JKW-KABAB-13-PA-019-wylie
@#/__/'chi med 'phags ma snying tig gi skong ba rin chen phreng mdzes zhes bya bzhugs so/__@#/__na mo gu ru Ar+YA tA re ye/__de la 'chi med 'phags ma'i dkyil 'khor du tshogs kyi mchod pa sogs kyi skabs skong ba bya bar spro na/__phyi nang gsang ba'i mchod rdzas ci 'byor pa bshams la/__skong rdzas nam mkha' mdzod kyi sngags rgya lan gsum gyis byin gyis brlabs shing*/__phyi nang gsang ba'i skong rdzas rnams dwangs shing thogs pa med pa lha tshogs rnams dgyes pa bskyed pa'i nam mkha' mdzod kyi 'khor lo'i sprin chen por gyur/__oM badz+ra s+pha ra Na khaM gyis rgyas par spel/__hU~M hrIH__rang byung ka dag gdod ma'i klong*/__/'chi med bde ldan zhing gi bdag__/pad+ma'i rigs mchog bcom ldan 'das/__/tshe dpag med mgon thugs dam bskang*/__/'chi bdag bdud tshogs dbyings su gzhom/__/gsang sngags rig sngags kun gyi rje/__/rgyal ba'i gtsug tor las byung ma/__/rnam par rgyal ma'i thugs dam bskang*/__/'khor ba las sgrol tA re ma/__/tu res na ba rnams las sgrol/__/rgyal ba kun gyi yum gyur ma/__/rje btsun 'phags ma'i thugs dam bskang*/__/dpal chen che mchog phyag rgya'i sku/__/'khor 'das srid zhi'i khyab bdag che/__/'od gsal rdo rje'i gsang mdzod 'dzin/__/shrI seng ha'i thugs dam bskang*/__pan grub lnga brgya'i gtsug rgyan che/__/'pho chen dwangs ma'i sku mchog brnyes/__/theg mchog bstan pa'i shing rta che/__/dri med bshes gnyen thugs dam bskang*/__/rtsa gsum rgya mtsho'i spyi gzugs che/__/'chi med rig 'dzin rdo rje'i sku/__/'khor ba srid du rtag bzhugs pa/__/pad+ma saM b+ha'i thugs dam bskang*/__/rnam par snang mdzad lo tsA che/__/ye shes spyan ldan sprul pa'i sku/__/mkhyen rab 'od zer sa gsum khyab/__/bai ro tsa na'i thugs dam bskang*/__/mdo sgyu sems gsum bstan pa'i bdag__/gsang sngags rgya mtsho'i mdzod 'dzin cing*/__/mthu stobs nus pa zla med pa/__/gnub ban chen po'i thugs dam bskang*/__/'jam dpal dbyangs kyi rnam par 'phrul/__/bka' drin mtshungs med chos kyi rgyal/__/gangs ljongs bstan pa'i shing rta 'dren/__/khri srong lde'u btsan thugs dam bskang*/__/yang dag grub pa chen po'i sku/__/rdzu 'phrul thog med nyi zer chibs/__/thugs kyi rig 'dzin grub pa'i rje/__/nam mkha'i snying po'i thugs dam bskang*/__/gu ru'i thugs kyi gzungs ma'i gtso/__/gsang chen bka' yi sdud pa mo/__/mi brjed gzungs thob ting 'dzin brnyes/__/ye shes mtsho rgyal thugs dam bskang*/__/bka' babs bdun gyi mdzod 'chang zhing*/__/gter 'byin mkhas grub kun gyi rje/__/'od gsal sprul pa'i rdo rjer shar/__/mkhyen brtse'i dbang po'i thugs dam bskang*/__/lha sras dam 'dzin rnam par 'phrul/__/zab gter rgya mtsho'i 'khor los bsgyur/__/snyigs ma'i 'gro 'dul rig pa 'dzin/__/mchog gyur gling pa'i thugs dam bskang*/__/bka' gter rab 'byams bstan pa'i bdag__/gsang chen rgya mtsho'i bsdu ba po/__/gsang ba'i bdag po rdo rje chos/__/pad+ma gar dbang thugs dam bskang*/__/rig rnams kun gyi khyab bdag che/__/ye shes spyi gzugs gdod ma'i mgon/__/dran pas srid zhi'i 'jigs 'phrog pa/__/'khor lo'i mgon po'i thugs dam bskang*/__/gzhan yang rtsa brgyud bla ma dang*/__/yi dam zhi khro rab 'byams lha/__/phrin las thogs med mkha' 'gro dang*/__/chos skyong dam can thugs dam bskang*/__hU~M hrIH__dkyil 'khor gtso mo bcom ldan 'das/__/'chi ba med pa'i mchog sbyin ma/__/so sor rtogs pa'i ye shes gzugs/__/'phags ma yab yum thugs dam bskang*/__/zhe sdang rnam par dag pa'i gzugs/__/rdo rje rigs mchog bcom ldan ma/__/mi bskyod rdo rje'i ngo bo nyid/__/rdo rje sgrol ma'i thugs dam bskang*/__/ser sna tshor ba rnam par dag__/rin chen rigs mchog bcom ldan ma/__/rin chen 'byung ldan ngo bo nyid/__/rin chen sgrol ma'i thugs dam bskang*/__/'du shes rtog tshogs rnam par dag__/pad+ma'i rigs mchog bcom ldan ma/__/snang ba mtha' yas ngo bo nyid/__/pad+ma'i sgrol ma'i thugs dam bskang*/__/'du byed sna tshogs rnam par dag__/las kyi rigs mchog macom ldan ma/__/don yod grub pa'i ngo bo nyid/__/las kyi sgrol ma'i thugs dam bskang*/__/rtag par lta ba rnam par dag__/zhi ba'i phrin las mnga' mdzad cing*/__/dkyil 'khor shar gyi sgo skyong ma/__/lcags kyu ma yi thugs dam bskang*/__/chad par lta ba rnam par dag__/rgyas pa'i phrin las mnga' mdzad cing*/__/dkyil 'khor lho yi sgo skyong ma/__/zhags pa ma yi thugs dam bskang*/__/bdag tu lta ba rnam par dag__/dbang gi phrin las mnga' mdzad cing*/__/dkyil 'khor nub kyi sgo skyong ma/__/lcags sgrog ma yi thugs dam bskang*/__/mtshan mar lta ba rnam par dag__/drag po'i phrin las mnga' mdzad cing*/__/dkyil 'khor byang gi sgo skyong ma/__/dril bu ma yi thugs dam bskang*/__/dkyil 'khor chen po'i phyi rim dang*/__/bar mtshams steng 'og thams cad du/__/'chi med rig 'dzin drang srong tshogs/__/tshe lha bye ba 'bum sde dang*/__/chos skyong nor lha gter gyi bdag__/rab 'byams sgyu 'phrul drwa ba che/__/ji snyed bsam yas spro zhing sdud/__/'phags ma'i lha tshogs thugs dam bskang*/__hU~M hrIH__thugs dam bskang ba'i dam rdzas ni/__/mchod yon zhabs bsil me tog spos/__/snang gsal dri chab zhal zas dang*/__/rol mo gzugs sgra dri ro reg__/bkra shis rdzas rtags rgyal srid bdun/__/khang bzang dpag bsam khrus kyi rdzing*/__/skyed tshal gter bum 'dod 'jo'i ba/__/rin chen 'phan gdugs bla bre dang*/__/rnga yab lda ldi phye ma 'phur/__/lha rdzas dar gyi na bza' dang*/__/rin po che yi rgyan cha mdzes/__/nye ba'i rin chen rnam pa bdun/__/snod bcud ri gling bkod pa che/__/glu dbyangs tshigs su bcad pa'i sgra/__/bza' bca' btung ba sna tshogs dang*/__/lha dang lha mo mang po yi/__/bro gar 'du 'phro yid du 'ong*/__/rdo rje'i rigs ma bcu drug dang*/__/sman rag gtor ma tshogs mchod sogs/__/zhing khams rab 'byams dpag med na/__/mchod rdzas bsam yas lhun grub kun/__/kun tu bzang po'i smon lam dang*/__/nam mkha' mdzod kyi ting 'dzin las/__/byung ba'i bde stong rol pa'i rtsal/__/mchod pa'i sprin phung mtha' yas pa/__/dkyil 'khor lha tshogs thams cad kyi/__/rdo rje'i dbang pos dgyes par rol/__/khams gsum snang ba ma lus kun/__/rdo rje'i lus kyi dkyil 'khor dang*/__/'chi med 'phags ma'i rten brten pa/__/lhun gyis grub pa chen por rdzogs/__/de las byung ba'i snang ba'i dngos/__/ji snyed mchod pa'i sprin phung che/__/zag med rang snang bde chen sprin/__/dbyings las byung zhing dbyings kyi rgyan/__/gdod nas dag pa chen po yi/__/gnyug ma mi shigs stong chen klong*/__/'od gsal sgyu 'phrul thig le che/__/ye shes snang ba lam me ba/__/mchod bya mchod byed bral bas bskang*/__/thugs dam bskang ba'i byin rlabs kyis/__/bcas dang rang bzhin nyes pa dang*/__/rtsa ba yan lag dam tshig la/__/'gal 'khrul nongs pa ci mchis pa/__/dkyil 'khor lha tshogs spyan snga ru/__/gnong 'gyod drag pos mthol lo bshags/__/bdag la brtse bas rab dgongs te/__/mi sgrib tshangs pa'i dngos grub stsol/__/skye 'chi 'pho 'gyur spros pa bral/__/'chi bdud rtog tshogs dbyings su zhi/__/'phags ma yid bzhin 'khor lo yi/__/rdo rje gsum mchog 'grub par mdzod/__/ces 'chi med 'phags ma'i thugs tig gi bskang ba 'di'ang rig 'dzin gyi btsun pa kun bzang 'od gsal snying po rtsal gyis sbyar ba 'dis kyang*/__/rang gzhan thams cad 'chi med 'phags ma'i ye shes kyi sku mngon du byed pa'i rgyur gyur cig__/sarba dA mang+ga laM//__//
