JKW-KABUM-01-KA-002-053-wylie
bla ma rigs gsum mgon po'i thugs dam gnad nas bskul ba'i gsol 'debs mos gus kyi dbyangs snyan/
- /__/bla ma rigs gsum mgon po'i thugs dam gnad nas bskul ba'i gsol 'debs mos gus kyi dbyangs snyan ces bya ba bzhugs so/__/na mo gu ru many+dzu g+ho ShA ya/__mkha' khyab rgyal ba kun gyi sku ye shes/__/gcig bsdus bla ma brtan pa'i 'khor lo la/__/mi phyed snying nas gus pas gsol 'debs na/__/thugs rje'i spyan gyis gzigs shig 'jam pa'i dbyangs/__/rnyed dka'i dal 'byor mi lus thob dus 'dir/__/long med 'chi ba dran pa'i brtson 'grus kyis/__/srid pa'i phun tshogs kun la ma chags pa'i/__/thar 'dod blo gros skyed cig 'jam pa'i dbyangs/__/deng nas bzung ste tshe rabs thams cad du/__/mtshan ldan bla ma dge ba'i bshes gnyen gyi/__/zhabs pad mnyes pa gsum gyis bsnyen nus pa'i/__/skal pa bzang por sbyor cig 'jam pa'i dbyangs/__/de las khas blangs tshul khrims rnam par dag__/mang du thos dang bsam pa'i pha rol son/__/rtse gcig bsgoms pas zhi lhag zung 'jug gi__/ting 'dzin sgo brgya 'byed mdzod 'jam pa'i dbyangs/__/log smra tshar gcod gzhan dag rjes bzung ba'i/__/thun mong rig pa'i gnas la ma rmongs shing /__/khyad par sde snod rgyud sde'i nges gsang la/__/'khrul med blo gros stsol cig 'jam pa'i dbyangs/__/'chad mkhas blo ldan bye ba'i yid dbang 'phrog__/rtsod pas phas rgol 'khrul pa'i dregs pa bcom/__/rtsom pas thub bstan yun ring gsal nus pa'i/__/smra ba'i dbang phyug stsol cig 'jam pa'i dbyangs/__/tha snyad kho na'i gnas la ma zhen par/__/dben pa'i gnas su mdo sngags lam gyi rim/__/tshul bzhin bsgrubs pas nyams rtogs yon tan kun/__/rtsol med rgyud la skyed cig 'jam pa'i dbyangs/__/gal te tshe 'dir brtan pa ma thob na/__/'chi ba 'od gsal don gyi 'jam pa'i dpal/__/mngon sum mthong nas chos sku'i grong khyer du/__/'bral med rjes su zungs shig 'jam pa'i dbyangs/__/der yang 'khrul nas bar dor 'khyams srid na/__/bla ma mchog dang brtan pa'i 'khor lo yis/__/rnam 'phrul du mas dag pa'i zhing khams su/__/lung bstan dbugs dbyung stsol cig 'jam pa'i dbyangs/__/las nyon dbang gis srid par skyes gyur kyang /__/dal 'byor rten thob theg chen rigs sad nas/__/dka' ba med par lam gyi lhag ma kun/__/rdzogs pa'i rten 'brel sgrigs shig 'jam pa'i dbyangs/__/mdor na 'di phyi bar do'i gnas skabs kun/__/mgon po khyod las skyabs gzhan mi 'tshol bas/__/rang gzhan don gnyis lhun gyis grub pa yi/__/dge mtshan mngon sum stsol cig 'jam pa'i dbyangs//___//__!_
na mo gu ru lo ke shwa rA ya/__sras bcas rgyal kun snying rje'i phung po la/__/bla ma phyag na pad+mor mtshan gsol bar/__/mi phyed gdung shugs drag pos gsol 'debs na/__/thugs rjes lhag par dgongs shig spyan ras gzigs/__/bdag dang bdag 'dra'i snyigs ma'i mthar skyes pa'i/__/yid can sdug bsngal rgya mtshor bying ba kun/__/mgon po khyod las skyabs gzhan ma 'tshal na/__/sdug bsngal 'dam nas drongs shig spyan ras gzigs/__/dal brgyad 'byor bcus brgyan pa'i lus rten kyang /__/'jig pa'i rkyen mang 'tsho ba'i rkyen nyung zhing /__/chos bzhin spyod la 'gal rkyen ches mang phyir/__/mi mthun bar chad sol cig spyan ras gzigs/__/dge ba'i bshes dang dge ba'i grogs po dang /__/dben pa'i gnas dang chos mthun yo byad dang /__/dad dang snying rje shes rab brtson 'grus sogs/__/mthun rkyen legs tshogs stsol cig spyan ras gzigs/__/do nub tsam yang mi 'chi'i gdeng med bzhin/__/sgrub la phyi bshol byed pa'i ngang ring po/__/bdag la dam chos yong dus mi gda' bas/__/btsan thabs 'khrul pa shig cig spyan ras gzigs/__/gting nas 'khor ba'i 'dod zhen ma log pas/__/rnam dkar bsgrub kyang srid pa'i 'dun mar 'chor/__/thar pa'i sa bon bral ba'i dman bdag la/__/nges 'byung drag po skyed cig spyan ras gzigs/__/rang nyid kho na srog las thar 'dod kyang /__/rnam mkhyen go 'phang thob pa'i thabs med pas/__/gzhan phyir byams dang snying rje byang chub sems/__/bcos min rgyud la skyed cig spyan ras gzigs/__/ji srid bdag tu 'dzin pa'i blo yod pa/__/de srid gzung 'dzin 'khrul pa mi zad pas/__/so sor rtog pa'i shes rab ral gri yis/__/spros pa'i drwa ba chod cig spyan ras gzigs/__/mdor na tshe 'dir chos spyod mthar phyin cing /__/'chi ba'i dus kyang gnad gcod sdug bsngal bral/__/byang chub sems gnyis bzhon pa la brten nas/__/bde nas bde bar drongs shig spyan ras gzigs/__/gang du skyes kyang dge ba'i bshes dang mjal/__/su dang 'grogs kyang chags sdang 'ching ba bral/__/ji ltar bsgrub kyang byang chub spyod mchog las/__/nam yang 'bral med mdzod cig spyan ras gzigs/__/mthar thug rang don spangs rtogs mthar phyin nas/__/gzhan don mkha' khyab snying rje'i phrin las can/__/mgon po khyod dang rnam thar dbyer med pa'i/__/go 'phang myur du stsol cig spyan ras gzigs/_/_! na mo gu ru badz+ra pA Na ye/__sras bcas rnam 'dren yongs kyi gsang ba gsum/__/gcig bsdus bla ma phyag na rdo rje'i zhabs/__/snying nas dran pa'i gdung bas gsol 'debs na/__/mngon sum byin gyis rlobs shig gsang ba'i bdag__/snyigs ma'i dus mthar skyes pa'i yid can rnams/__/gang du gnas kyang nad mtshon phongs pa dang /__/yid srubs dpung dang bcas pas skabs btsal bar/__/rdo rje'i go chas srungs shig gsang ba'i bdag__/lhag par steng 'og bar gsum gdon gyi rigs/__/rnam pa du mas 'gro ba'i srog 'phrog cing /__/snod bcud rgud pa'i gdung ba la sbyor ba/__/mthu stobs nus pas thul cig gsang ba'i bdag__/gzhan yang 'jigs pa brgyad dang bcu drug sogs/__/mi mthun 'gal rkyen du ma'i lcags sgrog gis/__/bdag gzhan lus ngag yid gsum bcings pa kun/__/ye shes ral gris chod cig gsang ba'i bdag___/tshul bzhin ma yin yid la byed pa yi/__/chags sdang rmongs pa'i 'thib bus non pa na/__/thugs rje nyin mor byed pa'i gzi 'od kyis/__/nyon mongs mun pa sol cig gsang ba'i bdag__/skad cig tsam zhig dge ba'i sems skyes kyang /__/bdud dang bdud kyi ris kyi bar chad kyis/__/blo sna log pa'i lam du sgyur byed pa'i/__/byang chub lam gegs sgrol cig gsang ba'i bdag__/nges par 'byung dang byang chub sems gnyis dang /__/rgyal ba'i sras kyi spyod pa rgya mtsho la/__/rang dbang bsgyur nas kun mkhyen ye shes kyi/__/go 'phang myur du stsol cig gsang ba'i bdag__/khyod ni rgyal ba'i gsung rabs mtha' dag dang /__/lhag par rdo rje theg pa kun 'dzin phyir/__/gsang chen lam gyi rten 'brel ma lus pa/__/rtsol med rgyud la skyed cig gsang ba'i bdag__/dbang gis rgyud smin dam tshig rnam par dag__/rim pa gnyis kyi ting 'dzin mthar phyin pas/__/'jig rten 'jig rten 'das pa'i dngos grub kyi/__/dga' ston lhug par stsol cig gsang ba'i bdag__/gal te tshe 'dir grub mtha' ma rnyogs na/___/srid pa kun tu dal 'byor lus rten mchog__/mtho ris yon tan bdun gyis rab mdzes pa'i/__/rigs su skye bar mdzod cig gsang pa'i bdag__/skyes ma thag tu dge ba'i bshes dang mjal/__/gsung gi bdud rtsi tshul bzhin bsgrubs pa las/__/mgon po khyod dang yon tan mtshungs pa yi/__/skal bzang mngon sum stsol cig gsang ba'i bdag__/de ltar phyogs dus rgyal ba sras bcas kyi/__/mkhyen brtse nus pa'i ye shes gcig bsdus pa/__/dpal ldan bla ma rigs gsum sems dpa' yi/__/thugs rje bskul zhing gsol ba gdab pa'i mthus/__/ji ltar smon pa'i gnas kun myur 'grub cing /__/bstan 'dzin zhabs brtan bshad sgrub bstan pa dar/__/'gro rnams rdzogs ldan dus kyi 'byor pa dang /__/srid zhi'i dge legs rgyas pa'i bkra shis stsol/__/ces pa'ang snga sor dad dam gtong ba'i nor gyis mngon par mtho ba phyag mdzod blo gros bzang po dang /__rnam dpyod kyi nor can 'jam dbyangs yon tan/__nye bar gnas pa tshul khrims rgya mtsho rnams kyis bla ma la gsol ba 'debs pa lam rim gyi smon lam dang bcas pa zhig dgos zhes bskul ba dang /__slad kyis khyab bdag rdo rje btsun mo'i ye shes gzigs pa'i bdud rtsis blo gros kyi pad+mo kha yongs su bye ba sgrub brtson rnal 'byor gyi dbang phyug chos dbyings dpal ldan dang /__sgrub brtson blo gros dpal ldan zung gis rgyang ring mo nas nan tan chen pos tshul 'di lta bu zhig gyis shig ces bskul ba la brten nas rje btsun bla ma dam pa rnams kyi bran du gyur pa'i kun rmongs kun tu rgyu 'jam dbyangs mkhyen brtse'i dbang pos yon tan rin po che du ma'i 'byung gnas dpal e wa~M chos ldan gyi bla brang thar pa rtser/__lhag bsam dag pas gang shar rtse gcig tu gsol ba btab pa'i dge bas 'di nyid kha ton du bgyid pa sogs 'brel tshad rnams kyi rgyud la byang chub kyi sems rin po che bcos min du skye ba'i rgyur gyur cig__/sarba dA ka l+yA NaM b+ha ba tu//___//__
