JKW-KABAB-05-CA-009-wylie
[¿ ]dpal bka' 'dus kyi rig 'dzin brgyud pa'i gsol 'debs 'bring po bzhugs so:___bka' 'dus rig 'dzin tshogs la phyag 'tshal lo:__o rgyan chen po pad+ma 'byung gnas kyis:__bod yul g.yo ru khra 'brug gnas mchog tu:__snod ldan rje 'bangs 'dus pa rgya mtsho la:__bka' 'dus smin grol yongs su rdzogs pa'i tshe:__'phrul gyi shog pur mkha' 'gro'i yi ge dang :__pad+ma'i bka' rtags phyag rgyar bcas nas su:__glegs bam kun bzhengs rab gnas me tog 'thor:__ma 'ongs don phyir shel gyi brag phug tu:__gsang ba'i rgyas btab smon lam mdzad pa'i dus:__gter bdag ma mo mkha' 'gro'i tshogs rnams kyis:__phyi rabs don du rig 'dzin brgyud pa la:__gsol ba 'debs tshul ji ltar bya zhes zhus:__gu ru dgyes nas dgongs brda bsnyan brgyud kyi:__rig 'dzin thams cad pad+ma bdag la 'dus:__bdag dang dbyer med gsol ba 'di btab na:__glog ltar myur bas byin gyis brlab par 'gyur:__de skad gsungs nas rdo rje'i bka' 'di stsal:__e ma hoH__'og min bkod pa lhun grub pho brang du:__dkyil 'khor rgya mtsho'i bdag nyid kun tu 'chang :__brjod med bsam 'das spros bral chen po'i ngang :__dag pa gnyis lngan chos sku'i ye shes brnyes:__dam pa khyed kyi rjes su bdag sgrub phyir:__gsol ba 'debs so chos sku kun tu bzang :__byin gyis rlobs shig o rgyan rin po che:__smin grol dbang bskur mchog thun dngos grub stsol:__mi 'gyur stug po bkod pa'i pho brang du:__bde chen kha sbyor bdag nyid rdo rje sems:__'gags med gsal dag snang ba chen po'i ngang :__nges pa lnga ldan longs sku'i ye shes brnyes:__dam pa khyed kyi rjes su bdag sgrub phyir:__gsol ba 'debs so longs sku rdo rje sems:__byin gyis rlobs shig o rgyan rin po che:__smin grol dbang bskur mchog thun dngos grub stsol:__byang phyogs lcang los brgyan pa'i pho brang du:__sangs rgyas thugs kyi sdud po gsang ba'i bdag:__rigs can rnams la chos kyi char 'bebs dang :__ma nges 'gro 'dul sprul sku'i ye shes brnyes:__dam pa khyed kyi rjes su bdag sgrub phyir:__gsol ba 'debs so dpal ldan gsang ba'i bdag:__byin gyis rlobs shig o rgyan rin po che:__smin grol dbang bskur mchog thun dngos grub stsol:__o rgyan d+ha na ko Sha'i pho brang du:__yo ga gsum gyi mdzod 'dzin kuny+dza ra:__lha klu mi yi 'dus pa rgya mtshor bcas:__tan+t+ra yongs rdzogs 'dzin cing spel bar mdzad:__dam pa khyed kyi rjes su bdag sgrub phyir:__gsol ba 'debs so rig 'dzin kuny+dza ra:__byin gyis rlobs shig o rgyan rin po che:__smin grol dbang bskur mchog thun dngos grub stsol:__rang byung he ru ka yi pho brang du:__rigs ldan chen po de ba bzang skyong zhabs:__bka' babs mchog brnyes dngos grub chu bo brdol:__gsang ba'i rgyud lung sbas pa'i phyag rgyas btab:__dam pa khyed kyi rjes su bdag sgrub phyir:__gsol ba 'debs so de ba bzang skyong zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__mchod rten chen po bde byed brtsegs pa ru:__ye shes mkha' 'gro'i gtso mo las kyi dbang :__bde chen bde ba'i gar gyis gsang mdzod dbye:__mi yul skal ldan thams cad tshim par mdzad:__dam pa khyed kyi rjes su bdag sgrub phyir:__gsol ba 'debs so las dbang chos kyi 'tsho:__byin gyis rlobs shig o rgyan rin po che:__smin grol dbang bskur mchog thun dngos grub stsol:__chos bzang sprin gyi yang rdzong dur khrod du:__grub pa'i rig 'dzin chen po nyi shu gcig:__bskyed rdzogs lam las mchog gi dngos grub brnyes:__rdzu 'phrul gar gyis snang srid g.yo bar mdzad:__dam pa khyed kyi rjes su bdag sgrub phyir:__gsol ba 'debs so rig 'dzin nyi shu gcig:__byin gyis rlobs shig o rgyan rin po che:__smin grol dbang bskur mchog thun=__o rgyan sprin nag 'dus pa'i dur khrod du:__rig 'dzin dga' rab rdo rje yab yum gyis:__spyi dpal lha tshogs sum brgya so lnga bsgrubs:__grub rtags rgyal tshab chen po'i sa la gnas:__dam pa khyed kyi rjes su bdag sgrub phyir:__gsol ba 'debs so dga' rab rdo rje'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__bru sha'i so sa gling gi dur khrod du:__slob dpon hU~M chen k+Sha ra yab yum gyis:__yang dag lha tshogs drug cu rtsa brgyad bsgrubs:__grub rtags ru lu'i dbyangs kyis 'dzam gling khyab:__dam pa khyed kyi rjes su bdag sgrub phyir:__gsol ba 'debs so slob dpon hU~M kA ra:__byin gyis rlobs shig o rgyan rin po che:__smin grol dbang bskur mchog thun dngos grub stsol:__sing+ga'i yul gyi kuny+dza'i dur khrod du:__slob dpon Ar+Ya de ba yab yum gyis:__phreng ba'i lha tshogs brgya dang rtsa brgyad bsgrubs:__grub rtags rdo rje'i zhabs kyis mkha' la bskyod:__dam pa khyed kyi rjes su bdag sgrub phyir:__gsol ba 'debs so Ar+Ya de ba rje:__byin gyis rlobs shig o rgyan rin po che:__smin grol dbang bskur mchog thun dngos grub stsol:__ma ga d+ha yi gsang lung dur khrod du:__mkhas pa a d+hi nI la yab yum gyis:__phyag na rdo rje'i lha tshogs brgyad cu bsgrubs:__grub rtags dam tshig phyag rgya dngos su gnang :__dam pa khyed kyi rjes su bdag sgrub phyir:__gsol ba 'debs so a d+hi nI la'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__mu stegs kang+ka tshal gyi dur khrod du:__rigs ldan chen po badz+ra king+ka ras:__rdo rje rtsal rdzogs sum cu rtsa drug bsgrubs:__grub rtags ci bzhed pho nya'i dngos grub brnyes:__dam pa khyed kyi rjes su bdag sgrub phyir:__gsol ba 'debs so badz+ra king+kar:___byin gyis rlobs shig o rgyan rin po che:__smin grol dbang bskur mchog thun dngos grub stsol:__za hor dga' ba tshal gyi dur khrod du:__mtsho skyes pad+ma badz+ra yab yum gyis:__rig 'dzin bla ma brgyad cu'i tshom bur bsgrubs:__grub rtags dran pa tsam gyis byin rlabs mdzad:__dam pa khyed kyi rjes su bdag sgrub phyir:__gsol ba 'debs so pad+ma badz+ra rtsal:__byin gyis rlobs shig o rgyan rin po che:__smin grol dbang bskur mchog thun dngos grub stsol:__he sa'i b+hi ma brdal ba'i dur khrod du:__rigs ldan slob dpon lU hi yab yum gyis:__bde mchog lha tshogs drug cu rtsa gnyis bsgrubs:__grub rtags 'ja' tshon lta bu'i sku ru gyur:__dam pa khyed kyi rjes su bdag sgrub phyir:__gsol ba 'debs so slob dpon lU hi pa:__byin gyis rlobs shig o rgyan rin po che:__smin grol dbang bskur mchog thun dngos grub stsol:__li yul 'ja' tshon tshal gyi dur khrod du:__slob dpon 'jam dpal bshes gnyen yab yum gyis:__gshin rje'i lha tshogs drug cu rtsa lnga bsgrubs:__grub rtags las kyi ya ma bran du 'khol:__dam pa khyed kyi rjes su bdag sgrub phyir:__gsol ba 'debs so slob dpon 'jam dpal bshes:__byin gyis rlobs shig o rgyan rin po che:__smin grol dbang bskur mchog thun dngos grub stsol:__rgya nag bsil sbyin tshal gyi dur khrod du:__slob dpon dz+nyA na sU tra yab yum gyis:__rat+na rtsal rdzogs lnga bcu rtsa lnga bsgrubs:__grub rtags snod bcud thams cad 'dod rgur sprul:__dam pa khyed kyi rjes su bdag sgrub phyir:__gsol ba 'debs so dz+nyA na sU tra che:__byin gyis rlobs shig o rgyan rin po che:__smin grol dbang bskur mchog thun dngos grub stsol:__'a sha he chen brdal ba'i dur khrod du:__slob dpon nA gA rdzu na yab yum gyis:__rta mgrin lha tshogs lnga bcu rtsa lnga bsgrubs:__grub rtags rdo rje'i gsung gi dngos grub brnyes:__dam pa khyed kyi rjes su bdag sgrub phyir:__gsol ba 'debs so nA gA rdzu+u na che:__byin gyis rlobs shig o rgyan rin po che:__smin grol dbang bskur mchog thun dngos grub stsol:__kha che gsang lam bsnol ba'i dur khrod du:___slob dpon Dom+b+hi he ru yab yum gyis:__dgyes rdor lha tshogs drug cu rtsa gnyis bsgrubs:__grub rtags brtul zhugs spyod pas 'gro don mdzad:__dam pa khyed kyi rjes su bdag sgrub phyir:__gsol ba 'debs so Dom+b+hi he ru ka:__byin gyis rlobs shig o rgyan rin po che:__smin grol dbang bskur mchog thun dngos grub stsol:__b+he ta drwa ba gtsug dgu'i dur khrod du:__slob dpon in+d+ra bo d+hi yab yum gyis:__gsang 'dus lha tshogs brgya dang sum cu bsgrubs:__grub rtags bde ba chen po'i ye shes brnyes:__dam pa khyed kyi rjes su bdag sgrub phyir:__gsol ba 'debs so in+d+ra bo d+hi zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__tho gar ke sa ra yi dur khrod du:__gu ru shrI siM ha yab yum gyis:__pad+ma rtsal rdzogs dgu bcu rtsa brgyad bsgrubs:__grub rtags skye 'chi med pa'i rig 'dzin brnyes:__dam pa khyed kyi rjes su bdag sgrub phyir:__gsol ba 'debs so gu ru shrI siM ha:__byin gyis rlobs shig o rgyan rin po che:__smin grol dbang bskur mchog thun dngos grub stsol:__ga'u shod kyi bsil tshal dur khrod du:__slob dpon bi ma mi tra yab yum gyis:__che mchog lha tshogs bdun cu rtsa gnyis bsgrubs:__grub rtags dwangs ma ye shes sku ru gyur:__dam pa khyed kyi rjes su bdag sgrub phyir:__gsol ba 'debs so slob dpon bi ma la:__byin gyis rlobs shig o rgyan rin po che:__smin grol dbang bskur mchog thun dngos grub stsol:__sham+b+ha la yi dur khrod ma la yar:__chos rgyal zla ba bzang po yab yum gyis:__dus 'khor brgya dang drug cu rtsa bzhi bsgrubs:__grub rtags rdo rje'i gdung gi dngos grub brnyes:__dam pa khyed kyi rjes su bdag sgrub phyir:__gsol ba 'debs so chos rgyal zla ba bzang :__byin gyis rlobs shig o rgyan rin po che:__smin grol dbang bskur mchog thun dngos grub stsol:__stag gzig nA ga pU ra'i dur khrod du:__rigs ldan sgeg pa rdo rje yab yum gyis:__mkha' klong lha tshogs brgya dang bcu bdun bsgrubs:__grub rtags nam mkha' mdzod kyi dngos grub brnyes:__dam pa khyed kyi rjes su bdag sgrub phyir:__gsol ba 'debs so sgeg pa rdo rje'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__ge sar yul gyi dpung 'joms dur khrod du:___bram ze sA ra tsan+d+ra yab yum gyis:__karma rtsal rdzogs brgya dang lnga bcu bsgrubs:__grub rtags sna tshogs las kyi dngos grub bsnyes:__dam pa khyed kyi rjes su bdag sgrub phyir:__gsol ba 'debs so bram ze sA ra ba:__byin gyis rlobs shig o rgyan rin po che:__smin grol dbang bskur mchog thun dngos grub stsol:__ma ru tse yul 'gro lding dur khrod du:__slob dpon d+ha na saM skr-i yab yum gyis:__srid pa ma mo bdun cu rtsa bzhi bsgrubs:__grub rtags bde ba chen po'i gzi brjid 'bar:__dam pa khyed kyi rjes su bdag sgrub phyir:__gsol ba 'debs so d+ha na saM skr-i ta:__byin gyis rlobs shig o rgyan rin po che:__smin grol dbang bskur mchog thun dngos grub stsol:__srin yul gtsug na me 'bar dur khrod du:__slob dpon kro d+ha rak+sha yab yum gyis:__phur pa'i lha tshogs brgyad cu rtsa bzhi bsgrubs:__grub rtags dregs pa kun gyi snying la gzir:__dam pa khyed kyi rjes su bdag sgrub phyir:__gsol ba 'debs so kro d+hA rak+sha ba:__byin gyis rlobs shig o rgyan rin po che:__smin grol dbang bskur mchog thun dngos grub stsol:__u pa la yi dur khrod me na yar:__slob dpon bud+d+ha gu h+ya yab yum gyis:__dregs pa kun 'dul lha tshogs bzhi bcu bsgrubs:___grub rtags lha srin tshogs rnams bran du 'khol:__dam pa khyed kyi rjes su bdag sgrub phyir:__gsol ba 'debs so slob dpon gu h+ya pa:__byin gyis rlobs shig o rgyan rin po che:__smin grol dbang bskur mchog thun dngos grub stsol:__mtha' 'khob phung lung nag po'i dur khrod du:__slob dpon shAn+tiM gar+b+ha yab yum gyis:__mngon spyod lha tshogs nyi shu rtsa brgyad bsgrubs:__grub rtags dmod pa'i mtshon chas dgra bgegs 'joms:__dam pa khyed kyi rjes su bdag sgrub phyir:__gsol ba 'debs so slob dpon shAn+tiM g+har:__byin gyis rlobs shig o rgyan rin po che:__smin grol dbang bskur mchog thun dngos grub stsol:__sa hor rat+na pU ra'i grong khyer du:__slob dpon pad+ma 'byung gnas man+dA ras:__dpal chen bka' 'dus yongs rdzogs dkyil 'khor bsgrubs:__grub rtags sangs rgyas kun dang gnyis su med:__dam pa khyed kyi rjes su bdag sgrub phyir:__gsol ba 'debs so 'chi med pad+ma 'byung :__byin gyis rlobs shig o rgyan rin po che:__smin grol dbang bskur mchog thun dngos grub stsol:__!__brag dmar 'om bu tshal gyi pho brang du:__mnga' bdag khri srong lde'u btsan yab yum gyis:__rtsa gsum kun 'dus snying po'i ye shes bsgrubs:__grub rtags dgongs pa mi g.yo mkha' ltar khyab:__dam pa khyed kyi rjes su bdag sgrub phyir:__gsol ba 'debs so chos rgyal khri srong rje:__byin gyis rlobs shig o rgyan rin po che:___smin grol dbang bskur mchog thun dngos grub stsol:__shangs kyi zab lung ma tshor gnyan phug tu:__rgyal sras mu tig btsad po yab yum gyis:__spyi dpal bud+d+ha rtsal rdzogs zhal gzigs shing :__phyogs las rnam par rgyal ba'i dngos grub gnang :__dam pa khyed kyi rjes su bdag sgrub phyir:__gsol ba 'debs so rgyal sras chos kyi rje:__byin gyis rlobs shig o rgyan rin po che:__smin grol dbang bskur mchog thun dngos grub stsol:__lho brag mkhar chu gnyan gyi dben gnas su:__gnubs ban nam mkha'i snying po yab yum gyis:__yang dag thugs kyi lha tshogs zhal gzigs shing :__nyi ma'i zer la chibs nas gshegs bzhud mdzad:__dam pa khyed kyi rjes su bdag sgrub phyir:__gsol ba 'debs so slob dpon nam mkha'i snying :__byin gyis rlobs shig o rgyan rin po che:__smin grol dbang bskur mchog thun dngos grub stsol:__gtsang gi jo mo kha rag brag phug tu:__slob dpon nyi ma grags dang byang chub snying :__rdo rje phreng ba'i lha tshogs zhal gzigs shing :__sku lus 'ja' dang me phung thig ler bsgyur:__dam pa khyed kyi rjes su bdag sgrub phyir:__gsol ba 'debs so nyi ma byang chub snying :__byin gyis rlobs shig o rgyan rin po che:__smin grol dbang bskur mchog thun dngos grub stsol:__khams kyi seng ge brag gi mtha' rtsa ru:__grub chen g.yu sgra snying po yab yum gyis:__phyag na rdo rje'i lha tshogs zhal gzigs shing :__sku lus gser gyi rdo rjer sprul zhing bsgyur:__dam pa khyed kyi rjes su bdag sgrub phyir:__gsol ba 'debs so grub chen g.yu sgra snying :__byin gyis rlobs shig o rgyan rin po che:__smin grol dbang bskur mchog thun dngos grub stsol:__lung gsum dkar po ljongs kyi dben gnas su:__rig 'dzin d+harma b+ha dra yab yum gyis:__rdo rje rtsal rdzogs lha tshogs zhal gzigs shing :__mkha' 'gro 'byung po'i tshogs kun bran du bkol:__dam pa khyed kyi rjes su bdag sgrub phyir:__gsol ba 'debs so d+harma b+ha dra'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__bu le gangs kyi dben gnas nyams dga' bar:__mkhas pa legs sbyin nyi ma yab yum gyis:__rig 'dzin bla ma'i lha tshogs zhal gzigs shing :__mthong ba'i chos la phyag rgya chen po grub:__dam pa khyed kyi rjes su bdag sgrub phyir:__gsol ba 'debs so mkhas pa legs sbyin nyi:__byin gyis rlobs shig o rgyan rin po che:__smin grol dbang bskur mchog thun dngos grub stsol:__gnas chen tsA ri g.yu mtsho'i dben pa ru:__yon tan mchog dang sna nam ye shes sdes:__yi dam bde mchog lha tshogs zhal gzigs shing :__bden pa'i don mthong sgrib med mkhyen pa rgyas:__dam pa khyed kyi rjes su bdag sgrub phyir:__gsol ba 'debs so yon tan ye shes sde:__byin gyis rlobs shig o rgyan rin po che:__smin grol dbang bskur mchog thun dngos grub stsol:__dben gnas sgrags kyi yang rdzong gsang phug tu:__sangs rgyas ye shes 'bro ban sprin 'byin gyis:__'jam dpal gshin rje'i lha tshogs zhal gzigs shing :__snang sems ro gcig brag la phur bus btab:__dam pa khyed kyi rjes su bdag sgrub phyir:__gsol ba 'debs so 'bro ban sprin 'byin zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__'ol kha 'gar phug gnyan po'i brag skyibs su:__'phags pa shes rab shud bu khong sleb gnyis:__rat+na rtsal rdzogs lha tshogs zhal gzigs shing :__bde chen brdal ba thig le'i sku ru grub:__dam pa khyed kyi rjes su bdag sgrub phyir:__gsol ba 'debs so 'phags pa shud bu'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__bsams yas mchims phu'i ge gong dben rtsa ru:__rgyal ba mchog dbyangs rdo rje bdud 'joms gnyis:__pad+ma gsung gi lha tshogs zhal gzigs shing :__rta skad gtsug bton dzam gling sum gnyis thos:__dam pa khyed kyi rjes su bdag sgrub phyir:__gsol ba 'debs so rgyal mchog bdud 'joms rtsal:__byin gyis rlobs shig o rgyan rin po che:__smin grol dbang bskur mchog thun dngos grub stsol:__kong po bu chu ljongs dkar dben gnas su:__cog ro klu yi rgyal mtshan mched gnyis kyis:__dgyes pa rdo rje'i lha tshogs zhal gzigs shing :__me phung mtshor bsgyur pad+ma'i steng du bzhugs:__dam pa khyed kyi rjes su bdag sgrub phyir:__gsol ba 'debs so klu yi rgyal mtshan zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__mkha' 'gros byin brlabs dpal gyi chu bo rir:__dgongs pa gsal dang chos kyi lhun po'i sdes:__gsang ba 'dus pa'i lha tshogs zhal gzigs shing :__mtha' bral don rtogs mkha' la bya ltar lding :__dam pa khyed kyi rjes su bdag sgrub phyir:__gsol ba 'debs so dgongs gsal chos kyi lhun:__byin gyis rlobs shig o rgyan rin po che:__smin grol dbang bskur mchog thun dngos grub stsol:__gangs dkar ti se'i glang chen phug pa ru:__mon mo bkra shis khye 'dren skyid lcam gyis:__pad+ma rtsal rdzogs lha tshogs zhal gzigs shing :__rdo rje'i lus gyur tshe la dbang ba thob:__dam pa khyed kyi rjes su bdag sgrub phyir:__gsol ba 'debs so ye shes mkha' 'gro'i zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__dben gnas yar klung shel gyi brag phug tu:__dz+nyA na ku mA dkon mchog 'byung gnas kyis:__che mchog yon tan lha tshogs zhal gzigs shing :__bdud rtsi'i rgyun 'bebs rdzu 'phrul sna tshogs ston:__dam pa khyed kyi rjes su bdag sgrub phyir:__gsol ba 'debs so dz+nyA na dkon mchog 'byung :__byin gyis rlobs shig o rgyan rin po che:__smin grol dbang bskur mchog thun dngos grub stsol:__la stod srin po rdzong gi dben gsum du:__klu yi dbang po A tsar gsal mchog gis:__dus kyi 'khor lo'i lha tshogs zhal gzigs shing :__mngon shes lnga ldan ye shes snang ba 'phel:__dam pa khyed kyi rjes su bdag sgrub phyir:__gsol ba 'debs so klu dbang gsal ba'i mchog:__byin gyis rlobs shig o rgyan rin po che:__smin grol dbang bskur mchog thun dngos grub stsol:__yar klung spu bra che chung dben gnas su:__gnyan chen dpal dbyangs sna nam ldang khri yis:__mkha' klong 'khyil ba'i lha tshogs zhal gzigs shing :__sa 'og gter 'byin rdzu 'phrul zhabs dang ldan:__dam pa khyed kyi rjes su bdag sgrub phyir:__gsol ba 'debs so dpal dbyangs sna nam khri:__byin gyis rlobs shig o rgyan rin po che:__smin grol dbang bskur mchog thun dngos grub stsol:__rgyang ro gtsang gi sil ma brag phug tu:__ska ba dpal brtsegs grwa pa grum bu yis:__karma rtsal rdzogs lha tshogs zhal gzigs shing :__dus gsum kun mkhyen sprul pa cir yang ston:__dam pa khyed kyi rjes su bdag sgrub phyir:__gsol ba 'debs so dpal brtsegs grwa pa rje:__byin gyis rlobs shig o rgyan rin po che:__smin grol dbang bskur mchog thun dngos grub stsol:__yar klung sham+b+ho gangs kyi ra ba ru:__'brog mi dpal ye dpal gyi dbang po yis:__srid pa bde 'gro'i lha tshogs zhal gzigs shing :__ma mo bran 'khol ri brag zang thal mdzad:__dam pa khyed kyi rjes su bdag sgrub phyir:__gsol ba 'debs so dpal ye dpal gyi dbang :__byin gyis rlobs shig o rgyan rin po che:__smin grol dbang bskur mchog thun dngos grub stsol:__mon kha ne ring seng ge rdzong gsum du:__ye shes mtsho rgyal ye shes gsal le yis:__rdo rje gzhon nu'i lha tshogs zhal gzigs shing :__srid pa phur bus snang srid kun la btab:__dam pa khyed kyi rjes su bdag sgrub phyir:__gsol ba 'debs so mtsho rgyal ye shes gsal:__byin gyis rlobs shig o rgyan rin po che:__smin grol dbang bskur mchog thun dngos grub stsol:__spa gro stag tshang seng ge'i phug pa ru:__dpal gyi seng ge la byid ye shes brtsegs:__dregs pa kun 'dul lha tshogs zhal gzigs shing :__lha srin bka' nyan gzhan snang mngon tu gyur:__dam pa khyed kyi rjes su bdag sgrub phyir:__gsol ba 'debs so dpal seng ye shes brtsegs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__brag dmar g.ya' ma lung gi ke'u tshang du:__bai ro tsa na ldan ma rtse mang gis:__stobs ldan nag po'i lha tshogs zhal gzigs shing :__ye shes spyan ldan mi brjed gzungs dbang thob:__dam pa khyed kyi rjes su bdag sgrub phyir:__gsol ba 'debs so bai ro rtse mang zhabs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__yar 'brog mtsho gling sgrub gnas yon po dor:__rgyal sras mchog grub rgyal po ye shes mchog:__bka' 'dus zhi khro'i lha tshogs zhal gzigs shing :__sngon gnas rjes dran don gyi dgongs pa shar:__dam pa khyed kyi rjes su bdag sgrub phyir:__gsol ba 'debs so rgyal sras ye shes mchog:__byin gyis rlobs shig o rgyan rin po che:__smin grol dbang bskur mchog thun dngos grub stsol:__g.yo ru grwa yi yar rje lha khang du:__zab gter rgya mtsho'i bka' babs o rgyan gling :__rtsa gsum chos srung du ma'i zhal gzigs shing :__'brel tshad don ldan dngos grub mchog brnyes pa'i:__dam pa khyed kyi rjes su bdag sgrub phyir:__gsol ba 'debs so pad+ma'i gdung 'tshob mchog:__byin gyis rlobs shig o rgyan rin po che:__smin grol dbang bskur mchog thun dngos grub stsol:__nyi shu rtsa gcig sprul pa'i dkyil 'khor du:__bde gshegs yongs rdzogs 'dus pa chen po'i tshogs:__gang la gang 'dul sprul pa cir yang ston:__skal ldan rnams la rab 'byams dngos grub ster:__dam pa khyed kyi rjes su bdag sgrub phyir:__gsol ba 'debs so zhi khro bka' 'dus lha:__byin gyis rlobs shig o rgyan rin po che:__smin grol dbang bskur mchog thun dngos grub stsol:__rang byung gnas yul dur khrod chen po na:__dpa' bo mkha' 'gro chos skyong gter bdag rnams:__legs nyes stangs 'dzin tshar gcod rjes su 'dzin:__phrin las thogs med sgrub mchog gces par skyong :__dam pa khyed kyi rjes su bdag sgrub phyir:__gsol ba 'debs so mkha' 'gro chos skyong tshogs:__byin gyis rlobs shig o rgyan rin po che:__smin grol dbang bskur mchog thun dngos grub stsol:__!__lus la sku yi dbang mchog bskur du gsol:__ngag la gsung gi dbang mchog bskur du gsol:__yid la thugs kyi dbang mchog bskur du gsol:__dbyer med ye shes dbang mchog bskur du gsol:__lus snang lha skur 'char bar byin gyis rlobs:__sgra grags sngags su 'char bar byin gyis rlobs:__dran rtog thugs su 'char bar byin gyis rlobs:__dbyer med blo 'das rtogs par byin gyis rlobs:__mi mthun bar chad zhi bar byin gyis rlobs:__mthun rkyen legs tshogs rgyas par byin gyis rlobs:__snang sems dbang du 'du bar byin gyis rlobs:__dgra bgegs drag pos sgral bar byin gyis rlobs:__rnam smin rig 'dzin thob par byin gyis rlobs:__'chi med tshe la dbang bar byin gyis rlobs:__phyag rgya chen po 'grub par byin gyis rlobs:__lhun grub rig 'dzin rdzogs par byin gyis rlobs:__ngo bo chos skur dag par byin gyis rlobs:__rang bzhin longs skur shar bar byin gyis rlobs:__thugs rje sprul sku 'byung bar byin gyis rlobs:__sku gsum dbyer med 'grub par byin gyis rlobs:__oM AHhU~M badz+ra gu ru d+he ba d+hA ki nI kA ya wA ka tsit+ta sarba sid+d+hi pha la ho:__zhes bzlas gdung shugs drag pos gsol btab na:__ba spu gzings shing mos gus mchi ma 'khrugs:__blo sna 'gyur ba'i nges shes nam skyes tshe:__rig 'dzin bla ma rnams kyi byin rlabs zhugs:__yi dam zhi khros dngos grub nges par ster:__mkha' 'gro chos skyong bran bzhin bsgo ba nyan:__nor bu rin chen rgyal mtshan rtser mchod ltar:__mchog thun dngos grub char bzhin 'bebs par 'gyur:__'di la nan tan gyis shig phyi rab rnams:__mi bslu nges pa pad 'byung bka' yin no:__mtsho rgyal yi ger bris la gter du sbos:__ma 'ongs mtha' nas mtha' ru don chen byed:__ces gsungs so:__sa ma ya:__rgya rgya rgya:__grathatsab+h+ya nya:__sprul sku o rgyan gling pas gter nas gdan drangs pa'o//__//
