JKW-KABUM-01-KA-002-058-wylie
'chi med pad+ma 'od 'bar la gsol ba 'debs pa tshe dang ye shes mchog sbyin/__
'chi med pad+ma 'od 'bar la gsol ba 'debs pa tshe dang ye shes mchog sbyin ces bya ba bzhugs so/__/na mo gu ru pad+ma ka rA ya/__/'chi med gnyug ma'i rdo rje'i ye shes ni/__/'chi med rtag pa dam pa'i ngo bo nyid/__/'chi med pad+ma 'od 'bar tshe mtha' yas/__/'chi med chos kyi sku la gsol ba 'debs/__/'chi med bde chen 'phags mchog snying rje'i gter/__/'chi med stong nyid gsang ba ye shes yum/__/'chi med grub pa'i rnam rol thod phreng lnga/__/'chi med longs spyod rdzogs skur gsol ba=__/'chi med gdod ma'i ngang las ma g.yos bzhin/__/'chi med rdo rje'i mtshan mchog brgyad la sogs/__/'chi med sgyu 'phrul dra ba'i gzugs 'chang ba/__/'chi med sprul pa'i sku la gsol=__/'chi med zung 'jug go 'phang mngon gyur pas/__/'chi med 'dod dgur 'char ba'i yon tan gyis/__/'chi med dge mtshan snang ba rab 'bar ba/__/'chi med rig 'dzin mchog la=__/'chi med bdud rtsi'i rgyun gyis lus can kun/__/'chi med tshe yi pad+mo rgyas pa dang /__/'chi med ye shes stsol mdzad phrin las can/__/'chi med mtsho skyes bla mar gsol ba 'debs/__/gsol ba 'debs so kun bzang pad+ma 'byung /__/byin gyis rlobs shig o rgyan thod phreng rtsal/__/bar chad sol cig pad+ma he ru ka__/dngos grub rnam gnyis tshe 'dir 'grub par mdzod/__/nor bu sman sogs phyi yi rten 'brel dang /__/rnal 'byor nus pa nang gi thabs mkhas kyis/__/dus min 'chi ba mtha' dag zhi byas nas/__/ring 'tsho'i dga' ston rgyas par byin gyis rlobs/__/tshul khrims dag pas lhar bcas kun gyis srung /__/byang chub sems kyis gdon bgegs dbang du gyur/__/spros bral lta bas skye 'chi'i 'khrul snang kun/__/gdod ma'i dbyings su grol bar byin gyis rlobs/__/dpal ldan bla ma'i thugs rje'i 'od zer gyis/__/phyi snod 'byung lnga'i khams dang srid zhi'i bcud/__/bkug ste nang gi sgo gsum la bstims pas/__/'gyur med rdo rje'i ngo bor byin=__rgud pa med pa'i lang tsho'i gzi 'od dang /__/stobs dang rtsal gyis phas rgol zil gnon cing /__/dngos grub bsod nams rnam par rgyas pa'i dpal/__/dbang bcu'i mnga' thang 'phel bar=__'chi med srog gi mdud pa dam por bcings/__/mi shigs tshe yi ljon bzang rab tu brtan/__/ma 'gag blo dang myur ba'i spobs pa yis/__/phyogs las rnam par rgyal bar=____bskyed rim gsal bas phung khams rdo rjer dag__/bzlas brjod nus pa srog rtsol rdo rjer rdzogs/__/gang shar rtog tshogs rang grol gnyug ma'i ngang /__/ye shes rdo rjer smin par=__kha sbyor rlung gis 'chi bdag g.yul las rgyal/__/gtum mo'i drod kyis stobs dang gzi brjid rgyas/__/'bar 'dzag zhu bde'i rags pa'i rtsa thig rlung /__/dwangs ma'i lus su 'grub par=__bde chen snang cha pad+ma 'od 'bar dang /__/shes rab man+dA ra ba mnyam sbyor bas/__/dga' bzhi dbu mar rdzogs pa'i skad cig la/__/lhan skyes ye shes 'char bar=__ka dag rig pa skye 'chi bral bar rtogs/__/lhun grub snang bzhi mi phyed thig ler shar/__/zung 'jug 'ja' lus rdo rje'i zhing khams su/__/'chi med sku gsum 'grub par byin gyis rlobs/__/mdor na gnas skabs tshe bsod dpal 'byor sogs/__/chos mthun bsam sbyor gegs med mthar phyin cing /__/mthar thug 'chi med rtag pa'i phrin las kyis/__/don gnyis yid bzhin 'grub par byin gyis rlobs/__/bkra shis srid dang zhi ba'i yon tan gyi/__/dge legs snang ba nub pa med pa'i phul/__/phun tshogs 'chi med grub pa'i ngo mtshar dang /__/lhan cig phan bde'i 'byor pa rgyas gyur cig__/de ltar brjod bya dang rjod byed gnyis ka dge mtshan gyi khyad par du ma dang ldan pa'i gsol 'debs kyi tshigs su bcad pa smon lam gyis mtha' brten pa 'di'ang /__mtsho skyes pad+ma 'od 'bar gyi byin rlabs snang ba dam pas mdzes pa 'chi med g.ya' ma lung gi dben gnas chen po'i nye 'dabs su smin zla'i dkar phyogs kyi gral tshes dge bar gsol ba btab pa las/__slar yang rnam par phye ba'i dge bas 'gro kun tshe bsod dpal 'byor ye shes yon tan thams cad rgyas pa'i rgyur gyur cig__/ces pa'ang gzhon nu a b+hA yas so//___//__!_
