JKW-KABUM-01-KA-002-075-wylie
yul dam pa rnams la gsol ba 'debs pa dge legs shis pa'i dbyangs snyan/__
yul dam pa rnams la gsol ba 'debs pa dge legs shis pa'i dbyangs snyan ces bya ba bzhugs so/__/oM swasti sid+d+haM/__bskal bzang sgron me bzhi pa shAkya'i tog__/sa bcu'i dbang phyug rgyal tshab ma pham pa/__/rgyal sras 'jam dbyangs slob ma mchog zung sogs/__/'phags tshogs 'dus par bcas la gsol ba 'debs/__/gnas brtan bcu drug gtad rabs chen po bdun/__/'dzam gling rgyan drug mchog dang rmad byung gsum/__/rnal 'byor dbang phyug brgyad cu rtsa bzhi sogs/__/rgya gar paN grub rnams la gsol ba 'debs/__/spyan ras gzigs dbang chos rgyal srong btsan rje/__/brtan pa'i 'khor lo thon mi saM b+ho Ta/__/lag na rdo rje stong btsan yul bzung sogs/__/sprul pa'i rgyal blon rnams la gsol ba 'debs/__/gsang 'dzin dbang po mkhan chen zhi ba 'tsho/__/thugs rje che dngos slob dpon pad+ma 'byung /__/'jam dpal gzhon nu chos rgyal khri srong sogs/__/bka' drin mnyam med rnams la gsol ba 'debs/__/mdo sngags bstan pa'i shing rta sa skya pa/__/zab rgyas rgyud sde'i gsang mdzod ngor chen rje/__/smra ba'i seng ge g.yag rong rnam gnyis sogs/__/bod yul bstan 'dzin rnams la gsol ba 'debs/__/gzhan yang snga 'gyur bka' gter brgyud 'dzin dang /__/bka' gdams gsar rnying bka' brgyud yab sras sogs/__/'gro la phan bde'i lam bzang snang mdzad pa'i/__/ris med dam pa rnams la gsol ba 'debs/__/de ltar mi phyed gus pas gsol btab mthus/__/bstan 'dzin skyes bu bstan pa'i sbyin bdag rnams/__/bskal brgyar zhabs brtan bshad sgrub phrin las rgyas/__/sa gsum dge legs snang bas khyab par shog__/ces pa'ang 'jigs bral gyi slob dpon 'jam dbyangs bla ma dgyes pa'i 'bangs mkhyen brtse'i dbang pos rab tshes sa 'brug lo'i rgyal zla'i dkar phyogs kyi rgyal ba gsum par gang shar gsol ba btab pa don dang ldan par gyur cig__/gong gi gsol 'debs ja mchod du byed na/__gsol ba 'debs zhes par/__mchod pa 'bul ces pa dang /__gsol btab mthus zhes par/__mchod pa'i mthus/__zhes kha bsgyur ro//___//__!_
