JKW-KABUM-02-KHA-001-017-wylie
gsung gi dben gnas dpal gyi bsam yas mchims phu la bsngags pa'i gtam rdo rje sgra ma'i tam+bu ra/__
gsung gi dben gnas dpal gyi bsam yas mchims phu la bsngags pa'i gtam rdo rje sgra ma'i glu dbyangs zhes bya ba/_na mo gu ru pad+ma kro d+hA ya/_srog rtsol byed pa d+hU tir sim pas gzhom du med pa'i nA da'i dbyangs/_/rgyal ba rnams kyi gsung gi mngon brjod zung 'jug rdo rje'i snang brnyan can/_/'od gsal snying po'i dpyid dpal la chags brtan g.yo kun la khyab pa'i tshul/_/'og min dpal gyi mchims phu nyid ces bsngags brjod me tog nyin bzhin 'thor/_1_/grub pa'i cod pan nor bu'i me long gis/_/zhabs kyi pad+mo mdzes byas rig 'dzin mchog__/sangs rgyas gnyis pa'i byin rlabs snang ba yis/_/ngo mtshar bkod pa du ma'i dge mtshan 'bar/_2_/lhag par rgyu yi stobs can skal bzang tshogs/_/ye shes klong dgu'i phyag rgyar ngal 'tsho ba'i/_/rang byung rdo rje'i brag gi ke'u tshang /_/dpal chen 'khor bcas dgyes pa'i pho brang dngos/_3_/g.yas g.yon ye shes DA ka'i tshogs kyi dpyid/_/bde stong brtul zhugs bdud rtsis bskyed bsrings pa'i/_/gnas 'di nyi shu rtsa bzhi'i yul mchog dang /_/mtshungs pa'i bsngags brjod rdo rje'i dbyangs su snyan/_4__/gzhan yang dbang chen grub pa'i slob dpon dang /_/dpal gyi seng ge rin chen mchog la sogs/_/rdzu 'phrul mchog brnyes du ma'i rnam par thar/_/srid na snyan pa'i gtam gyi yi ges brjid/_5__/slad nas ye shes sku can klong chen pas/_/'od gsal snying tig seng ge'i sgra bsgrags pa'i/_/mod la dbang po rnon bo'i gdul bya'i tshogs/_/snang bzhi'i pha mthar gshegs pa'i brtul zhugs bzung /_6__/de slad phyi ltar sprul pa'i sa spyod de/_/nang ltar 'chi med pad+ma drwa ba'i zhing /_/gsang ba 'og min chos dbyings pho brang dang /_/dbyer med bsngags brjod nor bu'i rgyud mang 'khrol/_7__/gang phyir dad pa'i dpyid kas bzung ba yi/_/bung ba gzhon nu'i gzugs kyang phyogs 'di ru/_/'bad pas bsnyen dang mchod pa'i sprin phung gis/_/rtsa gsum rgya mtsho'i tshogs rnams dgyes pa bskyed/_8__/lhag par zung 'jug ye shes dpal chen po/_/sgrub_ sde brgyad kyi rdo rje'i rnal 'byor dang /_/phyi nang gzhan gsum mchod cing bsnyen pa yi/_/skal ba dge ba'i phun tshogs mngon du gyur/_9__/de las rnam par dkar ba'i sa bon ni/_/byang chub snying po'i tshal du smin pa las/_/phan bde'i 'bras bur rdzogs pa'i grags snyan gyis/_/srid pa gsum na kun tu mdzes gyur cig__10_/ces pa'ang rig 'dzin grub pas brten pa'i sman ljongs nyams dga' ba de nyid du rgyal khams phyogs med nyul ba'i bung ba gzhon nu zhig gis gsol ba btab pa shub+haM//___//_!
