JKW-KABAB-13-PA-013-wylie
@#/__/'chi med 'phags ma'i snying thig gi brgyud pa'i gsol 'debs tshe dbang bcud 'dzin ces bya ba bzhugs so/__/rang byung rtag pa'i rdo rje tshe dpag med/__/'chi bdag bdud 'joms gtsug tor rnam par rgyal/__/dkyil 'khor dbang phyug yid bzhin 'khor lo la/__/gsol ba 'debs so tshe dbang dngos grub stsol/__/'gyur med ye shes rang gzugs shrI siM ha/__/'pho bral 'pho ba chen po bi ma la/__/rdo rje'i sku brnyes pad+ma saM b+ha ba/__/gsol ba 'debs so tshe dbang dngos grub stsol/__/chos rgyal yab sras gdams pa'i snod ldan rje/__/bai ro gnubs chen mchog dbyangs nam snying 'bangs/__/tshe lam gsang ba'i grogs mchog mtsho rgyal mar/__/gsol ba 'debs so tshe dbang dngos grub stsol/__/'od gsal klong nas sprul pa'i rdo rjer shar/__/dri med ye shes 'od brgya'i gzi brjid 'phro/__/'gro ba'i mun sel dpal ldan bla ma la/__/gsol ba 'debs so tshe dbang dngos grub stsol/__/thugs thig bka' bab gdams zab bcud 'dzin pa'i/__/rtsa brgyud bla ma 'chi med dkyil 'khor lha/__/dpa' bo DA ki dam can gter srung la/__/gsol ba 'debs so tshe dbang dngos grub stsol/__/yongs grub rdo rje'i bdud rtsis lus khams kyi/__/'pho ba'i dri bkrus gnyug ma'i thig le gsol/__/lhar snang lus la brten pa'i srog gi tshe/__/sku yi rdo rjer 'grub par byin gyis rlobs/__/thabs dang shes rab thams cad bde chen ngang*/__/thun mong thun min gnad kyis zag pa kun/__/'gyur ba med bsdams 'pho bcas thig le'i tshe/__/gsung gi rdo rjer 'grub par byin gyis rlobs/__/snang ba 'khrul med 'od gsal sbubs su tshud/__/rig pa dri med ka dag lhum su zhugs/__/nam yang mi 'gyur rtag pa gnyug ma'i tshe/__/thugs kyi rdo rjer 'grub par byin gyis rlobs/__/rgyu 'bras skye 'chi'i 'jigs pa kun las grol/__/'chi med rtag pa dam pa'i tshe dbang thob/__/'khor ba srid du rgyun mi 'chad pa'i sku/__/ye shes rdo rjer 'grub par byin gyis rlobs/__/zhes pa 'di'ang de wI ko Ti tsA 'dra rin chen brag gi snying po dpal spungs yangs khrod kun bzang bde chen 'od gsal gling du pad+ma gar gyi dbang phyug rtsal gyis bris pa 'chi med rdo rje'i srog 'grub pa'i rgyur gyur cig__/dge legs 'phel//
