JKW-KABUM-01-KA-002-062-wylie
slob dpon rin po che pad+ma 'byung gnas kyi thugs dam gnad nas bskul ba'i gsol 'debs bsam don myur 'grub/__
slob dpon rin po che pad+ma 'byung gnas kyi thugs dam gnad nas bskul ba'i gsol 'debs bsam don myur 'grub ces bya ba bzhugs so/__/bde chen chos sku'i zhing na snang mtha' yas/__/dpal ldan gru 'dzin ri bor spyan ras gzigs/__/rnga yab dpal rir mtsho skyes thod phreng rtsal/__/sku gsum dbyer med mchog la gsol ba 'debs/__/mgon khyod bla ma mchog gsum yi dam dang /__/dpa' bo mkha' 'gro chos srung nor lhar bcas/__/skyabs gnas kun 'dus ngo bor shes pa'i blos/__/snying nas 'bod do thugs rje'i spyan gyis gzigs/_/bdag dang bdag 'dra'i mgon med snyigs ma'i 'gror/__/gang la gang 'dul sprul pa'i skur bzhengs nas/__/gnas skabs mthar thug bsam pa'i don rnams kun/__/chos bzhin 'grub par mdzod cig pad+ma 'byung /__/khyad par nad gdon drag pos gzir ba'i tshe/__/o rgyan sman gyi bla ma'i skur bzhengs la/__/byin rlabs dpag bsam rgyas pa'i grib bsil du/__/ngal bso'i dbugs 'byin mdzod cig pad+ma 'byung /__/rnam mang dus min 'chi bas 'jigs pa na/__/o rgyan tshe dpag med mgon skur bzhengs la/__/'chi med tshe dang ye shes mchog 'grub pa'i/__/skal bzang mngon sum stsol cig pad+ma 'byung /_/snod bcud rgud pa'i gdung bas nyam thag tshe/__/o rgyan mkha' 'gro nor lha'i skur bzhengs la/__/dpal 'byor longs spyod rdzogs ldan sprin chen las/__/'dod rgu'i gru char phobs shig pad+ma 'byung /__/lung rtogs chos kyi dga' ston nyams pa'i tshe/__/o rgyan shAkya seng ge'i skur bzhengs la/__bstan 'dzin zhabs brtan bshad dang sgrub pa yi/__/bstan pa rgyas par mdzod cig pad+ma 'byung /__/rmongs dang ma rig 'thib bus non pa'i tshe/__/o rgyan blo ldan mchog sred skur bzhengs la/__/ji lta ji snyed shes bya kun mkhyen pa'i/__/ye shes snang ba stsol cig pad+ma 'byung /__/rang dang gzhan gyi don gnyis sgrub pa'i tshe/__/o rgyan pad+ma saM b+ha'i skur bzhengs la/__/'jig rten 'jig rten 'das pa'i dngos grub kyi/_/dge mtshan rgyas par mdzod cig pad+ma 'byung /__/mkha' khyab 'gro ba'i don la spyod pa'i tshe/__/o rgyan nyi ma 'od zer skur bzhengs la/__/mthong thos dran reg gdul bya'i tshogs rnams kun/__/smin cing grol bar mdzod cig pad+ma 'byung /_/rlabs chen bstan 'gro'i phan bde spel ba'i tshe/__/o rgyan pad+ma rgyal po'i skur bzhengs la/__/khams gsum srid zhi'i legs tshogs ji snyed kun/__/'bad med dbang du sdus shig pad+ma 'byung /__/phas rgol gza' klu 'byung pos 'tshe ba'i tshe/__/o rgyan seng ge sgra sgrog skur bzhengs la/__/mthu stobs phyag na rdo rje 'bar ba yis/__/ming gi lhag mar mdzod cig pad+ma 'byung /__/mtha' dmag dus 'khrugs rgyal 'gong 'tshe ba'i tshe/__/o rgyan rdo rje gro lod skur bzhengs la/__/gzugs can gzugs med dam sri'i tshogs rnams kyi/__/don snying lkog mar phyungs shig pad+ma 'byung /__/rtse gcig zab mo'i rnal 'byor bsgom pa'i tshe/__/o rgyan rdo rje 'chang gi skur bzhengs la/__/bskyed rdzogs rdzogs pa chen po'i gseng lam nas/__/zung 'jug 'grub par mdzod cig pad+ma 'byung /__/gal te tshe 'dir brtan pa ma thob na/__/o rgyan snang ba mtha' yas skur bzhengs la/__/'chi khar gnad gcod sdug bsngal zhi ba dang /_/bde chen zhing du 'khrid cig pad+ma 'byung /__/der yang 'khrul nas bar dor 'khyams srid na/__/o rgyan dus gsum mkhyen pa'i skur bzhengs la/__/'jigs skrag 'khrul snang rang sar grol ba dang /__/dag pa'i zhing du drongs shig pad+ma 'byung /__/mdor na 'di nas byang chub snying po'i bar/__/skyid sdug legs nyes bzang ngan ci byung yang /__/mgon po khyod las skyabs gzhan ma mchis pas/__/'bral med byin gyis rlobs shig pad+ma 'byung /_/zhes pa'ang rab byung bcu bzhi pa'i lcags pho khyi'i lo'i snron zla ba'i dkar phyogs kyi tshes bcur bod kyi sgrub gnas dpal chu bo ri'i gu ru'i sgrub gnas nam mkha' lding du tshogs kyi mchod pa dang bcas bod khams bstan 'gro'i phan bde 'phel ba'i smon 'dun bgyis skabs yid la shar ba bzhin/__slar yang gtsang stod ru lag gram pa rgyang gi sgrub phug sogs su rtse gcig dad pas gsol ba 'debs pa po ni/__rig 'dzin gyi btsun pa rgyal khams nyul ba'i da ri drA 'jam dbyangs mkhyen brtse'i dbang po ste/__'dis kyang 'brel tshad rnams kyi rgyud la dpal o rgyan chos kyi rgyal po'i byin rlabs gcig car du zhugs shing /__bsam sbyor chos mthun yid bzhin du 'grub pa'i rgyur gyur cig/___/__!
