JKW-KABAB-11-DA-027-wylie
_@#/__/rta mgrin dregs pa kun sgrol gyi las byang gi 'don 'grigs phyogs mtshon bzhugs//na mo gu ra be/__dpal rta mgrin dregs pa kun sgrol gyi phrin las btang ba'i tshul la gsum/__bsnyen pa/__sgrub chen dang dbang bskur/__las sbyor zlog pa'i dus so/__/de gsum ka las byang dang mngon rtogs khrigs su bsdebs pa 'di nyid la brten dgos pas spyi khog nas 'dra yang mngon rtogs 'dor len dang rgyas bsdus kyi khyad par rnams shes dgos pas dang po rang don bsnyen pa bya ba'i skabs su man ngag gsal sgron nyid rtsa bar byas nas nang lus dkyil ltar bsgom pa nyid gtsor bton dgos pas na/__de nas bshad pa'i dkyil 'khor rten rdzas gtor mchod rnams tshogs par bya/__spros med kyi rnal 'byor pa dang 'byor pa dman pa dag gis bsnyen pa byed na spyi mthun sman raka gtor gsum tsam la brten kyang chog ste bsnyen pa lus dkyil gtso che bas so/__/phrin las kyi thog mar tshig bdun dang brgyud pa'i gsol 'debs bya/__dkar bgegs gter rnying las byung ba'i rgyas pa zhig sbyar na legs par snang bas dgongs 'dus lugs lta bu'i dkar gtor btang*/__rten rdzas yod na skabs 'dir 'god dgos pas phur pa dang byugs rdzas sogs mdun du bzhag la/__rang nyid skad cig gis dpal chen rta mgrin sku mdog dmar po zhal gcig phyag gnyis khro bo'i chas can/__phyag g.yas rdo rje'i tho ba phyar zhing g.yon sdigs mdzub kyi rtse la me zhags 'phro ba snang ba mtha' yas kyis dbu brgyan cing me phung 'bar ba'i dbus na 'gying bar gyur/__ces gsal btab la/__gsal sgron ltar/__rang nyid rta mgrin gyi skur gsal ba'i sogs phur bskyed/__byugs bdug brab gsum bzhug gsol rnams byas la/__bka' brgyad bde 'dus kyi dus gsum bde gshegs lta bu byin 'bebs spyi 'gro dang gzi byin bskyed pa'i sngags dbyangs bya/__de nas bgegs gtor byin brlab bsngo ba sogs gter rnying gzhan ltar byas la las byang gi bgegs bskrad/__me mtshams/__khro bcu'i mtshams gcod/__skyabs sems/__mchod pa byin brlab brda sgo phyag__/dam bca'/__byin 'bebs/__bshags pa/__sman rag gtor gsum byin brlab bcas sngon 'gro rnams rgyas par btang*/__dngos bzhi'i bskyed rim gsal sgron ltar/__oM ma hA shU n+ya tA sogs nas/__rigs kyi bdag pos dbur brgyan par gyur/__ces pa'i bar gyis lus dkyil gsal gdab/__las byang ltar snyan gsan dbab pa nas bstod pa'i bar btang*/__de nas gsal sgron las/__thugs ka'i ye shes sems dpa' sogs kyis 'dzab dgongs gsal btab la/__las byang ltar bsnyen sngags 'bru lnga bcu rtsa brgyad pa bzla/__thun mthar kha skong dbyangs gsal dang rten snying*/__stong tshigs ye shes lha tshogs dang yig brgya brjod/__zur gsal gtor ma'i las rim byin brlab nas mchod bstod bar kyis gtor ma 'bul/__nongs bshags gtor mgron brtan bzhugs spyi mthun/__gsal sgron ltar/__phyi snod kyi 'jig rten sogs kyis bsdu/__chos kyi sku'i dbyings sogs kyis thun mtshams lhar ldangs/__dge bsngo bkra shis las byang ltar bya/__thun rjes ma rnams la las byang gi skyabs sems dang mchod pa byin brlab/__sman raka gtor gsum sngags tsam gyis byin brlab/__gsal sgron ltar lha bskyed/__las byang gi spyan 'dren/__hrIH__nub phyogs bde ldan nas/__dbang gi rta skad 'tsher cing gshegs su gsol:__sngags brjod/__/bzhugs gsol yang de mtshungs/__hU~M/_brjod med spros bral sogs tshan dang po'i mthar sngags brjod/__phyag 'tshal dang po'i sh+lo ka gnyis kyis mthar sngags/__mchod pa/__hU~M/__dbus mtha' med pa nas/__tshim par bzhes su gsol:__ces pa tsam gyi mthar gtor ma'i las rim nas 'byung ba'i mchod pa dang*/__bstod pa sh+lo ka tsam gyis 'thus par byas na stabs bde'o/__/dgongs thun la tshogs mchod dus las byang sogs skabs su 'bul dgos shing lhag chog las byang dkyus kyis 'thus/__de 'phros gtang rag mchod bstod dang nongs bshags phyin chad mthar dbyung*/__snga thun la brgyud 'debs/__mtshams gcod sogs sngon 'gro dang las byang rgyas pa tshar re grub na legs/__bsnyen tshad rgyas pa 'bum phrag bzhi/__las rung tsam la 'bum phrag gcig gis grub/__de ltar rtsa ba bsnyen thebs nas sgrub pa'i sngags gsal sgron nas 'byung ba ltar gtso bo la 'bum/__'khor so so'i sgos bsnyen khri tsho re bzla/__de grub nas las sbyor sa bcad tsam du bsnyen sngags la las byang gi sngags sham spyir gdags pa bsnyen sgrub bcu cha tsam dang*/__bye brag sgos srog gang 'os bzla/__bsnyen sgrub grub skabs bzlas pa dang gtor 'bul rjes bstod pa rngams chen 'gying glu btang*/__tshogs dang lhag chog rgyas pa/__brtan ma chad mdo bro rab bcas sbyar/__gtang rag mchod bstod rgyas pa dang*/__dngos grub blangs/__nongs bshags la sogs dkyus ltar la/__kha skong sbyin sreg bsnyen pa'i bcu cha dgos pas sreg pa me'i las gzhir bzhag__/thab dang bsreg rdzas lha'i sku mdog sngags sogs zhi ba kho nar bsgyur shes par bya'o/__/des lus dkyil la brten te bsnyen pa la nang gses su dbye ba'i bsnyen sgrub las sbyor gsum ka grub pa yin no/__/gnyis pa sgrub pa dngos phyi dkyil la brten pa gtso che bas/__dkyil 'khor dang rten rdzas gtor mchod sogs gsal sgron nas bshad pa ltar 'tshogs par byas te/__'don 'grigs ltar bsnyen pa'i skabs su smos pa nyid sor bzhag pa las/__dngos gzhi'i bskyed rim gsal sgron lus dkyil mi sbyor bar las byang dkyus kyi mngon rtogs dang bzlas dmigs kyang las byang las 'byung ba de kas 'thus shing*/__bsgom tshul bdag mdun dbyer med la bzlas pa'i 'gor dzaba? khang dbye/__bsnyen sngags ring mo dang gsal sgron gyi sgrub sngags gtso bor bzla/__las sbyor yang skabs 'di'i rjes thob tu gal che/__thun mthar kha skong stong tshigs gtor 'bul rnams sngar ltar dang*/__thun gang rung zhig gi mthar bstod bskul chen mo nges par sbyor zhing tshogs mchod kyang nyin re bzhin grub dgos/__thun snga ma rnams la gtor 'bul nongs bshags brtan bzhugs grub nas 'jog__/bsdu ldangs mi dgos/__thun rjes ma rnams la mngon rtogs kyis gsal 'debs bskyar/__spyan 'dren sogs mdor bsdus bya ba'i tshul gong du smos pa ltar dang*/__dgongs mo chos srung gtor 'bul/__srod thun mthar mdun bskyed brtan bzhugs/__bdag bskyed bsdu ldangs sogs bya/__sgrub pa dus grangs rtags kyi tshad gang byed kyang grub pa'i rjes kyi bya ba rnams kyang bsnyen pa'i skabs su smos pa bzhin no/__/sgrub chen tshom bu tshogs sgrub byed na sgrub khog spyi 'gro zhig sbyar ba'i phyag len dang cho ga'i 'gros rnams de ltar la/__rten phur rgyan 'god skabs su 'god/__byin 'bebs sgrub khog gi dkyus ltar sbyar bas 'thus/__las byang gong du sgrub pa'i skabs su bshad pa ltar la/__'di thams cad la mngon rtogs skabs khro bcu srung ba'i dus kyi dkar po kho na bsgom/__sgrub chen skabs 'dir mchod bstod tshogs skong sogs spros pa ji tsam rgyas bzhin legs kyang bzlas grangs mi 'gro na cung zad bsdu ba sogs skabs bstun bya'o/__/dbang bskur skabs kyi 'don 'grigs ni dbang bsgrigs su bshad pa ltar ro/__/gsum pa zlog pa'i las sbyor skabs/__rten phur 'god pa dang bdag bskyed las dkyil bsgom pa sogs gsal sgron du bshad pa rnams mi dgos pas/__brgyud 'debs dang dkar bgegs sngon du 'gro bas las byang nyid mthar chags su btang*/__mngon rtogs lha bskyed skabs bdag bskyed 'khor du khro bcu srung ba'i dus ltar dkar po dang*/__zlog gtor gyi go sar mdun bskyed kyi khro bcu zlog dus kyi nag po bsgom pa ste cho ga ris gcig gis bdag mdun gnyis su bsgoms nas spyan 'dren man chad dus gcig tu byed pa stabs bde ba las/__zlog dkyil zur du 'don sgom byed pa sogs 'di rang la yig cha sger du yod par snang*/__bzlas pa'i skabs bsnyen sgrub las sbyor gsum ka'i sngags bzla grub na legs shing mi 'grub na bsnyen sngags ring mo nyid spyi dril yin pas de dang*/__sngags sham spyir gdags pa tsam gyis 'thus/__stong tshigs mchod bstod/__gtor 'bul bcas grub na chos srung gtor chog btang*/__tshogs byin brlab nas skong bshags yan song mtshams bde gshegs spyi bskul chen mo sbyar/__gser skyems dpang gzu rnams spyi 'gro btang*/__las byang gi hom bskyed dang bskul sh+lo ka gcig po'i 'phros/__tshig lhug 'gugs gzhug spyi 'gro lan gsum/__las byang gi phyag rgya bzhi bskul/__dbye 'bebs drug po re re'i gsham du/__bsnyen sngags kyi gsham du so so'i sngags btags pa lan gsum mam re re brjod/__bsgral bstab rjes su rtsa ba'i bstod pa rngams chen 'gying glu gyer/__zlog byang tshar gang 'os zlog sngags bgrang ba rnams bya/__/zhag grangs byed na 'di mtshams tshogs la rol cing lhag ma sogs rjes chog mthar dbyung*/__gtor ma 'phen skabs lhag chog rjes gser skyems btang*/__brtan ma dang chad mdo'i rjes zor du bskul ba gtor ma'i las rim mjug gi__/hU~M/__dgongs su gsol lo sogs zlog thung de tshar gcig gam gsum brjod la gtor ma 'phang*/__bro brdung ba dang tshe 'gugs spyi rgyug byang gter lta bur sbyar/__gtang rag mchod bstod nas bkra shis brjod pa'i bar snga ma rnams ltar byas pas grub bo/__/zhes pa'ang blo rmongs rnams la phyogs mtshon tsam du pad+ma gar dbang blo gros mtha' yas kyis bris pa dge legs 'phel//__//__________________
