JKW-KABAB-01-KA-005-wylie
@#/__kun mkhyen bla ma 'jam dbyangs mkhyen brtse'i dbang po'i 'khrungs rabs rags bsdus kyi gsol 'debs ngo mtshar dpal skyed bzhugs so//na mo gu ra be/__/rgyal ba sras dang bcas pa'i ye shes mdzod/__/phyogs dus rdzogs sangs rgyas kun skyed pa'i yab/__/mkha' khyab 'gro ba 'dren mdzad thugs rje can/__/bcom ldan 'jam dpal dbyangs la gsol ba 'debs/__/mkhyen rab phul byung chos kun thugs su chud/__/a ti'i bstan bdag 'jam dpal bshes gnyen dang*/__/rdo rje'i sku brnyes 'gro don rtag tu bzhugs/__/bI ma mi tra'i zhabs la gsol ba 'debs/__/gangs ljongs chos kyi nyin byed 'dren pa yi/__/shing rta chen po 'jam mgon khri lde'i zhabs/__/'brel tshad don ldan bka' 'dus chos kyi bdag__/rgyal sras mchog grub rgyal por gsol ba 'debs/__/'od dpag med mgon dI paM ka ra yi/__/thugs sras mchog gyur nag tsho tshul khrims rgyal/__/spyan ras gzigs sprul gangs can bstan 'gro'i dpal/__/rgyal ba'i 'byung gnas zhabs la gsol ba 'debs/__/ngo mtshar gter 'byin rgya mtsho'i 'khor los sgyur/__/mnga' bdag nyang ral nyi ma 'od zer dang*/__/mi la'i thugs sras mkha' spyod sku dngos gshegs/__/ras chung rdo rje grags par gsol ba 'debs/__/byang phyogs rgyud du dge slong 'tsho byed ces/__/rgyal bas lung bstan mnyam med sgam po pa/__/bod yul rdo rje 'dzin kun gtsug gi rgyan/__/grags pa rgyal mtshan zhabs la gsol ba 'debs/__/chos rgyal gsung sprul gter kha bco brgyad bdag__/'gro 'dul gu ru chos kyi dbang phyug dang*/__/khams gsum skye dgu'i skyabs gcig chos kyi rgyal/__/blo gros rgyal mtshan zhabs la gsol ba 'debs/__/rtsol bral theg pa'i chos 'khor bla med bskor/__/kun tu bzang po dri med 'od zer dang*/__/bsam yas sgyu 'phrul drwa ba'i gter mdzod 'chang*/__/yar rje o rgyan gling par gsol ba 'debs/__/bka' gdams bstan pa'i mnga' bdag thams cad mkhyen/__/phrin las mkha' khyab dge 'dun grub pa dang*/__/ri khrod mgon pos rjes gzung mchog dngos grub/__/paN chen ba na rat+nar gsol ba 'debs/__/rgyud sde rgya mtsho'i 'byung gnas zha lu pa/__/mkhyen rtogs dbang phyug mkhyen rab chos kyi rje/__/gzhan phan cho 'phrul 'dzam gling khyab par ston/__/grub chen thang stong rgyal por gsol ba 'debs/__/gangs can slob bshad bstan 'dzin kun gyi phul/__/'jam dpal dbyangs dngos mkhyen brtse'i dbang phyug dang*/__/mtshan thos srid pa'i 'jigs skyob mkhas grub mchog__/pad+ma dbang gi rgyal por gsol ba 'debs/__/rig sngags 'chang ba mthu ldan dbang po'i sde/__/bkra shis stobs rgyal mkha' 'gro yongs grub rtsal/__/rtsod pa'i dus mthar gangs can skyob pa'i mgon/__/ngag dbang blo bzang rgya mtshor gsol ba 'debs/__/rgyal sras lha rje'i yang srid bcu gnyis pa/__/o rgyan gsung sprul gter chen chos rje gling*/__/mkhyen brtse nus ldan mkhan chen e waM pa/__/byams pa nam mkha' 'chi med la gsol ba 'debs/__/dgongs pa'i rtsal rdzogs a ti'i bstan pa yis/__/kun tu khyab mdzad 'jigs med gling pa dang*/__/bka' babs bdun ldan mtshungs bral 'khor lo'i mgon/__/'jam dbyangs mkhyen brtse'i dbang por gsol ba 'debs/__/mi phyed rtse gcig gus pas gsol btab mthus/__/skye ba kun tu dam pa mchog rnams kyis/__/rjes su bzung nas rlabs chen spyod pa yis/__/rang gzhan don gnyis mtha' ru phyin par shog__/mgon khyod mngon par rdzogs par 'tshang rgya ba'i/__/'khor gyi 'dus pa dang por skyes nas kyang*/__/chos sgo kun 'dzin bstan pa phyogs brgyar spel/__/nyid dang dbyer med mngon par byang chub shog__/gang gi bstan pa nyin mo'i 'od bzhin gsal/__/phrin las rgyun bzang srid mtha'i bar du bdal/__/'jig rten rgud pa ming yang mi grags shing*/__/dge legs rdzogs ldan gsar pas kun khyab shog__/ces pa'ang dpal ldan e waM pa'i bstan 'dzin chen po mnga' ris chos rje kun dga' 'jam dbyangs gyis gsung bskul rten bcas stsal gnang ngor*/__kun mkhyen bla ma rin po che'i rdo rje'i bka' slob blo gros mtha' yas pa'i sdes cho 'phrul zla ba'i dkar phyogs kyi tshes bzang por rdzong gsar bkra shis lha rtse'i chos grwa chen por bgyis pa dge legs 'phel//__//
