JKW-KABAB-20-WA-017-wylie
@#/__snyan brgyud phur pa'i gnad tig gi gtor bzlog phrin las rdo rje'i thog 'bebs dgra bgegs kun 'joms bzhugs so//__//@##/__/na ma shrI badz+ra ku mA rA ya/__/ma rungs bdud dgra'i tshogs rnams 'dul ba la/__/mthu stobs bskal pa'i me ltar rab 'bar zhing*/__/dus gsum rgyal ba'i phrin las gcig bsdus pa/__/bla ma dpal chen rdo rje gzhon nus skyongs/__/snyigs dus ma rungs dam sri'i tshogs rnams kun/__/rtswa sbur me bzhin 'jom par byed pa la/__/khro rgyal rig sngags phrin las stobs 'dus las/__/lha mchog gzhan gyis 'dul bar ga la nus/__/de phyir pra b+ha hasti'i thugs kyi bcud/__/gu ru shAkya seng ge'i zhal gyi lung*/__/'od gsal sprul pa'i rdo rje'i snyan brgyud kyi/__/phrin las rdo rje phur pa'i gtor bzlog 'chad/__/'dir dbang thob cing dam tshig la gnas pa'i sngags pas tshul 'di'i bskyed rdzogs kyi gding dang ldan pa'am/__/bsnyen sgrub las su rung ba sngon du 'gro bas srung bzlog gi las la bsngags pa'i gtor bzlog gi rim pa la/__yo byad sngon du bsags pa/__cho ga'i rim pa dngos/__rjes kyi bya ba dang gsum las/__dang po/__drag po'i las dang mthun pa'i gnas sam sgrub pa'i khang par nyi ma lho bgrod mgo phur 'dzoms pa sogs mngon spyod gdab las la bsngags pa'i dus su gnas khang rgyan gyis spras par gzhung mthun gyi sku rten bkrams pa'i spyan sngar stegs bur sgrub phur dar mthing nag gi cod pan can dang*/__yi dam dang chos skyong gi gtor ma/__tshogs/__chad brtan/__sman raka__/nyer spyod/__dkar bgegs sogs spyi ltar dang*/__khyad par gyi las dkyil stegs bu la ro sol gyis byugs par e gru gsum me ri dang bcas pa'i dbus su drag po'i 'khor lo rtsibs bcu/__/lte bar chos 'byung dang bcas pa bri/__de steng many+dzi'i khar lcags snod du 'bru nag gi rjen phye khrag gis sbrus pa'i dmar gtor thog gzugs 'khor bcu'i bskor/__de yi phyi la mdun du shwa na ma bzhi/__g.yas su bdag nyid ma bzhi/__g.yon du sa bdag ma bzhi yi bshos bu so so'i mthun rdzas kyis gtams pa rnams kyi rtser sku gzugs ru mtshon ba dan nag po me long dang bcas pa btsugs/__khrag kong*/__mtshe yungs/__rtsang dmar/__khram byang dang rgyu rlon sogs drag po'i rgyan gyis rngams brjid ldan pa bya/__mthar bskor du/__gtor zor/__khrag kong*/__rdo zor/__mda'/__yungs dkar gyi gong bu/__dug sna bcas dang khrag gi ar+g+haM sogs drag po'i nyer spyod kyis g.yas su bskor/__nye logs ci bde bar lcags hom du bag zan la phung shul sogs kyi sa dang dur khrod kyi 'jag ma btang ba'i ling+ga la tshad ldan byed na dgra srog spu gri'i 'khor lo tshon skud sngo dmar gyis bcings pa gzhugs la mtha' rtsangs ras bskor/__nyin re bzhin bsgral rgyu'i zan ling*/__bya 'ug gi sgro/__gu gul/__yungs dkar/__byad thags/__khrag thun/__thun rdzas sna tshogs/__gdab phur/__ral gri/__tho ba/__hom gzar rnams dang*/__bzlog pa grangs gsogs skabs zor la 'bul rgyu'i gtor chung grangs mang*/__thun gtor zur gsum mtshe yungs rtsang gis brgyan pa/__gzhan yang rol mo'i rigs byed sogs 'og tu dgos pa rnams 'du bya/__bskang bzlog rkyang pa yin na zor gtor dang ling+ga bdud rtsi rak+ta mar me dza gad maM sa tshe'i zla rgyas bam chen/__gsur chen/__bza' bca' sogs bskang rdzas sna tshogs bshams pa las gzhan mi dgos so/__/gnyis pa cho ga dngos la/__ting nge 'dzin gyi rdzong bca' ba dang*/__drag po'i g.yul 'gyed pa gnyis las/__dang po ni tshig bdun gsol 'debs dang*/__dpal chen rdo rje gzhon nu'i dgongs pa yi sogs dang*/__brgyud pa'i gsol 'debs nas brtsams mchod pa byin brlab kyi bar las byang phrin las rnam par rol pa'i dga' ston ltar btang*/__bdag bskyed ni/__hU~M/__rdo rje de bzhin nyid kyi dbyings sogs rgyun gyi rnal 'byor gter chen bla ma mkhyen brtse'i gsungs sab kha med pa ltar btang la bsnyen sgrub las gsum gyi bzlas pa bcas bya/__stong tshig gi mchod pa phul la mdun bskyed mchod pa byin brlab dang*/__lha bskyed nas bzung bzlas pa'i bar las byang rgyas pa phrin las rnam rol ltar sbyar la zor dkyil lhar bskyed/__dzaba? khang dbye mi dgos/__bum bzlas dang tshe sgrub sogs kyang dor/__khyad par gyi bzlas dmigs srung bzlog bsad mnan gsum las dang po rdo rje'i mkhar du srung ba ni/__dpal chen bcu las ye shes kyi:__rnam 'phrul nam mkha' gang bar 'phros:__phyogs mtshams steng 'og tshom bur bzhugs:__bsrung ba mtshams kyi las mdzad de:__gur khang drug gis gtams par bsgoms:__sgrub sngags mthar/__hU~M hU~M hU~M hU~M hU~M hU~M hU~M hU~M hU~M hU~M:__hU~M badz+rA kA wA tsi rak+Sha rak+Sha zhes sbyar ba bzla/__gnyis pa bzlog dmigs ni/__dpal chen lha tshogs 'khor dang bcas:__khros 'khrugs rngams pa'i gzi byin bskyed:__phyi rol zhal gzigs sngags kyi sgra:__'brug stong lta bur sgrogs pa yi:__sku dang zhal las dmod pa'i mtshon:__nad mtshon dug rlangs pho nya'i tshogs:__skar ltar 'khrugs shing ser ltar 'babs:__nag phyogs 'byung po'i sde dang bcas:__phas rgol rig sngags dmod pa'i dbal:__mi mthun 'bras bu than ltas ngan:__thams cad rang dbang med par bzlog:__dgra dang bgegs kyi steng du babs:__rtsa sbur me lces bsregs pa bzhin:__rjes shul med par brlag par bsam:__sgrub sngags dang drag sngags spu gri sbrel ba'i sham du/__rbod zor sarba a pa ka ra b+h+yo b+h+yo zlog zlog rbad nan:__zhes chig dril du drag kha nas chu 'bab pa bzhin drag tu bzla/__gsum pa bsad dmigs spyir btang ni/__rang gi thugs ka'i 'od zer mdun bskyed la phog__/de las 'od zer tsha zhing rtsub pa 'phros/__khro bcu khra thab sgo ma dam can rnams la phog pas de rnams las sprul pa'i pho nya dpag tu med pa 'phros/__byang chub sgrub pa la bar du gcod cing bstan 'gro la 'tshe ba'i dgra bgegs thams cad mngon spyod drag po'i phrin las drug gis ming tsam yang med par rdul du brlag par bsam/__sgrub sngags dang spu gri sbrel ba'i hU~M phaT kyi gong du dgra bgegs dam sri mA ra ya zhes sbyar ba ci nus su bzla/__thun rdzas rnams la'ang phus gdab ste ngar bskyed/__thun mthar dbyangs gsal rten snying yig brgya bzla/__stong tshig mchod bstod mdor bsdus sngon du 'gro bas/__bka' gter gyi srung ma spyi dang*/__khyad par phur srung gi gsol ka rgyas bsdus gang rigs sbyar/__tshogs byin brlab nas brtsams mchod pa'i rjes/__skong ba bdud las rnam rgyal sbyar/__bshags pa'i rjes smad las gtor bzlog rgyas pa dang mi 'brel na bsgral bstabs bcas dkyus ltar grub pa dang*/__rol mo dbyangs dang bcas pas/__hU~M:__snang srid phur bus gdab pa'i phyir:__rdo rje gzhon nu'i thugs dam bskang :__khams gsum 'khor ba rgyas 'debs phyir:__'khor lo rgyas 'debs thugs dam bskang :__mi dge bcu po tshar bcad phyir:__khro rgyal yab bcu'-i thugs dam bskang :__dge bcu dang du blang ba'i phyir:__khro mo bcu y-i thugs dam bskang :__phyogs bcur sprul pa 'gyed pa'i phyir:__khra thabs nyi shu'i thugs dam bskang :__gdug pa'i dgra bgegs sgrol ba'i phyir:__sras mchog nyer gcig thugs dam bskang :__zhi rgyas dbang drag las sgrub phyir:__phrin las bzhi yi thugs dam bskang :__slob dpon sku dgra sgrol ba'i phyir:__shwA na mched bzhi'i thugs dam bskang :__bstan pa'i spyi dgra sgrol ba'i phyir:__re ti mched bzhi'i thugs dam bskang :__rnal 'byor sgos dgra sgrol ba'i phyir:__bse mo bzhi yi thugs dam bskang :__myur mgyogs drag po'i las mdzad phyir:__bse lcags dung gsum thugs dam bskang :__dgugs 'dren 'ching bsdam myos bya'i phyir:__sgo ma bzhi yi thugs dam bskang :__ru tra sde gsum 'dul ba'i phyir:__ging chen bco brgyad thugs dam bskang :__phyogs bcur dmag dpung dbab pa'i phyir:__ma bdun sring bzhi'i thugs dam bskang :__phrin las rgya mtsho sgrub pa'i phyir:__dbang phyug nyer brgyad thugs dam bskang :__zhes dang gzhan yang*/__bskang ngo bskal pas thugs dam bskang :__dkyil 'khor lha tshogs thugs dam bskang :__bdud rtsi sman gyis thugs dam bskang :__ba liM gtor mas thugs dam bskang :__rak+ta dmar gyis thugs dam bskang :__zhal zas tshogs kyis thugs dam bskang :__dkyil 'khor 'khor zhal gyis thugs dam bskang :__dza gad phud kyis thugs dam bskang :__zhun chen mar mes thugs dam bskang :__srog dbugs mdangs kyis thugs dam bskang :__gsur chen dri yis thugs dam bskang :__rol mo sgra yis thugs dam bskang :__bskang gyur dbang dang dngos grub stsol:__g.yar dam gnyen po sor stsol cig:__de nas dpon slob rnams kyis phyir zlog tu thal mo gdab cing*/__de ltar bskang bas bskang gsol nas:__'di ltar bzlog pa'i phrin las mdzod:__rnal 'byor bdag cag 'khor bcas la:__yas kyi bdud g.yos phyir la bzlog:__mas kyi sri langs phyir la bzlog:__nye ba'i byol po phyir la bzlog:__yul ba'i 'grim chags phyir la bzlog:__pha tshan rgya 'dre phyir la bzlog:__ma bu'i byur 'dre phyir la bzlog:__gshin rje'i 'khrul 'khor phyir la bzlog:__ma mo'i khrag zor phyir la bzlog:__bdud kyi khram kha phyir la bzlog:__btsan gyi gzer kha phyir la bzlog:__sa bdag gdug byed phyir la bzlog:__rgyal po'i smyo 'bog phyir la bzlog:__gza' yi king kang phyir la bzlog:__mu stegs ngan sngags phyir la bzlog:__the'u rang sris rkun phyir la bzlog:__nad kha rims kha phyir la bzlog:__sngags pa'i phur kha phyir la bzlog:__bon gyi bon zor phyir la bzlog:__sum pa'i glang zor phyir la bzlog:__me nyag 'bol le phyir la bzlog:__lo zla zhag keg phyir la bzlog:__mo ngan rmi ngan phyir la bzlog:__ltas ngan mtshan ngan phyir la bzlog:__pho brgya'i mda' bdar mtshon kha bzlog:__mo brgya'i dug g.yos zas kha bzlog:__mi nag skye bo'i ya ga bzlog:__bran khol ngan pa'i dmod mchu bzlog:__dgra la b+h+yo la bsgral du gsol:__bgegs la b+h+yo la rdul du rlog:__zhes bskang bzlog 'di kho na la grangs bzung*/__spro na drag sngags bzlog sham can cung zad bzla/__tshogs la rol pa nas bzung las byang dkyus ltar la/__chad tho'i mgor 'og gi zor bskul tsam sbyar te gtor ma phul bas bskang bzlog spyi khyab la rung bas zhar la 'phros pa'o/__/bzlog pa rgyas pa'i skabs gong gi tshogs bshags pa bcas grub pa na/__gnyis pa drag po'i las kyi g.yul 'gyed pa la sngon du bya ba gsum/__bar du bya ba bzhi/__rjes kyi bya ba drug gi snga ma la/__thugs dam bskul ba/__gser skyems/__gzu dpang gsum las/__dang po ni/__rang nyid lha'i nga rgyal drag po bskyed la/__bla ma rig 'dzin dpal chen rdo rje phur bu'i dkyil 'khor gyi lha tshogs dam can srung ma dang bcas pa thams cad drag po mngon spyod kyi las la bzhengs shing sprul pa'i pho nya nams mkha' gang ba tsam spro bar dmigs la/__rig 'dzin bskul ba ni/__hU~M:__byang chub mchog tu sems bskyed cing :__dus gsum rgyal ba'i gdung 'tshob ba'i:__rig 'dzin rnams kyi dus la bab:__phur bu sgrub pa'i grogs mdzod cig:__slob dpon pad+ma 'byung gnas kyis:__rgya gar tsan+dan nags tshal du:__ji ltar rtags bstan bsnyel lam ci:__phur bu sgrub pa'i grogs mdzod cig:__paN chen bi ma mi tra yis:__gang+gA la yi chu bo la:__ji ltar rtags=__phur bu=__bal po shI la many+dzu yis=__man d+ha la yi mkhar gong la:__ji ltar =__phur bu=__mkhar chen ye shes mtsho rgyal gyis:__dgung gi pho rog nag po la:__ji ltar=__phur bur=__pad+ma mdo sngags gling pa yis:__snyan brgyud bka' babs brnyes pa'i tshe:__ji ltar rtags bstan bsnyel lam ci:__phur bu sgrub pa'i grogs mdzod cig:__gzhan yang rig 'dzin grub pa'i tshogs:__phrin las drag rtsal can rnams kyis:__ji ltar=__phur bu=__ma g.yel ma g.yel rig 'dzin rnams:__sngon gyi thugs dam rjes dgongs la:__mthu rtsal nus pa'i dpung skyed cing :__byin gyis brlab phyir gshegs su gsol:__de nas dkyil 'khor gyi lha tshogs bskul ba ni/__hU~M:__chos nyid gdod nas skye ba med pa la:__snying rje chen pos skye ba'i skur bstan pa:__dpal chen rdo rje gzhon nu yab yum dang :__rigs lnga ye shes kun tu snang ba'i sprin:__khro bcu yab yum khra thabs sprul pa bcas:__dus las yal yol dbri bkol mi mdzad par:__chos dbyings ye shes gsal ba'i ngang nyid las:__thugs dam dbang gis khros 'khrugs skur bzhengs te:__gdug can dgra bgegs gtum po pham mdzad phyir:__'khor bcas tha tshig gnyen po'i dus la bab:__gsol yang mi dgongs bskul yang mi bgyid na:__thugs dam zhal bzhes dam bca' brdzun du thal:__de phyir ye shes chen po'i rtsal bskyed la:__mngon spyod dmod pa'i phrin las yongs grub mdzod:__phur srung dam can rnams bskul ba ni/__hU~M b+h+yo:__sngon tshe sgrub pa'i gnas mchog nas:__lcags kyi spyang mo mgo dgu ma:__zangs kyi wa mo rkang gsum ma:__bswe yi 'phar ba lce brgyad ma:__g.yu yi phyi mo ral pa can:__nga ro 'brug tu ldir zhing zug:__kha rlangs sprin du 'khyil zhing 'thibs:__mig ni nyi ma'i zer bzhin 'bar:__bang ni glog gis 'gran mi nus:__spu ni mtshon cha'i so ltar rno:__de 'dra'i chibs kyi brjid tshul la:__'jigs pa'i mi mo bzang mo zhon:__g.yas pas rdo rje thod phreng 'dren:__g.yon pas rin chen phur bu 'dril:__mu kha mched bzhi'i dus la bab:__'dir spyon bcol ba'i phrin las mdzod:__ma tha ma tha badz+ra:__dz+wa la dz+wa la badz+ra:__su ru su ru badz+ra:__mu ru mu ru badz+ra:__dgra bgegs gnod byed mA ra ya hU~M phaT:__hU~M b+h+yo:__bying byed mtsho la gnas bcas shing :__rlung nag 'tshubs ma'i sna 'dren ma:__dpal ldan nag mo re ma ti:__sku mdog mthing nag 'bar ba la:__mi lpags rlon pa sku la gsol:__phyag na spu gri rnon po bsnams:__chibs su drel rta rkang gsum bcibs:__'dir spyon bcol ba'i phrin las mdzod:__hU~M:__bar snang khams su rten bcas shing :__'brug dang glog gi sna 'dren ma:__dpal ldan nag mo re ma ti:__sku mdog dmar nag 'bar ba la:__btsos dmar la'u sku la gsol:__khrag skam lcags skyu phyag na bsnams:__chu glang sngon po chibs su bcibs:__'dir spyon bcol ba'i phrin las mdzod:__hU~M:__ri rab rtse la rtain bcas shing :__sad dang ser ba'i sna 'dren ma:__dpal ldan nag mo re ma dza:__sku mdog ser nag 'bar ba la:__bya yi thul pa sku la gsol:__phyag na gser gyi zor ba bsnams:__chibs su sha ba yu mo bcibs:__'dir spyon bcol ba'i phrin las mdzod:__b+h+yo:__sa yi gling du rten bcas shing :__kha ba bu yug sna 'dren ma:__dpal ldan nag mo re ma dzu:__sku mdog ljang nag 'bar ba la:__chu dar thul pa sku la gsol:__phyag na bdud kyi khram bam bsnams:__rnga mo sngo nag chibs su bcibs:__'dir spyon bcol ba'i phrin las mdzod:__hU~M ma ma wA shaM ku ru ma d+haM e ka ra i dan d+ha ti ma ma shI g+h+raM kA ra ye dgra bgegs gnod byed mA ra ya hU~M phaT:__hU~M b+h+yo:__bal yul ya byin yul la bsten:__mar khu'i mtsho la mnga' yang mdzad:__rdo rje ya byin mthu mo che:__sku mdog mthing nag 'bar ba la:__mthing nag ber chen sku la gsol:__phyag na bdud zhags lcags kyu bsnams:__bdud rta nag po chibs su bcibs:__'dir byon bcol ba'i phrin las mdzod:__hU~M:__rong gi de byin yul la bsten:__zhag gi mtsho la mnga' yang mdzad:__rdo rje de byin rtsal mo che:__sku mdog ser nag 'bar ba la:__ber chen ser nag sku la gsol:__gser zhags gser phur bsnams:__chibs su gza' rta ser po bcibs:__'dir spyon bcol ba'i phrin las mdzod:__hU~M:__mang yul bse byin yul la bsten:__khrag gi mtsho la mnga' yang mdzad:__rdau rje bse byin 'phrul mo che:__sku mdog dmar nag 'bar ba la:__ber chen dmar nag sku la gsol:_btsan zhags seng lding phur bu+u bsnams:__chibs su btsan rta dmar po bcibs:__'dir spyon bcol ba'i phrin las mdzod:__hU~M:__snye nam phag byin yul la bsten:__'o ma'i mtsho la mnga' yang mdzad:__rdo rje phag byin mthu mo che:__sku mdog sngo nag 'bar ba la:__ber chen sngo nag sku la gsol:__g.yu zhags mchong phur phyag na bsnams:__g.yu rta sngon po chibs su bcibs:__'dir spyon bcol ba'i phrin las mdzod:__ka Ta ka Ta ya:__dza ye bi dza ye:__a dzi te a pa rA dzi te mA ra se na pra mar+d+ha ni:__dgra bgegs gnod byed mA ra ya hU~M phaT:__ces dang bskul mtshams so sor/__dam rdzas mchod pa 'di bzhes la:__srid pa'i phur bu bdag sgrub pas:__bcol ba'i phrin las 'grub par mdzod:__ces sbyar zhing sman rag gtor ma la sbrengs te bskul lo/__/gnyis pa gser skyems ni/__ra~M ya~M kha~M gis sbyangs/__stong pa'i ngang las b+h+rU~M las rin po che'i snod du oM AHhU~M las gser skyems kha dog dri ro nus pa phun sum tshogs par gyur:__hU~M:__dkon mchog rin chen gsum dang rtsa ba gsum:__khyad par phrin las phur pa'i lha tshogs rnams:__gser skyems bdud rtsi'i mchod pa 'di bzhes la:__rnal 'byor bdag gi mthu dang dpung bskyed cig:__pho rgyud mo rgyud ma ning dregs pa'i sde:__ma mo mkha' 'gro zhing skyong gnas nyul kun:__gser skyems bdud rtsi'i mchod pa 'di bzhes la:__rnal 'byor bdag gi mthu dang dpung bskyed cig:__lo zla zhag dus spar sme tshes kyi bdag:__yul lha gzhi bdag mthu rtsal ldan pa kun:__gser skyems bdud rtsi'i mchod pa 'di bzhes la:__rnal 'byor bdag gi mthu dang dpung bskyed cig:__gsum pa gzu dpang ni/__hU~M:__bdag ni rnal 'byor sgrub pa pos:__rdo rje theg pa'i bstan pa la:__mi phyed dad pas rab zhugs te:__sgrub pa snying por len pa dang :__klog dang spong ba'i sde btsugs shing :__thos bsam bstan pa btsugs pa la:__dgra dang bgegs kyi bar chad byung :__ma g.yel drag po'i las mdzod cig:__da dus bskal pa'i snyigs ma la:__rnal 'byor mgon skyabs ma mchis pas:__lha dang srung ma grogs la byon:__bden rdzun gnyis kyi dpang po mdzod:__bdag ni ma nyes ma len no:__ma yo ma bcos gzu dang dpang :__dam nyams dgra bo sdig chen gyis:__lha dang slob dpon brnyas pa dang :__rdo rje'i 'ched la 'khu ba dang :__srung ma rnams la mthu med zer:__sangs rgyas bstan pa bshigs pa dang :__sems can yongs la 'tshe ba dang :__chos 'khor srid la rngams pa dang :__dge 'dun sde la 'tshe ba dang :__bstan pa'i gzhi la phrag dog byas:__mi dge bcu ni dang len pa'i:__dam nyams sdig can dgra bo 'di:__myur du bsgral bar ma byas na:__snying po'i sgrub pa bshol la thug:__sangs rgyas bstan pa 'jig la nye:__da ni lha dang srung ma rnams:__mngon spyod drag po'i las la bskul:__ma g.yel drag po'i phrin las mdzod:__gnyis pa bar du bya ba'i las la/__dmigs bya bskyed 'gugs/__sgrol chog dngos/__thugs dam bskul ba/__bzlog pa'i las bcol ba dang bzhi las/__dang po ni/__e yaM dz+wa la raM/__rang gi mdun du gnam lcags kyi brub khung bang rim dgu pa/__kha khyer dog cing gting zab pa/__'og gzhi gser gyi sa gzhi la thug pa/__mtshon cha sna tshogs kyi char 'bebs pa'i phyi rol du phur srung dam can rnams las la rngams pa de'i nang du nr-i tri las gnod byed dgra bgegs 'dus pa'i ngo bo nag la ham pa/__rkang lag lcags sgrog gis bsdams pa/__bu ga dgu nas khrag 'dzag pa/__mig shi mig__/'o dod lhang lhang 'bod pa zhig tu gyur/__g.yab dril 'gugs rgya bcas/__na mo/__rig 'dzin rtsa brgyud kyi dpal ldan bla ma dam pa rnams kyi bka' bden pa dang*/__sangs rgyas kyi bka'=__chos kyi bka'=__dge 'dun gyi bka'=__gsang sngags dang rig sngags dang*/__gzungs sngags dang snying po dang phyag rgya dang ting nge 'dzin gyi bden pa dang*/__chos nyid gdod nas stongs kyang chos can rgyu 'bras bslu ba med pa'i bden pa dang*/__khyad par du bcom ldan 'das dpal chen rdo rje gzhon nu phrin las phur pa rol pa'i dkyil 'khor gyi lha tshogs bka' sdod dam can rgya mtsho'i tshogs dang bcas pa rnams kyi bka' bden pa dang*/__bden pa chen po'i mthu la brten nas bstan dang 'gro ba'i spyi dgra/__khyad par rig pa 'dzin pa bdag cag yon mchod 'khor dang bcas pa rnams la snga dgra lag gis bdar ba/__phyi dgra yid la sems pa/__da dgra thad du 'dzugs pa'i gzugs can sdang ba'i dgra dang*/__gzugs med gnod byed bgegs kyi tshogs dang bcas pa srid pa gsum gar gnas gar gros kyang skad cig yud tsam gyis dmigs pa'i rten 'di la khug cig__/oM badz+ra kI li kI la ya dgra bgegs gnod byed dzaHhU~M ba~M hoH__shrI g+h+raM A na ya hU~M phaTaH__lan gsum gyis bkug ste/__badz+ra aM ku sha dzaH__badz+ra pA sha hU~M:__badz+ra s+pho Ta ba~M:__badz+ra g+han+De ho:__pra be sha ya phaT:__A be sha ya AH__zhes phyag rgya bzhi'i dgug gzhug bcings myos dbye dbab rnams bya/__gnyis pa bsgral ba dngos la rig pa mchog gi rgyud las/__lha dbral gzugs la dbab pa dang*/__/byad du gzhug dang smyo ru gzhug__/rdul du brlag dang zhal du bstabs/__/de la'ang pho nya 'phyang sngags rdzas/__/ting 'dzin dmod pas las rdzogs bya/__/zhes 'byung ba ltar gab pa'i sngags drug gi dgongs pas bsgral ba'i las drug__/de re re la'ang nang gses drug drug tu gsungs pa snyan brgyud gter gzhung dkyus su bab drug gis bskul ba dang*/__byad du bcug cing lha dbye dang*/__spu gri'i sngags dang dmod pa gdags:__zhes pa'i don grub pa'i rig 'dzin rnams kyi man ngag gis cung zad rgyas par bkral ba la/__dang po lha dang phral ba la'ang drug gi__/pho nya bskul ba ni/__hU~M:__dam tshig chen po'i dus la bab:__khyod kyi dam tshig dus la bab:__mthu rtsal phyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__'phyang ni/__gtogs shing grogs dang phral bar gyis:__sngags ni/__oM badz+ra kI li kI la ya dgra bgegs ha sa ya ra ha sa ya ra hrIHdaN+Da hU~M phaT:__dbye rdzas bdug__/bya 'ug gi sgros byab/__dkyil 'khor lha tshogs dang rdo rje legs pa 'gong po 'khor dang bcas pas lha dang phral bar bsams/__dgra bo skyobs pa'i lha gnyis dang phral bar gyur cig__/ces dmod bor/__gnyis pa gzugs dbab ni/__snga ma ltar drug re 'og ma rnams la 'gre bas/__hU~M:__sprul pa chen po'i dus la bab:__mthu rtsal phyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__phobs shig rnam par gzir bar gyis:__oM badz+ra kI li kI la ya dgra bgegs A we sha ya A we sha ya hU~M phaT:__yungs dkar gyis brab/__dkyil 'khor gyi lha tshogs dang klu chen 'jog po 'khor dang bcas pas rnam shes bkug nas bstim par bsams/__dgra bo'i rnam shes ling ga la thim par gyur cig__/gsum pa byad du gzhug pa ni/__hU~M:__phyag brnyan chen po'i dus la bab:__mthu rtsal phyung ba'i dus la bab:__dongs grub bar chad byed pa'i bgegs:__gdug cing sdang sems ldan pa rnams:__zungs shing rgyob cig rnam par chings:__oM badz+ra kI li kI li ya dgra bgegs sarba shI g+h+raM a na ya hU~M phaT:__byad thag gis bcings/__dkyil 'khor gyi lha tshogs dang srog bdag sgrol ging 'khor dang bcas pas dgra bo bcings par bsams/__dgra bgegs gnod byed 'di chings shig sdoms shig:__bzhi pa smyo ru gzhug pa ni/__hU~M:__shwa na mu kha'i dus la bab:__mthu rtsal phyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__rings par khug la smrar chug cig:__oM badz+ra kI li kI la ya dgra bgegs dz+wa la pa ya dz+wa la pa ya hU~M phaT:__dug snas brab/__dkyil 'khor gyi lha tshogs dang the'u rang 'khor dang bcas pas dgra bgegs sems smyo ru bcug par bsams/__dgra bgegs smyo 'bog dran pa nyams par gyur cig__/lnga pa rdul du brlag pa'i khongs su spu gri chig shur gyi gdab las 'byung bas/__bsgral phur thogs la/__bdag dpal chen po/__phur pa sras mchog__/ling ga dgra bgegs dngos su gsal ba'i snying gar tshe srog gi rten nr-i tri dang bcas gsal/__phur pa'i dbal rtse a dkar po'i 'od kyis dmigs bya'i sgrib gnyis bag chags dang bcas pa sbyangs/__srog rten la reg pa tsam gyis sgo lnga'i rnam shes dbal rtser bsdus/__nyon yid rtsad bcad/__dwangs ma lnga 'dus kyi tshe bsod thams cad 'od kar po'i rnam par bsdus nas rang la thim/__kun gzhi'i rnam shes a dkar po'i rnam pa phur rtses ling gis btegs nas dpal chen po'i thugs kar thim/__phur bu'i dbal las mtshon cha'i char bab pas bag chags kyi gzugs phung dum bur gtubs par bsams la/__hU~M:__'dod khams gzugs khams gzugs med khams:__sku gsung thugs kyi dbyings su rdzogs:__ye shes gsum gyi srog ldan pas:__dug gsum rtsad gcod kI la ya:__'dril ni rdo rje gzhon nus 'dril:__dmigs pa dgra dang bgegs la gtad:__las ni tshe bsod rang la bstim:__rnam shes chos kyi dbyings su sbar:__gzugs phung thal ba'i rdul du brlag:__'bras bu las ngan rgyun bcad de:__sangs rgyas rnams kyi sras su bskyed:__mngon spyod phrin las yongs rdzogs mdzod:__oM badz+ra kI li kI la ya sarba big+h+nAn ba~M hU~M phaT:__dgra bgegs tsit+ta mA ra ya hU~M phaT:__rbad thum ri li li:__zhes brjod de tshe khrus kyi dgongs pa dang ldan pas brten pa bsgral/__drag sngags spu gri'i thun rdzas kyis brab/__ral gris gtub/__rten gzhi bag chags kyi phung po rgyun bcad pa'i phyir rdul du brlag pa dngos ni/__hU~M:__sa bdag chen po'i dus la bab:__mthu rtsal phyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__lus ngag rdul phran bzhin du rlog:__oM badz+ra kI li kI la ya dgra bgegs da d+ha ya da d+ha ya hU~M phaT:__tho gtun gyis brdung ste/__dkyil 'khor gyi lha tshogs dang lha bdud rnam rol 'khor dang bcas pas dgra bgegs rdul du brlag par gyur/__dgra bgegs thal ba'i rdul du rlogs shig__/drug pa zhal du stobs pa ni/__hU~M:__bdag nyid chen po'i dus la bab:__mthu rtsal phyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__nga yi dbang du gyur nas kyang :__bsgo ba'i bka' la nyan par gyis:__oM badz+ra kI li kI la ya dgra bgegs b+hin+d+ha ya b+hin+d+ha ya hU~M phaTaH__hom gzar gyis ling ro bstab la/__dkyil 'khor gyi lha tshogs dang re ma ti 'khor dang bcas pas dgra bgegs stobs par gyur/__dgra bgegs sha khrag lhag ma med par rol cig__/slar yang ling ro rnams bdud rtsir sbar ba zhal du stobs pa ni/__hU~M b+h+yo:__gnam sa tsam gyi zhal gdangs la:__gangs ri tsam gyi mche ba gtsigs:__glog dmar 'gyu 'dra'i ljags brkyang ste:__nyams pa bdun ldan dgra bo rol:__ye shes chen po'i gzi byin bskyed:__bde ba chen po'i rtsal dang bcas:__dbyings rig gnyis su med pa'i ngang :__mngon spyod phrin las mthar phyin mdzod:__sa ma ya ho ho ho:__a haM ma hA su kha ho:__nyin tha mar shog ling yod na hom du bsregs/__spro na drag po'i sbyin bsregs kyang bya/__de ltar bsgral ba'i sha rus cha gcig gtor mar bstabs/__cha gcig khrag skyems dang sbyar te bzlog bskul skabs 'bul rgyu 'jog__/cha gcig lhag gtor gtsang dme la bsre dgos/__skabs 'dir tshogs la rol/__lhag ma btang ba'i bar las byang ltar ro/__/gsum pa slar yang thugs dam bskul ba ni/__hU~M hU~M hU~M:__bzhengs shig rdo rje gzhon nu'i tshogs:__dbyings las skye ba ma mchis kyang :__rig pa rang snang rol pa'i rtsal:__drag shul chen po'i gzi byin bskyed:__dgra bgegs sha khrag rus pa'i tshogs:__dgyes pa'i gad mo dang bcas bzhes:__'bar ba mchog gi cho 'phrul gyis:__nag phyogs dgra bgegs rtsad nas chod:__rnal 'byor bdag cag 'khor bcas la:__phas rgol rbod gtong dmod pa'i mtshon:__zlog gzir phrin las dus la bab:__ma g.yel ma g.yel yi dam lha:__bzhi pa bzlog pa'i phrin las dngos ni/__hU~M b+h+yo:__shin tu rnam dag ye shes ngang :__snying rje'i skur shar he ru ka:__bcom ldan rdo rje gzhon nu ni:__shes rab yum dang mnyam sbyor bas:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__me long ye shes ngang nyid las:__bcom ldan badz+ra kI la ya:__gtso 'khor sprul pa yang sprul bcas:__thogs med phrin las rtsal phyungs la:__nyon mongs zhe sdang las byung ba'i:__mi mthun 'gal rkyen bar chad zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__mnyam nyid ye shes ngang nyid las:__bcom ldan rat+na kI la ya:__gtso 'khor sprul pa yang sprul bcas:__thogs med phrin las rtsal phyungs la:__nyon mongs nga rgyal las byung ba'i:__mi mthun 'gal rkyen bar chad zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__sor rtogs ye shes ngang nyid las:__bcom ldan pad+ma kI la ya:__gtso 'khor sprul pa yang sprul bcas:__thogs med phrin las rtsal phyungs la:__nyon mongs 'dod chags las byung ba'i:__mi mthun 'gal rkyen bar chad zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__bya grub ye shes ngang nyid las:__bcom ldan karma kI la ya:__gtso 'khor sprul pa yang sprul bcas:__thogs med phrin las rtsal phyungs la:__nyon mongs phrag dog las byung ba'i:__mi mthun 'gal rkyen bar chad zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__mi dge bcu po gnas dag cing :__dge ba bcu po gnas gyur pa:__khro bcu khra phyag 'khor bcas kyis:__rgyu 'bras 'chol bar spyod pa zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__hU~M b+h+yo:__rang byung ye shes gcig nyid las:__du ma'i gar gyis rnam 'phrul pa:__sgo ma srung mar bcas pa yis:__sna tshogs rtog pa thams cad zlog:__gdod ma'i bde gshegs snying po las:__glo bur rtog pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtag sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la bsgyur:__ye shes chen po mthar phyin mdzod:__oM badz+ra kI li kI la ya sarba big+h+nAn ba~M hU~M phaT:__rbod zor sarba a pa ka ra b+h+yo b+h+yo zlog zlog rbad nan:__ces dang*/__gzhan yang*/__b+h+yo:__gzhan yang zlog cing bsgyur ba ni:__rnal 'byor bdag cag 'khor bcas la:__gnod cing bar du gcod pa yi:__ltas ngan brgyad cu rtsa bzhi zlog:__ye 'drogs sum brgya drug cu zlog:__dus min 'chi dang 'jigs brgyad zlog:__glo bur bdun brgya nyi shu zlog:__bgegs rigs stong phrag brgyad cu zlog:__gdon rigs stong phrag bco brgyad zlog:__skeg chen sum brgya drug cu zlog:__lha chen drag po'i gdug rtsub zlog:__lha ma yin gyi sgyu thabs zlog:__mgon po'i spar bu bskor ba zlog:__gshin rje'i 'khrul 'khor bcas pa zlog:__drang srong bram ze'i dmod pa zlog:__gza' yi king kang 'phen pa zlog:__btsan nad gzer kha gtong ba zlog:__sa bdag klu yi mdze nad zlog:__ban+des 'bum bskor byed pa zlog:__sngags pas sngags zor 'phen pa zlog:__bon gyis tso dmar 'phen pa zlog:__mu stegs ngan sngags byed pa zlog:__byang phur rbod gtong zug pa zlog:__mnan gtad sreg 'phang byed pa zlog:__mo rtsis rmi lam mtshan ngan zlog:__snga zhags mda' ltar 'phen pa zlog:__phyi zhags gru gur 'thul ba zlog:__mi mthun gnod pa'i phyogs kun zlog:__bzlog go dmar chen gtor mas zlog:__bsgyur ro phur bu'i mthu yis bsgyur:__zor ro dgra dang bgegs la zor:__bcom ldan rdo rje phur pa'i tshogs:__dam rdzas mchod pa 'di bzhes la:__byad dang rbod gtong bsgyur ba dang :__bcol ba'i phrin las 'grub par mdzod:__oM badz+ra kI li kI la ya hU~M hU~M:__bdud pra mA ra ya rbad nan:__kha la dza ma li rbad nan:__ra tsa du ling shag rbad nan:__shig shig dum dum rbad nan:__tshal pa tshal pa rbad nan:__khroM khroM b+h+yo rbad nan:__rmug rmug rbad nan:__tir tir rbad nan:__tshal tshal rbad nan:__bzlog pa'i phrin las bskul:__gal che na bzlog sngags kyang grangs bsag go__/gtor bzlog zhag grangs byed na 'di nas 'og tu 'byung ba'i thun gtor bskul bcas dang*/__chos skyong gi gtor 'bul/__chad brtan sogs las byang ltar mthar dbyung dgos so/__/gsum pa rjes kyi bya ba'i las la/__ye shes gshegs shing zor bsgrub pa/__zor lam bsal ba/__mthu dpung bskyed pa/__zor bskul ba/__zor 'phang ba/__zor rjes gcod pa dang drug las/__dang po ni/__nyin tha ma la/__spro na slob dpon bdud chas su zhugs/__gtor ma'i lha tshogs la mchod bstod nongs pa bshags te/__zor dkyil gyi sprul gzhi ye shes kyi 'khor lo nam mkhar 'degs/__sprul pa dam tshig gi 'khor lo 'od du zhu ba las gtor chen zor rdzas dang bcas pa skad cig gis dpal rdo rje gzhon nu khro bcu khra phyag sgo ma bka' srung sde brgyad dregs pa'i dpung tshogs bsam gyis mi khyab pa dang bcas pa thams cad khro gtum 'jigs pa'i gzugs can srid gsum gang ba'i nad mtshon dug gi char 'bebs pas dgra bo sgrol ba'i las la rngams par gyur/__drag sngags spu gri mA ra ya'i spel tshig can bzla/__dmar gtor khrag skyems bcas par dgra bgegs 'gugs 'dren dang*/__ra~M ya~M kha~M/__stong pa'i ngang las gtor snod dmar gyi dung chen yangs pa'i nang du gtor rdzas dgra bgegs kyi sha khrag rus pa 'dod yon gyi rnam pa nam mkha' dang mnyam par gang bar gyur/__oM AHhU~M gis byin gyis brlabs te/__zhal bstabs kyi dmigs pa dang bcas rtsa sngags la gtor sngags i daM ba ling+ta kha kha khA hi khA hi:__btags pa lan gsum gyis khrag gtor gtor chen du phul la/__khrag skyems sgrengs ba dang bcas/__hU~M:__bcom ldan rdo rje gzhon nu 'khor bcas la/__/dgra bgegs sha khrag rus pa nang khrol sogs/__/lhun por spungs pa'i 'dod dgu'i ba ling+ta/__/phyi nang nyer spyod sman rag bdud rtsi'i tshogs/__/'bul lo dgyes par rol la bdag cag gi__/nad gdon kun zhi tshe dpal longs spyod spel/__/khams gsum dbang sdus dgra bgegs bdud sde'i dpung*/__/thams cad ming gi lhag mar tshar chod cig__/phas rgol bsam ngan sbyor rtsub byad stems dpung*/__/thams cad rang gshed phobs la nus mthu shigs/__/mdor na bdag gi re 'bras gang yin pa/__/'bad med lhun gyis grub pa'i phrin las mdzod/__/ces 'dod don gsol bas/__dam tshig ye shes kyi 'khor lo thams cad dgra bgegs kyi steng du las la rngams par bsams/__las byang gi chad tho btang*/__gnyis pa zor lam bsal ba ni/__dkar gtor gser skyems sngon du 'gro bas/__hU~M:__rdo rje gzhon nu'i bka' nyan pa:__phur srung dam can 'khor dang bcas:__de ring rnal 'byor las brtsams na:__sgo rnams phyes la 'phrang sol cig:__phyogs skyong bcu dang rgyal chen bzhi:__gtsang ris dpal mgon bdun cu rnams:__bka' dang dam las ma 'da' bar:__ru nga phrag dog ma mdzad cig:__zhabs bskum sku gzur dbu khug la:__bdag gis dmar chen gtor zor 'phen:__gdong du su yang ma 'dug cig:__ces brjod/__phud dang ru mtshon gyis sna drangs la zor 'phen phyogs su khyer/__gsum pa zor dpung bskyed pa ni/__slar yang phud phyogs bcur 'thor te/__hU~M b+h+yo:__bla ma yi dam lha tshogs dang :__khyad par phur bu'i lha tshogs kyis:__mchod sbyin gser skyems 'di bzhes la:__do nub zor gyi las mdzod cig:__shwa na bdag nyid sa bdag sogs:__dam can chos skyong srung ma yis:__mchod sbyin gser skyems 'di bzhes la:__do nub zor gyi las mdzod cig:__snang srid lha srin sde brgyad dang :__yul lha gzhi bdag gnyen po yis:__mchod sbyin gser skyems 'di bzhes la:__do nub zor gyi las mdzod cig:__ces dang bden pa'i stobs brjod pa ni/__hU~M:__sangs rgyas kyis ni bdud pham mdzad/__/chos ma yin ni chos kyis so/__/dge 'dun gyis ni mu stegs pham/__/dbang pos lha min pham 'gyur te/__/rdo rje gzhon nu'i lha tshogs kyis/__/dgra bgegs rnams ni pham par mdzad/__/rigs sngags bden pa'i mthu 'di ni/__/thogs pa med par 'grub par mdzod/__ces brjod la rig pa ngar bskyed/___bzhi pa zor bskul ba ni/__hU~M:__chos dbyings skye ba med pa'i mkha' klong nas:__dbyings kyi cho 'phrul 'od lnga kun tu shar:__ma rungs gdug pa'i tshogs rnams bsgral ba'i phyir:__bcom ldan dpal chen badz+ra ku mA ra:__yab yum sras dang bka' sdod sprul 'khor bcas:__gdug pa 'dul phyir dus las mi g.yel ba'i:__mngon spyod dmod pa chen po'i rtsal bskyed la:__dam nyams dgra bgegs sgrol ba'i phrin las mdzod:__ces bskul/__lnga pa zor 'phang ba ni/__dmigs bya 'ben du bzung la dgugs gzhug drag tu bya/__zor rnams rim par brdegs la/__hU~M:__dpal chen rdo rje gzhon nu yis/__/pho nyar mngags pa'i zor gyi bdag__/dgra bgegs sgrol phyir las la ya/__/dmar chen drag po gtor ma'i zor/__/rba klong 'khrugs pa khrag gi zor/__/ri bo bsnyil ba rdo yi zor/__/rno myur shugs drag mda' yi zor/__/mtshon rtse gzings pa yungs dkar zor/__/mun pa 'khrigs pa dug gi zor/__/glog ltar 'khyugs shing thog ltar 'bebs/__/dgra bgegs lus sems 'bem la yA/__drag sngags bzlog shams can brjod la rngams stabs dang bcas 'phang*/__rgyas par spro na zor bdun kha phral kyang rung ngo*/__/de nas zor chen btegs la/__hU~M b+h+yo:__dgongs su gsol lo sangs rgyas rnams:__gsan du gsol lo yi dam lha:__khrag 'thung rdo rje gzhon nu'i tshogs:__thugs dam zhal bzhes ma g.yel cig:__bstan pa bshigs pa'i dgra bo dang :__bar gcod byed pa'i bgegs tshogs kyi:__skyobs pa'i lha dang srung ma dang :__'go ba'i dgra bla rgyud dang bcas:__bsdongs zla byed pa'i 'byung po kun:__ye shes me yi mtshon chas gzir:__rig sngags dmod pas rming med bcoms:__bdun brgyud rigs kyang rtsad nas chod:__ming dang brda tsam med par mdzod:__oM badz+ra kI li kI la ya hU~M hU~M hU~M:dang drag sngags chig dril mthar bdud pra mA ra ya rbad nan:__kha la dza ma le rbad nan:__ra tsa du ling shag rbad nan:__shig shig dum dum rbad nan:__tshal pa tshal pa rbad nan:__khroM khroM b+h+yo rbad nan:__rmugs rmugs rbad nan:__tir tir rbad nan:__tshal tshal rbad nan:__zhes drag sngags bzla bzhin du 'phang pas/__dgra bo'i gzugs phung rdul du bshigs/__/rnam shes mar me bsad pa ltar yal/__gnas gzhis longs spyod rjes med du brlag par bsams/__dmod mo dang bcas thal mo dang dul mo brdeg go__/drug pa zor rjes gcod pa ni/__phyi bsnyegs bcad phyir bya khyung 'jigs su rung bas zhal phyir gzigs par bsams la/__oM khroM ga ru Ta tsa le tsa le hU~M phaT:__zhes bzla/__las byang ltar srung 'khor gyis mtshams bcad/__rdo rje slob dpon gyis rting mnan te log la sgrub khang gi sgo drung du brtan ma skyongs/__gtor gzhong sbubs la dam sri sgab 'dre bkug cing mnan par bsams/__las byang ltar rta bro dang*/__shis brjod mdor bsdus bya/__'phang ba'i snga rjes skabs gang babs la mnan pa bya bar 'dod na las kyi rim pa zur gsal ltar shes par bya'o/__/gsum pa rjes kyi cho ga ni/__nang du log sgrub sngags kyi sham bur/__badz+ra dz+nyA na A yu She swA hA:__btags pa cung zad bzlas mthar/__mda' dar g.yab ste/__oM:__dang por thugs bskyed rjes su dgongs:__bar du grub pa'i rtags mtshan dbyungs:__tha ma rig 'dzin bdag cag gis:__rtse gcig bsnyen pa chud ma gson:__sku gsung thugs kyi gzi byin bskyed:__yon tan phrin las cho 'phrul ston:__pho nya sprul pas 'jig rten khongs:__snod kyi dwangs ma bcud kyi dpal:__'khor 'das kun gyi tshe bsdus la:__rnal 'byor bdag gi lus la zhugs:__sgo gsum thig le'i dbyings su bstim:__bla tshe chad nyams yar ba gsos:__tshe dang ye shes dngos grub stsol:__zhes tshe 'gugs kyang bya/__chos srung gi gtor 'bul rjes chog bcas dang*/__ye shes kyi 'khor lo nam mkhar btegs pa'i lha la mchod bstod/__nongs bshags dang*/__brtan bzhugs bdag bskyed bsdu ldangs/__dge bsngo shis brjod bcas las byang ltar rgyas par bya'o/__/de ltar brtson pas gnas skabs dang mthar thug gi byang chub sgrub pa'i 'gal rkyen phyi nang gi nyer 'tshe mtha' dag zhi zhing*/__bar chad med pa rdo rje'i sa lam yongs su rdzogs nas khrag 'thung dpal chen phrin las rol pa'i gsang ba mi zad rgyan gyi 'khor lo'i go 'phang mngon du 'gyur ba ni nges pa'o/__/dpal chen rdo rje srin po khro bo'i rgyal/__/che btsan gdug pa mthar byed ku mA ra'i/__gtor bzlog rdo rje'i thog 'bebs 'khrul 'khor 'dis/__/bstan dgra ma lus rtsad nas brlag gyur cig__/'di la ma rig sgribs pas nongs gyur na/__/bla ma rdo rje sems dpa'i spyan sngar bshags/__/legs byas dge ba rin chen lhun po 'di/__/bstan dang 'gro la yongs su bsngo bar bgyi/__/rtsa gsum thugs rje'i byin rlabs sprin phung las/__/grub gnyis nor bu'i gru char 'bebs pa dang*/__/phur bu'i thal 'byin rnam bzhi'i dgongs pa yis/__/srid gsum grong khyer dus gcig sgrol bar shog__/ces snyan brgyud phur pa'i gnad tig gi gtor bzlog rdo rje'i thog 'bebs dgra bgegs kun 'joms zhes bya ba 'di ni nyag a dzi rong gi dri hred dbon po pad+ma rig 'dzin nas snga rjes nan tan chen pos bskul ba dang*/__rang gis bsgrigs pa'i las byang dang 'brel bar kun gzigs mchog sprul rin po che bkra shis dpal 'byor gyi zhal snga nas kyang bris na legs tshul bka' phebs bzhin rje nyid nas yi ge'i lhan cig byed rkyen sogs bka' drin gyis nye bar khyab pa dang bcas/__'jam dbyangs blo gros rgya mtsho'am phrin las grub pa rtsal gyis rdzong sar bkra shis lha rtse'i chos grwar sa byi hor zla drug pa'i tshes la khrigs su bsdebs pa 'dis kyang rgyal bstan rin po che der 'dzin sde dang bcas pa dar zhing rgyas la/__nag phyogs kyi bdud dpung rtsad nas 'joms pa'i rgyur gyur cig__/sarba dA mang+ga laM//__//_
