JKW-KABUM-01-KA-002-079

Previous Text Back to Volume PageNext Text

རྩ་གསུམ་ཆོས་སྲུང་རྒྱ་མཚོའི་ཚོགས་ལ་གསོལ་བ་འདེབས་པ་བྱིན་རླབས་སྤྲིན་ཕུང་།

Wylie title	rtsa gsum chos srung rgya mtsho'i tshogs la gsol ba 'debs pa byin rlabs sprin phung
Location	mkhyen brtse'i bka' 'bum Volume 1, sde tshan 2, Text 79, Pages 286-289 (Folios 114b3 to 116a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rtsa gsum chos srung rgya mtsho'i tshogs la gsol ba 'debs pa byin rlabs sprin phung. In 'jam dbyangs mkhyen brtse'i dbang po'i bka' 'bum, Vol. 1: 286-289. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs
Deity	chos srung
Colophon	།ཅེས་པའང་སྔ་འགྱུར་རྡོ་རྗེ་ཐེག་པའི་རིང་ལུགས་གཙོ་བོར་བཏོན་ནས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་སརྦ་སུ་ཤྲེ་ཡསྶིདྡྷིརྦྷ་བ་ཏུ།།
	ces pa'ang snga 'gyur rdo rje theg pa'i ring lugs gtso bor bton nas mtsho skyes bla ma dgyes pa'i 'bangs mkhyen brtse'i dbang pos gsol ba btab pa sarba su shre yas+sid+d+hir+b+ha ba tu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྩ་གསུམ་ཆོས་སྲུང་རྒྱ་མཚོའི་ཚོགས་ལ་གསོལ་བ་འདེབས་པ་བྱིན་རླབས་སྤྲིན་ཕུང་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ནི་ག་ཎེ་བྷྱཿ ཀུན་བཟང་རྡོར་འཆང་རིགས་ལྔ་གང་ཆེན་མཚོ། །གྲགས་ཆེན་གསལ་བའི་སྟོན་པ་བཅུ་གཉིས་སོགས། །མཁའ་ཁྱབ་རྒྱལ་བ་དགོངས་པའི་བརྒྱུད་པ་ལ། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། །གསང་བདག་དགའ་རབ་འཇམ་དཔལ་ཤྲཱི་སེང་། །ཛྙཱ་ན་སཱུ་ཏྲ་མཁས་པ་ཉེར་གཅིག་སོགས། །སེམས་ཀློང་མན་ངག་བརྡ་བརྒྱུད་བླ་མ་ལ། །གསོལ་བ་འདེབས་སོ༴ རིགས་གསུམ་སེམས་དཔའ་རིགས་ཅན་དྲྭ་མ་ལྔ། །རྒྱལ་པོ་ཛཿདང་བདེ་བ་གསལ་མཛད་སོགས། །རྗེས་སུ་རྣལ་འབྱོར་ཚོམ་བུ་འབུམ་ཕྲག་ལ། །གསོལ་བ་འདེབས་སོ༴ སྒེག་པ་རྡོ་རྗེ་སངས་རྒྱས་གསང་བ་དང་། །ལས་ཀྱི་དབང་མོ་རིག་འཛིན་རྣམ་བརྒྱད་སོགས། །རྒྱུད་དང་སྒྲུབ་སྡེའི་ཤིང་རྟ་ཆེ་རྣམས་ལ། །གསོལ་བ་འདེབས་སོ༴ བྱ་སྤྱོད་རྣལ་འབྱོར་རིག་སྔགས་གྲུབ་པ་དང་། །འཛམ་གླིང་རྒྱན་མཆོག་རྨད་བྱུང་སློབ་མར་བཅས། །ཐུབ་བསྟན་གསལ་བའི་སྒྲོན་མེ་མཆོག་རྣམས་ལ། །གསོལ་བ་འདེབས་སོ༴ རྩ་གསུམ་རྒྱ་མཚོའི་ཁྱབ་བདག་ཐོད་ཕྲེང་རྩལ། །མཚན་མཆོག་བརྒྱད་དང་རྣམ་འཕྲུལ་བཅུ་གཉིས་སོགས། །བསམ་ཡས་སྒྱུ་འཕྲུལ་དྲྭ་བའི་འཁོར་ལོ་ལ། །གསོལ་བ་འདེབས་སོ༴ དྲི་མེད་བཤེས་གཉེན་མཁན་ཆེན་བྱང་ཆུབ་སེམས། །ཆོས་རྒྱལ་ཡབ་སྲས་བཻ་རོ་མཚོ་རྒྱལ་སོགས། །སྤྲུལ་པའི་རྗེ་འབངས་ལོ་པཎ་ཚོགས་རྣམས་ལ། །གསོལ་བ་འདེབས་སོ༴ སོ་ཟུར་གནུབས་ཉང་གཏེར་སྟོན་རྒྱ་མཚོར་བཅས། །བཀའ་གཏེར་དག་སྣང་ཆོས་ཀྱི་འཁོར་ལོས་སྒྱུར། །དུས་གསུམ་མཁས་གྲུབ་རིམ་པར་བྱོན་རྣམས་ལ། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། །ཁྱད་པར་སྐྱབས་ཀུན་འདུས་ཞལ་ཡེ་ཤེས་སྐུ། །གདུལ་བྱའི་སྣང་ངོར་བཤེས་གཉེན་མཆོག་གི་ཚུལ། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ༴ རྡོ་རྗེ་སེམས་དཔའ་འདུས་པ་སྒྱུ་འཕྲུལ་ལྷ། །ཁྲག་འཐུང་དཔལ་དགུ་རིགས་ལྔ་རིགས་གསུམ་སོགས། །རྒྱུད་སྡེ་དྲུག་གི་ཡི་དམ་ལྷ་ཚོགས་ལ། །གསོལ་བ་འདེབས་སོ༴ བསྐལ་བཟང་འགྲོ་བའི་འདྲེན་མཆོག་ཤཱཀྱའི་ཏོག །ཕྱོགས་བཅུ་དུས་བཞིའི་རྣམ་འདྲེན་རྫོགས་སངས་རྒྱས། །གང་འདུལ་སྤྲུལ་པའི་སྐུར་སྣང་མཐའ་ཡས་ལ། །གསོལ་བ་འདེབས་སོ༴ འགོག་དང་ལམ་གྱི་བདེན་པས་བསྡུས་པ་ཡི། །ཞི་བ་ཆགས་བྲལ་བདུད་རྩི་འདུས་མ་བྱས། །རིམ་དགུའི་ཐེག་པའི་སྡེ་སྣོད་རྒྱ་མཚོ་ལ། །གསོལ་བ་འདེབས་སོ༴ མ་ཕམ་འཇམ་དབྱངས་ཕྱག་རྡོར་སྤྱན་རས་གཟིགས། །ཀུན་ཏུ་བཟང་སོགས་ཐེག་ཆེན་སེམས་དཔའ་དང་། །ཉན་རང་འཕགས་པའི་དགེ་འདུན་ཐམས་ཅད་ལ། །གསོལ་བ་འདེབས་སོ༴ གནས་གསུམ་དཔའ་བོ་དང་ནི་རྣལ་འབྱོར་མ། །རྡོ་རྗེའི་ཆོས་སྲུང་ནོར་ལྷ་གཏེར་གྱི་བདག །རབ་འབྱམས་སྐྱབས་གནས་རྒྱ་མཚོའི་ཚོགས་རྣམས་ལ། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། ། ༈ གསོལ་བ་འདེབས་སོ་དཀོན་མཆོག་རིན་པོ་ཆེ། །བྱིན་གྱིས་རློབས་ཤིག་རིག་འཛིན་བླ་མའི་ཚོགས། །དངོས་གྲུབ་སྩོལ་ཅིག་ཡི་དམ་ཞི་ཁྲོའི་ལྷ། །བར་ཆད་ཀུན་སེལ་མཁའ་འགྲོ་ཆོས་སྐྱོང་རྣམས། །སྙིང་ནས་གདུང་ཤུགས་དྲག་པོས་རྗེས་དྲན་ཅིང་། །རྩེ་གཅིག་གུས་པས་ཕྱག་འཚལ་མཆོད་པ་འབུལ། །དད་པས་སྐྱབས་མཆི་འབངས་སུ་དམ་བཅའ་ན། །དེང་ནས་བཟུང་སྟེ་ཐུགས་རྗེས་བསྐྱང་དུ་གསོལ། །བདག་རྒྱུད་སྒྲིབ་གཉིས་བག་ཆགས་ཡོངས་བྱང་ནས། །ཚེ་བསོད་དཔལ་འབྱོར་ཉམས་རྟོགས་ཡེ་ཤེས་རྒྱས། །གཞན་རྒྱུད་མཁའ་ཁྱབ་གདུལ་བྱ་སྨིན་ཅིང་གྲོལ། །རྒྱལ་ཀུན་ཕྲིན་ལས་རྫོགས་པར་བྱིན་གྱིས་རློབས། །རིས་མེད་ཐུབ་བསྟན་སྒྲོན་མེ་དམ་པ་རྣམས། །བསྐལ་བརྒྱར་ཞབས་བརྟན་ཆོས་འཁོར་བསྐོར་བ་དང་། །དགེ་འདུན་སྡེ་དང་བཤད་སྒྲུབ་བསྟན་པའི་དཔལ། །ཕྱོགས་མཐར་དར་ཞིང་རྒྱས་པར་བྱིན་གྱིས་རློབས། །སྣོད་བཅུད་ཐམས་ཅད་སྙིགས་མའི་རྒུད་པ་ཞི། །བདེ་སྐྱིད་ཆོས་ལྡན་འབྱོར་པ་ངང་གིས་འཕེལ། །ཀུན་ཀྱང་ཐེག་མཆོག་སྙིང་པོའི་སྒོར་ཞུགས་ནས། །སྐུ་བཞིའི་གོ་འཕང་འགྲུབ་པར་བྱིན་གྱིས་རློབས། །དེ་མ་ཐོབ་པའི་ཚེ་རབས་ཐམས་ཅད་དུ། །བྱང་ཆུབ་སེམས་དང་ནམ་ཡང་མི་འབྲལ་ཞིང་། །རྒྱལ་སྲས་སྤྱོད་པ་རྒྱ་མཚོར་དབང་བསྒྱུར་ནས། །རང་གཞན་ཕན་བདེར་འགོད་པར་བྱིན་གྱིས་རློབས། །མདོར་ན་འདི་ནས་བྱང་ཆུབ་སྙིང་པོའི་བར། །མཁྱེན་བརྩེའི་བདག་ཉིད་སྐྱབས་གནས་ཁྱེད་རྣམས་ཀྱིས། །རྟག་ཏུ་རྗེས་བཟུང་བྱིན་གྱིས་བརླབས་པ་དང་། །སྲིད་ཞིའི་དགེ་ལེགས་འཕེལ་བའི་བཀྲ་ཤིས་ཤོག །ཅེས་པའང་སྔ་འགྱུར་རྡོ་རྗེ་ཐེག་པའི་རིང་ལུགས་གཙོ་བོར་བཏོན་ནས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་སརྦ་སུ་ཤྲེ་ཡསྶིདྡྷིརྦྷ་བ་ཏུ།། །། ༈

[edit]

rtsa gsum chos srung rgya mtsho'i tshogs la gsol ba 'debs pa byin rlabs sprin phung /__ rtsa gsum chos srung rgya mtsho'i tshogs la gsol ba 'debs pa byin rlabs sprin phung zhes bya ba bzhugs so/__/na mo gu ru de wa DA ki ni ga Ne b+h+yaH__kun bzang rdor 'chang rigs lnga gang chen mtsho/__/grags chen gsal ba'i ston pa bcu gnyis sogs/__/mkha' khyab rgyal ba dgongs pa'i brgyud pa la/__/gsol ba 'debs so byin rlabs dngos grub stsol/__/gsang bdag dga' rab 'jam dpal shrI seng /__/dz+nyA na sU tra mkhas pa nyer gcig sogs/__/sems klong man ngag brda brgyud bla ma la/__/gsol ba 'debs so=__rigs gsum sems dpa' rigs can drwa ma lnga/__/rgyal po dzaHdang bde ba gsal mdzad sogs/__/rjes su rnal 'byor tshom bu 'bum phrag la/__/gsol ba 'debs so=__sgeg pa rdo rje sangs rgyas gsang ba dang /__/las kyi dbang mo rig 'dzin rnam brgyad sogs/__/rgyud dang sgrub sde'i shing rta che rnams la/__/gsol ba 'debs so=__bya spyod rnal 'byor rig sngags grub pa dang /__/'dzam gling rgyan mchog rmad byung slob mar bcas/__/thub bstan gsal ba'i sgron me mchog rnams la/__/gsol ba 'debs so=__rtsa gsum rgya mtsho'i khyab bdag thod phreng rtsal/__/mtshan mchog brgyad dang rnam 'phrul bcu gnyis sogs/__/bsam yas sgyu 'phrul drwa ba'i 'khor lo la/__/gsol ba 'debs so=__dri med bshes gnyen mkhan chen byang chub sems/__/chos rgyal yab sras bai ro mtsho rgyal sogs/__/sprul pa'i rje 'bangs lo paN tshogs rnams la/__/gsol ba 'debs so=__so zur gnubs nyang gter ston rgya mtshor bcas/__/bka' gter dag snang chos kyi 'khor los sgyur/__/dus gsum mkhas grub rim par byon rnams la/__/gsol ba 'debs so byin rlabs dngos grub stsol/__/khyad par skyabs kun 'dus zhal ye shes sku/__/gdul bya'i snang ngor bshes gnyen mchog gi tshul/__/bka' drin mnyam med rtsa ba'i bla ma la/__/gsol ba 'debs so=__rdo rje sems dpa' 'dus pa sgyu 'phrul lha/__/khrag 'thung dpal dgu rigs lnga rigs gsum sogs/__/rgyud sde drug gi yi dam lha tshogs la/__/gsol ba 'debs so=__bskal bzang 'gro ba'i 'dren mchog shAkya'i tog__/phyogs bcu dus bzhi'i rnam 'dren rdzogs sangs rgyas/__/gang 'dul sprul pa'i skur snang mtha' yas la/__/gsol ba 'debs so=__'gog dang lam gyi bden pas bsdus pa yi/__/zhi ba chags bral bdud rtsi 'dus ma byas/__/rim dgu'i theg pa'i sde snod rgya mtsho la/__/gsol ba 'debs so=__ma pham 'jam dbyangs phyag rdor spyan ras gzigs/__/kun tu bzang sogs theg chen sems dpa' dang /_/nyan rang 'phags pa'i dge 'dun thams cad la/__/gsol ba 'debs so=__gnas gsum dpa' bo dang ni rnal 'byor ma/__/rdo rje'i chos srung nor lha gter gyi bdag__/rab 'byams skyabs gnas rgya mtsho'i tshogs rnams la/__/gsol ba 'debs so byin rlabs dngos grub stsol/__/_!_gsol ba 'debs so dkon mchog rin po che/__/byin gyis rlobs shig rig 'dzin bla ma'i tshogs/__/dngos grub stsol cig yi dam zhi khro'i lha/__/bar chad kun sel mkha' 'gro chos skyong rnams/__/snying nas gdung shugs drag pos rjes dran cing /__/rtse gcig gus pas phyag 'tshal mchod pa 'bul/__/dad pas skyabs mchi 'bangs su dam bca' na/__/deng nas bzung ste thugs rjes bskyang du gsol/__/bdag rgyud sgrib gnyis bag chags yongs byang nas/__/tshe bsod dpal 'byor nyams rtogs ye shes rgyas/__/gzhan rgyud mkha' khyab gdul bya smin cing grol/__/rgyal kun phrin las rdzogs par byin gyis rlobs/__/ris med thub bstan sgron me dam pa rnams/__/bskal brgyar zhabs brtan chos 'khor bskor ba dang /__/dge 'dun sde dang bshad sgrub bstan pa'i dpal/__/phyogs mthar dar zhing rgyas par byin gyis rlobs/__/snod bcud thams cad snyigs ma'i rgud pa zhi/__/bde skyid chos ldan 'byor pa ngang gis 'phel/__/kun kyang theg mchog snying po'i sgor zhugs nas/__/sku bzhi'i go 'phang 'grub par byin gyis rlobs/__/de ma thob pa'i tshe rabs thams cad du/__/byang chub sems dang nam yang mi 'bral zhing /__/rgyal sras spyod pa rgya mtshor dbang bsgyur nas/__/rang gzhan phan bder 'god par byin gyis rlobs/__/mdor na 'di nas byang chub snying po'i bar/__/mkhyen brtse'i bdag nyid skyabs gnas khyed rnams kyis/__/rtag tu rjes bzung byin gyis brlabs pa dang /__/srid zhi'i dge legs 'phel ba'i bkra shis shog_/ces pa'ang snga 'gyur rdo rje theg pa'i ring lugs gtso bor bton nas mtsho skyes bla ma dgyes pa'i 'bangs mkhyen brtse'i dbang pos gsol ba btab pa sarba su shre yas+sid+d+hir+b+ha ba tu//___//__!_