JKCL-KABUM-12-NA-078-wylie
'bras ljongs su lha lcam sangs bde 'das skabs bris pa'i smon lam bzhugs so/__/na mo/__bla ma yi dam mkha' 'gro dang /__sangs rgyas chos dang dge 'dun tshogs/__/khyad par nye ba'i sras chen brgyad/__/thugs rje ldan rnams dgongs su gsol/__/'brel thob rnams kyis gtsor byas pa'i/__/nam mkha'i mtha' klas 'gro ba rnams/__/sdug bsngal kun dang bral ba dang /__/bde dang rtag tu mi 'bral shog__/bdag la dmigs nas gang dag gi__/bzang ngan 'brel pas bsdus pa kun/__/ngan 'gro'i 'jigs las rab grol te/__/bde 'gro'i rten bzang thob par shog__/lhag par dad mos drag po yi/__/gus pas skyabs su bsnyen pa rnams/__/mi mthun rkyen ngan kun zhi nas/__/tshe bsod ye shes rgyas par shog__/bdag gi ming tsam thos pa rnams/__/srid pa'i gdung ba kun zhi zhing /__/mtho ris rten bzang thob pa dang /__/mthar gyis byang chub la 'god shog__/sangs rgyas chos rnams yongs rdzogs shing /__/zag med bde bas 'byor pa dang /__/'phags pa'i nor gyis rab skyid de/__/sprul pas 'gro ba 'dren par shog__/tshe rabs kun tu theg chen gyi/__/rigs can du ni skye ba dang /__/yongs 'dzin bshes bzang dang 'phrad de/__/theg mchog chos la spyod par shog__/byang chub sgrub la bar chod kyi/__/'tshe ba kun dang bral ba dang /__/gnod pa kun gyis mi tshugs shing /__/phun sum tshogs pas 'byor par shog__/gzungs sprin ting 'dzin mngon shes sogs/__/dpag med yon tan dang ldan zhing /__/nyon mongs shes bya'i sprin tshogs kun/__/chos kyi dbyings su zhi bar shog__/stong nyid snying rje'i snying po can/__/byang chub sems mchog dang ldan zhing /__/nam mkha' ji srid gnas kyi bar/__/gzhan phan mtha' yas 'byung bar shog__/de ltar smon pa'i gnas mtha' dag__/gegs med 'grub pa rgyal ba dang /__/de sras tshogs kyis byin rlobs shing /__/chos nyid bden pa'i stobs 'bar shog__/ces pa'ang chos kyi blo gros pas so//___//
