JKW-KABUM-02-KHA-002-013-wylie
chab mgar puN+ye rA dza la gnang ba'i zhal gdams gsol smon bkra shis mtshan gyi snang ba zhes pa/__
oM swa sti/_bkra shis mtshan gyi snang ba cha res kyang /_/srid zhi'i rgud pa'i mun pa drung 'byin pa'i/_/bskal bzang sgron me bzhi pa shAkya'i tog__/thub mchog don kun grub la phyag 'tshal lo/_/'di nas bzung ste rnam mkhyen snying po'i bar/_/gus pas skyabs mchi lus dang longs spyod 'bul/_/sdig ltung kun bshags dge la rjes yi rangs/_/chos 'khor bskor bzhin rtag par bzhugs gsol 'debs/_/'gro kun don du smon 'jug mchog sems bskyed/_/bdag dang mtha' yas sems can ma lus rnams/_/bcom ldan khyed kyis brtse bas rjes bzung nas/_/tshe rabs kun tu byin gyis brlabs pa dang /_/sngon tshe gdul bya'i don du thugs bskyed nas/_/smon lam chen po lnga brgya btab pa yi/_/bden pa'i 'bras bu mngon sum snang mdzad de/_/bdag gzhan rgyud la 'byor par byin gyis rlobs/_/gnas skabs chos bzhin spyod pa'i 'gal rkyen zhi/_/tshe bsod dpal 'byor lung rtogs shes rab 'phel/_/mthar thug bde ba can gyi zhing skyes nas/_/myur du byang chub go 'phang thob par shog__/ces pa'ang skabs gsum dbang po'i sna tshogs las pa dang rjes su mthun pa'i sgo nas sprul pa'i sku'i 'du byed la mkhas pa puN+ya rA dza sogs kyis ngos nas phul pa'i ston mchog thub pa'i dbang po'i snang brnyan rgya gar ma yid bzhin bsam 'phel la phyag mchod gsol ba 'debs pa'i ched du bskul ba ltar 'jam dbyangs bla ma dgyes pa'i 'bangs mkhyen brtse'i dbang pos bris pa dge legs 'phel//___//
