཅིག་གོས་རྣལ་འབྱོར་མ་ཡིན་པའི་རྒྱུ་མཚན་ཅིའང་མེད་ཅེས། གངྒཱ་དེ་ལས་འབབ་པའི་ཕྱིར། །མ་དྲོས་གཞན་དུ་བཙལ་མི་དགོས། །འདུས་བྱས་རྟག་པ་མེད་པའི་ཕྱིར། །སྔོན་བཞིན་ད་ལྟ་གནས་པ་མེད། །ཅེས་ཟེར་རོ། །དེ་ལ་དང་པོ་ནི་སྒྲུབ་བྱེད་མ་ངེས་ཏེ། མཉན་ཡོད་དང་རྒྱ་མཚོའི་བར་ནའང་ཡོད་པའི་ཕྱིར་རོ། །གཉིས་པ་མི་འཐད་དེ། ཆོས་མངོན་པ་ནི་ཕྱི་ནང་གི་ཤེས་བྱ་རྣམས་ཀྱི་རང་སྤྱིའི་མཚན་ཉིད་སྟོན་བྱེད་ཡིན་པའི་ཕྱིར་རོ། །གསུམ་པ་མི་འཐད་དེ། གངྒཱ་འདིས་མཱ་པཾ་གཤགས་ནས་འགྲོ་བའི་ཕྱིར་རོ། །གལ་ཏེ་དེར་འབབས་པ་ཡོད་ན། གཞུང་ཚིག་ཀྱང་། དེ་ལ་ཞེས་འདོན་དགོས་ལ། དེའི་ཚེ། ཤར་ཕྱོགས་ཀྱི་རྒྱ་མཚོ་ཆོས་ཅན། མ་དྲོས་པར་ཐལ། གངྒཱ་ཁྱོད་ལ་འབབ་པའི་ཕྱིར། ཞེས་སོགས་ཐལ་འགྱུར་བསམ་གྱིས་མི་ཁྱབ་པ་སྤྲོར་ཡོད་དོ། །འདུས་བྱས་མི་རྟག་པ་སྒྲུབ་བྱེད་དུ་བཀོད་པ་ནི་སྙིང་རྗེའི་ཡུལ་ལོ། །དེས་ན་སྡོམ་གསུམ་ལས་ཏི་སེ་སོགས་རྒྱུད་སྡེ་ནས་གསུངས་པའི་གནས་ཆེན་དུ་བསམས་ནས་འགྲོ་བ་ཡིན་ན་ནི་མ་ཡིན་ཞིང་། གང་ཟག་དམན་པ་ཕྱིན་ཀྱང་དོན་མེད་པ་དང་། རི་བོ་གངས་ཅན་དང་མ་དྲོས་པར་བསམ་ན་དེ་ཡང་མ་ཡིན་ཏེ། མངོན་པ། དུས་འཁོར་སོགས་ནས་བཤད་པའི་མཚན་ཉིད་མ་ཚང་བའི་ཕྱིར་རོ། །དེས་ན་མངོན་པ་དུས་འཁོར་ནས་བཤད་པའི་གངས་ཅན་ནི་མཐུན་ལ། རྒྱུད་སྡེ་ནས་བཤད་པའི་རི་མ་ལ་ཡ་ནི། རྗེ་བཙུན་གྱིས་བལ་བོར་གཏོགས་པའི་བོད་ཅེས་གསུངས་པས། དོན་དུ་མུ་སྟེགས་རྣམས་ཀྱིས་ནཱི་ལ་ཀཎྜུ་གནས་ཞེས་ཟེར་བ་དེ་ཉིད་ཡིན་ནོ། །འོན་ཀྱང་རྗེ་མི་ལ་དང་། ལོ་ཆེན་གྱིས་མཱ་པཾ་མ་དྲོས་སུ་བཤད་པ་ནི་རྣལ་འབྱོར་གྱི་ཉམས་སྣང་ངམ། སྙན་དང གས་མཁན་གྱི་ལུགས་ཙམ་སྟེ། རྗེ་བཙུན་གྱིས་ས་སྐྱ་འོག་མིན་དུ་བཤད་པ་དང་མཚུངས་སོ། །དེས་ན་ཕྱི་རོལ་པ་དང་། མངོན་པ། དུས་འཁོར་སོགས་ནས་བཤད་པའི་གངས་ཅན་དང་། མ་དྲོས་པ་ནི་ད་ལྟའི་པུ་ཧྲང་གི་གངས་མཚོ་འདི་གཏན་མིན་ཅིང་། རྒྱུད་སྡེ་ནས་བཤད་པའི་ཧི་མ་ལ་ཡང་མ་ཡིན་པར་ལུང་རིགས་ཀྱིས་གྲུབ་བོ། །གཉིས་པ་ལ། ཕྱིའི་ཡུལ་ཆེན་ངོས་བཟུང་ལ་གཞུང་སོ་སོའི་ལུགས་བཤད་པ། ཡུལ་ཆེན་པོ་བདུན་བཤད་དེ་དོགས་པ་བསལ་བའོ། །དང་པོ་ལ་བཞི། དང་པོ་འཁོར་ལོ་བདེ་མཆོག་ལས་རྩ་རྒྱུད་ཀྱི་དངོས་བསྟན་ཡུལ་ཉེར་བཞི་གསུངས་པའི། པུལླི་ར་མ་སྟེ་གང་པའི་གནས་ནི། རྡོ་རྗེ་གདན་གྱི་ལྷོ་ནུབ་ན་ཡོད་ཅེས་བླ་མ་དམར་གསུངས། ཁ་ཅིག་ཤར་ཕྱོགས་བྷཾ་ག་ལའི་ལྷོ་མཚོ་མ་ལ་ཡའི་ཆུ་ཀླུང་གི་གནས་ཌ་མི་ཌི་གདུག་པའི་གནས་ན་རྡོའི་ལིངྒ་མགོ་ལྟ་བུའི་མཚན་མ་ཡོད་ཅེས་གསུངས། ཆོས་རྗེ་པས་ཡུལ་འདི་ཉིད་ཀོལླ་གི་རི་དང་གཅིག་ཅེས་གསུངས། དེ་ལྟར་ན་ལྷོ་ནུབ་གཽ་ལའི་རི་ན་ཡོད་དོ། །ཛ་ལནྡྷ་ར་སྟེ་དྲྭ་བ་འཛིན་པ་ནི། ནུབ་བྱང་ན་རྡོ་ལ་མེ་འབར་གྱི་གནས་དེ་ཡིན་པར་དམར་བཞེད། རྗེ་བཙུན་གོང་མ་ནི་ཁ་ཆེའི་དགོན་པ་ཛ་ལནྡྷ་རར་གསུངས། བུ་སྟོན་རིན་པོ་ཆེས་གུ་གེའི་ནུབ་བྱང་ཐོ་ལིང་གི་གཙང་པོ་ཤ་བ་རུ། གར་ཤའི་གཙང་པོ་སི་བ་ཤ་ན། ཤཱི་ལ་ཛའི་གཙང་བོ་མེ་ར་ཝི་ནང་གསུམ་འདུས་པའི་མོད་ན་གྲོང་ཁྱེར་ཆེན་པོ་གཅིག་ཡོད། དེའི་ཉེ་ལོགས་ན་རྡོའི་ལིངྒ་ཐོད་པ་སྦུབས་པ་ལྟ་བུ་ཕྱོགས་གཅིག་ན་བུ་ག་དང་བཅས་པ་ཡོད་ལ། དེའི་ཉེ་འཁོར་ན་ཞིང་སྐྱོང་ལྷ་མོ་ཛྭ་ལ་མུ་ཁི་ཞེས་བྱ་བ་རྡོ་ལ་རང་འཁྲུངས་སུ་ཡོད་པ་ཁ་སྦུབས་སུ་ཉལ་བ་དེ་ལ་གཙུག་ལག་ཁང་བརྩེགས་པ་ཡོད། དེའི་རྒྱང་གྲགས་གཅིག་གི་ཕ་རོལ་ན། སྒྲུབ་ཕུག་བརྒྱ། ཆུ་མིག་བརྒྱ། ཤིང་དྲུང་བརྒྱ་ཡོད་པའི་ཐད་ཀའི་བྲག་དཀྱིལ་ན་ཆུ་འབབ་པ། དེ་ལ་མུ་སྟེགས་པ་རྣམས་ཁྲུས་བྱེད་པ་ཡོད་དོ། །ཞེས་གསུངས། ཨཽ་ཌཱི་ཡཱ་ན་ནི་འཕུར་འགྲོ་སྟེ། རྒྱལ་པོ་ཨིནྡྲ་བྷཱུ་ཏི་བྱོན་པའི་ཡུལ་རྡོའི་ཆོས་འབྱུང་ཡོད་པའི་གནས་སོ། །ཨརྦུ་ཏ་ནི་འགྲོ་བའི་ཆུ་བུར་ཏེ། ལྷོ་ཕྱོགས་ན་རི་དབུས་མཐོ། མཐའ་དམའ། འབྲང་རྒྱས་འདྲ་བ། ནགས་ཚལ་འཐུག་པོས་བསྐོར་བ། སྒྲུབ་གནས་ཤིན་ཏུ་ཉམས་དགའ་བ་ཞིག་གོ །ཞེས་བུ་བཞེད། འགའ་ཞིག་གྲོང་ཁྱེར་རྡོ་འཇོག་ལ་འདོད། གོ་དཱ་བཱ་རི་ནི་པའི་མཆོག་སྦྱིན་ཅེས་པ་སྟེ། བལ་ཡུལ་དུ་བ་དཀར་མོ་ཞིག་གི་འོ་མས་མཆོད་སྦྱིན་བྱས་པའི་ཤུལ་དུ་ས་བརྐོས་པས་དབང་ཕྱུག་ལིངྒ་ཞིག་བྱུང་། དེ་རྡོ་རྗེའི་གདན་ནས་ཟླ་བ་ཕྱེད་གཉིས་ཀྱི་ས་རི་བོ་འབིགས་བྱེད་དང་ཉེ་བར་ཁྱེར་ཏེ་མཆོད་པས་ཁྲུས་ཆུ་བྱུང་བའི་གནས་ལ་གྲགས་སོ་ཞེས་བུ་བཞེད། གོང་མ་དག་ལྷོ་ཕྱོགས་དཔལ་གྱི་རི་ལ་ཆུ་བོ་གོ་དཱ་བ་རི་འབབས་པ་དེའོ་གསུངས། མཁས་འཇུག་ཏུ་བལ་ཡུལ་དུ་ཡོད་པར་བཤད་པ་ནི་དང་པོའི་བྱུང་ཁུངས་ལ་དགོངས་སོ། །རཱ་མེ་ཤྭ་ར་དགའ་བའི་དབང་ཕྱུག་ནི། ཤར་ཕྱོགས་རྒྱལ་པོ་དགའ་བའི་དབང་ཕྱུག་གི་གྲོང་ཁྱེར་ན། སྒྲུབ་གནས་རྡོའི་ལིངྒ་རྟའི་རྔོག་ལྟ་བུས་མཚན་པ་ཡོད་ཅེས་བུ་གསུངས། ལྷོ་ནུབ་དགའ་བྱེད་དབང་ཕྱུག་གིས་བྱས་པའི་དབང་ཕྱུག་ཆེན་པོའི་རྟེན་ཡོད་པ་དེ་ཡིན་ཞེས་དམར་བཞེད། ཆོས་རྗེས་ཀྱང་ལྷོ་ཕྱོགས་ན་ཡོད་པར་གསུངས། དེ་ཝཱི་ཀོ་ཊ་ནི་ལྷ་མོ་རྫོང་སྟེ་ཤར་ཕྱོགས་བ་རེནྡྲའི་ས་ཕྱོགས་གྲེ་མོའི་ལྷོ་ཐད་ན། གྲོང་ཁྱེར་པཉྩ་པ་ཞེས་བྱ་བའི་རྒྱང་གྲགས་བཞིའི་ཕ་རོལ་ན་དེ་ཝཱི་ཀོ་ཊའི་ལྷ་ཁང་ཡོད། མཱ་ལ་བཱ་ནི་ནུབ་ཕྱོགས་ན་ཕྲེང་བ་ཅན་ཞེས་བྱ་བའི་སྒྲུབ་གནས་རི་གཡས་གཡོན་གཉིས་མཐོ་བ་ཕྲག་པ་ལྟ་བུ་ཞིག་ཡོད་དེ་ཞེས་བུ་བཞེད། རྗེ་བཙུན་གོང་མ་ནི་ལྷོ་ནུབ་ཙནྡན་སྐྱེ་བའི་ཡུལ་ན་ཡོད་པ་དེ་ཡིན་གསུངས། ཀཱ་མ་རཱུ་པ་ནི་འདོད་པའི་གཟུགས་ཏེ། གཉལ་གྱི་ལྷོ་ཐད་ན་གྲོང་ཁྱེར་ཆེན་པོ་གཅིག་ཡོད། དེའི་ཕྱོགས་ན་སྒྲུབ་གནས་རྡོའི་ལིངྒ་ཆོས་འབྱུང་མི་གང་ཙམ་གྱིས་མཐོ་བ་ཞིག་ཡོད། ཕྱོགས་དེ་ནས་ཆུ་བོ་ལོ་ཧི་ཏ་ཡང་འབབ་བོ། །ཨོ་ཊེ་ནི་བསམ་ལྡན་ཏེ། ལྷོ་ཕྱོགས་ཀྱི་རྒྱལ་པོ་ཤིང་རྟ་བཅུ་པའི་ཡུལ་ན་རྡོའི་ལིངྒ་ནུ་མ་ལྟ་བུས་མཚན་པའི་སྒྲུབ་གནས་ཡོད། འདི་ཨོ་ཌཱི་བི་ཤའི་ཡུལ་ཡིན་པར་ཆོས་རྗེས་བཞེད། ཏྲི་ཤ་ཀུ་ན་ནི་དགེ་མཚན་གསུམ་པ་སྟེ། སྟག་གཟིག་གི་ཡུལ་ཆུ་བོ་གངྒཱ་། གནྟི། ས་བཱ་རུ་གསུམ་འདུས་པའི་མདོ་ན། ངང་པ་སོགས་བྱ་སྐད་སྙན་པར་སྒྲོགས་པའི་སྒྲུབ་གནས་རྡོའི་ལིངྒ་ལྟ་བུས་མཚན་པ་གཅིག་ཡོད་ཅེས་བུ་བཞེད། ཆོས་རྗེས་ནི་ཤར་ལྷོ་ན་ཡོད་ཅེས་གསུངས། ཀཽ་སཱ་ལ་དགེ་བ་ཅན་ནམ་མཛོད་ལེན་ནི། རྒྱལ་པོ་གསལ་རྒྱལ་གྱི་ཡུལ་ཏེ། སྔོན་དགེ་བ་ཅན་གྱིས་བརྩིགས་པས་དེ་སྐད་དུ་གྲགས། དེའི་རྒྱང་གྲགས་གཅིག་གི་ཕ་རོལ་ན་རྡོའི་ལིངྒ་སྣ་ལྟ་བུས་མཚན་པ་ཡོད། ཀ་ལིངྐ་ཅི་མཚན་ནི། གུ་གེ་ནང་གི་རྒྱབ། རྡོར་གདན་ནས་དཔག་ཚད་བཅུ་གཉིས་ཀྱི་ཚུ་རོལ་ན། གླང་པོ་ཆེ་འཛིན་པའི་ས་ཞེས་སྒྲུབ་གནས་ཡོད་པ་དེ་ཡིན། ཁ་ཅིག་རྡོར་གདན་ནས་ལྷོ་ནུབ་ཏུ་དཔག་ཚད་དྲུག་ཅུ་ཕྱིན་པ་ན། རྒྱལ་པོ་ཐམས་ཅད་སྒྲོལ་གྱི་ཡུལ་ཡོད་པ་དེའོ་གསུངས། ཆོས་རྗེས་ཀྱང་ལྷོ་ཕྱོགས་ན་ཡོད་པར་བཞེད། ལམྦཱ་ཀ་སྟེ་འཕྱང་བ་ཅན་ནི། གར་ལོག་གི་རྒྱབ་བྲག་དང་ཆུ་འཐབ་པའི་སྒྲུབ་གནས་ཤིན་ཏུ་དབེན་པ་ཞིག་ཡོད་ཅེས་བུ་བཞེད། ཁ་ཅིག་ཨོ་རྒྱན་ནས་ཤར་དུ་ཅུང་ཟད་ཕྱིན་པ་ན་ཡོད་པར་བཞེད། ཀཉྩི་ཀ་ནི་གསེར་ལྡན་ཏེ། རྒྱ་གར་ལྷོ་ཕྱོགས་ཆོས་ཀྱི་གྲགས་པའི་ཡུལ་དང་ཉེ་བར། གྲོང་ཁྱེར་མཆོག་ཅེས་གྲགས་པ་དཱ་རི་ཀ་པས་གྲུབ་པ་བརྙེས་པའི་ས་དེ་ན། གསེར་གྱི་ལིངྒ་ལྟ་བུས་མཚན་པའི་སྒྲུབ་ཕུག་ཡོད་པ་དེའོ། །ཡུལ་འདི་ན་མི་ཁྱིམ་འབུམ་ཕྲག་བཅུ་བཞི་ཡོད་ཅེས་ས་སྐྱ་པ་ཆེན་པོས་གསུངས། ཧི་མ་ལ་ཡ་ནི། ཁ་ཅིག་བོད་སྤྱི། ཁ་ཅིག་མངོན་པའི་གངས་ཅན་སོགས་འདོད་པ་ནི་མི་འཐད་དེ། བལ་ཡུལ་གྱི་ནཱི་ལ་ཀཎྛའི་གནས་མཚེའུ་ཆུང་ངུ་མང་པོས་བརྒྱན་པ་ཞེས་པ་དེའོ། །པྲེ་ཏ་པཱུ་རི་ནི་ཡི་དྭགས་ཀྱི་གྲོང་ཁྱེར་ཏེ། ཁ་ཅིག་པུ་ཧྲང་སྤྱི་དེར་འདོད་ཀྱང་། བྱང་ཕྱོགས་ན་ཡོད་པར་འདོད་པ་དག་གོ །གྲྀ་ཧ་དེ་ཝ་ཁྱིམ་གྱི་ལྷ་སྟེ། ལི་ཡུལ་ལྕང་ར་སྨུག་པོ་ནི་རྡོའི་ལིངྒ་སྙིང་ལྟ་བུས་མཚན་པའི་སྒྲུབ་གནས་ཡོད་ཅེས་ཟེར། སཽ་རཥྟ་ནི་ཡུལ་འཁོར་བཟང་པོ་ཅན་ཏེ། ནུབ་ཕྱོགས་ན་སོ་མ་ནཱ་ཐ་ཞེས་རྣལ་འབྱོར་དབང་ཕྱུག་གི་སྐུ་བཞུགས་པ་དེའོ། །སུ་བརྞྞཱ་དྭཱི་པ་གསེར་གླིང་སྟེ། ཤར་ལྷོའི་ཕྱོགས་ན་མི་ཡོད་པ་དང་། ལྷོ་ཕྱོགས་ན་མི་མེད་པའི་གླིང་སྟེ་གཉིས་ཡོད་པ་དེའོ། །ཞེས་རྗེ་བཙུན་གོང་མ་བཞེད། ནཱ་ག་ར་ནི་གྲོང་ཁྱེར་ཏེ། ཁ་ཅིག་ཁ་ཆེའི་གྲོང་ཁྱེར་ནཱ་ག་ར་ལ་ངོས་འཛིན་ཀྱང་། བླ་མ་གོང་མ་རྣམས་ཡུལ་དབུས་ཀྱི་སཏྣཱ་ག་ར་ཡིན་པར་བཞེད། སིནྡྷུ་ནི། ཆུ་བོ་སིནྡྷུ་འབབ་པའི་ནུབ་བྱང་གི་མཚམས་ན་ཡོད་ཅེས་ཆོས་རྗེས་གསུངས། མ་རུ་མྱ་ངམ་གྱི་ཡུལ་ནི། ནུབ་བྱང་གི་མཚམས་ཀཤྨཱི་དར་དང་ཉེ་བ་ན་རྡོ་འཁྲུལ་པ་བཏོན་པས་མི་ཐོན་པ་ཡོད་ཟེར། ཀུ་ལུ་ཏཱ་ངན་གཅོད་དེ། གར་ཤའི་རྒྱབ་ཀུང་ཤའི་ཕུག་ན་སྒྲུབ་གནས་ཐུར་དུ་བརྐོས་པའི་རིང་མོ་ཞིག་ན་རྡོའི་ལིངྒ་པུས་མོ་ལྟ་བུ་ཡོད་ཅེས་བུ་བཞེད། ཆོས་ཀྱི་རྗེས་སྟོད་ཕྱོགས་ན་པུས་མོ་ལྟ་བུའི་རྡོ་ཡོད་ཅེས་གསུངས། གཉིས་པ་ཡུལ་ཉི་ཤུ་རྩ་བརྒྱད་ནི། ཕྱག་ཆེན་ཐིག་ལེར་བཤད། གནས་ལ་སོགས་པ་བཅུ་གཉིས་ཀྱི་དང་པོ་གཉིས་ལ་ཡུལ་བཞི་བཞི་དང་། ཕྱི་མ་གཉིས་ལ་ཡུལ་གཉིས་གཉིས་ཀྱི་རླུང་སེམས་ཐིམ་ཚུལ་གྱི་དབང་དུ་བྱས་ནས་སོ། །གསུམ་པ་ཡུལ་སུམ་ཅུ་རྩ་གཉིས་ནི། རྩ་བའི་རྒྱུད་བརྟག་པ་གཉིས་པའི་དངོས་བསྟན་ཏེ། འདི་ལ་གཞུང་སྒྲ་ཇི་བཞིན་པར་སོ་གཉིས་སུ་འདོད་པ་དང་། འཁྲུགས་བསྡེབས་ནས་སུམ་ཅུ་རྩ་གཉིས་སུ་འབྱེད་ཚུལ་གཉིས་ཡོད་དེ་ཊཱི་ཀ་ལས་གསལ་ཞིང་། ཕྱི་མ་འདི་རྗེ་བཙུན་ཆེན་པོ་ཡབ་སྲས་ཀྱི་བཞེད་པ་བླ་ན་མེད་པའོ། །བཞི་པ་ཡུལ་ཞེ་བརྒྱད་དུ་བཤད་པ་ནི། འཁོར་ལོ་སྡོམ་ཆེན་ལས། གཞུ་ལ་སོགས་པ་ལུགས་ལས་བཟློག་པའི་ཚུལ་གྱིས་གནས་སོགས་ཉེར་བཞི་དང་། ཀུན་རྫོབ་ཀྱི་དབྱེ་བས་མ་རིག་པ་དང་། ཆུ་སྲིན་སོགས་ལུགས་འབྱུང་གི་ཚུལ་གྱིས་འཐུང་གཅོད་སོགས་ཉེར་བཞི་སྟེ་ཞེ་བརྒྱད་དུ་གསུངས་སོ། །དེ་དག་ཀྱང་འཛམ་གླིང་ན་ཡུལ་སྟོང་ཕྲག་བདུན་ཅུ་རྩ་བཞིར་མུ་སྟེགས་པའི་ཞིང་སྐྱོང་ཕོ་མོ་དེ་སྙེད་བཞུགས་ཤིང་། དེ་དག་གི་གཉེན་པོར་རྡོ་རྗེ་འཆང་གིས་སྤྲུལ་པའི་ཡེ་ཤེས་ཀྱི་མཁའ་འགྲོ་མ་གྲངས་དང་མཐུན་པར་གནས་པས། བདེ་མཆོག་ལས། སྟོང་ཕྲག་བདུན་ཅུ་རྩ་གཉིས་ཀྱི། །མཁའ་འགྲོ་མས་ནི་ཡོངས་སུ་ཁྱབ། །ཅེས་སོ། །དེ་རེ་རེ་ལའང་འཁོར་བྱེ་བ་ཕྲག་རེ་གནས། དེ་རེ་རེ་ལའང་འཁོར་ཉི་ཤུ་རྩ་ལྔ་རེ་ཡོད། དེས་ཡུལ་ཐམས་ཅད་ཁྱབ་སྟེ། དེའིའང་གཙོ་མོ་ནི་ཡེ་ཤེས་དང་། འཁོར་འཇིག་རྟེན་པ་སྟེ། འོན་ཀྱང་དམ་ཚིག་བརྟན་པས་བྱང་ཆུབ་སེམས་དཔའི་དགེ་འདུན་ནོ། །དེ་དག་གིས་ཐ་མལ་གྱི་བུད་མེད་རྣམས་ཀྱང་བརླབས་ཏེ་རྣལ་འབྱོར་པ་རྣམས་ཀྱང་བྱིན་གྱིས་རློབ། དེའང་བསྡུ་ན་སོ་གཉིས། དེའང་ཉེར་བཞི། དེ་བཅུ་གཉིས། དེ་བརྒྱད་དུ་འདུ་བས་ན། གང་ཟག་གི་ཁམས་དང་བསྟུན་པ་སྟེ་འགལ་བ་མེད་དོ་ཞེས་འཇམ་དབྱངས་བསོད་ནམས་རྩེ་མོས་གསུངས་སོ། །གཉིས་པ་ལ། སྔ་རབས་པ་དག་ལས་ལྷ་བཙུན་པས་སོ་གཉིས་ཀྱི་སྟེང་གླེང་གཞི་དང་། བཞི་པོ་གཅིག་ཏུ་བསྡོམས་པ་སྟེ་ལྔ་བསྟན་པར་བཤད། སྤོས་ཁང་པས་སོ་གཉིས་ཀྱི་སྟེང་། ནང་དུ་སྦས་པའི་རྩ་ལྔ་ཕྱི་རོལ་དུ་གླིང་བཞི་རི་རབ་སྟེ་ལྔ་བསྟན་པར་བཞེད། དགའ་གདོང་པས་ཡུལ་ཉེར་བཞིའི་སྟེང་། སྙིང་གའི་པདྨ་འདབ་བརྒྱད་ཕྱི་ནང་གཉིས་ཀྱི་ཕྱི་མ་བརྒྱད་དང་། ནང་མའི་ཕྱོགས་བཞི་དབུས་དང་ལྔའོ་ཞེས་བཞེད་དེ། རྗེ་བཙུན་གོང་མའི་དགོངས་པ་མ་ལོངས་པའོ། །ཕྱིས་གསེར་མདོག་པས། ཀྱེ་རྡོར་གྱི་ལུགས་ལྟར་ན། དབྱེ་གཞི་འདུ་བ་དང་ཉེ་བའི་འདུ་བ་གཉིས་ལ། དབྱེ་བའི་ཡ་གྱལ་གཉིས་གཉིས་ཡོད་པས་བཞི་དང་། མི་སློབ་པའི་གནས་ཕྱི་རོལ་རྡོ་རྗེའི་གདན་དང་། ནང་དུ་འོག་མིན་ཏེ་ལྔ་བསྣན་པ་དང་། ཡང་ན་དགྱེས་རྡོར་གྱི་དངོས་བསྟན་སོ་གཉིས་སྟེང་། དེར་མ་བཤད་པའི། རཱ་མེ་ཤཱ་ར། ཨོ་ཊེ། ཏྲི་ཤ་ཀུ་ན། པྲེ་ཏ་པཱུ་རི། གྲྀ་ཧ་དེ་ཝ་ལྔ་བསྣན་པའོ་ཞེས་བཞེད་ཀྱང་རང་བཟོ་འབའ་ཞིག་གོ །རང་ལུགས་ནི་བཞི་སྟེ། དང་པོ་ཨིནྡྲ་བྷཱུ་ཏིས་དགའ་བ་བཅུ་དྲུག་མཚོན་པའི་ས་བཅུ་དྲུག་དང་སྦྱར་ཏེ་དགའ་བའི་མེ་ཏོག་ལས་བཤད་པ་ནི། ཨུ་ཌི་ཡཱ་ན༡། འཕུར་བའི་ཐེག་པ། ཛ་ལནྡྷ་ར༢། དྲ་བ་འཛིན་པ། པུལླི་རཱ་མ༣། སྐྱེས་བུའི་རྟགས་ལ་དགའ་བ། ཀཱ་མ་རཱུ་པ༤། འདོད་པའི་གཟུགས། མཱ་ལ་ཝ་ནའདི་རྣམས་ཟུར་ཆགས། ༥། ཕྲེང་ལྡན། སིནྡྷ༦། འཁྱོག་འགྲོ། ནཱ་ག་ར ༧། གྲོང་ཁྱེར་མང་པོ། སིངྒ་ལ༨། སེང་གེས་འཛིན་པ། མུ་རྨུ་ན༩། མཁས་པ་མང་པོ། དེ་བཱ་ཀུ་ཊ༡༠། ལྷ་མོའི་མཁར། ཀུ་མུ་ཏཱ༡༡། ངན་གཅོད། ཨརྦུ་ཏ༡༢། ཆུ་མཚམས། ཧ་རི་ཀེ་ལ༡༣། སེང་གེ་རྩེ་བ། གཽ་དྷ་བ་ར༡༤། འདོད་པས་སྒྲིབ་པ། ལམྤ་ཀ༡༥། །ཆུ་འབབས་པ། ཀཱནྫི༡༦། ཐུག་པ་སྦྱིན་པ། ཀརྨཱ་བངྐཾ་༡༧། ས་རློན་གྱི་ཞལ་བརྒྱས་པ། སུ་བརྞ་དྭཱི་པ༡༨། གསེར་གླིང་། ཀུངྐུ་ན་ཀ༡༩། །གསེར་གྱིས། བྷིནྡྷ༢༠། འབིགས་བྱེད། པྲེ་ཏ་སུཪྻ༢༡། ཡི་དྭགས་ཀྱི་དྲི་ངན། ས་མུ་ཏྲ་ཏཱི་ར༢༢། རྒྱ་མཚོའི་ངོགས་སམ་འགྲམ། ཙཱ་རི་ཏྲ༢༣། སྤྱོད་པ་མང་པོ། ཀུ་མཱ་རི་པཱུ་ར༢༤། གཞོན་ནུའི་གྲོང་ཁྱེར། ཀཥྨཱི་ར༢༥། གུར་གུམ་གྱི་ཡུལ། ཀེ་དཱ་ར༢༦། བདེ་བའི་ཞིང་། ནེ་པཱ་ལ༢༧། ནོར་སྐྱོང་། ཀརྞྞོ་ཛ༢༨། རྣ་བར་སྙན། ཨ་མྲྀ་ཏ་པཱུ་རི༢༩། འཆི་མེད་གྲོང་ཁྱེར། མ་ནུ་ཥྱ་པཱུ་ར༣༠། མིའི་གྲོང་ཁྱེར། སཱ་ཏཱ་ལ་༣༡། ས་འོག །མེ་རུ་ཤི་ཁཱ་ར༣༢། རིན་རྩེ། ཧི་མཱ་ལ་ཡ༣༣། ཁ་བའི་གནས། སཽ་རཥྟས༣༤། ཡུལ་འཁོར་བཟང་པོ། ཀ་ལིངྐ་༣༥། དུས་མཚན། ཀོ་ཤ་ལ་སྱ ༣༦། མཁས་པས་བྱས་པ། བཛྲཱ་ས་ན༣༧། རྡོ་རྗེའི་གདན་རྣམས་སོ། །དེ་ཡང་བརྟག་གཉིས་ལས་གསུངས་པའི་གནས་ཉེར་དགུ་དང་། དེར་དངོས་སུ་མ་གསུངས་པའི་ཀེ་ད་ར་སོགས་བདུན་དང་། རྩ་བའི་གནས་རྡོ་རྗེའི་གདན་ཏེ་སོ་བདུན་ནོ། །གཉིས་པ་སློབ་དཔོན་རྡོ་རྗེ་གསང་བས་རང་གཞིན་དགའ་བའི་སྒྲོན་མེ་ལས། དཔའ་བོའི་གནས་བཅུ་དྲུག །དཔའ་མོའི་གནས་བཅུ་དྲུག །གསང་བའི་གནས་བཞི། གཙོ་བོའི་གནས་དང་སོ་བདུན་དུ་གསུངས་ཏེ། གྲངས་འདྲེན་ཚུལ་སྔ་མ་དང་མཐུན་ནོ། །གསུམ་པ་རྡོ་རྗེ་སྙིང་པོར་ཉུང་ངུས་རྒྱུད་ཀྱི་བསྡུས་དོན་རྣམ་པར་བཤད་པ་ལས། སྐུ་གསུང་ཐུགས་འཁོར་ལོའི་གནས་བརྒྱད་དེ་ཉེར་བཞི། དེ་སྟེང་ཡེ་ཤེས་འཁོར་ལོའི་གནས་ལྔ་དང་། དུར་ཁྲོད་བརྒྱད་བསྣན་པས་སོ་བདུན་དུ་གསུངས་པ་དང་། བཞི་པ་སློབ་དཔོན་པདྨ་རྡོ་རྗེས་མཁའ་འགྲོ་རྒྱ་མཚོའི་འགྲེལ་པ་གྲུ་གཟིངས་ལས་ཕྱི་རོལ་གྱི་ཡུལ་ཆེན་པོ་སོ་བདུན་འདོད་ཁམས་ལ་སྦྱར་བ་དང་། ཁམས་གསུམ་སྤྱི་ལ་སྦྱར་ཚུལ་གཉིས་ལས། དང་པོ་ནི། ཆུ་གཏེར༧། རི་གླིང་དམྱལ་བ་བརྒྱད་ཉེར་བཞི། རྡོ་རྗེའི་རི། རྒྱ་མཚོ་ཆེན་པོ། རི་རབ་ཀྱི་འོག་གི་ཆ། གང་དུ་གནས་པའི་གཞི། ནམ་མཁའ། རི་རབ་ཀྱི་རྩེ་མོ་སྟེ་སོ་བདུན་དང་། གཉིས་པ་ནི། འདོད་ཁམས་༡༠། གཟུགས་ཁམས༡༦། གཟུགས་མེད༤། བསམ་གཏན་བཞི་པ་མན་ཆད་ལ། ཆགས་པ། འཇིག་པ། འགྲོ་བ། མི་འགྲོ་བ། འདོད་པ་ཅན་ཏེ་བསྣན་པས་སོ་བདུན་ནོ། །དེ་ལྟར་སྤྱིར་ཡུལ་ཆེན་སོ་སོར་བཤད་པ་དང་། ཁྱད་པར་འཛམ་གླིང་དུ་ཡོད་ཚུལ་དང་པོར་བཤད་པ་འདི་ཁོ་ན་ལ་ཡིད་རྟོན་པར་གྱིས་ཤིག །གསུམ་པ་རྡོ་རྗེ་གདན་གྱི་རྣམ་གཞག །ཐེག་ཆེན་ཐུན་མོང་བར་གྲགས་པ་དང་། ཐུན་མིན་ལ་གྲགས་པ་གཉིས། དང་པོ་ནི། ཡུལ་དབུས་མ་ག་དྷ་ནི། དུས་གསུམ་སངས་རྒྱས་ཐམས་ཅད་བཞུགས་གནས་རྡོ་རྗེའི་གདན། མེ་ཆུ་རླུང་གསུམ་གྱིས་ཀྱང་མི་འཇིག་པ། སངས་རྒྱས་ཀྱི་བྱིན་རླབས་ཀྱིས་དབང་ཆེན་གསེར་གྱི་ས་གཞི་ལ་ཐུག་པའི་བར་རིན་ཆེན་སྣ་ཚོགས་ལས་གྲུབ་པ། རྡོ་རྗེ་རྒྱ་གྲམ་དུ་གནས་པའི་ལྟེ་བ་ལས་བྱང་ཆུབ་ཤིང་སྐྱེས་ཤིང་རྡོ་རྗེ་རྩེ་མོ་བཞིའི་ཐད་ཀ་ནས་རྡོ་རྗེ་ཕུར་པའི་མཆོད་རྟེན་བཞི་ཡོད་པར་ཉན་ཐོས་པ་འདོད་ལ། ཐེག་ཆེན་རྣམས་རྡོ་རྗེ་རྩེ་ལྔ་ལངས་ནས་ཡོད་པའི་ཁོང་གསེང་ན་བྱང་ཆུབ་ཀྱི་ཤིང་སྐྱེས། རྭ་བཞི་ལ་རྡོ་རྗེ་ཕུར་པའི་མཆོད་རྟེན་བཞི་ཡོད་པར་འདོད། དེ་དག་གི་བར་ན་མདའ་རྒྱང་འབྲིང་ཚད་ཙམ་ཡོད་དེ། དེ་ནི་རྡོ་རྗེ་གདན་གྱི་རྒྱའི་ཚད་དོ་ཞེས་འདོད། དེ་ལྟ་བུ་འཛམ་གླིང་གི་དཀྱིལ་ན་ཡོད་པ་དང་། བྱང་ཆུབ་ཀྱི་ཤིང་དྲུང་དེར་བསྐལ་པ་བཟང་པོའི་སངས་རྒྱས་ཐམས་ཅད་སངས་རྒྱ་ཚུལ་སྟོན་པ་དང་། འཇིག་པ་མེད་པར་ནི་ཐེག་པ་གཉིས་ཀས་འདོད་དོ། །དེར་བདག་ཅག་གི་སྟོན་པ་སངས་རྒྱས་པའི་ཚེ། བྱང་ཆུབ་ཀྱི་ཤིང་མ་ཡིན་པའི་ཤིང་གཞན་རྣམས་འོད་ཟེར་གྱིས་བསྲེགས་ཏེ། ད་ལྟ་ཡང་བྱང་ཆུབ་ཀྱི་ཤིང་ནས་ཅུང་ཟད་ཤར་དུ་ཕྱིན་པ་ན། སངས་རྒྱས་ཀྱི་སྐུ་ཚད་གཅིག་དང་། དེའི་སྟེང་ན་འོད་ཟེར་བཀྱེ་བའི་གནྡྷོ་ལ་ཞེས་པ་ཡོད། སྲོད་ལ་བདུད་བཏུལ་བའི་ཚེ། འཇམ་དཔལ་གྱིས་རྔའི་སྒྲ་བརྡུངས་པའི་མཚོན་བྱེད་དུ། ལྕགས་རིའི་ནུབ་ན་མཆོད་རྟེན་ཞིག་གི་ནང་འཇམ་དཔལ་གྱི་སྐུ་ཁྲུ་གང་བའི་ཚད་ཙམ་ཞིག་ཡོད། དེ་ནས་སངས་རྒྱས་ནས་བདུན་ཕྲག་གཉིས་པ་ལ་བཞེངས་ཏེ་འཛམ་བུའི་གླིང་བཅགས་ཏེ། རྡོ་རྗེ་གདན་གྱི་བྱང་ཕྱོགས་ན་རྡོ་རྗེའི་ར་བའི་གོང་ན་སངས་རྒྱས་ཀྱིས་གོམ་པ་བཅུ་གཉིས་དོར་བའི་ཤུལ་ན་ཞབས་རྗེས་བཅུ་གཉིས་ཡོད་ཅིང་། མཐའ་གཉིས་ན་མཆོད་རྟེན་རེ་རེ་ཡང་ཡོད། གསུམ་པ་སྟོང་གསུམ་དུ་བཅགས་པའི་མཆོད་རྟེན་ནི། བྱང་ཕྱོགས་ན་མཆོད་རྟེན་གྱི་ཕྲེང་བ་བཅུ་གཉིས་ཡོད། བཞི་པ་སྤྱན་མི་འཛུམ་པར་གཟིགས་པའི་མཆོད་རྟེན་ནི། བྱང་ཕྱོགས་ན་བྱང་ཆུབ་ཀྱི་ཤིང་ལ་གཟིགས་པའི་སྐུ་གནྡྷོ་ལ་དང་བཅས་པ་ཡོད། ལྔ་པ་ཀླུ་བཏང་བཟུང་གི་གནས་ལ་བྱོན་ཏེ། རྡོ་རྗེ་གདན་གྱི་རྒྱང་གྲགས་གཉིས་ན་མཚོ་ཡོད་པའི་ནང་ན། སངས་རྒྱས་ཀྱི་མདུན་ན་རྡོའི་ཐེམ་སྐས་བྱུང་བ་ཡོད། དྲུག་པ་བྱང་ཕྱོགས་སུ་རྒྱང་གྲགས་གཅིག་བྱོན་པའི་སར། ཀུན་ཏུ་རྒྱུ་བཏུལ་བའི་ཤུལ་དུ། ཤིང་ནྱ་གྲོ་དྷའི་རྩ་བར་མཆོད་རྟེན་ཞིག་ཡོད། བདུན་པ་རྡོ་རྗེ་གདན་གྱི་ཤར་ཕྱོགས་སུ་ཚོང་དཔོན་ཟུང་གིས་སྦྲང་རྩི་ཕུལ་བར། མཆོད་རྟེན་གྱི་ལོགས་སུ་སྟོན་པ་དང་། ཚོང་དཔོན་གྱི་གཟུགས་རི་མོར་བྲིས་པ་ཡོད། དེ་ནས་ལྷོ་ནུབ་ཏུ་ཤིང་ནྱ་གྲོ་དྷའི་རྩ་བར་ཆོས་མི་གསུང་བར་བཞུགས་པ་ན་ཚངས་དབང་གིས་ཆོས་འཁོར་བསྐོར་བར་བསྐུལ་བའི་སར་མཆོད་རྟེན་གྱི་ནང་སངས་རྒྱས་དང་ཚངས་དབང་གི་གཟུགས་བྲིས་པ་ཡོད། དེ་ནས་ཝཱ་ར་ཎཱ་སཱིར་ཆོས་འཁོར་བསྐོར་ཏོ། །གཞན་དུ་རྟེན་གྱི་གཙོ་བོ་བྱང་ཆུབ་ཆེན་པོ་ནི། སྟོན་པ་མྱ་ངན་ལས་འདས་ནས་ལོ་བརྒྱ་ལོན་པ་ན་བྲམ་ཟེ་མོ་ཞིག་གི་བུ་མཆེད་གསུམ་གྱི་ཆུང་བས་བཞེངས་ཏེ་གཙུག་ཏོར་ལྟར་མི་མངོན་པ། འོད་འདོམ་གང་ཡོད་པ། སྤྱོད་ལམ་རྣམ་བཞི་བྱེད་པ་མ་གཏོགས་སངས་རྒྱས་དངོས་དང་མཚུངས་པའོ། །གཙུག་ལག་ཁང་ཇི་ལྟར་ཡོད་ན་བྱང་ཆུབ་ཤིང་གི་རྒྱབ་ཏུ་བདུད་བཏུལ་བའི་ལྷ་ཁང་དུ་ཐུབ་པའི་སྐུ་བདུད་འདུལ་བའི་ཕྱག་རྒྱ་མཛད་པ་དང་། མདུན་མ་ལ་བྱང་ཆུབ་ཆེན་པོའི་སྐུ་བཞུགས་པའི་ལྷ་ཁང་ཡོད། སྐུ་དེ་གཉིས་ཀ་ཡང་བྱང་ཆུབ་ཤིང་ལ་རྒྱབ་བརྟེན་པ། བྱང་ཆུབ་ཤིང་གནྡྷོ་ལའི་རྩེ་མོར་གདུགས་ཕུབ་པ་ལྟར་མཛེས་པ། གཙུག་ལག་ཁང་ལ་ཡང་ཐོག་རིམ་པ་གཉིས་རེ་ཡོད་ཅིང་། ཏོག་དང་བཅས་པས་བརྒྱན། གཙུག་ལག་ཁང་གི་ཤར་མའི་ནང་སྐོར་ལ་ཁོར་ཡུག་ཏུ་རྡོའི་མཆོད་མེའི་ཀོང་བུ་དང་། ཕྱི་སྐོར་ལ་ཉེ་སྲས་བརྒྱད། ལྷོ་ཕྱོགས་སོགས་གཞན་ལ་ཉན་ཐོས་ཆེན་པོ་རྣམས་ཀྱི་སྐུ་གྲངས་མེད་པ་བཞུགས། དེའི་ཕྱི་རོལ་དུ་འཁོར་ས་རིམ་པ་གཉིས་ཡོད་པར་གྲགས་ཀྱང་། དེང་སང་གཅིག་ལས་མེད། འཁོར་ས་ཕྱི་མ་ལ་སྒོ་བཞི་ཡོད་པའི། ཤར་དུ་ཕྱག་བཞི་པ། བྱང་དུ་གུར་གྱི་མགོན་པོ། ལྷོ་ནུབ་ཀྱི་སྒོ་ན་སིངྒ་ལའི་གླིང་གི་མགོན་པོ་དང་། གནོད་སྦྱིན་གྱི་རྒྱལ་པོ་ཆུ་སྲིན་ལ་ཞོན་པ་སོགས་དངོས་སུ་གསུང་བྱོན་པས་མཚོན་ཤིན་ཏུ་མང་པོ་ཡོད་པར་ཐོས་ཀྱང་བྲིར་མ་ལོངས། རྡོ་རྗེ་གདན་གྱི་ལྷོ་ནུབ་མཚམས་ན། ཨ་གར་བྷོ་དྷི་ཞེས་པ་བྱང་ཆུབ་ཤིང་གི་ཡན་ལག་ཏུ་གྱུར་པའི་ལྗོན་ཤིང་། ལྷོ་ཕྱོགས་ན་སྐུ་ཁྲུས་མཛད་པའི་རྫིང་བུ། དེ་དང་ཉེ་བ་དབུ་སྐྲ་བཞར་བའི་མཆོད་རྟེན། རྡོ་རྗེ་གདན་གྱི་ལྷོ་ནུབ་མཚམས་ན་བི་བྷ་ག་ཞེས་པའི་རི་དང་། ནུབ་བྱང་མཚམས་ན་ཨཾ་ས་གི་ལི་དང་། གྷི་ཏ་ཀོ་ཊི་ཞེས་པའི་རི་གཉིས། བྱང་ཤར་དང་ཉེ་བ་ན་ཙ་ཏྱཾ་པཪྤ་ཏ་ཞེས་པའི་མཆོད་རྟེན་གྱི་རི། དེ་དང་ཉེ་བ་ན་རི་ག་ཡ་གོ་རི། ཡང་རྡོ་རྗེ་གདན་ནས་ཤར་ལྷོ་མཚམས་སུ་ཞག་གཅིག་ཙམ་ན་རཱ་ཛ་གི་རི་ཞེས་པ་རྒྱལ་པོའི་ཁབ་ཀྱི་བྱ་རྒོད་ཕུང་པོའི་རི། དེ་ནས་ནུབ་ཕྱོགས་སུ་རྡོ་རྗེ་གདན་དང་ཉེ་བ་ན་འབར་བའི་ཕུག །དེའི་ལྷོ་ཕྱོགས་ན་གྲོང་ཁྱེར་སྒྲ་བཅས། རྡོ་རྗེ་གདན་གྱི་ནུབ་ཕྱོགས་ཞག་བདུན་ཙམ་ན་ཆོས་འཁོར་གནས་ཝཱ་ར་ཎཱ་སཱི། དེ་གཉིས་ཀྱི་བར་ན་ཡངས་བ་ཅན། ཝཱ་ར་ཎཱ་སཱིའི་ནུབ་ན་ཛ་བོ་ན་སྭ་ར་སྭ་ཏཱི་ཞེས་གངྒཱའི་ཡ་གྱལ་གྱི་ཆུ་བོ་ཞིག་ཡོད། དེའི་ཕ་རོལ་ན་མཉན་ཡོད་ཉེ་ལོགས་སུ་ཆུ་སྲིན་བྱིས་པ་གསོད་ཀྱི་གནས་དང་། གྲོང་ཁྱེར་ཀེ་ལ་ཤ་སོགས། ཡང་རྡོ་རྗེ་གདན་གྱི་ནུབ་ཕྱོགས་ན་ཀཽ་ཤཾ་བྷི་དང་། ཨཥྟ་བི་ཞེས་སྔོན་གནོད་སྦྱིན་འབྲོག་གནས་ཀྱི་ནགས་དང་། གནས་ཆེན་པོ་བརྒྱད་ཀྱི་མཆོད་རྟེན་སོགས་ཕལ་ཆེ་བ་ཡོད་དེ། སྔོན་སྟོན་པ་འདི་ཉིད་རྡོ་རྗེ་གདན་དུ་བྱང་ཆུབ་ནས་དེ་དག་ཏུ་ཆོས་གསུངས་པ་ཡིན་པས་ཡན་ལག་ཏུ་གཏོགས་སོ། །རྡོ་རྗེ་གདན་གྱི་ནུབ་ཕྱོགས་སུ་སྐུ་འཁྲུངས་པའི་གནས་སེར་སྐྱ་དང་། ས་དཀར་ཅན་ཞེས་པ་ནི། མརྐྐོ་ཡི་ཞེས་རྡོ་རྗེ་གདན་རང་གི་སའི་ཁ་དོག་ལ་མིང་བཏགས་པ་ཡིན་ཅེས་པཎྜི་ཏ་རྣམས་བཞེད་དོ། །གཉིས་པ་ནི། འོག་མིན་སྟུག་པོ་བཀོད་པ་སྟེ། འདི་ལ་ཁ་ཅིག་གནས་གཙང་ལྔའི་ནང་ཚན་དང་། ལ་ལ་གཟུགས་ཁམས་ཀྱི་འོག་མིན་ལ་ཆེ་ཆུང་གཉིས་ཀྱི་ཆེ་བར་འདོད་པ་ཡོད་མོད་ཀྱི། འདིར་ནི། ལང་གཤེགས་ལས། གཙང་མའི་གནས་དག་སྤངས་པ་ཡི། །འོག་མིན་ཞེས་བྱ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །ཞེས་དང་། རྩེ་མོར། འོག་མིན་སྟུག་པོ་ཉམས་དགའ་འདིར། །སྟུག་པོའི་ཞིང་ཁམས་འཇིག་མེད་པ། །ཞེས་བཤད་པས། རྗེ་བཙུན་གོང་མ་རྣམས་སྟུག་པོ་བཀོད་པ་ཁམས་གསུམ་གྱི་སྐྱོན་ལས་གྲོལ་ཞིང་རྒྱུན་མི་འཇིག་རྟག་པ་ཡིན་པར་བཤད་ལ། འོན་ཀྱང་། གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །ཞེས་བཤད་པ་དང་འགལ་ལོ་ཞེ་ན། དེ་ནི་ཁ་དོག་དང་དབྱིབས་ཀྱི་རྣམ་པར་གསལ་བས་གཟུགས་ཀྱི་ཁམས་སུ་བཞག་པ་དབུ་མ་པ་ཆོས་བཤེས་ཀྱིས་བཤད་པ་བཞིན་ནོ། །དེས་ན་སྟུག་པོ་བཀོད་པ་ནི་ཡེ་ཤེས་སྣང་བ་འཇིག་མེད་རྟག་པ་ཡིན་པའི་ཕྱིར། འཇིག་རྟེན་གྱི་ཁམས་མ་ཡིན་ཏེ། སངས་རྒྱས་རང་རྒྱུད་ཀྱིས་བསྡུས་པའི་ཡེ་ཤེས་ཁོ་ན་ཡིན་པར་ཤེས་པར་བྱའོ། །ཞེས་གསུངས་སོ། །ཞེས་པའང་རང་ཉིད་ཀྱི་དྲན་པ་གསོ་བའི་ཕྱིར་དུ་ཟིན་བྲིས་སུ་བཏབ་པ་ཛ་ཡནྟུ།། །། ཙཱ་རི་ཏྲ་ཞེས་པ་ནི། བོད་ཀྱི་འདི་གཏན་མ་ཡིན་ཏེ། མན་སྙེར། ཧ་རི་ཀེ་ལ་དང་། ཙ་རི་ཏྲ་སོགས་བདུན་ཐག་ཉེར་ཡོད་པར་བཤད་ལ། ཧ་རི་ཀེ་ལའི་ཁྱད་པར་ལན་ཚྭ་རྒྱ་མཚོའི་ནང་སྐྱེས་ཡིན་པར་བཤད་པས་ལྷོ་ཕྱོགས་རྒྱ་མཚོའི་འགྲམ་ན་ཡོད་པར་གྲུབ་སྟེ། དེ་ཡང་ཧ་རི་ཀེ་ལ་ནི་ནམ་མཁའི་ཤིང་ལྡན་ཡིན་ལ། དེ་ཡུལ་དབུས་ནས་ལྷོ་ཕྱོགས་སུ་དཔག་ཚད་སུམ་བརྒྱ་བགྲོད་པར་ཡུལ་ཀོརྐ་ན་ཞེས་སུ་ཡོད་པར་ཞལ་ལུང་གི་འགྲེལ་བར་བཤད་པའི་ཕྱིར་དང་། སམྦུ་ཊིར། ཀ་རཉྫར་གནས་ཙཱ་རི་ཏྲ། །ཞེས་བཤད་པས། ད་ལྟའི་འདིར་ཀ་རཉྫའི་ཤིང་མེད་ཅིང་། དེ་མེད་པས་དེར་གནས་པའི་ལྷ་མོ་ཞི་བྱེད་མ་ཡང་མེད་ལ། དེ་ཕྱིར་ཙ་རི་ཏྲ་མ་ཡིན་པར་གྲུབ་བོ། །ལ་ལ་དག་དེ་ཝི་ཀོ་ཊ་ཡིན་པར་སྨྲ་སྟེ། དེ་ལ་མིག་གཉིས་དང་སྦྱར་བའི། གཅིག་ཤོས་རྒྱ་གར་ལྷོ་ཕྱོགས་ལྷ་མོའི་མཁར་ན་ཡོད་ཅིང་། གཅིག་པོ་བོད་ཀྱི་འདིར་འདོད་ན། དེར་བྷ་དྲའི་ཤིང་སྟེ། མགུལ་ཆོག་སོ་རྟའི་ཡ་རྐན་འདྲ་ཟེར་བ་དེ་ཡོད་ན་འགལ་བ་མེད་ཀྱང་། དེ་མེད་ན་དེར་གནས་པའི་ལྷ་མོ་དྲག་མོ་ཆེན་མོ་མེད་ལ། དེ་མེད་པས་དེ་ཝཱི་ཀོ་ཊ་མ་ཡིན་པར་གྲུབ་བོ། །བོད་ཡུལ་དུ་ཞིང་སྐྱོང་ལྷན་ཅིག་སྐྱེས་མ་གནས་ཤིང་། དེ་ཝཱི་ཀོ་ཊའི་ཡུལ་དེ་ལྷ་མོ་དྲག་མོ་ཆེན་མོ་བྷ་དྲའི་ཤིང་ལ་བརྟེན་ནས་གནས་སོ། །ཞེས་རྡོ་རྗེ་མཁའ་འགྲོ་མས་གསུངས་པའི་ཕྱིར་རོ། །ལ་ལ་དག །ནཱ་རོ་པས་ཡུལ་ཉེར་བཞི་གྲོང་ཁྱེར་གཅིག་དང་། དུས་འཁོར་ལས་བོད་ལྟ་བུ་རེ་རེ་ལའང་ཚང་བར་གསུངས་པས། ཙ་རི་ཙ་གོང་ཙ་རི་ཏྲ་ཡིན་པར་གྲུབ་བོ། །ཞེས་སྨྲ་བ་ནི། ཡར་ལུང་ཨོ་རྒྱན་ཡིན་པའི་ཤེས་བྱེད་དུ་ལུང་དེ་དག་འགོད་པ་དང་ཁྱད་མེད། སྤྱིར་ཡང་ཡུལ་ཆེན་དེ་དག་འཇིག་རྟེན་གྱི་ཁམས་གཅིག་ལ་བཞག་པ་དང་། འཛམ་བུའི་གླིང་ལ་བཞག་པ་དང་། ཡུལ་ཕྲན་སོ་སོར་བཞག་པ་དང་། གྲོང་ཁྱེར་གཅིག་ཏུ་བཞག་པ་སོགས་དབང་པོའི་རིམ་པ་དང་རྗེས་སུ་མཐུན་པར་འཆད་པ་ལས། འཛམ་བུའི་གླིང་གི་དབང་དུ་བྱས་ནས་སྤྱོད་པ་རྒྱུ་བའི་ཡུལ་གྱི་ཙ་རི་ཏྲ་དེ་ཡིན་པར་ལུང་རིག་མན་ངག་གིས་གྲུབ་པ་ཞིག་དགོས་ཀྱི། སྤྱིར་ཙ་རི་ཏྲ་ཞེས་བཤད་པས་མི་འགྲུབ། སྤྱིར་ཨོ་རྒྱན་ཞེས་བཤད་པས། ཡར་ལུང་ཨོ་རྒྱན་དུ་མི་འགྲུབ་པ་བཞིན་ནོ། །དེ་ལྟ་མོད་ཀྱི་དེར་རྒྱུ་བའང་གྲུབ་ཐོབ་དག་གིས་རྒྱུ་བར་རྒྱུད་ནས་གསུངས་པའི་ཕྱིར་ཕལ་པས་རྒྱུ་བ་ནི་བྱ་བ་གཞན་གྱི་ཕྱིར་ཡིན་ན་མ་གཏོགས་དངོས་གྲུབ་སྒྲུབ་པར་བསམས་ནས་རྒྱུ་བ་ནི་ཉེས་དམིགས་ལས་ཕན་ཡོན་ཅི་ཡང་མེད་དོ། །ཙ་རི་ཙ་གོང་གཅིག་ཏུ་གྲགས་པ་སྡོམ་གསུམ་ལས་བཤད་པ་ནི། རྒྱུད་ལས་དེ་ལྟར་བཤད་དོ་སྙམ་ན། དེ་ནི་བོད་ཡུལ་ན་གྲགས་པའི་དབང་དུ་བྱས་ནས། དེ་འགོག་པའི་ཕྱིར་མིང་ཙམ་བརྗོད་པ་ཡིན་གྱི། རྒྱུད་སྡེ་ནས་ཙ་རི་ཙ་གོང་ཞེས་འབྱུང་བའི་ཤེས་བྱེད་བཀོད་པ་མ་ཡིན་པའི་ཕྱིར་སྐྱོན་མེད་ལ། འདོད་ན་ཡར་ལུང་ཨོ་རྒྱན་མ་ཡིན་པའི་ཤེས་བྱེད་འགོད་པའི་ཚེ། རྒྱུད་སྡེ་ནས་བཤད་པའི་ཡར་ལུང་ཞིག་སྔོན་དུ་བཙལ་དགོས་པར་ཐལ་ལོ། །ཡང་པུ་ཧྲང་གི་གངས་མཚོ་ལ་ཏི་སེ་མ་ཕམ་དུ་བཤད་པའང་མི་འཐད་དེ། དེ་ལ་མངོན་པ་དང་། དུས་འཁོར་དང་། གནས་བརྟན་སྤྱན་དྲངས་སོགས་ནས་བཤད་པའི་མཚན་ཉིད་ཟུར་ཙམ་ཡང་མེད་པའི་ཕྱིར་དང་། ཨིནྡྲ་བྷཱུ་ཏིས་བཤད་པའི་གནས་སོ་བདུན་གྱིས་ཀེ་ཏ་ར་ཞེས་ལྷ་མོ་རྨ་བྱའི་སྒྲོ་བཞུགས་པའི་ཏི་སེ་མུ་སྟེགས་ཚུན་ཆོད་ལ་ཡོངས་སུ་གྲགས་པ་དེ་ཡང་མིན་ལ། ཡུལ་ཉེར་བཞིའི་ནང་ཚན་ཧི་མར་ཡང་མིན་ཅིང་། མདོར་ན་དེ་རྣམས་གང་ཡང་མ་ཡིན་པའི་ཕྱིར་དང་། གཏམ་རྒྱུད་ཚད་མ་ལས། རང་མཆན་ལས། བོད་རྒྱ་གར་གྱི་བར་ན་སྟོད་མངའ་རི་ནས་རྒྱ་ནག་གི་བར་བར་མ་ཆད་པའི་རི་རྒྱུད་གཉིས། བོད་ནས་ཧོར་གྱི་བར་ན་ཆགས་པའི་ནང་རྒྱུད་དེ། དེ་ལྟར་གསུམ། ཆུ་བོ་ཤཱི་ཏའི་བྱང་ནས་རི་རྒྱུད་དྲུག་སྟེ་དགུ་འདས་པའི་ཕ་རོལ་ན་རི་བོ་གངས་ཅན་ཡོད་དོ་ཞེས་བཤད་པའི་ཕྱིར་རོ། །ཀླུ་སྒྲུབ་ཀྱིས་མདོ་ཀུན་བཏུས་ལས་མ་དྲོས་པ་དང་ཉེ་བར་ཨུ་དུམྺཱ་རའི་ཚལ་ཡོད་པར་གསུངས་པས་ཀྱང་གནོད་ལ། གཞན་ཡང་རྟོགས་བརྗོད་ནས་བཤད་ཚུལ་སོགས་གནོད་བྱེད་ཆར་བཞིན་དུ་འབབ་པ་ཤ་སྟག་ཡིན་པས། ད་ཀོ་གངས་ཅན་དང་མཚོ་མ་དྲོས་པའམ། ཡོངས་གྲགས་ཀྱི་གངྒཱ་མི་འབབས་པས་མ་ཕམ་མ་དྲོས་མིན་པར་མི་འགྲུབ་སྟེ། སྡུད་པའི་ལུང་གིས་གནོད་དོ་ཞེ་ན། འོ་ན་ཞིང་གི་ཡུལ་ཆུ་དེ་ཡང་མ་དྲོས་པ་ལས་མ་བྱུང་ན་ལུང་འགལ་འཛིན་དགོས་པས་ཧ་ཅང་ཐལ་ལོ། །ཡུལ་ཉེར་བཞིའི་ནང་ཚན་གྱི་རི་མ་ལའམ། སོ་བདུན་གྱི་ནང་ཚན་ཀེ་ཏ་ར་སོགས་ཡིན་ནོ་སྙམ་པའི་རྟོགས་པ་རིང་དུ་སྤོངས་ཤིག །ཅེས་པའང་དེའི་དགག་སྒྲུབ་ལས་བྲིས་སོ།། །། ༈

[edit]

sdom gsum las bshad pa'i ri bo gangs can dang ma dros pa/_rgyud sde nas gsungs pa'i phyi'i yul chen/_rdo rje gdan te gnas gsum gyi rnam gzhag ma Ni dza la kAn+ta las/_dang po ni/_phyi rol pa'i lugs ltar na/_gangs can gyis shar nub rgya mtsho'i bar thams cad khyab par bshad cing /_ma dros pa'i tha snyad dngos su ma grags kyang /_de'i dod gang+gA la 'dod par gsal la/_de na rgyal po b+ha gi ra thas phab pa'i gang+gA nyid gangs can gyi steng du rgya mtshor 'khyil pa las gang+gA sogs bdun du gyes par bshad/_gang+gA de sdig pa sbyong ba'i cha nas mA paM ste sdig bral ces bya/_de ri bo gangs can gyi rtse rgya mtshor yod la/_da lta mA paM 'di ti se'i drung na yod/_ti se ni ha nu man+thas 'phangs pa'i gangs ri dum bu zhig yin par drang srong grogs mkhar smra bas bshad/_des na gangs can dngos gzhi ma yin/_de ma yin par grub pas mA paM yang ma dros par mi 'thad/_gangs ri'i yul nas 'bab par bshad pas kyang gnod do/_/'o na ti se yin nam zhe na/_de yang ma yin te/_ti se la/_kai la sha zhes grags la/_gangs 'di'i ming la ka bi la zhes rgya gar shar nub tu grags pa'i phyir dang /_gangs can la hi ma la zhes bshad pas thams cad tha dad do/_/mngon pa'i lugs ltar na/_mdzod las bshad tshul gzhung du bris pa dang /_sa sde las kyang ri nag po dgu zhes pa'i gsal kha ma bshad pa ma gtogs snga ma dang phal cher mtshungs la/_phal chen las kyang de dang 'dra ba las/_mtsho ma dros pa dang /_chu bo ma dros pa gnyis su phye nas chu bo bzhi ka yang ma dros par bshad do/_/de la rig ral gyis sdom gsum rgyan gyi me tog las/_da lta'i ti se dang mnyan yod thad mnyam yod la/_de dang gnas kyi bar du ri nag po dgu yod par mngon sum gyis mthong ba'i phyir dang /_phal po che sogs nas bshad pa ni dus dbang gis 'gyur pa yin la/_bya rgod phung po la rab brtags dang /_gcig gos rnal 'byor ma yin pa'i rgyu mtshan ci'ang med ces/_gang+gA de las 'bab pa'i phyir/_/ma dros gzhan du btsal mi dgos/_/'dus byas rtag pa med pa'i phyir/_/sngon bzhin da lta gnas pa med/_/ces zer ro/_/de la dang po ni sgrub byed ma nges te/_mnyan yod dang rgya mtsho'i bar na'ang yod pa'i phyir ro/_/gnyis pa mi 'thad de/_chos mngon pa ni phyi nang gi shes bya rnams kyi rang spyi'i mtshan nyid ston byed yin pa'i phyir ro/_/gsum pa mi 'thad de/_gang+gA 'dis mA paM gshags nas 'gro ba'i phyir ro/_/gal te der 'babs pa yod na/_gzhung tshig kyang /_de la zhes 'don dgos la/_de'i tshe/_shar phyogs kyi rgya mtsho chos can/_ma dros par thal/_gang+gA khyod la 'bab pa'i phyir/_zhes sogs thal 'gyur bsam gyis mi khyab pa spror yod do/_/'dus byas mi rtag pa sgrub byed du bkod pa ni snying rje'i yul lo/_/des na sdom gsum las ti se sogs rgyud sde nas gsungs pa'i gnas chen du bsams nas 'gro ba yin na ni ma yin zhing /_gang zag dman pa phyin kyang don med pa dang /_ri bo gangs can dang ma dros par bsam na de yang ma yin te/_mngon pa/_dus 'khor sogs nas bshad pa'i mtshan nyid ma tshang ba'i phyir ro/_/des na mngon pa dus 'khor nas bshad pa'i gangs can ni mthun la/_rgyud sde nas bshad pa'i ri ma la ya ni/_rje btsun gyis bal bor gtogs pa'i bod ces gsungs pas/_don du mu stegs rnams kyis nI la kaN+Du gnas zhes zer ba de nyid yin no/_/'on kyang rje mi la dang /_lo chen gyis mA paM ma dros su bshad pa ni rnal 'byor gyi nyams snang ngam/_snyan dang_gas mkhan gyi lugs tsam ste/_rje btsun gyis sa skya 'og min du bshad pa dang mtshungs so/_/des na phyi rol pa dang /_mngon pa/_dus 'khor sogs nas bshad pa'i gangs can dang /_ma dros pa ni da lta'i pu hrang gi gangs mtsho 'di gtan min cing /_rgyud sde nas bshad pa'i hi ma la yang ma yin par lung rigs kyis grub bo/_/gnyis pa la/_phyi'i yul chen ngos bzung la gzhung so so'i lugs bshad pa/_yul chen po bdun bshad de dogs pa bsal ba'o/_/dang po la bzhi/_dang po 'khor lo bde mchog las rtsa rgyud kyi dngos bstan yul nyer bzhi gsungs pa'i/_pul+li ra ma ste gang pa'i gnas ni/_rdo rje gdan gyi lho nub na yod ces bla ma dmar gsungs/_kha cig shar phyogs b+haM ga la'i lho mtsho ma la ya'i chu klung gi gnas Da mi Di gdug pa'i gnas na rdo'i ling+ga mgo lta bu'i mtshan ma yod ces gsungs/_chos rje pas yul 'di nyid kol+la gi ri dang gcig ces gsungs/_de ltar na lho nub gau la'i ri na yod do/_/dza lan+d+ha ra ste drwa ba 'dzin pa ni/_nub byang na rdo la me 'bar gyi gnas de yin par dmar bzhed/_rje btsun gong ma ni kha che'i dgon pa dza lan+d+ha rar gsungs/_bu ston rin po ches gu ge'i nub byang tho ling gi gtsang po sha ba ru/_gar sha'i gtsang po si ba sha na/_shI la dza'i gtsang bo me ra wi nang gsum 'dus pa'i mod na grong khyer chen po gcig yod/_de'i nye logs na rdo'i ling+ga thod pa sbubs pa lta bu phyogs gcig na bu ga dang bcas pa yod la/_de'i nye 'khor na zhing skyong lha mo dz+wa la mu khi zhes bya ba rdo la rang 'khrungs su yod pa kha sbubs su nyal ba de la gtsug lag khang brtsegs pa yod/_de'i rgyang grags gcig gi pha rol na/_sgrub phug brgya/_chu mig brgya/_shing drung brgya yod pa'i thad ka'i brag dkyil na chu 'bab pa/_de la mu stegs pa rnams khrus byed pa yod do/_/zhes gsungs/_au DI yA na ni 'phur 'gro ste/_rgyal po in+d+ra b+hU ti byon pa'i yul rdo'i chos 'byung yod pa'i gnas so/_/arbu ta ni 'gro ba'i chu bur te/_lho phyogs na ri dbus mtho/_mtha' dma'/_'brang rgyas 'dra ba/_nags tshal 'thug pos bskor ba/_sgrub gnas shin tu nyams dga' ba zhig go_/zhes bu bzhed/_'ga' zhig grong khyer rdo 'jog la 'dod/_go dA bA ri ni pa'i mchog sbyin ces pa ste/_bal yul du ba dkar mo zhig gi 'o mas mchod sbyin byas pa'i shul du sa brkos pas dbang phyug ling+ga zhig byung /_de rdo rje'i gdan nas zla ba phyed gnyis kyi sa ri bo 'bigs byed dang nye bar khyer te mchod pas khrus chu byung ba'i gnas la grags so zhes bu bzhed/_gong ma dag lho phyogs dpal gyi ri la chu bo go dA ba ri 'babs pa de'o gsungs/_mkhas 'jug tu bal yul du yod par bshad pa ni dang po'i byung khungs la dgongs so/_/rA me shwa ra dga' ba'i dbang phyug ni/_shar phyogs rgyal po dga' ba'i dbang phyug gi grong khyer na/_sgrub gnas rdo'i ling+ga rta'i rngog lta bus mtshan pa yod ces bu gsungs/_lho nub dga' byed dbang phyug gis byas pa'i dbang phyug chen po'i rten yod pa de yin zhes dmar bzhed/_chos rjes kyang lho phyogs na yod par gsungs/_de wI ko Ta ni lha mo rdzong ste shar phyogs ba ren+d+ra'i sa phyogs gre mo'i lho thad na/_grong khyer pany+tsa pa zhes bya ba'i rgyang grags bzhi'i pha rol na de wI ko Ta'i lha khang yod/_mA la bA ni nub phyogs na phreng ba can zhes bya ba'i sgrub gnas ri g.yas g.yon gnyis mtho ba phrag pa lta bu zhig yod de zhes bu bzhed/_rje btsun gong ma ni lho nub tsan+dan skye ba'i yul na yod pa de yin gsungs/_kA ma rU pa ni 'dod pa'i gzugs te/_gnyal gyi lho thad na grong khyer chen po gcig yod/_de'i phyogs na sgrub gnas rdo'i ling+ga chos 'byung mi gang tsam gyis mtho ba zhig yod/_phyogs de nas chu bo lo hi ta yang 'bab bo/_/o Te ni bsam ldan te/_lho phyogs kyi rgyal po shing rta bcu pa'i yul na rdo'i ling+ga nu ma lta bus mtshan pa'i sgrub gnas yod/_'di o DI bi sha'i yul yin par chos rjes bzhed/_tri sha ku na ni dge mtshan gsum pa ste/_stag gzig gi yul chu bo gang+gA /_gan+ti/_sa bA ru gsum 'dus pa'i mdo na/_ngang pa sogs bya skad snyan par sgrogs pa'i sgrub gnas rdo'i ling+ga lta bus mtshan pa gcig yod ces bu bzhed/_chos rjes ni shar lho na yod ces gsungs/_kau sA la dge ba can nam mdzod len ni/_rgyal po gsal rgyal gyi yul te/_sngon dge ba can gyis brtsigs pas de skad du grags/_de'i rgyang grags gcig gi pha rol na rdo'i ling+ga sna lta bus mtshan pa yod/_ka ling+ka ci mtshan ni/_gu ge nang gi rgyab/_rdor gdan nas dpag tshad bcu gnyis kyi tshu rol na/_glang po che 'dzin pa'i sa zhes sgrub gnas yod pa de yin/_kha cig rdor gdan nas lho nub tu dpag tshad drug cu phyin pa na/_rgyal po thams cad sgrol gyi yul yod pa de'o gsungs/_chos rjes kyang lho phyogs na yod par bzhed/_lam+bA ka ste 'phyang ba can ni/_gar log gi rgyab brag dang chu 'thab pa'i sgrub gnas shin tu dben pa zhig yod ces bu bzhed/_kha cig o rgyan nas shar du cung zad phyin pa na yod par bzhed/_kany+tsi ka ni gser ldan te/_rgya gar lho phyogs chos kyi grags pa'i yul dang nye bar/_grong khyer mchog ces grags pa dA ri ka pas grub pa brnyes pa'i sa de na/_gser gyi ling+ga lta bus mtshan pa'i sgrub phug yod pa de'o/_/yul 'di na mi khyim 'bum phrag bcu bzhi yod ces sa skya pa chen pos gsungs/_hi ma la ya ni/_kha cig bod spyi/_kha cig mngon pa'i gangs can sogs 'dod pa ni mi 'thad de/_bal yul gyi nI la kaN+Tha'i gnas mtshe'u chung ngu mang pos brgyan pa zhes pa de'o/_/pre ta pU ri ni yi dwags kyi grong khyer te/_kha cig pu hrang spyi der 'dod kyang /_byang phyogs na yod par 'dod pa dag go_/gr-i ha de wa khyim gyi lha ste/_li yul lcang ra smug po ni rdo'i ling+ga snying lta bus mtshan pa'i sgrub gnas yod ces zer/_sau raSh+ta ni yul 'khor bzang po can te/_nub phyogs na so ma nA tha zhes rnal 'byor dbang phyug gi sku bzhugs pa de'o/_/su bar+N+NA dwI pa gser gling ste/_shar lho'i phyogs na mi yod pa dang /_lho phyogs na mi med pa'i gling ste gnyis yod pa de'o/_/zhes rje btsun gong ma bzhed/_nA ga ra ni grong khyer te/_kha cig kha che'i grong khyer nA ga ra la ngos 'dzin kyang /_bla ma gong ma rnams yul dbus kyi sat+nA ga ra yin par bzhed/_sin+d+hu ni/_chu bo sin+d+hu 'bab pa'i nub byang gi mtshams na yod ces chos rjes gsungs/_ma ru mya ngam gyi yul ni/_nub byang gi mtshams kash+mI dar dang nye ba na rdo 'khrul pa bton pas mi thon pa yod zer/_ku lu tA ngan gcod de/_gar sha'i rgyab kung sha'i phug na sgrub gnas thur du brkos pa'i ring mo zhig na rdo'i ling+ga pus mo lta bu yod ces bu bzhed/_chos kyi rjes stod phyogs na pus mo lta bu'i rdo yod ces gsungs/_gnyis pa yul nyi shu rtsa brgyad ni/_phyag chen thig ler bshad/_gnas la sogs pa bcu gnyis kyi dang po gnyis la yul bzhi bzhi dang /_phyi ma gnyis la yul gnyis gnyis kyi rlung sems thim tshul gyi dbang du byas nas so/_/gsum pa yul sum cu rtsa gnyis ni/_rtsa ba'i rgyud brtag pa gnyis pa'i dngos bstan te/_'di la gzhung sgra ji bzhin par so gnyis su 'dod pa dang /_'khrugs bsdebs nas sum cu rtsa gnyis su 'byed tshul gnyis yod de TI ka las gsal zhing /_phyi ma 'di rje btsun chen po yab sras kyi bzhed pa bla na med pa'o/_/bzhi pa yul zhe brgyad du bshad pa ni/_'khor lo sdom chen las/_gzhu la sogs pa lugs las bzlog pa'i tshul gyis gnas sogs nyer bzhi dang /_kun rdzob kyi dbye bas ma rig pa dang /_chu srin sogs lugs 'byung gi tshul gyis 'thung gcod sogs nyer bzhi ste zhe brgyad du gsungs so/_/de dag kyang 'dzam gling na yul stong phrag bdun cu rtsa bzhir mu stegs pa'i zhing skyong pho mo de snyed bzhugs shing /_de dag gi gnyen por rdo rje 'chang gis sprul pa'i ye shes kyi mkha' 'gro ma grangs dang mthun par gnas pas/_bde mchog las/_stong phrag bdun cu rtsa gnyis kyi/_/mkha' 'gro mas ni yongs su khyab/_/ces so/_/de re re la'ang 'khor bye ba phrag re gnas/_de re re la'ang 'khor nyi shu rtsa lnga re yod/_des yul thams cad khyab ste/_de'i'ang gtso mo ni ye shes dang /_'khor 'jig rten pa ste/_'on kyang dam tshig brtan pas byang chub sems dpa'i dge 'dun no/_/de dag gis tha mal gyi bud med rnams kyang brlabs te rnal 'byor pa rnams kyang byin gyis rlob/_de'ang bsdu na so gnyis/_de'ang nyer bzhi/_de bcu gnyis/_de brgyad du 'du bas na/_gang zag gi khams dang bstun pa ste 'gal ba med do zhes 'jam dbyangs bsod nams rtse mos gsungs so/_/gnyis pa la/_snga rabs pa dag las lha btsun pas so gnyis kyi steng gleng gzhi dang /_bzhi po gcig tu bsdoms pa ste lnga bstan par bshad/_spos khang pas so gnyis kyi steng /_nang du sbas pa'i rtsa lnga phyi rol du gling bzhi ri rab ste lnga bstan par bzhed/_dga' gdong pas yul nyer bzhi'i steng /_snying ga'i pad+ma 'dab brgyad phyi nang gnyis kyi phyi ma brgyad dang /_nang ma'i phyogs bzhi dbus dang lnga'o zhes bzhed de/_rje btsun gong ma'i dgongs pa ma longs pa'o/_/phyis gser mdog pas/_kye rdor gyi lugs ltar na/_dbye gzhi 'du ba dang nye ba'i 'du ba gnyis la/_dbye ba'i ya gyal gnyis gnyis yod pas bzhi dang /_mi slob pa'i gnas phyi rol rdo rje'i gdan dang /_nang du 'og min te lnga bsnan pa dang /_yang na dgyes rdor gyi dngos bstan so gnyis steng /_der ma bshad pa'i/_rA me shA ra/_o Te/_tri sha ku na/_pre ta pU ri/_gr-i ha de wa lnga bsnan pa'o zhes bzhed kyang rang bzo 'ba' zhig go_/rang lugs ni bzhi ste/_dang po in+d+ra b+hU tis dga' ba bcu drug mtshon pa'i sa bcu drug dang sbyar te dga' ba'i me tog las bshad pa ni/_u Di yA na1/_'phur ba'i theg pa/_dza lan+d+ha ra2/_dra ba 'dzin pa/_pul+li rA ma3/_skyes bu'i rtags la dga' ba/_kA ma rU pa4/_'dod pa'i gzugs/_mA la wa na'adi rnams zur chags/_5/_phreng ldan/_sin+d+ha6/_'khyog 'gro/_nA ga ra_7/_grong khyer mang po/_sing+ga la8/_seng ges 'dzin pa/_mu rmu na9/_mkhas pa mang po/_de bA ku Ta10/_lha mo'i mkhar/_ku mu tA11/_ngan gcod/_arbu ta12/_chu mtshams/_ha ri ke la13/_seng ge rtse ba/_gau d+ha ba ra14/_'dod pas sgrib pa/_lam+pa ka15/_/chu 'babs pa/_kAn+dzi16/_thug pa sbyin pa/_karmA bang+kaM 17/_sa rlon gyi zhal brgyas pa/_su bar+Na dwI pa18/_gser gling /_kung+ku na ka19/_/gser gyis/_b+hin+d+ha20/_'bigs byed/_pre ta suR+Ya21/_yi dwags kyi dri ngan/_sa mu tra tI ra22/_rgya mtsho'i ngogs sam 'gram/_tsA ri tra23/_spyod pa mang po/_ku mA ri pU ra24/_gzhon nu'i grong khyer/_kaSh+mI ra25/_gur gum gyi yul/_ke dA ra26/_bde ba'i zhing /_ne pA la27/_nor skyong /_kar+N+No dza28/_rna bar snyan/_a mr-i ta pU ri29/_'chi med grong khyer/_ma nu Sh+ya pU ra30/_mi'i grong khyer/_sA tA la 31/_sa 'og_/me ru shi khA ra32/_rin rtse/_hi mA la ya33/_kha ba'i gnas/_sau raSh+tas34/_yul 'khor bzang po/_ka ling+ka 35/_dus mtshan/_ko sha la s+ya_36/_mkhas pas byas pa/_badz+rA sa na37/_rdo rje'i gdan rnams so/_/de yang brtag gnyis las gsungs pa'i gnas nyer dgu dang /_der dngos su ma gsungs pa'i ke da ra sogs bdun dang /_rtsa ba'i gnas rdo rje'i gdan te so bdun no/_/gnyis pa slob dpon rdo rje gsang bas rang gzhin dga' ba'i sgron me las/_dpa' bo'i gnas bcu drug_/dpa' mo'i gnas bcu drug_/gsang ba'i gnas bzhi/_gtso bo'i gnas dang so bdun du gsungs te/_grangs 'dren tshul snga ma dang mthun no/_/gsum pa rdo rje snying por nyung ngus rgyud kyi bsdus don rnam par bshad pa las/_sku gsung thugs 'khor lo'i gnas brgyad de nyer bzhi/_de steng ye shes 'khor lo'i gnas lnga dang /_dur khrod brgyad bsnan pas so bdun du gsungs pa dang /_bzhi pa slob dpon pad+ma rdo rjes mkha' 'gro rgya mtsho'i 'grel pa gru gzings las phyi rol gyi yul chen po so bdun 'dod khams la sbyar ba dang /_khams gsum spyi la sbyar tshul gnyis las/_dang po ni/_chu gter7/_ri gling dmyal ba brgyad nyer bzhi/_rdo rje'i ri/_rgya mtsho chen po/_ri rab kyi 'og gi cha/_gang du gnas pa'i gzhi/_nam mkha'/_ri rab kyi rtse mo ste so bdun dang /_gnyis pa ni/_'dod khams 10/_gzugs khams16/_gzugs med4/_bsam gtan bzhi pa man chad la/_chags pa/_'jig pa/_'gro ba/_mi 'gro ba/_'dod pa can te bsnan pas so bdun no/_/de ltar spyir yul chen so sor bshad pa dang /_khyad par 'dzam gling du yod tshul dang por bshad pa 'di kho na la yid rton par gyis shig_/gsum pa rdo rje gdan gyi rnam gzhag_/theg chen thun mong bar grags pa dang /_thun min la grags pa gnyis/_dang po ni/_yul dbus ma ga d+ha ni/_dus gsum sangs rgyas thams cad bzhugs gnas rdo rje'i gdan/_me chu rlung gsum gyis kyang mi 'jig pa/_sangs rgyas kyi byin rlabs kyis dbang chen gser gyi sa gzhi la thug pa'i bar rin chen sna tshogs las grub pa/_rdo rje rgya gram du gnas pa'i lte ba las byang chub shing skyes shing rdo rje rtse mo bzhi'i thad ka nas rdo rje phur pa'i mchod rten bzhi yod par nyan thos pa 'dod la/_theg chen rnams rdo rje rtse lnga langs nas yod pa'i khong gseng na byang chub kyi shing skyes/_rwa bzhi la rdo rje phur pa'i mchod rten bzhi yod par 'dod/_de dag gi bar na mda' rgyang 'bring tshad tsam yod de/_de ni rdo rje gdan gyi rgya'i tshad do zhes 'dod/_de lta bu 'dzam gling gi dkyil na yod pa dang /_byang chub kyi shing drung der bskal pa bzang po'i sangs rgyas thams cad sangs rgya tshul ston pa dang /_'jig pa med par ni theg pa gnyis kas 'dod do/_/der bdag cag gi ston pa sangs rgyas pa'i tshe/_byang chub kyi shing ma yin pa'i shing gzhan rnams 'od zer gyis bsregs te/_da lta yang byang chub kyi shing nas cung zad shar du phyin pa na/_sangs rgyas kyi sku tshad gcig dang /_de'i steng na 'od zer bkye ba'i gan+d+ho la zhes pa yod/_srod la bdud btul ba'i tshe/_'jam dpal gyis rnga'i sgra brdungs pa'i mtshon byed du/_lcags ri'i nub na mchod rten zhig gi nang 'jam dpal gyi sku khru gang ba'i tshad tsam zhig yod/_de nas sangs rgyas nas bdun phrag gnyis pa la bzhengs te 'dzam bu'i gling bcags te/_rdo rje gdan gyi byang phyogs na rdo rje'i ra ba'i gong na sangs rgyas kyis gom pa bcu gnyis dor ba'i shul na zhabs rjes bcu gnyis yod cing /_mtha' gnyis na mchod rten re re yang yod/_gsum pa stong gsum du bcags pa'i mchod rten ni/_byang phyogs na mchod rten gyi phreng ba bcu gnyis yod/_bzhi pa spyan mi 'dzum par gzigs pa'i mchod rten ni/_byang phyogs na byang chub kyi shing la gzigs pa'i sku gan+d+ho la dang bcas pa yod/_lnga pa klu btang bzung gi gnas la byon te/_rdo rje gdan gyi rgyang grags gnyis na mtsho yod pa'i nang na/_sangs rgyas kyi mdun na rdo'i them skas byung ba yod/_drug pa byang phyogs su rgyang grags gcig byon pa'i sar/_kun tu rgyu btul ba'i shul du/_shing n+ya gro d+ha'i rtsa bar mchod rten zhig yod/_bdun pa rdo rje gdan gyi shar phyogs su tshong dpon zung gis sbrang rtsi phul bar/_mchod rten gyi logs su ston pa dang /_tshong dpon gyi gzugs ri mor bris pa yod/_de nas lho nub tu shing n+ya gro d+ha'i rtsa bar chos mi gsung bar bzhugs pa na tshangs dbang gis chos 'khor bskor bar bskul ba'i sar mchod rten gyi nang sangs rgyas dang tshangs dbang gi gzugs bris pa yod/_de nas wA ra NA sIr chos 'khor bskor to/_/gzhan du rten gyi gtso bo byang chub chen po ni/_ston pa mya ngan las 'das nas lo brgya lon pa na bram ze mo zhig gi bu mched gsum gyi chung bas bzhengs te gtsug tor ltar mi mngon pa/_'od 'dom gang yod pa/_spyod lam rnam bzhi byed pa ma gtogs sangs rgyas dngos dang mtshungs pa'o/_/gtsug lag khang ji ltar yod na byang chub shing gi rgyab tu bdud btul ba'i lha khang du thub pa'i sku bdud 'dul ba'i phyag rgya mdzad pa dang /_mdun ma la byang chub chen po'i sku bzhugs pa'i lha khang yod/_sku de gnyis ka yang byang chub shing la rgyab brten pa/_byang chub shing gan+d+ho la'i rtse mor gdugs phub pa ltar mdzes pa/_gtsug lag khang la yang thog rim pa gnyis re yod cing /_tog dang bcas pas brgyan/_gtsug lag khang gi shar ma'i nang skor la khor yug tu rdo'i mchod me'i kong bu dang /_phyi skor la nye sras brgyad/_lho phyogs sogs gzhan la nyan thos chen po rnams kyi sku grangs med pa bzhugs/_de'i phyi rol du 'khor sa rim pa gnyis yod par grags kyang /_deng sang gcig las med/_'khor sa phyi ma la sgo bzhi yod pa'i/_shar du phyag bzhi pa/_byang du gur gyi mgon po/_lho nub kyi sgo na sing+ga la'i gling gi mgon po dang /_gnod sbyin gyi rgyal po chu srin la zhon pa sogs dngos su gsung byon pas mtshon shin tu mang po yod par thos kyang brir ma longs/_rdo rje gdan gyi lho nub mtshams na/_a gar b+ho d+hi zhes pa byang chub shing gi yan lag tu gyur pa'i ljon shing /_lho phyogs na sku khrus mdzad pa'i rdzing bu/_de dang nye ba dbu skra bzhar ba'i mchod rten/_rdo rje gdan gyi lho nub mtshams na bi b+ha ga zhes pa'i ri dang /_nub byang mtshams na aM sa gi li dang /_g+hi ta ko Ti zhes pa'i ri gnyis/_byang shar dang nye ba na tsa t+yaM paR+pa ta zhes pa'i mchod rten gyi ri/_de dang nye ba na ri ga ya go ri/_yang rdo rje gdan nas shar lho mtshams su zhag gcig tsam na rA dza gi ri zhes pa rgyal po'i khab kyi bya rgod phung po'i ri/_de nas nub phyogs su rdo rje gdan dang nye ba na 'bar ba'i phug_/de'i lho phyogs na grong khyer sgra bcas/_rdo rje gdan gyi nub phyogs zhag bdun tsam na chos 'khor gnas wA ra NA sI/_de gnyis kyi bar na yangs ba can/_wA ra NA sI'i nub na dza bo na swa ra swa tI zhes gang+gA'i ya gyal gyi chu bo zhig yod/_de'i pha rol na mnyan yod nye logs su chu srin byis pa gsod kyi gnas dang /_grong khyer ke la sha sogs/_yang rdo rje gdan gyi nub phyogs na kau shaM b+hi dang /_aSh+ta bi zhes sngon gnod sbyin 'brog gnas kyi nags dang /_gnas chen po brgyad kyi mchod rten sogs phal che ba yod de/_sngon ston pa 'di nyid rdo rje gdan du byang chub nas de dag tu chos gsungs pa yin pas yan lag tu gtogs so/_/rdo rje gdan gyi nub phyogs su sku 'khrungs pa'i gnas ser skya dang /_sa dkar can zhes pa ni/_mar+k+ko yi zhes rdo rje gdan rang gi sa'i kha dog la ming btags pa yin ces paN+Di ta rnams bzhed do/_/gnyis pa ni/_'og min stug po bkod pa ste/_'di la kha cig gnas gtsang lnga'i nang tshan dang /_la la gzugs khams kyi 'og min la che chung gnyis kyi che bar 'dod pa yod mod kyi/_'dir ni/_lang gshegs las/_gtsang ma'i gnas dag spangs pa yi/_/'og min zhes bya nyams dga' bar/_/yang dag sangs rgyas der sangs rgyas/_/zhes dang /_rtse mor/_'og min stug po nyams dga' 'dir/_/stug po'i zhing khams 'jig med pa/_/zhes bshad pas/_rje btsun gong ma rnams stug po bkod pa khams gsum gyi skyon las grol zhing rgyun mi 'jig rtag pa yin par bshad la/_'on kyang /_gzugs kyi khams kyi 'og min du/_/'dod chags bral khyod 'tshang rgya'o/_/zhes bshad pa dang 'gal lo zhe na/_de ni kha dog dang dbyibs kyi rnam par gsal bas gzugs kyi khams su bzhag pa dbu ma pa chos bshes kyis bshad pa bzhin no/_/des na stug po bkod pa ni ye shes snang ba 'jig med rtag pa yin pa'i phyir/_'jig rten gyi khams ma yin te/_sangs rgyas rang rgyud kyis bsdus pa'i ye shes kho na yin par shes par bya'o/_/zhes gsungs so/_/zhes pa'ang rang nyid kyi dran pa gso ba'i phyir du zin bris su btab pa dza yan+tu//_//_tsA ri tra zhes pa ni/_bod kyi 'di gtan ma yin te/_man snyer/_ha ri ke la dang /_tsa ri tra sogs bdun thag nyer yod par bshad la/_ha ri ke la'i khyad par lan tshwa rgya mtsho'i nang skyes yin par bshad pas lho phyogs rgya mtsho'i 'gram na yod par grub ste/_de yang ha ri ke la ni nam mkha'i shing ldan yin la/_de yul dbus nas lho phyogs su dpag tshad sum brgya bgrod par yul korka na zhes su yod par zhal lung gi 'grel bar bshad pa'i phyir dang /_sam+bu Tir/_ka rany+dzar gnas tsA ri tra/_/zhes bshad pas/_da lta'i 'dir ka rany+dza'i shing med cing /_de med pas der gnas pa'i lha mo zhi byed ma yang med la/_de phyir tsa ri tra ma yin par grub bo/_/la la dag de wi ko Ta yin par smra ste/_de la mig gnyis dang sbyar ba'i/_gcig shos rgya gar lho phyogs lha mo'i mkhar na yod cing /_gcig po bod kyi 'dir 'dod na/_der b+ha dra'i shing ste/_mgul chog so rta'i ya rkan 'dra zer ba de yod na 'gal ba med kyang /_de med na der gnas pa'i lha mo drag mo chen mo med la/_de med pas de wI ko Ta ma yin par grub bo/_/bod yul du zhing skyong lhan cig skyes ma gnas shing /_de wI ko Ta'i yul de lha mo drag mo chen mo b+ha dra'i shing la brten nas gnas so/_/zhes rdo rje mkha' 'gro mas gsungs pa'i phyir ro/_/la la dag_/nA ro pas yul nyer bzhi grong khyer gcig dang /_dus 'khor las bod lta bu re re la'ang tshang bar gsungs pas/_tsa ri tsa gong tsa ri tra yin par grub bo/_/zhes smra ba ni/_yar lung o rgyan yin pa'i shes byed du lung de dag 'god pa dang khyad med/_spyir yang yul chen de dag 'jig rten gyi khams gcig la bzhag pa dang /_'dzam bu'i gling la bzhag pa dang /_yul phran so sor bzhag pa dang /_grong khyer gcig tu bzhag pa sogs dbang po'i rim pa dang rjes su mthun par 'chad pa las/_'dzam bu'i gling gi dbang du byas nas spyod pa rgyu ba'i yul gyi tsa ri tra de yin par lung rig man ngag gis grub pa zhig dgos kyi/_spyir tsa ri tra zhes bshad pas mi 'grub/_spyir o rgyan zhes bshad pas/_yar lung o rgyan du mi 'grub pa bzhin no/_/de lta mod kyi der rgyu ba'ang grub thob dag gis rgyu bar rgyud nas gsungs pa'i phyir phal pas rgyu ba ni bya ba gzhan gyi phyir yin na ma gtogs dngos grub sgrub par bsams nas rgyu ba ni nyes dmigs las phan yon ci yang med do/_/tsa ri tsa gong gcig tu grags pa sdom gsum las bshad pa ni/_rgyud las de ltar bshad do snyam na/_de ni bod yul na grags pa'i dbang du byas nas/_de 'gog pa'i phyir ming tsam brjod pa yin gyi/_rgyud sde nas tsa ri tsa gong zhes 'byung ba'i shes byed bkod pa ma yin pa'i phyir skyon med la/_'dod na yar lung o rgyan ma yin pa'i shes byed 'god pa'i tshe/_rgyud sde nas bshad pa'i yar lung zhig sngon du btsal dgos par thal lo/_/yang pu hrang gi gangs mtsho la ti se ma pham du bshad pa'ang mi 'thad de/_de la mngon pa dang /_dus 'khor dang /_gnas brtan spyan drangs sogs nas bshad pa'i mtshan nyid zur tsam yang med pa'i phyir dang /_in+d+ra b+hU tis bshad pa'i gnas so bdun gyis ke ta ra zhes lha mo rma bya'i sgro bzhugs pa'i ti se mu stegs tshun chod la yongs su grags pa de yang min la/_yul nyer bzhi'i nang tshan hi mar yang min cing /_mdor na de rnams gang yang ma yin pa'i phyir dang /_gtam rgyud tshad ma las/_rang mchan las/_bod rgya gar gyi bar na stod mnga' ri nas rgya nag gi bar bar ma chad pa'i ri rgyud gnyis/_bod nas hor gyi bar na chags pa'i nang rgyud de/_de ltar gsum/_chu bo shI ta'i byang nas ri rgyud drug ste dgu 'das pa'i pha rol na ri bo gangs can yod do zhes bshad pa'i phyir ro/_/klu sgrub kyis mdo kun btus las ma dros pa dang nye bar u dum+WA ra'i tshal yod par gsungs pas kyang gnod la/_gzhan yang rtogs brjod nas bshad tshul sogs gnod byed char bzhin du 'bab pa sha stag yin pas/_da ko gangs can dang mtsho ma dros pa'am/_yongs grags kyi gang+gA mi 'babs pas ma pham ma dros min par mi 'grub ste/_sdud pa'i lung gis gnod do zhe na/_'o na zhing gi yul chu de yang ma dros pa las ma byung na lung 'gal 'dzin dgos pas ha cang thal lo/_/yul nyer bzhi'i nang tshan gyi ri ma la'am/_so bdun gyi nang tshan ke ta ra sogs yin no snyam pa'i rtogs pa ring du spongs shig_/ces pa'ang de'i dgag sgrub las bris so//_//_!