JKW-KABAB-17-TSA-021-wylie
@#/__/rdzogs pa chen po man ngag sde'i bcud phur man ngag thams cad kyi rgyal po klong lnga'i yi ge dum bu gsum pa lce btsun chen po'i bI ma la'i zab tig gi bshad khrid chu 'babs su bkod pa snying po'i bcud dril ye shes thig le zhes bya ba bzhugs so//_na mo gu ru we/__'od gsal rdzogs pa chen po sems klong man ngag sde gsum gyi chos tshul zab rgyas mtha' yas pa slob dpon chen po bI ma la mi tra'i thugs la mnga' ba'i nang nas man ngag sde yang gsang bla med kyi bcud phur man ngag thams cad kyi rgyal po 'di bI ma'i zab sgrub dang 'brel ba'i dpe rgyun gter du bzhugs pa dpal sngags kyi srung mas lce rigs kyi btsun pa seng ge dbang phyug la gtad/__des gsang zhing sgrub pa'i dus na rmi lam dang nyams snang lta bu ma yin par paN chen bI ma'i ye shes kyi sku dngos su byon nas dpon slob lhan cig tu yun ring por bzhugs shing smin grol yongs su rdzogs pa gnang*/__bI ma'i bka' bzhin du bsgoms pas lce btsun gyis 'pho chen 'ja' lus rdo rje'i sku mngon du mdzad/__de'i 'da' ka'i rdo rje'i tshig man ngag gi yi ge dum bu gsum pa 'di mkha' 'gro ma rnams la gnang ba o rgyan gyi yul la sogs pa dpa' bo mkha' 'gro'i zhing khams rab 'byams rnams su spyan drangs nas rang gzhan gyi don bsam gyis mi khyab pa mdzad zin pa dang mdzad bzhin pa yin la/__slar 'od gsal sprul pa'i rdo rje bdag gis rjes dran gyi sgo nas gtan la phab pa 'dis gdul bya'i skal ba dang 'tshams pa'i 'gro don ci rigs byung zhing da lam khyed rang rnams la'ang legs par gdams pa la gsum klad don mtshan khyad par can mkha' 'gro'i sdud phyag dang bcas pa/__gzhung don man ngag zab mo dum bu gsum rtogs brjod gtad rgya smon lam dang bcas pa/__mjug don ye shes mkha' 'gro'i zhal gdams rdo rje'i tshig gi mtha' brgyan pa'o/__/dang po la gnyis/__mtshan don dang phyag go__/dang po ni mtshan gyi khyad par gsum gyi dang po rdzogs zhes pa gang du rdzogs na/__spros pa thams cad dang bral ba'i chos kyi dbyings khyab brdal klong yangs chen po'i ngo bor dbyer med ro gcig tu ye nas rdzogs/__gang rdzogs na 'khor 'das lam gsum gyis bsdus pa'i snang srid kyi chos thams cad lhag ma med par rdzogs/__tshul ji ltar rdzogs na chos dbyings zhes pa snod stong chen po 'dra ba gcig gi nang du chos can zhes pa dngos rdzas bzang ngan mang po lhan cig tu blug pa lta bu'am/__chos can zhes pa rdzas so so ba lta bu rnams de dang der 'tshams pa'i chos nyid ces snod stong khol bu ba re re'i khongs su tshud pa lta bu'i mtshan ma ris chad can de 'dra ni ga la yin/__ji ltar yin na/__'khor 'das sogs bzang ngan dang bdag gzhan dang*/__snod bcud dang*/__bem shes sogs/__tha dad rnam pa sna tshogs bsam gyis mi khyab cing brjod kyis mi lang ba 'jig rten mngon sum du snang ba gang ci snyed cig yod pa de dag thams cad gnas lugs don dam pa mthar thug gi dbang du byas te bshad na/__spros bral chos kyi dbyings dang ro gcig pa tshul gcig pa kho nar ye nas yin cing*/__de ltar ye nas gnas pa ma gtogs dbyings de las tha dad pa'i spu ris rdul phra rab tsam yang sngar yod ma myong*/__da lta yod mi srid/__phyis nam yang yod par 'gyur ba'i gnas med cing skabs med pa yin no/__/pa zhes pa de ltar chos dbyings rgya chad phyogs lhung kun bral khyab cing rtag pa dam pa de yang gzhan ga shed nas brtsal mi dgos te/__rang gi sems nyid rig pa rjen pa skad cig ma'i ngo bor hril gyis 'dus pas na rig pa las ngo bo tha dad pa'i dbyings dang ye shes gang yang rnyed mi dgos so/__/rdzogs pa zhes pa'i don bshad tshul mang yang skabs 'dir ni/__snang ba dang shes pa/__sku dang ye shes sogs rnam pa'i bye brag mtha' dag dbyings kyi ngo bor ro gcig tu dril zhing dbyings de yang rig pa las nam yang mi 'da' bas na gnad thams cad rig thog tu dril te bshad lugs so/__/chen po zhes pa/__chos thams cad kyi gnas lugs mthar thug pa dbyings rig dbyer med 'di'i gong na rtogs bya dang bstan bya gzhan gang yang med pas phyogs dus kyi rgyal ba sras dang bcas pas kyang 'di las lhag pa zhig gzigs su med cing bstan du'ang med do ces so/__/de ltar ma bcos ye nas gnas pa gzhi/__rang rig blo bral mngon sum du rtogs shing goms par byed pa lam/__dri ma yongs su dag nas rang gnas kyi gtan srid zin pa mthar thug gi 'bras bu/__thams cad dbyings rig gi ngo bor rdzogs shing rang ngo 'phel 'grib dang bral bar dbyer med chen po'o/__/tshul de lta bu gdul bya dbang rab sogs kyis rtogs shing mngon du byed pa'i 'jug sgo gzhan las khyad du 'phags pa ni rdzogs chen sde gsum yin/__de'i nang nas kyang ches mchog tu gyur pa gsang ba man ngag gi sde la'ang phyi skor nang skor gsang skor yang gsang bla med kyi skor te/__bzhi las 'di yang gsang bla na med pa yin zhing*/__de yang man ngag ces pa rgyu dang tshegs chung ngu zhig gis don chen po bde myur du 'grub pa'i 'phrul thabs ngo mtshar can blos dpag ste tshad bzung dka' ba zhig go__/sde ni nyung ngu dang chung ba las lhag pa'i mang zhing rgyas la rin thang che ba ste/__rgyal bstan rin po che yongs su rdzogs pa'i rtse rgyal theg mchog 'od gsal snying po'i rgyud thams cad kyi sgo dang lde mig lta bu sgra thal 'gyur rtsa ba'i rgyud/__chu bo lta bu'i rgyud rdzogs pa rang byung*/__/ri rgyal lta bu'i rgyud yi ge med pa/__/rgya mtsho lta bu'i rgyud rig pa rang shar/__/nyi ma lta bu'i rgyud rdo rje sems dpa' snying gi me long*/__khyung chen lta bu'i rgyud klong drug pa/__/seng ge lta bu'i rgyud seng ge rtsal rdzogs/__rgyal po'i nor mdzod lta bu'i rgyud rin po che spung pa/__'khor lo lta bu'i rgyud bkra shis mdzes ldan/__ral gri lta bu'i rgyud thugs kyi me long*/__gser zhun lta bu'i rgyud nor bu phra bkod/__rgyan phreng lta bu'i rgyud mu tig phreng ba/__sgeg mo la me long bstan pa lta bu'i rgyud ngo sprod spras pa/__rin chen 'od 'bar lta bu'i rgyud sgron ma 'bar ba/__sbrul mdud rang grol lta bu'i rgyud rig pa rang grol/__ma pang bu 'jug lta bu'i rgyud nyi zla kha sbyor/__rgyal po sa 'dzin lta bu'i rgyud sku gdung 'bar ba ste bcu bdun/__sngags srung khros ma'i rgyud spu gri lta bu dang bco brgyad/__'di dag tshul bzhin du bkral ba'i gzhung 'grel dang man ngag shin tu zab cing rgya che ba slob dpon dga' rab rdo rje sogs rig 'dzin chen po du mas mdzad pa da lta mkha' 'gro'i zhing rnams su mtha' yas pa bzhugs la/__ci rigs re zab gter gy-i tshul du yang yod do/__/bod yul du'ang dpal o rgyan chen po dang paN chen bI ma'i snying thig sngar nas byon pa da lta yang bzhugs la/__de 'dzin pa'i skyes mchog snying po'i lta bsgom phun sum tshogs pa can chos pa phal gyis 'gran zla bral ba du ma zhig sngar nas rim bzhin byung zhing da lta yang yod la phyis kyang 'byon par 'gyur ba de dag bla ma'i man ngag las skyes pa sha stag yin la/__des na rgyal kun spyi mes dpal kun tu bzang po nas bzung ste ston pa'i drin gyis bstan pa rin po che byung zhing bstan pa'i drin gyis bstan 'dzin gyi sde rnams byung ba dang de ltar 'byung bar 'gyur ba kho na'o/__/de'i bcud phur ni bshad ma thag pa'i chos sde de rnams kyi yang zhun snying po'i bcud thig slob ma'i rgyud la bde myur gyi tshul du 'debs sla ba sogs zab khyad shin tu che bas na de skad ces bya'o/__/mtshan gnyis pa'i skabs kyi man ngag ces pa sgo yul rlung rig gi gnad zab shin tu bya sla zhing 'jug bde ba'i thabs mchog gis mtshon te rang gnas sku dang ye shes mngon sum du gtan la 'bebs nus pa rtog ges blos mi dpog pa'o/__/thams cad kyi rgyal po zhes pa/__rgyu mtshan nyid kyi theg pa che chung dang*/__'bras bu gsang sngags phyi nang gi rgyud lung man ngag thams cad kyang dngos sam brgyud nas rnam mkhyen kho nar gzhol thabs las ma 'das pas na man ngag khyad par can re yin mod/__de dag las 'di nyid khyad du 'phags pa ni/__dper na rgyal phran sogs skye bo ya rab grangs mang zhing stobs dpung mnga' thang ci tsam che ba sus kyang*/__'khor los bsgyur rgyal gyi sku gcig pu la sgo kun nas 'gran mi nus pa de bzhin du/__'di man chad kyi rim gnyis zab mo sogs chos tshul gang gis kyang theg mchog rdzogs pa chen po'i man ngag gi dum bu 'di tsam la'ang 'gran mi nus te/__rnam mkhyen gyi lam bde myur 'di dang mtshungs pa med pa'i phyir ro/__/klong lnga ni/__mtshan nyid 'dzin pa'i ye shes lnga'i ngos nas dbyings kyi rnam dbye mdzad pa ste/__chos kyi dbyings kyi ye shes kyi dbyings sogs so/__/de'i yi ge ni/__lce btsun gyi rdo rje'i zhal chems DA kis bsdu ba mdzad tshul rigs drug klong grol gyi yi ge 'bru drug po 'a chung a la bsdus te/__a me long*/__sha chos dbyings/__sa mnyam nyid/__ma sor rtog__/ha bya grub ye shes kyi klong lnga'i dbyings su bzung ba nyid/__slad nas bdag nyid rang lo gnas nyer bzhi'i grangs mnyam son pa'i tshe gnas dus dge ba'i rten 'brel dus la babs pa na rje mo dpal gyi blo gros ma'i sprul 'khor gyi tshul 'dzin DA ki 'bum phrag byed pa'i dgyes zhal mngon sum du bstan cing mi shigs na da'i rang sgra rdo rje'i 'bru drug pa'i dbyangs snyan gyi 'gyur ba yid 'phrog pas rjes su bskul ba'i rkyen gyis sngon gnas ji bzhin pa rjes dran gyi tshul du rang shar ba yin pas na rdo rje'i 'bru drug po brda yig gis gzugs su klad du bkod kyang chog mod dgos pa'i dbang gis bod yig byas te dum bu dang po'i mtshams ci rigs su bris so/__/klong lngar dbye ba'i rgyu mtshan cung zad bshad na/__gzhi dang lam gyi dus su snod 'byung ba lnga/__bcud phung po lnga/__yul 'dod yon sogs lnga tshan du ma dang*/__'bras dus su/__rigs lnga/__sku lnga/__ye shes lnga/__zhing khams lnga sogs so so'i mtshan nyid dang byed las tha dad pa ltar phyogs dang ris su ma chad par snang zhing snang ba'i dus nyid nas 'pho med rnam kun mchog ldan chos kyi dbyings bde klong yangs pa chen po'i rang bzhin las mi 'da' bas 'khor 'das kyi chos sna tshogs ma 'dres ji ltar snang tshul dang rjes mthun gyi sgo nas klong lnga'i rnam dbye byung ba'o/__/de'i yi ge ni 'di ltar yi ge'i gzugs sgra sogs gsang sngags thabs kyi cho 'phrul phal cher 'phral gyi rgyu rkyen kho na las byung ba ltar du snang mod/__don du ni mchog tu mi 'gyur ba'i bde chen nyid de dang der rnam par 'phrul pa'i bye brag tsam yin pas dum bu gsum gyis bsdus pa'i yi ge'i phreng ba yid ngor dran pa dang*/__gzugs su bkod pa dang*/__brjod pa'i sgra tshigs mtha' dag gi ngo bo dbyings dang ye shes dbyer med chen po nyid rnam pa de dang der shar ba las mi 'da' bas de skad ces bya'o/__/dum bu gsum pa zhes bya ba ni bar mtshams kyi rnam dbye'o/__/mtshan gsum pa'i don ni/__'pho chen rdo rje'i sku brnyes lce btsun chen po seng ge dbang phyug gi 'da' dka'i zhal gdams khyad par can 'di yang thol byung rang rdol kho na lta bu ma yin par chos sku'i ston pa dpal kun tu bzang po nas rdo rje'i tshig don bar ma chad du byung ba paN grub lnga brgya'i gtsug rgyan slob dpon chen po'i bI ma la mi tras legs par bkral ba'i man ngag zab mo brgya dang bcu dgu sogs kyi bcud dril yang zab snying gi ti la ka mthar thug pa yin no/__/ces so/__/gnyis pa ni/__'das rjes 'di thog mar bka' bsdu mdzad dus ye shes kyi mkha' 'gro mas gus phyag mdzad pa ste/__de'i don ni/__phyogs dus nam mkha'i mthas gtug pa'-i skye 'gro mchog dman bar ma thams cad kyi sems nyid ni rgyu rkyen gzhan gang la'ang ma ltos par ye nas rnam par dag cing lhun gyis grub pa'i rang bzhin lhan skyes kyi 'od gsal rang byung khyab brdal chen po sku gsum rgyal ba rab 'byams ji snyed cig bzhugs pa'i ngo bo las nam yang mi g.yo bar snang srid gzhir bzhengs dag pa rab 'byams ye shes lha'i dkyil 'khor gyi 'khor lo 'byams klas pa'i tshul du rang chas su bzhugs pa de dag rang rig pa skad cig ma'i ngo bor dbyer med thig le nyag cig gi tshul du 'ub chub pa nyid rtogs bya'i yul dang rtogs byed kyi yul can tha dad pa'i mtshan ma rdul tsam yang mi dmigs shing gnas lugs kyi rang zhal ma nor ji bzhin pa mngon sum du rig pa'i tshul gyis 'dud pa'o/__/gnyis pa gzhung don man ngag zab mo khrid kyi lugs su bshad pa la gsum/__brgyud pa'i lo rgyus kyi sgo nas chos dang bla ma la yid ches kyi nges shes bskyed pa/__mchog dbang zab mo'i sgo nas snod ldan gyi slob ma'i rgyud ma smin pa smin par byed pa/__thun mong ma yin pa'i gdams ngag khyad par can gyi sgo nas smin zin grol bar byed pa'o/__/dang po la gnyis/__sngon ji ltar byung tshul dang phyis ji ltar 'byung tshul lung bstan pa'o/__/dang po chos sku'i ston pa gdod ma'i sangs rgyas dpal kun tu bzang po ni gnas 'og min chen po chos dbyings mu mtha' bral ba na thugs ka dag gting gsal mi rtog nam mkha'i rdo rje de bzhin nyid chen po las rang snang ye shes kyi rlung rig dri ma med pa rang shar ba nyid ye shes rig pa nyid kyis mngon du mdzad pas glo bur gyi dri ma zhes bya ba slar gtan nas mi skye ba'i chos can du ma spang ye nas rnam par dag ste ngo bo stong pa chos sku'i ye shes rigs thams cad kyi khyab bdag chen por mnga' dbang rdzogs pa las nam yang ma g.yos bzhin du rang bzhin gsal ba longs sku'i ye shes rang snang rang gsal gyi sku dang zhing khams rgya mtsho mtha' yas pa dang*/__de las sa bcu'i byang sems rnams kyi ngor sku dang zhing khams kyi bkod pa mu mtha' med pa yang rtag pa rgyun gyi 'khor lor ngang gis snang zhing*/__thugs rje kun khyab sprul sku'i ye shes zhing dag pa dang ma dag pa'i tshul mtha' yas pa rnams su gang la gang 'dul gyi sprul pa'i sku grangs med dpag tu med pa rgya che rgyun mi chad du ma nges cir yang ston pas gdul bya sna tshogs pa'i don rtag khyab lhun grub kyi tshul du mdzad pa nyid do/__/longs sku'i ston pa thugs rdo rje'i rigs mchog dpal rdo rje sems dpa' la ston pa kun bzang nyid kyis 'og min rnam par dag pa'i gnas su chos rdzogs pa chen po bsam gyis m-i khyab pa mngon sum du bstan pa'i tshul gyis ston 'khor dgongs spyod dbyer med par mdzad/__rdor sems kyis sprul pa'i sku mchog rig 'dzin dga' rab rdo rje la gnang*/__de'i 'khrungs yul nub phyogs o rgyan gy-i zhing*/__mi'i yab med par phyag rdor nyid bya ngang ser gyi gzugs su byon te lha'i bu sems lhag can gyi rig pa hU~M yig dkar dmar mdangs ldan gyi rnam pas yum gyi thugs dbus su bzhag pa las 'khrungs pas na dpal gsang ba'i bdag po'i sras su gtogs/__des sing ga la'i bram ze'i rigs sras slob dpon 'jam dpal bshes gnyen la nges gsang rdzogs pa chen po'i smin grol yongs rdzogs dang 'das rjes kyi gdams ngag tshig gsum gnad brdeg bcas gnang*/__des rgya nag khyim bdag gi rigs sras rig 'dzin shri sing ha la theg mchog rgyal po'i smin grol yongs rdzogs dang 'das rjes kyi man ngag dgongs nyams drug pa bcas gnang*/__des rgya nag gdol pa'i rigs sras dz+nyA na su tra dang kha che'i khyim bdag gi rigs sras paN chen bI ma lhan cig la rdzogs chen gsang skor man chad gnang mtshams/__bI ma yul gzhan du byon rjes dz+nyA na su tra la yang gsang bla med kyi smin grol yongs rdzogs dang 'das rjes man ngag gzer bu bdun pa bcas gnang*/__slar dz+nyA na su tra las bI mas yang gsang bla med yongs rdzogs dang 'das rjes bzhag thabs bzhi pa bcas gsan par gsungs pas de ltar na brgyud pa 'dir ye shes mdo yod dgos/__bI ma'i 'ja' lus rdo rje'i sku da lta yang bzhugs pas 'das rjes ma byung*/__'dis rdzogs pa chen po'i chos gter bod yul du mang po sbas pa/__nyang bka' gdams pa ting 'dzin bzang po/__gnas brtan ldang ma lhun rgyal/__sprul sku rgyal ba zhang ston sogs kyis ci rigs bton zin pa'i brgyud pa 'dir 'dren mi dgos te/__bI mas lce btsun la dngos su gnang ba'o/__/ston pa kun bzang rdor sems gnyis rgyal ba dgongs brgyud dngos/__rdor sems kyis dga' rab rdo rje dgongs pas byin gyis brlabs pa'i don brgyud/__de nas bI ma yan rig 'dzin brda brgyud/__des lce btsun la gnang tshul sngar bshad pa ltar la lce btsun gyi 'das rjes man ngag mkha' 'gros spyan drangs pa ni snying thig chen mo las kyang gsal bas skal ldan yid ches pa'i gnas so/__/yang dus gzhan du slob dpon pad+ma dang bI mas shri seng ha dngos las yang gsang bla med gsan pa'i lo rgyus tshad ldan bzhugs pas de'i dbang du mdzad na/__rje 'jam mgon bla mas gnang ba'i brgyud 'debs ltar ro/__/der ma zad thig le gsang rdzogs su yang kun bzang nas bI ma'i bar gyi bla brgyud gzhan gang yang ma gsungs pa'i rgyu mtshan ni sku gsum gyis bsdus pa'i bde bar gshegs pa thams cad kyi gzugs kyi rgyal po rnam snang*/__tshor ba'i rgyal po rin 'byung*/__'du shes kyi rgyal po snang mtha'/__'du byed kyi rgyal po don grub/__rnam par shes pa'i rgyal po rdo rje mi bskyod pa/__de dag rnam 'gyur gyi sgo nas khro tshul can dang*/__yum dang 'khor gyi rnam rol grangs las 'das pa rnams gcig tu bsdus pa'i ye shes kyi sku ni khyab bdag rigs drug pa dpal kun tu bzang po dngos yin la/__de'i go 'phang dam pa mngon du brnyes zin pa'i spyi dpal chen po che mchog he ru ka nyid rnal 'byor gyi dbang phyug seng he shwa ra'i skur bzhengs pa'i gong na bla ma gzhan zhig ma bzhag kyang chog dgos pa'i dbang du mdzad pa'o/__/gnyis pa ni/__dum bu dang po'i mthar lung ji ltar bstan pa thog tu bab ste/__snyigs ma las kyang cher snyigs ma'i dus 'dir tha mal pa las ches tha mal pa'i gang zag mngon sum tshad grub skyon gyi cha ni sgo kun nas cher rgyas shing yon tan gyi cha ni sgo kun nas nyag phra ba bdag lta bu la yang*/__rgyal ba'i mdzad phrin dus las mi yol ba shin tu dbang btsan pas/__mkha' 'gro'i brda tshig gis sems rgyud gting nas bskul ba'i dus der ni tha mal gyi snang sems 'di dag gnas 'gyur ci byas kyang rjes shul tsam yang ma lus pa gar song cha med rang yal du song ba'i rang mal du ye shes rin po che'i 'od khyim blta bas chog mi shes pa zhig tu da lta'i rig pa skad cig ma 'di lce btsun chen po'i sku gsung thugs rdo rjer hril kyis song nas/__ye shes dang*/__las dang*/__'jig rten gyi mkha' 'gro 'dus pa rgya mtsho rnams la smin grol yongs su rdzogs pa don nor 'khrul dang tshig lhag chad gang gis kyang bslad med pa yud tsam gyis shin tu gsal bar bstan pa'i go skabs bzang po byung*/__de'i rjes thob tu sgyu ma lta bu'i yi ger bris pa mi lo bcu gsum bcu bzhi tsam la rang gar bzhag__/de nas rgyal bas lung zin blo gros mtha' yas pa'i sde la chos sgo thog mar phyes pa yin/__de ltar na bdag kho na ma gtogs pa'i rig 'dzin chen po gong ma rnams ni grub thob las kyang grub thob chen po zag med 'ja' lus rdo rje'i sku brnyes pa sha stag yin la/__de rnams kyis yang yang byin gyis brlabs pa'i chos 'di ni bshad na bshad rin dang bsgom na bsgom rin chog pa zhig yin par sems so/__/zhes gsungs/__gnyis pa ni/__ston pa rdo rje rgyal po mtshan nyid dang ldan pas/__chos la mos shing lam 'og mas rgyud sbyong stobs kyis theg mchog rgyal po'i snod du rung ba'am/__dang po nyid nas dbang rnon gyi skal ldan kha cig__/tshe 'di'i zhen pa chung zhing snying po'i chos dang bla ma la kha tsam min pa'i dad 'dun che ba/__dam tshig srung ba la ngo lkog med pa/__lta sgom gzugs brnyan tsam re kha nas sgrogs shing las 'bras bslu med khyad gsod byed pa'i zog po bdud kyis bslus pa lta bu ma yin par bla ma'i bka' bzhin du bsgrub la gzhol nus pa'i slob ma la gnas dus/__yo byad sogs cho ga'i yan lag gzhung bzhin du tshang ba'i sgo nas rig pa rtsal gyi dbang dang snying po'i zab khrid zung 'jug gi thabs mchog ngo mtshar bas rjes su bzung ste smin grol gnyis ka'i sa bon dus gcig la legs par 'debs shing mthar thug gi 'bras bu mngon du 'gyur thabs zab mo nyid brgyud ldan bla ma'i phyag bzhes ltar gnad smin re bya ba shin tu gal che/__dbang gzhan las lhag pa'i so so'i skabs don yang 'di ltar/__spros bcas bum chus bskul te/__rang lus dang yul snang gdos bcas kyi snang zhen thams cad rang sar yal/__dwangs ma 'od phung gi rtsa 'khor yi ge dang bcas mngon du sad/__de'i dbang gis 'dzin sems las rlung dang bcas pa ma spang rang grol lhan skyes bde chen gyi ngo bor mngon sum du smin pa'am/__smin rung gi nus pa khyad par can rgyud la bzhag spros med bla ma'i byang sems dwangs ma mi shigs pa'i bdud rtsi'i zeg bcud/__rang gi 'od lus de'i spyi bo bde chen gyi 'khor lor rang gnas kyi thig le stong sgron la sim/__rang dang bla ma dbyer mi phyed pa'i rdo rje'i ye shes kyi dwangs bcud cher 'phel bas 'od rtsa'i 'khor lo rnams dang ba spu'i rtse mo tshun chad khrig ger gang*/__rig pa ye shes kyi rang bzhin bde gsal rnam par mi rtog pa'i nyams snang bsam gyis mi khyab pa'i ngo bor ye nas rdzogs pa nyid mngon du sad par byas/__de'i ngang du rang rtsal ye shes kyi rlung sbyor dang bcas te drag tu gcun pas dwangs ma'i 'od 'dus rtsa yig rnams dang bcas pa 'od gsal rnam par mi rtog pa'i dbyings chen por ro gcig tu ngang gis zhugs shing thim pas mtshan rtog bzang ngan gyi rgyu ba phra rags thams cad lhag med dbyings su nub/__ma bcos ye gnas kyi spros bral rjen pa nyag gcig tu smin cing gtan srid zin pa'i skal ba can du byas/__shin tu spros med kyi sngon 'gro rdo rje'i lus sbyong*/__hU~M gi ngag sbyong*/__dmigs med kyi ngang du bzhag cing de las ldang ba sems sbyong*/__'gro drug gi rnam pa blos blang zhing stong pa'i dbyings su mthar skyel te ngal bso ba de rnams so so'i gzhi rtsa gcod thabs dang*/__gtso bor sems kyi gzhi rtsa gcod thabs kyi bye brag yin la/__thabs des sgo gsum bzang ngan thams cad gzhi med rtsa bral du kho thag chod tshe gang la yang re dog mi bya bar gtad med zang thal gyi ngang du ma bcos rang gar bzhag__/dngos gzhi 'ja' shel bstan cing dbang tshig brjod pa ni rig pa'i ngo bo ka dag dang rang bzhin lhun grub mtshon byed kyi brda thabs khyad par can yin la des mtshon te bla mas dgongs pa gtad pa'i mthus/__mtshon bya'am rtogs bya'i don gyi ngo bo ni sems nyid ngo bo stong zhing bdag med spros bral chen po/__rang bzhin ye nas dag pas gsal khyab chen po/__stong gsal de gnyis nam yang dbyer med zung 'jug chen po/__de dag rang rig pa'i bdag nyid las ma 'das pa'i tshul/__rab rig pas skad cig gis rtogs pa/__'bring rang thog tu nyams myong bzang po skye ba/__tha mas kyang legs par go ba ni dbang don gyi ye shes med du mi rung ba yin/__de nas lus gnad/__mig gnad/__rlung sems kyi gnad gzir zhing*/__bla mas hUM gis rgyas btab pas lta don der ma bcos ngang bsgom gyi gzer thebs te lam las phyir mi ldog pa'i tshul gyis sku gsum myur du thob pa'-i skal ba rgyud la bzhag pa yin/__rab tu spros med kyi sngon 'gro lus gcer bur phyung ba ni/__sems nyid sgrib g.yogs kyi shun pa dang phral te dbyings rig rjen la phud pa'i rten 'brel gyi sgo dang brda thabs bstan pa yin/__slob dpon skyil krung mnyam bzhag drang por bzhugs pa ni/__dus nam yang lta sgom lam byed kyi skabs su lus gnad drang po dang ma bral na nyams rtogs khyad par can ngag gis skye'o zhes brda thabs bstan pa yin/__bla ma'i thugs kar a yig sngon po la slob mas sems gtad pa ni/__bla ma'i thugs rdo rje ma skyes mi 'gyur ba dang slob ma'i sgau gsum dbyer med ro gcig tu 'dres pa'i thabs kyi sgo bstan pa dang rten 'brel mngon sum du bsgrigs pa yin/__bla mas hU~M gsum brjod pas slob ma'i rgyud la ye shes gsum ldan gyi ngo bo rdo rje gsum gyi gzi byin btsan thabs su dbab cing slob ma'i sgau gsum phra rags thams cad hUM yig mthing ga'i rnam par hril gyis bsdus te phaT sgra drag pos rang gnas sku gsum gyi dbyings su skad cig gis gzhug pa'am/__de tsam ma byung na slob ma'i sems gzung 'dzin gyi 'khrul mdud thad kar bcad de/__de'i mthus lus sems khams gsum gyi skye gnas ngan par dbang med du rgyu ba'i sgrib skyon bsal te sku gsum gyi zhing khams rnam par dag par gnas spar ba'i thabs dang rten 'brel yin/__de'i tshe slob ma'i sems stong gsal rig pa'i bdag nyid can du mthong ba na de'i ngang ma bor bar stong pa'i ye shes khregs chod/__gsal ba'i ye shes thod rgal gnyis ka'ang rang rig pa'i snying po can gyi rtogs goms bar ma chad pa la brten nas tshe 'dir/__nang rang gnas gdod ma'i sku gsum gyi ngo bor btsan sa zin pa'am/__'chi srid chos sku/__bar do longs sku/__skye srid sprul sku gang rung rang snang du ngo shes rtsal rdzogs brtan pa thob pa'i tshul gyis so so'i rang gnas zin pa'am/__de ltar ma byung na 'bras bu mngon gyur du bzhugs pa'i sku gsum zhing khams rgya mtsho'i bkod pa mu dang mtha' med pa'i rnam rol du ma ro gcig gi tshul du da lta phyi rol na yod pa dag dang*/__slob ma sogs 'gro ba mtha' dag gi sems nyid stong gsal rig pa'i ngo bor gnas pa rnams ye nas nang 'dres pa'i tshul las mi 'da' bas chos nyid ro gcig pa'i bden pa dang*/__gsang sngags zab mo'i chos dang bla ma'i byin rlabs dang ldan pa'i thabs khyad par can gyis mtshams sbyar ba'i rten 'brel gyi bden pa bslu ba med pa'i mthus skye ba 'di'i 'og gam gzhan du yang rung ste rnam par dag pa'i zhing de dag tu nges par skye ba'i sgor bcug pa yin/__dngos gzhi lus bzhugs stangs gsum/__ngag rlung 'byung 'jug dal ba/__rgyang zhags gzigs stangs gsum/__sems phyi nang gi dbyings rig dbyer med kyi ngang du mnyam par 'jog skabs der/__bla mas rdo rje'i tshig gis ngo sprad cing lung bstan rgyas btab dang bcas pa gnang ba'i mthus/__rlung sems kyi dri mas ma bslad pa'i sems nyid gnyug ma'i sku dang ye shes kyi rang zhal rjen cer gyi tshul du rang byung rig pa'i ye shes kyi snang ba/__dwangs ma'i dbang yul du'ang ma nor mngon sum du mthong ba sogs snang bzhi'i lam gyi rim pa gang zag so so'i blo rim dang rjes su mthun pa'i sgo nas bsgrod pa mthar phyin te nang gsal gdod ma'i dbyings su gtan srid zin byed kyi thabs mchog bla na med pa bstan pa yin/__mtha' brtan bla ma'i sku dang*/__dbyangs gsal dkar dmar gyi phreng ba/__a yig mthing ka__/'od lnga'i gong bu rnams sku'i gnas so so nas thon te slob ma'i gnas so sor bstim pa ni/__rgyal ba rnams dang bla ma'i mi phyed rdo rje gsum dbyer med ye shes rdo rje dang bcas pa'i phyag rgyas theb pas/__gdon mi za bar 'tshang rgya ba'i skal ba can du byas pa yin/__spyir rig rtsal dbang mchog rgyal po'i khyad chos mtha' yas pa'i snying po skabs 'dir yang de tsam re nges par shes dgos so/__/gsum pa la gsum/__gdams pa zab mo'i sngon 'gro dngos gzhi/__rjes kyi khrid rim mo/__/sngon 'gro la'ang gsum/__rgyud snod rung du bya ba thun gyi sngon 'gro/__thun mong gi sngon 'gro blo sbyong rnam pa bdun/__khyad par gyi sngon 'gro bsags sbyong thun mong ma yin pa lnga'o/__/dang po thun gyi sngon 'gro la'ang gsum/__dben gnas brten tshul/__sgo gsum rnal dbab/__bla ma la gsol 'debs so/__/dang po ni/__ston mchog shAkya'i rgyal po'i gdul zhing 'phags pa spyan ras gzigs kyi zhing mchog__/dpa' bo mkha' 'gro ngang gis 'du ba'i gnas nyi shu rtsa bzhi po nang rdo rje'i lus kyi bkod pa dang sbyar te mtshon na gsang gnas bde skyong gi 'khor lo zhes zag bcas zag med kyi bde chen btsan thabs su 'dren nus pa'i gnas khyad par can bod khams mtha' dbus thams cad yin pa la yin par shes pa'i dag snang dang bcas te sgrub pa'i 'gal rkyen chung zhing mthun rkyen 'byor pa'i sa phyogs/__dur khrod/__ri rtse/__gangs ltong*/__mtsho gling*/__nags 'dabs sogs/__dgra rkun sogs mi yi rgyu 'grul med cing nyams len 'phel ba'i gnas nges med dam/__chos mthun gyi gnas gcig tu'ang rung ste rnam g.yeng gi rkyen dang bral ba gtso bor bzung zhing*/__der gcig pu'ang grogs chos mthun dang bcas te ji srid 'tsho ba'i bar du bsten dgos so/__/gnyis pa ni/__gnas ci tsam dben rung sgo gsum bag med kyi le lo rnam g.yeng nyi tshe ba rgyun chags res dus 'da' ba dang*/__lkog tu bsam spyod ngan pa byas na rang zhe rang la khrel zhing nyes dmigs lhag par che bas dus rtag tu dran shes bag yod brtan pos sgrub tshugs don ldan re zin thabs su tha mal gyi bsam spyod ltar snang gi chos tshul dang bcas pa'i mtshams dam du bcad/__lto gos dang gnyid tshad la phab/__rig pa hur bton te/__stan bde ba la bsam gtan gyi spyod lam khyad par can dang ldan pas rtag tu 'dug tshugs par byas te lus rnal du dbab/__rang gzhan gyi tshe rabs thog med nas bsags pa'i nyes ltung thams cad dang*/__khyad par du lam zab mo nyams su len pa'i gegs dang bar du gcod pa'i rkyen bzang ngan thams cad lhag med rang sar dag par bsgom la/__rlung ro lan gsum mam dgu phrugs su bsal nas dbugs phyi nang gi rgyu ba mi tshor tsam du dal ba la bslab pas ngag rnal du dbab/__rnam rtog bzang ngan bar ma gzhan thams cad blos btang ste/__rang gzhan mkha' mnyam gyi lus can ma lus pa'i sems kyi rang bzhin ye sangs rgyas pa yin gsung na'ang*/__ma rtogs rang 'khrul kho na'i gzhan dbang gis med snang rmi lam lta bu'i sdug bsngal gsum gyi rgyu 'bras du ma zhig la rtag tu longs spyod pa 'di kye ma'o/__/da ni 'di las thar pa'i thabs myur du 'bad dgos so snyam du thar 'dod kyi blo yang yang bsgom/__bdag drin gyis dus gsum du skyong mkhan ma gyur sems can rnams sdug bsngal rgyu 'bras rgya che zhing mu med pas dbang med rtag tu mnar ba 'di dag lhag par snying re rje snyam pa'i blo drag po shas mi bzod pa lta bu yang yang bsgom/__snying rje'o bsam pa kho nas mi chog pas sdug bsngal rgyu 'bras lhag med du bsal nas rang gnas sku dang ye shes chen po la bdag kho nas dgod par bya'o/__/snyam du gzhan phan lhag pa'i bsam pa byang chub mchog gi sems rin po che rtse gcig tu yang yang bsgom/__gzhan don rnam mkhyen gyi go 'phang de'ang rgyu med rkyen med las 'byung mi srid mod/__rgyu rkyen bla na med pa'i myur lam mthar thug pa 'od gsal rdzogs pa chen po'i man ngag gi snying po chos pa phal gyis rnyed dka' ba 'di lta bu bla ma'i bka' dang man ngag gi gzhung bzhin du nyams su blang zhing nyams len mthar dbyung bar bgyi'o snyam du sgrub bya skabs su bab pa'i chos dang chos ston pa'i bla ma la yid ches kyi dad mos kha tsam min pa re snying khong rus pa'i gting nas bsgom pas sems rnal du dbab par bya'o/__/gsum pa ni/__skad cig gis snang srid rnam dag 'og min kyi zhing khams chen po kun bzang mchod sprin rgya mtsho dang bcas pa 'byams klas pa'i dbus su drin chen rtsa ba'i bla ma nyid sku rdo rje mtshan dpe'i gzi byin gyis snang srid thams cad zil gyis non pa/__gsung rdo rje tshangs pa'i dbyangs kyis zab rgyas chos kyi sgo mtha' yas pa bstan pa/__thugs rdo rje mkhyen brtse nus stobs bsam gyis mi khyab pa'i ye shes kyi gzigs pas bdag sogs sems can thams cad nam yang 'bral med rjes su 'dzin pa/__sku gsum gyi rgyal ba rab 'byams gcig tu 'dus pa'i ngo bor mngon sum bzhin du bkra lam mer bzhugs pa nyid la/__bdag sogs byang chub snying po'i bar du ci mdzad khyed kho nas mkhyen no/__/skyabs dang re ltos gzhan ni tha na rmi lam tsam du'ang med do snyam du blo sna gzhan rang 'gags su 'gro ba tsam gyi mos gus gdung shugs drag po'i sgau nas bsgom thabs gsol 'debs ngag 'don ltar brjod cing gsol ba phur tshugs su btab mthar dgyes shing brtse ba chen pos rang la thim pas bla ma'i rdo rje gsum dang rang gi sgo gsum ro gcig tu 'dres par bsam la rang sems bzo bcos med par ci gnas su bzhag__/'di dag nyams len phyi ma thams cad kyi gzhi 'dzin nam yang gal che ba'o/__/gnyis pa skabs 'di tsam kho nar ma tshad chos pa thams cad kyi spyi nor med du mi rung ba'i blo sbyong gi thabs zab mo bdun gyi dang po mi rtag pa bsgom pa ni/__'di ltar so so'i rgyu rkyen sna tshogs glo bur du 'dus pa'i dbang gis sngar med gsar du yod par byas pa'i snod bcud gnyis bsdus kyi chos ji ltar snang zhing srid tshad thams cad rang grub zin pa'i dus skad cig gnyis pa phan chod 'dug dbang med par 'jig cing slar yang rigs 'dra phyi ma re rgyun chags su skye ba'i snga phyi skye 'jig gi bar mtshams rang 'bras mi mngon pa tsam du 'pho 'gyur sla bas de la rtag pa dang brtan pa ci yod/__des na/__gnas lus/__longs spyod/__tshe srog dang bcas pa su la ci yod tshad thams cad mi rtag pa'i rang bzhin kho na las ma 'das shing*/__'dzam gling gi mi rnams tshe tshad ma nges pa dang*/__snyigs dus 'dir tshe thung nad mang sogs kyis lhag par mnar bas myur du 'chi nges yin te/__dper na chu'i sbu ba rlung gis btab bzhin pa dang 'dra tshul snying thag pa nas yang yang bsgom la rtag 'dzin gyi blo ngan smyon pa'i sems 'dra ba 'di las go ldog ste mi rtag pa yin pa la yin par shes pa'i blo bcos min rgyun chags re ma byung gi bar du thun dang thun mtshams su kun la 'bral med kyi tshul du yang yang bsam zhing dam pa'i chos bsgrub pa la phyi bshol dang le lo cung zad tsam yang mi 'chor ba'i thabs la sgo kun nas 'bad par bya'o/__/gnyis pa 'khor ba'i bde ba yang mi bde ba 'byung ba'i rgyu yin tshul bsgom pa ni/__'di ltar sngon bsags zag bcas kyi dge 'bras mngon mtho'i bde ba yid du 'ong 'ong ltar snang ba re la zhen cing chags pa'i dbang gis tshe 'di blos mi thong*/__bde ba don gnyer gyi bsam spyod kho nas g.yeng pas dam pa'i chos gang yang mi 'grub/__dgra 'dul gnyen skyong sogs la dus rtag tu 'bad pa'i zhor 'byung re tshun chad du sdig pa ngan pa du ma re bsags pa'i 'bras bu tshe 'dir mi bde ba'i rnam pa mang zhing phyi ma ngan song gi sdug bsngal drag po mi 'dod bzhin du myong dgos par 'gyur bas na/__'khor ba'i bde skyid glo bur ba 'di ci tsam che ba de tsam du chos pa rnams phung byed kyi bslu brid shin tu ma rung ba tshabs chen zhig yin te/__dper na kha dog mdzes shing dri ro bzang ba'i dug dang*/__dug 'dres pa'i bza' btung zhim pos bslus te zos na de'i 'bras bu dug gi gzer nad ngan pa dbang med du myong dgos pa byung tshe 'gyod kyang bcos thabs dka' ba lta bu yin par shes nas/__bslu brid tshe 'di'i bde ba la chags zhen ma chod na rang dang gang 'brel tshun chad la sdug bsngal bzod dka' ba re ngang gis 'byung tshul legs par bsgom zhing blo sna tshe 'di'i 'dod zhen las bzlog ste dam pa'i chos phyogs su blo rtse gtad thabs re la sgo kun nas 'bad par bya'o/__/gsum pa 'khor ba'i mthun rkyen la sus ci tsam 'bad kyang zin dus med tshul bsgom pa ni/__'di ltar 'khor ba'i skye 'gro mchog dman thams cad kyis so so'i lus sems bde thabs su mthun rkyen gyi yo byad rnam pa sna tshogs re 'bad pa du ma'i sgo nas rtsol sgrub byed mod sngon bsags dman na gang yang 'byor dka' zag bcas kyi dge 'bras phran bu re 'byor zhing ci tsam longs spyod na yang cung zad song rjes rang sar yal ba ltar gyur tshe slar yang 'dod sred sngar bzhin ches cher 'phel bas lus sems gdung zhing ngal ba du mas yang yang 'bad rtsol rdzogs dus med pa zhig byed dgos rgyu ma gtogs legs par yongs su zin dus ni nam yang med pa ste/__dper na ri dwags skom pas gdung tshe smig rgyu la chur 'khrul nas de rjes bsnyogs pa dang nges par 'dra tshul zhib tu bsgom nas 'tsho ba chos mthun res chog shes pa'i thabs la snying nas 'bad par bya'o/__/bzhi pa mi chos kyi bya bzhag ltar snang bzang ngan thams cad don med tshul bsgom pa ni/__'di ltar tshe 'di'i bde sdug__/legs nyes/__dar rgud/__mtho dman/__phyug dbul sogs bzang ngan gang nyams su myong tshad gson dus nas snga ma snga ma rnams dran pa'i yul tsam las med/__'chi dus su las dge sdig gi rnam smin kho na ma gtogs rjes su 'brang zhing phan gnod byed mkhan su yang med pas skabs re'i bde sdug gang byung des rnam pa kun tu phyi mthar 'khyol ba'i snying po dang don 'bras ni rdul tsam yang med pa ste dper na gnyid thun re'i skabs su rmi lam bzang ngan re glo bur du byung ba dang 'dra nges yin tshul yang yang bsgom nas ltar snang gi bde sdug gang la'ang blang dor gyi 'bad rtsol dang re dog gi nyer len mi byed par gang byung des chog gi ro snyoms re la blo gzhol ba shin tu gal che/__mdor na 'khor ba'i bde skyid dang*/__de'i yo byad rnams dang*/__bzang ngan gyi snang ba yud tsam re 'di dag la zhen chags shor ba'i nyes dmigs rnams yang yang bsgom nas rang blo de las ldog thabs dang*/__gzhan blo de las sgrol 'dod kyi bsam pa rnam par dag pa bcos min re rgyud dang 'dres nges bya ba ni dam pa'i chos thams cad kyi rtsa ba yin pas yang yang 'bad dgos so/__/lnga pa thar pa'i phan yon bsgom pa ni/__'di ltar thar pa'i lam yang dag pa mthar phyin pa'i 'bras bu nyan rang dgra bcom pa'i go 'phang rin po che thob na 'khor ba'i sdug bsngal rgyu dang bcas pa las gtan du grol nas zhi bde'i yon tan phun sum tshogs pa mngon du mdzad zin pas na slar sdug bsngal 'khor ba'i 'dam 'dir nam yang mi ldog ste/__dper na 'brum nad byang ba'i skyes bu'i lus rten der 'brum nad des na mi srid pa bzhin no/__/khyad par du theg chen gyi lam tshul bzhin du bsgom pa'i 'bras bu mthar thug pa ni zhi bde de las kyang ches khyad du 'phags pa/__thar pa dam pa'am thar pa'i mchog bla na med pa rnam mkhyen gyi go 'phang rin po che yid bzhin dbang gi rgyal po'i mchog lta bu yin la/__de ni srid zhi'i mtha' gnyis ka'i rgyu dang bcas pa las rab tu 'das shing don gnyis bla na med pa la mnga' dbang 'byor pa rtag khyab lhun grub kyi yon tan bsam gyis mi khyab cing brjod kyis mi longs ba mtha' yas mu med pa dang ldan pa yin la/__'di lta bu'i go 'phang mchog de thob na smos ci dgos/__thob 'dod kyi yid smon lan gcig tsam byas pa'i phan yon yang rdo rje'i ljags kyis bgrang par mi nus pa'i yul yin pas na shes ldan dag gis da lta rang dbang yod dus 'dir kha tsam tshig tsam ma yin par snying thag pa nas rdzogs pa'i sangs rgyas kyi go 'phang myur du thob 'dod kyi blo bcos min stobs dang ldan pa zhig rgyud la ma skyes kyi bar du 'bad pas bsgom pa dang srog gi phyir yang mi spang snyam pa'i dam bca' brtan po re ci nas kyang gal che'o/__/drug pa bla ma'i gdams ngag gal che tshul bsgom pa ni/__de ltar thar pa dang thams cad mkhyen pa'i go 'phang sgrub byed kyi lam bzang khyad par can ni ston mchog bde bar gshegs pa nyag gcig gi bka' drin kho na las byung ba'i dam pa'i chos kyi sgo grangs med pa rnams sgron ma'i zhing gi gdul bya bsod nams can dag la phyogs ris med pa'i tshul du snang ba thams cad kyang gdams ngag khyad par can re yin na yang pho tshod dang rang bzo lta bus ni sus kyang nyams 'og tu mi chud la/__chos der mkhas pa'i bla ma mtshan ldan gyi gdams ngag gnad bsdus thog mtha' tshang ba re thob na nyams su blang bya yang dag pa re bde blag tu shes par 'gyur bas bla ma'i gdams ngag zab mo ni med du mi rung ste/__dper na khang bzang gi rtser sleb thabs them skas bzang po la rag las pa dang 'dra bas dang po mtshan ldan gyi bla ma dam pa brtags shing btsal/__rnyed pa'i tshe mnyes pa gsum ldan gyi sgo nas bstan cing bka' bzhin nyams su len pa la blo thag chod na gcig chog gi nye lam rmad du byung ba yin pas nyams 'og tu mi chud pa'i kha bshad brgya stong re las bla ma'i gdams ngag sna gcig gi gtso che ba ni yongs su grags shing mngon sum tshad mas kyang grub pa yin no/__/bdun pa sems rang babs su gnas thabs gal che bas ji ltar bsgom tshul ni/__bla ma'i gdams ngag thos pa tsam dang*/__bshad shes pa tsam gyis rang rgyud mi grol bas bsgom dgos/__glen bsgom re dang*/__rnam rtog gis bslad zhugs pa dang*/__'phro skyong mi nus par sked chad mang po thun nang du byung ba'i bsgom gyi gzugs brnyan res mi tshe 'da' na yang nyams rtogs bzang po mi skye bas thun re yin kyang bla ma'i zhal khrid ltar bsgom pa gal che/__dben pa'i gnas su stan bde ba la lus drang por 'dug__/rlung rang babs su 'jog pa'i bar rlung bum pa can 'jam po bzung*/__mig ha re bzhag__/lus sems khong lhod shes pa dwangs gsal sang nge ba rang so ma nyams par byas te rang babs su lhang nger skyong*/__rtog dpyod kyi spu ris mang po mi bslad sgom blo ngang mi thung zhing 'di yin 'di min gyi re dogs mi cher bar thog mar thun grangs mang zhing thun yun thung ngu re la legs par 'jog__/nam sgom kyang rung yengs med 'dzin med zer ba de dran par byas la lag len du btab dgos/__goms rim bzhin thun je ring bya/__nyob na rig pa hur phyung*/__'phro rgod che na lhod la bzhag__/sems grim lhod dang*/__kha zas spyod lam bcas rang nyams la gang 'phrod res tshod 'dzin/__sems btson 'dzin gyi bsdam che ba dang*/__nya re nyo res dwangs cha shor ba'am/__kha yengs mig yengs sogs lhod che na skyon yin/__mngon shes rmi lam chal chol dang lha mthong 'dre mthong ngas shes ngas rtogs sogs bshad rgyu mang na gegs yin/__g.yo nyams sogs bde mi bde ci rigs yod med ni gang zag so'i khams dbang khyad che bas mtha' gcig tu ma nges/__sems rang babs su skyong bas lus sems bde nyams dang*/__shes pa gsal nyams dang*/__stong gzugs shar ba dang*/__rnam rtog 'gag pa'am ma 'gag kyang sems la ci yang mi gnod pa mi rtog pa'i nyams sogs/__nyams snang 'jam rtsub phra rags dang yun ring thung shugs che chung bzang ngan gyi rnam pa ci byung yang de rnams la ngo lta dang 'di yin 'di min gyi rtsis gdab zhen 'dzin gang yang mi byed par rang babs kyi shes pa dwangs sang nge ba nyid la nyams len gyi mthil bcol te rang gi slob dpon rang gis byed nas khab mig tu skud rtse bcug pa ltar gnad smin re nus na rang rgyud kyi nyon mongs pa mgo non cing de'i dbang du mi 'chor ba'i rang tshugs zin pa dang dus rgyun sems zhi dul can bskyed rdzogs kyi ting nge 'dzin thams cad skye ba'i gzhi rten du rung ba/__dper na zhing sa dul ba lta bu 'byung bas dang po nas che skad mtho skad don med mang po mi sgrogs par rang sems zhib la phab nas nyams len gyi rkang tshugs thabs 'di ci nas gal che'o/__/de ltar blo sbyong bdun po re re nas thog mar sems bskyed mthar bsngo smon rnam par dag pa re bcas thun du bcad de bsgom pa dang thun mtshams su yang so so'i nyams len gyi rtsi dang ma bral ba'i sgo nas rang rgyud la 'byor nges bya'o/__/gsum pa thun min gyi sngon 'gro la lnga/__khyad par can gyi skyabs 'gro/__sems bskyed/__sgrib sbyong*/__tshogs bsags/__bla ma'i rnal 'byor ro/__/dang po ni/__skyabs yul rang mdun nam mkhar mchod sprin rgya mtsho'i dbus su seng khri pad+ma nyi zla'i gdan la rtsa ba'i bla ma nyid shrI he ru ka seng he shwa ra sku rdo rje dmar smug sgeg 'dzum brjid nyams dang ldan pa rin chen rus rgyan sna tshogs kyis mdzes shing phyag mnyam bzhag gi phyag rgya can zhabs rdo rje'i skyil krung gis bzhugs pa/__gzi mdangs nyi ma bye ba'i 'od phung lta bu dang rdo rje ye shes kyi me 'od phyogs bcur 'phro ba/__gsung rdo rje chos kyi sgra chen kun tu sgrogs pa/__thugs rdau rje rig pa gting gsal chos sku/__rig mdangs rang gsal longs sku/__rig rtsal phyogs med sprul sku'i rang bzhin gyi rab 'byams skyabs gnas rgya mtsho spro bsdu'i bdag nyid chen po rjes chags brtse bas bdag la lhag par dgongs shing ye shes spyan gyis mngon sum du gzigs te dgyes ye re bzhugs par bsgom/__skyabs su 'gro ba po mkha' mnyam sems can yongs kyi don phyir bdag nyid sgo gsum gus pa'i rnam 'gyur dang bcas te bla ma'i spyan sngar 'khod pa/__skyabs su ji ltar 'gro tshul/__bdag sogs 'gro ba'i sems nyid ye stong ka dag chos sku/__rang gsal lhun grub longs sku/__dbyer med chen po'i rtsal snang sprul sku'i ngo bo ni skyabs yul dang gnyis su med pa ye sangs rgyas pa'i rang bzhin can yin gsung na'ang*/__rang ngo ma shes pa'am de'i don ma rig pa'i 'khrul rtog glo bur ba'i dri ma 'jigs dang sdug bsngal thams cad kyi rtsa bar gyur pa 'di myur du grol phyir yid ches phyir mi ldog pa'i dad pas drangs te/__gtan gyi skyabs mgon re ltos mthar thug pa khyed kho na la bcol ba yin lags na/__khyed kyi ye shes mchog gi gzi byin tshad med pa'i mthus bdag cag rnams kyis rang sems gnyug ma'i rang ngo skad cig gis shes pa'i ngang du gnyis 'dzin gyi dri ma mtha' dag btsan thabs su rnam par grol nas thugs yid dbyer med du 'dres shing sangs rgyas pa zhig da lta stan thog 'di ru mdzad du gsol snyam du mos gus gdung shugs drag po'i sgo nas skyabs 'gro lan brgya stong ci rigs gzhung bzhin du brjod cing bsam pa'i mthar bla ma rang la bsdu zhing thugs yid 'dres pa'i ngang la rang babs su bzhag__/spyod lam rnam pa bzhi'i skabs su bla ma'i snang ba dang mi 'bral ba'i lam khyer la bslab/__dus dang rnam pa kun tu bla ma'i thugs dang rang sems dbyer med du bsre zhing ngo lkog mtshungs pa'i rang sems gtsang ma re nus na skyabs 'gro'i bslab bya sogs srung sdom gy-i gnad 'dus pa yang yin no/__/gnyis pa ni/__sems bskyed kyi sdom pa dbang dus su khas blang ba des thob pa yin snyam du rjes su dran par byas la/__'di ltar rang gzhan zhes pa'i skye 'gro tha dad du snang ba zhig mngon sum du shar/__snang ba de ltar bden par bzung ba'i blo de je brtan je 'phel du song nas a 'thas kyi phyogs zhen drag po dang bcas pa'i rang phyogs dang gzhan phyogs zhes sde tshan gnyis ris chad ltar snang zhing snang ba ltar bden grub tu bzung ste rtsa ba rang dang lhag par chags yul re khol bu khol bur bcad pa'i phyi nang gi dbye ba mang po zhig byas te rang phyogs rnams la bde ba yod thabs sdug bsngal med thabs ci drag re la lugs gnyis kyi sgo nas nan gyis 'bad/__rang 'dod de la gnod byed kyi skye 'gro rnams bdag gi dgra bo'o zhes bzung ste de la gnod gang thub thub re byed/__de 'dra'i phyogs ris dang chags sdang rgyun ma chad pa'i tshul du skye ba thog med nas gang byas tshad de rnam mkhyen la rgyab kyis phyogs shing srid zhi gang rung gi mthar 'phen byed dang theg chen gyi dge rtsa nyams byed dper na nor rdzas la dbul 'dre zhugs pa lta bu yin pas bdag gces 'dzin gyi 'gong po zhes bya/__de lta bu'i blo nyes spang nas gzhan don du rnam mkhyen sgrub byed kyi bsam sbyor khyad par can la brtson dgos shing*/__skabs 'dir shin tu snying por dril te ji ltar bsgom pa ni/__ma gyur mkha' mnyam gyi sems can drin mo che mtha' dag gi sems kyi chos dbyings gdod nas dag pa sku gsum gyi rang bzhin las nam yang mi 'da' mod/__ma rig 'khrul snang glo bur ba'i gzhan dbang gis khams gsum 'khor ba'i sdug bsngal mu mtha' med pas dbang med rtag tu mnar ba 'di rnams snying re rje/__'di dag gi sems nyid rang zhal rang gis mthong goms la brten nas 'khrul 'khor sdug bsngal rgyu 'bras las yongs su grol zhing rang gnas sku dang ye shes kyi sa la bdag kho nas dgod par bya/__de'i ched du theg mchog yang gsang bla na med pa'i khyad chos dbyings rig dbyer med kyi gsang lam la tshul bzhin du 'jug cing lam mthar phyin pa'i thabs mkhas la ci nas kyang 'bad par bgyi'o snyam du sems khyad par can bskyed de gzhung tshig brjod la gsal snang 'don skyor dang bcas pas rang rgyud dang 'dres nges su bsgom par bya'o/__/gsum pa sgrib sbyong bzhi pa tshogs bsags stabs gcig tu nyams su blang ba ni/__rang nyid gnyug ma'i lha sku stong ra sgrib thogs kun bral dwangs gsal 'od kyi rnam pa'i nang dbus su rtsa dbu ma sbom phra srin mdzub tsam phyi dkar nang dmar sngo ba'i 'od mdangs can yar sne spyi gtsug dang mar sne lte 'og sor bzhi'i mtshams su zug pa'i g.yas su ro ma dmar mo rdul gyis brlan cing g.yon du rkyang ma dkar mo khu ba'i gsher bag can gnyis ka dbu ma'i sum cha tsam re'i yar sne dbu ma las sor tshad tsam dma' mtshams nas sna bug g.yas g.yon la zug cing mar sne yi ge cha yi dbyibs su dbu mar tshud pa/__gtso bo de gsum las dgyes pa'i rtsa phran spyi bo bde chen 'khor lo'i rtsa 'dab dkar po so gnyis thur bstan/__mgrin pa longs spyod 'khor lo'i rtsa 'dab dmar po bcu drug gyen bstan/__snying ga chos kyi 'khor lo'i rtsa 'dab sngon po brgyad cung zad thur bstan/__lte ba sprul pa'i 'khor lo'i rtsa 'dab ser po drug cu rtsa bzhi gyen bstan rnams dwangs gsal 'od kyi sbu gu'i rnam pa can/__dbu ma'i mar sne rtsa gsum 'dus mdo las sor tshad tsam mtho ba'i sar pad+ma nyi zla'i steng du rtsa ba'i bla ma gsung pad+ma'i rigs kyi rdor sems dmar gsal rus rgyan can rdor dril 'dzin cing rang 'od kyi yum la 'khyud de zhabs rdor skyil du bzhugs pa rab 'byams rgyal kun 'dus pa'i spyi gzugs gzhir gnas kyi gtum mo dang dbyer med du bsgom pa rten gyi stobs/__rang gzhan sgo gsum gyis tshe rabs thog med nas bsags pa'i rang bzhin gyi sdig sgrib dang*/__bcas pa'i ltung ba sdom pa gsum dang khyad par rtsa ba yan lag gi dam tshig nyams pa'i sgrib skyon ci mchis pa thams cad shin tu gnong 'gyod drag po'i sems kyis mthol zhing bshags so byang zhing dag par gyur cig snyam pa sun 'byin pa'i stobs/__phyin chan srog la bab kyang mi bgyid do snyam du dam bca' ba sor chud pa'i stobs/__bla ma'i thugs rje ye shes kyi gzi byin chen pos bdag cag gi sngar byas kyi sdig sgrib bag chags dang bcas pa yongs su dag nas phyis nam yang rgyud la mi skye bar mdzad du gsol snyam du gsol ba btab cing yig brgya lan nyer gcig tsam brjod pas thugs rgyud gnad nas bskul/__de nas rlung ro bsal/__'og rlung bsdam/__steng rlung dal bus mnan pa'i rkyen gyis bla ma'i sku las ye shes ky-i me 'bar ba yar song nas g.yas 'khyil tshul gyis lte ba'i rtsa 'khor gang*/__snyoms 'jug gi gnas skabs dang 'dod chags kyi sgrib pa thams cad sregs sbyangs dag par byas/__me lce snying ga'i rtsa 'khor gang*/__gnyid 'thug gi gnas skabs dang gti mug gi sgrib pa thams cad sregs sbyangs dag__/de nas mgrin pa'i rtsa 'khor gang*/__rmi lam gyi gnas skabs dang phrag dog gi sgrib pa thams cad sregs spyangs dag__/mthar spyi bo'i rtsa 'khor gang*/__sad pa'i gnas skabs dang*/__zhe sdang dang nga rgyal gyi sgrib pa thams cad sregs sbyangs dag par byas/__de rnams dang chabs gcig tu sems can thams cad kyi sdig sgrib ma lus pa sregs sbyangs stong par bsam/__rlung mi thub dus sang sang 'bud cing slar yang bzung la dmigs pa'i 'phro skyong*/__thun mthar rlung sbyor lhod de dmigs 'dun ma bor ba'i ngang nas yig brgya ci rigs bzla/__bshags rgyud kyi ru dra'i smre bshags dang*/__bde mchog mngon 'byung gi rgyud tshig mgon po bdag ni sogs dang*/__'gro mgon chos rgyal 'phags pa'i gsung*/__sku gsung thugs rtsa ba sogs kyang brjod na legs shing med kyang chog__/rtsa tshig dang 'jam mgon bla ma'i khrid yig tu rlung sbyor cher ma mngon pa ltar na dmigs pa dang bzlas grangs gtsor 'don bya/__'di ltar me sbyor la rlung gnad gal che ba'i dbang du byas na bzlas grangs mang mi dgos/__gang ltar yang*/__mthar bla ma rdo rje sems dpa'i thugs shin tu dgyes shing zhal 'dzum mdangs dang bcas te/__kye rigs kyi bu khyed kyi nyes ltung thams cad rtsa ba nas dag pa yin no/__/zhes gnang ba byin par mos la bla ma dang thugs yid bsre zhing mnyam par bzhag pa rnams gnyen po kun spyod kyi stobs so/__/de nas tshogs bsags kyi nyams len la tshogs zhing gi khyad par rtsa 'khor bzhi'i lte bar dbu ma'i nang du pad+ma nyi zla'i gdan re re la spyi bor bla ma sku rdo rje yab yum dkar po/__mgrin par bla ma gsung rdo rje yab yum dmar po/__snying gar bla ma thugs rdo rje yab yum mthing ka__/lte bar bla ma ye shes rdo rje yab yum ser gsal kun kyang mtshan dpe'i nyams ldan gcer bu rus rgyan can yab rnams rdo dril 'dzin nas yum la 'khyud de rdor skyil gyis bzhugs pa/__yum rnams g.yas gri gug dang g.yon bdud rtsi'i b+han+d+ha bsnams nas yab dang sbyor ba/__rtsa 'dab rnams kyi nang du pad nyi'i gdan re re la bde stong lhan skyes kyi ye shes btsan thabs su mngon du byed pa'i rten 'brel gyi khyad par ye shes dbyings kyi mkha' 'gro ma dkar dmar mthing ser gri thod can bde ba'i gar gyis bzhengs pa'i 'khor dang bcas te byin thibs se bzhugs par bsgom/__mchod rdzas kyi khyad par spyi bo'i rtsa 'khor gyi steng gi dbu ma'i nang du gzhir gnas kyi dkar cha nyis dwangs sum dwangs kyi bcud thig ha~M yig dkar gsal mgo thur bstan dran pa tsam gyis bde ba chen po rtsol med du skyed byed sangs rgyas thams cad 'dus pa'i ye shes kyi bdud rtsi zag la khad par bsgom/__lte 'og gi bla ma rdor sems yab yum la bdag gis bsod nams dang ye shes kyi tshogs chen po myur du rdzogs shing kun mkhyen ye shes kyi go 'phang mngon du 'gyur bar mdzad du gsol snyam du gsol ba snying nas btab cing*/__ma hA su ka badz+ra sa twa a haMH__zhes brgya rtsa sogs bzlas pas thugs rgyud bskul/__de nas rlung sngar ltar legs par bzung bas bskul te bla ma'i sku las ye shes kyi me 'bar ba dbu ma'i nang brgyud bla ma rnams kyi mdun nas yar song ba haM la reg pa tsam gyis bdud rtsi'i rgyun babs/__spyi bo'i bla ma sku rdo rje yab yum 'khor bcas la phog pas dga' ba'i mchod pas mnyes/__bla ma yab yum rnams kyi sku las babs pa'i bdud rtsi dang bcas pas spyi bo'i rtsa 'khor gang*/__rags pa lus dang phra ba rtsa yi sgrib pa dag cing tshogs chen rdzogs/__dga' ba'i ye shes rgyud la skyes/__stong pa'i 'od gsal mngon du byas/__snang stong sku rdo rje dang dbyer med sprul pa'i skur gyur/__bdud rtsi mgrin par babs ba bla ma gsung rdo rje yab yum 'khor bcas la phog pas mchog dga'i mchod pas mnyes/__sku yi bdud rtsi dang bcas pas mgrin pa'i rtsa 'khor gang*/__rags pa ngag dang phra ba rlung gi sgrib pa dag cing tshogs chen rdzogs/__mchog dga'i ye shes rgyud la skyes/__shin tu stong pa'i 'od gsal mngon du byas/__grags stong gsung rdo rje dang dbyer med longs spyod rdzogs pa'i skur gyur/__bdud rtsi snying gar babs pa bla ma thugs rdo rje 'khor bcas la phog pas khyad par dga' ba'i mchod pas mnyes/__sku yi bdud rtsi dang bcas pas snying ga'i rtsa 'khor gang*/__rags pa sems dang phra ba thig le'i sgrib pa dag cing tshogs chen rdzogs/__khyad par dga' ba'i ye shes rgyud la skyes/__thams cad stong pa'i 'od gsal mngon du byas/__dran stong thugs rdo rje dang dbyer med chos kyi skur gyur/__bdud rtsi lte bar babs pas bla ma ye shes rdo rje yab yum 'khor bcas la phog pas lhan skyes kyi dga' ba'i mchod pas mnyes/__sku yi bdud rtsi dang bcas pas lte ba'i rtsa 'khor gang*/__zag bcas kyi sgo gsum cha mnyam phra rag gi 'pho ba'i sgrib pa dag cing tshogs chen rdzogs/__dga' bral lhan skyes kyi ye shes rgyud la skyes/__rab tu stong pa'i 'od gsal mngon du byas/__mchog tu mi 'gyur ba'i bde stong dbyer med ngo bo nyid kyi skur gyur par bsam/__de ltar yang yang sbyang*/__thun mthar rtsa 'dab dang 'khor gyi mkha' 'gro rnams bla ma so so'i thugs kar thim/__rang lus skra rtse man chad rtsa gsum gyi stod cha spyi mgrin gyi bla ma yab yum dang bcas pa 'od dkar po'i rnam pas mar snying ga'i bla ma la thim/__rkang pa'i sor rtse yan chad kyi lus dang*/__rtsa gsum gyi smad cha/__lte 'og dang lte ba'i bla ma bcas 'od dmar gyi rnam pas yar 'dus te snying ga'i bla ma la thim/__de nas bla ma yang skad cig gis chos kyi dbyings su yal bas gzhi rten kun bral bsam mi khyab pa'i ngang du mnyam par bzhag__/slar ldang ba na gnyug ma rdo rje'i lha skur gsal zhing bsngo smon sogs rgyun spyod la 'jug go__/lnga pa bla ma'i byin rlabs lam byed kyi rim gnyis mdor bsdus 'di ni dngos gzhi bla sgrub kyi bsnyen pa'i tshul dang rdzogs rim dngos kyi gzhi 'dzin lta bu yin/__nyams su len dus rlung ro sangs kyis 'bud la shes pa rang sor bzhag cing legs par bsgom/__bsgom rim ni gzhung don je gsal du btang ba ngag 'don gyi dkyus ltar yin la/__spyan 'dren gyi mthar bI ma'i sngags dang hU~M lngas bskul bas ri bo rtse lnga nas bI ma dang mkha' 'gro'i gnas nas lce btsun kyi sku klong lnga'i ye shes kyi ngo bo mthing dkar ser dmar ljang gu grangs med byon nas rang dang bla ma'i gnas lngar yang yang bstim/__yan lag bdun pa'i don ni/__ye nas ma skyes pas nam yang mi 'gag pa rang gnas sku gsum gyi rgyal srid chen po lam snang bzhi mthar phyin pa'i sgo nas mngon du mdzad zin pa'i bla ma dang rang sems kyi ngo bo rang bzhin thugs rje rnam gsum dbyer med kyi tshul du gnas pa rnams da lta gnyis su snang yang don la ye nas 'du 'bral med par yin lugs rang ngor mjal ba'i tshul gyis phyag 'tshal ba dang*/__rlung sems rig pa'i dbyings su thim pa las rig rtsal rnam par dag pa'i mchod sprin rab 'byams ma bkod rang byung gi tshul du 'bul ba dang*/__glo bur gyi sdig ltung ci mchis pa thams cad dbyings rig 'dus ma byas pa'i klong du ma spang rang sar grol ba'i tshul gyis bshags pa dang*/__bdag gzhan dang rtogs ma rtogs sogs bzang ngan gnyis kun bral gyi blos mtshan ma med pa'i don la rjes su yi rang ba dang*/__brjod med don mtshon gyi chos 'khor chen po rig rtsal ye shes kyi gzi byin thogs pa med pa nyid 'gags med rdo rje'i gsung dbyangs zab mo dang chab gcig tu bskor bzhin par/__rdo rje'i gzugs sku 'pho med yongs grub chen por bzhugs gsol 'debs pa dang*/__rten 'brel sgyu ma'i dge tshogs mtha' dag 'khor gsum dmigs med 'od gsal gyi dbyings su bsngo ba rnams rtse gcig tu bya/__'dir brgyud 'debs dkyus ltar ram/__rig rtsal dbang thob shrI sing ye shes mdo/__zhes cung zad bsgyur ba gang mos btang*/__gsol 'debs gzhung tshig gi don ni/__stong pa'i 'od gsal ka dag khregs chod dang*/__snang ba'i 'od gsal lhun grub thod rgal gyi lam snang chos nyid mngon sum gong 'phel tshad phebs chos zad bzhi ka mthar phyin nas mthar thug gi dag pa gnyis ldan mngon du mdzad pa las mchog tu mi 'gyur ba'i rig pa nyid slar yang gdul bya'i dpal du ye shes chen po'i sku lnga rang shar gyi tshul du bzhengs shing*/__de yang lugs gzhan la yongs su ma grags pa'i zag bral 'ja' lus 'pho chen rdo rje zhes mi shigs dwangs ma'i rang gzugs nam mkha' ji srid du bsgres rgud dang 'chi ba med pa mnga' ba'i bla ma rin po che dri med bshes gnyen khyed mkhyen no kye zhes mtshan nas bos te rjes 'jug bdag la sgrib med ye shes kyi thugs rjes brtse bar dgongs nas/__nyams sogs ltar snang tsam ma yin par khyed dang dbyer med mngon sum du 'gyur ba'i byin rlabs chen po phyi dus su ma 'gyang bar deng 'dir skad cig gis rtsol zhig ces snying nas gsol ba phur tshugs su 'debs pa dang sngags bzlas spel te rtse gcig tu 'bad mthar dbang don du slar yang gsol ba btab/__dbang len pa'i dmigs pa ngag 'don ltar bya/__gal te spros pa la dga' bas bI ma lar mchod bstod dmigs bsal byed na ye shes pa bstim rjes su rang gi thugs las mchod lha dang mchod tshogs spros te mngon par mchod par mos la mchod bstod don phrin nyid sbyar/__de nas yan lag bdun pa gsol 'debs dbang len bla ma rang gi smin mtshams kyi phra thig la bsdu ba rnams bya/__rang gi lhar snang legs par gsal zhing khyad par smin mtshams kyi phra thig la rig pa gtad de sngags bzla/__'di rdor bzlas yang rlung ngang gis 'jug pa oM gnas pa AHldang ba hU~M gi sgrar bsam pa'am 'bru gsum po dkar dmar mthing ga'i gzugs dang sgra gnyis ka snga phyi'am dus gcig la lam byed dal bus bslab/__skyo ba'am 'phrau 'du bya bar spro na phra thig las 'od lnga 'phro 'du gzhung bzhin dang dag pa'i snod bcud rang la bsdu ba yang*/__bsdu rim dkyus ma'i snga rol nas ci rigs btang bas chog__/thun mthar rang las spros pa'i mchod sprin gyis rang nyid mchod tshul shes pas mchod bstod don phrin ltar bya ba'am ma byas kyang chog__/'chi kha dang 'chi srid lam byed kyi khyad par bsdu rim gyi skabs rnams su dag pa'i snod bcud rang gi thugs kar bsdu rang gi lus sems ltar snang ba yang smin mtshams kyi phra thig la dril/__phra thig dwangs gsal g.yo med la rig pa rtse gcig tu dril te yun cig gnas su 'jog pa ni rang nyid 'da' ka'i lam gnad yin la/__de yang spros bral gyi dbyings su ar la gtad de rig pas dbyings la ngo lta mi dgos par rtog bral gyi rang gshis su ngal bso ba ni 'chi srid kyi rnal 'byor lam du byed thabs so/__/slar yang gnyug ma rdo rje'i lha skur bkra lam gyis ldang zhing tshogs drug gi snang ba bzang ngan dbang shes kyi yul du lhug par shar ba na de dag bden mi bden sogs rtog rjes su mi 'brang bar bsgom bya'i snying po lhar snang dbyings snang gang gi skabs su bab pa de'i rang thog tu rig pa'i btsan sa bzung dgos/__bla ma'i snang ba phra thig dang rdor bzlas spro bsdu'i bye brag 'di dag me thog tu shing bskam bsnan pa ltar gcig grogs gcig byed kyi tshul du gsal brtan thob pa re nyams su blang na bskyed rdzogs zung 'jug don la gnas pa nyid do/__/rdzogs rim gyi mdo chings yang thun nang sogs kyi lha snang dbyings snang dang tshogs drug gi snang ba thams cad blos bkod pa tsam las gang yang ma grub/__bkod pa po byung tshor can gyi blo nyid kyang tha snyad du med pa gsal snang tsam las gzhan ci yod/__blo de'i don dam pa'i ngo bo ni chos kyi dbyings nyid de shes bya dang shes pa tha dad pa'i blo gnyis snang gis bsam pa'i yul las 'das kyang yul dang yul can gnyis med so so rang rig pa'i ye shes kyis rten med par spros bral rjen pa'i tshul du mthong ba'i lta ba dang*/__de ltar rtogs pa'i rnal 'byor pas sems nyid nang gi nam mkha' mi rtog rang gsal mtha' bral chen po nyams su blangs pas goms 'dris rnal du 'byor pa'am gsal brtan thob par bya ba bsgom pa dang*/__yul sems bzang ngan gyi rjes su mi 'brang zhing thams cad rig pa'i rgyan du shar ba la ngang gis dbang bsgyur ba'i spyod pa rnams nyin zhag bdun tsam la nyin mtshan bar med du btson na'ang zhi lhag gi rnal 'byor dus gcig la 'grub ste lhar snang gis dbyings kyi ngo bo mi sgrib pa dang*/__dbyings la mnyam par bzhag pa las lhar snang ma bsgom na yang ngang gis shar ba 'byung zhing rlung bcu zin pa'i rtags rnams kyang ngang gis 'char la bla mas rjes su 'dzin cing byin gyis brlab pa 'byung bas na the tshom med pa'i dad mos rtse gcig gis bsgom par bya'o/__/de ltar thun mong dang khyad par can gyi sngon 'gro zab mos nyams len gyi gzhi srog rkang tshug par byas te de nas 'od gsal theg mchog rgyal po'i dngos gzhi'i nyams len la 'jug dgos pa yin no/__/gnyis pa gdams pa zab mo'i dngos gzhi la gnyis/__mos gus bla ma'i bskyed rim dang*/__thun min snying po'i rdzogs rim mo/__/dang po ni/__dben cing nyams dga'i sgrub gnas su sman rag gtor mchod dang tshogs rdzas srung ma'i mchod gtor rang 'byor dang mthun par bsham/__mtshams dam du bcad la sngon 'gro'i rgyud sbyong skabs dang bstun te ci rigs btang*/__de rjes srod thun nas 'jug tshe brgyud 'debs dang don phrin gyi skyabs sems tshogs bsags grub nas rang nyid dpal siM he shwa ra rta mchog he ru ka dmar po skra gseb rta gdong ljang zhur dang sku la khro chas can gri thod 'dzin pa'i rnam par bzhengs la 'byung gtor spy-i 'gre btang*/__rta mgrin bsgom pa dang 'byung gtor bcas nyin dang po 'dis chog__/rgyal chen tho 'dzug mi dgos/__don phrin mtshams gcod nas bzung bstod pa bcas grub nas bla ma'i gsol 'debs dang sngags nan tan dbang blang ba bcas bya/__de nas rang gi lha snang gtsor 'don gyi tshul du legs par bsgom/__bla sku gnyis las bsgom bya mi mang bas stabs shin tu bde ba yin/__sngags don gsal 'debs kyis tshigs bcad don phrin ltar brjod cing bsam la rtsa ba'i sngags dang rdor bzlas spro bsdus dmigs pa dang bcas/__rtsa sngags bzla ba rnams rim bzhin nan tan gyis 'bad mthar dbyangs gsal dang yig brgya rten 'brel snying po rnams brjod/__mthar bla ma rang dang bcas la dmigs pa'i mchod bstod don phrin ltar bya/__de nas bshags rgyud ltar brjod med don bshags btang*/__tshogs mchod dang srung ma'i gsol phrin dkyus ltar bya/__dngos grub len pa tshar nyin ma gtogs mi dgos/__slar yang mchod bstod sngar ltar dang nong bshags bya/__de nas bla ma la dbang don du gsol ba lan gsum sogs btab nas dbang blang ba'i dmigs pa bya zhing thugs yid bsre la mnyam par bzhag__/de nas rang nyid kyi lha snang bsdu ldang sngar bshad pa ltar dang bsngo smon shis brjod dkyus ltar bya/__rdzogs rim mdor bsdus bsgom nas nyal ba'i rnal 'byor la 'jug__/thor thun la sngon 'gro'i ngag 'don gyi rjes 'brel du bdag bskyed kyi dmigs zlas sogs sngar bshad pa ltar btang*/__thun drug spro na snga thun phyi thun nyin mtshan gyi gung gi thun re bya/__thun bzhi bde na gung thun gnyis mi dgos/__gang ltar yang thor thun ma gtogs pa la don phrin dkyus ltar gyi bzlas pa'i mthar mchod bsto nongs bshags bla ma la dbang don du gsol 'debs nas bzung shis brjod bcas kha tshang re bya/__tshogs dang srung ma'i gsol mchod nyin rer tshar res chog pas phyi thun nam srod thun dang 'brel bar btang*/__bzlas grangs nyar nyor sogs mtshams ltar snang tsam re yun ring por byas kyang bskyed rdzogs ma gsal na rang blo sun cing chos la yid chad sogs chos min gyi rgyur 'gro nyan yod pas sems gsal dag re gal che/__legs par 'bad na zhag nyer gcig gis rtags thon 'byung*/__tshar nyin sngar bsham pa'i gtor ma de gtor rdzas kyis gsos te thor thun la don phrin btang*/__bzlas pa'i mthar mchod bstod nongs bshags bla ma la dbang don du gsol 'debs dbang blang zhing smin mtshams kyi thig ler bstim pa bcas bya/__de nas skad cig gis gtor ma lce btsun dngos su bsgom la skyabs gnas kun 'dus kyi ngo bor blo thag bcad de dngos grub blang ba'i tshig brjod mthar rang gi spyi bor blang zhing gnas gsum du gtug gtor rdzas cung zad rol pas gtor lha lce btsun nyid rang gi snying dbus su thim pas rang nyid lam snang ba bzhi'i bsgrod pa skad cig gis mthar phyin te 'pho chen rdo rje'i sku ru sangs rgyas pa lce btsun dngos dang dbyer med pa'i dngos grub chen po thob pa yin snyam du nges shes bskyed la mnyam par bzhag__/'dir bsdu ldang mi dgos pas bsngo smon shis brjod dkyus ltar byas la thor thun grol/__snga thun la sngon 'gro'i ngag 'don ltar gzhan rnams gnad bsdus re dang kha skong sbyin sreg gi mal du sgrib sbyong tshogs bsags gnyis rlung sbyor bcas gnad smin re bya/__phyi thun skabs su tshogs gtor ci 'byor bsham nas don phrin gyi bzlas pa gnad bsdus dang*/__dbyangs gsal yig brgya rten snying rnams lan bdun re tsam gyi mthar mchod bstod bya/__brjod med don bshags btang*/__tshogs mchod brgya rtsa sogs dang*/__srung ma'i gsol mchod nan tan mthar mchod bstod nongs bshags nas bkra shis bar dang gzhan yang bsngo smon shis brjod gang rgyas btang*/__de nas mtshams rim bzhin grol bar bya'o/__/rje'i gsung bshad gnang dus don phrin gyi thun bcad lugs rnams legs par ma zin nas slar zhu dgos byung ba sku mdun du tho bkod byas pa yin no/__/gnyis pa la gsum/__dbang po rab tshe 'dir grol byed/__dbang po 'bring bar dor grol byed/__dbang po tha ma rang bzhin sprul sku'i zhing du grol byed kyi gdams ngag go__/'dir dbang po ni/__zab lam 'di'i khog snying lhun grub thod rgal gyi nyams len yin pas mig dbang skyon med zhig dgos mod/__dad brtson dran pa ting 'dzin shes rab rnams yin pa gzhir bcas khyad par du snying po'i chos dang de ston pa'i bla ma la yid ches mi ldog pa'i dad mos rab 'bring tha ma'i sgo nas dbye ba yin/__dbang po rab tshe 'dir grol byed la gnyis/__sngon 'gro 'khrul gzhi rtsad nas gcod thabs/__dngos gzhi 'khrul pa rang grol du gtong thabs dang de'i rjes 'brel du 'khrul snang ye shes su rang 'char thabs so/__/dang po ni/__'khrul gzhi zhes pa lam bden kyis spang bya rgyu kun 'byung bden pa dang 'bras bu sdug bden gyi gzhi dang rtsa bar gyur pa'i kun rtog phyin ci log pa zhig ste/__gnas lugs spros pa'i mtshan ma thams cad dang bral ba ye nas yin pa la/__de ltar ma shes nas mtshan mar 'dzin pa'i blo ngan rnams yin la de yang yar thog gi mtha' mi mngon pa'i dus nas 'gro rgyud la glo bur du byung zhing rgyun chags ltar gnas pa dang lam bden gyis ma spang na rang ldog tu nam yang 'gro mi srid pa'i mtha' med pa lta bu 'di la rang cag sems can rnams kyi blo ngan goms yun shin tu ring por song ba'i dbang gis bden bden yin yin ltar 'dug mod/__blo ngan 'di yang don dam spros bral gyi rang gnas las 'das te gzhan thag ring ga shed na sleb tshar bas da ni phyir lam gtan nas mi rnyed pa'am gal te lam rnyed na 'ang yun ring po'i bar du sngar gyi rang gnas der sleb thabs gtan nas med pa lta bu'i rgyang chad can de 'dra ni ga la yin/__man ngag gi thabs zab mo sna re tsam gyis legs par zin pa na ngan goms tshab po che yun ring song song ba'i rtog ngan de skad cig yud tsam gyis rang gnas spros bral bde ba chen por skyel ba las sla ste/__dper na lag pa'i lto rgyab bsgyur ba'am gnyid sad pa ltar 'gro ba yin pas na dpal dus kyi 'khor lo las mtshams med lnga tshe 'dir byas pa'i sdig can yang tshe 'di nyid la rdzogs pa'i sangs rgyas thob par byed pa'i thabs ces dang rdzogs chen gyi gzhung nas las la bzang ngan dang dbang po la rno brtul med gsungs pa'ang gsang sngags thabs kyi che ba don la gnas pa nyid yin gyi/__log lta che na nyes dmigs med/__dad pa che na phan yon med/__zer ba lta bu'i chos log de 'dra ni yin ga la srid/__da lta'i dus ngan pa 'di la grub thob rtogs ldan sgom chen pa zer ba ni mang che zhad re 'dug na'ang*/__phal che bas rnam rtog mi rtag nas yal song ba de ngo shes na sems ngo shes rlom byed/__yang rnam rtog shar tshe 'khrul pa dang ci ma shar na de'i tshe grol ba yin rlom byed/__thang re rnam rtog bzang ngan thams cad dgra ru bzung nas dge sems dang bcas pa ci thub thub re bkag__/thang re rnam rtog thams cad yon tan can sha stag tu bzung nas sdig sems la che brjod byed cing bzang ngan thams cad chos sku'i yo lang yin rlom gyis spyod pa 'chol nyog re la 'bad/__stong nyid rtogs pa'i lta sgom ci yod tshad thams cad las 'bras bslu med kyi dgra gshed du phab pa sogs bstan pa'i zhabs 'dren chen po dang dus ngan tha ma'i sems can rnams la ro thog rdog brdzis kyi las ka tshab chen sems 'dre slong byed kyi 'khor lo bskor mkhan re ma gtog sems ngo shes mkhan dang bsgom mkhan phar bskyur/__'khrul pa zer ba de ci 'dra yin rtsad chod mkhan yang nyin skar bas dkon pa 'dra'o/__/mdor na skye 'gro'i rgyud kyi shes pa'i cha tsam la thog mtha' gnyis ka med pas ma tshad de bslad byed kyi dri ma yang shes cha nyid dang tha mi dad pa'i rnam pas sngar nas mnyam por 'ong ba'i bdud zer ba ltar mnyam 'grogs kyi tshul du byung ba zhig yin pas na bdag nyid gcig pa dang lhan skyes kyi ma rig pa sogs su grags mod don la nam yang 'du 'bral med pa'i lhan skyes kyi bde chen ltar dus rtag tu gnyug mar gnas pa'i 'khrul sems zhig su la'ang med pas de'i gzhi rtsa lhag med kun rdzob tu'ang slar gtan nas mi skye bar mtha' chod nges zhig bcad nus shing*/__de ltar gcod byed ni de'i dngos gnyen gyi lam bden khyad 'phags zhig ma gtogs ci yod/__lam bden de gang yin snyam na shes rab phul du byung ba zhig yin pas na thos bsam bsgom pa las byung ba'i zab rgyas kyi shes rab bde myur du skye thabs su lhag pa'i lha bsnyen cing sgrub pa sogs gcig las gcig lhag lta bu mtha' yas pa zhig bzhugs pa las skabs 'dir ni sems nyid kyi rang ngo phyogs re tsam mthong zhing gom 'dris byas na rtsal gyi shes rab rtsol med du 'byung la de gzhan skyon brtag byed sogs bdud kyi 'jug phyogs re'i dbang du mi gtong bar gnad du chun na lam gyi gegs the tshom sogs blo yi mun pa sel zhing lam yang dag pa re ma nor bar shes par 'gyur bas thog ma nyid nas sems nyid rang ngo shes thabs la 'bad pa yin/__'on kyang rlung sems rags pas rang ngor kheb dus su stong 'ding gsal 'ding mang po btang na yang sems nyid ji bzhin pa mthong dka' ba dper na nyi ma mthong 'dod pa'i mis bar snang sprin 'thug pos kheb dus gnam ltas mang po byas pa dang 'dra bas rlung sems rags pa'i rgyu ba mtshams bcad thabs rgyal ba'i bka' dang mthun pa'i man ngag myong bas grub pa re la brten dgos pa gzhir bcas/__de 'dra'i man ngag phun sum tshogs pa gsang sngags bla med lugs kyi bskyed rim tshad ldan rgyas bsdus ci rigs la brten pa'i rdzogs rim zab mos rlung dbu mar zhugs gnas thim gsum gyi mthar 'od gsal mngon du byed lugs khyad du 'phags pa du ma zhig bzhugs pa rnams 'dir byed mi dgos par 'khrul rtog thad kar gcod thabs kyi man ngag shin tu bya sla zhing chod che ba yod la de don tshul bzhin du nyams su blang na 'khrul rtog las rlung dang bcas pa rang 'gag tu 'gro zhing de'i tshe ngos zin rung ma zin rung ma 'khrul pa'i sems nyid rjen la bud na ma gtogs 'gro sa med pas thabs de'i sgor gyur pa 'khrul gzhi rtsad gcod kyi lam gnad 'di la bzhi/__lus sbyong*/__ngag sbyong*/__sems sbyong*/__de thams cad la gces pa gnad do/__/'dir spros med dbang gi sngon 'gro las byung ba'i dbang don nyams len byed pa skabs su babs pas sa phyogs shin tu dben par phyin te gzhi bdag la gtor skyems btang nas 'gal rkyen sel zhing mthun rkyen sbyor ba'i phrin bcol bya/__bla med byang chub kyi sems kyi kun slong dang rtsa ba'i bla ma la gsol ba shugs drag tu btab cing thugs yid bsres te har gyis langs la rdo rje'i 'dug stangs dang bcas rang lus rdo rje sngon po rtse lnga pa ye shes kyi me rab tu 'bar zhing 'khyil ba las me stag tsha tsha 'phrau bas cis kyang mi tshugs par yun thung tsam bsgom/__slar lus drang por 'dug la ngag tu hU~M zhes brjod pa tsam gyis snang srid thams cad hU~M yig mthing nag ye shes kyi 'od lnga 'phro zhing me 'bar ba sha stag tu gyur te de rnams kyi rang sgra 'brug stong dus gcig la ldir ba tsam sgrogs par bsgom la hU~M dbyangs drag po thol byung gi tshul du dar gcig brjod/__de nas sems kyi dran rtog bzang ngan thams cad bcad de mi rtog pa'i ngang du mnyam par 'jog__/phaT sgra drag po brjod pas de las sad pa na 'gro drug gi lus kyi rnam 'gyur ngag gi smra brjod/__sems kyi byung tshor bde sdug bar ma thams cad blos ci khyud re wal gyis gsal btab/__yid ngor gsal bdo ba na phaT sgra byas te 'phro bcad la rnam pa yid byed kyi spros pa dang bral ba'i ngang du ngal bso/__yang de rnams bskyar/__bar skabs su 'gro drug lus ngag gi rnam 'gyur shug 'byung re drag tu byas na'ang chog__/g.yeng rkyen nyar nyor dang rtsed mtshar lta bu mi bya/__de ltar nyin gcig gam gsum tsam sngon du btang nas slar sgo gsum sbyong thabs dngos la 'jug dgos/__dang po ni/__lus bzang ngan gang las kyang ma skyes mod gson dus snying dbus sogs lus gnas kyi rig pa 'od gsal nyid rang lus lam gnad kyis rab tu gcun na mngon pas rdo rje'i 'khrul 'khor bya ba la gnas khang sogs stabs gang bder lus 'gyel kyang rma sogs skyon mi 'byung ba'i stan la 'khod de lus 'khor ba la mi 'jug cing sangs rgyas kyi sku rdo rje thob phyir lam 'dir 'bad do snyam du dung nger bsgom/__bla ma la gsol ba btab cing thugs yid bsre/__de nas lang la rkang rting gnyis sbyar rkang sor cung bkyed pa stan la btsug pus mo phyir bkyed/__sked pa dang mgo rke drang por bsrang gru mo brgyang nas spyi bor ma reg tsam na thal mo khong stong med par sbyar/__mig gnad ha re 'jog__/shes pa rang sor bzhag__/shed rim gyis phyung la lus kyi cha dang lto ba'i rlung bcas shugs kyis gcun cing 'dar chung thon par bya/__mgo yu 'khor ba dang dran pa 'gag snyam byung na rig pa de'i rjes su mi 'brang bar hur phyung*/__tshugs mi thub par 'gyel na der bor la gtad med kyi ngang du ngal bso/__ngal dub kyis thang chad kyang mi skyo bar snying rus kyis 'bad/__rlung sems kyi rgyu ba bcad thabs yin pas dus rgyun dmigs rnam mang po mi dgos/__srod dus sogs skabs rer lus rdo rje rtse lnga sngon po ye shes kyi 'od lnga dang me 'bar ba bsgom na gnas skabs su bgegs kyis mi tshug cing rig rtsal 'bar ba dang mthar thug chos sku 'gyur med ye shes lnga ldan thob pa'i dgos pa yod/__yang rdo rje sngon po rtse gsum pa'-i yar gyi dbus ra chos sku g.yas g.yon longs sprul te gzugs sku/__mar gyi dbus ra ngo bo stong pa/__g.yas rang bzhin gsal ba/__g.yon thugs rje kun khyab ste ye shes gsum/__rdo rje'i sked pa gcig dril ni gzhir gnas kyi ye shes gsum po 'bras bu sku gsum gyi ngo bo rdzogs byed lam bden gyi rig pa so mas khregs chod dang thod rgal gyi lam gnad gcig dril dus gcig la nyams 'og tu btsud nus pa'i mtshon don shes pas 'khor 'das rgyang chad phyogs 'dzin gyi sgrog las grol ba'i dgos pa yod/__de gnyis gang bsgom kyang lus sems lhag med rdo rje der hril gyis song bar bsam dgos/__tshig phyi ma'i phyi ma ltar mi 'gyur rdo rje'i 'khrul 'khor dgos gnad lag len dang bcas pa khrid yig ye shes bla ma las shin tu gsal bas de ltar legs par byed dgos/__rten 'brel thun mong ma yin pa'i lus sbyong 'di ni phyag bskor gar dang phyag rgya rtsa rlung gi 'khrul 'khor lta bu byed rgyu dgos rgyu che la don 'bras chung ba zhig gtan nas min te/__rlung sems 'gag cing sems nyid 'od gsal ngos zin pa dang lus zag med 'od skur grol ba'i nye rgyu khyad par can yin no/__/gnyis pa ni/__stan bde ba la drang por 'dug nas ngag 'khor ba las ldog cing sangs rgyas kyi gsung rdo rje 'grub phyir lam 'di la 'jug go snyam du dung nger bsgom/__bla ma la mos gus drag pos thugs yid bsre/__de nas rang bla ma'i ngo bor gnas pa'i thugs kar hU~M sngon phra mo 'od lnga 'bar ba gzhir gnas ye shes kyi ngo bor gsal btab/__shes pa khod snyoms dus hU~M sgra che chung spel ma/__nyob na je drags ngar ldan/__rgod na je chung je dal khams dang sbyar ba'i hU~M dbyangs kyis bskul te/__hU~M de 'dra mang po byung ba sna bug g.yas nas phyir thon te nye 'khor gyi yo byad dang skye 'gro gnas khang sogs la phog pa tsam gyis thams cad hU~M du hril gyis song nas rang sgra 'u ru ru sgrogs par bsgom/__de nas hU~M yig blos khyud tshad spro zhing des snod bcud blos khyud tshad hU~M gi gzugs sgra 'ba' zhig tu bsgyur/__de dag rang sgra bcas te tshur 'dus pa/__la la sna bug g.yon nas lus kyi nang du zhugs/__la la lus kyi phyi nas tshur thim pas rang lus skra rtse tsam yang ma lus pa dang rlung sems bcas hU~M gi gzugs sgra kho nar gyur/__de nas hU~M rnams rtsa ba'i hU~M la bsdu/__de yang dbyings su bsdus te ngal bso/__rjes shes gang snang hU~M du 'char snyam ma byung bar du bya/__des sngar zhen gyi dngos 'dzin gang yang ma chod pa'am gal te hU~M snang la zhen na rang tha mal pa'i snying ga nas hU~M mthing me 'bar ba che chung nges med mang po 'phros pa kun kyang gnam lcags rdo rje'i thog chen las kyang stobs shugs che bar gyur pa de rnams kyis rang bzhin gyi lus rlung sems bag chag dang bcas pa lhag med du gtor phyi snod thams cad kyang de bzhin du gtor mthar hU~M rnams kyang rang sar yal bas chos thams cad stong chen chos kyi dbyings dang ro gcig tu gyur par bsam la rig pa 'dzin med kyi ngang du mnyam par bzhag__/rjes snang thams cad stong seng gi rnam pa'i dum chod khrol khrol gyi nyams ma byung gi bar du 'bad dgos/__thun min gyi ngag sbyong 'di yang kha 'don bzlas brjod gzhan dang rdor bzlas bum chen sogs rlung sbyor gzhan las myur ba'i yul sems kyi 'khri ba btsan thabs su gcod byed mchog tu gyur pa yin pas lus sems na bun ltar dengs pa'i nye rgyu yin par shes dgos so/__/gsum pa ni/__stan bde ba la lus drang por 'khod de yid 'khor ba las ldog nas sangs rgyas kyi thugs rdo rje 'grub par bya phyir sems nyid gtan la 'bebs par bgyi'o snyam du dung nger bsgom/__bla ma la mos gus gdung shugs drag pos gsol ba rtse gcig tu btab cing thugs yid bsre/__lus sems khong lhod pa'i ngang nas yid gzhan du ma yengs par 'di ltar bsam dgos te/__so so'i rgyu rkyen sna tshogs pa glo bur du tshogs shing phan tshun rten cing 'brel pa tsam gyi rkyen dbang gis 'khor 'das ky-i chos ngan pa dang bzang po'i bye brag mtha' klas pa'i rgyu dang 'bras bu'i tshul du tha dad rnam pa sna tshogs ji ltar snang zhing srid pa thams cad blos bkod pa'am blos bzhag pa tsam ma gtogs don la grub pa ni cung zad kyang med/__blo de yang blos btags tsam las gang yang med bzhin du yod yod ltar gsal zhing ma 'dres pa'i tshul gyis bzang ngan bar ma gang rung gi rnam rtog sngar med re gsar du byung zhing gnas la 'gags 'gro ba dang yang gsar pa re skye ba sogs rgyun mi chad pa 'di dang po ji ltar byung snyam na/__yul nye bar gnas shing dbang po skyon med pa dang shes pa 'char rung go ma 'gags tsam tshogs pa'i rkyen dbang gis mngon sum du byung na'ang med pa gsal snang sgyu ma'i mi sogs dang 'dra ba ma gtogs rgyu kher tshug can 'di kho nas byung ngo zhes pa'i khungs gtan nas mi srid pas rgyus stong*/__bar du ji ltar gnas snyam na/__med snang tsam po de yun ring thung ci tsam gnas pa ltar snang yang rung sgyu ma'i mi sogs kyi rnam 'gyur dang 'dra ba ma gtogs don la gang yang mi gnas pas rnam rtog rang gi ngo bos stong*/__tha ma ji ltar 'gro bar 'dug snyam na de ltar ma skyes shing mi gnas pa'i kun rtog glo bur ba de 'jig rkyen gyi dbang gis 'gro ba ltar snang na'ang sgyu ma'i rta glang sogs yal zin pa de slar mi skye ba ltar rigs 'dra phyi ma'i kun rtog rnams sngar yal tshar ba de'i rang 'bras gtan nas min pas 'bras bus stong*/__des na rgyu 'bras ngo bo gsum gyis stong pa'i snang tsam kun rdzob kyi sems skye 'gags gnas gsum mam byung gnas 'gro gsum gyi rnam pa ci tsam zhig shar na'ang shar ba'i dus nyid nas don dam par 'pho 'gyur de 'dra gdod nas yod ma myong ba'i tshul ngo shes pa la sems nyid rtogs zhes bya/__de la ci tsam goms pa de tsam du chos pa rnams kyi dgag bya rmongs pa dang chags sdangs sogs rtogs ngan dri ma can rnams dag cing bsgrub bya dad rtson snying rje shes rab sogs dri ma med pa rnams gong nas gong 'phel gyi tshul du ngang gis 'byung ba mi bslu bas don dam tshul bzhin du shes na des kun rdzob kyi rten 'brel khyad gsod mi mdzad par ma zad spang blang ma nor ba'i lag len tshul bzhin du thub nges re yin dgos pas na sems sbyong gi man ngag 'di sbyang brtson gzhan las ches zab pa rnam grol thar pa dang thams cad mkhyen pa'i lam bzang ma nor ba'i gzhung shing chen po yin pa dang rdzogs pa chen po'i rig pa ka dag nyid mngon du byed thabs med du mi rung ba lta bu'ang yin pas na chos 'di las phyi rol du ma gyur pa'i skal ldan rnams kyis gus pa chen pos nyams su blang bar bya'o/__/bzhi pa ni/__sems nyid don dam pa'i gnas lugs gtan la 'bebs pa'i skabs 'dir ni spang bya'i kun rtog zhen yul dang bcas pa gzhi med rtsa bral du gtong dgos pas ma tshad sgo gsum gyi sbyang pa byas ma thag pas mtshon pa'i bskyed rdzogs sogs zag bcas dang zag med kyi lam gang la brtson pa mtha' dag gnas lugs chos kyi dbyings su gang yang ma grub pas cir yang mi dmigs pa'i ngang du la bzla ba dang*/__de ltar ma rtogs te 'khrul pa'i sems can gyi rgyud rnam par grol ba'i thabs su gyur pa snang tshul sgyu ma tsam gyi spang gnyen dgag sgrub kyi bya byed thams cad ngo mtshar sgyu ma'i rol rtsed bzhin du snang cha rdul tsam ma 'gag pa'i dus nyid nas chos kyi dbyings rnam par dag cing 'od gsal ba'i rol gar tsam du ro snyoms shes shing dran rig chos kyi dbyings las mi g.yo ba'i btsan sa rang babs kyi tshul du 'dzin pa ni rdzogs pa chen po'i lam gnad mthar thug pa'i srog rtsa lta bu yin pas na grub mtha' gzhan dang mi bsre bar rang lam tshul bzhin du nyams su blang ba la sgo kun nas 'bad par bya'o/__/de ltar lus ngag sems sbyong 'dra mi 'dra mang po byed mkhan gyi shes pa kho rang gzhi med rtsa bral du thag chod pa zhig ma byung gi bar du 'bad dgos/__thun gyi mjug rnams su bsngo smon rnam par dag pa re bya ba dang thun mtshams su'ang so so'i nyams len gyi rtsis zin pa re la dran shes bag yod brtan po zol med re rgyun du bslab par bya'o/__/gnyis pa la gnyis lam dngos dang yan lag go__/dang po la'ang gnyis/__ngo bo ka dag gi nyams len dang rang snang lhun grub kyi nyams len no/__/de yang rdzogs chen gyi dngos gzhi'i nyams len rnams ma bcos rig pa rjen pa kho na lam du byed pa yin la/__man ngag sde yang gsang bla med kyi skabs 'dir gdod nas 'khrul ma myong bas lam gyis gsar du grol ba gang yang byar med ye grol gyi rig pa'i ngo bo la mnyam par bzhag pa'i ngang du sgrib byed kyi dri ma glo bur bas bslad nas 'khrul cha can du song ba'i rlung sems rang grol du gtong thabs khregs chod kyi lam dang*/__rig pa'i ngo bo dang 'bral med rjes su 'brel ba'i rang snang dri ma med pa nyid mngon du byed thabs thod rgal gyi lam gnyis gyi phyi ma ni gsang skor man chod kyis ji bzhin par gtan la 'bebs mi nus pa'i khyad chos yang yin la de'i dang po ka dag gi nyams len la gsum/__lta bas thag bcad pa/__bsgom pas nyams su blang ba spyod pas bog dbyung ba'o/__/dang po ni/__sems kyi gsang ba rig pa nyid sus kyang ma bcos par ye nas gzhi med rtsa bral dngos mtshan thams cad las rab tu 'das pa'i spros bral klong yangs chen po yin pas na ngo bo stong pa zhes bya/__rig pa'i rang bzhin ni kun gzhi zhes kun gzhi'i rnam shes sogs glo bur ba'i bag chag bzang ngan sna tshogs pa'i rten du grags pa lta bu'am yid rtog med dang sgo lnga'i rnam shes ltar rtog med lung ma bstan gyi shes pa gzhan las ches 'phags pa rtog sgrib kyi dri ma kun dang ye nas bral ba'i rang gsal 'pho 'gyur med pa nyid mngon du gyur ma thag pa nas ma bcos gdod ma'i ngo bo nang gsal tshul gyi mkhyen cha rang chas lhun gyis grub pa'i bdag nyid chen po yin pas na rang bzhin gsal ba zhes bya/__stong gsal gnyis phan tshun rten dang brten pa'i tshul du gnas pa tsam ma yin par ye nas dbyer med ro gcig pa'i ngo bo las g.yo ba phra mo tsam zhig nam yang yod mi srid pa'i khyab cing rtag pa dam pa rig stong zung 'jug chen po'i rang rtsal phyir gsal gyi ye shes rgya chad phyogs lhung kun bral rtogs na sangs rgyas dang ma rtogs na sems can gyi rten dang g.yo ba'i chos thams cad kyi rnam pa 'char rung ma 'gags shing gshis la gang yang mi gnas pa'i tshul gyis ye nas kun tu khyab cing yongs su brdal ba la thugs rje kun khyab ces bya/__rtsal snang gi chos thams cad tha dad ma 'dres pa'i tshul can yin mod/__de dag kyang gnas lugs rig stong zung 'jug nyid las mi gzhan pas rnam gsum dbyer med chen po zhes bya/__de yang bden 'dzin bshigs shul gyi stong pa nyid dang*/__de shes byed kyi blo gsal ba dang*/__snga ma yul dang phyi ma yul can tsam gyi zung 'brel lta bu khol bu ba ma yin la/__rig pa spros bral cis kyang mi phyed pa'i ngo bo ye stong dang*/__rang bzhin sus kyang ma bkod pa'i blo bral rang byung rang gsal dang*/__snga ma yul dang phyi ma yul can lta bu'i tha dad dbyer med ye nas yin pa ma gtogs sangs rgyas sems can sus kyang de ltar stong thabs gsal thabs de gnyis kha sbyor byed thabs rdul tsam yang byed mi dgos pa'i ma bcos zung 'jug 'pho 'gyur med pa de la bden 'dzin gyi blos lta ci bden med tsam 'dzin byed lta bu'i blo glo bur ba gang gis kyang ngo lta byed mi nus shing byed kyang ci dgos pas/__rtogs bya rtogs byed kyi mtshan ma rdul tsam yang med na'ang rang thog tu ngo 'phrod cing yin nam min snyam pa'i rtog dpyod sogs skyon thams cad kyang rang thog der ngang gis chod nas yid gnyis the tshom gyi gnas med pa zhig ma byung na ka dag rtog pa'i ming brtags pa tsam re la ni don ci zhig yod pas rab ci bzhin du rtogs pa dang*/__'bring rang thog tu nyams myong bzang po thon pa dang*/__tha na'ang blos byas mtshan ma'i grub mtha' gzhan gang dang yang mi 'dra ba'i gnad gsang phu thag chod pa re go ba ni med du mi rung ba yin la/__de yang bla slob tshad ldan 'dzom na dbang dus sogs zhar byung ngo 'phrod pa yang sngar nas da bar du byung zhing*/__de tsam min na'ang man ngag gi dum bu 'dis bstan pa'i sngon 'gro'i thog ma nas da bar du bshad cing nyan pa de rnams kha tsam min par nyams su blang na thabs des los rtogs/__khyad par du blo sbyong gzhan yun ring por byas pa bas bla ma'i mos gus bzang po thun chung gcig gi dga' bas blo sna mi mang bar sems nyid rtogs thabs bla ma'i mos gus gcig chog yin thag bcad de dus dang rnam pa kun tu brtson na khe shin tu che zhing nyes 'gal rdul tsam yang med pa yin gyi gzhan lha kha 'dre kha dang pho kha mo rkub sogs la re ba byas na cir 'gyur mi shes/__ltas dang lta rgyu gang yang med ces kha la khyer na chos dang gang zag ya bral bas rtogs rgyu yang ci yod/__de 'dra'i mi rnams chos dang rgyab 'gal du 'gro nges yin/__de bas na sems nyid tshul bzhin du rtogs pa'i smon lam bzang po re tshun chad la ji srid 'tsho ba'i bar du 'bad par bya'o/__/gnyis pa ni rig ngo dang po shes pa nas nang gsal gdod ma'i dbyings su sangs ma rgyas kyi bar du bsam sbyor gzhan gyis rig pa bcos bslad mi byed par bsgom pa gnad du 'gro ba re la nyin mtshan khor yug tu bslab dgos pas 'gro grangs mang ba sogs lus kyi spyod lam 'gyur ldog sna tshogs mi byed par dper na ri bo ltar 'dug tshug brtan po re zin pa la brten nas bsgom gyi gzhi bzung phyir lus bag pheb par byas la drang por 'dug cing mig thad kar ha rer bzhag__/smra ba 'phro bcad la rig pa g.yo med du gnas dus rlung rang babs rgya yan du 'jog__/bying nyams kyis rig pa bslad snyam byung na rlung kha nas phyir 'dzin gyis ar la gtad/__rgod nyams shar dus rlung bum pa can 'jam po bzung nas nang du rlung sems ar la gtad/__ar gtad ces pa rlung sems dbyings su gcun pa la zer/__skabs 'dir rlung sems rig thog tu gcun byas na chog__/rlung sems 'gros gcig pas rlung rgod na sems mtsho rlabs ltar g.yo zhing 'khrug__/rlung 'jam dus rgya mtsho rlabs bral ltar sems mi 'phro/__lus sems g.yo byed rlung yin pas rlung gnad gal che/__/cog bzhag dang pos gzhi ma zin par bsgul bskyod bzang ngan ci tsam shor ba de snyed du rlung gi rtsal shugs 'phel bas cog bzhag bar ma la gnod/__rlung gis lus sems dkrug pa des rig ngo sgrib nas rtogs su mi ster zhing bsgom yang mi bde bas cog bzhag phyi ma la gnod/__des na sgo gsum rtsol med du 'jog pa gal che/__de las kyang cog bzhag phyi ma 'di'i srog shing yin la de yang dbyings rig dbyer med rang gsal 'pho 'gyur dang bral ba ye nas yin lugs go myong rtogs gsum gang rung gi sgo nas ngo shes pa de blo yi bcos bslad thams cad dang bral ba'i rang babs sor bzhag gi ngang bsgom kho na la nyams len gyi mthil bcol zhing gzhi rtsa tshug nges pa zhig bya'o/__/rig pa ma bcos so ma'i rang tshugs thun chung gcig zin na'ang de'i dus su rtsal snang bzang ngan dang phra rag yun ring thung gi rnam pa ci ltar shar na yang de rnams la zhen 'dzin lta ci rtog dpyod tsam yang mi byed par gtad med rgya yan tu bor na re dogs bdag 'dzin skye ba'i gnas med cing rten med par thams cad rang sar dag pa las 'das mi srid pas grol lugs kyi rtsis gdab gang yang ma byas kyang chog go__/rig pa'i rtsal shugs rdzogs nas gsal brtan gong nas gong 'phel gyi tshul du thob cing phyir mi ldog pa'i brtan pa mthar phyin pa 'byung ba'i slad du cog bzhag gsum dang skad cig kyang mi 'bral bar bsgom na rig pa la gsal brtan ci tsam thob pa de tsam du rig rtsal gyi sems 'khrul chas bslad pa thams cad rtsol med du dag pa dang chabs gcig tu las rlung rang dag tu 'gro ba dang dag pa'i rlung sems stobs su gyur cing gdos bcas kyi rtsa mdud sogs lus kyi zag pa rnams kyang rim pa bzhin du grol zhing yongs su dag pa na lus la gnod pas mi tshug pa 'byung ba sogs mdor na snang sems thams cad rig pa'i 'og tu ngang gis tshud pas ci byas tshad lam yang dag par longs shing rang snang rang dbang du 'byor ba zhig ma 'bad bzhin du 'byung ba yin no/__/yang thugs rje kun khyab dang rnam gsum dbyer med yin pa'i rgyu mtshan gyis rtsal snang shar ba la phyir bltas te de'i gzhi rtsa bcad pa sogs kyis lam du byas na'ang khyad med snyam na de'ang rtsa ba bor nas yal ga tshol ba glang po nang na yod pa ma shes pa'am shes kyang des ma chog par glang rjes phar phar bcad na der rnyed rgyu zhig yod du re ba ltar lam gyi dngos gzhi nyid las je ring du 'gro'o/__/mdor na rig pa cog bzhag kho nas sa ma zin tshe khregs chod rang lam gyi dngos gzhi sems gzhan su zhig gis zin gal te yid dpyod dang*/__rlung bcing ba dang zhu bde'i thabs kyis zin pa'i blo res stong pa nyid lam du byas na 'dra 'dra yin snyam na rdzogs chen yang lam gzhan dang ci zhig khyad pas des ni rig pa cog bzhag dang mnyam pa lta ci phyogs su yang mi nye/__der ma zad rig pa rtsal thog tu g.yo ba na rtsal gyi rlung sems yang so so'i yul thog tu phyir 'byams te bag chags re'i ngan gshis su shor zhing de dang der zhen pas nyon mongs par 'gyur ba las ci yod/__rtsal gyi shes cha res rig pa'-i ngo bo la dpyad pa'i spu ris phyes na des kyang rig pa'i rang so ma bcos pa ji bzhin du mi zin pas rtogs bral gyi rig pa so ma nyid cog ger 'jog par bya'o/__/rig pa dang sems gnas kyi nyams gang yin kyang rung rlung kha re ldang lugs kyis bde gsal mi rtog dang chags sdang shugs drag sogs shes nyams bzang ngan dang*/__rtags bcu'i stong gzugs dang lha snang 'dre snang sogs snang nyams bzang ngan mang po shar ba dang mi shar ba'i gang zag los yod pas gal te shar tshe de'i rjes bcad na byis pa'i 'ja' rjes 'ded dus rdog sna rdo dang thug nas 'gyel ba ltar chag sgo re ma gtogs ci yod pas re dog kun bral gyi rig thog tu thams cad ro snyoms byed dgos pa yin/__rnal 'byor pa'i nyams la ci shar tshad der rang gis re dog dga' sdug mang po byed cing gzhan la'ang cal sgrogs byed mkhan de rnams nyams len la sa zin dang 'dom phug med pas sprang rtags bstan pa yin pas ci mkho/__rig rgyu mang yang bshad rgyu ma mang na skyon chen po yang de tsam ci yod/__rdzogs chen sogs nas bsgom med gsung pa ni gnas lugs rtogs tshe de la mnyam par bzhag na mtshan ma'i bsgom pa gzhan btsal du med pa'am mnyam bzhag gom shing rtsal rdzogs dus su ched du ma bsgom na yang bsgom don ngang ngam shugs kyis gong 'phel du 'gro ba'i don yin gyi nyams len ma byed gsungs pa min/__sbyang pa sngon song gi skal ldan rtogs goms cig chod ltar 'gro ba'ang srid gsung mod/__de 'dras chos min gyi rnam g.yeng ga la byed/__grol tshad gsung pa'ang chos dang gang zag ya ma bral ba zhig gis tshul bzhin du brtson na de 'dra 'byung ba'i don yin gyis de dus ma grol na grol ba'i dus med pa'ang de phan chod sgrub gtan nas mi dgos gsung pa min/__des na bsgom med kha la khyer zhing rnam g.yeng kho nas mi tshe stong zad mkhan mdo shor de 'dra mi rung bas dam pa gong ma rnams kyis dka' spyad snying rus drag pos phur tshugs su bsgom pa ltar bsgom rgyu dang goms rgyu gnyis ka los yod pas da lta gson po rang dbang yod dus su nyams rtogs skye rung ma skye rung bsgom yun shi dang gtug thub pa re byed pa dang byang chub ma thob bar du bsgom pa rgyun chags su byed pa'i skal ldan du 'gyur ba'i smon lam bzang po re snying thag pa nas 'debs dgos pa yin no/__/gsum pa ni/__khregs chod kyi lta sgom la phan thabs kyi spyod pa mang yang mdor bsdu na mi dge ba'i bsam sbyor thams cad spang dgos pa gzhir bcas dge ba'i mthar thug dang sdig rgyun gcod byed thun mong ma yin pa'i nyams len 'di las gzhan pa'i sgo gsum rtsol ba can gyi rnam dkar la 'bad na rlung sems de dang der g.yo ba'i rkyen gyis rig pa brtan cing 'phel ba'i gegs su 'gyur bas na skabs thob dmigs gsal gyi dgos dbang gis rlung sems rags pa'i g.yo rtsol bzang ngan thams cad gnyug mar bzhag ste dbyings rig g.yo med rgyun chags su spyod pa la 'jug pa 'di ni rgyal po sa 'dzin ltar bag yod kyi spyod pa dang snang tshul bzang ngan gyi chos kun rig thog tu dbyer med ro snyoms kyi gsang spyod gcig rdzogs kyi tshul du bslab pa nyid dngos gzhi'i nyams len rtsa ba'i grogs su med du mi rung bas thun dang thun mtshams bcas la rim pa bzhin du bya ba dgu phrugs su btang bar bya'o/__/de yang theg pa thams cad nas gsungs pa'i blang dor rtsol bcas rnams la phan yon dang dgos nus gang yang mi 'dug snyam du khyad gsod kyi sgo nas spang ba lta bu ni/__skad cig tsam yang bsam mi rung ngo*/__/spros med kyi nyams len kho nas blo gtan nas mi tshim pa'i gang zag gis thun mtshams sogs bar skabs su rang nyid gang la lhag par mos pa'i dge sbyor rnam dag re yang bya'o/__!__/gnyis pa de dang rjes 'brel 'khrul snang ye shes kyi rang snang du 'char byed thod rgal gyi myur lam la'ang gsum/__lhun grub 'od gsal gyi gnad gsang cung zad bkral ba dang*/__lam du ji ltar byed thabs/__gegs sel bog 'don gyi man ngag go__/dang po ni/__bla med rdo rje theg pa'i nye lam gyi gzhung shing thabs bskyed pa'i rim pa thams cad lha ye shes pa'i gzugs sku'i rnam pa lam byed kyi sgo nas gtso bo lus sgrib sogs sbyong zhing tshe 'di'am bar srid dang skye srid sogs su grol byed lha so so'i sngags bzla thabs sogs cha lag dang bcas te bsnyen sgrub las gsum gyis bsdus pa dang*/__de la brten nas shes rab rdzogs rim zab mos yi dam lha'i thugs chos sku lam byed gyis gtso bo rlung sems sbyong zhing tshe 'di'am 'chi srid kyi gnas skabs su grol bar mdzad lugs tshul gcig pa lta bu yin la/__lam dus kyi grub 'bras yang dpe don gyi 'od gsal rtogs gom dang 'brel ba'i sgyu lus dang slob pa'i zung 'jug ye shes kyi sku gong nas gong 'phel gyis mi slob pa'i zung 'jug chen por sbyor lugs dang*/__rig 'dzin rnam pa bzhi thob lugs kyi rnam dbye sogs du ma zhig bzhugs pa rnams gcig las gcig zab lta bu yin la/__'dir ni dbang dang bla ma'i byin rlabs ngo sprod kyi thabs khyad par can/__slob ma'i mos gus sogs rten 'brel rmad du byung ba dus 'dzom pa la brten nas bsod nams kyi ngo skal dang 'tshams pa'i sems kyi gsang ba dam pa sems nyid chos kyi sku ngo 'phrod cing rgyun bskyang pa des rlung sems ma dag pa'i cha sgo gsum gyi dri ma sbyong zhing*/__rab tshe 'dir de 'og 'chi srid kyi stong pa'i 'od gsal shar dus su yar gyi zang thal chen po gdod ma'i nang dbyings su mngon par byang chub pa'i go 'phang la khregs chod kho nas kyang sbyor bas/__thod rgal ma bsgom na'ang lam mthar phyin par bsgrod nus pa dang*/__stong pa'i ye shes ka dag la gnas brtan grol ba ci rigs thob pa'i rjes 'brel gyi tshul du thod rgal la 'jug lugs rgyud kyi dgongs pa phyogs gcig dang*/__yang ngo bo ka dag gi rang bzhin lhun grub de la gzhir gnas kyi mkhyen cha'i go ma 'gag pa ye shes chos sku dang gzhir gnas kyi snang cha'i go ma 'gag pa gzugs sku'i ngo bo nang gsal shin tu phra ba'i tshul gyis dbyer med ro gcig tu bzhugs tshul tshig la brten nas go brda 'phrod cing brda yis mtshon te 'od snang ngo 'phrod pa'i skal ldan la dang po nyid nas lhun grub dri ma med pa'i snang nyams chen po btsan thabs su mngon du byed thabs sgo yul rlung rig gi gnad gcun pa na stong gzugs kyi 'od snang mi mthong mi srid/__de yang dus 'khor ba'i stong gzugs dag pa dang snang tshul gcig ma gtogs ci yod kyang rdo rje lu gu rgyud sku dang thig le stong sgron gzhal yas khang phyi nang gi dbyings rnam dag gi 'od snang zhing gi ngo bo yin pa dus 'khor nas ma gsungs shing*/__'od kyi phyag rgya mar bde rol dgos pa lta ci lha mo'i gzugs mang po 'char tshul tsam yang rdzogs chen gyi rgyud rnams nas ma gsungs pas rtsol bcas rtsol med kyi lam tha dad pa dang thabs lam gyi byed bcing gis rlung rtags kyi stong gzugs glo bur du shar ba dang gnyug ma'i rig gdangs thabs la brten nas phyir gsal du shar ba gnyis ngo bo tha dad pa gzhir bcas/__de bas na thod rgal gyi snang nyams mngon sum du mthong ba'i slob ma des bla ma'i bka' bzhin du the tshom med par bsgom na snying dbus gzhir gnas kyi gnyug ma'i sku dang zhing bkod 'od kyi rnam par gsal ba der tsit+ta sha sgron du grags pa dang*/__phyir rgyu ba'am 'phro ba'i lam rtsa ka ti shel sbug lta bu'i yal ga phra la 'khril dang dar dkar snal ma zhes mig tu zug pa la dkar 'jam rtsa sgron zhes grags pa dang*/__phyir thon pa'i sgo 'od rtsa kha phyes pa'i rnam pa'am kha zum pa ltar gnas na'ang 'od snang mi 'gog par sgrib med zang thal du gnas pa la rgyang zhags chu sgron du grags pa dang*/__'od rtsa sbug stong drang por gnas par byed pa dang der 'od snang 'phul byed dam bskyod byed kyi gnyug ma'i rlung la shes rab srog tu gyur pa'i rlung du grags pa de thams cad rnam pa ma 'dres pa yin mod/__ngo bo rig pa'i ye shes nyid las 'da' ma myong pas na chos nyid kyi bden pa bslu ba med pa'i gnad 'dis sngon nas ka dag stong chen ma mthong na yang 'od snang lam byed kyi skabs 'dir ji bzhin bar mthong ba ni rgyud kyi dgongs pa phyogs gcig yin no/__/'od snang shes rig dang bcas pa rtog med spros bral chos dbyings blo 'das chen por ar la gtad de mthar thug zad sar skyel ba ni lam gnad mthar thug pa yin la/__de yang rig pa'i ngo bor rang babs su 'jog pa kho nas dbyings las mi g.yo ba'i btsan sa zin pa ni blo rab dang gom 'dris brtan po med na dka' yang*/__rig rtsal so ma'i dran shes kyi sgo nas 'od snang la zhen pa lta ci rtog dpyod tsam yang mi byed par rig thog tu rang babs su 'jog pa ni lugs gcig ste gtso bo khregs chod kyi lam gnad du bsdu ba yin/__yang rig pa rgya chad phyogs lhung bral ba la lus kyi phyi nang sogs phyogs 'dzin dang*/__'od snang ye shes kyi sku'i ngo bo yin pa la bem chos su blta ci dgos pas rig rtsal so ma'i dran shes lu gu rgyud nyid la phar gtad cing*/__de nyid thig le stong sgron gyi nang khong gi dbyings dngas gsal las mi 'gul ba'i thabs su mig dang rlung yang der thim 'gro ba ltar rtse gcig tu gzir zhing ar la gtad pa nyid goms na ci tsam brtan pa thob pa de tsam du nang gi rig ngo yang brtan cha ngang gis thob pa 'byung ba yin la/__'di ni gtso bo lhun grub kyi lam gnad du dril lugs so/__/gang ltar yang ka dag gi ngo bo lam dus su rjen la phud cing de yang grol sa mthar thug gi dbyings su 'khyol ba zhig rtsol med tshul gyis mngon du 'gyur dgos pa yin no/__/thod rgal bsgom pas tshe 'dir snang bzhi mthar ma phyin na bar dor snang ba'i 'od gsal shar ba nyid dus der lam du byed thabs la da lta nas blo sbyong na grol shin tu sla ste/__rags lus snga phyi'i bar mtshams yin pa dang bar srid kyi yid lus phyi ma yang ma shar ba'i gnas skabs grol gzhi ka dag nyid dang 'brel shin tu sla ba'i rang dus yin pa'i phyir ro/__/rdzogs chen gyi rgyud nas bstan pa'i sangs rgyas rang snang gi longs sku ni/__bod du byon cing da lta yang mjal du yod pa'i rgyud gzhan nas bstan pa ma mthong yang sngar 'phags yul sogs zhing gzhan dang gzhan du bzhugs pa'i rgyud ci 'dra yod dang*/__des bstan tshod sus zin na rnam mkhyen gyi spyod yul tsam dang*/__lam gzhan nas sangs rgyas pa rnams la rang snang longs sku med do byas na/__rgyal ba'i zhing gi bkod pa mu mtha' med pa thams cad dbyer med du ma ro gcig yin pa gzhir bcas pa shin tu mi bde zhing 'pho chen rdo rje'i sku ni thod rgal mthar phyin pa'i khyad chos kho nar bzhed pa 'dra'o/__/sangs rgyas kyi yul ni gzhan sus kyang tshod mi zin pa nyid do/__/de ltar gsang ba las kyang ches gsang ba rang bzhin lhun grub kyi ye shes nyid sku dang zhing khams ltar rang snang ba'i 'od gsal chen po dri mas ma bslad pa phyogs dang ris su ma chad pa'i gdul bya'i khams la rang chas su bzhugs pa nyid da lta skad gcig gi thod rgal gyi tshul du mngon sum lam du byed thabs kyi myur lam mthar thug pa 'di ni gzhan du ma dmigs shing bla na ma mchis pa zhig yin par 'dug pas na/__yin pa la yin par ngo shes pa'i dad gus kyi sgo nas nyams len la 'jug par bya'o/__/gnyis pa lam dngos nyams su blang thabs la sgo gsum gyi gnad gzir zhing gnad gsum gyi sgo nas rang gnas 'od gsal ba'i sku dang ye shes kyi ngo bo mngon sum lam snang du byed cing gdod ma'i zad sar skyel ba'o/__/de la lus kyi gnad chos sku'i bzhugs stangs seng+ge 'gying ba lta bu longs sku'i bzhugs stangs glang chen nyal stabs lta bu/__sprul sku'i bzhugs stangs drang srong bsam gtan bsgom pa'i lus gnad gtsog pur gnas pa lta bu ste/__de dag snying tig gi rgyud don ma nor ba'i lag khrid zhib tu bslab la bzhugs stangs gsum gang rung zhig las mi 'da' zhing lus bsgul bskyod cung zad kyang mi shor bar nyin mtshan rgyun chags su brtson par bya/__ngag gnad smra brjod thams cad rgyun bcad de 'og rlung gyen du drangs shing ran par bsdam/__steng rlung kha nas phyir nar gyis 'bud cing dal gyis 'jog__/slar nang du 'jug dus shin tu dal ba dang phyir dbyung dus cung zad shugs bskyed pa la dus dang rgyun du ma yengs par bslab/__sems gnad rang rig pa'i ye shes ngo 'phrod pa de'i rang 'od rang snang nyag gcig tu ngo shes shing thag bcad de der mi dpyod par rang gnas kyi rig stong ka dag gi dbyings su mthar skyel la ma bcos par 'jog__/sngar rig pa'i ngo bo ma rtogs na'ang 'od snang spyi dang khyad par rdo rje lu gu rgyud kyi dkyil du'am sbubs su sems zhugs pa bzhin cher gyis bltas te 'od snang la re dog dgag sgrub sogs rtog dpyod kyi mtshan 'dzin phra mo tsam yang mi bya bar shes pa nyid der thim pa'i tshul gyis bsre zhing lug rgyud dbyings su gcun pa'i thabs la rim bzhin bslab pa ni gnad dam pa'o/__/'char gzhi yul gyi gnad ni spyir bslad rkyen med pa'i nam mkha' g.ya' dag pa/__bye brag tu nyin mor chos sku'i rten nyi ma sprin bral gyi 'og tu mtho gang ngam khru gang ngam mda' gang tsam na gtad/__mtshan mor longs sku'i rten zla ba sprin bral dang sprul sku'i rten mar me gsal ba rlung dang bral ba gang rung gi dkyil du gtad/__yul rkyen dang ma sbyar na'ang snang nyams ngang gis ma shar gyi bar du yul gnad 'bral med du brten pa gal che/__de'ang rang gi mig sogs khams dang 'phrod cing 'od lnga 'char sla la 'phel brtan gang che ba'i yul de gtso bor gzung*/__gzhan yang gsal khung cung zad can dang mun khang du bsgom lugs kyang 'dug__/'char byed sgo'i gnad ni/__shes pas gzugs mthong ba'i sgo mig 'bras skyon med yin la dri ma glo bur bas bslad pa'i mig dbang gdos bcas des tha mal gyi yul rag pa'ang khol bu ba gang nye re las mi mngon na snang nyams ga la mthong*/__bsam gtan grub pa'i mig yin rung dbang shes glo bur ba'i yul las 'das pa'i snang nyams mthong mi nus na'ang*/__phal pa la snang nyams mthong ba'i sgo med mi dgos te snying dbus mi shig pa'i thig le rig pa'i rang gdangs ye shes kyi rtsa chen mig la zug pa des dri ma med pa'i 'od snang mngon sum du mthong bas na mig gnyis cung zad gyen du blta ba chos sku'i gzigs stangs la goms pas rdo rje lu gu rgyud rig pa gar gtad der sdod par byed cing sku gsum lam snang du rdzogs pa'i tshad mthong bar 'gyur/__mig gnyis thad kar blta zhing cung zad mnan pa'i tshul gyis zur du dal bus khrid pa longs sku'i gzigs stangs nyid la goms pas chos nyid gnyug ma'i rang snang dngos su mthong zhing las rlung rang 'gags su 'gro ba dang ye shes kyi ngo bo mched pa'i tshul gyis thig le dang thig phran mang po mngon sum du 'char/__blta stangs cung zad thur du phab nas zim bus blta ba sprul sku'i gzigs stangs la goms pas yul tha dad ris chad kyi 'khrul snang 'gag cing rig pa'i rang gnas chos nyid kyi snang ba dang mi 'bral bar 'gyur/__de ltar gzigs stangs gsum gang la'ang mig cher mi bsgrim/__rdzi ma 'thab rdeb mi byed/__mig 'bras g.yo 'gul med pa rang babs su blta ba la gzigs stangs ma byas kyang 'od snang ngang gis shar ba ma byung gi bar du nyin mtshan rgyun chags su 'bad par bya/__'od snang che chung gang yang rung mngon sum gyi snang ba de kha dog lnga ldan du shar na lta stangs de las mi 'gul/__dkar shas che na mig g.yas su cung zad ldog cing mnan/__ser shas che na gyen du ldog__/dmar shas che na thur du ldog__/ljang shas che na g.yon du ldog__/mthing shas che na dkyil du gtad la mnan/__'od dbyibs gyen 'greng du shar na mig thur du ldog__/rtsibs shar nyid rang gi mdun phyogs su tshur drang*/__zlum po la g.yon du ldog__/gru bzhi la g.yas su ldog__/zla gam la steng du ldog__/gru gsum la'ang thur du ldog__/thig tshom dang*/__pad+ma dang*/__gur khyim dang mkhar thabs dang*/__mu khyud rim pa can dang*/__dga' 'khyil gyi dbyibs 'dra ba shar na mig de las mi g.yo bar gtad/__snang nyams brtan por 'byung phyir shes pa dang mig 'bras lu gu rgyud kho na la rtse gcig tu gtad cing lug rgyud 'od snang gi dkyil du btsud nas de las mi g.yo ba'i thabs la nan gyis 'bad pa gnad dam pa yin/__'od snang 'phel thabs su steng 'og dang g.yas g.yon mtshams rnams su dal bus 'khrid cing*/__snga dro la shar nas lho phyogs dang*/__dgung mor nub nas byang phyogs su drangs/__bud med kyis snga dro shar nas byang dang*/__phyi dro nub nas lho phyogs su 'khrid/__mi gsal na slar yang yul gnad la gtad de gsal snang ma nyams bar rim bzhin 'khrid shes par bya/__thig le stong sgron 'char sla thabs su mig gnyis sgrim lhod snyoms shing lta stangs mnyam par bya/__snang nyams dbang po'i mngon sum gyi yul yin pas 'char byed sgo yi gnad gzir ba shin tu gal che'o/__/rang re mos pa lam byed mkhan dag gis kyang bar skabs su slar yang ru shan dbye ba 'dra bskyar dus ma gtog 'od gsal thod rgal mchog tu gsang ba chen po dngos ci tsam bsgom pa de srid kyi thun nang kun tu lus bzhugs stangs dang*/__mig gzigs stangs kho na la dal gyis gnas pa las cung zad kyang mi 'gul ba dang*/__ngag smra rgyun thams cad bcad de lkug pa ltar bya ba dang*/__sems phyi nang gi dbyings rig la rtog dpyod tsam yang mi byed par rang sor 'jog pa'i sgo nas nyams len gyi gzhi bzung*/__thun mtshams rnams su'ang lus bsgul bskyod nyung zhing de yang dal la lhod chags par bya/__ngag smra brjod kyi spros pa gcod/__sems rtog dpyod lu gu rgyud du mi g.yeng bar thad kar 'jog pa la bslab/__gnas kyi khyad par sa phyogs dma' bas nam mkha' mthong rgya chung ba dang*/__shar nub kyi mthong yul rgyang thag thung zhing shar nub gyi ri mtho bas nyi zer la gyen du blta dgos pa tha ma/__sa phyogs cung mtho bas nam mkha' che tsam mthong ba dang*/__shar nub mthong rgya dang ri mtho dman 'os mtshams nyi ma la cung zad gyen du blta dgos pa 'bring*/__rang gnas pa'i sa phyogs ri rtse lta bu nam mkha' mthong rgya che ba dang shar nub mthong rgyang ring zhing de'i phyogs kyi ri dma' bas nyi zer la thad kar blta chog pa rab yin/__rang gi lus khams tsha shas che ba dang shes pa bying nyams che na chos sku'i bzhugs stangs dang gzigs stangs rtsal du 'don/__tsha grang 'dres ma'am snyoms shing bying rgod res 'jog can yin na longs sku'i bzhugs stangs dang gzigs stangs la 'bad/__grang shes che ba dang rgod nyams che na sprul sku'i bzhugs stangs dang gzigs stangs la gtso bor bya'o/__/ji ltar 'char ba dbyings rig gi gnad ni/__rtsa ba nang dbyings sems nyid kyi ngo bo ka dag gdod ma'i ye shes stong chen spros bral ye gnas khyab brdal chen po dang*/__nang gsal gyi rig pa rang bzhin lhun grub 'dus ma byas pa'i ye shes thim la ma rmugs dang*/__thugs rje'i 'char gzhi ma 'gag pa'i ye shes rgya chad phyogs lhung thams cad las 'das pa'i rig pa kun khyab byang chub sems kyi ngo bor ye nas rang chas su gnas shing*/__de ltar ngo bo rang bzhin thugs rje'i bdag nyid can gyi rang rig pa skad gcig ma zang thal rjen pa 'di ni 'gro drug gi sems can mchog dman bar ma mtha' dag dang*/__sa lam la gnas pa'i rnal 'byor pa rnams dang*/__dag pa gnyis ldan gyi sangs rgyas thams cad la ngo bo bzang ngan dang 'phel 'grib kyi khyad par rdul tsam yang med la 'du 'bral skad cig tsam yang med par yongs su khyab cing mi 'gyur rtag pa dam pa'i tshul du ye nas lhan skyes su bzhugs pa nyid lam pa'i gang zag sus rtogs shing goms na myur du rnam par grol bar 'gyur la ma rtogs shing ma goms pa'i phal pa rnams glo bur 'khrul pa mu mtha' med pa'i gzhan dbang du 'gro ba las mi 'da' bas grol 'khrul gnyis ka'i gzhi rtsa lta bu nang gi dbyings rig nyid dang de las dwangs gsal 'od kyi dbyibs dang kha dog gi rnam pa can phyir gsal gyi dbyings rig dwangs ma'i dbang yul du mngon sum lhug par shar ba rig gdangs rdo rje lu gu rgyud rta rnga'am gser skud sgrim pa lta bu thig phran du mas spras pa de yang stong gzugs snang tsam ma gtogs gang yang ma grub pas dbyings las mi 'da' mod/__thig le stong sgron dang dbyings rnam dag gi sgron ma la phyi nang gnyis su dbye ba de rnams rnam pa ma 'dres gsal rdzogs su rang shar ba rnams tshul bzhin lam du byas na sngar ma rtogs pa'i ngor glo bur du shar ba'i 'khrul snang gi yul dang yul can mtha' dag spang bsgyur lam byed kyi thabs gzhan gang la'ang ltos mi dgos par rang yal rang 'gag gi tshul du dag nas/__gdod ma rang gnas kyi sku dang ye shes chen po bsam gyis mi khyab pa'i ngo bor mnga' dbang rdzogs pa las 'da' mi srid pa ni chos nyid kyi bden pa bslu ba med pa yin pas na/__phyi nang gi dbyings rig ngo shes shing rtsa ba nang gi rig pa gsal dag ngar dang ldan pa nyid stong chen ka dag gi dbyings su gnyis med ro gcig tu gcun/__phyir gsal gyi rig gdangs rdo rje lu gu rgyud nyid dbyings thig gi ra bar g.yo 'gul dang bral ba gcun pa la nyams len gyi mthil bcol te gom 'dris rtse gcig tu bya/__phyi nang gi dbyings rig gang la'ang blos dpyad mtshan 'dzin gyis bcos bslad ma zhugs par rang babs sor bzhag kho nar nyams len rnal ma bgyis pa la brten nas phyi nang gi dbyings rig de dag gcig grogs/__gcig gis byed de gsal brtan mthar phyin cing myur du gdod ma'i zad sa chen por rnam par grol bas mthar thug gi sku dang ye shes mngon du 'gyur ba gdon mi za'o/__/de dag kyang sgra thal 'gyur rtsa ba'i rgyud las/__mngon sum gnad ni lus ngag sems/__/so so'i gnad rnams nges par bstun/__/de yang lus ni sku gsum las/__/rgyun du 'da' bar mi bya'o/__/ngag ni bslab dang gnas pa dang*/__/la bzla brtan par bya ba'o/__/sems ni dbyings la gtan pas 'grub/__ces dang*/__gnad gsum man ngag 'bral mi bya/__/de yang sgo dang yul nyid dang*/__/rlung dang rig pa'i gnad kyis brten/__/sgo ni sku gsum mig gis blta/__/yul ni sgrib byed bral ba'o/__/rlung rig dal bas ye shes 'grub/__ces so/__/phan yon dang bcas pa yang*/__btags grol sangs rgyas sras gcig gi rgyud las/__lus ni seng ge lta bu dang*/__/drang srong dang ni glang chen tshul/__/'di las g.yo bar ma byas na/__/sangs rgyas sum stong nyid dang yang*/__/skal ba dag ni mnyam pa yin/__/zhes dang*/__ngag ni ji ltar lkug pa bzhin/__/su dang brda tsam nyid mi bya/__/'di ltar su yis byas pa'i mi/__/sems kyi 'khro 'du rang chod de/__/ces dang*/__dbyings kyi nang du lu gu rgyud/__/mnyam par bzhag cing 'bral mi bya/__/'di ltar su yis byas pa'i mi/__/thog ma'i kun tu bzang po dang*/__/skal ba nyid ni mnyam pa yin/__/zhes so/__/khyad par du'ang nang dbyings ka dag spros bral stong chen gdod ma'i grol sa klong yangs chen po'i ngang der rang byung gi rig pa 'od gsal thig le nyag gcig nyid dbyer med ro gcig ye nas yin pa la yin par shes pa'i sgo nas rang babs dwangs gsal g.yo med kyi tshul las nam yang mi 'da' ba dang*/__rig rtsal rtsol med shugs 'byung gi shes rab khyad par can 'bad med klong rdol ba'i tshul du ngang gis shar zhing rgyas pa na/__des nga rgyal te chos dang gang zag gzhan sun 'byin lhur len byed pa dang*/__lha mthong 'dre mthong mngon shes cal sgrogs sogs zog po'i rgyu rkyen du 'gro ba'i bdud kyi 'jug phyogs su ma shor ba phyogs dang ris su ma chad pa'i chos dang gang zag dam pa rnams la dad gus dag snang phun sum tshogs pa gong nas gong 'phel gyi tshul du bya zhing*/__rang lam khyad par can la the tshom gyi sgro 'dogs chod de yid ches mi ldog pa'i nges pa gting tshug pa re rnyed pa'i sgo nas rang nyid tshe dang sgrub pa mnyam pa'i thabs la rtse gcig tu gzhol ba dang*/__de las gzhan pa'i ma rtogs log rtogs phyogs rtogs can ltar snang ba'i skye 'gro mtha' dag la snying rje chen po'i sgo nas phan ci thogs re byed pas mtshon/__rig 'dzin gong ma dag gi rnam thar rma med pa'i rjes shul zin pa'i thabs kho nar ci nas kyang 'bad dgos/__dri mas gos ma myong ba'i rig gdangs phyir gsal dbyings thig gi dkyil du gzugs med gzugs ltar snang ba ye shes snying po'i srog can gyi rig pa rdo rje lu gu rgyud de la rtog dpyod glo bur bas bslad ma zhugs pa dwangs gsal g.yo med brtan por 'byung ba'i slad du hril gyis gcun pa kho nar rgyun chags su 'bad na theg rtse snying po'i nyams len gyi ngo bo thams cad 'ub kyis 'dus pa yin mod/__'di 'dra'i gnad dang bral rung da dus kyi rdzogs chen snying thig par khas che ba la las glen sgom lo grangs bgrang zhing rang rtsis chen po re byed/__la las blun gtam rtog ge'i kha 'chal lta bu sha sna spu bsdus re 'ur sgrogs byed/__de 'dras sku tshe 'da' ba'i ngang rmongs pa'i skye 'gro mang po lam min gyi g.yang sar khyu ded thub pa la pho rgod go chod yin rlom byed mkhan mngon sum tshad grub ha cang mang drag pas gtan nas ma bzod de/__da dung yang rgyal ba'i mthu dang so so'i las 'phro bzang po zol med re 'dzom zhing phrag dog phyogs ris kyi bdud dbang du ma song ba'i skal ldan re srid na de dag gi don du bsams te yang nas yang du bshad cing shin tu gsal bar bstan pa yin pas na snying po'i don zab mthar thug pa 'di rnams snying gi dkyil du 'chang thub ci nas kyang zhu'o/__/zhes gsungs/__'di ltar yang thal 'gyur las/__/lu gu rgyud kyi rang bzhin ni/__/rnam par rtog pa kun dag pas/__/ma 'khrul pa yi sangs rgyas so/__/zhes dang*/__mngon sum rnyed pa'i skal ldan la/__/khams gsum 'khor ba'i ming med de/__/srid gsum gdar sha chod pa'o/__/zhes rig gdangs kyi yin lugs dang mthong ba'i phan yon bcas shin tu gsal ba'o/__/de ltar phyi nang gi dbyings rig la rtog goms tshul bzhin byas na snang bzhi'i 'char tshul ngang gis 'byung ba gzhir bcas/__de yang rten gyi gang zag gi khams dbang mi 'dra ba dang*/__khregs chod kyi rtogs goms rab 'bring tha ma'i dbang gis 'phel cha go rim yod med kyi khyad par gsungs shing*/__brtson pa rab kyis myur du lam bsgrod nus la le lo can de las 'gyang ba yin mod/__rim bzhin ji ltar 'char tshul bshad na/__dang po chos nyid mngon sum ni/__nang gi rig pa blo bral mngon sum du rtogs shing skyong bde ba dang*/__dbyings rig phyir gsal gyi snang ba yang thal 'gyur las/__chos nyid mngon sum snang ba ni/__dbang po'i sgo nas nges thon te/__sprin med pa yi mkha' la gsal/__zhes pa ltar snying dbus mi shigs pa'i rig gdangs 'od rtsa'i gsang lam rgyud de rgyang zhag sgron ma'i sgor thon nas 'char gzhi'i mdog mtshungs lta bu'i 'od snang 'al 'ol mthong ba phyi dbyings dang*/__de mched pa'i tshul gyis 'od snang bkrag mdangs can thig zhib mang po yod pa mthong ba nang dbyings te rnam dag dbyings sgron longs sku'i zhing khams kyi ngo bo dang*/__mu khyud rim pa can gyi thig le dmar zlum dmar ser ser skya mthing nag sogs mthe bong tsam pa res mngon res mi mngon pa gnyis re tsam du mnyam gyi tshul du mthong ba thig le stong sgron gzhal yas khang gi ngo bo dang*/__'od snang rta rnga 'dra ba shel phreng dang gser rkud 'dra ba bar mtshams su thig chung yod pa thig chung 'phro ba/__'gro 'ong dang g.yo 'gul myur ba du ma dbyings thig gi nang dang bar mtshams ci rigs su mthong ba de dag rdo rje lu gu rgyud de sku yi ngo bo yin la/__de rnams gsal dag ma 'dres pa'i rnam pa can dngas ma'i dbang yul du mngon sum 'char ba na des gar khyab tsam du tha mal gyi yul snang sgrib par 'gyur zhing 'od snang gang du 'khrid pa der 'char ba dang thig le stong sgron sum 'brel can la rdo rje lu gu rgyud cung zad gnas pa tshun chad lam snang dang po'i dus yin la chos nyid kyi rang snang rjen pa dpe dang brda rtags tshigs dang yid dpyod las 'das pa mngon sum du mthong bas na chos nyid mngon sum gyi snang ba zhes bya ste/__thal 'gyur las/__chos nyid mngon sum snang ba yis/__/yid dpyod 'dzin pa'i tshig las 'das/__/zhes so/__/sngon chad sdig po che yin rung lam 'di'i rnal 'byor pa 'di skabs su shi na lam rkyen gzhan med kyang ngan song du rdog pas 'phul yang mi 'gro zhing mngon mtho'i rten bzang rnyed nas lam gyi 'phro mthud nus par 'gyur ro/__/gnyis pa nyams gong 'phel ni/__'od snang gong nas gong du 'phel zhing rang gi smin mtshams sor bzhi tsam nas 'od snang rgya ral te mthong yul gyi mkha' dbyings su 'ja' 'od zer thig kha dog lnga ldan gyen 'bring rtsib shar drwa phad lta bu 'od khyim/__pad sdong*/__mkhar thabs mchod rten gyi rnam pa mig mang ris sogs 'od phung sna tshogs kyi klong na thig le stong sgron lnga tshom sogs rgyun du gnas shing*/__de yang me long tsam dang kham phor tsam dang*/__sba phub tsam du cher 'phel zhing 'thug po'i rnam pa can gyi dbus su rig pa rdo rje lu gu rgyud kyang je brtan je sbom tshul gyis rtsal rdzogs te lha sku'i gtsug gtor nas sku phyed sku rkyang gcig nas du ma'i bar du shar zhing*/__de dag g.yo 'gul med par gnas pa'i tha mal pa'i 'khrul snang rim bzhin nub nas ye shes kyi rang snang 'phel rgyas su 'gyur ba'i dus na phyi nang yul rags pa skye sdud byed pa'i las rlung dang*/__nang phung khams bsgul bskyaud byed pa'i rlung dang*/__gsang ba kun rtog yul la g.yo byed kyi rlung gi stobs shugs zad pas phyi'i rkyen snang bzang ngan thams cad rnal 'byor pa'i lam gyi grogs su 'char/__nang 'khrul pa nyon mongs pa'i bsam spyod la zhen rtsol mi 'byung*/__gsang ba rig pa 'pho med rtog bral gyi dbyings su ngang gis gnas par 'gyur bas 'di dus shi na chos nyid kyi bar dor 'tshang rgya ba las phyi nas srid pa'i 'khrul snang rang rgyud pa mi 'byung ba yin te/__thal 'gyur las/__gong du 'phel ba'i nyams snang gis/__'khrul pa'i snang ba nub par byed/__ces gsungs so/__/gsum pa rig pa tshad phebs kyi snang ba ni/__da lta'i ma dag tha mal gyi dngos snang sa rdo ri brag sogs gdos bcas su shar tshad nub nas lhun grub 'od gsal gyi zhing snang chen pos yongs su khyab ste gang snang 'od kyi rang bzhin las mi 'da'/__lnga ldan gyi thig le lnga tshom mang po bkod legs pa re re'i nang na'ang zhi khro yab yum 'khril sbyor gyi sku tshom bu dang bcas pa mkha' dbyings gang ba tsam du 'char zhing de dag gi thugs ka nas shin tu phra ba'i 'od zer rang gi snying gar 'brel pa 'byung*/__de tshe phyi'i yul snang longs sku'i zhing ltar 'char/__nang rang lus gdos bcas ltar rang ngor mi snang zhing stong gzugs kyi rnam par shar/__gsang ba ma dag pa'i rlung sems kyi 'gyu ba rang sar 'gag cing dag pa'i rlung sems tshad la phebs te khyad par can gyi spyan dang mngon shes sogs yon tan dpag tu med pa la rang dbang 'byor zhing gal te 'di dus shi na rang gi lus sems 'od kyi zer thag la 'dus te ye shes kyi 'od sku'i thugs kar zhugs pa'am/__'od sku rnams tshur rang gi snying gar 'dus pa gang rung gi sgo nas 'phos te bar dor gzhi'i 'od gsal dang 'dres shing de tshe rags lus zag pa bag chag dang bcas pa slar mi skye ba'i chos can du dag cing ye shes rin po che'i 'od phung du dengs/__rig pa sgrib skyon thams cad las rnam par grol te nang dbyings ka dag chen po'i klong du 'tshang rgya ba yin no/__/de ltar yang rgyud las/__rig pa tshad phebs snang ba yis/__phyi nang gzung 'dzin gdos bcas grol/__zhes pa ltar ro/__/bzhi pa chos nyid zad pa'i snang ba ni/__ma dag pa'i phyi yul snang*/__nang rang lus gsang ba nyon mongs pa'i rtog tshogs dang de dag g.yo byed kyi las rlung rnams rig thog tu rang sar dag nas slar skye ba'i gnas med par zad sar 'khyol ba yin te/__thal 'gyur las/__chos nyid zad pa'i snang ba yis/__khams gsum 'khor ba'i rgyun thag gcod/__ces so/__/ye nas dri ma med pa'-i phyir gsal lhun grub kyi lam snang chen po de dag kyang dper na chu rlabs slar 'dus pa ltar grol gzhi ka dag gting gsal gzhon nu bum sku chen por ngang gis 'jug pa la nye ba na skye ba gang la'ang rang dbang 'byor ba chos nyid yin pas zag bral 'pho chen rdo rje'i skur bzhengs par spro na rang lus 'od phung du dengs pa'i 'od lnga'i lag sor rnams khra lam mer rig ngor snang ba tsam las lus dbyibs gzhan gang yang mi mngon pa'i mtshams 'dir 'od kyi sor mo la rig pa gcun ma thag tu skad gcig gi dwangs ma mi shigs pa'i 'ja' lus 'pho chen rdo rje zag pa med pa'i ye shes kyi sku mngon du 'gyur ba yin la/__gang ltar yang lam snang lhag ma med pa rang gi sems nyid gdod ma'i grol sa mthar thug ka dag klong chen yangs pa mtshan ma'i spros pa thams cad las rab tu 'das shing nang gsal shin tu phra ba'i ye shes chen po thim la ma rmongs pa rgya chad phyogs lhung bral ba'i ngo bor 'ub kyi 'dres te dbyer med ro gcig tu gyur pas dag pa gnyis ldan mthar thug pa'i gtan srid tshe 'dir zin pa yin no/__/deltar yang thal 'gyur las/__/chos zad pa yi snang ba ni/__/nyams kyi snang ba kun stongs nas/__/lus zad dbang po'i yul yang zad/__/rtog tshogs 'khrul pa rang grol nas/__/brjod gzhi tshig dang bral ba'o/__/zhes dang*/__de ltar lus 'byung rgyun chad nas/__/zag bcas phung po mi snang bar/__tshe 'di nyid la 'tshang rgya'o/__/zhes so/__/tshig rkang phyi ma gsum po 'dis bI ma sogs 'pho chen rdo rje'i skur bzhugs pa rnams rdzogs pa'i sangs rgyas dngos yin lugs gsal bar bstan pa'ang yin no/__/de ltar lam snang so so'i mtha' brtan gyi man ngag gsum mtshan re dang*/__de'i khongs su rmi lam gyi tshad/__sgo gsum gyi dngos rtags bcas mdor bsdus bshad na/__mi 'gul ba gsum la gzhi bca' ba ni/__lus bzhugs stangs dang mig gzigs stangs gsum gang rung*/__rlung sems dbyings rig la gtad de gzhan du mi 'gul na dbyings rig 'phel brtan 'byung ba'i man ngag ste chos nyid mngon sum gyi dus su gces/__sdod pa gsum gyi tshad ni/__phyi snang ba rang sor sdod pas des sems mi 'phrog ste rkyen snang lam grogs su 'char/__nang phung po sdod pas 'khrul pa'i bya ba mi 'phel/__gsang ba rlung sems sdod pas 'khrul sems 'gag pa'i man ngag ste nyams gong 'phel gyi dus su 'byung*/__'di dus sogs su tshad rmi lam gyis bzung ba ni/__dang por bzang po sha stag rmi/__bar du ngos zin cing sprul bsgyur nus/__mthar 'od gsal gyi ngang du dag nas rgyun chad pa 'byung*/__rtags sgo gsum la shar ba ni/__mngon sum gyi dus na lus g.yo 'gul dang bral/__ngag smra brjod dang bral/__sems 'khrul rtogs 'phral du dag__/gong 'phel gyi dus su lus mdzes chos dang bral/__ngag byung rgyal du smra/__sems rtogs med kyi ngang la gnas/__tshad phebs kyi dus na lus 'byung bzhis mi non/__ngag chos kyi dbyangs snyan ngang gis 'byung*/__sems ya nga bag tsha dang bral/__chos zad kyi dus su lus 'ja' 'am na bun lta bu/__ngag brag cha'i sgra dang*/__sems rtog glog 'gyu ba tsam las med pa rnams 'byung ngo*/__/thob pa gsum gyi gzer ni/__phyi yul snang zhing khams su rang snang ba'i dbang thob/__nang rang lus 'od snang du rang shar/__gsang ba rlung sems nyon mongs pa sangs nas ye shes su dbang 'di rnams tshad phebs kyi skabs su 'byung*/__gdeng bzhi'i grol tshad ni/__sangs rgyas gzhan nas thob 'dod kyi re ba dang rang gnas mngon du mi 'gyur ba'i dog pa/__'khor ba gzhi med du grol bas rang nyid slar 'khor mi 'khor gyi dgag sgrub re dog ngang gis zad pa ni lam snang bzhi'i skabs su 'byung*/__rmi lam zin pa sogs lam rkyen gzhan la mi ltos te thod rgal goms pa na ngang gis 'byung bar shes dgos so/__/thod rgal gyi man ngag 'di ni the tshom med la btson 'grus che ba'i gang zag gi spyod yul yin pas rtse gcig tu 'bad nus na shes rab rno brtul dang las bzang ngan la mi ltos pas shes ldan dag gis cis kyang nan tan bya ba'i gsang lam mchog dam pa nyid do/__!__/gsum pa gegs sel bog 'don mdor bsdus ni/__mig skyon bsal zhing dwangs gsal brtan po 'byung thabs dang*/__sgron ma 'phel byed kyi sngags dang rdzas dang rten 'brel gyi khyad par rnams snying thig bka' gter sogs gzhan las shes par bya/__gegs sel bog 'don gcig chog mthar thug pa bla ma'i mos gus rtsal du 'don/__gegs med cing lam mthar skyol thabs kyi rtsa ba gsang spyod yin pas brtul zhugs rlung 'dzin gyi spyod pa bdun po 'di dag la rtsal ci yod kyi sgo nas 'bad dgos shing*/__dang po bung ba bcud tshol gyis spyir lam gyi spang gnyen ngos 'dzin dgos mod skabs 'dir ni spang bya'i rtsa ba phyogs ris med pa'i 'gro rgyud kyi shes cha grol 'khrul gnyis ka'i snga rol gyi spyi gzhi lung ma bstan rtogs na sangs rgyas kyi sku dang zhing bkod/__ma rtogs na 'gro drug gi gnas don lus kyi bye brag 'byams klas pa 'byung nges/__de gnyis gcig gis gcig ma sgrib pa/__rgyu rkyen gang 'dzoms pa na med snang sgyu ma lta bu mngon sum du 'byung rung go 'gag cing bye brag phyed ma rag pa yod mnyam dang*/__snang ba'i dus nyid nas don la ci yang ma grub pa'i spros bral yin mnyam/__de lta bu de la srog gi rlung zhes bya ba'ang gnas pas des bskul te snang cha phyir bskyod pa 'od ltar mngon pa'i tshe de la brten nas thog mar 'khrul lugs ni rkyen bzhi'i dbang gis yin te/__rgyu'i rkyen rang snang yin par ngo ma shes pa/__bdag po'i rkyen de las gzhan du bzung ba/__dmigs pa'i rkyen de las 'khrul snang du ma mched pa/__de ma thag pa'i rkyen shes dang shes bya de dag dus mtshungs pa'i dbang gis ye shes kyi sku zag bcas kyi lus su 'khrul/__dbyings snang yul du 'khrul/__rig pa sems su 'khrul pa yin mod/__de ltar thog mar 'khrul pa'i dus nyid nas bzung ste rang re da lta 'khrul 'byams kyi ngang du gnas bzhin pa'i dus 'dir yang sku dang ye shes las rgyang chad du song ba ni cung zad kyang med de dper na chu nyid grang lhag gi rkyen glo bur pa'i dbang gis chab rom zhes sra mkhregs rdo lta bu'i rnam par mngon sum du smin zin pa'i dus der yang rang bzhin ni chu las 'da' ma myong ba bzhin no/__/des rnam 'gyur bzang ngan shin tu tha dad pa tsam rgyu mtshan du byas te rang bzhin rnam dag la the tshom za ba ni nam yang mi rung ngo*/__/de ltar glo bur du 'khrul lugs ji bzhin pa shes na de'i dngos gnyen lam bden yang rig pa dang de'i rang snang ngo 'phrod pa nyid lta ba'i mthar thug yin lugs la nges pa mi rnyed mi srid do/__/grol na'ang rkyen bzhis grol te/__rgyu'i rkyen chos thams cad kyi gnas lugs mthar thug ye thog gdod ma'i sems nyid ka dag stong chen/__bdag po'i rkyen ma bcos rang byung gi rig pa rjen pa/__dmigs pa'i rkyen dbyings rig dbyer med chen po'i rang ngo shes pa/__de ma thag pa'ang mtshungs pa'i rkyen dbyings rig dri ma med pa ngo shes rtsal rdzogs brtan pa mthar phyin pa thob ma thag tu phyogs dus su mu mtha' med pa'i dag pa gnyis ldan gyi sangs rgyas ma lus pa'i ngo bo skad cig gis mngon du 'gyur ba las 'da' mi srid pa yin no/__/de 'dra ma byung bar du 'khrul cha la ming bzang po ci tsam btags kyang gnyen po med na rang grol du 'gro ba ni gnas med cing skabs med do/__/thos rgya gzhan che rung chung rung snying thig pa rnams nas 'di tsam re ma shes na dge med sdig med lta med bsgom med nyin mtshan bar med yin rabs sogs smra kham ci tsam che yang don la mgo rmongs re yin par 'dra'o/__/zhes gsungs/__gnyis pa thi bya tshang 'jug ni/__snying thig snying po'i lam gnad la the tshom gyi sgro 'dogs chod nges byung na de tshe nyams len la 'jug dgos kyi the tshom can gyis lam go chod dka'/__'on kyang bla ma'i mos gus bzang po dang 'brel ba'i nyams len byas na the tshom rang thog tu chod pa'ang 'byung ba yin pas khang phug tu ro nyal mi byed par dbyings rig mngon sum gyi don la bsam pas nyon mongs pa'i mgo non/__gnad smin re bsam tshe srid pa hrul por 'gro/__bsgom shing rtsal rdzogs pa na nyon mongs pa rang mtshan drung nas 'byin pa 'byung ba ni mi bslu'o/__/gsum pa ri dwags lta bu ni/__nyams len gyi grogs su dper na ri dwags rmas ma bzhin du gcig pu dben par ji srid 'tsho ba'i bar du gnas dgos so/__/bzhi pa lkug pa lta bu ni/__ri khrod du ngag 'chal las thu ba med pas ci yang mi smra ba la bslab/__skabs rer tshogs su yang lkug pa bzhin du 'dug__/lnga pa ni/__de ltar byas na nges med 'brel med kyi tshig re dog dang bral ba rang rdol du byung tshe ched du mi spang pa la smyon pa ltar smra ba zhes grags/__drug pa ni/__zas gos gnas mal la bzang ngan blang dor med par khyi phag ltar gang byung des chog byung na bzang ngan ro snyoms kyi spyod pa zhes bya/__de drug mthar chags sam ci rigs rdzogs nas rang rig pa'i ye shes rang dbang brtan po thob pa na snang ba rgyas thebs ni ngang gis 'byung ste/__de yang snang rkyen gyis rig pa tshur mi non cing rig pa rang sor gnas pa kho nas chog gi__/sems sde sogs ltar rig pas snang thog tu lhan pa sbyar 'dug ga la dgos/__rig pa'i rang so ci tsam zin pa de srid du/__des ni bzang rkyen la phar mi re bas 'dod zhen thams cad dang bral/__ngan rkyain gyis tshur mi non pas khong khro ba dang zhe sdang gi gnas med/__yul dang yul can gyi rnam pa thams cad rig pa'i yo lang kho na las mi 'da' ba byung na de la seng ge lta bu'am snang srid dbang bsgyur gyi spyod pa zhes bya ste bdun pa yin la/__'di dag rang nyams dang legs par sbyar zhing zol dang ma 'dres par dus tshod dang 'brel ba'i sgo nas rnam par dag pa re spyad par bya'o/__/nyams len gyi bog nyams len nyid kyis 'don dgos pa gzhir bcas pas dngos gzhi'i khrid kyi khongs 'dir dge sbyor srang du gzhug pa'i man ngag dus bzhi sangs rgyas mnyam sbyor bshad na/__dang po nyin par dbyings rig rang zhal lta ba ni/__ka dag gi rig stong dang de'i rang gdangs lhun grub kyi 'od snang gang yang sngar bshad pa ltar tshul bzhin du nyams su blang*/__gzhung gi dngos bstan ltar na thod rgal gnad smin bsgom pas nyin snang 'da' thub pa byung na bzang*/__srod 'khor sogs nam stod la'ang zla ba gsal na de dang min na mar me la brten te rlung sems rig pa rdo rje lu gu rgyud sgyu ma rdo rje btsan po de'i drwa bar btsud na legs/__gnyis pa srod la dbang po gnad du bsdu ba ni/__chags can yin na rang lus thabs ldan las rung gi dus su las rgya tshul bzhin du brten pa las byung ba'i bde stong gi ngang du rlung sems dbang yul du gnad du bsdu ba byas na'ang gzhung 'dir yul gyi bdud rtsi brten ces spyi btang tsam mngon pas chog yang na rang lus thabs ldan gyi 'bar 'dzag sngon 'gro'i skabs nas byung ba de ltar byas kyang 'thus/__gsum pa nam gung shes bya bum 'jug ni/__gnyid la nye ba na bla ma dang rang rig pa dbyer med kyi ngo bo thig le dkar po sran ma tsam gyi dkyil du a dkar spu shad tsam yod pa re rang gi snying dbus dang smin mtshams su gsal legs par btab cing bla ma la 'od gsal zin pa'i 'dod don yang rtse gcig tu gsol te phra thig la sems bzung*/__gsal bar zin pa na de'i 'od kyis snang srid thams cad 'od lngas khyab par bsam/__mthar de yang thig le la bsdus te sems gzhan du ma yengs par gnyid log__/thig le gnyis dus gcig la bsgom ma bde na res mos sam gtso bo snying khar bya/__thig le leb mo'i dkyil du a yod pa min pas zlum po'i sbrubs su a dod gsal sgrib bral ba bsgom mo/__/thabs des kyang 'od gsal dang rmi lam zin par 'gyur/__bzhi pa tho rangs rig pa rang gsal gdab pa ni/__tho rangs lus gnad seng ge'i 'dug stangs dang bcas ha sprugs kyis rlung bsangs nas mdun gyi nam mkha' mda' gang ngam khru gang tsam na rtsa ba'i bla ma dang bI ma la dbyer med pa'i ngo bo a dkar po dwangs gsal 'od lnga 'bar ba gsal btab la mig kyang der gtad/__bla ma'i thugs skye med kyi ngang du rang gi lus sems khrug ger 'dres par bsam la rlung rig rtse gcig tu bcun te a la gtad/__rig pa bslad cha dang bral nas dwangs sang nger byung tshe rang sems skye med las gud na bla ma med par kho thag bcad de rig pa rang babs bde lugs su bskyang na kun rtog thams cad de'i rol par 'char zhing rang grol du 'gro ba yin/__dus dang rnam pa kun tu gces pa'i gnad gcig chog ni/__nyams len gang byed dang de las gzhan pa'i sgo gsum gyi bya ba thams cad kyang rig pa gsal dag gi ngang nas byas na snang sems thams cad rgya mtsho la gza' skar shar ba ltar rig pa'i rgyan du snang ba dang chu rlabs chur thim pa ltar rig pa dang ro gcig tu rdzogs pa yin no/__/gnyis pa dbang po 'bring bar dor grol byed kyi gdams ngag la gnyis/__'chi kha bar do'i man ngag ma pang du bu 'jug lta bu dang*/__chos nyid bar do'i man ngag mi 'gyur ba gser thur lta bu'o/__/dang po la'ang gnyis/__dbyings rig bsre ba dang*/__'pho ba'i gdams ngag go__/dbyings rig bsre ba ni/__da lta nas nam mkha' sum phrug gcig tu bsre ba la nyams len gnad du 'gro bar bya ste/__phyi dbyings mtshon byed par snang stong seng blo yul sgrib thogs bral ba 'di 'am/__rgyan gyi nam mkha' g.ya' dag la ngos bzung ba'ang 'dug__/gang ltar yang mtshon bya dngos ni chos rnams kyi chos nyid ka dag klong yangs chen po phyi dang nang med pa kun tu yang nang du gyur pa'i dbyings 'pho 'gyur dang bral ba des da lta phyi rol na yang khyab dgos kyi rgya chad phyogs lhung can du gang na'ang mi gnas pa de'o/__/de bzhin du nang dbyings kyang lus nang gi rtsa sbug stong seng nge ba nyid do/__/gsang dbyings nyid ni sems nyid stong chen rig pa'i snying po can 'di kho na'o/__/de rnams ye nas ro gcig yin pa la rang re sems can gyi blo ngor gud chad ltar snang ba nyid gsang mchog rgyal po'i man ngag gi 'phrul thabs khyad par can gyis dbyer med ro gcig tu bsre ba yin lugs kyi lam gnad shes pa'i sgo nas dbyings rig bsre ba'am nam mkha' sum phrug bsgom pa la rtse gcig tu 'bad/__bar skabs su nga shi tshar ba yin/__nam mkha' lta bu'i stong chen gyi dbyings 'di 'chi srid chos sku'i 'od gsal yin/__sems nyid rig stong ngo shes pa 'di chu phran nam bu ltar snang zhing gzhir gnas gnyug ma'i stong chen gyi 'od gsal nyid rgya mtsho'am ma ltar snang ba 'di yang blo ngor gnyis snang tsam las don du rang gnas su sleb pa na ma bu ltar pho mo tha dad tsam yang gdod nas yod ma myong bas chu la chu bzhag pa ltar dbyer med ro gcig tu rtogs par bya'o snyam du kho thag chod pa'i blos 'phen pa drag po re btang*/__de ltar goms na 'chi khar stabs bde ba 'byung*/__de nas 'chi kha'i dus der sngar goms pa ltar dbyings rig btsan thabs su bsre bar bya'o/__/'pho ba da dus sbyong lugs ni bsam gtan gyi spyod lam la gnas pas sngon 'gro tshang ba'am skyabs sems legs par song ba'i rjes su nam mkha'i dbyings thams cad rang bzhin sprul ba'i zhing mchog lnga dur khrod chen po me ri 'bar ba dang bcas pas yongs su khyab par mos/__rang lus 'od snang khong stong gi dbus na rtsa dbu ma byang chub chen po'i rgyu lam mda' smyug tsam gsang gnas nas spyi bo'i bar du drang thal ler shel sngon gyi sbu gu bzhin du yod par bsgom/__snying ga'i thad kyi dbu ma'i nang na rang gi rlung sems thams cad lhag ma med pa 'dus pa'i ngo bo thig le 'od lnga'i mdangs can gyi sbubs su a dkar gyis mtshan pa chung ngu zhig rtse gcig tu bsgom/__rang gi spyi bor dbu ma'i steng na 'ja' gor gy-i nang du dpal drin chen rtsa ba'i bla ma nyid dgyes ye re bar do'i lam sna 'dren pa'i ded dpon chen por sku'i rnam pas mngon sum du bzhugs pa la/__bdag kyang bla ma'i thugs bde chen 'od gsal gyi klong du skad cig gis drang du gsol snyam du mos gus gdung shugs drag pos gsol ba phur tshugs su btab cing 'pho bya rlung sems kyi thig ler sems gtad ma thag tu 'phar ling ling je mthor song ba dbu ma'i yar sner sleb mtshams su hig gam phaT drag po gnyis ka'am gang rung brjod pas thig le nyid bla ma'i thugs kar sib kyis thim nas ro gcig tu 'dres pa yang yang bsgom/__thun bsdu ba na bla ma dbu ma'i lam nas snying dbus su thim pas rang bla ma'i ngo bor sangs rgyas par bsam la sems khong lhod de rang babs su bzhag__/zhing khams rnams mi dmigs pa'i ngang nas dge ba bsngo zhing*/__skye ba kun tu yang dag bla ma dang*/__ces sogs kyi smon lam gdab/__'chi nges pa'i tshe 'di snang gi zhen phyir gtan nas mi 'brang bar 'pho ba'i nyams len sngar sbyang pa ltar la thun mthar rtsa ba'i bla ma nyid dur khrod me ri 'bar ba sogs rang bzhin sprul pa'i zhing mchog gang mos der dngos su bzhud par bsgom pa tsam khyad par du byas te rtse gcig tu bsgom bzhin pa'i ngang nas dbug chad pa'am ci lcog gi bar du bsgom nus na sdig pas mi gos te dag pa'i zhing du skye bar 'gyur ro/__/bar dor grol tshad can yin rung 'pho ba byas pas thur du lhung bar mi 'gyur pa yang shes dgos so/__/gnyis pa ni/__'chi dus kyi thim rim rags pa rnams rdzogs nas snang mched thob gsum gyi snang ba yang ngos zin long yod med gang rung gi mthar rlung sems glo bur ba'i rgyu ba ma lus pa rang 'gag tu song ba na 'chi srid dus kyi gzhi yi 'od gsal sems nyid gnyug ma'i ngo bo ston gnam g.ya' dag pa lta bu ngang gis shar ba yin mod/__lam gnad mi shes pa rnams brgyal te sems med pa'i gnas skabs kyi ngang re zhig 'thum par 'gyur la/__slar yang sems nyid 'od gsal gyi rtsal las rlung rig gi rang snang shar na'ang ngos zin long med par rang ngor bag la zha ste srid pa bar do'i 'khrul snang 'char ba rtsom pa las mi 'da'/__'di dus skye srid lam byed kyi man ngag med pa rnams la bar do'i yid lus grub pa las ci yod/__rdo rje theg pa'i lam gnad goms pa rnams ni bshad ma thag pa ltar sems gzhan 'gag zin dus su dran med rang gar mi 'thum par rab tu stong pa dpe yi 'od gsal gyi tshul du rtogs na de'i rjes thob tu srid pa bar do'i yid lus med par dag pa'i sgyu lus 'grub pa yang yod mod/__rdzogs chen snying thig pa'i khyad chos rang snang chos nyid bar dor shar ba'i lam snang gi lha sku dang mi 'dra ste/__klong drug pa las/__chos nyid dag pa'i bar do dang*/__yi dam lha yi sgyu lus gnyis/__'dra'o 'dra'o nor ra re/__zhes pa ltar 'od gsal gyi rtsal snang phra rags dang dri bcas rlung sems phra mos bslad pa yod med kyi khyad shin tu che/__bskyed rdzogs kyi nyams len de las lhag pa rnams ni rab tu stong pa don gyi 'od gsal mngon sum du rtogs rjes slob pa'i zung 'jug ma bcos pa'i lha sku mngon du 'gyur ba las mi 'da' mod/__de yang slob lam lhag bcas yin la/__sngar bshad pa'i 'pho chen rdo rje'i sku ni dag pa gnyis ldan gyi gzugs sku'i rnam 'gyur mi 'dra ba las lam gyi lhag ma gang yang med pa'i khyad par yang shes dgos/__skabs 'dir ni snang mched thob gsum bcas 'gag pa de la rnam shes nam mkha' la thim pa zhes bya/__de'i tshe sems nyid gdod ma'i stong chen rang gnas gnyug ma'i 'od gsal ngang gis shar zhing de'i ngang las zer mdangs phyir ma mched pa'i rang dus der 'chi srid chos sku'i 'od gsal zhes gzhi dby-ings ka dag gi grol sa chen po dper ma lta bu yin la/__tshe 'dir sems nyid ka dag gi nyams len brtan po yod pa nyid bu lta bu yin te/__de gnyis gong 'dzom pa na sngar 'dris pa nyid rang ngo shes shing de las mi 'gyur ba la 'od gsal ma bu 'phrod pa zhes bya/__de las slar mi ldog pa btsan sa zin pa la yar gyi zang thal du bar dor med par grol ba zhes bya ste spang bya lhag med slar mi skye ba'i chos can du yongs su grol nas mthar thug 'bras dus kyi chos sku mngon du 'gyur ba yin no/__/de ltar chos sku'i gtan srid ma zin na rig rtsal shes rab srog tu gyur pa'i rlung gis bskul te bar do lhun grub kyi 'od gsal lam snang gi longs sku'i ngo bo phyir gsal gyi tshul du shar ba yin mod/__de yang ka dag gi ngang du shar ba yin gyi rang sa de las 'das te gzhan zhig tu sleb tshar ba lta bu ni min no/__/ji ltar shar na 'od gsal zung 'jug la thim pa zhes 'od thig gi snang ba sna tshogs skur smin te rigs lnga sogs zhi khro yab yum gyi tshom bu grangs med pa rig pa tshad phebs kyi skabs su shar ba las kyang lhag par gsal 'tsher can sgra 'od zer gsum dang bcas te rang shar zhing ji srid gnas pa'i bar de ni bar do snang ba'i 'od gsal gyi bye brag zung 'jug gi rang dus yin la/__'dir ma grol na ye shes bzhi sbyor gyi snang ba zhes 'od kyi snam bu thig le che ba res brgyan pa bzhi shar/__der ma grol na lhun grub sgo brgyad kyi snang ba zhes/__thugs rje ltar shar ba/__ye shes ltar shar ba/__'od ltar shar ba/__sku ltar shar ba/__gnyis med ltar shar ba/__'tha' grol ltar shar ba/__ma dag pa 'khor ba'i sgo ltar shar ba/__dag pa ye shes kyi sgo ltar shar ba dang brgyad po dus gcig la shar/__de dus kyang ma grol na ni chos nyid kyi bar do las 'das te srid pa bar dor 'khyams par 'gyur/__de ltar chos nyid bar do'i rang snang zung 'jug nas lhun grub bar gyi snang ba gang shar yang de dang der grol byed kyi lam gnad ni gang shar gyi snang ba nyid ka dag gi rang snang yin par ngo shes shing de las mi 'gyur bar rang babs su gnas/__yid gnyis the tshom med par kho thag chod cing de las gnyis snang gis mi g.yo bar rtsal rdzogs shing brtan pa thob pa na 'od kyi snang cha yul can gyi shes rab dang bcas pa nang dbyings ka dag klong yangs chen por ro gcig tu gyur te grol sa mthar thug gi ngang las nam yang mi g.yo bar dag pa gnyis ldan gyi rgyal sa zin pa la bar do longs sku nas 'tshang rgya ba zhes bya/__'di dag shar lugs kyi khyad par dang*/__grol tshad dang*/__bsam gtan gyi zhag dang skad cig ma'i rnam dbye sogs zhib tu bshad na mang che zhing phyogs tsam gyis go dka' bas rgyal ba'i dbang po kun mkhyen klong chen rab 'byams kyi gsung gi gsang mdzod chen po rnams las shes par gyis shig__/ces gsungs/__gsum pa dbang po tha ma rang bzhin sprul sku'i zhing du grol byed kyi gdams ngag ni/__gong gi grol sa chen po de rnams su grol mi nus te srid pa bar do'i yid lus dbang med du rmi lam ltar shar ba na/__der ni ri nyil ba'i sgra/__mtsho dang chu chen g.yo 'khrug gi sgra/__rlung chen drag tu g.yo ba'i sgra 'brug stong dus gcig la grags pa tsam mi bzod pa dang*/__yul grong khang khyim grogs shi gson sogs ngo shes pa dang mi shes pa du ma/__rang lus kyi rnam 'gyur dang spyod lam zas skom gos sogs dang bde sdug gi snang ba sna tshogs gcig tu ma nges pa/__me chen/__chu chen/__sa rdo'i g.yang sa shin tu ya nga ba sogs 'jigs skrag gi 'khrul snang du mas mnar zhing bya spu rlung khyer ltar gar 'gro tsam yang rang dbang med pa/__skyabs med mgon med du gyur pa yin na yang dri la za ba'i lus sems de mngon shes rdzu 'phrul nyi tshe ba re dang ldan zhing gson pa'i dus kyi bsam spyod phal cher dran pa dang lus tshol ba la dga' snang chen po rgyun chags su shar ba yin/__de 'dra'i dus su bar do'i snang ba ngos bzung ste/__skyabs kyi mthar thug rtsa ba'i bla ma nyid dang de'i gdams ngag gi snying po bya sla la chod che ba dgos nges pa'i dus der skyel ma dpa' bo lta bu rang snang dag pa'i zhing mchog yid la byas te/__der 'gro ba'i 'dun pa shugs drag skad cig ma tsam gyis chog pa 'di rjes su dran te/__lus sems lam du 'jog shes pa ni ci nas kyang gal che zhing*/__de yang gang du 'gro ba'i zhing ni dbus stug po bkod pa na thugs rdo rje rnam snang*/__shar mngon dga' na sku rdo rje mi bskyod rgyal po/__lho dpal ldan brtsegs pa na yon tan rdo rje rin 'byung*/__nub pad+mo bkod pa na gsung rdo rje 'od dpag med/__byang las rab grub pa na phrin las rdo rje don grub yab yum gyis rang rang gi 'khor tshogs la rdo rje theg pa la sogs pa'i chos char 'bebs bde skyid ngo mtshar ni sprul sku'i dag pa'i zhing mchog bde ba can lta bu grangs med pas mtshon mi nus pa'i khyad par can de lta bu mngon sum du bzhugs pa yin la/__der 'gro thabs ni/__rigs gang la rang nyid lhag par mos shing dad pa de la las 'phro bzang po yod pa'i rtags yin phyir de'am/__rgyal ba rnams kyi sku dang zhing bkod thams cad dbyer med du ma ro gcig tu thag chod pa'i nges shes yod na khyad par med pas/__da ni bdag rang snang dag pa'i zhing der mda' 'phang pa bzhin 'gro bar bya yi/__rgyal ba rig lnga'i ngo bo rtsa ba'i bla ma rin po ches nye ring dang sgrib thogs med pa'i thugs rje'i lcags kyus da lta nyid du drang du gsol snyam du mos gus gdung shugs drag po byas pa tsam gyis rmi lam sad pa ltar dag pa'i zhing du sleb tshar ba na rdzus skyes ye shes kyi lus mtshan dpe yod par gyur te ston 'khor de dag gi zhal mjal/__chos thos/__dbang thob/__lus bstan/__dbugs dbyung gzeng bstod dang bcas te rten de la nang dbyings gdod ma'i klong du 'tshang rgya ba yin la/__yang na rigs lnga'i zhi dkyil gyi steng du rab 'jigs dur khrod chen po me ri 'bar ba na khyab bdag rigs drug pa khro bo'i skur bzheng pa ston pa gzhon nu dpa' bo stobs ldan zhes ye shes 'jigs byed chen po 'khor rig 'dzin dpa' bo mkha' 'gro'i khro tshogs dang bcas te sbyor sgrol gyi thabs chen gtso bor gyur pa'i rdo rje theg pa bsam gyis mi khyab pa'i chos char rab tu 'bebs bzhin pa der da lta 'gro bar bya yi/__bla ma he ru ka dpal mchog gis bdag myur du drongs shig ces mos 'dun drag po byas pa dang chabs gcig tu yid lus nyid 'od dmar gyi chos 'byung gi nang rlung sems a yig dkar po'i rnam pa bkra lam gyi gsal btab la de nyid glog 'khyug pa ltar skad cig gis bla ma dpal chen po'i thugs kar sib kyis thim nas dbyer med ro gcig tu sangs rgyas par bsam na rnam grol myur du thob pa yin la/__de dag kyang chos dang bla ma'i byin rlabs tshad med pa'i mthu dang chos nyid rnam par dag cing bsam gyis mi khyab pa'i bden pa chen po'i stobs kyis bslu med du 'grub pa kho na'o/__/gsum pa ni/__skabs 'di tsam du ma zad rdo rje theg pa'i lam gang nyams su blang yang med du mi rung ba lta bu'i cha rkyen rnams yin te/__de yang bla ma la dad mos chung na ltar snang gi lam gzhan gang 'bad tshad don du 'gyur dka' bas rang rang gi drin can rtsa ba'i bla ma la the tshom gyis skyon rtog dang mnyam 'grogs kyis khyad gsod mi byed par sangs rgyas dngos mthong gi dag snang dang yid ches rkyen gyis mi ldog pa'i dad mos drag po ngo lkog med pa re byas na sngags kyi dngos grub sogs ji ltar 'dod pa'i don thams cad gegs med lag mthil du ngang gis mchis pa yin pas sngar nas da bar yang yang bshad pa bzhin du nyams su blang zhing gsol ba phur tshugs su 'debs/__sdug bsngal sna tshogs dang de'i rgyu sdig pa mi bzad pa rnams gang las 'byung gzhi lta bu zag bcas nyer len gyi phung po lnga po 'dis non te 'di dang 'brel thag ma chod na sdug bsngal rdzogs shing zad pa'i dus med pa'i 'khor ba 'di'i rang mtshangs ngan pa la yang yang bsam ste rang gzhan thar 'dod nges 'byung gi blo khyad par can yang nas yang du bsgom/__rang drin gyis bskyangs pa'i mar gyur mkha' mnyam gyi sems can las ngan pa 'di rnams sdug bsngal la 'jigs nas rgyab kyis phyogs shing yang dag pa'i lam du 'gro shes pa phar zhog__/ce re bltas bzhin du long ba mgo rmongs pa tha chad pa 'di rnams sdug bsngal rgyu 'bras las grol 'dod kyi snying rje drag po shas mi bzod pa tsam yang yang bsgom pa nyid lam gyi rtsa bar bzung*/__nga'i bla ma'i chos 'di ma gtogs gzhan rnams dman te ma dag pa'o/__/snyam du log rtog ngan pa mi bsogs par kun la dad gus dag snang kha zhe med pa'i sgo nas bla ma dkon mchog spyi la mos gus kyi blo rtsal du 'don/__ltar snang gi chos dang 'jig rten tshe 'di'i rnam g.yengs snying po med la gnod tshabs shin tu che ba rnams che bzhag chung bskyur byas te spros pa bcad/__de yang dang po 'di bya 'di byed kyi blo ngan shar ba nyid nang du bsdus te ma mtha' yang ci mi snyam pa'i ngang la kha rog bsdad na spros pa chal chol shugs kyis chod pa yin/__tshogs drug gi yul snang gzugs sgra sogs bzang ngan gang shar yang der zhen med rang grol du spyad shes pa'i sgo nas yul drug gi bdud rtsi mi spang zhing lam grogs su bsten/__sna nas rgyu ba'i rlung rang babs rgya yan nam btang snyoms su 'jog la so mchu mi bsdam kha ha cang mi gdangs pa'i bar nas 'jam rlung yud tsam phyir 'dzin pa la bslab/__bar rlung bum pa can 'jam pos lto ba ran tsam thad kar brgyang pa yon tan rin po che skye ba'i rlung sbyor ci nus su 'bad/__phyi nang 'od gsal gyi 'char sgo'am 'char nub kyi rkyen dbang po gzhan las gtso che ba mig mi 'gul rdzi ma 'thab rdeb mi byed par stong pa'i dbyings su ce re 'jog__/'di dus nam mkha' sum phrug gi gnad kyang nam dran gyi dus su bya/__de dag gi rtsa ba rig pa rjen sangs bcos min gyi ngo bo 'di sgrim lhod tshod zin gyis ma yengs mi 'dzin par dus dang rgyun du 'bral med tshul gyis skyong*/__yar mar gyi tshes bcu dang nya stong brgyad gsum sogs la ci 'byor pa'i sgo nas tshogs mchod ci nus su bya/__dge rtsa gang byas btang snyoms su ma shor bar bstan 'gro'i don du yongs su bsngo zhing smon lam rnam dag res mtshams sbyar ba rnams gcig las gcig lhag lta bu shin tu gal po che yin pas na bdag gzhan legs su 'dod pa'i skal ldan dag gis de bzhin du 'bad par bya'o/__snying thig gsang mchog rgyal po'i khyad chos dang man ngag gi bye brag zab cing rgya che mu med pa rnams la thos bsam dang lta rtog lan re tsam byed rgyu byung na de 'dra bskal pa brgyar yang rnyed par dka' ba'i skal pa bzang po yin pas rang nyid che 'dod rnyed tshol dang mkhas par grags 'dod sogs rtog ngan gyis ma bslad pa'i sgo nas bka' gter gyi gzhung bzang spyi dang khyad par gong du bshad zin pa ltar mdzod chen bdun dang snying thig ma bu mkha' 'gro'i gsang mdzod mtshungs mtha' bral ba dag la blo rtsal ci yod phyung nas lta rtog zhib mo yang yang byed cing*/__deng dus kyi kha cig ltar rang gi go long shes long ma byung bar chal chol re thos tshad de ma thag nas 'ur sgrogs byas te rlung la mi bskur bar zab don snying la bcang*/__bshad tshod rang gis bzung na nyen chung zhing khe che ba yin mod/__blun po grags rjes su mi 'brang bar mkhas grub tshad ma'i bla ma dam pa chos rgyus dang phan sems can gang na su bzhugs pa'i zhal nas mnyan pa rnams kyang ci srid 'tsho ba'i bar du yal bar mi 'dor ba zhig ma byas na/__phyogs zhen rang bzo res ni gsang ba zab mo'i gting rnyed pa min pas chos gang la yang skur pa mi 'debs shing rang lugs la nan gyis sbyang brtson bya ba ni srid zhi'i legs tshogs thams cad kyi rtsa ba yin no/__/da ni lam de ltar nyams 'og tu chud pa rnams mthar thug gi 'bras bu rdzogs pa'i sangs rgyas kyi go 'phang chen po rang gnas mngon du gyur pa'i dus mtshams bshad par bya te/__spyir nye lam rdo rje theg pas mi tshe gcig gi 'grub pa sogs las khyad par du gyur pa/__tha na mi lo bcu gnyis/__'bring na mi lo gsum/__rab kyi zla ba drug gis 'tshang rgya ba bstan la/__de yang tshe sngon dang da lta'i sbyang brtson rab 'bring la rag las pa yin zhing dngos 'bras ni rdzogs pa'i sangs rgyas kyi sku gnyis mchog dam pa'o/__/de rnams kyis dum bu gsum gyis bsdus pa'i smin grol gyi myur lam tshang la ma nor ba bshad zin te rtogs brjod rdo rje'i glu ni lce btsun gyis ched du brjod pa ste/__e ma smyon pa seng dbang nga :__zhes sogs dang*/__skal ldan rnams la gtad rgya mdzad pa yang 'da' ka'i rdo rje'i tshig rdzogs chen gyi khog snying ling gis phyung ste lag mthil du dngos su bzhag pa 'di'i tshig gi tha ma dus kyi mtha' nas mthar snod ldan gyi ngo skal du snang ba dang*/__de'i mthus 'di dang su 'phrad rnams ring por mi thogs te myur du 'pho chen ye shes rdo rje'i sku bla ma dang mnyam par 'byung ba'i smon lam bzang po rdo rje'i bden tshig dngos su gnang ba'o/__/rtsa ba'i sa bcad gsum pa ye shes kyi mkha' 'gro'i rje mo dpal gyi blo gros ma'i zhal gdams rdo rje'i tshig gis mtha' brgyan pa ni/__dbang dus su ngo sprod kyi tshul du gdams pa dang*/__khrid kyi dus su sa bcad mdo chings byas te ma nor par bkral ba dang*/__nyams su blang dus 'chang pas btags grol mchog tu gyur pa dang*/__dpe rgyun mthong na yang nyams kyi bab 'byung bas mthong grol chen mo dngos dang*/__tshig don sna re yid la 'chang ba dang dpe cha lag tu 'chang na'ang des myur du grol bas dran grol dang reg grol du don gyis grub la/__tshul bzhin du sus bsgom kyang de ni snga ma dag las kyang ches myur du grol ba smos ci dgos pas yon tan bla na med pa de lta bu dang ldan pa yin pa'i phyir na nyung zab gnad 'dril gyi chos 'di ni snying thig nyams su len tshul gzhan las stabs bde zhing tshig don shin tu gsal ba chos tshul gzhan dang ma 'dres shing yod dgos tshad kha tshang la nyams 'og tu mi chud pa'i tshig gi spros pa dang bral ba sogs khyad 'phags zhig yin pa ni mkhas grub bye ba du mas gzigs pher ba lta bu don la gnas pa nyid do/__/de yang dam pa gong ma gzhan dag gis ni chos zab mo thugs rtsis ha cang che bas los yin/__'di la bzo bcos 'phri snon gyis bslad mkhan rnams dang lta rtog rang gar byed mkhan tshun chod kyi tshe srog myur du chod sogs dmod ngan skrag thub pa re mdzad pa dang*/__lha srung btsan pa re la gnyer gtad dam bzhag mdzad 'dug pa mthong mod/__de 'dra zhig yin na ma bris kyang los chog snyam/__ngas ni spel chog nas bris pa yin pas na rang rang gis nyams len re mdzad pa dang*/__gzhan dag mos ldan la spel zhing 'brel 'jog ci nus re byas na da lta dus babs kyi chos red pas ngan 'brel tshun chod la'ang don 'bras gtan nas med pa ni ga la yin/__phan ma thogs rung gnod ni gang yang mi skyel thag chod yin pas de bzhin du thugs bzhag mdzad pa ci nas kyang zhu'o/__/zhes bslu med rdo rje'i bka' gsang bden tshig btsan pos skye 'gro yongs la lhug par gnang ba lta bu'i bka' drin chen po gzhan 'gran bral ba'ang legs par thob byung ba lags so/__/'di ltar theg dgu'i rtse rgyal rdzogs chen yang gsang bla med kyi dgongs don lha lam yangs por rje kun mkhyen bla ma rdo rje 'chang chen po'i rig rtsal khyung chen rgyal pos gshogs 'gros zur bstan tsam bsgyur ba'i shul lam chen por rang 'dra'i blo mig phye ma leb lta bu'i gshogs lhab ci tsam byas kyang phyogs tsam yang mtshon mi nus pa gzhir bcas pas nyes tshogs ci mchis brtse chen thugs kyi dgongs te bzod par bzhes shing dge bas 'di bzung byang chub bar du nam yang 'bral med rjes su 'dzin pa'i rgyur gyur cig__/ces pa 'di yang rje'i bka' slob mkhas dbang du ma'i gral mtha' pa gter ming las rab gling pas gsung zab snga phyi'i 'gag don gang shes zin bris su btab pa yongs su dge bar gyur cig/__//____________________
