JKCL-KABUM-11-DA-061-wylie
srid pa'i lha chen la bstod pa khams gsum 'gugs pa'i lcags kyu zhes bya ba/__bla ma thugs chen pad+ma rgyal po la phyag 'tshal lo/__/'jig rten che dgu kun gyi mnga' bdag che/__/srid pa'i mes po dbang phyug u ma yum/__/bde chen chags pa'i ros myos btsun mo bzhi/__/'khor tshogs bye ba 'bum sde'i tshogs la bstod/__/'dod pa'i khams na che btsan 'gran zla bral/__/srid pa gsum la dbang bsgyur dregs pa'i sde/__/lha dang lha min bdud srin gnod sbyin tshogs/__/bran du bkol ba'i rje bo chen por bstod/__/'dod pa'i rgyal po gzhan 'phrul dbang byed che/__/'dod pa'i yon tan kun la dgyes rol zhing /__/'dod don ma lus yid bzhin sgrub mdzad pa/__/'dod rgu'i dngos grub 'byung gter khyod la bstod/__/lha min g.yul bzlog lha yi sde dpon che/__/lha rnams kun gyi phyag bya'i 'os su gyur/__/lha la dbang bsgyur lha dmag skyob byed pa/__/lha chen ma hA de wi'i sku la bstod/__/tshangs pa'i gnas dang rgya mtsho chen po'i 'gram/__/gangs dkar ti se gnas yul dur khrod sogs/__/kun tu dga' ba nyams brgyas sgeg ba'i sku/__/zhi khro'i gar gyi rol par bsgyur la bstod/__/'jig rten tsam min 'jig rten 'das pa yi/__/'phags mchog pad+ma gar gyi dbang phyug dang /__/tha dad ma yin gnyis su snang ba tsam/__/dbang mdzad dbang gi dpa' bo chen por bstod/__/rab dmar rjes chags pad+ma'i lcags kyu gdengs/__/'od dmar rlung gi zhags pas srid gsum 'ching /__/mig 'phrul lta bur dgyes pa'i gar stabs bsgyur/__/dgra las rnam rgyal ling+ga bsgrengs la bstod/__/g.yas bskum g.yon brkyang 'dor stabs pad nyir 'gying /__/ral pa'i thor tshug zla ba tshes pas brgyan/__/lha rdzas gsar pa'i stod g.yogs cod pan dang /__/ut+pal dmar po'i rgyan gyis mdzes la bstod/__/yum chen chos dbyings stong pa'i rang gzugs ni/__/dka' bzlog chen mo gsang ba'i DA ki bzhi/__/dbang mdzad chen mor dgyes par sbyor mdzad ma/__/'khor 'das thams cad skyed sdud ma la bstod/__/res 'ga' lha chen drag por ston pa'i tshe/__/rab khros zhing skyong gdong bzhi mgon por sprul/__/dregs byed 'khor gyi dbus na 'gying zhing brjid/__/rgyal ba'i bstan srung chen por bstod bar bgyi/__/snang srid rnam dag mchod pa'i rdzas chen po/__/khyod kyi dbang po drug la dgyes dgur stob/__/'gal 'khrul nyams chags nyes byas thams cad bshags/__/thugs dam bskang ngo mchog thun dngos grub stsol/__/rgyal ba'i bstan dang bstan 'dzin dar zhing rgyas/__/'jig rten yang dag lta spyod dang 'gal ba'i/__/bstan dang 'gro ba'i bde skyid bcom pa rnams/__/rtsa sbur me dang 'phrad bzhin gzhom par mdzod/__/bdag cag skye dang tshe rabs thams cad du/__/rgyal ba'i bstan pa spel ba'i mthu dang nus/__/yongs su rdzogs te bstan 'gror bde skyid kyi/__/sgo 'phang myur du 'byed pa'i phrin las mdzod/__/khams gsum brtan g.yo thams cad rang sems kyi/__/rol rtsal shar ba'i snang bar nges rnyed pas/__/rang rig bde chen klong du 'ub chub cing /__/lha chen po dang dbyer med 'grub par shog__/ces pa'ang 'jam dbyangs dga' ba'i go chas rgya gar rdo rje gling du sa khyi lo'i zla drug tshes nyer dgu rgyal dang phur bu'i 'grub sbyor bzang por bris pa rgyal bstan rin po che yun du gnas pa'i rgyur gyur cig__/sarba dA mang+ga laM/__zhal dro'o//__//
