JKCL-KABUM-12-NA-080-wylie
sbas gnas chen po 'bras ljongs bde ba'i smon lam bde skyid rab 'phel zhes bya ba bzhugs so/__/na mo gu ru/__mchog gsum rtsa gsum sku gsum kun 'dus pa/__/ma lus 'gro ba'i skyabs mgon pad+ma 'byung /__/bi ma bai ro khri srong mtsho rgyal sogs/__/bka' gter rig 'dzin brgyud pa thams cad dang /__/yi dam zhi khro mkha' 'gro chos skyong dang /__/nor lha gter gyi bdag po la sogs pa/__/mkhyen brtse nus pa'i gter la dbang 'byor ba'i/__/skyabs kyi mchog gyur thams cad dgongs su gsol/__/'dzam gling spyi dang khyad par sbas pa'i yul/__/'bras mo ljongs zhes dpal ri pad+ma 'od/__/sa 'dir 'phos pa'i sgrub gnas byin can la/__/mi gtsang nyams grib gos pa sangs gyur cig__/rtsa gsum lha rnams gnas 'dir rtag bzhugs nas/__/snod bcud bkra shis rdo rje'i byin chen dbab/__/yul la dge bcu sde bzhi'i dpal yon rgyas/__/srid zhi'i phywa g.yang dngas bcud 'gugs par mdzod/__/chos ldan rgyal po'i chab srid mnga' thang rgyas/__/rigs brgyud 'phel zhing sku tshe yun du brtan/__/pha rol sdang dgra gnod byed gdon bgegs rnams/__/thal pa'i rdul bzhin brlag par mdzad du gsol/__/nges gsang snying po'i bstan pa rab rgyas shing /__/skye 'gro thams cad byams pa'i sems dang ldan/__/phan tshun pha ma lta bu'i 'du shes kyis/__/yang dag dge la spyod par mdzad du gsol/__/he ru ka dpal nam mkha' 'jigs med sogs/__/rnal 'byor mched bzhis ji ltar smon pa bzhin/__/gegs med 'grub cing gu ru pad+ma yi/__/thugs bskyed bden tshig bslu ba med par shog__/lha ma yin dang yid srubs 'gong po yi/__/rgyu lam bcad nas sbas yul rin chen gyi/__/bkra shis mdzod khang 'jigs med rdo rje'i gur/__/rtag brtan dge legs snang ba'i bkra shis shog__/ces pa'ang 'jam dbyangs chos kyi blo gros pas smon tshig tu me bya zla 3tshes la bla ma dam pa ngag dbang grags pa nas bskul ngor bris pa'o//___//
