JKCL-KABUM-12-NA-076-wylie
gter gyi bstan rgyas smon lam bkra shis lha yi rnga chen zhes bya ba bzhugs so/__/oM swasti/__rig 'dzin rtsa brgyud mkha' la sprin ltar dkrigs/__/yi dam lha tshogs zhi khro'i gar bsgyur zhing /__/mkha' 'gro chos skyongs rdul gyi grangs snyed rnams/__/thugs dam thugs rjes dgongs par mdzad du gsol/__/rtsa gsum kun 'dus o rgyan rdo rje 'chang /__/gang gi ye shes sgyu ma'i rnam par 'phrul/__/lha yi sras po mu tig btsad po yi/__/rnam rol byang chub rdo rje zhabs brtan gsol/__/ma hA gu ru'i thugs kyi gsang ba'i mdzod/__/DA ki 'bum gyi snying khrag dwangs ma'i bcud/__/thugs gter chen po bla med yang tig ces/__/sngon med ngo mtshar zab dang rgya che ba/__/yi dam bka' 'dus mkha' 'gro rgya mtsho dang /__/drag sngags dgongs pa 'dus pa la sogs pa/__/sred len med pa'i brda' yi ri mo las/__/'dzad med chos kyi gter mdzod chen po yis/__/dam ldan skal bzang slob tshogs smin cing grol/__/gdul bya mi dang mi min mtha' klas 'dul/__/nag phyogs lha min kla klo'i gdug rtsub zhi/__/rgya 'dre 'gongs po'i rgyu ba rab bcad de/__/bod khams mtha' dbus kun tu dge zhing shis/__/bstan 'dzin skyes rnams sku tshe brtan pa dang /__/chos skyong rgyal po'i mnga' thang rab tu rgyas/__/'jig rten kun tu bde dges 'byor par shog__/zab gter bstan pa mi nub yun du gnas/__/chos kyi byin rlabs gong nas gong du 'phel/__/'brel pa thob tshad shin tu bkra shis shing /__/rang gzhan don gnyis lhun gyis grub gyur cig__/bdud 'dul bde chen mkha' spyod gling pa yi/__/thugs gter chen po nor bu'i mdzod chen rnams/__/phyogs dus kun tu dar shing rgyas pa dang /__/bstan pa yun du gnas pa'i bkra shis shog__/ces sa pho byi ba'i lo rgyal gyi zla ba'i tshes bcu bzang por rig 'dzin bla ma nyid kyi phyag bris/__sku gsung thugs rten 'chi med tshe stobs bskyed pa'i bcud len ril bu sogs gnang 'byor byung zhing /__zab gter gyi dpe mjal ba na rab tu dwangs bas mtshams sbyar te/__'jam dbyangs mkhyen brtse'i sprul ming 'dzin pa 'jam dbyangs chos kyi blo gros kun dga' phrin las rgya mtshos smon tshig tu bris pa dge legs su gyur cig__/sarba dA mang+ga laM//___//
